ᤀᤡᤈᤁᤡᤀᤣᤗ 46 - LIFOTNTᤜᤠᤱ ᤏᤢ ᤋᤱᤏᤠᤶᤜᤠ᤹ 1 “‘ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤛᤡᤃᤠᤱ ᤗᤰᤂᤢᤶᤔᤥᤒᤠ ᤏᤠᤱᤃᤧᤴ ᤐᤡᤛᤠᤱ ᤁᤧᤜᤡᤛᤡᤱᤒᤠ ᤕᤶᤒᤠ ᤗᤠᤶᤎᤣ᤺ᤵᤐᤠᤴ ᤕᤠ᤺ᤶᤒᤰ ᤆᤥ᤺ᤰᤔᤠ ᤋᤢᤰᤛᤡ ᤕᤧᤴ ᤌᤠᤖᤡᤰ ᤛᤢᤵᤔᤠ ᤑᤶᤔᤠ ᤐᤥᤱ᤹. ᤁᤖ ᤛᤒᤠᤌ ᤕᤧᤴᤏᤥ ᤏᤢ ᤗᤠᤍᤢᤵᤐᤥᤒᤠ ᤕᤧᤴᤏᤥᤃ ᤜᤶᤔᤠ ᤐᤥᤱ᤹॥ 2 ᤜᤠᤱᤅᤡᤴ ᤗᤠ᤺ᤰᤁᤠᤳᤗᤠᤶ ᤕᤶᤒᤠ ᤗᤠᤶᤎᤣ᤺ᤳᤋᤥᤒᤠ ᤀᤠ᤺ᤶᤓᤥ᤹ᤀᤥᤗᤠᤶ ᤛᤡᤃᤠᤱ ᤗᤠ᤺ᤵᤔᤠ ᤐᤥᤱ᤹ ᤜᤧᤰᤁᤩᤠᤱ ᤕᤶᤒᤠ ᤗᤠᤶᤎᤣᤳ ᤛᤡᤳᤗᤠᤱᤜᤠ᤹ᤖᤧ ᤁᤢᤒᤣᤛᤠᤱ ᤂᤢᤏᤧ᤹ ᤕᤧᤵᤗ ᤐᤥᤱ᤹॥ ᤂᤢᤏᤧ᤹ ᤋᤠᤖᤢᤒᤠ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠᤴ ᤏᤢ ᤋᤱᤈᤢᤶ ᤘᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤔᤧᤍᤥᤴᤍᤢᤖ ᤐᤥᤱ᤹॥ ᤕᤶᤒᤠ ᤗᤠᤶᤎᤠ᤺ᤳᤐᤢᤱᤅᤥ ᤂᤢᤏᤧ᤹ ᤔᤠᤱᤛᤧᤘᤠ ᤆᤥᤃᤢᤖ ᤐᤥᤱ᤹ ᤂᤧᤒᤩᤠᤱ ᤂᤢᤏᤧ᤹ ᤗᤠ᤺ᤰᤁᤠᤳ ᤗ᤺ᤶᤔᤠ ᤐᤣ᤺ᤰᤔᤠ ᤐᤥᤱ᤹. ᤁᤖ ᤕᤶᤒᤠ ᤗᤠᤶᤎᤣ᤺ᤵᤐᤠᤴ ᤕᤢ᤺ᤴᤇᤡᤰ ᤌᤠᤖᤡᤰ ᤔᤧᤴᤇᤢᤵᤐᤣ ᤑᤶᤔᤠ ᤐᤥᤱ᤹॥ 3 ᤛᤠᤒ᤻ᤒᤠᤌᤜᤠ᤹ᤀᤥ ᤏᤢ ᤗᤠᤍᤢᤵᤜᤠ᤹ᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤕᤶᤒᤠ ᤗᤠᤶᤎᤣᤳ ᤛᤡᤃᤠᤱ ᤗᤠ᤺ᤵᤔᤠᤍᤧᤴᤏᤥ ᤗᤠᤈᤣ᤹ᤀᤥᤒᤠ ᤔᤏᤠᤜᤠ᤹ ᤔᤠᤱᤛᤧᤘᤠ ᤔᤧᤈᤥ᤺ᤰᤗ ᤐᤥᤱ᤹॥ 