ᤀᤡᤈᤁᤡᤀᤣᤗ 5 - LIFOTNT

ᤁᤧᤍᤠᤒᤠ ᤂᤠᤛᤧᤴᤏᤡᤸᤗᤧ ᤗᤠᤃᤡ ᤔᤡᤰᤛᤣᤴ

¹ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤔᤧᤳᤋᤠᤱ. “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤏᤠᤀᤣ. ᤂᤧᤏᤧ᤹ ᤗᤳᤇᤠ ᤂᤠᤃᤧᤛᤢᤰᤐᤠ ᤋᤠᤓᤣᤎᤡᤰ ᤕᤠᤱᤛᤡᤱᤅᤧ᤹ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤶᤎᤥᤀᤡᤴ ᤏᤢ ᤁᤢᤎᤣᤃᤣ᤺ᤰᤀᤡ᤺ᤴ ᤏ᤺ᤱᤔᤠᤖᤧ ᤗᤠᤃᤡ ᤇᤢᤖᤠ ᤜᤧᤰᤁᤣ ᤁᤴ ᤕᤠᤅᤧ᤹॥ ᤛᤢᤶᤛᤡ ᤁᤢᤍᤱᤒᤠ ᤗᤰᤁᤥ ᤁᤧᤎᤣᤃᤣᤰ ᤔᤢᤖᤡᤰᤁᤡᤴ ᤌᤠᤱᤔᤠᤖᤧ ᤗᤠᤃᤡ ᤗᤳᤇᤠ ᤋᤧᤶᤍᤢᤖᤡ ᤀᤥᤃᤵ ᤆᤥᤃᤧ᤹॥

² ᤁᤧᤈᤀᤡ᤺ᤳᤛᤠᤵ ᤕᤖᤢᤛᤗᤧ᤺ᤶᤔᤡᤸᤗᤧ ᤁᤢᤗᤢᤶᤔᤥ ᤁᤸᤗᤧ ᤁᤢᤗᤰ ᤌᤡᤰ ᤏᤧᤛ᤻ᤛᤧ᤹॥ ᤌᤱᤅᤥ ᤁᤡᤷᤃᤵ ᤁᤵᤔᤠ ᤁᤧᤗᤧᤱᤛᤡᤱᤒᤠ ᤕᤠ᤺ᤶᤒᤰᤁᤡᤴ ᤆᤢ᤺ᤳᤋᤠᤱ ᤁᤢᤗᤰ ᤌᤡᤰ ᤂᤧᤵᤔᤥ ᤜᤠ᤺ᤴᤍᤧᤍᤣᤛᤧ᤹॥ ᤘᤣ᤹ ᤁᤢᤗᤰ ᤌᤡᤰᤁᤧᤴ ᤂᤧᤏᤧ᤹ ᤁᤧᤛᤠᤵᤆᤀᤡ᤺ᤳ ᤁᤧᤖᤧᤰ ᤐᤡᤛᤠᤱ ᤛᤧᤛᤧᤍᤣᤛᤧ᤹ ᤜᤧᤰᤁᤩᤠᤱ ᤋᤠᤓᤣ᤺ᤸᤗᤧ ᤆᤠᤰᤂᤰ ᤆᤠᤰᤂᤰ ᤂᤰᤋᤧ᤹॥ ᤁᤢᤏᤢᤵᤔᤠ ᤘᤣ᤹ ᤁᤢᤗᤰ ᤌᤡᤰᤁᤧᤴ ᤛᤢᤖᤡᤳ ᤁᤣᤈᤱᤅᤥ ᤑᤢᤳᤗᤢᤶ ᤌᤩ᤺ᤱ ᤛᤧᤛᤧᤍᤣᤛᤧ᤹. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤋᤠᤓᤣ᤺ᤸᤗᤧ ᤑᤢᤳᤇᤡᤱᤈᤩᤠᤱ ᤛᤧᤛᤢᤱᤍᤣᤛᤢᤱᤛᤡᤱ᤹॥

