ᤀᤡᤈᤁᤡᤀᤣᤗ 44 - LIFOTNTᤔᤠᤱᤜᤡᤶᤔᤥ ᤗᤠ᤺ᤵᤔᤠ ᤌᤡᤶᤜᤠ᤹ 1 ᤂᤧᤒᤩᤠᤱ ᤂᤧᤴ ᤔᤏᤠ᤺ᤸᤗᤧ ᤀᤠᤱᤃᤠ᤹ ᤛᤣᤛᤣᤍᤧᤴ ᤗᤠᤁᤠᤳᤐᤠ ᤏᤠᤱᤃᤧᤴ ᤐᤡᤛᤠᤱ ᤁᤧᤜᤡᤛᤡᤱᤒᤠ ᤕᤶᤒᤠ ᤗᤠᤶᤎᤣ᤺ᤵᤐᤥ ᤏᤢ᤺ᤰᤋᤠᤱ ᤋᤠᤖᤠᤱ. ᤁᤖ ᤁᤴ ᤛᤢᤵᤔᤏᤠᤒᤠ ᤐᤳᤇᤧ॥ 2 ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤔᤧᤳᤋᤠᤱ. “ᤁᤴ ᤕᤶᤒᤠ ᤗᤠᤶᤎᤣ᤺ᤵᤐᤠᤴ ᤛᤢᤵᤔᤏᤠᤒᤠᤀᤣ ᤐᤳᤗ ᤐᤥᤱ᤹॥ ᤀᤠᤳᤋᤡᤸᤗᤧᤀᤠᤱ ᤁᤴ ᤀᤠᤑᤠᤸᤗᤧᤀᤠᤱ ᤔᤧᤜᤴᤍᤢᤴᤗ ᤜᤧᤰᤁᤩᤠᤱ ᤗᤠᤱᤔᤧᤄᤣ᤺ᤰᤏᤧᤴᤗ. ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤠ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤁᤵᤔᤥᤗᤠᤶ ᤗᤠᤛᤧᤀᤠᤱ ᤘᤠ᤹॥ 3 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤕᤢᤱᤔᤠᤀᤠᤱ ᤛᤡᤍᤢᤱᤈᤓᤠ ᤋᤥ᤺ᤶᤔᤏᤠᤒᤠ ᤁᤢᤈᤠ ᤆᤠᤔᤠᤖᤧ ᤗᤠᤃᤡ ᤜᤠᤱᤅᤡᤴ ᤀᤠᤵᤑᤣᤰᤗᤰ ᤕᤶᤒᤠ ᤗᤠ᤺ᤶᤎᤣ᤺ᤳ ᤛᤡᤃᤠᤱ ᤗᤠ᤺ᤵᤔᤠ ᤛᤢᤰ॥ ᤂᤢᤏᤧ᤹ ᤕᤶᤒᤠ ᤗᤠᤶᤎᤣ᤺ᤵᤐᤥᤒᤠ ᤀᤠ᤺ᤶᤓᤥ᤹ᤀᤥᤗᤠᤶ ᤗᤠ᤺ᤵᤔᤠ ᤐᤥᤱ᤹ ᤜᤧᤰᤁᤩᤠᤱ ᤀᤠᤶᤓᤠ ᤂᤧᤴ ᤗᤠᤶᤒᤠᤀᤣ ᤗ᤺ᤶᤔᤠ ᤐᤣ᤺ᤰᤔᤠ ᤐᤥᤱᤗᤥ॥” 4 ᤂᤧᤒᤩᤠᤱ ᤂᤧᤴ ᤔᤏᤠ᤺ᤸᤗᤧ ᤀᤠᤱᤃᤠ᤹ ᤌᤠᤱᤃᤧᤳ ᤐᤡᤛᤠᤱᤒᤠ ᤛᤡᤃᤠᤱᤒᤠ ᤕᤶᤒᤠ ᤗᤠᤶᤎᤣ᤺ᤵᤐᤥᤗᤠᤶ ᤔᤠᤱᤜᤡᤶ ᤋᤃᤠᤱᤒᤠ ᤗᤰᤂᤢᤶᤔᤥ ᤋᤠᤖᤠᤱ॥ ᤀᤠᤱᤃᤠ᤹ ᤀᤥᤔᤕᤠᤱᤅᤡᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤡᤴ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤔᤡᤍᤡᤱᤅᤡᤸᤗᤧ ᤌᤡᤶᤛᤢᤒᤠ ᤏᤡᤛᤢᤱ. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤠᤶᤒᤠᤱᤅᤥ ᤛᤠᤶᤒᤥᤴ ᤜᤒᤳ ᤑᤴᤇᤡᤱᤅᤠ॥ 