ᤀᤧᤈᤪᤠ 10 - LIFOTNTᤔᤏᤠᤜᤠ᤹ᤖᤧ ᤂᤢᤴᤇᤡ ᤗᤠᤕᤥᤗᤠᤶ ᤔᤧᤜᤡᤴ 1 ᤀᤧᤈᤪᤠᤴ ᤔᤠᤱᤜᤡᤶᤔᤡᤸᤗᤧ ᤁᤢᤍᤃᤡ ᤁᤢᤎᤧᤃᤣ᤺ᤰᤁᤡᤴ ᤋᤷᤄᤢ᤹ ᤔᤧᤳᤋᤢᤀᤠᤱ ᤐᤣᤗᤡᤃᤧᤴ ᤋᤢᤘᤠ ᤆᤥ᤺ᤰᤏᤢ. ᤜᤠᤒᤧᤖ ᤂᤧᤱᤜᤠ᤹ᤖᤧ ᤗᤠᤕᤥ ᤔᤧᤈᤥᤃᤢᤒᤠᤀᤣ ᤑᤠ᤹ᤀᤠᤱ ᤐᤠ᤺ᤳᤋᤢᤖ ᤕᤢᤅᤧ॥ ᤀᤡᤛᤪᤠᤀᤡᤗᤒᤠ ᤕᤧᤶᤒᤡᤳᤇᤠ. ᤔᤧᤴᤇᤢᤔᤠ ᤏᤢ ᤜᤡᤴᤈᤠ᤹ᤒᤡᤳᤇᤠ᤹ᤜᤠ᤹ᤖᤧᤴ ᤗᤳᤇᤠ ᤕᤶᤒᤠ ᤔᤏᤠᤗᤢᤵ ᤌᤡᤰ ᤂᤢᤏᤧ᤹ ᤁᤢᤄᤡᤖᤡ ᤔᤧᤈᤢᤵᤛᤧ॥ ᤔᤏᤠ ᤗᤢᤵᤐᤥᤒᤠ ᤔᤏᤠᤜᤠ᤹ᤀᤠᤱ ᤂᤢᤴᤇᤡ᤹ ᤏᤡᤱᤘᤠ᤹ ᤗᤥᤖᤧᤖ ᤔᤧᤜᤠᤒᤧᤖ ᤔᤧᤕᤧᤒᤧ॥ 2 ᤂᤧᤴ ᤀᤣᤃᤠᤱ ᤀᤣᤗᤠᤔ ᤛᤕᤱᤛᤔᤠ ᤕᤜᤡᤀᤣᤗᤖᤧ ᤁᤢᤛ᤻ᤛᤠ ᤛᤁᤏᤩᤠᤜ᤺ᤸᤗᤧ ᤀᤧᤈᤪᤠᤴ ᤔᤧᤳᤋᤢ. “ᤘᤣ᤹ ᤛᤢᤘᤠᤱᤛᤔᤠ ᤔᤧᤴᤇᤢᤔᤠᤜᤠ᤹ ᤀᤠᤏᤡᤃᤣ ᤋᤧᤴᤎᤠᤶ ᤔᤣ᤺ᤰᤂᤡᤶ ᤀᤠᤔᤧᤳᤋᤢᤶᤛᤡᤶᤔᤠᤱ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤥᤒᤠ ᤏᤛᤠ᤺ᤴᤏᤡᤴ ᤀᤠᤗᤧᤰᤂᤢᤶ. ᤁᤖ ᤀᤠᤖ ᤌᤠᤖᤡᤰᤛᤠᤱ ᤀᤡᤛᤪᤠᤀᤡᤗᤖᤧ ᤁᤢᤗᤠᤃᤡ ᤗᤠᤶᤀᤥᤔᤧᤵᤔᤠ ᤏᤡᤱᤛᤠᤱ ᤘᤠ᤹॥ 3 ᤁᤴ ᤔᤧᤴᤇᤢᤔᤠᤜᤠ᤹ ᤏᤢ ᤀᤅᤧ᤺ᤰᤘᤠᤜᤠ᤹ ᤀᤠᤏᤡ᤹ᤃᤣ ᤔᤠ᤺ᤱᤄᤠᤀᤣ ᤐᤠᤱᤄᤢᤶ ᤋᤣᤛᤢᤶᤛᤡᤶᤒᤧ ᤑᤠ᤹ᤀᤠᤱ ᤀᤠᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤁᤧᤛᤠᤰᤐᤠ ᤔᤠᤱᤜᤧᤰ ᤆᤥ᤺ᤰᤔᤠ ᤐᤥᤱ᤹॥ ᤂᤧᤏᤧ᤹ ᤏᤢ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤱᤈᤠᤱ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠ ᤔᤏᤠᤜᤠ᤹ᤖᤧ ᤀᤠᤏᤡ᤹ ᤌᤧᤔᤠ ᤛᤢᤈᤠ ᤔᤧᤒᤡᤖᤡᤃᤧ. ᤜᤠᤒᤠ ᤂᤧᤴᤏᤣ ᤀᤠᤏᤡᤃᤣ ᤆᤥᤃᤢᤶᤒᤧ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤸᤗᤧ ᤌᤣ ᤐᤠ᤺ᤳᤋᤢ᤹. ᤜᤠᤒᤠ ᤂᤧᤴᤏᤣ ᤀᤠᤏᤡᤃᤣ ᤆᤥᤃᤢᤶᤒᤧ॥ 4 ᤀᤠᤸᤗ ᤆᤥ᤺ᤰᤔᤠ ᤁᤧᤒᤥᤱᤒᤠ ᤕᤠ᤺ᤶᤒᤰᤁᤡᤸᤗᤧ ᤗᤰᤐᤧᤴᤛᤠᤒᤠᤃ ᤂᤧᤏᤧ᤹ ᤁᤧᤘᤠ᤹॥ ᤀᤠᤏᤡᤃᤣ ᤂᤧᤏᤧ᤹ ᤋᤡᤶᤔᤠᤛᤡᤃᤧ ᤜᤧᤰᤁᤩᤠᤱ ᤋᤃᤡ ᤐᤥᤖᤧᤖ ᤕᤠ᤺ᤶᤒᤰᤁᤡᤴ ᤁᤧᤖᤧᤰ ᤛᤢᤖᤧ᤹ᤀᤥ॥” 5 ᤀᤧᤈᤪᤠ᤺ᤸᤗᤧ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹. ᤗᤧᤒᤡᤜᤠ᤹ ᤏᤢ ᤘᤣ᤹ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤗᤥᤒᤠᤜᤠ᤹ ᤛᤁᤏᤩᤠᤜ᤺ᤸᤗᤧ ᤐᤠ᤺ᤳᤋᤢᤒᤠ ᤜᤧᤰᤁᤣ ᤕᤠ᤺ᤶᤒᤰ ᤆᤥᤃᤢᤶᤒᤧ ᤑᤠ᤹ᤀᤠᤱ ᤔᤠᤱᤜᤧᤰ ᤆᤥ᤺ᤰᤔᤠ ᤐᤠᤱᤄᤢᤛᤡ॥ 6 ᤜᤧᤰᤁᤩᤠᤱ ᤂᤧᤴ ᤔᤠᤱᤜᤡᤶᤔᤡᤸᤗᤧ ᤁᤢᤍᤃᤡᤗᤠᤶ ᤀᤣᤗᤩᤠᤛᤡᤒᤖᤧ ᤁᤢᤛ᤻ᤛᤠ ᤕᤜᤥᤜᤠᤏᤠᤏᤖᤧ ᤁᤢᤕᤠᤰᤑᤠᤱᤅᤥ ᤐᤣ ᤜᤧᤰᤁᤩᤠᤱ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠᤗᤠᤶ ᤁᤧᤏᤢ᤺ᤱᤒᤠ ᤁᤧᤓᤧᤶᤒᤠ ᤔᤏᤠᤜᤠ᤹ ᤏᤛᤠ᤺ᤴᤛᤠᤒᤠ ᤔᤧᤜᤥᤵᤋᤧᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤔᤧᤖᤡᤱ ᤌᤰᤏᤢ ᤛᤧᤴᤍᤡᤰ ᤏᤠᤶᤍᤠ᤺ᤳᤋᤠᤳ ᤕᤢᤅᤧᤀᤠᤱ ᤂᤠᤀᤥ᤺ᤴᤍᤢ॥ ᤂᤢᤏᤧ᤹ ᤌᤣᤀᤠᤱ ᤔᤧᤈᤏᤧᤴ ᤔᤧᤎᤢᤅᤢᤴ॥ 7 ᤂᤧᤴ ᤀᤣᤃᤠᤱ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠᤗᤠᤶ ᤁᤧᤏᤢ᤺ᤱᤒᤠ ᤁᤧᤓᤧᤶᤒᤠᤜᤠ᤹ ᤁᤧᤖᤧᤰ ᤕᤖᤢᤛᤗᤧ᤺ᤶᤔᤥ ᤆᤢᤶᤔᤠᤖᤧ ᤗᤠᤃᤡ ᤁᤠᤰ ᤕᤖᤢᤛᤗᤧᤔ ᤏᤢ ᤕᤜᤢᤍᤠᤀᤥ ᤀᤡᤱᤄᤱ ᤔᤧᤜᤠᤰᤋᤢᤛᤡ॥ 8 ᤁᤴ ᤀᤡᤱᤈᤠᤱᤅᤡᤴ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤗᤠᤶᤗᤥᤒᤠᤜᤠ᤹ᤖᤧ ᤔᤧᤒᤡᤖᤢᤛᤡᤀᤠᤱ ᤘᤕᤧ॥ ᤛᤢᤶᤕᤠᤴᤗᤧ ᤀᤠᤳᤋᤡᤴ ᤔᤧᤃᤧᤳᤏᤧᤴ ᤔᤧᤍᤠᤏᤧᤴ. ᤂᤧᤸᤗᤧ ᤁᤧᤖᤧᤰ ᤁᤢᤕᤠᤱᤛᤠᤁᤢᤴᤎᤣᤜᤠ᤹ ᤛᤠᤰᤁᤧᤸᤗᤧᤰ ᤏᤠ᤺ᤵᤔᤠ ᤐᤥᤱ᤹ ᤜᤧᤰᤁᤩᤠᤱ ᤂᤧᤸᤗᤧ ᤛᤱᤈᤢᤶᤓᤥᤀᤥ ᤐᤠᤛᤡᤱᤐᤠᤍᤠᤱᤗᤠ ᤐᤥᤱᤔᤠ ᤕᤢᤰᤁᤡᤴ ᤔᤠᤛᤢ ᤁᤧᤗ᤹ᤒᤠᤀᤠᤱ ᤀᤡᤱᤈᤠᤱ ᤘᤕᤧ॥ 9 ᤛᤢᤶᤕᤠᤴᤗᤧᤛᤠ ᤑᤠᤱᤛᤡ ᤗᤠ ᤁᤧᤖᤧᤒᤠ ᤏᤡᤒᤥᤱ ᤕᤧᤴᤏᤥ ᤕᤜᤢᤍᤠ ᤏᤢ ᤒᤣᤏᤩᤠᤔᤡᤏ ᤁᤧᤖᤧᤰ ᤕᤧᤶᤒᤡᤳᤇᤠᤜᤠ᤹ ᤕᤖᤢᤛᤗᤧ᤺ᤶᤔᤥ ᤔᤧᤍᤩᤧᤀᤠᤱ ᤔᤠᤱᤜᤡᤶ ᤗᤰᤂᤢᤶᤔᤥ ᤔᤧᤈᤢᤵᤛᤧ॥ ᤕᤶᤒᤠ ᤘᤜᤡᤳ ᤌᤩᤧᤖ ᤐᤳᤇᤧ ᤜᤧᤰᤁᤩᤠᤱ ᤘᤜᤡᤳᤋᤡᤴ ᤏᤢ ᤆᤢᤶᤗᤢᤱ ᤆᤢᤶᤔᤠᤀᤣ ᤁᤧᤒᤥᤱᤒᤠ ᤐᤠ᤺ᤴᤏᤡᤸᤗᤧ ᤆᤥᤃᤢᤸᤗᤧ ᤁᤧᤖᤧᤰ ᤔᤏᤠᤜᤠ᤹ ᤔᤧᤕᤰᤂᤧᤖ ᤔᤧᤕᤢᤅᤧ॥ 