ᤀᤡᤈᤁᤡᤀᤣᤗ 7 - LIFOTNTᤀᤡᤛᤪᤠᤀᤡᤗᤖᤧ ᤁᤢᤏᤢᤵᤔᤠᤴ ᤏᤡ᤺ᤳᤋᤠᤱ ᤘᤠ᤹ 1 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤁᤢᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤁᤧᤖᤧ. 2 “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤏᤠᤀᤣ. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤡᤛᤪᤠᤀᤡᤗᤧᤴ ᤀᤰᤂᤣ ᤔᤧᤳᤋᤢᤖᤥ— “ᤁᤵᤔᤥ ᤁᤢᤏᤢᤵᤔᤠᤴ ᤁᤧᤖᤧᤍᤩᤧᤀᤠᤱ ᤘᤠ᤹ᤖᤥ᥄ ᤏᤠᤱᤃᤧᤴ. ᤏᤠᤶᤎᤠ. ᤌᤠᤱᤃᤧᤳ ᤀᤡᤃᤪ ᤗᤠᤱᤃᤧᤳ ᤜᤧᤏᤧ᤹ ᤀᤠᤳᤋᤠᤴ ᤀᤠᤳᤋᤠᤴ ᤀᤥᤃᤧᤔᤛᤠᤱ ᤁᤧᤗᤠᤈᤣᤴ ᤔᤧᤃᤧᤀᤠᤱ ᤏᤧᤖᤥ॥ 3 ᤏᤡᤱᤛᤠᤱ ᤆᤥ᤺ᤰᤔᤠᤗᤠᤶ ᤌᤧᤔᤠᤀᤠᤱ ᤜᤥᤵᤗᤥ. ᤌᤣᤀᤠᤱᤓᤧᤸᤗᤧ ᤀᤠᤛᤡᤰ ᤐᤥ᤺ᤰᤔᤠᤴ ᤂᤧᤏᤧ᤹ᤀᤥ ᤌᤠᤛᤢᤱᤗᤥ॥ ᤂᤧᤏᤧ᤹ ᤁᤧᤕᤧᤵᤗᤧᤰᤁᤡᤸᤗᤧ ᤁᤢᤗᤧᤰᤘᤠ ᤂᤠᤛᤧᤴ ᤗᤥ᤺ᤴᤏᤧᤖᤥ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤖᤧᤰ ᤛᤡᤰᤁᤧᤗᤧ᤺ᤱᤒᤠ ᤁᤧᤕᤠ᤺ᤶᤒᤰᤁᤡᤸᤗᤧ ᤁᤢᤗᤧᤰᤘᤠ ᤏᤢ᤺ᤰᤋᤢᤱᤗᤥ॥ 4 ᤀᤠᤱᤃᤠ᤹ ᤀᤠᤔᤡᤰᤁᤡᤴ ᤌᤡᤰᤏᤠᤜᤠᤱ ᤜᤡᤛᤢᤱᤍᤣᤛᤢᤱᤗᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤗᤢᤱᤔᤠ᤹ ᤁᤧᤴᤍᤢᤰᤏᤧᤸᤗᤥ॥ ᤂᤧᤏᤧ᤹ ᤁᤧᤈᤥᤃᤢᤒᤠ ᤕᤠᤶᤃᤧᤛᤡᤱᤒᤠ ᤁᤧᤗᤠᤕᤥᤜᤠ᤹ᤖᤧ ᤗᤠᤃᤡ ᤀᤠᤱᤃᤠ᤹ ᤁᤢᤗᤧᤰᤘᤠ ᤏᤢ᤺ᤰᤋᤢᤱᤗᤥ॥ ᤂᤧᤒᤩᤠᤱ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤂᤧᤏᤧ᤹ ᤏᤡᤱᤘᤠ᤹ ᤁᤧᤄᤥᤛᤢᤖᤥ॥” 5 “ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ— ᤔᤧᤱᤄᤧᤶᤔᤣ ᤁᤧᤘᤠ᤹ᤒᤠ ᤔᤧᤰᤔᤠᤛᤡᤔᤧᤴ ᤋᤠᤖ ᤐᤳᤗᤥ᥄ 6 ᤁᤢᤏᤢᤵᤔᤧᤴ ᤋᤩᤧᤀᤠᤱ ᤘᤠ᤹ᤖᤥ॥ ᤁᤧᤖᤧᤰᤏᤢ᤺ᤸᤗᤧ ᤀᤣᤃᤠᤱ ᤁᤢᤏᤢᤵᤔᤠᤴ ᤁᤧᤖᤧᤍᤩᤧᤀᤠᤱ ᤘᤠ᤹ᤖᤥ॥ ᤏᤡᤴᤎᤠᤛᤣ᤺ᤰᤀᤥᤒᤠ ᤁᤧᤔᤧᤰᤔᤧᤸᤗᤧ ᤂᤧᤏᤧ᤹ ᤁᤧᤜᤠᤱᤗ ᤘᤠ᤹ᤖᤥ॥ 7 ᤀᤡᤛᤪᤠᤀᤡᤗᤒᤠ ᤔᤧᤴᤇᤠᤶ ᤕᤠᤵᤔᤡᤛᤣ. ᤂᤡᤏᤡ᤹ ᤔᤧᤰᤔᤠ ᤕᤧᤶᤔᤡᤴ ᤜᤣ᤺ᤰᤛᤡᤱᤗ ᤐᤳᤗᤥ॥ ᤂᤧᤴ ᤕᤧᤶᤔᤡᤴ ᤋᤩᤧᤀᤠᤱ ᤘᤠ᤹ᤖᤥ. ᤋᤢᤰᤂᤣᤘᤠ ᤕᤧᤴᤏᤡᤴ ᤏᤡ᤺ᤳᤋᤠᤱᤅᤣ ᤘᤠ᤹ᤖᤥ॥ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ᤀᤥ ᤀᤠᤏᤠᤰᤏᤠᤰᤐᤠ ᤕᤶᤒᤠ ᤀᤡᤰᤗᤠᤜᤠ᤹ ᤂᤧᤶᤍᤧᤳᤗᤥ. ᤏᤡᤱᤘᤠ ᤋᤠᤔᤠ ᤛ᤺ᤵᤔᤠ ᤀᤡᤰᤗᤠᤜᤠ᤹ᤃ ᤔᤣ᤺ᤴᤗᤥ॥ 8 ᤀᤠᤛᤡᤰ ᤐᤥ᤺ᤰᤔᤠᤴ ᤜᤠᤖᤠᤀᤣ ᤂᤧᤏᤧ᤹ᤀᤥ ᤌᤠᤛᤢᤱᤗᤥ ᤜᤧᤰᤁᤩᤠᤱ ᤀᤠᤕᤠ᤺ᤰᤗᤧ᤹ᤔᤠᤴ ᤂᤧᤏᤧ᤹ᤀᤥ ᤌᤠᤖ ᤕᤠ᤺ᤴᤍᤢᤱᤗᤥ. ᤂᤧᤏᤧ᤹ ᤁᤧᤈᤥᤃᤢᤒᤠ ᤛᤡᤰᤁᤧᤗᤧ᤺ᤱᤒᤠ ᤁᤧᤖᤧᤰ ᤁᤧᤗᤠᤕᤥᤜᤠ᤹ᤖᤧ ᤗᤠᤃᤡ ᤀᤠᤱᤃᤠ᤹ ᤂᤧᤏᤧ᤹ ᤁᤢᤗᤧᤰᤘᤠ ᤏᤢ᤺ᤰᤋᤢᤱ ᤐᤡᤏᤧᤖᤥ॥ 