ᤀᤡᤈᤁᤡᤀᤣᤗ 6 - LIFOTNT

ᤀᤡᤛᤪᤠᤀᤡᤗᤒᤠ ᤁᤥ᤺ᤰᤔᤠᤜᤠ᤹ᤖᤧ ᤁᤢᤍᤰᤗᤧᤱᤘᤠᤀᤥ ᤔᤠᤱᤏᤡᤱᤘᤠ᤹ᤐᤠᤴ

¹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤕᤠᤶᤔᤥ ᤀᤠᤱᤃᤠ᤹ᤀᤥ ᤁᤧᤖᤧ—

² “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤏᤠᤀᤣ. ᤀᤡᤛᤪᤠᤀᤡᤗᤒᤠ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ ᤗᤧᤵᤔᤠᤱ ᤁᤧᤏᤠᤖᤠᤴ ᤜᤡᤛᤧ᤹ ᤜᤧᤰᤁᤩᤠᤱ ᤂᤧᤴ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ᤖᤧ ᤁᤢᤍᤰᤗᤧᤱᤘᤠᤀᤥ ᤔᤠᤱᤏᤡᤱᤘᤠ᤹ᤐᤠᤴ ᤐᤠ᤺ᤳᤋᤧ᤹॥

³ ᤀᤡᤛᤪᤠᤀᤡᤗᤒᤠ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤛᤣ. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤗᤠᤶ ᤁᤴ ᤀᤡᤱᤄᤱᤅᤡᤴ ᤂᤧᤵᤛᤧᤶᤔᤧ᤹॥ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤵᤑᤣᤰᤁᤣ ᤁᤥ᤺ᤰᤔᤠ ᤑᤠᤱᤈᤱᤜᤠ᤹. ᤌᤧᤃᤢ ᤔᤠᤱᤘᤠᤜᤠ᤹ ᤜᤧᤰᤁᤩᤠᤱ ᤐᤠᤰᤗᤢᤶᤗᤢᤶᤒᤠ ᤏᤢ ᤏᤧᤏᤧᤒᤠᤍᤧᤴᤜᤠ᤹ ᤀᤰᤂᤣ ᤔᤧᤳᤋᤢᤛᤡ᤹—ᤀᤠᤱᤃᤠ᤹ ᤂᤡᤏᤡ᤹ ᤛᤶᤎᤠᤱ ᤋᤧᤴᤎᤱ ᤋᤠ᤺ᤵᤔᤠ ᤆᤥᤃᤢᤱ᤹. ᤂᤧᤒᤩᤠᤱ ᤂᤡᤏᤡ᤹ᤀᤥ ᤁᤧᤏᤧᤒᤠ ᤏᤠᤘᤠᤀᤡᤳᤗᤠ ᤛᤧᤘᤠ ᤔᤧᤵᤔᤠᤍᤧᤴᤜᤠ᤹ ᤑᤕ᤺ᤵᤑᤕ᤺ᤵ ᤕ᤺ᤵᤛᤢᤱ᤹॥

⁴ ᤂᤡᤏᤡ᤹ᤀᤥ ᤁᤧᤏᤧᤒᤠ ᤁᤧᤖᤧᤰ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ ᤔᤧᤗᤢ᤺ᤴᤍᤢ᤹. ᤜᤧᤰᤁᤩᤠᤱ ᤂᤡᤏᤡ᤹ᤀᤥ ᤁᤧᤏᤧᤒᤠ ᤛᤢᤰᤐᤠ ᤜᤠ᤺ᤶᤔᤠᤍᤧᤴᤜᤠ᤹ ᤂᤠᤵᤐᤢᤌᤩ᤺ᤱ ᤔᤧᤈᤥᤃᤢ᤹॥ ᤂᤡᤏᤡ᤹ᤀᤥ ᤁᤧᤕᤢᤱᤒᤠ ᤏᤠᤘᤠᤀᤡᤳᤗᤠᤜᤠ᤹ ᤋᤃᤡ ᤂᤡᤏᤡ᤹ᤀᤥ ᤁᤧᤘᤠ᤹ᤒᤠ ᤔᤏᤠᤜᤠ᤹ ᤛᤧᤖᤢᤱᤛᤡᤱ᤹॥

⁵ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤆᤣᤜᤠ᤹ ᤂᤢᤴᤇᤡ᤹ ᤏᤠᤘᤠᤀᤡᤳᤗᤠᤜᤠ᤹ ᤋᤃᤡ ᤏᤧᤛ᤻ᤛᤢᤱᤛᤡᤱ᤹ ᤜᤧᤰᤁᤩᤠᤱ ᤂᤡᤏᤡ᤹ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ ᤁᤧᤖᤧᤰ ᤐᤡᤛᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤧᤵᤐᤠᤜᤠ᤹ ᤛᤧᤛᤢᤱ ᤏᤧᤛ᤻ᤛᤢᤱ᤹॥

