ᤀᤡᤈᤁᤡᤀᤣᤗ 47 - LIFOTNTᤔᤠᤱᤜᤡᤶᤗᤠᤶᤒᤠ ᤁᤧᤃᤢᤱᤒᤠ ᤁᤧᤗ᤺ᤶᤒᤠ ᤘᤜ᤺ᤱ 1 ᤂᤧᤴ ᤔᤏᤠ᤺ᤸᤗᤧ ᤀᤠᤱᤃᤠ᤹ ᤔᤠᤱᤜᤡᤶᤔᤥ ᤗᤠ᤺ᤵᤔᤠ ᤗᤠᤶᤎᤣ᤺ᤵᤐᤥ ᤏᤢ᤺ᤰᤋᤠᤱ ᤋᤠᤖᤠᤱ. ᤜᤧᤰᤁᤩᤠᤱ ᤔᤠᤱᤜᤡᤶᤔᤥᤒᤠ ᤗᤠᤶᤎᤠ᤺ᤳᤐᤢᤱᤅᤡᤸᤗᤧ ᤁᤢᤛᤡᤃᤠᤱᤗᤠᤶ ᤆᤫᤠ᤺ᤳᤋᤡᤴ ᤏᤠᤱᤃᤧᤴ ᤐᤡᤛᤠᤱ ᤗ᤺ᤴᤍᤧᤖ ᤐᤳᤇᤧᤒᤠ ᤏᤡᤛᤢᤱ (ᤌᤣᤀᤠᤱᤓᤧᤸᤗᤧ ᤔᤠᤱᤜᤡᤶᤔᤡᤴ ᤏᤠᤱᤃᤧᤴ ᤐᤡᤛᤠᤱ ᤁᤧᤜᤡᤛᤡᤱᤒᤠ ᤆᤥᤃᤧ)॥ ᤔᤠᤱᤜᤡᤶᤔᤡᤸᤗᤧ ᤁᤢᤛᤡᤃᤠᤱ ᤗᤠᤱᤃᤧᤳ ᤗᤧᤵᤔᤠᤱᤗᤠᤶ. ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤕᤥᤜᤠᤱ ᤗᤧᤵᤔᤠᤱ ᤆᤫᤠ᤺ᤳᤋᤡᤴ ᤁᤢᤰᤛᤧ ᤕᤧᤖ ᤐᤳᤇᤧ॥ 2 ᤂᤧᤒᤩᤠᤱ ᤂᤧᤴ ᤔᤏᤠ᤺ᤸᤗᤧ ᤀᤠᤱᤃᤠ᤹ ᤌᤠᤱᤃᤧᤳ ᤐᤡᤛᤠᤱᤒᤠ ᤕᤶᤒᤠ ᤗᤠᤶᤎᤣ᤺ᤵᤐᤥᤗᤠᤶ ᤗᤠ᤺ᤰᤁᤠᤳ ᤗ᤺ᤳᤋᤠᤱ ᤜᤧᤰᤁᤩᤠᤱ ᤏᤠᤱᤃᤧᤴ ᤐᤡᤛᤠᤱ ᤁᤧᤜᤡᤛᤡᤱᤒᤠ ᤗᤠᤁᤠᤳᤐᤠ ᤕᤶᤒᤠ ᤗᤠᤶᤎᤣ᤺ᤵᤐᤥ ᤀᤡᤛᤠᤱ ᤋᤠᤖᤠᤱ. ᤜᤧᤰᤁᤩᤠᤱ ᤆᤫᤠ᤺ᤳᤋᤡᤴ ᤗᤠᤱᤃᤧᤳ ᤗᤧᤵᤔᤠᤱᤗᤠᤶ ᤁᤢᤰᤛᤧ ᤐᤣᤖ ᤐᤳᤇᤧ॥ 