9 ᤀᤠᤱᤃᤠ᤹ ᤀᤠᤔᤡᤰᤁᤡᤴ ᤌᤡᤰᤏᤠᤜᤠᤱ ᤜᤡᤛᤢᤱᤍᤣᤛᤢᤱᤗᤥ ᤜᤧᤰᤁᤩᤠᤱ ᤀᤠᤱᤃᤠ᤹ ᤗᤢᤱᤔᤠ᤹ ᤔᤧᤍᤢᤰᤏᤧᤴᤗᤥ॥ ᤂᤧᤏᤧ᤹ ᤁᤧᤈᤥᤃᤢᤒᤠ ᤁᤧᤖᤧᤰ ᤛᤡᤰᤁᤧᤗᤧ᤺ᤱᤒᤠ ᤁᤧᤗᤠᤕᤥᤜᤠ᤹ᤖᤧ ᤗᤠᤃᤡ ᤀᤠᤱᤃᤠ᤹ ᤂᤧᤏᤧ᤹ᤀᤥ ᤁᤢᤗᤧᤰᤘᤠ ᤏᤢ᤺ᤰᤋᤢᤱᤗᤥ॥ ᤂᤧᤒᤩᤠᤱ ᤂᤧᤏᤧ᤹ ᤂᤢᤶᤍᤡᤱ ᤁᤧᤒᤡᤒᤠ ᤕᤜᤘᤣ ᤍᤠᤱᤒᤠᤴ ᤀᤠᤱᤃᤠ᤹ᤀᤣ ᤑᤠ᤹ᤀᤠᤱ ᤂᤧᤏᤧ᤹ ᤏᤡᤱᤘᤠ᤹ ᤁᤧᤄᤥᤛᤢᤖᤥ॥ 10 “ᤂᤠᤛᤧᤴᤗᤥᤶᤔᤠ ᤕᤧᤴᤏᤡᤴ ᤂᤠ ᤁ᤹ᤕᤥ ᤘᤠ᤹ᤖᤥ. ᤂᤧᤏᤧ᤹ ᤁᤧᤔᤧᤰᤔᤧᤸᤗᤧ ᤁᤧᤜᤠᤱᤗ ᤘᤠ᤹ᤖᤥ᥄ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤜᤧᤴᤌᤡᤶ ᤕᤠᤰᤔᤠ ᤋᤰᤁᤠ᤺ᤳᤋᤡᤴ ᤏᤢ ᤀᤠᤱᤍᤡᤱ ᤗ᤹ᤔᤧᤴ ᤑᤢᤱ ᤁᤢᤀᤡᤛᤡᤰ ᤑᤧᤰᤋᤧᤀᤠᤱ ᤐᤳᤗᤥ॥ 11 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤢ᤹ᤀᤡᤓᤧᤶᤔᤠᤴ ᤗᤳᤇᤠ ᤋᤰᤁᤠ᤺ᤳᤋᤥ ᤐᤥᤖᤧᤀᤠᤱ ᤐᤳᤗᤥ ᤂᤧᤸᤗᤧ ᤂᤢᤴᤇᤡ᤹ ᤑᤧᤴᤕᤠ᤺ᤶᤒᤰᤁᤡᤸᤗᤧ ᤗᤠᤃᤡ ᤜᤡᤵᤋᤢᤛᤡᤖᤥ॥ ᤁᤴ ᤀᤠᤱᤍᤡᤱ ᤁᤧᤗ᤹ᤒᤠ ᤏᤢ ᤁᤢ᤹ᤀᤡᤃᤧᤓᤧᤶᤒᤠ ᤀᤠᤳᤋᤡᤴ ᤔᤏᤠᤜᤠ᤹ᤀᤠᤱ ᤔᤧᤴᤍᤠᤱᤏᤧᤴᤗᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤠᤱᤛᤠᤁᤢᤴᤎᤣ ᤏᤢ ᤂᤢᤴᤇᤡ᤹ ᤔᤡᤱᤛᤥ ᤌᤠ᤺ᤱᤛᤥᤜᤠ᤹ ᤘᤖᤧᤱᤗᤧᤱ ᤔᤠᤒᤣ᤺ᤰᤗᤥ॥ 