ᤀᤧᤈᤪᤠ 3 - LIFOTNT

ᤗᤧᤳᤋᤡ ᤋᤥ᤺ᤶᤔᤠ ᤋᤧᤴ ᤕᤠᤶᤔᤥ ᤔᤧᤈᤥᤃᤢ

¹ ᤏᤢᤛᤡ ᤗᤠ ᤌᤠᤖᤡᤰ ᤀᤡᤛᤪᤠᤀᤡᤗᤡᤜᤠ᤹ ᤀᤠᤒᤠᤅᤣ ᤂᤢᤴᤇᤡ᤹ ᤕᤧᤰᤕᤰᤜᤠ᤹ᤀᤥ ᤔᤧᤕᤢᤅᤧ ᤔᤧᤃᤖᤧ॥ ᤂᤧᤴ ᤀᤣᤃᤠᤱ ᤂᤧᤱᤜᤠ᤹ ᤁᤧᤖᤧᤰ ᤕᤖᤢᤛᤗᤧ᤺ᤶᤔᤥ ᤌᤡᤰᤜᤢᤵ ᤔᤧᤒᤥ᤺ᤰᤂᤧᤀᤠᤱ ᤔᤧᤈᤢᤵᤛᤧ॥

² ᤂᤧᤒᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ ᤔᤥᤛᤠ᤺ᤸᤗᤧ ᤐᤡᤖᤢᤛᤡᤒᤠ ᤛᤠᤶᤕᤥᤌᤡᤶ ᤀᤡᤱᤈᤠᤱᤅᤥ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤀᤡᤱᤈᤠᤱ ᤁᤢᤀᤡᤛᤡᤰ ᤂᤧᤱᤜᤠ᤹ᤖᤧ ᤂᤧᤵᤔᤥ ᤂᤢᤴᤇᤡ᤹ ᤗᤧᤳᤋᤡᤜᤠ᤹ ᤋᤥ᤺ᤶᤔᤠᤖᤧ ᤗᤠᤃᤡ ᤕᤥᤛᤠᤍᤠᤁᤧᤸᤗᤧ ᤁᤢᤛ᤻ᤛᤠ ᤕᤣᤛᤢᤀᤠᤴ. ᤂᤢᤏᤧ᤹ ᤁᤢᤴᤍᤣᤱ ᤁᤢᤴᤈᤢᤶ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹. ᤛᤠᤗᤋᤡᤀᤣᤗᤖᤧ ᤁᤢᤛ᤻ᤛᤠ ᤕᤖᤢᤒᤠᤒᤣᤗ ᤏᤢ ᤂᤢᤏᤧ᤹ ᤁᤢᤃᤠ᤹ᤀᤡᤜᤠ᤹ᤖᤧ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤥ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤔᤧᤈᤥᤃᤢ॥

³ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠᤗᤠᤶ ᤁᤧᤏᤢ᤺ᤱᤒᤠ ᤁᤧᤓᤧᤶᤒᤠ ᤔᤏᤠᤜᤠ᤹ ᤗᤠᤈᤣ᤹ᤀᤥ ᤁᤧᤕᤢᤱᤒᤠ ᤁᤧᤕᤠ᤺ᤰᤐᤠ ᤔᤏᤠᤜᤠ᤹ᤏᤢ ᤔᤧᤃᤡᤛᤧᤛᤠᤱ ᤂᤧᤱᤜᤠ᤹ᤖᤧ ᤋᤃᤡᤒᤠ ᤋᤧᤴᤏᤥᤀᤣ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤔᤧᤈᤥᤃᤢ॥ ᤂᤧᤴ ᤀᤣᤃᤠᤱ ᤕᤠᤶᤔᤥ ᤂᤧᤱᤜᤠ᤹ᤖᤧ ᤌᤡᤰᤕᤠ᤺ᤴᤎᤰ ᤂᤧᤵᤔᤥ ᤋᤠᤏᤠᤶ ᤏᤢ ᤕᤢ᤺ᤴᤇᤡᤰᤐᤠ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤋᤥ᤺ᤶᤔᤠ ᤔᤧᤜᤣ᤺ᤰᤋᤢ॥