3 ᤂᤧᤴ ᤔᤏᤠ᤺ᤴ ᤁᤢᤜᤢᤰᤁᤥ ᤁᤢᤛᤡ᤺ᤰᤔᤠ ᤀᤍᤪᤠᤴ ᤕᤠᤱᤛᤡᤱᤅᤠᤱ ᤏᤠᤱᤃᤧᤴ ᤗᤧᤵᤔᤠᤱ ᤐᤣ. ᤜᤧᤰᤁᤩᤠᤱ ᤂᤢᤏᤧ᤹ ᤜᤧᤴᤇᤡᤱ ᤌᤡᤰ ᤜᤢᤰᤛᤡᤰ ᤛᤡ᤺ᤰᤋᤢ. ᤂᤧᤒᤩᤠᤱ ᤂᤢᤏᤧ᤹ ᤗᤠᤱᤔᤡᤰᤁᤥ ᤌᤠᤖᤡᤰ ᤆᤫᤠ᤺ᤳ ᤁᤧᤏᤧᤒᤠᤗᤠᤶ ᤀᤠᤱᤃᤠ᤹ ᤗᤠᤱᤄᤣ᤺ᤰᤂᤠᤱ॥ 4 ᤂᤢᤏᤧ᤹ ᤘᤣ᤹ ᤜᤧᤴᤇᤡᤱ ᤌᤡᤰ ᤜᤢᤰᤛᤡᤰ ᤛᤡ᤺ᤰᤋᤢ ᤜᤧᤰᤁᤩᤠᤱ ᤂᤢᤏᤧ᤹ ᤌᤢᤱᤒᤥᤀᤥ ᤌᤠᤖᤡᤰ ᤆᤫᤠ᤺ᤳ ᤁᤧᤏᤧᤒᤠᤗᤠᤶ ᤀᤠᤱᤃᤠ᤹ ᤗᤠᤱᤄᤣ᤺ᤰᤂᤠᤱ॥ ᤂᤢᤏᤧ᤹ ᤘᤣ᤹ ᤜᤧᤴᤇᤡᤱ ᤌᤡᤰ ᤜᤢᤰᤛᤡᤰ ᤛᤡ᤺ᤰᤋᤢ ᤜᤧᤰᤁᤩᤠᤱ ᤁᤧᤱᤅᤥ ᤌᤠᤖᤡᤰ ᤆᤫᤠ᤺ᤳ ᤁᤧᤏᤧᤒᤠᤗᤠᤶ ᤀᤠᤱᤃᤠ᤹ ᤗᤠᤱᤄᤣ᤺ᤰᤂᤠᤱ॥ 5 ᤂᤢᤏᤧ᤹ ᤘᤣ᤹ ᤜᤧᤴᤇᤡᤱ ᤌᤡᤰ ᤜᤢᤰᤛᤡᤰ ᤛᤡ᤺ᤰᤋᤢ. ᤁᤖ ᤁᤴ ᤗᤳᤇᤠ ᤘᤜ᤺ᤱ ᤏᤧᤛ᤻ᤛᤧ ᤀᤠᤱᤃᤠ᤹ ᤁᤠ᤺ᤰᤔᤠ ᤔᤧᤴᤇᤢᤰᤐᤠ. ᤌᤣᤀᤠᤱᤓᤧᤸᤗᤧ ᤆᤫᤠ᤺ᤳᤋᤡᤴ ᤐᤥᤖᤧᤀᤠᤱ ᤏᤧᤛ᤻ᤛᤧ ᤜᤧᤰᤁᤩᤠᤱ ᤆᤠ᤺ᤰᤔᤠ ᤁᤧᤏᤢ᤹ᤒᤠ ᤜᤠ᤺ᤳᤗᤧᤀᤠᤱ ᤁᤠ᤺ᤰᤔᤠ ᤛᤢᤰᤔᤧᤴᤍᤧᤵᤔᤏᤠᤒᤠ ᤘᤜ᤺ᤱ ᤐᤥ᤺ᤰᤂᤧᤀᤠᤱ ᤏᤧᤛ᤻ᤛᤧ॥ 6 ᤂᤢᤏᤧ᤹ ᤀᤠᤱᤃᤠ᤹ ᤛᤣ᤺ᤴᤍᤥᤛᤠᤱ. “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤌᤣ ᤂᤧᤏᤧ᤹ ᤁᤴ ᤀᤥᤃᤧᤔᤧᤳᤋᤢᤖ ᤁᤧᤒᤵᤐᤡ᥅” ᤂᤧᤒᤩᤠᤱ ᤂᤢᤏᤧ᤹ ᤀᤠᤱᤃᤠ᤹ ᤂᤧᤴ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥ ᤏᤢ᤺ᤰᤋᤠᤱ ᤋᤣ᤹ᤖᤠᤱ॥ 7 ᤀᤠᤱᤃᤠ᤹ ᤂᤧᤵᤔᤥ ᤁᤧᤖᤠᤱᤅᤡᤸᤗᤧ ᤘᤜ᤺ᤱᤅᤡᤸᤗᤧ ᤏᤠᤜᤠᤱ ᤁᤳᤏᤠᤜᤠᤱ ᤁᤢᤕᤠᤀᤥ ᤀᤠᤱᤃᤠ᤹ ᤛᤠ᤹ᤖᤡᤰ ᤕᤖᤡᤰ ᤛᤡᤱᤒᤢᤱᤜᤠ᤹ ᤏᤡᤛᤢᤱ॥ 8 ᤂᤢᤏᤧ᤹ ᤀᤠᤱᤃᤠ᤹ ᤔᤧᤳᤋᤠᤱ. “ᤁᤴ ᤆᤫᤠ᤺ᤳᤋᤡᤴ ᤏᤠᤱᤃᤧᤴ ᤐᤡᤛᤠᤱ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴ ᤐᤥᤱᤗ ᤘᤃᤢ ᤐᤣ᤺ᤰᤁᤠᤱ ᤕᤢᤶᤗᤠ᤺ᤰᤂᤠᤱ ᤘᤖ᤺ᤱᤅᤥᤒᤠ ᤏᤧᤏᤧᤒᤠᤍᤧᤴᤏᤥ ᤗᤠ᤺ᤳ॥ ᤘᤖ᤺ᤱᤅᤥ ᤁᤴ ᤗᤠ᤺ᤳᤋᤠᤱ ᤂᤧᤵᤔᤥᤒᤠ ᤆᤫᤠ᤺ᤳᤋᤡᤴ ᤛᤣᤛᤣᤒᤠ ᤆᤥᤃᤢ᤹॥ 9 ᤘᤜ᤺ᤱ ᤘᤠᤃᤧᤃᤢᤒᤠᤍᤧᤴᤏᤥ ᤀᤠᤳᤋᤠᤋᤠᤴᤏᤣ ᤕᤖᤡᤰ ᤁᤢᤜᤡᤱᤘᤧᤳ ᤐᤠᤎᤢᤱᤛᤠᤜᤠ᤹ ᤔᤧᤕᤠᤰ॥ ᤂᤧᤵᤔᤥ ᤏᤡ᤺ᤵᤔᤧᤴᤍᤧᤳ ᤅᤠᤜᤠ᤹ ᤔᤧᤕᤠᤰ. ᤌᤣᤀᤠᤱᤓᤧᤸᤗᤧ ᤁᤴ ᤆᤫᤠ᤺ᤳᤋᤡᤴ ᤂᤧᤵᤔᤥ ᤁᤢᤱᤒᤣ᤺ᤰ ᤜᤧᤰᤁᤩᤠᤱ ᤕᤢᤶ ᤁᤧᤗᤠ᤺ᤰᤐᤠ ᤆᤫᤠ᤺ᤳᤋᤡᤴ ᤛᤣᤛᤣᤒᤠ ᤆᤥᤃᤢ᤹. ᤁᤸᤗᤧᤆᤥᤃᤢᤸᤗᤧ ᤘᤜ᤺ᤱ ᤘᤠᤃᤧᤃᤢᤒᤠ ᤀᤠᤳᤋᤡᤛᤠᤱ ᤌᤧᤔᤠᤛᤠᤱ ᤔᤧᤜᤡᤱ᤹॥ 