12 ᤀᤥᤖᤥ. ᤂᤧᤴ ᤕᤧᤶᤔᤡᤴ ᤋᤩᤧᤀᤠᤱ ᤘᤠ᤹ᤖᤥ. ᤂᤧᤴ ᤕᤧᤴᤏᤡᤴ ᤁᤵᤔᤥ ᤘᤠ᤹ᤖᤥ᥄ ᤁᤢᤔᤧᤸᤗᤢᤱ ᤀᤠᤈᤧ᤺ᤳᤇᤡᤰ ᤆᤥ᤺ᤰᤔᤠ ᤐᤠ᤺ᤴᤏᤥ ᤆᤡᤃᤰᤘᤠ᤹ ᤁᤧᤀᤡᤱᤒᤠᤜᤠ᤹ ᤔᤧᤴᤇ᤺ᤳᤏᤧᤴᤗᤖᤥ. ᤜᤧᤰᤁᤩᤠᤱ ᤁᤢᤔᤧᤸᤗᤢᤱ ᤛᤢ᤺ᤸᤗᤡᤰ ᤐᤥ᤺ᤰᤂᤧ ᤑᤠ᤹ᤀᤠᤱ ᤁᤧᤛᤱᤒᤠᤜᤠ᤹ᤀᤠᤱ ᤔᤧᤖᤡᤱ ᤔᤧᤴᤎᤰᤏᤧᤴᤗᤖᤥ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤛᤠ᤹ᤖᤡᤰ ᤁᤡᤵᤔᤠᤃᤧᤄᤢᤒᤠ ᤀᤠᤛᤠᤰᤁᤧᤴᤏᤥ ᤂᤧᤱᤜᤠ᤹ ᤁᤧᤖᤧᤰ ᤔᤧᤎᤠᤖᤥ॥ 13 ᤗᤧᤱᤜᤱ ᤁᤧᤈᤥ᤺ᤰᤐᤠᤜᤠ᤹ ᤔᤧᤍᤠᤱ ᤔᤧᤕᤠ᤺ᤰᤛᤠᤱ ᤂᤧᤱᤜᤠ᤹ ᤂᤢᤴᤇᤡ᤹ ᤗᤧᤱᤜᤱᤅᤥ ᤕᤠᤶᤔᤥ ᤀᤠᤓᤧᤸᤗᤧᤀᤠᤱ ᤔᤧᤴᤏᤢ᤺ᤱᤏᤧᤴᤗᤥ॥ ᤌᤣᤀᤠᤱᤓᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢᤒᤠᤴ ᤁᤧᤖᤧᤰᤁᤥ ᤆᤢᤰᤗᤥ ᤁᤴ ᤐᤠ᤺ᤴᤜᤠ᤹ ᤔᤧᤗᤧᤱᤏᤧᤸᤗᤥ᥄ ᤗᤠᤕᤥᤸᤗᤧ ᤌᤡᤰᤏᤠᤜᤠᤱ ᤜᤡᤛᤢᤍᤧᤛᤢᤒᤠ ᤀᤠᤳᤋᤡᤴ ᤔᤏᤠ᤺ᤸᤗᤧ ᤁᤢᤜᤡᤱᤔᤧᤴᤏᤠᤱ ᤕᤠᤶᤔᤥ ᤔᤧᤏᤢ᤺ᤱᤏᤧᤴᤗᤥ॥” ᤀᤡᤛᤪᤠᤀᤡᤗᤧᤴ ᤆᤡᤈᤡ ᤂᤰᤂᤰ ᤐᤥᤱ᤹ 14 “ᤀᤡᤛᤪᤠᤀᤡᤗᤒᤠ ᤌᤰᤛᤢᤒᤠᤜᤠ᤹ ᤐᤠᤱᤔᤠᤛᤡᤖᤧ ᤗᤠᤃᤡ ᤌᤢᤳᤋᤢᤖᤡ᤺ᤵᤐᤠᤸᤗᤧ ᤂᤧᤱᤜᤠ᤹ ᤀᤢ᤺ᤳᤋᤢᤛᤡᤖᤥ. ᤁᤖ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤔᤧᤱᤄᤧᤵᤛᤢᤴᤗᤥ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤛᤠ᤹ᤖᤡᤰ ᤀᤠᤛᤡᤰ ᤐᤥ᤺ᤰᤔᤠᤴ ᤂᤧᤱᤜᤠ᤹ ᤁᤧᤖᤧᤰᤗᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤘᤠᤖᤥ॥ 