10 ᤏᤡᤱᤘᤠ᤹ᤑᤢᤛᤠᤶᤒᤠ ᤀᤧᤈᤪᤠᤴ ᤐᤥᤃᤧᤀᤠᤱ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ ᤏᤛᤠᤴ ᤁᤧᤜᤥᤵᤐᤠ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡ ᤜᤧᤰᤁᤩᤠᤱ ᤘᤣ᤹ ᤛᤢᤘᤠᤱᤛᤔᤠ ᤔᤧᤴᤇᤢᤔᤠᤜᤠ᤹ᤏᤢ ᤔᤣ᤺ᤰᤂᤡᤶ ᤁᤧᤈᤥᤃᤢᤶᤔᤠᤱ ᤀᤡᤛᤪᤠᤀᤡᤗᤧᤴ ᤀᤠᤵᤋᤡᤰᤛᤠᤒᤠ ᤁᤧᤈᤥᤃᤢᤶᤔᤠᤱ ᤁᤧᤘᤕᤡ᤹॥ 11 ᤀᤠᤸᤗ ᤀᤠᤏᤡᤃᤣ ᤗᤠᤕᤥ ᤆᤥᤃᤢᤶᤒᤧ ᤑᤠ᤹ᤀᤠᤱ ᤕᤜᤘᤣ ᤍᤠᤱᤒᤠ ᤂᤧᤏᤡ᤹ ᤌᤠ᤺ᤰᤌᤧᤒᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡ ᤐᤠ᤺ᤳᤋᤧᤶᤔᤧ᤹ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤏᤡᤱᤘᤠ᤹ ᤀᤡᤛᤡ᤺ᤰ ᤕᤠ᤺ᤶᤒᤰ ᤆᤥᤃᤧᤶᤔᤧ᤹॥ ᤂᤡᤏᤡ᤹ ᤗᤠᤈᤣ᤹ᤀᤥ ᤁᤧᤕᤢᤱᤒᤠ ᤌᤡᤶᤔᤧᤴᤍᤱ ᤛᤢᤘᤠᤱᤜᤠ᤹ ᤜᤧᤰᤁᤩᤠᤱ ᤘᤣ᤹ ᤗᤠᤈᤣ᤹ᤒᤠ ᤂᤡᤏᤡ᤹ ᤔᤣ᤺ᤳᤜᤠ᤹ᤏᤢ ᤗᤠ᤺ᤳᤗᤠ᤺ᤳ ᤘᤕᤧᤶᤔᤧ᤹॥” 12 ᤂᤧᤒᤩᤠᤱ ᤁᤧᤈᤢᤶᤒᤠᤀᤠᤱ ᤁᤧᤕᤢᤱᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤔᤧᤀ᤺ᤰᤋᤧᤀᤠᤱ ᤔᤧᤒᤠ᤺ᤳᤋᤢ. “ᤂᤧᤏᤧ᤹ ᤌᤣ ᤁᤧᤒᤠ᤺ᤳᤋᤢ. ᤀᤠᤏᤡᤃᤣ ᤜᤧᤰᤁᤣᤀᤣ ᤆᤥᤃᤢᤶᤒᤧ॥” 