⁴ ᤂᤧᤴ ᤀᤣᤃᤠᤱ ᤂᤧᤱᤜᤠ᤹ᤖᤧ ᤛᤠᤶᤕᤥᤌᤡᤶᤔᤥ ᤛᤠᤵᤋᤧᤀᤠᤱ ᤁᤧᤒᤵᤐᤠ ᤁᤢᤀᤡᤛᤡᤰ ᤕᤠᤰᤛᤠ ᤕᤠ᤺ᤰᤔᤠ ᤛᤠ᤺ᤱᤃᤠᤜᤡᤶ ᤋᤱᤏᤠᤶ ᤔᤧᤍᤥᤛᤢ॥ ᤌᤡᤰᤕᤠ᤺ᤴᤎᤰ ᤂᤧᤴ ᤕᤧᤴᤏᤥ ᤋᤥ᤺ᤶᤔᤠ ᤁᤧᤒᤥᤱᤒᤠ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤜᤠ᤹ ᤔᤧᤍᤥᤴᤍᤢ॥

⁵ ᤂᤧᤴᤏᤢ᤺ᤸᤗᤧ ᤘᤣ᤹ ᤌᤡᤰᤕᤠ᤺ᤴᤎᤰ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ. ᤗᤠᤍᤢᤵᤐᤠ ᤕᤧᤴᤏᤥ ᤋᤥ᤺ᤶᤔᤏᤠᤒᤠ ᤛᤡᤍᤢᤱᤈᤓᤠ ᤏᤢ ᤕᤜᤘᤣ ᤍᤠᤱᤒᤠᤸᤗᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡᤰ ᤁᤧᤖᤧᤰ ᤛᤣᤛᤣ ᤋᤱᤏᤠᤶᤜᤠ᤹ᤀᤥᤒᤠ ᤛᤡᤍᤢᤱᤈᤓᤠ ᤔᤧᤍᤥᤴᤍᤢ॥ ᤂᤧᤴᤏᤢ ᤛᤥᤛᤥᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤀᤠᤒᤠᤅᤣ ᤂᤢᤴᤇᤡ᤹ ᤏᤡᤱᤘᤠ᤺ᤸᤗᤧ ᤜᤢᤰᤘᤠ ᤕᤠᤱᤜᤠ᤹ᤀᤠᤱ ᤂᤧᤱᤜᤠ᤹ᤖᤧ ᤔᤧᤍᤥᤴᤍᤢ॥

⁶ ᤔᤏᤠᤜᤠ᤹ᤖᤧ ᤂᤧᤴ ᤕᤧᤶᤔᤥ ᤌᤠᤖᤡᤰ ᤔᤠᤱᤜᤡᤶᤔᤡᤴ ᤆᤥ᤺ᤰᤔᤠ ᤔᤧᤴᤜᤣ᤺ᤰᤁᤣ ᤘᤕᤧᤛᤠᤱ ᤂᤧᤱᤜᤠ᤹ᤖᤧ ᤏᤢᤛᤡ ᤗᤠᤀᤥᤒᤠ ᤌᤡᤰᤛᤡᤃᤣᤰᤐᤠ ᤕᤧᤴᤏᤥ ᤕᤜᤘᤣ ᤍᤠᤱᤒᤠᤀᤥ ᤛᤡᤍᤢᤱᤈᤓᤠᤜᤠ᤹ ᤋᤥ᤺ᤶᤔᤠ ᤔᤧᤜᤣ᤺ᤰᤋᤢᤖᤥ॥

ᤔᤠᤱᤜᤡᤶᤔᤡᤴ ᤕᤠᤶᤔᤥ ᤔᤧᤈᤥᤃᤢ

⁷ ᤗᤢᤱ ᤏᤢ ᤛᤡᤱ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤏᤠᤶᤕᤠᤰ ᤐᤡᤔᤠᤛᤡ ᤑᤠ᤹ᤀᤠᤱ ᤔᤏᤠᤜᤠ᤹ᤖᤧ ᤕᤠᤱ ᤔᤧᤒᤡᤖᤢᤛᤡ ᤜᤧᤰᤁᤩᤠᤱ ᤗᤧᤒᤏᤠᤏᤗᤠᤶ ᤔᤧᤕᤢᤖᤢᤒᤠ ᤛᤠᤶᤔᤠᤱᤛᤡᤱᤜᤠ᤹ᤖᤧ ᤁᤢᤗᤧᤰᤘᤠᤀᤥ ᤋᤢᤖᤥᤛ ᤏᤢ ᤛᤡᤍᤥᤏᤀᤥ ᤜᤠᤱᤔᤠ ᤁᤧᤒᤥᤱᤒᤠ ᤁᤢᤈᤠ ᤏᤢ ᤆᤤᤋᤢᤏ ᤏᤡ᤺ᤱᤃᤣ᤹ᤀᤠᤱ ᤔᤧᤒᤡᤖᤢᤛᤡ॥ ᤛᤠᤶᤔᤠᤱᤛᤡᤱᤜᤠ᤹ ᤘᤖ᤺ᤱᤅᤥᤗᤠᤶ ᤕᤥᤵᤐᤠ ᤌᤠᤖᤡᤰ ᤔᤧᤍᤠᤖᤢ॥ ᤁᤴ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤑᤠᤖᤛ ᤗᤠᤈᤣ᤹ᤒᤠ ᤐᤕᤶ ᤜᤠᤱ ᤁᤥᤖᤣᤛᤧᤸᤗᤧ ᤆᤥ᤺ᤰᤔᤠ ᤑᤠ᤺ᤰᤋᤢᤛᤡᤀᤠᤱ ᤘᤕᤧ॥

⁸ ᤔᤠᤱᤜᤡᤶ ᤔᤧᤈᤥᤃᤢᤒᤠᤍᤧᤴ ᤕᤖᤢᤛᤗᤧ᤺ᤶᤔᤥ ᤂᤧᤱᤜᤠ᤹ ᤔᤧᤃᤧᤖᤧ ᤔᤧᤍᤩᤧᤒᤠ ᤏᤡᤛᤡᤃᤣᤰᤐᤠ ᤋᤱᤒᤣᤀᤥᤒᤠ ᤏᤡᤛᤡᤃᤣᤰᤐᤠ ᤗᤠᤀᤥ ᤂᤧᤱᤜᤠ᤹ᤖᤧ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤜᤣ᤺ᤰᤋᤢ॥ ᤕᤖᤢᤒᤠᤒᤣᤗ. ᤕᤣᤛᤢᤀᤠ ᤏᤢ ᤂᤧᤱᤜᤠ᤹ᤖᤧ ᤁᤧᤖᤧᤰ ᤀᤠᤒᤠᤅᤣ ᤂᤢᤴᤇᤡ᤹ ᤗᤠᤈᤣ᤹ᤒᤠ ᤋᤣ᤺ᤱᤈᤢᤶᤜᤠ᤹. ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤜᤧᤰᤁᤩᤠᤱ ᤗᤧᤒᤡᤜᤠ᤹ ᤏᤢ ᤛᤧᤰᤂᤠ᤺ᤸᤗᤧ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠᤗᤠᤶ ᤕᤖᤢᤛᤗᤧ᤺ᤶᤔᤥ ᤁᤧᤏᤢ᤺ᤱᤒᤠ ᤁᤧᤍᤠᤒᤠ ᤁᤧᤖᤧᤰ ᤔᤏᤠᤜᤠ᤹ ᤂᤧᤴ ᤕᤠ᤺ᤶᤒᤰᤁᤥ ᤔᤧᤓᤴᤇᤡᤱ॥ ᤏᤡᤒᤥᤱ ᤋᤱᤒᤣ ᤀᤡᤃᤪ ᤂᤧᤴᤏᤢ᤺ᤸᤗᤧ ᤕᤖᤡᤰ ᤋᤱᤒᤣ ᤁᤧᤃᤧᤵᤐᤠ ᤁᤧᤖᤧᤰ ᤗᤧᤒᤡᤜᤠ᤹ ᤔᤠᤱᤜᤡᤶᤔᤡᤴ ᤕᤠᤶᤔᤥ ᤆᤥ᤺ᤰᤔᤠ ᤕᤠ᤺ᤶᤒᤰᤁᤥ ᤗᤰᤐᤧᤴᤛᤠᤒᤠ ᤐᤥᤱᤔᤠᤖᤧ ᤗᤠᤃᤡ ᤔᤢᤖᤠ ᤔᤧᤔᤧᤳᤋᤢᤛᤡ॥

