ᤀᤡᤈᤁᤡᤀᤣᤗ 9 - LIFOTNT

ᤕᤖᤢᤛᤗᤧ᤺ᤶᤔᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤶᤍᤡᤱ ᤐᤡᤖᤢ

¹ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤴ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤋᤧ. “ᤕᤧᤰᤕᤰᤁᤡᤴ ᤂᤢᤶᤍᤡᤱ ᤐᤡᤔᤠᤖᤧ ᤗᤠᤃᤡ ᤕᤢᤰᤋᤡᤱ ᤁᤧᤒᤥᤱᤒᤠ ᤔᤏᤠᤜᤠ᤹ ᤋᤠᤖᤧᤛᤧ᤹᥄ ᤂᤢᤴᤇᤡ᤹ ᤑᤧᤈᤢᤶᤓᤧᤕᤠ ᤂᤈᤢᤶᤄᤕᤠᤜᤠ᤹ ᤔᤧᤍᤠᤖᤢᤀᤠᤱ ᤔᤧᤍᤠᤖ ᤑᤠ᤹ᤀᤠᤱ ᤂᤧᤱᤜᤠ᤹ ᤔᤧᤳᤋᤧᤛᤧ᤹᥄”

² ᤌᤠᤱᤃᤧᤳ ᤗᤧᤵᤔᤠᤱ ᤋᤰᤁᤧᤔᤧᤵᤐᤠ ᤌᤥᤛᤔᤠ ᤕᤶᤒᤠ ᤗᤠᤶᤎᤣ᤺ᤵᤐᤥᤗᤠᤶ ᤁᤧᤖᤧᤰᤗᤧ ᤂᤢᤴᤇᤡ᤹ ᤜᤢᤰᤁᤥ ᤀᤠᤛᤡᤛᤡᤒᤠ ᤑᤧᤈᤢᤶᤓᤧᤕᤠ ᤂᤈᤢᤶᤄᤕᤠᤜᤠ᤹ ᤁᤧᤃᤵᤐᤠ ᤋᤢᤰᤛᤡ ᤔᤏᤠᤜᤠ᤹ ᤂᤡᤔᤥ ᤗᤡᤃᤰ ᤔᤧᤗ᤺ᤴᤍᤧ॥ ᤗᤡᤵᤗᤡᤱᤃᤣ ᤂᤡ᤺ᤸᤗᤧᤴ ᤋᤣᤳ ᤁᤧᤈᤠᤱᤒᤠ ᤔᤏᤠᤎᤡᤰ ᤂᤧᤱᤜᤠ᤹ᤏᤢ ᤘᤕᤧ. ᤂᤧᤸᤗᤧ ᤁᤢᤜᤢᤰᤁᤥ ᤁᤢᤛᤠᤵᤔᤠ ᤛᤠᤔᤠᤜᤠ᤹ ᤁᤢᤃᤣᤱᤅᤥ ᤜᤣᤛᤢᤀᤠᤱ ᤘᤕᤧ॥ ᤂᤧᤱᤜᤠ᤹ ᤁᤧᤖᤧᤰ ᤔᤠᤱᤜᤡᤶ ᤗᤰᤂᤢᤶᤔᤥ ᤔᤧᤒᤣ ᤜᤧᤰᤁᤩᤠᤱ ᤁᤠᤛᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤒᤣᤛᤠᤱ ᤔᤧᤕᤧᤶᤛᤡᤱ॥

³ ᤂᤧᤒᤩᤠᤱ ᤁᤖᤢᤒᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤁᤧᤒᤵᤐᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱᤅᤡᤴ ᤌᤠ᤺ᤱ ᤗᤧᤵᤔᤠᤱ ᤐᤥᤃᤧ. ᤜᤧᤰᤁᤩᤠᤱ ᤔᤠᤱᤜᤡᤶᤔᤥ ᤗᤠ᤺ᤵᤔᤠ ᤗᤠᤶᤎᤣ᤺ᤵᤐᤥ ᤆᤳᤇᤡᤱ॥ ᤂᤶᤓᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤠᤵᤔᤠ ᤛᤠᤔᤠ ᤁᤧᤒᤱᤒᤠ ᤗᤡᤵᤗᤡᤱᤃᤣ ᤂᤡ᤺ᤸᤗᤧ ᤋᤣᤳ ᤁᤧᤈᤠᤱᤒᤠ ᤔᤏᤠᤴ ᤀᤢ᤺ᤳᤋᤢ॥