³ ᤆᤒᤧ᤺ᤳᤇᤡᤰ ᤌᤧᤃᤣ᤺ᤰᤀᤡᤈᤡᤖᤰ ᤗᤠᤖᤧ᤹ᤀᤠᤱ ᤁᤧᤈᤠᤱᤅᤥ ᤀᤡᤄᤣ᤺ᤰᤂᤧ ᤑᤳᤇᤧ᤹॥

⁴ ᤂᤧᤒᤩᤠᤱ ᤁᤴ ᤁᤢᤓᤠ ᤌᤧᤃᤣ᤺ᤰᤀᤡᤜᤠ᤹ ᤔᤡᤀᤥ ᤗᤠᤵᤑᤢᤛᤧ ᤕᤠᤰᤋᤧ᤹ᤀᤠᤱ ᤔᤡᤎᤡᤰᤂᤧᤍᤣᤛᤧ᤹॥ ᤁᤴ ᤀᤠᤈᤧ᤺ᤳᤇᤡᤰᤁᤥᤗᤠᤶ ᤔᤡᤴ ᤐᤥᤖ ᤐᤣᤰ ᤜᤧᤰᤁᤩᤠᤱ ᤁᤧᤖᤧᤰ ᤀᤡᤛᤪᤠᤀᤡᤗᤧᤴ ᤂᤠᤵᤐᤢᤌᤩ᤺ᤱ ᤆᤥᤃᤢᤖᤥ॥

⁵ “ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱ᤹—ᤕᤖᤢᤛᤗᤧ᤺ᤶᤔᤡᤴ ᤌᤧᤔᤠ ᤐᤥᤱ᤹ ᤁᤧᤗ᤹ᤒᤠ ᤁᤱᤃ ᤗᤳᤇᤠ ᤁᤢᤒᤡᤖᤥ॥ ᤀᤠᤱᤃᤠ᤹ ᤕᤖᤢᤛᤗᤧ᤺ᤶᤔᤡᤴ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤏᤧᤛᤢᤱᤅᤠᤱ ᤏᤧᤖᤥ.

⁶ ᤁᤖ ᤛᤧᤰᤂᤠᤀᤣ ᤂᤧᤸᤗᤧ ᤁᤒᤪᤡᤱ ᤐᤡᤛᤠᤱᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤏᤢ᤺ᤸᤗᤧ ᤕᤖᤡᤰ ᤀᤠᤱᤃᤠ᤹ ᤀᤠᤎᤡᤶᤜᤠ᤹ ᤏᤢ ᤀᤠᤀᤡᤱᤈᤠᤱᤜᤠ᤹ᤖᤧ ᤁᤢᤍᤰᤗᤧᤱᤘᤠᤀᤥ ᤐᤡᤑᤩᤢᤱ ᤆᤥᤃᤢᤱᤀᤠᤱ ᤘᤠ᤹॥ ᤋᤡᤶᤔᤠ ᤏᤠ᤺ᤵᤔᤠᤖᤧ ᤗᤠᤃᤡ ᤂᤢᤏᤧ᤹ ᤐᤡᤖᤢᤱᤒᤠ ᤀᤠᤱᤃᤠ᤹ ᤀᤠᤎᤡᤶᤜᤠ᤹ ᤏᤢ ᤀᤠᤀᤡᤱᤈᤠᤱᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤏᤠ᤹ᤖᤢᤀᤠᤱ ᤘᤠ᤹॥

⁷ “ᤁᤸᤗᤧᤆᤥᤃᤢᤸᤗᤧ. ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤱ᤹—ᤀᤠᤱᤃᤠ᤹ ᤀᤠᤀᤡᤱᤈᤠᤱᤜᤠ᤹ ᤏᤢ ᤀᤠᤎᤡᤶᤜᤠ᤹ ᤁᤧᤴᤀᤡ᤺ᤳᤋᤢᤶᤔᤡᤴ ᤁᤧᤴᤏᤠ᤺ᤳᤋᤢᤶᤔᤡᤴᤏᤠᤱ ᤂᤡᤏᤡ᤹ ᤜᤡᤶᤒᤣᤛᤠᤱᤒᤠᤜᤠ᤹ᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤂᤡᤏᤡ᤹ ᤔᤏᤠᤜᤠ᤹ ᤁᤢ᤹ᤀᤡᤃᤧᤓᤧᤖᤡᤀᤠᤱ ᤁᤧᤘᤕᤡ᤹॥ ᤂᤡᤏᤡ᤹ ᤁᤒᤪᤡᤱ ᤐᤡᤛᤠᤱᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤕᤠᤖᤡᤰᤁᤠᤱ ᤂᤡᤏᤡ᤹ ᤂᤧᤶᤍᤢ ᤗᤠ᤹ᤖᤢᤖ ᤁᤧᤴᤘᤕᤡᤴ᤹॥

