ᤀᤡᤈᤁᤡᤀᤣᤗ 8 - LIFOTNT

ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤈᤁᤡᤀᤣᤸᤗᤧᤴ ᤐᤡᤖᤢᤒᤠ ᤏᤡᤛᤡᤃᤣᤰᤐᤠ ᤛᤢᤑᤥ ( ᤀᤡᤈ ᥎:᥇–᥇᥆:᥈᥈ ) ᤕᤖᤢᤛᤗᤧ᤺ᤶᤔᤥ ᤏᤠᤘᤠᤀᤡᤳᤗᤠᤴ ᤛᤧᤘᤠ ᤔᤧᤔᤧᤳᤋᤢ

¹ ᤂᤧᤒᤩᤠᤱ ᤕᤜᤥᤕᤠᤁᤡᤏ ᤜᤠᤱᤅᤡᤴ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤒᤠ ᤋᤢᤰᤛᤡᤃᤣᤰᤐᤠ ᤋᤱᤒᤣ ᤁᤧᤖᤧᤒᤠ ᤋᤢᤰᤛᤡᤃᤣᤰᤐᤠ ᤗᤠ ᤅᤠᤛᤡᤃᤣᤰᤐᤠ ᤕᤧᤴᤏᤥ. ᤕᤜᤢᤍᤠᤒᤠ ᤗᤠᤶᤗᤥᤒᤠᤜᤠ᤹ ᤀᤠᤱᤃᤠ᤹ ᤀᤠᤜᤡᤶᤔᤥ ᤔᤧᤘᤕᤧᤸᤗᤧ. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤢᤰᤛᤠᤶᤔᤡᤴ ᤀᤠᤱᤃᤠ᤹ᤀᤥ ᤋᤩᤧ॥

² ᤔᤧᤴᤇᤠᤶ ᤕᤠᤵᤔᤡ ᤜᤧᤰᤁᤣ ᤏᤡᤃᤧᤍᤧᤵᤐᤠ ᤌᤡᤰ ᤀᤠᤱᤃᤠ᤹ ᤏᤡᤛᤢᤱ॥ ᤀᤠᤰᤋᤱᤒᤠ ᤏᤡᤍᤧᤳᤋᤧᤓᤧᤸᤗᤧ ᤂᤧᤸᤗᤧ ᤁᤢᤃᤧᤱᤅᤠᤱ ᤕᤥ. ᤜᤢᤖᤢᤖᤢᤏᤠ ᤔᤡ ᤁᤧᤍᤡ᤺ᤵᤐᤠ ᤜᤧᤰᤋᤱᤒᤠ ᤏᤡᤎᤠᤒᤧ॥ ᤁᤢᤃᤧᤱᤅᤠᤱ ᤌᤥ ᤀᤡ᤺ᤱᤔᤏᤠ ᤕᤢᤱᤔᤏᤠᤒᤠ ᤁᤠᤛᤠ ᤁᤢᤀᤡᤛᤡᤰ ᤋᤡᤸᤗᤧᤰ ᤋᤡᤸᤗᤧᤰ ᤗ᤹ᤖᤡᤰ ᤗᤧᤰᤋᤧᤒᤠ ᤏᤡᤍᤧᤳᤋᤧ॥

³ ᤂᤧᤸᤗᤧ ᤜᤢᤰ ᤜᤧᤰᤋᤱᤒᤠᤎᤡᤰ ᤛᤴᤇᤢᤀᤠᤱ ᤀᤠᤱᤃᤠ᤹ ᤀᤠᤎ᤻ᤃᤣᤰ ᤀᤡᤀᤥ ᤋᤧᤶᤛᤠᤱᤅᤠᤱ ᤋᤣ᤹ᤖᤠᤱ॥ ᤂᤧᤴ ᤀᤣᤃᤠᤱ ᤛᤢᤑᤥᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠᤶᤛᤠᤶᤔᤡᤸᤗᤧ ᤀᤠᤱᤃᤠ᤹ ᤋᤠᤱᤛᤠᤱᤒᤥ ᤌᤠ᤺ᤱ ᤐᤰᤂᤠᤱ ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤗᤠᤶᤒᤠᤒᤠ ᤛᤢᤑᤥᤀᤥ ᤕᤖᤢᤛᤗᤧᤔ ᤁᤧᤳᤋᤠᤱ॥ ᤔᤠᤱᤜᤡᤶ ᤛᤡᤃᤠᤱ ᤁᤧᤏᤧᤒᤠ ᤗᤰᤂᤢᤶᤔᤥ ᤗᤠ᤺ᤵᤔᤠ ᤌᤠᤱᤃᤧᤳ ᤗᤧᤵᤔᤠᤱᤒᤠ ᤕᤶᤒᤠ ᤗᤠᤶᤎᤣ᤺ᤳᤋᤥ ᤁᤧᤳᤋᤠᤱ. ᤂᤧᤵᤔᤥ ᤕᤶᤒᤠ ᤏᤠᤘᤠᤀᤡᤳᤗᤠ ᤌᤡᤰ ᤕᤢᤱ ᤂᤧᤸᤗᤧ ᤕᤜᤘᤣ ᤍᤠᤱᤒᤧᤴ ᤛᤠ᤹ᤖᤡᤰ ᤁᤢᤏᤠᤃᤧᤜᤧᤶᤒᤠ ᤆᤥᤃᤢᤀᤠᤱ ᤘᤠ᤹॥