5 ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤔᤧᤳᤋᤠᤱ. “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤀᤠᤱᤃᤠ᤹ ᤂᤧᤏᤧ᤹ ᤔᤧᤳᤏᤧᤒᤠ ᤁᤧᤖᤧᤰ ᤌᤡᤶᤜᤠ᤹ ᤏᤢ ᤀᤡᤱᤈᤠᤱᤜᤠ᤹ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤀᤥᤔᤧᤳᤋᤧ᤹. ᤏᤡ᤺ᤳᤋᤠᤱᤗᤠᤶ ᤂᤧᤵᤛᤧ᤹ ᤜᤧᤰᤁᤩᤠᤱ ᤏᤢᤖᤡᤰ ᤏᤡᤱᤘᤠ᤹ ᤐᤡᤖᤧ᤹॥ ᤔᤠᤱᤜᤡᤶᤔᤥ ᤀᤠᤳᤋᤡᤴᤜᤠ᤹ᤖᤧ ᤗᤠ᤺ᤵᤔᤠ ᤗ᤺ᤶᤔᤠ ᤔᤧᤄᤥᤛᤢ᤹ ᤜᤧᤰᤁᤩᤠᤱ ᤀᤠᤳᤋᤡᤴᤜᤠ᤹ᤖᤧ ᤔᤧᤱᤄᤥᤛᤢᤴ᤹ ᤂᤧᤴ ᤂᤧᤏᤧ᤹ ᤏᤢᤖᤡᤰ ᤀᤥᤔᤧᤳᤋᤧ᤹॥ 6 ᤂᤧᤏᤧ᤹ ᤀᤡᤛᤪᤠᤀᤡᤗᤒᤠ ᤐᤡᤑᤩᤢᤱᤒᤠᤜᤠ᤹ ᤀᤰᤂᤣ ᤔᤧᤳᤋᤧᤛᤧ᤹. ‘ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤱ᤹—ᤀᤡᤛᤪᤠᤀᤡᤗᤒᤠ ᤔᤏᤠᤛᤣ. ᤂᤡᤏᤡ᤹ ᤕᤠᤶᤃᤧᤛᤡᤱᤒᤠ ᤑᤧᤴᤕᤠ᤺ᤶᤒᤰᤜᤠ᤹ ᤛᤠ᤹ᤖᤡᤰᤁᤣ ᤀᤡ᤺ᤳᤋᤧᤖᤥ᥄ 7 ᤕᤠᤶᤃᤧᤛᤡᤱᤒᤠ ᤂᤡᤏᤡ᤹ ᤑᤧᤴᤕᤠ᤺ᤶᤒᤰᤜᤠ᤹ᤏᤢ᤺ᤸᤗᤧ ᤘᤣ᤹. ᤏᤡᤱᤘᤠ᤹ᤀᤥ ᤏᤢ ᤌᤰᤗᤠᤀᤥ ᤜᤷᤍᤥ ᤔᤧᤴᤜᤧᤰᤔᤏᤠᤒᤠ ᤘᤣ᤹ ᤗᤠᤈᤣ᤹ᤒᤠ ᤔᤏᤠᤜᤠ᤹ ᤀᤠᤱᤃᤠ᤹ ᤀᤠᤛᤣᤛᤣᤍᤧᤴᤏᤥ ᤂᤡᤏᤡ᤹ ᤁᤧᤍᤠᤖᤢᤶᤛᤡᤶᤔᤠᤱ ᤀᤠᤱᤃᤠ᤹ᤀᤥ ᤁᤢᤈᤠ. ᤛᤠᤛᤥ᤺ᤳ ᤏᤢ ᤔᤠᤰᤂᤡ᤹ ᤁᤧᤍᤥ᤺ᤴᤍᤢᤶᤔᤡᤸᤗᤧ ᤀᤠᤛᤢᤳᤌᤥ ᤁᤧᤈᤥᤃᤢᤶ. ᤜᤧᤰᤁᤩᤠᤱ ᤀᤠᤱᤃᤠ᤹ ᤆᤥᤃᤢᤱᤒᤠ ᤔᤠᤱᤜᤢᤵᤐᤡᤴ ᤂᤡᤏᤡ᤹ ᤁᤧᤓᤣ᤺ᤴᤍᤢᤶ॥ 8 ᤀᤠᤱᤃᤠ᤹ ᤀᤠᤛᤣᤛᤣ ᤌᤡᤶᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤆᤥ᤺ᤰᤔᤠ ᤁᤧᤒᤥᤱᤒᤠ ᤕᤠ᤺ᤶᤒᤰᤜᤠ᤹ ᤂᤡᤏᤡ᤹ ᤆᤥ᤺ᤰᤔᤠᤖᤧ ᤁᤢᤗᤧᤰᤘᤠ. ᤀᤠᤱᤃᤠ᤹ ᤀᤠᤛᤣᤛᤣᤍᤧᤴᤏᤡᤴ ᤀᤥᤔᤧᤵᤔᤠᤖᤧ ᤗᤠᤃᤡ ᤂᤡᤏᤡ᤹ ᤘᤣ᤹ᤜᤠ᤹ ᤜᤢᤰᤁᤧᤛᤢᤵᤋᤢᤶᤛᤡᤶ॥ 9 “‘ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤱ᤹—ᤏᤡᤱᤘᤠ᤹ᤀᤥ ᤏᤢ ᤌᤰᤗᤠᤀᤥ ᤜᤷᤍᤥ ᤔᤧᤴᤜᤧᤰᤔᤏᤠᤒᤠ ᤘᤣ᤹ ᤗᤠᤈᤣ᤹ᤒᤠᤜᤠ᤹. ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤁᤧᤕᤢᤱᤒᤠ ᤘᤣ᤹ ᤗᤠᤈᤣ᤹ᤒᤠ ᤀᤠᤳᤋᤡᤴᤜᤠ᤹ᤀᤠᤱ ᤀᤠᤱᤃᤠ᤹ ᤀᤠᤛᤣᤛᤣᤍᤧᤴᤏᤥ ᤗᤠ᤺ᤵᤔᤠ ᤔᤧᤱᤄᤥᤏᤧᤴᤗᤥ॥’” ᤗᤧᤒᤡᤜᤠ᤹ᤖᤧ ᤏᤡᤱᤘᤠ᤹ᤑᤢᤛᤠᤶᤒᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤏᤢ᤹ᤏᤧᤴ 10 “‘ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤋᤠᤵᤔᤧᤒᤧ᤹ᤖᤧᤀᤠᤱ ᤔᤧᤒᤣᤒᤠ ᤕᤧᤶᤔᤠᤱᤎᤥ ᤀᤠᤱᤃᤠ᤹ᤗᤠᤶ ᤔᤠ᤺ᤱᤄᤠ ᤁᤧᤒᤥᤱᤒᤠ ᤏᤢ ᤀᤠᤱᤃᤠ᤹ ᤕᤠᤵᤔᤡ ᤁᤧᤏᤠ᤹ᤒᤠᤀᤠᤱ ᤂᤢᤴᤇᤡ᤹ ᤏᤠᤘᤠᤀᤡᤳᤗᤠᤜᤠ᤹ᤀᤥ ᤁᤧᤔᤠᤒᤠᤀᤠᤱ ᤁᤧᤘᤠ᤹ᤒᤠ ᤗᤧᤒᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤸᤗᤧ ᤂᤢᤶᤍᤡᤱᤅᤡᤴ ᤔᤧᤍᤢᤔᤢᤖ ᤐᤥᤱ᤹॥ 11 ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤛᤣᤛᤣᤍᤧᤴᤏᤥ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤄᤥᤛᤢ᤹. ᤔᤠᤱᤜᤡᤶᤔᤥᤒᤠ ᤕᤶᤒᤠ ᤗᤠᤶᤎᤣ᤺ᤳᤜᤠ᤹ ᤁᤥᤔᤠ ᤏᤢ ᤔᤠᤱᤛᤧᤘᤠ ᤕᤠ᤺ᤶᤒᤰ ᤆᤥ᤺ᤰᤔᤠᤀᤠᤱ ᤔᤧᤄᤥᤛᤢ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤏᤠᤜᤠ᤹ᤖᤧ ᤗᤠᤃᤡ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤜᤠ᤹ ᤏᤢ ᤛᤡᤍᤢᤱᤈᤓᤠᤜᤠ᤹ ᤛᤧᤵᤔᤠ ᤔᤧᤛᤢᤰᤋᤢᤛᤡ᤹ ᤂᤧᤒᤩᤠᤱ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤕᤧᤵᤔᤠ ᤏᤢ ᤂᤧᤱᤜᤠ᤹ ᤔᤠᤱᤛᤧᤘᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤐᤡᤔᤠ ᤔᤧᤛᤢᤰᤋᤢᤛᤡ᤹॥ 