⁸ ᤂᤧᤸᤗᤧᤆᤥᤃᤢᤸᤗᤧ ᤀᤠᤸᤗ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤴᤏᤣ ᤂᤡᤏᤡ᤹ ᤏᤡᤱᤔᤡᤀᤠ॥ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤔᤧᤏᤡᤛᤢᤖᤀᤣ ᤀᤠᤱᤃᤠ᤹ ᤂᤡᤏᤡ᤹ ᤂᤢᤶᤍᤡᤱ ᤐᤡᤏᤡᤱ᤹॥

⁹ ᤂᤡᤏᤡ᤹ ᤕᤠᤶᤃᤧᤛᤡᤱᤒᤠ ᤏᤠᤘᤠᤀᤡᤳᤗᤠᤜᤠ᤹ᤖᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤁᤢᤓᤠ ᤋᤃᤡ ᤀᤠᤓᤧᤸᤗᤧᤀᤠᤱ ᤂᤢᤶᤍᤡᤱ ᤔᤧᤶᤒᤡᤀᤣ ᤁᤳᤏᤡᤱᤒᤠ ᤂᤢᤶᤍᤡᤱ ᤐᤡᤏᤡᤱ᤹ ᤜᤧᤰᤁᤩᤠᤱ ᤕᤠᤶᤔᤥ ᤀᤠᤓᤧᤸᤗᤧᤀᤠᤱ ᤂᤢᤶᤍᤡᤱ ᤔᤧᤒᤡᤏᤡᤱᤅᤡᤴ᤹॥

¹⁰ ᤐᤠᤔᤠᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤛᤠᤜᤠ᤹ ᤔᤧᤈᤛᤡ᤹. ᤜᤧᤰᤁᤩᤠᤱ ᤛᤠᤜᤠ᤹ᤖᤧ ᤂᤢᤴᤇᤡ᤹ ᤐᤠᤔᤠᤜᤠ᤹ ᤔᤧᤈᤛᤡ᤹॥ ᤀᤠᤱᤃᤠ᤹ ᤂᤡᤏᤡ᤹ ᤂᤢᤶᤍᤡᤱ ᤐᤡᤏᤡᤱ᤹ ᤜᤧᤰᤁᤩᤠᤱ ᤆᤒᤧ᤺ᤳᤇᤡᤰ ᤁᤧᤜᤡᤱᤒᤠᤀᤠᤱ ᤁᤧᤘᤠ᤹ᤒᤠᤜᤠ᤹ ᤛᤢᤖᤡᤳ ᤁᤣᤈᤱᤅᤥ ᤑᤢᤳᤗᤢᤶ ᤌᤩ᤺ᤱ ᤛᤧᤏᤡᤱᤍᤣᤏᤡᤱ᤹॥

¹¹ “ᤀᤠᤱᤃᤠ᤹ ᤁᤢᤜᤡᤱᤘᤧᤳ ᤘᤠ᤹ᤀᤠᤒᤠ ᤁᤢᤀᤡᤛᤡᤰ. ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. ᤀᤠᤱᤃᤠ᤹ ᤘᤖᤧᤱᤗᤧᤱ ᤂᤡᤏᤡ᤹ ᤔᤡᤱ ᤔᤠᤛᤢᤱ ᤐᤡᤏᤡᤱ᤹॥ ᤛᤡᤰᤁᤧᤗᤧ᤺ᤱᤒᤠ ᤂᤡᤏᤡ᤹ ᤗᤠᤕᤥᤜᤠ᤹ ᤏᤢ ᤛᤡᤰ ᤘᤕᤠᤰ ᤁᤧᤔᤧᤵᤐᤠ ᤂᤡᤏᤡ᤹ ᤆᤀᤡ᤺ᤳᤜᤠ᤹ᤖᤧ ᤀᤠᤱᤃᤠ᤹ ᤀᤠᤜᤡᤶᤔᤡᤴ ᤁᤧᤈᤡ᤺ᤴᤍᤢᤶᤒᤠᤸᤗᤧ ᤆᤥᤃᤢᤸᤗᤧ ᤆᤒᤧ᤺ᤳᤇᤡᤰᤁᤠᤱ ᤀᤠᤗᤢᤱᤔᤠ᤹ ᤛᤩᤠ᤺ᤳ ᤁᤧᤸᤗ᤹ᤖᤡᤴ᤹॥