⁶ ᤂᤡᤏᤡ᤹ ᤀᤠᤳᤋᤡ ᤀᤠᤳᤋᤡ ᤁᤧᤕᤢᤅᤡ᤹ ᤂᤧᤵᤔᤥ ᤆᤡᤈᤡ ᤂᤰᤂᤰ ᤐᤥᤱ᤹. ᤜᤧᤰᤁᤩᤠᤱ ᤁᤢᤛᤡᤱ ᤏᤡ᤺ᤳᤔᤧᤴᤍᤧᤵᤔᤏᤠᤒᤠ ᤂᤡᤏᤡ᤹ ᤔᤠᤱᤛᤧᤘᤠ ᤆᤥ᤺ᤰᤔᤠᤍᤧᤴᤜᤠ᤹ ᤂᤠᤵᤐᤢᤌᤩ᤺ᤱ ᤆᤥᤃᤢᤱ᤹॥ ᤂᤡᤏᤡ᤹ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ ᤔᤧᤗᤢ᤺ᤴᤍᤢ᤹. ᤂᤡᤏᤡ᤹ ᤏᤠᤘᤠᤀᤡᤳᤗᤠᤜᤠ᤹ ᤑᤕ᤺ᤵᤑᤕ᤺ᤵ ᤔᤧᤕ᤺ᤵᤛᤢ᤹. ᤂᤡᤏᤡ᤹ ᤛᤢᤰᤐᤠ ᤜᤠ᤺ᤶᤔᤠᤍᤧᤴᤜᤠ᤹ ᤔᤧᤎᤢᤵᤛᤢ᤹. ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤈᤥᤃᤢᤶᤒᤠ ᤁᤧᤖᤧᤰ ᤛᤠᤶᤕᤥᤒᤠ ᤀᤡᤳᤜᤠ᤹ ᤂᤠᤵᤐᤢᤌᤩ᤺ᤱ ᤐᤥᤱ᤹॥

⁷ ᤔᤧᤛᤧᤖᤢᤛᤡᤒᤠ ᤂᤡᤏᤡ᤹ ᤔᤏᤠᤜᤠ᤹ ᤂᤡᤏᤡ᤹ ᤗᤢᤶᤔᤥᤀᤣ ᤔᤧᤈᤥᤴ᤹. ᤜᤧᤰᤁᤩᤠᤱ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤂᤡᤏᤡ᤹ ᤏᤡᤱᤘᤠ᤹ ᤁᤧᤄᤥᤛᤢᤶ᤹॥

⁸ “ᤁᤖ ᤀᤠᤱᤃᤠ᤹ ᤆᤒᤧ᤺ᤳᤇᤡᤰ ᤀᤠᤔᤏᤠᤜᤠ᤹ ᤂᤠᤵᤐᤢᤌᤩ᤺ᤱ ᤐᤥᤱᤔᤠᤗᤠᤶ ᤔᤧᤄᤧᤳᤇᤡᤱᤗ ᤕᤠ᤺ᤴᤍᤢᤱᤛᤡᤱ᤹. ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤑᤢᤳᤇᤡᤱᤈᤩᤠᤱ ᤔᤧᤛᤧᤖᤥ॥

⁹ ᤂᤧᤒᤩᤠᤱ ᤂᤧᤱᤜᤠ᤹ ᤔᤧᤴᤇᤠᤶ ᤛᤢᤘᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤸᤗᤧ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤏᤡᤱᤘᤠ᤹ ᤔᤧᤀᤡ᤺ᤳᤋᤠ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤡᤱᤗᤧᤰᤐᤠ ᤏᤡᤱᤘᤠ᤹ ᤏᤢ ᤂᤢᤴᤇᤡ᤹ ᤏᤠᤘᤠᤀᤡᤳᤗᤠᤜᤠ᤹ ᤛᤡᤖᤠ᤹ᤌᤠᤱᤒᤠ ᤋᤠᤵᤑᤧ᤺ᤶᤒᤠ ᤔᤡᤰᤗᤥ ᤗᤠᤶᤔᤠᤸᤗᤧ ᤀᤠᤱᤃᤠ᤹ ᤀᤠᤰᤂᤩᤠᤖᤡᤰ ᤀᤠᤏᤡᤱᤘᤠ᤹ ᤋᤢᤰ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢ᤹॥ ᤂᤧᤒᤩᤠᤱ ᤏᤡᤴᤎᤠᤛᤣ᤺ᤰᤀᤥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤛᤡᤰᤁᤧᤗᤧ᤺ᤱᤒᤠ ᤗᤠᤕᤥᤜᤠ᤹ᤖᤧ ᤆᤥᤃᤢᤸᤗᤧ ᤂᤢᤴᤇᤡ᤹ ᤀᤠᤵᤑᤣᤰ ᤔᤧᤈᤡ᤺ᤳᤇᤡᤱ᤹॥

¹⁰ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤜᤏᤧ ᤋᤠᤵᤑᤧ᤺ᤶᤒᤠ ᤐᤠ᤺ᤴᤏᤡᤴ ᤋᤠᤖᤢᤱ ᤐᤠ᤺ᤳᤋᤢᤱᤒᤠ ᤔᤧ᤺ᤴᤗᤳᤇ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤖᤥ॥