15 ᤕᤧᤰᤕᤰ ᤗᤠ᤺ᤰᤁᤠᤳ ᤗᤧᤵᤔᤠᤱ ᤌᤱ ᤐᤥᤱᤗ ᤘᤠ᤹ᤖᤥ ᤜᤧᤰᤁᤩᤠᤱ ᤛᤡᤃᤠᤱ ᤗᤧᤵᤔᤠᤱ ᤔᤡᤱᤍᤣ᤹ ᤏᤢ ᤛᤠᤰᤘᤠᤴ ᤘᤠ᤹ᤖᤥ॥ ᤕᤧᤰᤕᤰᤁᤥᤒᤠ ᤗᤢᤱᤎᤠᤰ ᤗᤠ᤺ᤰᤁᤠᤳ ᤁᤧᤘᤠ᤹ᤒᤠᤜᤠ᤹ ᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤋᤠᤓᤣ᤺ᤸᤗᤧ ᤔᤧᤛᤡᤖᤥ॥ ᤕᤧᤰᤕᤰᤁᤥᤒᤠ ᤗᤢᤱᤎᤠᤰ ᤛᤡᤃᤠᤱ ᤁᤧᤘᤠ᤹ᤒᤠᤜᤠ᤹ ᤛᤠᤰᤘᤠᤴ ᤏᤢ ᤋᤢᤰᤔᤠ ᤗᤠ᤺ᤰᤔᤠᤖᤧ ᤔᤧᤛᤡᤖᤥ॥ 16 ᤁᤧᤖᤧᤰ ᤁᤧᤜᤡᤱᤒᤠᤀᤠᤱ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ᤀᤥ ᤁᤧᤄᤧᤳᤇᤡᤱᤒᤠ ᤁᤧᤒᤣ᤺ᤰᤐᤠᤜᤠ᤹ ᤏᤧᤏᤧᤒᤠᤍᤧᤴᤜᤠ᤹ᤀᤥᤒᤠ ᤐᤢᤳᤋᤢ᤺ᤰᤁᤣᤜᤠ᤹ ᤁᤢᤀᤡᤛᤡᤰ ᤔᤧᤖᤡᤱ ᤔᤧᤎᤰᤗᤥ. ᤂᤧᤱᤜᤠ᤹ ᤂᤢᤴᤇᤡ᤹ ᤗᤠᤕᤥᤸᤗᤧ ᤗᤠᤃᤡ ᤔᤧᤜᤠ᤺ᤵᤗᤥ॥ 17 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤜᤠ᤹ ᤋᤧᤸᤗᤥᤰ ᤋᤧᤸᤗᤥᤰ ᤗ᤹ᤖᤥ. ᤜᤧᤰᤁᤩᤠᤱ ᤂᤢᤴᤇᤡ᤹ ᤌᤢᤱᤒᤥᤜᤠ᤹ ᤔᤧᤴᤎᤢᤶᤔᤏᤠᤒᤠ ᤐᤥᤱᤗᤥ॥ 18 ᤂᤧᤱᤜᤠ᤹ ᤀᤠᤵᤑᤣᤰ ᤛᤃᤡᤋᤣᤳ ᤔᤧᤈᤠᤰᤛᤡᤱᤗᤥ. ᤂᤧᤱᤜᤠ᤹ ᤁᤡᤔᤠ ᤕᤱᤔᤠ ᤏᤢ ᤏᤠᤎᤠᤔᤧᤸᤗᤧ ᤛᤢ᤺ᤵᤋᤢᤛᤡᤖᤥ॥ ᤏᤡᤱᤘᤠ᤹ ᤋᤢᤰᤂᤣ ᤆᤠᤔᤠ ᤏᤢ ᤗᤠᤕᤥᤗᤠᤶ ᤜᤡᤶᤔᤠᤖᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤧᤃᤣᤰᤐᤠᤴ ᤔᤧᤏ᤺ᤰᤂᤢᤖᤥ॥ 