ᤀᤡᤈᤁᤡᤀᤣᤗ 45 - LIFOTNTᤗᤠᤈᤣᤴ ᤔᤧᤓ᤺ᤰᤂᤢ 1 “‘ᤂᤡᤏᤡ᤹ ᤗᤰᤂᤥᤔᤠᤖᤧ ᤗᤠᤃᤡ ᤗᤠᤈᤣᤴ ᤁᤧᤓ᤺ᤰᤂᤢᤶᤔᤡᤸᤗᤧ ᥈᥋.᥆᥆᥆ ᤜᤧᤴᤇᤡᤱ ᤜᤢᤰᤛᤡᤰ ᤁᤣ᤺ᤶᤒᤠ ᤁᤢᤗᤠᤶᤋᤡ ᤏᤢ ᥈᥆.᥆᥆᥆ ᤜᤢᤰᤛᤡᤰ ᤁᤢᤓᤧᤖᤧ ᤁᤧᤏᤧᤒᤠ ᤁᤢᤗᤰ ᤌᤡᤰ ᤛᤣᤛᤣ ᤌᤢᤶ ᤐᤥᤱᤔᤠᤖᤧ ᤗᤠᤃᤡ ᤕᤜᤘᤣ ᤍᤠᤱᤒᤠᤀᤥ ᤂᤡᤏᤡ᤹ ᤁᤧᤍᤥ᤺ᤴᤍᤢᤶᤗ ᤐᤥᤱ᤹. ᤂᤧᤴ ᤁᤧᤖᤧᤰ ᤋᤧᤱᤃᤵᤐᤡᤴ ᤛᤣᤛᤣᤒᤠ ᤐᤥᤱ᤹॥ 2 ᤁᤵᤔᤥᤗᤠᤶ ᤁᤢᤗᤠᤶᤋᤡ ᤏᤢ ᤁᤢᤓᤧᤖᤧ ᤏᤧᤵᤔᤠᤱ ᤜᤢᤰᤛᤡᤰ ᥋᥆᥆ ᤁᤧᤏᤧᤒᤠ ᤁᤢᤗᤰ ᤌᤡᤰ ᤛᤣᤛᤣᤍᤧᤴᤗᤧ ᤗᤠᤃᤡ ᤐᤥᤱ᤹. ᤂᤧᤴ ᤗᤠ᤺ᤰᤁᤠᤳ ᤁᤧᤖᤧᤰ ᤐᤡᤛᤠᤱ ᥋᥆ ᤜᤢᤰᤛᤡᤰ ᤋᤠᤶᤍᤠᤶᤒᤠᤍᤧᤴ ᤏᤧᤖ ᤐᤥᤱ᤹॥ 3 ᤁᤴ ᤛᤣᤛᤣ ᤌᤢᤶᤔᤥ. ᥈᥋.᥆᥆᥆ ᤜᤢᤰᤛᤡᤰ ᤁᤣ᤺ᤶᤒᤠ ᤁᤢᤗᤠᤶᤋᤡ ᤏᤢ ᥇᥆.᥆᥆᥆ ᤜᤢᤰᤛᤡᤰ ᤁᤢᤓᤧᤖᤧ ᤁᤧᤏᤧᤒᤠ ᤁᤢᤗᤰ ᤌᤡᤰ ᤛᤡ᤺ᤰᤋᤧᤶᤔᤧ᤹॥ ᤁᤵᤔᤥ ᤛᤣᤛᤣᤍᤧᤴ. ᤛᤠ᤹ᤖᤡᤰ ᤛᤣᤛᤣᤒᤠᤍᤧᤴ ᤐᤥᤱ᤹॥ 4 ᤛᤣᤛᤣᤍᤧᤴᤏᤥ ᤔᤠᤱᤛᤧᤘᤠ ᤕᤠ᤺ᤶᤒᤰ ᤆᤥ᤺ᤰᤛᤧ ᤁᤧᤍᤠᤒᤠ ᤏᤢ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤏᤡ᤺ᤳᤋᤠᤱ ᤔᤠᤱᤛᤧᤘᤠ ᤕᤠ᤺ᤶᤒᤰ ᤆᤥ᤺ᤰᤛᤧ ᤁᤧᤍᤠᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤂᤧᤴ ᤗᤠᤈᤣ᤺ᤸᤗᤧ ᤁᤢᤗᤰ ᤌᤡᤰ ᤆᤰᤂᤥᤒᤠᤍᤧᤴᤏᤠᤱ ᤐᤥᤱ᤹॥ ᤁᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤜᤠ᤹ᤖᤧ ᤗᤠᤃᤡ ᤗᤠᤈᤣ᤹ ᤏᤢ ᤛᤣᤛᤣᤒᤠᤍᤧᤴᤗᤧ ᤗᤠᤃᤡ ᤗᤳᤇᤠ ᤛᤣᤛᤣᤍᤧᤴ ᤐᤥᤱ᤹॥ 5 ᥈᥋.᥆᥆᥆ ᤜᤢᤰᤛᤡᤰ ᤁᤣ᤺ᤶᤒᤠ ᤁᤢᤗᤠᤶᤋᤡ ᤏᤢ ᥇᥆.᥆᥆᥆ ᤜᤢᤰᤛᤡᤰ ᤁᤢᤓᤧᤖᤧ ᤁᤧᤏᤧᤒᤠ ᤁᤢᤗᤰ ᤌᤡᤰ ᤗᤠᤈᤣ᤹ ᤔᤠᤱᤜᤡᤶᤔᤥ ᤔᤠᤱᤛᤧᤘᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤗᤧᤒᤡᤜᤠ᤹ᤖᤧ ᤗᤠᤃᤡ ᤐᤠᤱᤈᤢᤶᤜᤠ᤹ ᤏᤢ ᤕᤢᤱᤔᤠᤖᤧ ᤗᤠᤃᤡ ᤂᤢᤴᤇᤡ᤹ ᤂᤥᤔᤠ ᤗᤰ ᤐᤥᤱ᤹॥ 6 “‘ᤛᤣᤛᤣᤍᤧᤴᤏᤡᤴᤏᤢ ᤛᤥᤛᤥᤖᤡᤰ ᥋.᥆᥆᥆ ᤜᤢᤰᤛᤡᤰ ᤁᤢᤓᤧᤖᤧ ᤏᤢ ᥈᥋.᥆᥆᥆ ᤜᤢᤰᤛᤡᤰ ᤁᤣ᤺ᤶᤒᤠ ᤁᤢᤗᤠᤶᤋᤡ ᤁᤧᤏᤧᤒᤠ. ᤜᤧᤰᤁᤩᤠᤱ ᤛᤣᤛᤣᤍᤧᤴᤏᤡᤸᤗᤧ ᤁᤢᤕᤠᤀᤥ ᤁᤧᤏᤧᤒᤠ ᤋᤧᤱᤃᤵ ᤌᤡᤰ ᤕᤧᤰᤕᤰᤁᤡᤸᤗᤧ ᤁᤢᤗᤠᤈᤣ᤹ ᤛᤡᤱᤒᤢᤱ ᤁᤢᤀᤡᤛᤡᤰ ᤀᤣ᤺ᤰ ᤛᤧᤴᤍᤧᤶᤔᤧ᤹. ᤁᤴ ᤁᤧᤖᤧᤰ ᤀᤡᤛᤪᤠᤀᤡᤗᤒᤠ ᤜᤡᤶᤛᤕᤱᤜᤠ᤹ᤖᤧ ᤗᤠᤃᤡ ᤐᤥᤱᤗᤥ॥ ᤜᤠᤱᤅᤡᤸᤗᤧ ᤁᤢᤗᤠᤈᤣ᤹ 7 “‘ᤛᤣᤛᤣ ᤌᤢᤶ ᤏᤢ ᤕᤧᤰᤕᤰᤁᤥᤒᤠ ᤁᤧᤖᤧᤰ ᤗᤠᤈᤣ᤹ ᤛᤡᤱᤒᤢᤱᤜᤠ᤹ᤖᤧ ᤁᤢᤕᤠᤀᤥᤒᤠ ᤗᤠᤈᤣ᤹ᤜᤠ᤹ ᤜᤠᤱᤅᤡᤸᤗᤧ ᤁᤢᤗᤠᤈᤣ᤹ ᤐᤥᤱ᤹॥ ᤁᤴ ᤏᤠᤶᤎᤠ ᤗᤧᤵᤔᤠᤱᤗᤠᤶ ᤏᤠᤶᤎᤠᤀᤣ ᤗᤧᤵᤔᤠᤱ ᤏᤢ ᤏᤠᤱᤃᤧᤴ ᤗᤧᤵᤔᤠᤱᤗᤠᤶ ᤏᤠᤱᤃᤧᤴᤏᤣ ᤗᤧᤵᤔᤠᤱ ᤁᤧᤒᤥᤒᤠ ᤁᤧᤒᤣ᤺ᤰᤐᤠ ᤐᤥᤱ᤹॥ ᤌᤠ᤺ᤰ ᤌᤠ᤺ᤰᤜᤠ᤹ᤖᤧ ᤂᤢᤴᤇᤡ᤹ ᤗᤰᤜᤠ᤹ᤀᤥᤒᤠ ᤌᤡᤰᤐᤠᤖᤧᤴ ᤐᤧᤴᤒᤧᤴ ᤁᤢᤍᤱᤒᤠ ᤐᤥᤱᤅᤠᤱ ᤏᤠᤶᤎᤠ ᤀᤡ᤺ᤴᤍᤥᤗᤠᤶ ᤏᤠᤱᤃᤧᤴ ᤀᤡ᤺ᤴᤍᤥ ᤌᤠᤖᤡᤰ ᤁᤧᤒᤥᤒᤠ ᤁᤧᤒᤣ᤺ᤰᤐᤠ ᤗᤰ ᤐᤥᤱ᤹॥ 8 ᤀᤡᤛᤪᤠᤀᤡᤗᤀᤥ ᤁᤴ ᤗᤠᤈᤣᤴ ᤂᤧᤸᤗᤧ ᤁᤢᤗᤰ ᤐᤥᤱ᤹॥ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤜᤠᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤀᤠᤸᤗᤀᤠᤱᤎᤥ ᤋᤠᤵᤑᤧ᤺ᤸᤗᤡᤰ ᤔᤧᤶᤔᤧᤳᤋᤢᤛᤡᤴ᤹ ᤁᤖ ᤀᤡᤛᤪᤠᤀᤡᤗᤒᤠ ᤜᤡᤶᤛᤕᤱᤜᤠ᤹ ᤂᤢᤴᤇᤡ᤹ ᤌᤠ᤺ᤰᤜᤠ᤹ ᤁᤢᤀᤡᤛᤡᤰ ᤗᤠᤈᤣᤴ ᤕᤢᤰ ᤆᤥ᤺ᤰᤔᤠ ᤔᤧᤓᤠ᤺ᤰᤋᤢᤛᤡᤖᤥ॥ ᤜᤠᤱᤜᤠ᤹ᤖᤧ ᤀᤡ᤺ᤵᤔᤠ ᤏᤠ᤺ᤵᤔᤠ ᤁᤧᤒᤥᤱᤒᤠ ᤌᤡᤶᤜᤠ᤹ 9 “‘ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤀᤡᤛᤪᤠᤀᤡᤗᤒᤠ ᤜᤠᤱᤛᤣ. ᤂᤡᤏᤡ᤹ ᤛᤠ᤹ᤖᤡᤰᤁᤣ ᤁᤢ᤹ᤀᤡᤃᤧᤓᤧᤖᤡᤀᤠᤱ ᤁᤧᤘᤕᤡ᤹᥄ ᤂᤡᤏᤡ᤹ ᤁᤢ᤹ᤀᤡᤓᤧᤶᤔᤠᤴ ᤏᤢ ᤔᤧᤴᤘᤠ᤹ᤔᤏᤠᤒᤠ ᤕᤠ᤺ᤶᤒᤰᤜᤠ᤹ ᤗᤧᤖᤧᤶᤔᤧ᤹ ᤜᤧᤰᤁᤩᤠᤱ ᤀᤠᤳᤋᤡᤴ ᤁᤧᤘᤠ᤹ᤒᤠ ᤏᤢ ᤁᤢᤍᤥ᤺ᤵᤔᤠ ᤆᤥᤰ ᤂᤧᤴ ᤆᤥᤃᤧᤶᤔᤧ᤹॥ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤂᤢᤴᤇᤡ᤹ ᤗᤠᤈᤣ᤹ ᤛᤡᤱᤒᤢᤱᤗᤠᤶ ᤏᤠ᤺ᤵᤔᤠᤍᤣᤔᤠᤛᤡ ᤗᤧᤖᤧᤶᤔᤧ᤹. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹॥ 10 ᤂᤡᤏᤡ᤹ ᤁᤧᤃᤧᤵᤐᤠ ᤁᤢᤛᤡ᤺ᤰᤔᤠ ᤁᤢᤎᤠᤱᤔᤠᤜᤠ᤹. ᤁᤧᤃᤧᤵᤐᤠ ᤀᤣᤐᤠ ᤏᤢ ᤁᤧᤃᤧᤵᤐᤠ ᤒᤠᤌ ᤁᤧᤕᤠᤅᤢᤶᤗ ᤐᤥᤱ᤹॥ 11 ᤀᤣᤐᤠ ᤏᤢ ᤒᤠᤌ ᤁᤢᤛᤡ᤺ᤰᤔᤠ ᤁᤢᤎᤠᤱᤔᤠᤜᤠ᤹ ᤁᤢᤍᤱᤒᤠ ᤐᤥᤱᤔᤠ ᤐᤥᤱ᤹. ᤀᤡᤃᤪ ᤌᤡᤒᤥᤱᤗᤰ ᤜᤥᤔᤖᤒᤠ ᤒᤠᤌ ᤏᤢ ᤌᤡᤒᤥᤱᤗᤰ ᤜᤥᤔᤖᤒᤠ ᤀᤣᤐᤠ. ᤁᤴ ᤏᤧᤵᤔᤠᤱᤗᤧ ᤗᤠᤃᤡ ᤜᤥᤔᤖᤧᤴ ᤁᤧᤘᤠ᤹ᤒᤠ ᤁᤢᤛᤡ᤺ᤰᤔᤠ ᤁᤢᤎᤠᤱᤔᤠᤖᤥ॥ 12 ᤛᤣᤁᤣᤗᤀᤥ ᤏᤡᤒᤥᤱ ᤃᤣᤖᤠᤜ ᤕᤠᤰᤗ ᤐᤥᤱ᤹॥ ᤗᤡᤒᤥᤱ ᤛᤣᤁᤣᤗ ᤁᤢᤕᤥ᤹ᤒᤠ ᤏᤡᤒᤥᤱᤅᤠᤱ ᤅᤠᤛᤡ ᤏᤢ ᤌᤡᤒᤥᤱᤅᤠᤱ ᤅᤠᤛᤡ ᤛᤣᤁᤣᤗ ᤁᤢᤕᤥ᤹ᤒᤠ ᤅᤠᤒᤥᤱ ᤛᤣᤁᤣᤗ ᤁᤢᤍᤱᤒᤠ ᤔᤡᤏᤠ ᤌᤡᤰ ᤐᤥᤱᤗᤥ॥ ᤁᤧᤖᤧᤰᤏᤢ᤺ᤸᤗᤧ ᤏᤢᤒᤠ ᤜᤢᤰᤘᤠᤜᤠ᤹ ᤏᤢ ᤛᤥᤛᤥᤳᤗᤖᤠᤱ 13 “‘ᤂᤡᤏᤡ᤹ ᤋᤥ᤺ᤶᤔᤠ ᤁᤧᤒᤥᤱᤒᤠ ᤜᤢᤰᤘᤠᤜᤠ᤹ ᤜᤠᤒᤠ ᤁᤴᤜᤠ᤹ᤖᤥ—ᤔᤠᤛᤡ ᤏᤢ ᤜ᤺ᤰᤛᤡ᤺ᤸᤗᤧᤴ ᤜᤥᤔᤖ ᤌᤰᤔᤠ ᤀᤣᤐᤠᤒᤠ ᤋᤢᤰᤛᤡᤃᤣᤰᤐᤠ ᤁᤢᤗᤰ॥ 14 ᤏᤡ᤺ᤱᤃᤣ᤹ᤖᤧ ᤗᤠᤃᤡ ᤛᤧᤶᤔᤠ ᤁᤧᤒᤥᤱᤒᤠ ᤁᤢᤗᤰ ᤁᤥᤖ ᤌᤰᤔᤠ ᤒᤠᤌᤖᤧ ᤌᤡᤒᤥᤱᤗᤰ॥ (ᤗᤳᤇᤠ ᤁᤥᤖᤀᤥ ᤌᤡᤒᤥᤱ ᤒᤠᤌ. ᤀᤡᤃᤪ ᤜᤥᤔᤣᤖ ᤌᤡᤰ ᤐᤥᤱ᤹. ᤌᤣᤀᤠᤱᤓᤧᤸᤗᤧ ᤌᤡᤒᤥᤱ ᤒᤠᤌᤖᤧ ᤜᤥᤔᤖ ᤌᤡᤰ ᤁᤢᤍᤱᤒᤠ ᤕᤥᤖᤥ॥) 15 ᤀᤡᤛᤪᤠᤀᤡᤗᤒᤠ ᤏᤢᤖᤡᤰ ᤆᤫᤠ᤺ᤳᤋᤡᤸᤗᤧ ᤘᤠᤖᤱᤔᤏᤠᤒᤠ ᤌᤰᤛᤠ ᤆᤠᤖᤠᤶᤔᤠᤍᤧᤴᤜᤠ᤹ᤀᤥᤗᤠᤶ ᤁᤡᤵ ᤏᤧᤳᤇᤡ ᤔᤧᤸᤗᤢᤰ ᤗᤢᤵ ᤌᤰᤔᤠ ᤗᤳᤇᤠ ᤔᤧᤸᤗᤢᤰ ᤕᤠᤱᤅᤠᤛᤡᤶᤔᤧ᤹॥ ᤀᤡᤛᤪᤠᤀᤡᤗᤒᤠ ᤜᤡᤶᤛᤕᤱᤜᤠ᤹ ᤛᤢᤳᤌᤥ ᤆᤥ᤺ᤰᤔᤠᤛᤡᤖᤧ ᤗᤠᤃᤡ. ᤕᤜᤘᤣ ᤍᤠᤱᤒᤧᤴᤏᤢ ᤋᤱᤈᤢᤶ ᤐᤥᤱᤔᤠᤖᤧ ᤗᤠᤃᤡ ᤁᤴ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠ. ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤠᤕᤠᤃᤧᤴ ᤛᤡᤍᤢᤱᤈᤓᤠ ᤏᤢ ᤋᤱᤈᤢᤶ ᤘᤠᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ᤖᤧ ᤗᤠᤃᤡ ᤀᤥᤃᤵ ᤔᤧᤈᤥᤃᤢᤖ. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹॥ 16 ᤀᤡᤛᤪᤠᤀᤡᤗᤀᤥ ᤜᤠᤱᤅᤡᤸᤗᤧ ᤁᤢᤗᤠᤃᤡ ᤀᤥᤃᤵ ᤆᤥ᤺ᤰᤔᤏᤠᤒᤠ ᤁᤴ ᤜᤢᤰᤘᤠᤜᤠ᤹ᤀᤥ ᤗᤠᤈᤣ᤹ᤒᤠ ᤁᤧᤖᤧᤰ ᤔᤏᤠᤜᤠ᤹ ᤔᤧᤈᤢᤶ᤹॥ 17 ᤀᤡᤛᤪᤠᤀᤡᤗᤒᤠ ᤜᤡᤶᤛᤕᤱᤅᤥ ᤋᤥᤔᤠ ᤏᤡ᤺ᤴᤎᤥ ᤁᤧᤒᤥᤱᤒᤠ ᤁᤧᤖᤧᤰ ᤛᤠᤓ᤺ᤱᤈᤠᤜᤠ᤹ᤀᤥ ᤁᤧᤖᤧᤰ ᤐᤖᤡᤰᤐᤠ ᤋᤱᤏᤠᤶᤜᤠ᤹ ᤗᤠᤍᤢᤵᤜᤠ᤹ᤀᤥ ᤏᤢ ᤛᤒᤠᤌ ᤋᤱᤏᤠᤶᤜᤠ᤹ᤀᤥ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹. ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤜᤠ᤹ ᤏᤢ ᤛᤣᤈ᤺ᤱᤘᤠ ᤛᤡᤍᤢᤱᤈᤓᤠᤜᤠ᤹ ᤜᤡᤔᤠ ᤋᤱᤔᤠᤃ ᤜᤠᤱᤅᤡᤸᤗᤧ ᤁᤢᤕᤠ᤺ᤶᤒᤰᤗᤥ॥ ᤀᤡᤛᤪᤠᤀᤡᤗᤒᤠ ᤜᤡᤶᤛᤕᤱᤜᤠ᤹ ᤛᤢᤳᤌᤥ ᤆᤥ᤺ᤰᤔᤠᤛᤡᤖᤧ ᤗᤠᤃᤡ. ᤕᤜᤘᤣ ᤍᤠᤱᤒᤧᤴᤏᤢ ᤋᤱᤈᤢᤶ ᤐᤥᤱᤔᤠᤖᤧ ᤗᤠᤃᤡ ᤛᤢᤳᤌᤥ ᤐᤥᤱᤔᤠ ᤘᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹. ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤜᤠ᤹. ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ ᤏᤢ ᤋᤱᤈᤢᤶ ᤘᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ ᤂᤢᤏᤧ᤹ ᤋᤠᤖᤢᤖᤥ॥ ᤋᤱᤏᤠᤶᤜᤠ᤹ ( ᤗᤠ ᥇᥈:᥇-᥈᥆ ; ᤗᤧᤒᤡ ᥈᥉:᥉᥉-᥊᥉ ) 18 “‘ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤌᤡᤰᤛᤡᤃᤣᤰᤐᤠ ᤗᤠᤀᤥᤒᤠ ᤌᤡᤰᤛᤡᤃᤣᤰᤐᤠ ᤕᤧᤴᤏᤥ ᤂᤡᤏᤡ᤹ ᤗᤳᤇᤠ ᤔᤧᤱᤃᤠ᤺ᤴᤏᤣᤒᤠ ᤁᤢᤶᤒᤠᤒᤠ ᤐᤡᤳᤛᤠᤳ ᤌᤡᤰ ᤕᤠᤱᤅᤠᤛᤡᤶᤔᤧ᤹ ᤜᤧᤰᤁᤩᤠᤱ ᤛᤣᤛᤣᤍᤧᤴᤏᤡᤴ ᤛᤢᤳᤌᤥ ᤆᤥᤃᤧᤶᤔᤧ᤹॥ 19 ᤏᤡᤱᤘᤠ᤹ᤑᤢᤛᤠᤶᤒᤠᤸᤗᤧ ᤁᤴ ᤛᤢᤳᤌᤥ ᤐᤥᤱᤔᤠ ᤘᤠᤕᤠᤃᤧᤴ ᤛᤡᤍᤢᤱᤈᤓᤠ᤺ᤸᤗᤧ ᤁᤢᤓᤠ ᤁᤢᤔᤠᤰᤂᤡᤴ ᤕᤠᤱᤛᤡᤱᤗ ᤜᤧᤰᤁᤩᤠᤱ ᤔᤠᤱᤜᤡᤶᤔᤥᤒᤠ ᤗᤠᤶᤎᤣᤳ ᤐᤢᤱᤜᤠ᤹ᤀᤥ. ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤌᤠ᤺ᤱᤛᤔᤠ ᤁᤢᤃ᤺ᤱᤃᤩᤠ᤺ᤸᤗᤧ ᤗᤡᤛᤡ ᤁᤢᤛᤢᤰᤐᤠᤜᤠ᤹ᤀᤥ ᤏᤢ ᤛᤡᤃᤠᤱᤒᤠ ᤗᤰᤂᤢᤶᤔᤥᤒᤠ ᤕᤶᤒᤠ ᤗᤠᤶᤎᤣ᤺ᤳᤋᤡᤸᤗᤧ ᤁᤢᤒᤢᤱᤜᤠ᤹ᤀᤥ ᤑᤳᤇᤢ᤹॥ 