12 ᤁᤖ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤏᤠᤘᤠᤀᤡᤳᤗᤠᤜᤠ᤹ ᤋᤃᤡ ᤔᤏᤠᤜᤠ᤹ ᤕᤠ᤺ᤶᤒᤰ ᤔᤧᤈᤥᤃᤢ ᤔᤧᤒᤡᤖᤢᤛᤡᤒᤠ ᤏᤢ ᤀᤡᤛᤪᤠᤀᤡᤗᤒᤠ ᤜᤡᤶᤛᤕᤱᤜᤠ᤹ ᤗᤠᤕᤥᤀᤥ ᤔᤧᤎᤠᤛᤢᤛᤡᤒᤠᤸᤗᤧ ᤆᤥᤃᤢᤸᤗᤧ. ᤂᤧᤱᤜᤠ᤹ᤖᤧ ᤂᤢᤶᤍᤡᤱ ᤂᤥᤔᤠᤀᤣ ᤐᤥᤱ᤹ ᤑᤠ᤹ᤀᤠᤱ ᤀᤠᤱᤃᤠ᤹ ᤀᤠᤜᤢᤰᤁᤡᤸᤗᤧ ᤛᤠ᤺ᤵᤛᤢᤱᤛᤡᤱᤅᤠᤱ ᤔᤠᤱᤜᤧᤰ ᤆᤥᤃᤢᤱᤅᤠᤱ ᤘᤠ᤹. ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱ᤹॥ 13 ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤁᤢᤀᤡᤛᤡᤰ ᤂᤧᤱᤜᤠ᤹ ᤀᤠᤱᤃᤠ᤹ ᤀᤠᤒᤣᤛᤠᤱ ᤋᤠᤔᤠ ᤔᤧᤱᤄᤥᤏᤧᤴ ᤀᤡᤃᤪ ᤀᤠᤱᤃᤠ᤹ ᤀᤠᤳᤋᤡᤴ ᤀᤠᤛᤣᤛᤣ ᤐᤠ᤺ᤴᤜᤠ᤹ᤖᤧ ᤁᤢᤒᤣᤛᤠᤱ ᤀᤡᤃᤪ ᤁᤧᤖᤧᤰᤏᤢ᤺ᤸᤗᤧ ᤛᤠ᤹ᤖᤡᤰ ᤀᤠᤛᤣᤛᤣ ᤛᤡᤍᤢᤱᤈᤓᤠᤜᤠ᤹ᤖᤧ ᤁᤢᤒᤣᤛᤠᤱ ᤂᤧᤱᤜᤠ᤹ ᤋᤠᤔᤠ ᤔᤧᤱᤄᤥᤏᤧᤴ. ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤕᤠᤶᤃᤧᤛᤡᤱᤒᤠ ᤗᤠᤕᤥᤜᤠ᤹ᤖᤧ ᤗᤠᤃᤡ ᤂᤧᤱᤜᤠ᤹ ᤛᤡᤖᤡᤱᤔᤔᤥ ᤌᤠᤔᤠᤀᤣ ᤐᤥᤱ᤹॥ 14 ᤜᤧᤰᤁᤣᤛᤠᤱ ᤔᤠᤱᤜᤡᤶᤔᤥᤒᤠ ᤗᤰᤐᤧᤴᤜᤠ᤹ ᤏᤢ ᤂᤧᤵᤔᤥ ᤆᤥ᤺ᤰᤔᤠ ᤁᤧᤒᤥᤱᤒᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ ᤀᤠᤱᤃᤠ᤹ ᤂᤧᤱᤜᤠ᤹ᤀᤣ ᤐᤡᤖᤢᤱᤛᤡᤱᤗᤥ॥’” ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ 15 “‘ᤁᤖ ᤀᤡᤛᤪᤠᤀᤡᤗᤡᤜᤠ᤹ ᤋᤠᤵᤔᤧᤒᤧ᤹ᤖᤧᤀᤠᤱ ᤀᤠᤱᤃᤠ᤹ᤗᤠᤶ ᤔᤠ᤺ᤱᤄᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤕᤧᤛᤠᤱ ᤗᤧᤒᤡ ᤌᤠ᤺ᤰᤁᤥᤒᤠ ᤛᤠᤍᤥᤁᤖᤧ ᤁᤢᤜᤡᤶᤛᤕᤱᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧᤃ ᤀᤠᤱᤃᤠ᤹ ᤀᤠᤛᤣᤛᤣᤍᤧᤴᤏᤥᤒᤠ ᤕᤠ᤺ᤶᤒᤰᤜᤠ᤹ ᤁᤢᤍᤥ᤺ᤵᤔᤠᤀᤠᤱ ᤔᤧᤈᤥᤃᤢᤖ ᤔᤧᤘᤕᤧ. ᤂᤧᤱᤜᤠ᤹ ᤔᤠᤱᤛᤧᤘᤠ ᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤀᤠᤒᤣᤛᤠᤱ ᤔᤧᤍᤠᤖ ᤐᤥᤱ᤹. ᤀᤠᤱᤃᤠ᤹ ᤀᤠᤍᤃᤡ ᤛᤠᤛᤥ᤺ᤳ ᤏᤢ ᤛᤠᤔᤠᤰᤂᤡ᤹ ᤛᤡᤍᤢᤱᤈᤓᤠ ᤋᤥ᤺ᤴᤇᤧ ᤂᤧᤱᤜᤠ᤹ ᤀᤠᤱᤃᤠ᤹ ᤀᤠᤍᤃᤡ ᤔᤧᤕᤧᤵᤗ ᤐᤥᤱ᤹. ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱ᤹॥ 16 ᤀᤠᤱᤃᤠ᤹ ᤀᤠᤜᤡᤶᤔᤥᤒᤠ ᤛᤣᤛᤣᤍᤧᤴᤏᤥ ᤂᤧᤱᤜᤠ᤹ᤖᤰ ᤔᤧᤗᤠᤳ. ᤀᤠᤱᤃᤠ᤹ ᤀᤠᤗᤠᤃᤡ ᤔᤠᤱᤛᤧᤘᤠ ᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤏᤢ ᤀᤠᤱᤃᤠ᤹ ᤀᤠᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤂᤧᤱᤜᤠ᤹ᤖᤰ ᤀᤠᤱᤃᤠ᤹ ᤀᤠᤈᤵᤋᤧᤴᤏᤡᤸᤗᤧ ᤁᤢᤒᤣᤛᤠᤱ ᤔᤧᤍᤠᤖᤥ॥ 17 “‘ᤂᤧᤱᤜᤠ᤹ ᤛᤡᤃᤠᤱ ᤗᤰᤂᤢᤶᤔᤥᤒᤠ ᤕᤶᤒᤠ ᤗᤠᤶᤎᤣ᤺ᤵᤐᤠᤜᤠ᤹ᤗᤠᤶ ᤔᤧᤗᤠ᤺ᤳᤋᤡᤸᤗᤧ ᤂᤧᤱᤜᤠ᤹ᤖᤧ ᤏᤤᤏᤠᤛᤢᤳ ᤆᤡᤖᤡᤰᤁᤡᤸᤗᤧᤴ ᤆᤠᤱᤜᤠ᤹ ᤔᤧᤈᤠᤰᤂᤢᤖ ᤐᤥᤱ᤹. ᤛᤡᤃᤠᤱ ᤗᤰᤂᤢᤶᤔᤥᤒᤠ ᤕᤶᤒᤠ ᤗᤠᤶᤎᤣ᤺ᤳᤜᤠ᤹ᤀᤥ ᤀᤡᤃᤪ ᤔᤠᤱᤜᤡᤶ ᤛᤡᤃᤠᤱ ᤂᤧᤱᤜᤠ᤹ ᤔᤠᤱᤛᤧᤘᤠ ᤕᤠ᤺ᤶᤒᤰ ᤔᤧᤈᤥ᤺ᤰᤁᤡᤸᤗᤧ ᤂᤧᤱᤜᤠ᤹ᤖᤧ ᤛᤧᤔᤢᤖᤡᤰᤗᤠᤶ ᤌᤠᤰᤔᤏᤠᤒᤠ ᤌᤧᤔᤠ ᤆᤠᤱᤅᤠᤱ ᤔᤧᤴᤈᤠᤰᤂᤢᤴᤗ॥ 18 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤧᤃᤣ᤺ᤰᤜᤠ᤹ᤀᤥ ᤏᤤᤏᤠᤛᤢᤳ ᤐᤠᤃᤠᤖᤡ ᤔᤧᤄᤢ᤺ᤰᤂᤢᤖ ᤐᤥᤱ᤹ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤱᤅᤥ ᤏᤤᤏᤠᤛᤢᤳ ᤆᤡᤖᤡᤰᤁᤡᤸᤗᤧᤴ ᤆᤠᤱ ᤛᤡᤃᤠᤱ ᤁᤢᤓᤠᤰ ᤌᤡᤰ ᤔᤧᤈᤠᤰᤂᤢᤖ ᤐᤥᤱ᤹॥ ᤂᤧᤱᤜᤠ᤹ᤖᤧ ᤜᤥ᤺ᤶᤒᤪᤡᤰᤘᤠ ᤁᤧᤗ᤺ᤶᤒᤠ ᤀᤠᤳᤋᤡᤴ ᤐᤖᤡᤰᤗᤧᤴᤏᤠᤱ ᤆᤠᤱ ᤆᤠᤱᤔᤠ ᤔᤧᤏᤢ᤹ᤏᤧᤴ॥ 