4 “‘ᤛᤒᤠᤌ ᤕᤧᤴᤏᤥ ᤜᤠᤱᤅᤡᤸᤗᤧ ᤕᤜᤘᤣ ᤍᤠᤱᤒᤠᤀᤥ ᤋᤠ᤺ᤵᤔᤠ ᤁᤧᤒᤥᤱᤒᤠ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ ᤋᤢᤰᤛᤡ ᤁᤢᤶᤒᤠᤒᤠ ᤔᤧᤸᤗᤢᤰᤜᤠ᤹ ᤏᤢ ᤗᤳᤇᤠ ᤌᤢ᤺ᤶᤒᤠ. ᤂᤧᤴ ᤁᤧᤖᤧᤰ ᤔᤧᤱᤃᤠ᤺ᤶᤔᤏᤠᤒᤠ ᤐᤥᤱᤔᤠ ᤐᤥᤱ᤹॥ 5 ᤌᤢ᤺ᤶᤒᤠ᤺ᤴᤏᤢ ᤛᤥᤖᤡᤰ ᤋᤥ᤺ᤶᤔᤠ ᤁᤧᤒᤥᤱᤒᤠ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤴ ᤀᤣᤐᤠ ᤌᤡᤰ ᤐᤥᤱᤗ ᤐᤥᤱ᤹. ᤜᤧᤰᤁᤩᤠᤱ ᤔᤧᤰᤗᤢᤰᤛᤠ᤺ᤳᤜᤠ᤹ᤏᤢ ᤛᤥᤛᤥᤖᤡᤰ ᤋᤥ᤺ᤶᤔᤠ ᤁᤧᤒᤥᤱᤒᤠ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠ᤺ᤴᤃ ᤆᤩᤠ ᤗ᤺ᤵᤔᤠ ᤏᤡᤱᤘᤠ᤹ ᤆᤥᤃᤢᤛᤠᤱ ᤏᤢ᤹. ᤂᤧᤴᤏᤢ ᤛᤥᤛᤥᤖᤡᤰ ᤁᤧᤖᤧᤰ ᤀᤣᤐᤠᤖᤧ ᤗᤠᤃᤡ ᤜᤡᤴ ᤌᤡᤰ ᤏᤡ᤺ᤱᤃᤣ᤹ ᤗ᤺ᤵᤔᤠ ᤐᤥᤱ᤹॥ 6 ᤗᤠᤍᤢᤵᤐᤥᤒᤠ ᤕᤧᤴᤏᤥ ᤐᤡᤳᤛᤠᤳ ᤌᤡᤰ. ᤋᤢᤰᤛᤡ ᤔᤧᤸᤗᤢᤰᤛᤠ᤺ᤳᤜᤠ᤹ ᤏᤢ ᤗᤳᤇᤠ ᤌᤢ᤺ᤶᤒᤠ ᤋᤥ᤺ᤶᤔᤠᤛᤡ ᤐᤥᤱ᤹. ᤂᤧᤴ ᤁᤧᤖᤧᤰ ᤔᤧᤱᤃᤠ᤺ᤴᤔᤏᤠᤒᤠ ᤐᤥᤱᤔᤠ ᤐᤥᤱ᤹॥ 