13 ᤁᤖ ᤂᤧᤱᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤔᤧᤕᤥ᤹ᤖᤢ. “ᤔᤏᤠᤗᤢᤵᤜᤠ᤹ ᤕᤖᤡᤰ ᤔᤧᤘᤠ᤹ ᤜᤧᤰᤁᤩᤠᤱ ᤕᤶᤒᤠ ᤘᤜᤡᤳᤋᤠᤱ ᤌᤠᤖ ᤐᤳ॥ ᤁᤴ ᤛᤠ᤺ᤱᤃᤠᤜᤡᤶ ᤁᤧᤜᤥᤵᤐᤠᤍᤧᤴᤏᤥ ᤀᤠᤏᤡᤃᤣ ᤀᤰᤂᤣᤗ᤹ᤖᤡᤰ ᤕᤧᤵᤔᤠ ᤔᤧᤛᤢᤰᤋᤡᤃᤧᤴ॥ ᤁᤴ ᤌᤡᤰᤕᤠᤴ ᤀᤡᤃᤪ ᤏᤡᤕᤠ᤺ᤴᤗᤧ ᤆᤥ᤺ᤰᤔᤠ ᤛᤢᤰᤁᤧᤍᤧᤵᤐᤠ ᤐᤠ᤺ᤴᤏᤠᤱ ᤔᤣ᤺ᤴ ᤌᤣᤀᤠᤱᤓᤧᤸᤗᤧ ᤀᤠᤏᤡᤃᤣ ᤕᤖᤡᤰ ᤁᤴ ᤗᤠᤕᤥᤀᤥ ᤌᤩᤧ᤹ᤀᤡᤃᤧᤀᤠᤱ ᤘᤕᤡᤃᤧ॥ 14 ᤀᤠᤏᤡᤃᤣ ᤛᤢᤜᤠᤱᤕᤢᤰᤐᤠᤜᤠ᤹ ᤕᤖᤢᤛᤗᤧ᤺ᤶᤔᤥ ᤔᤧᤕᤢᤱᤗ ᤜᤧᤰᤁᤩᤠᤱ ᤁᤴ ᤐᤠ᤺ᤴᤏᤥ ᤗᤰᤐᤧᤴᤛᤠᤒᤠ ᤔᤧᤒᤥᤱᤗ॥ ᤀᤠᤳᤋᤡᤸᤗᤧ ᤘᤣ᤹ ᤛᤢᤘᤠᤱᤛᤔᤠ ᤁᤢᤔᤣᤳ ᤘᤠ᤹. ᤂᤧᤴ ᤁᤢᤓᤠ ᤏᤡ᤺ᤴᤎᤥ ᤁᤧᤒᤥᤱᤒᤠ ᤕᤧᤴᤏᤥ ᤂᤢᤏᤧ᤹ ᤁᤢᤕᤧᤰᤕᤰᤁᤥᤒᤠ ᤗᤠᤶᤗᤥᤒᤠᤜᤠ᤹ ᤜᤧᤰᤁᤩᤠᤱ ᤂᤠᤛᤧᤴᤗᤥ᤺ᤶᤒᤠᤜᤠ᤹ᤏᤢ ᤋᤠᤖ॥ ᤀᤰᤂᤣᤗ᤹ᤖᤡᤰ ᤁᤸᤗᤧ ᤁᤢᤕᤠ᤺ᤶᤒᤣᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤧᤛᤡᤰᤁᤧᤴ ᤆᤡᤈᤡ ᤕᤧᤶᤕᤧᤶ ᤐᤥᤱ᤹॥” 15 ᤀᤛᤠᤜᤣᤗᤖᤧ ᤁᤢᤛ᤻ᤛᤠ ᤈᤥᤏᤠᤌᤠᤏ ᤜᤧᤰᤁᤩᤠᤱ ᤋᤡᤰᤓᤠᤖᤧ ᤁᤢᤛ᤻ᤛᤠ ᤕᤠᤈᤕᤠᤜ᤺ᤴᤏᤢ᤺ᤸᤗᤧ ᤘᤣ᤹ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤂᤧᤴ ᤐᤠ᤺ᤴᤏᤡᤴ ᤔᤧᤴᤀᤳᤋᤢᤴ॥ ᤔᤛᤢᤸᤗᤠᤔ ᤏᤢ ᤗᤧᤒᤡ ᤛᤒ᤻ᤒᤋᤤᤖᤧ ᤂᤢᤴᤇᤡ᤹ ᤀᤠ᤺ᤴᤇᤡᤱᤔᤠᤴ ᤂᤥᤛᤧᤳᤇᤢᤀᤠᤱ ᤂᤧᤱᤜᤠ᤹ ᤏᤧᤵᤔᤠᤱᤗᤧ ᤂᤧᤴ ᤐᤠ᤺ᤴᤏᤡᤴ ᤀᤳᤋᤧᤇᤢᤀᤠᤱ ᤘᤕᤧᤳᤇᤡ॥ 16 ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠᤗᤠᤶ ᤁᤧᤏᤢ᤺ᤱᤒᤠ ᤁᤧᤓᤧᤶᤒᤠ ᤕᤧᤶᤒᤡᤳᤇᤠᤜᤠ᤹ ᤂᤧᤴ ᤐᤠ᤺ᤴᤏᤡᤴ ᤂᤧᤶᤔᤠ ᤔᤧᤍᤧᤴᤍᤧ ᤜᤧᤰᤁᤩᤠᤱ ᤀᤧᤈᤪᤠ᤺ᤸᤗᤧ ᤜᤡᤶᤛᤕᤱᤒᤠ ᤋᤢᤶᤓᤠᤰᤐᤠᤜᤠ᤹ᤗᤢᤶᤔᤥᤗᤠᤶ ᤗᤠᤶᤗᤥᤒᤠᤜᤠ᤹ ᤔᤢᤖᤠ ᤔᤧᤳᤋᤢᤛᤡᤀᤠᤱ ᤂᤢᤴᤇᤡ᤹ ᤔᤡᤱ ᤔᤧᤛᤠᤵᤋᤢ॥ ᤌᤡᤒᤥᤱ ᤗᤠ ᤁᤧᤖᤧᤒᤠ ᤌᤡᤰᤛᤡᤃᤣᤰᤐᤠ ᤕᤧᤴᤏᤥ ᤂᤧᤱᤜᤠ᤹ ᤀᤠᤵᤑᤣᤰ ᤛᤠ᤹ᤛᤡᤱᤔᤠ ᤔᤧᤜᤣ᤺ᤰᤛᤡᤱ॥ 17 ᤜᤧᤰᤁᤩᤠᤱ ᤗᤠ ᤛᤢᤶᤛᤡ ᤌᤠᤖᤡᤰ ᤂᤧᤱᤜᤠ᤹ᤖᤧ ᤘᤣ᤹ ᤛᤢᤘᤠᤱᤛᤔᤠ ᤁᤢᤔᤣᤳ ᤁᤧᤘᤠ᤹ᤒᤠ ᤁᤧᤖᤧᤰ ᤕᤧᤶᤒᤡᤳᤇᤠᤜᤠ᤹ ᤔᤧᤛᤠ᤹ᤖᤢᤛᤡᤖᤥ॥ ᤘᤣ᤹ ᤗᤠᤈᤣ᤹ᤒᤠ ᤔᤧᤴᤇᤢᤔᤠ ᤁᤧᤍᤠ᤺ᤵᤐᤠᤜᤠ᤹ 18 ᤘᤣ᤹ ᤗᤠᤈᤣ᤹ᤒᤠ ᤔᤧᤴᤇᤢᤔᤠ ᤔᤣ᤺ᤰᤂᤡᤶ ᤁᤧᤔᤧᤵᤐᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤔᤡᤱᤏᤠ᤺ᤳᤜᤠ᤹ ᤁᤴᤜᤠ᤹ᤀᤣᤖᤥ— ᤕᤥᤛᤠᤍᤠᤁᤖᤧ ᤁᤢᤛ᤻ᤛᤠ ᤕᤣᤛᤢᤀᤠ ᤏᤢ ᤂᤧᤸᤗᤧ ᤁᤢᤜᤡᤶᤛᤕᤱᤗᤠᤶ ᤔᤠᤛᤣᤕᤠᤜ. ᤀᤣᤗᤡᤀᤣᤈᤖ. ᤕᤠᤖᤡᤒ ᤜᤧᤰᤁᤩᤠᤱ ᤃᤍᤗᤩᤠᤜ ᤔᤧᤘᤕᤧ॥ 19 ᤂᤧᤱᤜᤠ᤹ᤖᤧ ᤂᤢᤏᤡ᤹ ᤔᤧᤸᤗᤡᤱᤃᤧᤴ ᤔᤣ᤺ᤳᤜᤠ᤹ ᤗᤠᤵᤑᤢᤔᤠᤛᤡ ᤔᤠᤱᤜᤧᤰ ᤔᤧᤈᤥᤃᤢ ᤜᤧᤰᤁᤩᤠᤱ ᤂᤢᤴᤇᤡ᤹ ᤗᤠᤕᤥᤗᤠᤶ ᤗᤧᤵᤔᤡ ᤂᤥᤔᤠᤖᤧ ᤗᤠᤃᤡ ᤁᤢᤶᤒᤠᤒᤠ ᤔᤧᤸᤗᤢᤰᤌᤡᤰ ᤛᤡᤍᤢᤱᤈᤓᤠ ᤔᤧᤍᤥᤴᤍᤢ॥ 