19 ᤔᤏᤠᤜᤠ᤹ ᤔᤧᤘᤠ᤹ᤒᤠ ᤗᤠ᤺ᤰᤁᤠᤳ ᤗᤰᤂᤢᤶᤔᤥ ᤂᤧᤱᤜᤠ᤹ ᤐᤣ᤺ᤰᤔᤠᤏᤢ᤺ᤸᤗᤧ ᤋᤃᤡ. ᤂᤧᤱᤜᤠ᤹ᤖᤧ ᤔᤠᤱᤛᤧᤘᤠ ᤔᤧᤈᤥ᤺ᤰᤁᤡᤸᤗᤧ ᤔᤧᤈᤠᤰᤂᤢᤀᤠᤱ ᤔᤧᤘᤠ᤹ᤒᤠ ᤆᤠᤱᤜᤠ᤹ ᤔᤧᤓᤧᤴᤍᤢᤀᤠᤱ ᤛᤣᤛᤣᤒᤠ ᤕᤠᤰᤑᤠᤱᤜᤠ᤹ᤀᤥ ᤔᤧᤏᤧᤛ᤻ᤛᤢ ᤔᤧᤎᤖ ᤐᤥᤱ᤹. ᤂᤧᤴ ᤆᤠᤱᤜᤠ᤹ ᤛᤣᤛᤣ ᤆᤥ᤺ᤰᤐᤠᤸᤗᤧ ᤆᤥᤃᤢᤸᤗᤧ ᤔᤏᤠᤜᤠ᤹ ᤜᤠᤴᤋᤡ ᤔᤧᤴᤈᤥᤃᤢᤛᤡᤴᤗ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤘᤣ᤹ ᤆᤠᤱ ᤔᤧᤈᤠᤰᤂᤢᤖ ᤐᤥᤱ᤹॥ 20 “‘ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤧᤃᤣ᤺ᤰᤔᤢᤖᤡᤰᤜᤠ᤹ ᤏ᤺ᤱᤔᤠ ᤔᤧᤏᤢ᤹ᤏᤧᤴ ᤀᤡᤃᤪ ᤁᤣ᤺ᤶᤒᤠ ᤐᤥᤖ ᤕᤠ᤺ᤶᤔᤠ ᤔᤧᤏᤢ᤹ᤏᤧᤴ. ᤁᤖ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤧᤃᤣ᤺ᤰᤔᤢᤖᤡᤰᤜᤠ᤹ ᤋᤠᤱᤒᤠ ᤔᤧᤄᤰᤋᤢᤖ ᤐᤥᤱ᤹॥ 21 ᤂᤧᤱᤜᤠ᤹ ᤛᤡᤃᤠᤱᤒᤠ ᤗᤰᤂᤢᤶᤔᤥ ᤔᤧᤗᤠ᤺ᤳᤋᤡᤸᤗᤧ ᤀᤠᤳᤋᤡᤴ ᤏᤡᤱᤘᤠ᤹ᤛᤠᤶᤒᤧᤸᤗᤧᤀᤠᤱ ᤆᤧᤸᤗᤧᤰᤛᤣ᤹ ᤌᤡ ᤌᤢᤱᤔᤠ ᤔᤧᤏᤢ᤹ᤏᤧᤴ॥ 22 ᤂᤧᤱᤜᤠ᤹ᤖᤧ ᤁᤢᤕᤧᤶᤒᤠ ᤁᤧᤛᤡᤔᤠ ᤀᤡᤃᤪ ᤁᤢᤕᤧᤶᤒᤠ᤺ᤸᤗᤧ ᤏᤠ᤹ᤖᤢᤔᤠ ᤔᤧᤴᤇᤢᤔᤠᤴ ᤋᤧᤴᤎᤠᤶ ᤔᤣ᤺ᤰᤂᤡᤶ ᤗᤡ᤺ᤱᤔᤠ ᤔᤧᤏᤢ᤹ᤏᤧᤴ. ᤂᤧᤱᤜᤠ᤹ᤖᤧ ᤀᤡᤛᤪᤠᤀᤡᤗ ᤌᤠ᤺ᤰᤁᤥᤒᤠ ᤛᤡᤛᤠᤃᤧᤴ ᤔᤧᤴᤇ᤻ᤕᤠᤜᤠ᤹ ᤀᤡᤃᤪ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤔᤣᤔᤣᤍᤢᤔᤠᤜᤠ᤹ᤖᤰ ᤔᤣ᤺ᤰᤂᤡᤶ ᤔᤧᤵᤔᤠ ᤔᤧᤛᤢᤰᤋᤢᤛᤡ᤹॥ 23 ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤛᤣᤛᤣᤒᤠ. ᤔᤧᤴᤈᤥᤒᤠ ᤏᤢ ᤌᤡᤶ ᤁᤢᤀᤡᤛᤡᤰ ᤛᤢᤳᤌᤥ ᤀᤡᤃᤪ ᤀᤠᤛᤢᤳᤌᤥ ᤐᤠ᤺ᤴᤜᤠ᤹ ᤛᤧᤶᤔᤠ ᤔᤧᤜᤢ᤹ᤖᤢᤛᤡ᤹॥ 24 “‘ᤁᤢᤓᤠ ᤂᤧᤔᤠ᤹ ᤐᤥ᤺ᤰᤏᤧᤓᤃᤪ. ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧᤀᤣ ᤂᤠᤛᤧᤴᤗᤥ᤺ᤶᤒᤠ ᤁᤢᤀᤡᤛᤡᤰ ᤕᤠ᤺ᤶᤒᤰ ᤔᤧᤈᤥᤃᤢᤖ ᤐᤥᤱ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤎᤡᤶᤜᤠ᤹ ᤁᤢᤀᤡᤛᤡᤰ ᤋᤢ᤺ᤴᤍᤣ᤹ᤜᤠ᤹ ᤏᤡ᤺ᤴᤎᤥ ᤔᤧᤈᤥᤃᤢᤖ ᤐᤥᤱ᤹॥ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤛᤠᤶᤕᤥ ᤌᤡᤶᤜᤠ᤹ ᤏᤢ ᤀᤠᤱᤃᤠ᤹ ᤀᤠᤀᤡᤱᤈᤠᤱᤜᤠ᤹ ᤀᤠᤱᤃᤠ᤹ ᤏᤡ᤺ᤴᤎᤥ ᤆᤥᤃᤢᤱᤒᤠ ᤁᤧᤖᤧᤰ ᤋᤱᤏᤠᤶᤜᤠ᤹ᤖᤧ ᤗᤠᤃᤡ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢᤖ ᤐᤥᤱ᤹ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤛᤠᤒᤠᤌᤜᤠ᤹ ᤛᤣᤛᤣ ᤔᤧᤏᤧᤳᤋᤢᤖ ᤐᤥᤱ᤹॥ 25 “‘ᤏᤡᤱᤘᤠ᤹ᤑᤢᤛᤠᤶᤒᤧᤴ ᤁᤧᤛᤡᤒᤠ ᤔᤏᤠ᤺ᤸᤗᤧ ᤁᤢᤒᤣᤛᤠᤱ ᤐᤣ᤺ᤰᤔᤠᤀᤠᤱ ᤀᤠᤵᤑᤣᤰ ᤀᤠᤛᤢᤳᤌᤥ ᤆᤥ᤺ᤰᤛᤡᤱᤔᤠ ᤔᤧᤏᤢ᤹ᤏᤧᤴ. ᤁᤖᤛᤠᤱ ᤁᤧᤛᤡᤒᤠ ᤔᤏᤠᤴ ᤀᤠᤵᤑᤣᤰ ᤁᤢᤶᤒᤠ. ᤀᤡᤃᤪ ᤁᤢᤶᤔᤠ. ᤁᤢᤛ᤻ᤛᤠ ᤕᤧᤶᤒᤡᤳᤇᤠ ᤀᤡᤃᤪ ᤁᤢᤛ᤻ᤛᤠ ᤔᤧᤴᤇᤢᤔᤠ. ᤁᤢᤴᤛᤠ᤹ ᤁᤢᤶᤓᤢ᤹ ᤀᤡᤃᤪ ᤔᤣ᤺ᤰᤂᤡᤶ ᤔᤧᤶᤒᤥᤱᤅᤣᤔᤠ ᤁᤢᤴᤏᤧ᤹ ᤁᤢᤴᤛᤠ᤹ᤏᤧᤓᤃᤪ. ᤂᤢᤏᤧ᤹ ᤀᤠᤵᤑᤣᤰ ᤀᤠᤛᤢᤳᤌᤥ ᤆᤥ᤺ᤰᤛᤡᤱᤔᤠ ᤛᤢᤰ॥ 26 ᤂᤢᤏᤧ᤹ ᤛᤢᤳᤌᤥ ᤆᤥ᤺ᤰᤛᤡᤱᤅᤠᤱ ᤀᤣᤃᤠᤱ ᤏᤢᤛᤡ ᤕᤧᤴ ᤌᤠᤖᤡᤰ ᤜᤠᤱᤄᤢᤖ ᤐᤥᤱ᤹॥ 27 ᤛᤣᤛᤣᤍᤧᤴᤏᤥ ᤔᤠᤱᤛᤧᤘᤠ ᤕᤠ᤺ᤶᤒᤰ ᤆᤥ᤺ᤰᤛᤧ ᤛᤣᤛᤣᤍᤧᤴᤏᤥᤒᤠ ᤛᤡᤃᤠᤱ ᤗᤰᤂᤢᤶᤔᤥ ᤗᤠ᤺ᤳᤋᤡᤸᤗᤧ ᤕᤠ᤺ᤴᤍᤡᤰ. ᤂᤢᤏᤧ᤹ ᤀᤠᤵᤑᤣᤰ ᤁᤢᤗᤠᤃᤡ ᤗᤳᤇᤠ ᤛᤢᤳᤌᤥ ᤐᤥᤱᤔᤠ ᤘᤠᤕᤠᤃᤧᤴ ᤛᤡᤍᤢᤱᤈᤓᤠ ᤋᤥ᤺ᤴᤍᤢᤖ ᤐᤥᤱ᤹. ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱ᤹॥ 28 “‘ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤰᤂᤥᤔᤠᤃ ᤀᤠᤱᤃᤠ᤹ᤖᤰ ᤐᤥᤱᤔᤠ ᤁᤧᤒᤥᤱᤒᤠ ᤐᤥᤱ᤹॥ ᤀᤡᤛᤪᤠᤀᤡᤗᤀᤥ ᤂᤡᤏᤡ᤹ ᤂᤧᤱᤜᤠ᤹ ᤌᤧᤔᤠᤀᤠᤱ ᤕᤠᤱᤛᤠᤁᤢᤴᤎᤣ ᤔᤧᤒᤡᤖᤧᤶᤛᤡᤶᤔᤡᤴᤏᤧ᤹. ᤀᤠᤱᤃᤠ᤹ᤀᤣ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤠᤱᤛᤠᤁᤢᤴᤎᤣᤀᤠᤖᤥ॥ 29 ᤂᤧᤱᤜᤠ᤹ᤖᤧ ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤜᤠ᤹. ᤛᤢᤳᤌᤥ ᤐᤥᤱᤔᤠ ᤘᤠᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ ᤏᤢ ᤀᤠᤵᤋᤡᤰᤗᤠᤶ ᤗᤧᤵᤔᤡ ᤂᤥᤔᤠ ᤘᤠᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ ᤔᤧᤈᤖᤥ. ᤀᤡᤛᤪᤠᤀᤡᤗᤀᤥ ᤔᤏᤠᤜᤠ᤹ᤖᤧ ᤀᤠᤱᤃᤠ᤹ᤀᤥ ᤔᤧᤛᤧᤴᤍᤢᤀᤠᤱ ᤔᤧᤍᤥᤴᤍᤢᤒᤠ ᤁᤧᤖᤧᤰ ᤜᤢᤰᤘᤠᤜᤠ᤹ ᤂᤧᤱᤜᤠ᤹ᤖᤧᤴ ᤐᤥᤱ᤹॥ 30 ᤋᤃᤡ ᤁᤧᤍᤢᤶᤒᤠ ᤁᤧᤖᤧᤰ ᤏᤢᤒᤠ ᤛᤡᤱᤛᤣ᤹ᤜᤠ᤹ ᤏᤢ ᤂᤡᤏᤡ᤹ ᤁᤧᤍᤥ᤺ᤴᤍᤢᤶᤒᤠ ᤁᤧᤖᤧᤰᤏᤢ᤺ᤸᤗᤧ ᤏᤢᤒᤠ ᤜᤢᤰᤘᤠᤜᤠ᤹ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧᤴ ᤐᤥᤱ᤹॥ ᤂᤡᤏᤡ᤹ ᤁᤧᤕᤢ᤺ᤳᤋᤢᤶᤒᤠ ᤑᤣ᤹ᤍᤢᤶᤗᤠᤶᤒᤠᤒᤠ ᤁᤧᤖᤧᤰᤏᤢ᤺ᤸᤗᤧ ᤋᤃᤡᤒᤠ ᤁᤢᤈᤠᤴ ᤂᤡᤏᤡ᤹ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤁᤧᤒᤡᤖᤢᤶᤛᤡᤶᤗ ᤐᤥᤱ᤹ ᤜᤧᤰᤁᤣᤗ᤹ᤖᤡᤰ ᤂᤡᤏᤡ᤹ ᤜᤡᤶᤛᤕᤱᤜᤠ᤹ᤀᤥ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤌᤠᤖᤥ॥ 31 ᤀᤠᤵᤑᤣᤰ ᤁᤧᤛᤡᤒᤠ ᤀᤡᤃᤪ ᤋᤠᤶᤓᤢᤱ ᤌᤰᤛᤠᤜᤠ᤹ᤖᤧ ᤔᤧᤓᤢᤕᤢ ᤔᤧᤛᤩᤧᤖᤢᤛᤡᤒᤠ ᤁᤢᤛᤡᤘᤧᤳ ᤂᤥᤃᤧᤍᤧᤵᤐᤠ ᤀᤠᤳᤋᤡᤴ ᤐᤢᤛᤠ ᤀᤡᤃᤪ ᤌᤰᤛᤠ ᤛᤠ᤺ᤴᤏᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤆᤠᤔᤠ ᤔᤧᤏᤢ᤹ᤏᤧᤴᤗᤥ॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.