10 ᤕᤥ᤺ᤱ ᤁᤧᤗᤧᤵᤐᤠᤜᤠ᤹ ᤘᤖ᤺ᤱᤅᤡᤸᤗᤧ ᤁᤢᤕᤠᤀᤥ ᤔᤧᤕᤧᤶᤛᤡᤱ᤹. ᤀᤣᤏ-ᤃᤣᤍᤡᤒᤠᤗᤠᤶ ᤀᤣᤏ-ᤀᤣᤃ᤻ᤗᤤᤶ ᤌᤠᤖᤡᤰ ᤕᤥ᤺ᤱ ᤂᤡᤱᤔᤠᤍᤧᤴᤜᤠ᤹ ᤐᤥᤱ᤹॥ ᤐᤕᤶ ᤕᤶᤒᤠ ᤋᤢᤱᤃᤥᤍᤡᤱ ᤘᤖ᤺ᤱᤅᤥᤒᤠ ᤅᤠᤜᤠ᤹ ᤁᤢᤀᤡᤛᤡᤰ ᤂᤧᤵᤔᤥ ᤐᤖᤡᤰ ᤐᤖᤡᤰᤐᤠ ᤕᤖᤡᤰ ᤅᤠᤜᤠ᤹ ᤔᤧᤕᤠᤰ॥ 11 ᤁᤖ ᤘᤖ᤺ᤱᤅᤡᤸᤗᤧ ᤁᤢᤕᤠᤀᤥᤒᤠ ᤘᤖᤰᤜᤠ᤹ ᤏᤢ ᤘᤈᤡᤶᤒᤣᤜᤠ᤹ᤃ ᤛᤣᤛᤣᤒᤠ ᤔᤧᤒᤥᤱᤏᤧᤴ. ᤂᤧᤴ ᤋᤧᤴᤜᤠ᤹ᤗᤠᤶ ᤕᤢᤶ ᤔᤧᤛᤢᤵᤛᤢ᤹॥ 12 ᤘᤜ᤺ᤱᤅᤡᤸᤗᤧ ᤏᤧᤵᤔᤠᤱ ᤐᤡᤛᤠᤱᤒᤠ ᤁᤢᤕᤠᤜᤠ᤹ᤀᤥ ᤁᤧᤖᤧᤰ ᤐᤖᤡᤰᤐᤠ ᤛᤡᤱᤛᤣ᤹ ᤁᤧᤎᤥ᤺ᤰᤐᤠ ᤛᤡᤱᤒᤢᤱᤜᤠ᤹ ᤗᤡᤱ᤹॥ ᤂᤧᤴ ᤛᤡᤱᤒᤢᤱᤜᤠ᤹ᤖᤧ ᤁᤢᤓᤧᤰᤘᤠᤜᤠ᤹ ᤀᤡᤔᤧᤗᤧᤶᤏᤧᤴ᤹. ᤁᤢᤈᤠ᤹ᤜᤠ᤹ᤀᤠᤱ ᤔᤧᤛᤶᤏᤧᤴ᤹॥ ᤁᤧᤖᤧᤰ ᤗᤠᤜᤠ᤹ᤀᤥ ᤂᤧᤴ ᤛᤡᤱᤒᤢᤱᤜᤠ᤹ᤖᤧ ᤁᤢᤈᤠ᤹ ᤌᤥᤰ. ᤌᤣᤀᤠᤱᤓᤧᤸᤗᤧ ᤛᤣᤛᤣᤍᤧᤴᤏᤥᤗᤠᤶ ᤂᤧᤱᤜᤠ᤹ᤀᤥ ᤆᤫᤠ᤺ᤳ ᤁᤢᤱᤒᤣ᤺ᤰ॥ ᤂᤧᤴ ᤛᤡᤱᤒᤢᤱᤜᤠ᤹ᤖᤧ ᤁᤢᤈᤠ᤹ᤜᤠ᤹ ᤆᤠᤔᤠᤖᤧ ᤗᤠᤃᤡ ᤁᤢᤈᤠ ᤏᤢ ᤁᤢᤓᤧᤰᤘᤠᤜᤠ᤹ ᤘᤣ᤺ᤵᤔᤠᤖᤧ ᤗᤠᤃᤡ ᤛᤡᤍᤠ᤹ ᤐᤥᤱᤗᤥ॥” ᤗᤠᤈᤣ᤹ᤀᤥᤒᤠ ᤀᤡ᤺ᤴᤍᤥᤜᤠ᤹ 13 ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—“ᤀᤡᤛᤪᤠᤀᤡᤗᤒᤠ ᤌᤡᤒᤥᤱᤅᤠᤱ ᤏᤧᤳᤇᤡ ᤌᤠ᤺ᤰᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤗᤰᤂᤥᤔᤠᤖᤧ ᤗᤠᤃᤡ ᤕᤥᤛᤣᤑᤖᤧ ᤁᤢᤗᤰ ᤏᤧᤳᤇᤡ ᤂᤥᤔᤠᤏᤢ ᤛᤥᤖᤡᤰ ᤗᤠᤈᤣᤴ ᤂᤡᤏᤡ᤹ ᤁᤧᤓ᤺ᤰᤂᤢᤶᤔᤡᤸᤗᤧ ᤀᤡ᤺ᤴᤍᤥᤜᤠ᤹ ᤁᤴ ᤐᤖᤡᤰᤐᤠ ᤐᤥᤱ᤹॥ 14 ᤂᤡᤏᤡ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤁᤴ ᤁᤢᤍᤱᤒᤠ ᤁᤧᤓ᤺ᤰᤂᤢᤶᤗ ᤐᤥᤱ᤹॥ ᤀᤠᤱᤃᤠ᤹ ᤂᤡᤏᤡ᤹ ᤐᤠᤎᤧᤒᤠᤜᤠ᤹ ᤐᤡᤖᤢᤱᤛᤡᤱ ᤑᤠ᤹ᤀᤠᤱ ᤀᤠᤜᤢᤰᤁᤡᤴ ᤑᤥ᤺ᤰᤂᤢᤱᤅᤠᤱ ᤔᤠᤱᤜᤧᤰ ᤆᤥᤃᤢᤱᤅᤠᤱ ᤘᤕᤠᤱᤒᤠᤸᤗᤧ ᤆᤥᤃᤢᤸᤗᤧ ᤁᤴ ᤗᤠᤈᤣᤴ ᤂᤡᤏᤡ᤹ ᤗᤰᤂᤥᤔᤠ ᤐᤥᤱᤗᤥ॥ 15 “ᤗᤠᤈᤣ᤹ᤀᤥᤒᤠ ᤀᤡ᤺ᤴᤍᤥᤜᤠ᤹ ᤁᤴᤜᤠ᤹ᤀᤣ ᤐᤥᤱᤗᤥ—ᤌᤠᤱᤃᤧᤳ ᤗᤧᤵᤔᤠᤱ ᤐᤕᤶ ᤕᤶᤒᤠ ᤘᤖ᤺ᤱᤗᤠᤶ ᤜᤣᤋᤗᤥᤏᤒᤠ ᤗᤠᤶ ᤐᤥᤱᤗ ᤗᤧᤒᤥ ᤜᤔᤠᤋ ᤐᤥᤱᤅᤠᤱ ᤛᤍᤠᤍ. 16 ᤒᤣᤖᤥᤋᤜ ᤏᤢ ᤛᤡᤒᤪᤤᤔ ᤌᤠᤖᤡᤰ (ᤁᤴ ᤋᤧᤴᤜᤠ᤹ ᤍᤔᤛ᤻ᤁᤛ ᤏᤢ ᤜᤔᤠᤋ ᤁᤢᤗᤢᤶᤔᤥᤒᤠ ᤀᤡ᤺ᤴᤍᤥᤀᤥ ᤏᤧᤖᤥ) ᤐᤥᤱᤗ ᤜᤦᤖᤠᤏᤖᤧ ᤁᤢᤀᤡ᤺ᤴᤍᤥᤀᤥ ᤁᤧᤏᤧᤒᤠ ᤜᤠᤛᤣᤖ ᤜᤠᤳᤋᤡᤁᤥᤏ ᤌᤠᤖᤡᤰᤁᤣ ᤁᤧᤳ॥ 