¹¹ “ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ᤖᤧ ᤕᤠᤶᤃᤧᤛᤡᤱᤒᤠ ᤗᤠᤕᤥ ᤔᤧᤈᤥᤃᤢᤀᤠᤱ ᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤀ᤺ᤰᤋᤧᤶᤔᤧ᤹. ᤜᤢᤰᤋᤠᤵᤐᤣ᤺ᤴ ᤑᤰᤂᤧᤶᤔᤧ᤹. ᤂᤡᤏᤡ᤹ ᤗᤠᤱᤜᤠ᤹ ᤌᤠᤵᤛᤧᤶᤔᤧ᤹॥ ᤀᤠᤸᤗ ᤂᤧᤱᤜᤠ᤹ ᤌᤱ. ᤛᤠᤰ ᤏᤢ ᤔᤡᤱᤍᤣ᤹ᤗᤠᤶ ᤛᤡᤔᤠ ᤔᤧᤈᤥᤰ॥

¹² ᤔᤠ᤺ᤱᤄᤠ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤀᤠᤱ ᤁᤧᤘᤠ᤹ᤒᤠᤜᤠ᤹ ᤋᤢᤰᤔᤠ ᤗᤠ᤺ᤰᤔᤠᤖᤧ ᤋᤖᤢᤛᤡ᤹॥ ᤏᤡ᤺ᤳᤋᤠᤱ ᤁᤧᤘᤠ᤹ᤒᤠᤜᤠ᤹ ᤋᤧᤴᤎᤱᤅᤡᤸᤗᤧ ᤔᤧᤰᤂᤢᤛᤡ᤹॥ ᤜᤧᤰᤁᤩᤠᤱ ᤁᤢᤓᤠ ᤁᤧᤜᤡᤱᤒᤠᤜᤠ᤹ ᤛᤠᤰᤁᤡᤸᤗᤧ ᤋᤖᤢ ᤛᤧᤖᤢᤛᤡ᤹॥ ᤜᤧᤰᤁᤣᤗ᤹ᤖᤡᤰ ᤁᤢᤏᤢᤵᤔᤥ ᤀᤠᤱᤃᤠ᤹ ᤀᤠᤛᤠᤰᤁᤧᤴᤏᤡᤴ ᤂᤧᤱᤜᤠ᤹ᤀᤥ ᤌᤠᤛᤢᤱ᤹॥

¹³ ᤜᤧᤰᤁᤩᤠᤱ ᤁᤧᤖᤧᤰ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ᤀᤥᤒᤠ ᤔᤠᤱᤎᤠ᤺ᤴᤜᤠ᤹ᤀᤥ ᤜᤧᤰᤁᤩᤠᤱ ᤁᤧᤖᤧᤰ ᤛᤖᤣ᤺ᤰᤕᤠ᤺ᤵᤐᤠ ᤛᤡᤱᤒᤢᤱ ᤛᤡᤃᤠᤱ ᤏᤢ ᤁᤧᤖᤧᤰ ᤜᤢᤶᤒᤧᤵᤐᤠ ᤕᤶᤒᤠ ᤛᤡᤱᤒᤢᤱᤜᤠ᤹ᤖᤧ ᤀᤡ᤺ᤵᤋᤢᤒᤠᤍᤧᤴᤏᤥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤠᤘᤠᤀᤡᤳᤗᤠᤜᤠ᤹ ᤛᤡᤍᤢᤱᤈᤓᤠ ᤔᤧᤒᤡᤖᤢᤛᤡᤒᤠ ᤋᤧᤴᤜᤠ᤹ᤀᤥ ᤂᤢᤴᤇᤡ᤹ ᤏᤠᤘᤠᤀᤡᤳᤜᤠ᤹ ᤗᤢᤶᤔᤥ ᤂᤢᤴᤇᤡ᤹ ᤔᤏᤠ ᤆᤣᤜᤠ᤹ ᤜᤳᤇᤧ ᤔᤧᤛᤧᤀᤠᤱ ᤔᤧᤏᤧ᤺ᤸᤗᤧ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢ᤹॥

¹⁴ ᤌᤠᤱᤃᤧᤳ ᤁᤧᤏᤧᤒᤠ ᤖᤡᤒ᤻ᤗᤠᤀᤠᤱ ᤗᤠᤱᤃᤧᤳ ᤗᤧᤵᤔᤠᤱᤒᤠ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴᤗᤠᤶ ᤀᤠᤱᤃᤠ᤹ ᤂᤧᤱᤜᤠ᤹ ᤂᤠᤵᤐᤢᤌᤩ᤺ᤱ ᤆᤥᤃᤢᤱᤛᤡᤱ᤹ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤧᤰᤕᤰᤜᤠ᤹ ᤆᤡᤈᤡ ᤂᤰᤂᤰᤐᤠ ᤆᤥᤃᤢᤱ᤹॥ ᤂᤧᤒᤩᤠᤱ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢ᤹॥”