20 ᤀᤡᤶᤔᤣᤖ ᤜᤡᤶᤛᤕᤱᤗᤠᤶ—ᤜᤏᤠᤏᤡ ᤏᤢ ᤈᤒᤍᤡᤕᤠᤜ 21 ᤜᤠᤖᤡᤔ ᤜᤡᤶᤛᤕᤱᤗᤠᤶ—ᤔᤠᤛᤣᤕᤠᤜ. ᤀᤣᤗᤡᤕᤠ. ᤛᤔᤠᤕᤠᤜ. ᤕᤜᤡᤀᤣᤗ ᤏᤢ ᤀᤢᤈ᤻ᤈᤡᤕᤠᤜ॥ 22 ᤐᤛᤜᤢᤖ ᤜᤡᤶᤛᤕᤱᤗᤠᤶ—ᤀᤣᤗᤩᤥᤀᤣᤏᤤ. ᤔᤠᤛᤣᤕᤠᤜ. ᤀᤡᤛ᤻ᤔᤠᤀᤣᤗ. ᤏᤋᤏᤣᤗ. ᤕᤥᤈᤠᤒᤠᤍ ᤏᤢ ᤀᤣᤗᤠᤛᤠ॥ 23 ᤗᤧᤒᤡᤜᤠ᤹— ᤕᤥᤈᤠᤒᤠᤍ. ᤛᤡᤔᤡ. ᤁᤣᤗᤠᤕᤠᤜ (ᤂᤧᤴ ᤁᤗᤡᤋᤠᤀᤠᤱ ᤔᤧᤔᤧᤳᤋᤢ). ᤐᤋᤜᤡᤕᤠᤜ. ᤕᤜᤢᤍᤠ ᤏᤢ ᤀᤣᤗᤡᤀᤣᤈᤖ॥ 24 ᤛᤠᤶᤃᤧᤗᤥᤒᤠᤜᤠ᤹— ᤀᤣᤗᤩᤠᤛᤡᤒ ᤔᤠᤱᤜᤡᤶᤔᤥ ᤗᤠᤶᤎᤣᤳ ᤁᤧᤃᤥᤒᤠᤜᤠ᤹— ᤛᤸᤗᤢᤔ. ᤋᤣᤗᤣᤔ ᤏᤢ ᤀᤢᤖᤡ॥ 25 ᤘᤣ᤹ ᤕᤧᤶᤒᤡᤳᤇᤠᤜᤠ᤹— ᤐᤖᤥᤛ ᤜᤡᤶᤛᤕᤱᤗᤠᤶ—ᤖᤔᤩᤠᤜ. ᤕᤡᤈᤩᤠᤜ. ᤔᤸᤁᤡᤕᤠᤜ. ᤔᤡᤕᤠᤔᤡᤏ. ᤀᤣᤗᤠᤈᤠᤖ. ᤔᤸᤁᤡᤕᤠᤜ ᤏᤢ ᤒᤏᤠᤕᤠᤜ॥ 26 ᤀᤣᤗᤠᤔ ᤜᤡᤶᤛᤕᤱᤗᤠᤶ—ᤔᤳᤋᤏᤩᤠᤜ. ᤈᤁᤖᤡᤕᤠ. ᤕᤜᤡᤀᤣᤗ. ᤀᤒ᤻ᤍᤡ. ᤕᤖᤣᤔᤥᤋ ᤏᤢ ᤀᤣᤗᤡᤕᤠ॥ 27 ᤈᤳᤋᤢ ᤜᤡᤶᤛᤕᤱᤗᤠᤶ—ᤀᤣᤗᤩᤥᤀᤣᤏᤤ. ᤀᤣᤗᤩᤠᤛᤡᤒ. ᤔᤳᤋᤏᤩᤠᤜ. ᤕᤖᤣᤔᤥᤋ. ᤈᤠᤒᤠᤍ ᤏᤢ ᤀᤈᤡᤈᤠ॥ 28 ᤒᤣᤒᤤ ᤜᤡᤶᤛᤕᤱᤗᤠᤶ—ᤕᤣᤜᤥᤜᤠᤏᤠᤏ. ᤜᤏᤏᤩᤠᤜ. ᤈᤒ᤻ᤒᤤ ᤏᤢ ᤀᤳᤗᤤ 29 ᤒᤠᤏᤡ ᤜᤡᤶᤛᤕᤱᤗᤠᤶ—ᤔᤛᤢᤸᤗᤠᤔ. ᤔᤸᤗᤢᤁ. ᤀᤍᤠᤕᤠᤜ. ᤕᤠᤛᤢᤒ. ᤛᤠᤗ ᤏᤢ ᤕᤖᤣᤔᤥᤋ॥ 