17 ᤁᤶᤓᤗ᤹ᤖᤡᤰ ᤀᤡ᤺ᤴᤍᤥᤴ ᤗᤢᤶᤒᤠᤱ ᤘᤖ᤺ᤱᤅᤥᤗᤠᤶ ᤜᤛᤖ-ᤀᤣᤏᤠᤏᤒᤠ ᤕᤧᤰᤕᤰ ᤌᤠᤖᤡᤰ ᤐᤣᤰ. ᤂᤧᤴ ᤍᤔᤛ᤻ᤁᤛᤗᤠᤶ ᤌᤠᤱᤃᤧᤳ ᤗᤧᤵᤔᤠᤱ ᤏᤧᤖᤥ ᤜᤧᤰᤁᤩᤠᤱ ᤜᤔᤠᤋᤗᤠᤶ ᤗᤠᤱᤃᤧᤳ ᤗᤧᤵᤔᤠᤱ ᤏᤧᤖᤥ॥ ᤁᤴ ᤌᤥ ᤌᤠᤱᤃᤧᤵᤐᤠ ᤀᤡ᤺ᤴᤍᤥ ᤐᤥᤱ᤹॥ 18 “ᤋ᤹ᤀᤡ ᤏᤠᤱᤃᤧᤴ ᤗᤧᤵᤔᤠᤱᤒᤠ ᤀᤡ᤺ᤴᤍᤥ᤺ᤱᤃ ᤜᤦᤖᤠᤏᤒᤠ ᤏᤢ ᤍᤔᤛ᤻ᤁᤛᤖᤧ ᤁᤢᤗᤢᤶᤔᤥ. ᤃᤡᤗᤠᤍ ᤏᤢ ᤀᤡᤛᤪᤠᤀᤡᤗ ᤗᤠᤈᤣ᤹ ᤁᤢᤗᤢᤶᤔᤥ ᤕᤷᤍᤏ ᤘᤜ᤺ᤱᤅᤡᤸᤗᤧ ᤁᤢᤕᤠ ᤁᤢᤕᤠ ᤐᤥᤱᤗ ᤏᤠᤱᤃᤧᤴ ᤘᤖ᤺ᤱ ᤏᤢ ᤋᤠᤔᤠᤖ ᤌᤠᤖᤡᤰᤁᤣ ᤔᤠ᤺ᤱᤗᤡᤰ ᤁᤧᤳ॥ ᤁᤴ ᤏᤠᤱᤃᤧᤴ ᤗᤧᤵᤔᤠᤱᤒᤠ ᤀᤡ᤺ᤴᤍᤥ ᤐᤥᤱ᤹॥ 19 “ᤗᤠᤱᤃᤧᤳ ᤗᤧᤵᤔᤠᤱᤒᤠ ᤀᤡ᤺ᤴᤍᤥ᤺ᤴᤃ ᤋᤠᤔᤠᤖᤗᤠᤶ ᤔᤣᤖᤡᤒᤠ-ᤁᤠᤍᤣᤛᤒᤠ ᤆᤫᤠ᤺ᤳᤜᤠ᤹ ᤌᤠᤖᤡᤰ. ᤂᤧᤒᤩᤠᤱ ᤔᤡᤛᤪᤒᤠ ᤜ᤺ᤱᤃᤢ᤺ᤸᤗᤧ ᤁᤢᤕᤠ ᤁᤢᤕᤠ ᤐᤥᤱᤗ ᤐᤕᤶ ᤕᤶᤒᤠ ᤘᤖ᤺ᤱ ᤌᤠᤖᤡᤰ ᤁᤧᤳ॥ ᤁᤱᤃ ᤗᤠᤱᤃᤧᤳ ᤐᤡᤛᤠᤱᤒᤠ ᤀᤡ᤺ᤴᤍᤥ ᤐᤥᤱ᤹॥ 20 “ᤏᤠᤶᤎᤠ ᤗᤧᤵᤔᤠᤱᤒᤠ ᤀᤡ᤺ᤴᤍᤥ᤺ᤴᤃ ᤗᤧᤒᤥ-ᤜᤔᤠᤋ ᤌᤡᤰᤏᤠᤜᤠᤱ ᤗᤧᤵᤔᤠᤱᤒᤠ ᤁᤢᤕᤠᤀᤥ ᤌᤠᤖᤡᤰ. ᤐᤕᤶ ᤕᤶᤒᤠ ᤋᤢᤱᤃᤥᤍᤡᤱ ᤘᤖ᤺ᤱᤅᤡᤴ ᤕᤠᤱᤄᤢ᤹॥ ᤁᤱᤃ ᤏᤠᤶᤎᤠ ᤗᤧᤵᤔᤠᤱᤒᤠ ᤀᤡ᤺ᤴᤍᤥ ᤐᤥᤱ᤹॥ 