¹² ᤁᤢᤗᤰ ᤛᤢᤶᤛᤡᤀᤥ ᤁᤢᤗᤰ ᤌᤡᤰ ᤂᤡᤏᤡ᤹ ᤔᤏᤠᤜᤠ᤹ ᤕᤧᤰᤕᤰᤁᤥ ᤋᤢᤰᤔᤠ ᤏᤢ ᤛᤠᤰᤘᤠ᤺ᤴᤗᤠᤶ ᤔᤧᤛᤡᤖᤥ॥ ᤕᤧᤰᤕᤰᤁᤥᤒᤠ ᤗᤢᤱᤎᤠᤰ ᤗᤠ᤺ᤰᤁᤠᤳ ᤏᤡᤱᤔᤡᤜᤠ᤹ᤖᤧ ᤁᤢᤗᤰ ᤛᤢᤶᤛᤡᤀᤥ ᤁᤢᤗᤰ ᤌᤡᤰ ᤂᤡᤏᤡ᤹ ᤔᤏᤠᤜᤠ᤹ ᤔᤧᤜᤧᤃᤢ ᤔᤧᤛᤧᤖᤢᤛᤡ᤹॥ ᤜᤧᤰᤁᤩᤠᤱ ᤁᤢᤗᤰ ᤛᤢᤶᤛᤡᤀᤥ ᤁᤢᤗᤰ ᤌᤡᤰ ᤀᤠᤱᤃᤠ᤹ ᤋᤠᤓᤣ᤺ᤸᤗᤧ ᤏᤠ᤺ᤳᤋᤢᤱᤛᤡᤱᤅᤠᤱ ᤛᤢᤖᤡᤳ ᤁᤣᤈᤱᤅᤥ ᤑᤢᤳᤗᤢᤶ ᤌᤩ᤺ᤱ ᤛᤧᤛᤢᤱᤍᤣᤛᤢᤱᤛᤡᤱ᤹॥

¹³ ᤂᤧᤒᤩᤠᤱ ᤁᤢᤏᤢᤵᤔᤥ ᤀᤠᤛᤠᤰᤁᤧᤴᤏᤡᤴ ᤆᤡ᤺ᤰᤋᤢ᤹. ᤂᤶᤓᤩᤠᤱ ᤀᤠᤱᤃᤠ᤹ ᤀᤠᤛᤡᤰᤆᤡᤶ᤹॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤀᤠᤱᤃᤠ᤹ ᤛᤠ᤹ᤖᤡᤰ ᤀᤠᤛᤡᤰ ᤐᤥ᤺ᤰᤔᤧᤴ ᤆᤡ᤺ᤰᤋᤢᤀᤠᤱ ᤀᤣᤃᤠᤱ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤴ ᤀᤠᤛᤡᤰᤛᤶᤔᤥ ᤐᤠᤖᤠᤱᤒᤠ ᤑᤠ᤹ᤀᤠᤱ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤁᤢᤛᤡᤱ ᤔᤧᤏᤡ᤺ᤳᤋᤢ᤹॥

¹⁴ “ᤜᤧᤰᤁᤣᤗ᤹ᤖᤡᤰ ᤀᤠᤱᤃᤠ᤹ ᤂᤡᤏᤡ᤹ ᤂᤠᤵᤐᤢᤌᤩ᤺ᤱ ᤆᤥ᤺ᤰᤏᤡᤱ. ᤜᤧᤰᤁᤩᤠᤱ ᤂᤡᤏᤡ᤹ ᤁᤒᤪᤡᤱ ᤗᤧᤵᤔᤠᤱᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤏᤢ ᤂᤧᤵᤔᤥᤗᤠᤶ ᤁᤧᤒᤥᤱᤒᤠᤀᤠᤱ ᤗᤠᤱᤃᤧᤄᤣ᤺ᤰᤐᤠ ᤁᤧᤖᤧᤰᤗᤠᤶ ᤁᤢᤏᤠᤔᤧᤴᤇᤠ᤹ ᤔᤧᤵᤔᤠ ᤗᤠᤶ ᤁᤧᤒᤥ᤺ᤰᤂᤡ᤹॥