19 “ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤠᤱᤜᤠ᤹ ᤔᤠᤖᤠᤶᤜᤠ᤹ᤀᤥ ᤗᤠᤵᤔᤧᤍᤣᤛᤢᤖᤥ. ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤋᤠᤶᤈᤡ᤹ ᤁᤢᤀᤡᤛᤡᤰ ᤗᤠᤵᤔᤧᤓᤢᤛᤢᤖᤥ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤛᤡᤰ ᤐᤥ᤺ᤰᤐᤠ ᤕᤧᤴᤏᤥ ᤂᤧᤱᤜᤠ᤹ ᤂᤢᤴᤇᤡ᤹ ᤛᤠᤶᤔᤩᤠᤱ ᤕᤢᤵᤐᤠ᤺ᤸᤗᤧ ᤔᤧᤛᤧ᤺ᤵᤋᤢᤛᤡᤴᤗᤥ॥ ᤁᤸᤗᤧ ᤂᤢᤴᤇᤡ᤹ ᤛᤡᤰᤁᤠᤱ ᤔᤧᤀᤣ᤺ᤵᤋᤢᤴᤗᤥ ᤂᤧᤱᤜᤠ᤹ ᤆᤠᤔᤠ ᤁᤢᤈᤠᤀᤠᤱ ᤔᤧᤒᤡᤖᤢᤛᤡᤴᤗᤥ. ᤌᤣᤀᤠᤱᤓᤧᤸᤗᤧ ᤂᤢᤴᤇᤡ᤹ ᤂᤡ᤺ᤶᤕᤰ ᤆᤥ᤺ᤰᤔᤠᤸᤗᤧ ᤂᤧᤱᤜᤠ᤹ ᤗᤠᤕᤥ ᤆᤥ᤺ᤰᤔᤠᤖᤰ ᤐᤠᤱᤄᤢᤛᤡᤖᤥ॥ 20 ᤂᤧᤱᤜᤠ᤹ ᤂᤢᤴᤇᤡ᤹ ᤏᤢᤒᤠ ᤘᤠ᤺ᤳᤋᤡ ᤛᤠᤔᤠᤜᤠ᤹ᤀᤥ ᤀᤠᤱᤍᤡᤱ ᤔᤧᤗ᤹ᤖᤧᤀᤠᤱ ᤔᤧᤘᤠ᤹ᤖᤥ ᤜᤧᤰᤁᤩᤠᤱ ᤁᤴ ᤕᤠᤶᤃᤧᤛᤡᤱᤒᤠ ᤏᤠᤘᤠᤀᤡᤳᤗᤠᤜᤠ᤹ ᤏᤢ ᤋᤠᤵᤑᤧ᤺ᤶᤒᤠ ᤆᤀᤡ᤺ᤳᤜᤠ᤹ ᤆᤥ᤺ᤰᤔᤠᤖᤧ ᤗᤠᤃᤡ ᤀᤥᤃᤵ ᤔᤧᤈᤥᤃᤢᤖᤥ॥ ᤂᤧᤸᤗᤧᤆᤥᤃᤢᤸᤗᤧ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤠᤱᤛᤠᤁᤢᤴᤎᤣᤜᤠ᤹ ᤀᤠᤱᤃᤠ᤹ ᤂᤢᤴᤇᤡ᤹ ᤗᤠᤃᤡ ᤕᤠᤶᤃᤧᤛᤡᤱᤒᤠ ᤆᤥᤃᤢᤱ ᤐᤡᤖᤢᤱᤛᤡᤱᤗᤥ॥ 21 ᤛᤠ᤹ᤖᤡᤰ ᤁᤢ᤹ᤀᤡᤃᤧᤓᤧᤶᤒᤠ ᤘᤣ᤹ ᤗᤠᤈᤣ᤹ᤒᤠ ᤛᤢᤘᤠᤱᤜᤠ᤹ᤖᤧ ᤆᤡᤃᤰᤘᤠ ᤜᤧᤰᤁᤣ ᤀᤠᤱᤃᤠ᤹ ᤁᤴ ᤔᤧᤏᤠᤵᤋᤢᤖ ᤕᤠ᤺ᤴᤍᤢᤱᤗᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤁᤴ ᤀᤠᤛᤢᤳᤌᤥ ᤔᤧᤈᤥᤃᤢᤖᤥ॥ 