⁴ ᤏᤧᤏᤧᤒᤠᤍᤧᤴᤏᤥ ᤀᤠᤱᤃᤠ᤹ ᤋᤃᤡ ᤏᤡᤛᤢᤱᤅᤠᤱ ᤘᤕᤧᤒᤠ ᤁᤢᤀᤡᤛᤡᤰ. ᤆᤄᤵ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱᤅᤡᤴ ᤀᤠᤱᤃᤠ᤹ ᤂᤧᤵᤔᤥ ᤏᤡᤛᤢᤱ॥

⁵ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤔᤧᤳᤋᤠᤱ. “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤏᤠᤀᤣ. ᤌᤠᤱᤃᤧᤳ ᤐᤡᤛᤠᤱ ᤀᤥᤔᤕᤧ᤹॥” ᤜᤧᤰᤁᤣᤗ᤹ᤖᤡᤰ ᤀᤠᤱᤃᤠ᤹ ᤀᤥᤔᤕᤠᤱ. ᤜᤧᤰᤁᤩᤠᤱ ᤌᤠᤱᤃᤧᤳ ᤗᤧᤵᤔᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤒᤣᤛᤠᤱ ᤗᤠ᤺ᤵᤔᤠ ᤗᤠᤶᤎᤣ᤺ᤳᤋᤡᤸᤗᤧ ᤁᤢᤕᤠᤀᤥ ᤕᤜᤘᤣ ᤍᤠᤱᤒᤠᤴ ᤁᤢᤏᤠᤃᤧᤜᤧᤶᤒᤠ ᤆᤥᤃᤢᤀᤠᤱ ᤘᤕᤧᤒᤠ ᤏᤠᤘᤠᤀᤡᤳᤗᤠᤴ ᤂᤧᤵᤔᤥ ᤕᤧᤒᤧ॥

⁶ ᤂᤢᤏᤧ᤹ ᤔᤧᤳᤋᤠᤱ. “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤏᤠᤀᤣ. ᤂᤧᤱᤜᤠ᤹ᤖᤧ ᤌᤧᤔᤠ ᤔᤧᤈᤥᤃᤢᤖ ᤔᤧᤒᤳ ᤂᤧᤏᤧ᤹ ᤁᤧᤏᤡᤛᤢᤒᤡ᥅ ᤀᤠᤱᤃᤠ᤹ ᤀᤠᤛᤣᤛᤣᤍᤧᤴᤗᤠᤶ ᤗ᤺ᤵᤔᤠᤍᤣᤔᤠᤖᤧ ᤗᤠᤃᤡ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤕᤠᤶᤃᤧᤛᤡᤱᤒᤠ ᤗᤠᤕᤥᤜᤠ᤹ ᤂᤧᤏᤧ᤹ ᤁᤧᤏᤡᤛᤢᤒᤡ᥅ ᤁᤖ ᤑᤧᤖᤧ᤹. ᤜᤧᤰᤁᤩᤠᤱ ᤂᤧᤏᤧ᤹ ᤁᤴᤜᤠ᤹ᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤕᤠᤶᤃᤧᤛᤡᤱᤒᤠ ᤐᤠ᤺ᤴᤜᤠ᤹ ᤁᤧᤏᤡᤛᤢ᤹᥄”

⁷ ᤂᤧᤒᤩᤠᤱ ᤔᤠᤱᤜᤡᤶᤔᤥᤒᤠ ᤗᤰᤂᤢᤶᤔᤥ ᤗᤠ᤺ᤵᤔᤠ ᤗᤠᤶᤎᤣ᤺ᤵᤐᤥ ᤂᤢᤏᤧ᤹ ᤋᤠᤖᤠᤱ. ᤂᤧᤵᤔᤥ ᤀᤠᤱᤃᤠ᤹ ᤗᤢᤱᤎᤠᤰᤁᤥ ᤗᤳᤇᤠ ᤁᤢᤜᤱᤎᤡᤰ ᤐᤳᤇᤧᤒᤠ ᤏᤡᤛᤢᤱ॥