⁹ ᤗᤧᤒᤡ ᤕᤣᤛᤢᤀᤠᤴ ᤏᤢ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹. ᤁᤢᤃᤠ᤹ᤀᤡᤜᤠ᤹. ᤁᤠᤍᤔᤡᤀᤣᤗ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ᤖᤧ (ᤜᤥᤍᤒᤡᤕᤠ᤺ᤸᤗᤧ ᤁᤢᤜᤡᤶᤛᤕᤱ) ᤜᤧᤰᤁᤩᤠᤱ ᤜᤣᤏᤠᤍᤠᤍᤖᤧ ᤁᤢᤛ᤻ᤛᤠᤜᤠ᤹॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤜᤠ᤹ ᤏᤢ ᤑᤢ᤹ᤏᤢᤛᤠ᤹ᤜᤠ᤹ᤖᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤜᤡᤶ ᤆᤥ᤺ᤰᤔᤠ ᤕᤠ᤺ᤶᤒᤰᤁᤡᤴ ᤀᤥᤔᤧᤵᤔᤠ ᤔᤧᤓᤠ᤹ᤖᤢᤛᤡ—ᤂᤧᤱᤜᤠ᤹ ᤁᤧᤖᤧᤰ ᤗᤧᤒᤡ ᤔᤧᤘᤕᤧ॥

¹⁰ ᤔᤏᤠᤜᤠ᤹ᤖᤧ ᤔᤠᤱᤜᤡᤶᤔᤡᤶᤗᤧ ᤁᤢᤒᤢᤱ ᤕᤢᤱᤔᤠ ᤔᤧᤜᤣ᤺ᤰᤋᤢᤀᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤆᤠᤱ ᤔᤧᤈᤠᤰᤛᤡᤱ ᤜᤧᤰᤁᤩᤠᤱ ᤜᤢᤰᤁᤥ ᤌᤢᤳᤋᤢᤖᤡ᤺ᤵᤐᤠ ᤔᤧᤕᤠᤱᤛᤡᤱᤅᤠᤱ ᤂᤢᤴᤇᤡ᤹ ᤀᤠᤒᤠᤅᤣ ᤋᤧᤴᤏᤥ ᤔᤧᤕᤧᤶᤛᤡᤱ॥ ᤀᤠᤛᤠᤐ ᤛᤕᤱᤒᤠ ᤗᤧᤒᤡᤜᤠ᤹ ᤂᤡᤳᤇᤡᤱ ᤂᤡᤳᤇᤡᤱ ᤁᤧᤗ᤹ᤒᤠ ᤋᤠᤜᤡᤵᤐᤡᤴ ᤔᤧᤕᤠᤱᤛᤡᤱᤅᤠᤱ ᤔᤧᤕᤧᤶᤛᤡᤱ॥ ᤍᤠᤀᤢᤍ ᤜᤠᤱᤅᤡᤸᤗᤧ ᤀᤡᤱᤈᤠᤱ ᤆᤥᤃᤢᤒᤠ ᤌᤡᤶ ᤁᤢᤀᤡᤛᤡᤰ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤏᤠᤖᤠ ᤔᤧᤓᤥᤛᤢᤖᤥ॥