22 ᤁᤴ ᤁᤧᤏᤠᤵᤐᤠᤜᤠ᤹ᤖᤧ ᤗᤠᤈᤣᤴ ᤔᤧᤗᤡᤛᤢ ᤔᤧᤍᤠᤖᤢᤸᤗᤧ ᤜᤧᤰᤁᤩᤠᤱ ᤕᤠᤱᤛᤠᤁᤢᤴᤎᤣᤒᤠ ᤀᤠᤗᤠᤈᤣᤴ ᤔᤧᤈᤡ᤺ᤴᤍᤢᤸᤗᤧ ᤂᤧᤱᤜᤠ᤹ᤗᤠᤶ ᤀᤠᤱᤃᤠ᤹ ᤀᤠᤏᤠᤖᤠᤴ ᤌᤡᤰᤏᤠᤜᤠᤱ ᤜᤡᤛᤢᤱᤗᤥ॥ 23 “ᤀᤠᤔᤏᤠᤜᤠ᤹ᤖᤧ ᤗᤠᤃᤡ ᤌᤰᤁᤪᤱᤜᤠ᤹ ᤕᤠᤖᤡᤵ ᤆᤥᤃᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤁᤡᤵᤔᤠ ᤁᤧᤄᤢᤒᤠ ᤔᤏᤠᤛᤧᤵᤔᤠ ᤕᤠ᤺ᤶᤒᤰᤜᤠ᤹ᤖᤧ ᤗᤠᤈᤣᤴ ᤔᤠᤰᤂᤡ᤹ ᤀᤡᤛᤣ᤺ᤱᤒᤠ ᤐᤥ᤺ᤰᤂᤧᤀᤠᤱ ᤏᤧᤖᤥ॥ ᤁᤢ᤹ᤀᤡᤓᤧᤶᤔᤠ ᤐᤠ᤺ᤴᤏᤡᤸᤗᤧ ᤕᤖᤢᤛᤗᤧ᤺ᤶᤔᤡᤴ ᤋᤡᤶᤛᤧᤀᤠᤱ ᤏᤧᤖᤥ॥ 24 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤎᤠ᤺ᤱᤜᤠ᤹ ᤕᤢᤰᤔᤠᤖᤧ ᤗᤠᤃᤡ ᤁᤧᤖᤧᤰᤏᤢ᤺ᤸᤗᤧ ᤁᤢ᤹ᤀᤡᤃᤧᤓᤧᤶᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤋᤠᤖᤢᤱᤛᤡᤱᤗᤥ॥ ᤂᤧᤱᤜᤠ᤹ᤖᤧ ᤔᤧᤜᤧᤴᤍᤢᤒᤠ ᤂᤢᤴᤇᤡ᤹ ᤔᤢᤰᤛᤠᤶᤔᤡᤴ ᤔᤧᤰᤂᤢᤱᤗᤥ ᤂᤶᤓᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤣᤛᤣᤍᤧᤴᤜᤠ᤹ ᤀᤠᤛᤢᤳᤌᤥ ᤆᤥᤃᤢᤱᤗᤥ॥ 25 ᤁᤡᤔᤠ ᤏᤢ ᤕᤱᤔᤠ ᤛᤡᤔᤠᤸᤗᤧ ᤀᤠᤔᤏᤠᤜᤠ᤹ ᤑᤳᤋᤢᤛᤡᤖᤥ॥ ᤂᤧᤱᤜᤠ᤹ᤖᤧ ᤏᤢ᤹ᤔᤠᤍᤠᤔᤠ ᤛᤏᤠᤖᤢᤱ ᤗᤠᤶ ᤀᤥᤔᤧᤔᤧᤳᤋᤢᤖᤥ ᤁᤖ ᤂᤧᤱᤜᤠ᤹ᤖᤧ ᤀᤠᤵᤑᤠᤸᤗᤧᤀᤠᤱ ᤔᤧᤱᤄᤥᤛᤢᤴᤗᤥ॥ 