⁸ ᤂᤢᤏᤧ᤹ ᤀᤠᤱᤃᤠ᤹ ᤔᤧᤳᤋᤠᤱ. “ᤀᤠᤸᤗ. ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤏᤠᤀᤣ. ᤗᤢᤱᤎᤠᤰᤁᤡᤴ ᤜᤱᤛᤧ᤹॥” ᤜᤧᤰᤁᤣᤗ᤹ᤖᤡᤰ ᤀᤠᤱᤃᤠ᤹ ᤗᤢᤱᤎᤠᤰᤁᤡᤴ ᤜᤱᤛᤢᤱ ᤂᤧᤒᤩᤠᤱ ᤗᤢᤱᤎᤠᤰᤁᤡᤸᤗᤧ ᤀᤡ᤺ᤵᤋᤢᤒᤠ ᤗᤠᤶᤎᤣᤳ ᤌᤡᤰ ᤏᤡᤛᤢᤱ॥

⁹ ᤂᤢᤏᤧ᤹ ᤔᤧᤳᤋᤠᤱ. “ᤛᤡᤃᤠᤱ ᤗᤠᤛᤧ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤧᤵᤔᤥ ᤔᤧᤈᤥᤃᤢᤖ ᤔᤧᤒᤵᤐᤠ ᤕᤠᤶᤃᤧᤛᤡᤱᤒᤠ ᤗᤠᤕᤥᤜᤠ᤹ ᤏᤢ ᤑᤧᤴᤕᤠ᤺ᤶᤒᤰᤜᤠ᤹ ᤀᤥᤔᤧᤳᤋᤧ᤹᥄”

¹⁰ ᤜᤧᤰᤁᤣᤗ᤹ᤖᤡᤰ ᤀᤠᤱᤃᤠ᤹ ᤛᤡᤃᤠᤱ ᤗᤠᤛᤠᤱ ᤜᤧᤰᤁᤩᤠᤱ ᤕᤠᤶᤃᤧᤛᤡᤱᤒᤠ ᤔᤢᤴᤈᤡᤱ ᤘᤕᤠᤰ ᤁᤧᤗ᤹ᤒᤠ ᤏᤠᤘᤠ ᤆᤀᤡ᤺ᤳᤜᤠ᤹ ᤏᤢ ᤁᤧᤀᤢ᤺ᤱᤛᤡᤱᤒᤠ ᤁᤧᤛ᤺ᤴᤇᤡᤱᤒᤠ ᤁᤧᤖᤧᤰ ᤐᤖᤡᤰᤐᤠ ᤌᤰᤛᤠᤜᤠ᤹ ᤔᤧᤗᤰᤋᤢᤀᤠᤱ ᤁᤧᤒᤵᤐᤠ ᤗᤢᤱᤎᤠᤰᤜᤠ᤹ ᤏᤡᤛᤢᤱ॥ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ᤖᤧ ᤕᤖᤡᤰ ᤐᤖᤡᤰᤐᤠ ᤏᤠᤘᤠᤀᤡᤳᤗᤠᤜᤠ᤹ ᤛᤧᤘᤠ ᤔᤧᤔᤧᤳᤋᤢᤛᤡᤒᤠᤀᤠᤱ ᤀᤠᤱᤃᤠ᤹ ᤏᤡᤛᤢᤱ॥

¹¹ ᤛᤠᤐᤠᤏᤖᤧ ᤁᤢᤛ᤻ᤛᤠ ᤕᤠᤈᤏᤩᤠᤜ᤺ᤴ ᤁᤢᤗᤢᤶᤔᤥ ᤔᤧᤕᤧᤵᤛᤢᤀᤠᤱ ᤏᤢᤒᤥᤱ ᤀᤡᤛᤪᤠᤀᤡᤗᤡ ᤗᤠᤶᤗᤥᤒᤠᤜᤠ᤹ ᤂᤧᤵᤔᤥ ᤛᤥᤖᤡᤰ ᤔᤧᤕᤧᤒᤧ॥ ᤁᤧᤖᤧᤰᤗᤧ ᤛᤢᤰᤐᤠ ᤜᤠ᤺ᤶᤔᤠ ᤛᤠᤱᤋᤧᤖᤧ᤺ᤱ ᤌᤡᤰᤌᤡᤰ ᤜᤢᤰᤁᤥ ᤔᤧᤒᤰᤂᤢ. ᤂᤶᤓᤩᤠᤱ ᤛᤠᤱᤋᤧᤖᤧ᤺ᤱᤜᤠ᤹ᤗᤠᤶ ᤛᤢᤰᤐᤠ ᤔᤡᤰᤂᤢ᤹ᤀᤡᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤧᤃᤣ᤺ᤰᤜᤠ᤹ᤖᤧ ᤌᤠ᤺ᤱ ᤗᤧᤵᤔᤠᤱ ᤛᤢ᤺ᤱᤃᤢ ᤛᤢ᤺ᤱᤃᤢ ᤐᤥᤃᤧᤖ ᤐᤳᤇᤧ॥