¹¹ ᤂᤧᤱᤜᤠ᤹ᤖᤧ ᤕᤜᤘᤣ ᤍᤠᤱᤒᤠᤴ ᤏᤥᤃᤧᤴ ᤔᤧᤒᤡᤖᤢ ᤜᤧᤰᤁᤩᤠᤱ ᤛᤧᤘᤠᤛᤠᤶᤗᤥᤴ ᤛᤠᤶᤔᤧᤔᤧᤳᤋᤢᤖ ᤀᤰᤂᤣᤗ᤹ᤖᤡᤰ ᤏᤡᤗᤧᤱ ᤛᤠᤶᤔᤧᤗᤥᤖᤧᤖᤥ— “ᤕᤜᤘᤣ ᤍᤠᤱᤒᤠᤴ ᤁᤧᤏᤢ᤹ᤒᤠ ᤆᤥᤰᤗᤥ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤧᤴ ᤂᤢᤏᤧ᤹ ᤛᤍᤠᤍᤡᤱ ᤗᤢᤱᤔᤠ᤹ ᤋᤢᤰᤋᤢᤖᤥ॥” ᤁᤧᤖᤧᤰ ᤔᤏᤠᤜᤠ᤹ ᤕᤶᤒᤠ ᤀᤡᤰᤗᤠᤀᤥ ᤔᤧᤀ᤺ᤰᤋᤧ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤁᤢᤏᤠᤖᤠ ᤔᤧᤓᤥᤛᤢ ᤌᤣᤀᤠᤱᤓᤧᤸᤗᤧ ᤔᤠᤱᤜᤡᤶᤔᤡᤸᤗᤧ ᤁᤢᤒᤢᤱ ᤕᤢᤱᤔᤠ ᤕᤠ᤺ᤶᤒᤰᤁᤡᤴ ᤔᤧᤜᤣ᤺ᤰᤋᤢᤀᤠᤱ ᤘᤕᤧ॥

¹² ᤕᤖᤡᤰ ᤁᤠᤵᤐᤥᤒᤠ ᤏᤡᤱᤘᤠ᤹ᤑᤢᤛᤠᤶᤒᤠ. ᤗᤧᤒᤡ ᤏᤢ ᤘᤣ᤹ ᤜᤡᤶᤛᤕᤱᤒᤠ ᤋᤢᤶᤓᤠᤰᤐᤠᤜᤠ᤹ᤖᤧ ᤋᤃᤡᤒᤠ ᤔᤠᤱᤜᤡᤶᤔᤡᤴ ᤔᤧᤏᤡᤛᤢᤀᤠᤱ ᤘᤕᤧ॥ ᤁᤴ ᤔᤠᤱᤜᤡᤶᤔᤡᤸᤗᤧ ᤁᤢᤒᤢᤱ ᤕᤢᤱᤛᤡᤱᤒᤠ ᤔᤧᤏᤡᤛᤢᤀᤠᤱ ᤂᤧᤱᤜᤠ᤹ ᤜᤠ᤺ᤵᤔᤠ ᤔᤧᤜᤣ᤺ᤰᤋᤧ॥ ᤁᤖ ᤂᤧᤵᤔᤥ ᤁᤧᤘᤠ᤹ᤒᤠ ᤘᤣ᤹ ᤔᤏᤠᤜᤠ᤹ᤃ ᤂᤢᤴᤇᤡ᤹ ᤏᤡᤱᤘᤠ᤹ ᤋᤩᤧᤀᤠᤱ ᤐᤛ᤺ᤳ ᤔᤧᤛ᤺ᤳᤋᤧ॥

¹³ ᤔᤏᤠᤜᤠ᤹ ᤔᤧᤛ᤺ᤳᤋᤧᤀᤠᤱ ᤔᤧᤀ᤺ᤰᤋᤧᤒᤠ ᤏᤢ ᤔᤧᤜᤠᤒᤧᤒᤠ ᤀᤡᤰᤗᤠᤜᤠ᤹ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤀᤣ᤹ᤀᤣ ᤂᤧᤶᤔᤠ ᤔᤧᤴᤇᤢᤰᤋᤢᤴ ᤌᤣᤀᤠᤱᤓᤧᤸᤗᤧ ᤂᤧᤴ ᤀᤡᤰᤗᤠ᤺ᤸᤗᤧ ᤗᤥ᤺ᤰᤂᤢᤀᤠᤱ ᤔᤠ᤺ᤱᤄᤠ ᤔᤠ᤺ᤱᤄᤠ ᤌᤠᤖᤡᤰᤁᤠᤱ ᤂᤧᤶᤍᤧᤳᤋᤧᤖᤥ॥