26 ᤕᤧᤳᤋᤢᤰᤂᤣ᤺ᤸᤗᤧ ᤁᤢᤛᤶᤎᤠᤱ ᤕᤧᤳᤋᤢᤰᤂᤣ ᤋᤠᤖᤥ. ᤜᤧᤰᤁᤩᤠᤱ ᤜᤕᤱᤁᤡᤸᤗᤡᤱᤗᤧ ᤁᤢᤈᤰ ᤜᤕᤱᤁᤡᤸᤗᤡᤱ ᤐᤥᤱᤍᤠᤖᤥ॥ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤗᤠᤶ ᤗᤳᤇᤠ ᤛᤢᤑᤥᤖᤧ ᤗᤠᤃᤡ ᤂᤧᤱᤜᤠ᤹ᤖᤧ ᤌᤣᤏᤠᤎᤣ ᤗᤠᤶ ᤀᤥᤔᤧᤔᤧᤳᤋᤢᤖᤥ॥ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤗᤠᤶ ᤏᤡᤛᤠᤶ ᤔᤧᤱᤄᤥᤛᤢᤴᤗᤥ ᤜᤧᤰᤁᤩᤠᤱ ᤗᤠᤶᤗᤥᤒᤠᤜᤠ᤹ᤗᤠᤶ ᤂᤧᤱᤜᤠ᤹ᤖᤧ ᤛᤢᤈᤠ ᤔᤧᤱᤄᤥᤛᤢᤴᤗᤥ॥ 27 ᤜᤠᤱᤅᤡᤴ ᤏᤢ ᤕᤢᤰᤛᤠᤒᤠᤴ ᤂᤢᤴᤇᤡ᤹ ᤏᤡᤱᤘᤠ᤹ ᤐᤱᤗᤥ. ᤜᤧᤰᤁᤩᤠᤱ ᤁᤧᤓᤠ᤹ᤒᤠ ᤔᤣ᤺ᤴᤏᤣ ᤕᤧᤵᤛᤡᤈᤠᤛᤡᤖᤥ. ᤂᤧᤒᤩᤠᤱ ᤁᤡᤔᤠ ᤕᤱᤔᤠᤖᤧ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤜᤠ᤹ ᤕᤱᤗᤥ॥ ᤂᤧᤱᤜᤠ᤹ᤖᤧ ᤘᤣ᤹ᤜᤠ᤹ ᤔᤧᤔᤧᤳᤋᤢᤛᤡᤒᤠ ᤋᤠᤵᤑᤧ᤺ᤶᤒᤠ ᤐᤠ᤺ᤴᤏᤡᤴ ᤀᤠᤱᤃᤠ᤹ ᤂᤢᤴᤇᤡ᤹ᤀᤥ ᤋᤠᤖᤢᤱᤗᤥ. ᤜᤧᤰᤁᤩᤠᤱ ᤛᤠ᤹ᤖᤡᤰᤁᤣ ᤂᤥᤔᤠ ᤔᤧᤕᤠᤖᤢᤒᤠ ᤂᤢᤶᤍᤡᤱᤅᤡᤴ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤋᤠᤖᤢᤱᤗᤥ॥ ᤂᤧᤒᤩᤠᤱ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢᤖᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.