20 ᤁᤢᤓᤠᤖᤧ ᤏᤡᤱᤘᤠ᤹ ᤔᤧᤴᤀᤡ᤺ᤳᤋᤣ ᤀᤡᤃᤪ ᤀᤠᤴᤈᤠᤏᤡ᤺ᤸᤗᤧ ᤗᤠᤕᤥ ᤆᤥᤃᤢᤀᤠᤱ ᤘᤠ᤹ᤏᤧᤓᤃᤪ. ᤗᤠ᤺ᤸᤗᤧ ᤏᤢᤛᤡᤃᤣᤰᤐᤠ ᤕᤧᤴᤏᤥ ᤂᤡᤏᤡ᤹ ᤜᤧᤰᤁᤣᤀᤣ ᤆᤥ᤺ᤰᤔᤠ ᤐᤥᤱ᤹. ᤜᤧᤰᤁᤣᤗ᤹ᤖᤡᤰ ᤔᤠᤱᤜᤡᤶᤔᤡᤴ ᤛᤢᤳᤌᤥ ᤆᤥᤃᤧ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤠᤱᤛᤧᤘᤠ ᤔᤧᤵᤔᤠᤖᤧ ᤗᤠᤃᤡ ᤕᤠᤖᤡᤵ ᤆᤥᤃᤧ᤹॥ 21 “‘ᤌᤡᤰᤛᤡᤃᤣᤰᤐᤠ ᤗᤠᤀᤥᤒᤠ ᤌᤡᤒᤥᤱᤅᤠᤱ ᤗᤡᤛᤡᤃᤣᤰᤐᤠ ᤕᤧᤴᤏᤥ ᤂᤡᤏᤡ᤹ ᤆᤥ᤺ᤰᤕᤢᤶᤓᤥ ᤋᤱᤏᤠᤶᤔᤡᤴ ᤏᤢᤛᤡ ᤕᤧᤴ ᤌᤠᤖᤡᤰ ᤁᤧᤍᤥᤛᤢᤶᤗ ᤐᤥᤱ᤹. ᤂᤧᤴ ᤕᤧᤴᤜᤠ᤹ᤀᤥ ᤁᤧᤓᤱᤒᤠ ᤛᤡᤍᤠ᤹ ᤔᤧᤴᤕᤠᤰᤁᤣᤒᤠ ᤂᤖᤧ᤺ᤱ ᤂᤡᤏᤡ᤹ ᤁᤧᤈᤠᤶᤗ ᤐᤥᤱ᤹॥ 22 ᤂᤧᤸᤗᤧ ᤕᤠ᤺ᤴᤍᤡᤰ ᤜᤠᤱᤅᤡᤸᤗᤧ ᤂᤢᤏᤧ᤹ ᤀᤠᤵᤑᤣᤰ ᤁᤢᤗᤠᤃᤡ ᤏᤢ ᤗᤠᤈᤣ᤹ᤀᤥᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤛᤢᤳᤌᤥ ᤐᤥᤱᤔᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤛᤧᤃᤶᤒᤠ ᤌᤡᤰ ᤛᤡᤍᤢᤱᤈᤓᤠ ᤋᤠᤖᤢᤖ ᤐᤥᤱ᤹॥ 23 ᤋᤱᤏᤠᤶᤔᤥᤒᤠ ᤂᤧᤴ ᤏᤢᤛᤡ ᤕᤧᤴ ᤌᤠᤖᤡᤰ ᤌᤡᤰᤕᤠ᤺ᤴᤎᤰ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤁᤢᤀᤡᤛᤡᤰ ᤏᤢᤛᤡ ᤔᤧᤱᤃᤠ᤺ᤶᤔᤏᤠᤒᤠ ᤛᤧᤃᤶᤒᤠᤜᤠ᤹ ᤏᤢ ᤏᤢᤛᤡ ᤔᤧᤱᤃᤠ᤺ᤶᤔᤏᤠᤒᤠ ᤌᤢ᤺ᤶᤒᤠᤜᤠ᤹ ᤜᤧᤰᤁᤩᤠᤱ ᤛᤢᤳᤌᤥ ᤐᤥᤱᤔᤠ ᤘᤕᤠᤃᤧᤴ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤁᤢᤶᤒᤠᤒᤠ ᤔᤧ᤺ᤴᤍᤠ ᤌᤡᤰ ᤕᤜᤘᤣ ᤍᤠᤱᤒᤠᤀᤥ ᤜᤠᤱᤅᤡᤸᤗᤧ ᤋᤥ᤺ᤴᤍᤢᤛᤡᤖ ᤐᤥᤱ᤹॥ 24 ᤂᤢᤏᤧ᤹ ᤁᤧᤖᤧᤰ ᤛᤧᤃᤶᤒᤠᤜᤠ᤹ ᤌᤰᤔᤠ ᤏᤢ ᤁᤧᤖᤧᤰ ᤌᤢ᤺ᤶᤒᤠᤜᤠ᤹ ᤌᤰᤔᤠ ᤀᤣᤐᤠ ᤌᤡᤰ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠ ᤁᤢᤀᤡᤛᤡᤰ ᤋᤥ᤺ᤶᤔᤠ ᤐᤥᤱ᤹. ᤜᤧᤰᤁᤩᤠᤱ ᤁᤧᤖᤧᤰ ᤀᤣᤐᤠ᤺ᤴᤏᤢ ᤛᤥᤛᤥᤖᤡᤰ ᤜᤡᤴ ᤌᤡᤰ ᤆᤤᤋᤢᤏ ᤏᤡ᤺ᤱᤃᤣ᤹ᤀᤠᤱ ᤋᤥ᤺ᤴᤍᤢᤖ ᤐᤥᤱ᤹॥ 25 “‘ᤏᤢᤛᤡᤃᤣᤰᤐᤠ ᤗᤠ᤺ᤸᤗᤧ ᤌᤡᤒᤥᤱᤅᤠᤱ ᤅᤠᤛᤡᤃᤣᤰᤐᤠ ᤕᤧᤴᤏᤠᤱᤎᤥ ᤏᤢᤛᤡ ᤕᤧᤴᤜᤠ᤹ᤀᤥ ᤌᤡᤰᤕᤠ᤺ᤴᤎᤰ ᤗᤠᤕᤥᤗᤠᤶ ᤛᤢᤳᤌᤥ ᤐᤥᤱᤔᤠ ᤘᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹. ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤠᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹. ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤜᤠ᤹ ᤏᤢ ᤏᤡ᤺ᤱᤃᤣ᤹ᤀᤡᤴ ᤜᤠᤒᤠ ᤜᤧᤰᤁᤣᤗ᤹ᤖᤡᤰᤁᤣ ᤂᤢᤏᤧ᤹ ᤋᤠᤖᤢᤖ ᤐᤥᤱᤗᤥ॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.