¹² ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤔᤧᤵᤋᤠᤱ. “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤏᤠᤀᤣ. ᤂᤠᤃᤧᤔᤠᤰᤐᤠ ᤕᤠᤰᤑᤠᤱᤅᤥ ᤀᤡᤛᤪᤠᤀᤡᤗᤒᤠ ᤗᤠᤶᤗᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤔᤠᤱᤎᤠ᤺ᤴᤜᤠ᤹ᤀᤥ ᤏᤠᤘᤠᤀᤡᤳᤗᤠᤜᤠ᤹ᤏᤢ ᤌᤧᤔᤠ ᤔᤧᤈᤥᤃᤢᤖ ᤔᤧᤕᤠᤰ ᤂᤧᤏᤧ᤹ ᤁᤧᤏᤡᤛᤢᤖ ᤁᤧᤒᤵᤐᤡ᥅ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢᤖ ᤔᤧᤒᤳ. ‘ᤕᤜᤘᤣ ᤍᤠᤱᤒᤧᤸᤗᤧ ᤀᤠᤏᤡ᤹ ᤀᤠᤴᤏᤡᤏᤧᤴ. ᤂᤢᤏᤧ᤹ ᤀᤠᤏᤡ᤹ ᤗᤠᤈᤣᤴ ᤗᤠᤵᤑᤢᤛᤢᤀᤠᤱ ᤏᤧᤖᤥ᥄’”

¹³ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤕᤠᤶᤔᤥ ᤕᤥ᤹ᤖᤢ. “ᤑᤧᤖᤧ᤹. ᤜᤧᤰᤁᤩᤠᤱ ᤁᤴᤜᤠ᤹ᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤕᤠᤶᤃᤧᤛᤡᤱᤒᤠ ᤗᤠᤕᤥᤜᤠ᤹ ᤀᤠᤱᤃᤠ᤹ ᤂᤧᤏᤧ᤹ ᤀᤥ᤺ᤴᤎᤠᤰᤏᤧ᥄”

¹⁴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤒᤠ ᤌᤠᤱᤃᤧᤳ ᤗᤧᤵᤔᤠᤱᤒᤠ ᤕᤶᤒᤠ ᤗᤠᤶᤎᤣ᤺ᤳᤋᤥ ᤂᤢᤏᤧ᤹ ᤋᤠᤖᤠᤱ. ᤜᤧᤰᤁᤩᤠᤱ ᤁᤢᤓᤠ ᤔᤧᤴᤇᤢᤔᤠᤜᤠ᤹ ᤂᤧᤵᤔᤥ ᤋᤶᤔᤢᤈ ᤛᤠᤶᤔᤠᤱᤅᤡᤸᤗᤧ ᤁᤢᤗᤠᤃᤡ ᤔᤧᤜᤠᤒᤧᤖ ᤔᤧᤕᤢᤅᤧ॥

¹⁵ ᤂᤢᤏᤧ᤹ ᤀᤠᤱᤃᤠ᤹ ᤛᤣ᤺ᤴᤗᤠᤵᤋᤠᤱ. “ᤁᤴ ᤂᤧᤏᤧ᤹ ᤁᤧᤏᤡᤛᤢᤀᤡ᥅ ᤁᤖ ᤀᤠᤱᤃᤠ᤹ ᤂᤧᤏᤧ᤹ ᤁᤴᤜᤠ᤹ᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤕᤠᤶᤃᤧᤛᤡᤱᤒᤠ ᤗᤠᤕᤥᤜᤠ᤹ ᤀᤥᤛᤧ᤺ᤴᤎᤠᤰᤏᤧ᥄”