21 ᤂᤡᤏᤡ᤹ ᤀᤠᤵᤑᤣᤰ ᤀᤠᤵᤑᤣᤰ ᤗᤢᤶᤔᤥ ᤀᤡᤛᤪᤠᤀᤡᤗᤒᤠ ᤌᤠ᤺ᤰᤜᤠ᤹ᤖᤧ ᤂᤢᤴᤇᤡ᤹ ᤔᤡᤱ ᤁᤢᤀᤡᤛᤡᤰ ᤂᤡᤏᤡ᤹ ᤁᤴ ᤗᤠᤈᤣᤴ ᤑ᤺ᤰᤂᤧᤶᤔᤧ᤹॥ 22 ᤁᤴ ᤗᤠᤈᤣᤴ ᤗᤳᤇᤠ ᤗᤰᤂᤥᤔᤠ ᤁᤢᤛᤡᤱᤒᤠ ᤂᤡᤏᤡ᤹ ᤀᤠᤵᤑᤣᤰ ᤗᤠᤃᤡ ᤏᤢ ᤂᤡᤏᤡ᤹ᤏᤢ ᤁᤧᤕᤢᤱᤒᤠ. ᤁᤢᤛ᤻ᤛᤠᤁᤢᤀᤣ ᤁᤧᤘᤠ᤹ᤒᤠ ᤘᤣ᤹ ᤗᤠᤈᤣ᤹ᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡᤀᤠᤱ ᤁᤢᤗᤰ ᤁᤢᤗᤰ ᤑ᤺ᤰᤂᤧᤶ ᤐᤡᤖᤧᤶᤛᤡᤶᤔᤧ᤹॥ ᤂᤡᤏᤡ᤹ ᤂᤧᤱᤜᤠ᤹ ᤀᤡᤛᤪᤠᤀᤡᤗᤀᤥᤀᤣ ᤛᤠᤃᤧᤘᤠ᤺ᤴᤇᤡᤱᤒᤠ ᤀᤠᤵᤑᤣᤰ ᤗᤠᤈᤣ᤹ᤒᤠ ᤁᤢᤀᤡᤛᤡ᤺ᤰᤁᤣ ᤀᤡ᤺ᤳᤋᤧᤶᤛᤡᤶᤔᤧ᤹. ᤂᤡᤏᤡ᤹ᤏᤢ ᤛᤥᤛᤥᤖᤡᤰ ᤀᤡᤛᤪᤠᤀᤡᤗᤒᤠ ᤌᤠ᤺ᤰᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤂᤧᤱᤜᤠ᤹ᤖᤧ ᤗᤰᤂᤥᤔᤠᤀᤣ ᤐᤥᤱ᤹॥ 23 ᤘᤣ᤹ ᤗᤠᤈᤣ᤹ᤒᤠᤴ. ᤀᤠᤳᤋᤡᤴ ᤌᤠ᤺ᤰᤁᤡᤴᤏᤢ ᤛᤥᤖᤡᤰ ᤕᤢᤱ᤹. ᤂᤡᤏᤡ᤹ ᤂᤧᤴᤏᤢ ᤛᤥᤖᤡᤰ ᤘᤣ᤹ ᤗᤠᤈᤣ᤹ᤒᤠᤴ ᤗᤰᤂᤥᤔᤠ ᤁᤧᤒᤡᤖᤢᤶᤗ ᤐᤥᤱ᤹.” ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.