30 ᤐᤜᤋ-ᤔᤥᤀᤠᤒ ᤜᤡᤶᤛᤕᤱᤗᤠᤶ—ᤀᤍᤏᤠ. ᤁᤣᤗᤠᤗ. ᤒᤏᤠᤕᤠᤜ. ᤔᤠᤛᤣᤕᤠᤜ. ᤔᤳᤋᤏᤩᤠᤜ. ᤒᤈᤗᤣᤗ. ᤒᤡᤴᤏᤢᤀᤡ ᤏᤢ ᤔᤏᤛ᤻ᤛᤣ॥ 31 ᤜᤠᤖᤡᤔ ᤜᤡᤶᤛᤕᤱᤗᤠᤶ—ᤀᤣᤗᤡᤀᤣᤈᤖ. ᤕᤡᤛᤡᤕᤠᤜ. ᤔᤸᤁᤡᤕᤠᤜ. ᤛᤔᤠᤕᤠᤜ. ᤛᤡᤔᤣᤀᤥᤏ. 32 ᤒᤣᤏᤩᤠᤔᤡᤏ. ᤔᤸᤗᤢᤁ ᤏᤢ ᤛᤔᤖᤕᤠᤜ॥ 33 ᤜᤠᤛᤢᤔ ᤜᤡᤶᤛᤕᤱᤗᤠᤶ—ᤔᤳᤋᤏᤤ. ᤔᤳᤋᤋᤠ. ᤈᤠᤒᤠᤍ. ᤀᤣᤗᤡᤐᤣᤗᤣᤋ. ᤕᤣᤖᤣᤔᤤ. ᤔᤏᤛ᤻ᤛᤣ ᤏᤢ ᤛᤡᤔᤡ॥ 34 ᤒᤠᤏᤡ ᤜᤡᤶᤛᤕᤱᤗᤠᤶ—ᤔᤠᤍᤤ. ᤀᤔᤪᤠᤔ. ᤀᤢᤀᤣᤗ. 35 ᤒᤏᤠᤕᤠᤜ. ᤒᤣᤍᤕᤠᤜ. ᤁᤗᤢᤜᤡ. 36 ᤓᤏᤩᤠᤜ. ᤔᤖᤣᤔᤥᤋ. ᤀᤣᤗᤩᤠᤛᤡᤒ. 37 ᤔᤳᤋᤏᤩᤠᤜ. ᤔᤳᤋᤏᤤ ᤏᤢ ᤕᤠᤛᤢ॥ 38 ᤒᤡᤴᤏᤢᤀᤡ ᤜᤡᤶᤛᤕᤱᤗᤠᤶ— 39 ᤛᤡᤔᤡ. ᤛᤣᤗᤣᤔᤩᤠᤜ. ᤏᤠᤋᤠᤏ. ᤀᤍᤠᤕᤠᤜ. 40 ᤔᤰᤏᤠᤍᤒᤤ. ᤛᤠᤛᤤ. ᤛᤠᤖᤤ. 41 ᤀᤈᤪᤣᤗ. ᤛᤣᤗᤣᤔᤩᤠᤜ. ᤛᤔᤖᤕᤠᤜ. 42 ᤛᤸᤗᤢᤔ. ᤀᤔᤷᤕᤠᤜ ᤏᤢ ᤕᤢᤛᤢᤑ॥ 43 ᤏᤣᤒᤥ ᤜᤡᤶᤛᤕᤱᤗᤠᤶ—ᤕᤡᤀᤣᤗ. ᤔᤳᤋᤡᤋᤩᤠᤜ. ᤈᤠᤒᤠᤍ. ᤈᤒᤡᤏᤠ. ᤕᤍ᤻ᤍᤤ. ᤕᤥᤀᤣᤗ ᤏᤢ ᤒᤏᤠᤕᤠᤜ॥ 44 ᤁᤴ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤔᤣ᤺ᤳᤜᤠ᤹ ᤘᤣ᤹ ᤗᤠᤈᤣ᤹ᤛᤔᤠ ᤔᤧᤴᤇᤢᤔᤠ ᤔᤧᤘᤕᤧ॥ ᤂᤧᤱᤜᤠ᤹ᤖᤧ ᤂᤧᤴ ᤂᤢᤴᤇᤡ᤹ ᤔᤣ᤺ᤳᤜᤠ᤹ᤗᤠᤶ ᤁᤢᤓᤠᤖᤧ ᤂᤢᤴᤇᤡ᤹ ᤛᤠᤀᤣᤀᤠᤱ ᤔᤧᤘᤕᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.