⁴ ᤂᤢᤏᤧ᤹ ᤂᤧᤴ ᤔᤧᤳᤋᤢ. “ᤕᤖᤢᤛᤗᤧ᤺ᤶᤔᤥᤒᤠ ᤔᤠᤖᤠᤶᤜᤠ᤹ᤀᤥ ᤂᤧᤏᤧ᤹ ᤗᤠᤱᤄᤣᤃᤧ᤹ ᤜᤧᤰᤁᤩᤠᤱ ᤂᤢᤴᤇᤡ᤹ ᤕᤧᤰᤕᤰᤁᤥ ᤕᤠᤶᤃᤧᤛᤡᤱᤒᤠ ᤗᤠᤕᤥᤜᤠ᤹ ᤔᤧᤈᤥᤃᤢᤖ ᤔᤧᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤁᤧᤜᤠ᤺ᤵᤐᤠ ᤏᤢ ᤛᤡᤖᤡᤱᤔᤔᤥ ᤁᤧᤎᤠᤒᤠ ᤁᤧᤖᤧᤰᤗᤧ ᤂᤢᤴᤇᤡ᤹ ᤋᤫᤠᤒᤠᤜᤠ᤹ᤀᤥ ᤔᤡᤰᤛᤣᤴ ᤑᤳᤇᤧ ᤐᤡᤖᤧᤛᤧ᤹॥”

⁵ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤴ ᤔᤏᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡᤒᤠ ᤀᤠᤱᤃᤠ᤹ ᤂᤧᤵᤛᤢᤱ. “ᤕᤧᤰᤕᤰ ᤁᤧᤖᤧᤰ ᤐᤡᤛᤠᤱ ᤂᤡᤏᤡ᤹ ᤂᤧᤴ ᤋᤡᤶᤍᤧᤶᤔᤧ᤹ ᤂᤧᤒᤩᤠᤱ ᤂᤢᤴᤇᤡ᤹ ᤋᤫᤠᤒᤥ ᤔᤡᤰᤛᤣᤴ ᤔᤧᤶᤒᤵᤔᤏᤠᤒᤠ ᤁᤧᤖᤧᤰ ᤛᤧᤖᤧᤶᤛᤡᤶᤔᤧ᤹॥ ᤗᤢᤱᤔᤠ᤹ ᤔᤧᤍᤢᤰᤋᤧᤶᤛᤡᤶᤔᤡᤴᤏᤧ᤹. ᤗᤢᤱᤔᤠ᤹ ᤛᤩᤠ᤺ᤳ ᤗ᤹ᤔᤠ ᤀᤥᤛᤣ᤺ᤴ ᤔᤧᤎᤠᤰᤋᤧᤶᤛᤡᤶᤔᤧᤴᤏᤧ᤹᥄

⁶ ᤁᤠᤵᤐᤥ ᤋᤢᤶᤛᤠ ᤜᤧᤰᤁᤩᤠᤱ ᤌᤠᤱᤒᤧᤴ. ᤔᤧᤴᤇ᤻ᤕᤠ. ᤔᤧᤴᤇᤢᤔᤠ ᤏᤢ ᤜᤡᤴᤈᤠ᤹ᤒᤡᤳᤇᤠ᤹ ᤁᤧᤖᤧᤰ ᤛᤧᤖᤧᤶᤛᤡᤶᤔᤧ᤹॥ ᤁᤖ ᤔᤡᤰᤛᤣᤴ ᤁᤧᤒᤵᤐᤠ ᤀᤠᤳᤋᤡᤴᤜᤠ᤹ᤀᤠᤱ ᤔᤧᤛᤢᤛᤧᤶᤛᤡᤶᤔᤧᤴᤏᤧ᤹॥ ᤜᤠᤒᤠ ᤁᤴ ᤔᤠᤱᤜᤡᤶᤔᤥᤗᤠᤶ ᤜᤣ᤺ᤰᤋᤧᤶᤔᤧ᤹॥” ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ᤖᤧ ᤛᤧᤵᤔᤠ ᤔᤧᤜᤣ᤺ᤰᤋᤢᤛᤡᤀᤠᤱ ᤏᤢᤒᤥᤱ ᤗᤠᤶᤗᤥᤒᤠᤜᤠ᤹ ᤔᤧᤛᤧᤖᤢᤛᤡ॥

⁷ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤱᤈᤠᤱ ᤐᤡᤖᤢᤛᤡ. “ᤔᤠᤱᤜᤡᤶᤔᤡᤴ ᤀᤠᤛᤢᤳᤌᤥ ᤆᤥᤃᤧᤶᤔᤧ᤹᥄ ᤁᤵᤔᤥᤒᤠ ᤗᤰᤂᤢᤶᤜᤠ᤹ ᤆᤣᤜᤠ᤹ᤖᤧ ᤌᤡᤶᤛᤧᤶᤔᤧ᤹॥ ᤐᤣᤃᤧᤶᤔᤧ᤹᥄” ᤀᤰᤂᤣᤗ᤹ᤖᤡᤰ ᤂᤧᤱᤜᤠ᤹ ᤗᤠ᤺ᤰᤁᤠᤳ ᤔᤧᤒᤣ ᤜᤧᤰᤁᤩᤠᤱ ᤕᤧᤰᤕᤰᤁᤥ ᤁᤧᤖᤧᤰ ᤐᤡᤛᤠᤱ ᤛᤧᤵᤔᤠ ᤔᤧᤜᤣ᤺ᤰᤋᤢᤛᤡ॥