7 ᤛᤧᤃᤶᤒᤠᤴᤏᤢ ᤀᤣᤐᤠ ᤌᤡᤰ. ᤌᤢ᤺ᤶᤒᤠ᤺ᤴᤏᤢ ᤀᤣᤐᤠ ᤌᤡᤰ. ᤜᤧᤰᤁᤩᤠᤱ ᤔᤧᤸᤗᤢᤰᤛᤠ᤺ᤳᤜᤠ᤹ᤏᤢ ᤁᤢᤏᤡᤱᤘᤠ᤹ ᤀᤡᤛᤡ᤺ᤰ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠ ᤁᤢᤀᤡᤛᤡᤰ ᤋᤠᤖᤢᤖ ᤐᤥᤱ᤹. ᤂᤧᤴᤏᤢ ᤛᤥᤛᤥᤖᤡᤰ ᤁᤧᤖᤧᤰ ᤀᤣᤐᤠᤖᤧ ᤗᤠᤃᤡ ᤜᤡᤴ ᤌᤡᤰ ᤏᤡ᤺ᤱᤃᤣ᤹ ᤗ᤺ᤵᤔᤠ ᤐᤥᤱ᤹॥ 8 ᤜᤠᤱᤅᤡᤴ ᤛᤡᤃᤠᤱ ᤗᤠ᤺ᤳᤋᤡᤸᤗᤧ. ᤕᤶᤒᤠ ᤗᤠᤶᤎᤣ᤺ᤵᤐᤥᤒᤠ ᤀᤠ᤺ᤶᤓᤥ᤹ᤀᤥᤗᤠᤶ ᤐᤥᤱᤅᤠᤱ ᤂᤢᤏᤧ᤹ ᤛᤡᤃᤠᤱ ᤗᤠ᤺ᤳᤗ. ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤶᤓᤠ ᤂᤧᤴ ᤗᤠᤶᤒᤠ ᤗᤠ᤺ᤰᤁᤠᤳ ᤗ᤺ᤴᤏᤠᤱ ᤐᤣ᤺ᤰᤗ॥ 9 “‘ᤏᤡ᤺ᤴᤎᤥ ᤁᤧᤒᤥᤱᤒᤠ ᤋᤱᤏᤠᤶᤜᤠ᤹ᤀᤥ ᤗᤠᤈᤣ᤹ᤀᤥᤒᤠ ᤔᤏᤠᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤔᤧᤍᤠ᤺ᤸᤗᤧ. ᤌᤠᤱᤃᤧᤳ ᤗᤧᤵᤔᤠᤱᤒᤠ ᤕᤶᤒᤠ ᤗᤠᤶᤎᤣ᤺ᤵᤐᤥᤗᤠᤶ ᤔᤠᤱᤛᤧᤘᤠ ᤆᤥ᤺ᤰᤛᤧ ᤛᤡᤃᤠᤱ ᤁᤧᤗᤠ᤺ᤵᤐᤠ ᤔᤏᤠᤜᤠ᤹ ᤗᤠᤱᤃᤧᤳ ᤐᤡᤛᤠᤱᤒᤠ ᤕᤶᤒᤠ ᤗᤠᤶᤎᤣ᤺ᤵᤐᤥᤗᤠᤶ ᤗᤠ᤺ᤰᤁᤠᤳ ᤔᤧᤗᤴ ᤔᤧᤒᤣ᤺ᤰᤗ. ᤜᤧᤰᤁᤩᤠᤱ ᤗᤠᤱᤃᤧᤳ ᤐᤡᤛᤠᤱᤒᤠ ᤕᤶᤒᤠ ᤗᤠᤶᤎᤣ᤺ᤵᤐᤥᤗᤠᤶ ᤛᤡᤃᤠᤱ ᤁᤧᤗᤠ᤺ᤵᤐᤠᤜᤠ᤹ ᤌᤠᤱᤃᤧᤳ ᤐᤡᤛᤠᤱᤒᤠ ᤕᤶᤒᤠ ᤗᤠᤶᤎᤣ᤺ᤵᤐᤥᤗᤠᤶ ᤗᤠ᤺ᤰᤁᤠᤳ ᤔᤧᤗᤴ ᤔᤧᤒᤣ᤺ᤰᤗ॥ ᤀᤠᤳᤋᤡᤴᤏᤠᤱ ᤂᤢᤏᤧ᤹ ᤛᤡᤃᤠᤱ ᤗᤠᤛᤧ ᤋᤩᤧᤒᤠ ᤗᤠᤶᤎᤣ᤺ᤵᤐᤥᤗᤠᤶ ᤕᤠᤶᤔᤥ ᤏᤢ᤺ᤱᤔᤠ ᤔᤧᤄᤥᤏᤧᤴ. ᤁᤖ ᤌᤡᤰᤏᤠᤜᤠᤱ ᤗᤧᤵᤔᤠᤱᤒᤠ ᤗᤠᤶᤎᤣ᤺ᤵᤐᤥᤗᤠᤶ ᤁᤧᤖᤧᤰ ᤗᤠ᤺ᤰᤁᤠᤳ ᤗ᤺ᤶᤔᤠ ᤐᤣ᤺ᤰᤔᤠ ᤐᤥᤱ᤹॥ 10 ᤂᤧᤱᤜᤠ᤹ ᤛᤡᤃᤠᤱ ᤔᤧᤗᤠ᤺ᤳᤋᤡᤸᤗᤧ ᤜᤧᤰᤁᤩᤠᤱ ᤗᤠ᤺ᤰᤁᤠᤳ ᤔᤧᤒᤣ᤺ᤰᤁᤡᤸᤗᤧ ᤜᤠᤱᤅᤡᤴᤏᤠᤱ ᤂᤢᤴᤇᤡ᤹ᤏᤢᤀᤣ ᤛᤥᤖᤡᤰ ᤗᤠ᤺ᤵᤔᤠ ᤗ᤺ᤶᤔᤠ ᤐᤥᤱ᤹॥ 11 “‘ᤋᤥᤔᤠ ᤁᤧᤒᤥᤱᤒᤠ ᤋᤱᤏᤠᤶᤜᤠ᤹ ᤏᤢ ᤋᤱᤏᤠᤶᤜᤠ᤹ᤀᤥᤒᤠ ᤕᤧᤴᤜᤠ᤹ᤀᤥ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤴ ᤗᤳᤇᤠ ᤐᤡᤳᤛᤠᤳ ᤌᤡᤰᤏᤢ ᤀᤣᤐᤠ ᤌᤡᤰ. ᤔᤧᤸᤗᤢᤰ ᤌᤡᤰᤏᤢ ᤀᤣᤐᤠ ᤌᤡᤰ. ᤜᤧᤰᤁᤩᤠᤱ ᤌᤢ᤺ᤶᤒᤠ ᤌᤡᤰᤏᤢ ᤆᤩᤠ ᤗ᤺ᤵᤔᤠ ᤏᤡᤱᤘᤠ᤹ ᤆᤥᤃᤢ᤹ ᤂᤧᤶᤓᤩᤠᤖᤡᤰᤁᤣ ᤗ᤺ᤳᤋᤢᤖ. ᤂᤧᤴᤏᤢ ᤛᤥᤛᤥᤖᤡᤰ ᤀᤣᤐᤠ ᤌᤰᤔᤠ ᤜᤡᤴ ᤌᤡᤰ ᤏᤡ᤺ᤱᤃᤣ᤹ ᤗ᤺ᤳᤋᤢᤖ ᤐᤥᤱ᤹॥ 12 “‘ᤀᤠᤸᤗ ᤜᤠᤱᤅᤡᤸᤗᤧ ᤀᤠᤒᤠᤅᤣ ᤁᤢᤏᤡᤱᤘᤠ᤹ ᤗᤠᤶᤒᤠᤒᤠ ᤜᤧᤰᤁᤣ ᤕᤜᤘᤣ ᤍᤠᤱᤒᤠᤀᤥ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤀᤡᤃᤪ ᤋᤱᤈᤢᤶ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤋᤥ᤺ᤶᤔᤠ ᤏᤡᤱᤘᤠ᤹ ᤆᤥᤃᤢ᤹. ᤜᤧᤰᤁᤣ᤺ᤸᤗᤧ ᤂᤢᤏᤧ᤹ ᤁᤢᤗᤠᤃᤡ ᤛᤡᤃᤠᤱ ᤗᤰᤂᤢᤶᤔᤥ ᤁᤧᤃᤧᤵᤐᤠ ᤏᤠᤱᤃᤧᤴ ᤐᤡᤛᤠᤱᤒᤠ ᤕᤶᤒᤠ ᤗᤠᤶᤎᤣ᤺ᤵᤐᤠᤴ ᤜᤶᤔᤠ ᤐᤡᤔᤠ ᤐᤥᤱ᤹॥ ᤂᤢᤏᤧ᤹ ᤏᤠ᤺ᤶᤛᤡᤱᤔᤠ ᤕᤧᤴᤏᤥ ᤛᤡᤍᤢᤱᤈᤓᤠ ᤆᤥᤃᤢᤒᤠ ᤁᤢᤀᤡᤛᤡᤰ ᤋᤥ᤺ᤴᤍᤢ᤹॥ ᤂᤢᤏᤧ᤹ ᤗ᤺ᤴᤒᤣ᤺ᤰᤁᤠᤱ ᤂᤧᤴ ᤕᤶᤒᤠ ᤋᤠ᤺ᤰᤜᤴ ᤗᤠᤶᤎᤣ᤺ᤵᤐᤠᤴ ᤕᤠᤶᤔᤥ ᤛᤢᤵᤔᤠ ᤐᤥᤱᤗᤥ॥ ᤌᤡᤰᤕᤠ᤺ᤴᤎᤰ ᤋᤥ᤺ᤶᤔᤠ ᤁᤧᤒᤥᤱᤒᤠ ᤛᤡᤍᤢᤱᤈᤓᤠ 13 “‘ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤋᤠᤏᤠᤶ ᤋᤠᤏᤠᤶ ᤋᤱᤒᤣ ᤌᤡᤰ ᤁᤧᤃᤧᤵᤐᤠ ᤔᤧᤱᤃᤠ᤺ᤶᤔᤏᤠᤒᤠ ᤔᤧᤸᤗᤢᤰᤛᤠ᤺ᤳᤌᤡᤰ ᤂᤡᤏᤡ᤹ ᤌᤡᤰᤕᤠ᤺ᤴᤎᤰ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤠᤕᤠᤃᤧᤴ ᤛᤡᤍᤢᤱᤈᤓᤠ ᤁᤧᤍᤥ᤺ᤴᤍᤢᤶᤗ ᤐᤥᤱ᤹॥ 14 ᤂᤧᤴᤏᤢ ᤛᤥᤛᤥᤖᤡᤰ ᤋᤠᤏᤠᤶ ᤌᤰᤔᤠ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠ ᤀᤣᤐᤠ᤺ᤸᤗᤧ ᤋᤢᤰᤛᤡᤃᤣᤰᤐᤠ ᤁᤢᤗᤰ ᤏᤢ ᤑᤣ᤹ᤖᤢᤶ ᤛ᤹ᤔᤠᤖᤧ ᤗᤠᤃᤡ ᤜᤡᤏᤖᤧ ᤁᤢᤗᤰ ᤛᤢᤶᤛᤡ ᤏᤡ᤺ᤱᤃᤣ᤹ᤀᤠᤱ ᤁᤧᤍᤠᤖᤢᤶᤗ ᤐᤥᤱ᤹॥ ᤕᤜᤘᤣ ᤍᤠᤱᤒᤠᤀᤥ ᤋᤥ᤺ᤶᤔᤏᤠᤒᤠ ᤁᤴ ᤛᤡᤍᤢᤱᤈᤓᤠ᤺ᤱᤃ ᤏᤢᤵᤔᤧᤴᤍᤡᤱ ᤛᤍᤠᤍᤡᤱᤒᤠ ᤌᤡᤶᤗᤥ॥ 15 ᤁᤶᤓᤗ᤹ᤖᤡᤰ ᤆᤰᤔᤧᤸᤗ᤹ᤀᤣ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤋᤠᤏᤠᤶ ᤌᤰᤔᤠ ᤔᤧᤸᤗᤢᤰᤛᤠᤳ ᤜᤧᤰᤁᤩᤠᤱ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠ ᤏᤢ ᤏᤡ᤺ᤱᤃᤣ᤹ ᤋᤠ᤺ᤵᤔᤠ ᤐᤥᤱᤗᤥ॥ ᤜᤠᤱ ᤏᤢ ᤗᤠᤈᤣ᤹ 16 “‘ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤜᤠᤱᤅᤡᤸᤗᤧ ᤂᤢᤏᤧ᤹ ᤀᤠᤵᤑᤣᤰ ᤁᤢᤗᤰᤂᤥᤔᤠᤗᤠᤶ ᤂᤢᤏᤧ᤹ ᤁᤢᤛ᤻ᤛᤠ ᤕᤧᤶᤒᤡᤳᤇᤠᤜᤠ᤹ᤀᤥ ᤌᤡᤰᤐᤠ ᤐᤡᤖᤢᤏᤧᤓᤃᤪ. ᤁᤴ ᤗᤰᤁᤡᤴ ᤂᤧᤸᤗᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤖᤧᤴᤏᤠᤱ ᤐᤥᤱ᤹. ᤁᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤰᤂᤥᤔᤠ ᤗᤠᤶᤒᤠᤒᤠ ᤗᤳᤇᤠ ᤗᤰ ᤐᤥᤱᤗ॥ 17 ᤁᤖ ᤂᤢᤏᤧ᤹ ᤀᤰᤋᤱᤒᤠ ᤔᤡᤰᤋᤥ᤺ᤰᤁᤡᤴ ᤁᤢᤕᤥ᤺ᤃ᤻ᤒᤠᤜᤠ᤹ᤀᤥ ᤁᤢᤓᤠ ᤌᤡᤰᤐᤠ ᤐᤡᤖᤢᤏᤧᤓᤃᤪ. ᤂᤢᤏᤧ᤹ ᤕᤠᤶᤔᤥ ᤕᤢᤰᤛᤡᤱ ᤐᤥᤱᤔᤠ ᤋᤱᤒᤣ ᤌᤠᤖᤡᤰᤗᤰ ᤂᤧᤴ ᤂᤧᤸᤗᤧᤴ ᤐᤥᤱᤗ. ᤂᤧᤒᤩᤠᤱ ᤂᤧᤴ ᤔᤡᤰᤋᤥ᤺ᤰᤁᤡᤴ ᤕᤠᤶᤔᤥ ᤜᤠᤱᤅᤡᤸᤗᤧᤴ ᤐᤥᤱᤗ॥ ᤂᤢᤏᤧ᤹ ᤁᤢᤗᤰᤂᤥᤔᤠᤴ ᤂᤢᤏᤧ᤹ ᤁᤢᤛ᤻ᤛᤠ ᤕᤧᤶᤒᤡᤳᤇᤠᤜᤠ᤹ᤖᤧᤴᤗᤰ ᤐᤥᤱᤗ. ᤂᤧᤴ ᤂᤧᤱᤜᤠ᤹ᤖᤧᤴᤏᤣ ᤐᤥᤱ᤹॥ 18 ᤜᤠᤱᤅᤡᤸᤗᤧ ᤔᤏᤠᤜᤠ᤹ ᤂᤢᤴᤇᤡ᤹ ᤗᤠᤈᤣ᤹ ᤛᤡᤱᤒᤢᤱᤅᤥᤗᤠᤶ ᤗ᤺ᤵᤔᤠᤍᤣᤔᤠᤛᤡᤀᤠᤱ ᤂᤢᤴᤇᤡ᤹ ᤗᤰᤂᤥᤔᤠᤴ ᤔᤧᤵᤔᤠᤛᤡᤱ ᤔᤧᤏᤢ᤹ᤏᤧᤴ॥ ᤂᤢᤏᤧ᤹ ᤀᤠᤵᤑᤣᤰ ᤁᤢᤗᤠᤈᤣ᤹ ᤛᤡᤱᤒᤢᤱᤗᤠᤶ ᤁᤢᤛ᤻ᤛᤠ ᤕᤧᤶᤒᤡᤳᤇᤠᤜᤠ᤹ ᤂᤢᤏᤧ᤹ ᤗᤰᤂᤥᤔᤠ ᤕᤢᤰ ᤐᤡᤖᤢᤛᤡᤖ ᤐᤥᤱ᤹. ᤜᤧᤰᤁᤣᤗ᤹ᤖᤡᤰ ᤀᤠᤱᤃᤠ᤹ ᤀᤠᤳᤋᤡᤴ ᤀᤠᤔᤏᤠᤜᤠ᤹ᤀᤠᤱ ᤂᤢᤴᤇᤡ᤹ ᤗᤠᤈᤣ᤹ ᤛᤡᤱᤒᤢᤱᤗᤠᤶ ᤔᤧᤴᤇᤧᤴᤏᤧᤴᤗᤖᤥ॥’” ᤔᤠᤱᤜᤡᤶᤔᤥ ᤁᤧᤏᤧᤒᤠ ᤛᤠ ᤌᤧᤶᤔᤠᤍᤧᤴᤜᤠ᤹ 19 ᤂᤧᤒᤩᤠᤱ ᤂᤧᤴ ᤔᤏᤠ᤺ᤸᤗᤧ ᤀᤠᤱᤃᤠ᤹ ᤕᤶᤒᤠ ᤗᤠᤶᤎᤣ᤺ᤳᤋᤡᤸᤗᤧ ᤁᤢᤒᤣᤛᤠᤱ ᤁᤧᤒᤵᤐᤠ ᤛᤡᤃᤠᤱ ᤗᤠ᤺ᤵᤔᤠ ᤗᤠᤶᤎᤣ᤺ᤳᤋᤥᤗᤠᤶ ᤌᤠᤱᤃᤧᤳ ᤗᤧᤵᤔᤠᤱ ᤁᤧᤜᤡᤛᤡᤱᤒᤠ ᤛᤣᤛᤣ ᤕᤠᤰᤑᤠᤱᤜᤠ᤹ᤀᤥ ᤋᤠᤖᤠᤱ. ᤂᤧᤴ ᤕᤠᤰᤑᤠᤱᤜᤠ᤹ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤏᤧᤛ᤻ᤛᤧ. ᤜᤧᤰᤁᤩᤠᤱ ᤏᤠᤶᤎᤠ ᤗᤧᤵᤔᤠᤱᤒᤠ ᤁᤢᤛᤢᤰᤐᤥ ᤁᤧᤏᤧᤒᤠᤍᤧᤴ ᤌᤡᤰ ᤂᤧᤸᤗᤧ ᤀᤠᤱᤃᤠ᤹ ᤀᤥ᤺ᤴᤎᤠᤰᤋᤠᤱ॥ 20 ᤂᤢᤏᤧ᤹ ᤀᤠᤱᤃᤠ᤹ ᤔᤧᤳᤋᤠᤱ. “ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤂᤧᤴ ᤛᤡᤍᤢᤱᤈᤓᤠᤜᤠ᤹ ᤗᤠᤁᤠᤳᤐᤠ ᤗᤰᤂᤢᤶᤔᤥ ᤔᤧᤴᤍᤣ᤹ᤖᤢᤴᤗ ᤂᤧᤒᤩᤠᤱ ᤔᤏᤠᤜᤠ᤹ ᤜᤠᤴᤋᤡ ᤔᤧᤶᤒᤥᤱᤏᤧᤴᤗ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤁᤴ ᤋᤧᤴᤏᤥ ᤀᤠᤵᤋᤡᤰᤗᤠᤶ ᤗᤧᤵᤔᤡ ᤂᤥᤔᤠ ᤘᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ ᤏᤢ ᤛᤢᤳᤌᤥ ᤐᤥᤱᤔᤠ ᤘᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ ᤔᤧᤎᤥ᤺ᤰᤋᤢ ᤜᤧᤰᤁᤩᤠᤱ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤜᤠ᤹ ᤔᤧᤗᤧ᤺ᤱᤄᤢ᤹॥” 