¹⁵ ᤂᤡᤏᤡ᤹ ᤁᤡᤵᤔᤠ ᤁᤧᤄᤢᤒᤠ ᤏᤢ ᤕᤱᤔᤠ ᤀᤠᤛᤡᤛᤡᤒᤠ ᤜᤧᤰᤁᤩᤠᤱ ᤁᤢᤏᤠᤔᤧᤴᤇᤠ᤹ ᤔᤧᤵᤔᤠ ᤆᤠᤜᤠᤰ ᤁᤧᤒᤥ᤺ᤰᤂᤡ᤹॥ ᤂᤧᤏᤡ᤹ ᤂᤡᤖᤡᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤗᤠᤃᤡ ᤂᤡᤏᤡ᤹ ᤛᤠᤶᤍᤡᤱ ᤁᤧᤒᤥ᤺ᤰᤂᤡ᤹॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤀᤠᤛᤡᤰ ᤐᤥ᤺ᤰᤔᤥ ᤂᤢᤶᤍᤡᤱ ᤐᤡᤖᤢᤱᤛᤡᤱᤅᤡᤸᤗᤧ ᤜᤧᤰᤁᤩᤠᤱ ᤑᤧ᤺ᤰᤋᤢᤱᤛᤡᤱᤅᤡᤸᤗᤧ ᤌᤧᤔᤠ ᤐᤥᤱ᤹ ᤁᤧᤗ᤹ᤒᤠᤴ ᤂᤧᤱᤜᤠ᤹ᤖᤧ ᤔᤧᤏᤡᤛᤢ᤹. ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤐᤠ᤺ᤳᤋᤢᤱᤅᤠᤱ ᤘᤠ᤹᥄

¹⁶ “ᤂᤧᤏᤡ᤹ ᤔᤧᤱᤔᤠᤖᤧ ᤗᤠᤃᤡ ᤀᤠᤛᤡᤛᤡᤒᤠ ᤋᤥ᤺ᤱᤅᤡᤸᤗᤧ ᤁᤧᤕᤠᤱᤄᤡᤒᤠ ᤜᤧᤰᤁᤣ ᤛᤧᤳᤗᤠ᤺ᤰᤔᤠᤸᤗᤧ ᤂᤧᤏᤡ᤹ ᤛᤠᤳᤗᤠᤶᤃᤧᤒᤳᤋᤡᤖ ᤕᤠ᤺ᤴᤏᤡᤱ᤹॥ ᤁᤢᤈᤠ᤺ᤸᤗᤧ ᤗᤳᤇᤠ ᤁᤢᤈᤡ᤹ ᤌᤡᤰᤁᤧᤴᤏᤠᤱ ᤔᤠ᤺ᤳᤗ ᤌᤠᤖᤡᤰ ᤀᤠᤸᤗᤛᤠᤱ ᤛᤠ᤹ᤖᤡᤰ ᤕᤶᤒᤠᤖ ᤕᤶᤒᤠ ᤛᤠᤰ ᤐᤥᤰ॥

¹⁷ ᤜᤧᤰᤁᤩᤠᤱ ᤛᤠᤰ ᤐᤥ᤺ᤰᤔᤠᤏᤢ ᤛᤥᤛᤥᤖᤡᤰ. ᤋᤠᤶᤓᤢᤱ ᤌᤰᤛᤠᤜᤠ᤹ᤖᤧ ᤂᤡᤏᤡ᤹ ᤁᤧᤶᤓᤳᤋᤡ᤹ ᤂᤧᤒᤩᤠᤱ ᤂᤡᤏᤡ᤹ ᤛᤠᤜᤠ᤹ ᤁᤧᤶᤏᤠᤵᤋᤡ᤹॥ ᤋᤢᤰᤔᤠ ᤗᤠ᤺ᤰᤔᤠ ᤏᤢ ᤋᤧᤴᤎᤱᤅᤡᤸᤗᤧ ᤂᤡᤏᤡ᤹ ᤗᤠᤈᤣᤴ ᤕᤢᤰᤋᤢ᤹. ᤂᤧᤒᤩᤠᤱ ᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤋᤠᤓᤣᤴ ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤋᤠᤖᤢᤱ᤹॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤐᤠ᤺ᤳᤋᤢᤱᤅᤠᤱ ᤘᤠ᤹ᤖᤥ᥄”