¹⁶ ᤂᤧᤒᤩᤠᤱ ᤂᤢᤏᤧ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶ ᤐᤣᤛᤠᤱᤒᤠ ᤗᤰᤂᤢᤶᤔᤥ ᤀᤠᤱᤃᤠ᤹ ᤋᤠᤖᤠᤱ॥ ᤛᤣᤛᤣᤍᤧᤴᤏᤥ ᤗᤠ᤺ᤵᤔᤠ ᤏᤢ ᤁᤠᤛᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤗᤢᤶᤔᤥ. ᤂᤧᤵᤔᤥ ᤏᤡᤒᤥᤱᤅᤠᤱ ᤅᤠᤛᤡ ᤕᤠᤖᤡᤰ ᤔᤏᤠᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤣᤛᤣᤍᤧᤴ ᤗᤧᤵᤔᤠᤱ ᤂᤢᤴᤇᤡ᤹ ᤀᤣ᤺ᤰᤌᤠ᤺ᤰᤔᤠᤴ ᤔᤧᤜᤡᤛᤢᤀᤠᤱ ᤔᤧᤒᤳᤇᤧ॥ ᤂᤧᤱᤜᤠ᤹ᤖᤧ ᤏᤠᤶᤔᤡᤴ ᤛᤧᤘᤠ ᤔᤧᤔᤧᤳᤋᤢᤖ. ᤂᤠᤶᤒᤠᤱᤅᤥ ᤀ᤺ᤰᤂᤢᤶ ᤔᤧᤓᤴᤇᤡᤱᤅᤠᤱ ᤏᤠᤱᤃᤧᤴ ᤐᤡᤛᤠᤱ ᤋᤰ ᤔᤧᤔᤧᤳᤋᤢᤀᤠᤱ ᤔᤧᤒᤳᤇᤧ॥

¹⁷ ᤂᤢᤏᤧ᤹ ᤛᤣ᤺ᤴᤍᤥᤛᤠᤱ. “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤏᤠᤀᤣ. ᤂᤧᤏᤧ᤹ ᤁᤴ ᤁᤧᤏᤡᤛᤢᤒᤡ᥅ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤔᤏᤠ ᤛᤧᤵᤔᤠᤖᤧ ᤗᤠᤃᤡ ᤗᤠᤶᤔᤧᤗᤥᤛᤢᤛᤡᤒᤠᤴ. ᤀᤠᤱᤃᤠ᤹ ᤛᤠ᤹ᤖᤡᤰ ᤁᤢᤏᤠᤔᤧᤴᤇᤠ᤹ ᤔᤧᤔᤧᤳᤋᤠᤒᤠᤴ ᤏᤢ ᤀᤠᤱᤃᤠ᤹ ᤀᤠᤛᤠᤰᤁᤧᤴ ᤔᤧᤓᤥᤰᤂᤢᤀᤠᤱ ᤕᤜᤢᤍᤠᤒᤠ ᤔᤏᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤁᤴ ᤕᤠᤶᤃᤧᤛᤡᤱᤒᤠ ᤗᤠᤕᤥᤜᤠ᤹ ᤂᤢᤴᤇᤡ᤹ ᤗᤠᤃᤡ ᤌᤧᤔᤠᤀᤠᤱ ᤔᤣ᤺ᤶᤒᤡ᥅

¹⁸ ᤂᤧᤸᤗᤧᤆᤥᤃᤢᤸᤗᤧ. ᤛᤠ᤹ᤖᤡᤰ ᤀᤠᤛᤡᤰ ᤐᤥ᤺ᤰᤔᤥ ᤀᤠᤱᤃᤠ᤹ ᤂᤧᤱᤜᤠ᤹ᤏᤢ ᤐᤠ᤺ᤳᤋᤠ॥ ᤀᤠᤱᤃᤠ᤹ ᤂᤧᤱᤜᤠ᤹ ᤗᤢᤱᤔᤠ᤹ᤀᤠᤱ ᤔᤧᤍᤢᤰᤋᤢᤱᤛᤡᤱᤅᤡᤴ ᤋᤠᤱᤔᤠᤀᤠᤱ ᤔᤧᤍᤠᤱᤄᤢᤱᤛᤡᤱᤅᤡᤴ॥ ᤜᤧᤰᤁᤩᤠᤱ ᤂᤧᤱᤜᤠ᤹ ᤗᤢᤱᤔᤠ᤹ ᤀᤠᤍᤢᤰᤋᤧ᤹ ᤗ᤹ᤖᤡᤰ ᤔᤧᤜᤠ᤺ᤵ ᤔᤧᤈᤡ᤺ᤱᤛᤠᤱ ᤀᤠᤱᤃᤠ᤹ ᤔᤧᤄᤧᤵᤛᤢᤱᤅᤡᤴᤗᤥ॥”