21 ᤂᤧᤒᤩᤠᤱ ᤂᤢᤏᤧ᤹ ᤀᤠᤱᤃᤠ᤹ ᤗᤠᤁᤠᤳᤐᤠ ᤗᤰᤂᤢᤶᤔᤥ ᤋᤠᤖᤠᤱᤅᤠᤱ ᤗᤰᤂᤢᤶᤔᤡᤸᤗᤧ ᤁᤧᤖᤧᤰ ᤁᤢᤛᤢᤰᤐᤠᤜᤠ᤹ᤀᤥ ᤋᤣ᤹ᤖᤠᤱ. ᤜᤧᤰᤁᤩᤠᤱ ᤀᤠᤱᤃᤠ᤹ ᤁᤧᤖᤧᤰ ᤁᤢᤛᤢᤰᤐᤠᤜᤠ᤹ᤀᤥ ᤘᤣ᤹ ᤗᤰᤂᤢᤶᤜᤠ᤹ ᤏᤡᤛᤢᤱ॥ 22 ᤗᤠᤁᤠᤳᤐᤠ ᤗᤰᤂᤢᤶᤔᤡᤸᤗᤧ ᤗᤡᤛᤡ ᤁᤧᤖᤧᤰ ᤐᤡᤛᤠᤱ ᤁᤢᤛᤢᤰᤐᤠᤜᤠ᤹ᤀᤥ ᤗᤡᤒᤥᤱ ᤜᤢᤰᤛᤡᤰ ᤁᤣ᤺ᤶᤒᤠ ᤁᤢᤗᤠᤶᤋᤡ ᤏᤢ ᤛᤢᤶᤒᤥᤱ ᤜᤢᤰᤛᤡᤰ ᤁᤢᤓᤧᤖᤧ ᤁᤧᤏᤧᤒᤠ ᤗᤢᤱᤎᤠᤰᤁᤡᤸᤗᤧ ᤁᤒᤪᤡᤱ ᤁᤒᤢᤒᤠ ᤗᤰᤂᤢᤶᤜᤠ᤹ ᤏᤧᤛ᤻ᤛᤧ. ᤁᤧᤖᤧᤰ ᤗᤰᤂᤢᤶᤜᤠ᤹ᤖᤧ ᤗᤡᤛᤡ ᤁᤢᤛᤢᤰᤐᤠᤜᤠ᤹ᤀᤥ ᤁᤢᤗᤠᤶᤋᤡ ᤏᤢ ᤁᤢᤓᤧᤖᤧ ᤁᤢᤍᤱᤒᤠ ᤏᤧᤛ᤻ᤛᤧ॥ 23 ᤗᤡᤛᤡ ᤗᤰᤂᤢᤶᤜᤠ᤹ᤖᤧ ᤁᤧᤖᤧᤰ ᤐᤡᤛᤠᤱ ᤋᤧᤔᤧ᤺ᤵᤔᤧ᤺ᤵᤐᤠ ᤗᤢᤱᤎᤠᤰ ᤔᤧᤛᤧᤳᤋᤢᤒᤠ ᤕᤧᤒᤧ. ᤂᤧᤴᤏᤢ ᤛᤥᤛᤥᤖᤡᤰ ᤗᤢᤱᤎᤠᤰᤜᤠ᤹ᤖᤧ ᤁᤢᤛᤡ᤺ᤰᤋᤥ ᤁᤧᤖᤧᤰ ᤐᤡᤛᤠᤱ ᤔᤡᤜᤠ᤺ᤳᤗᤢᤱᤜᤠ᤹ ᤔᤧᤈᤥᤃᤢᤀᤠᤱ ᤏᤧᤛ᤻ᤛᤧ॥ 24 ᤂᤢᤏᤧ᤹ ᤀᤠᤱᤃᤠ᤹ ᤔᤧᤳᤋᤠᤱ. “ᤜᤠᤒᤠ ᤁᤴ ᤁᤢᤈᤠ ᤌᤥ᤺ᤰᤔᤠᤍᤧᤴᤜᤠ᤹ᤀᤥ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤡᤍᤢᤱᤈᤓᤠᤜᤠ᤹ ᤔᤠᤱᤜᤡᤶᤔᤥ ᤔᤠᤱᤛᤧᤘᤠ ᤁᤧᤈᤥ᤺ᤰᤐᤠᤜᤠ᤹ᤖᤧ ᤔᤧᤎᤥ᤺ᤰᤋᤢᤖᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.