⁸ ᤂᤧᤱᤜᤠ᤹ᤖᤧ ᤗᤠ᤺ᤰᤁᤠᤳ ᤔᤧᤛᤧᤖᤢᤛᤡᤖ ᤔᤧᤕᤠᤃᤧᤸᤗᤧ. ᤀᤠᤱᤃᤠ᤹ᤖᤰ ᤀᤣ᤺ᤰᤛᤧᤳᤇᤠ ᤘᤕᤠᤱ॥ ᤀᤠᤱᤃᤠ᤹ ᤀᤠᤏᤠᤖᤠᤴ ᤂᤠᤶᤒᤠᤱᤅᤥ ᤛᤠᤶᤒᤥᤴ ᤜᤒᤳ ᤑᤳᤇᤢᤱᤅᤠᤱ ᤜᤠᤒᤠᤱ. “ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤀᤣ᥄ ᤌᤣ ᤂᤧᤏᤧ᤹ ᤕᤖᤢᤛᤗᤧ᤺ᤶᤔᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤛᤠ᤹ᤖᤡᤰ ᤁᤧᤕᤠ᤺ᤰ ᤗᤧ᤹ᤔᤠᤖᤧ ᤀᤡᤛᤪᤠᤀᤡᤗᤀᤥ ᤁᤧᤏᤶᤒᤠᤀᤠᤱ ᤁᤧᤘᤠ᤹ᤒᤠᤜᤠ᤹ ᤘᤖᤧᤱᤗᤧᤱ ᤁᤧᤛᤖᤢᤛᤡᤒᤡ᥅”

⁹ ᤂᤧᤒᤩᤠᤱ ᤂᤢᤏᤧ᤹ ᤀᤠᤱᤃᤠ᤹ ᤔᤧᤳᤋᤠᤱ. “ᤀᤡᤛᤪᤠᤀᤡᤗ ᤏᤢ ᤕᤜᤢᤍᤠᤒᤠ ᤔᤏᤠᤜᤠ᤹ᤖᤧ ᤛᤠ᤹ᤖᤡᤰ ᤐᤕᤶ ᤕᤶᤒᤠ ᤗᤠᤕᤥᤜᤠ᤹ ᤔᤧᤈᤥᤃᤢᤀᤠᤱ ᤔᤧᤘᤠ᤹॥ ᤔᤏᤠ ᤛᤧᤵᤔᤧᤸᤗᤧ ᤗᤠᤈᤣᤴ ᤁᤧᤖᤧᤰ ᤐᤡᤛᤠᤱ ᤛᤎᤧᤰ ᤋᤡᤶᤛᤧᤀᤠᤱ ᤏᤧ. ᤕᤧᤰᤕᤰᤁᤡᤴ ᤔᤧᤴᤘᤠ᤹ᤔᤏᤠᤒᤠ ᤂᤠᤛᤧᤴᤗᤥ᤺ᤶᤔᤠᤸᤗᤧ ᤁᤢᤎᤡᤶ ᤐᤥ᤺ᤰᤂᤧᤀᤠᤱ ᤏᤧ॥ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ᤹. ‘ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤔᤧᤏᤡᤛᤢᤴ᤹॥ ᤕᤜᤘᤣ ᤍᤠᤱᤒᤧᤸᤗᤧ ᤗᤠᤈᤣᤴ ᤗᤠᤵᤑᤢᤛᤢᤀᤠᤱ ᤏᤧ᥄’

¹⁰ ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤂᤧᤱᤜᤠ᤹ ᤔᤧᤍᤠᤱᤄᤢᤱᤛᤡᤱᤅᤡᤴ᤹ ᤀᤡᤃᤪ ᤂᤧᤱᤜᤠ᤹ ᤀᤠᤗᤢᤱᤔᤠ᤹ ᤛᤩᤠ᤺ᤳᤋᤠᤱ ᤔᤧᤸᤗ᤹ᤏᤧᤴ॥ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ᤖᤧ ᤁᤢᤗᤧᤰᤘᤠ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤰ ᤕᤥᤖ ᤏᤢ᤺ᤰᤋᤢᤱ ᤐᤡᤖᤢᤱᤛᤡᤱ᤹॥”

¹¹ ᤂᤧᤒᤩᤠᤱ ᤁᤢᤛᤠᤵᤔᤠ ᤛᤠᤔᤠ ᤁᤧᤒᤱᤒᤠ ᤗᤡᤵᤗᤡᤱᤃᤣ ᤂᤡ᤺ᤸᤗᤧ ᤋᤣᤳ ᤁᤧᤈᤠᤱᤒᤠ ᤔᤏᤠᤴ ᤏᤢ᤺ᤰᤂᤧᤀᤠᤱ ᤐᤠ᤺ᤳᤋᤢ. “ᤂᤧᤏᤧ᤹ ᤀᤡᤱᤈᤠᤱ ᤁᤧᤒᤡᤖᤠᤱᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤆᤥᤃᤢᤱᤅᤠᤱ ᤘᤠ᤹ᤖᤥ॥”