ᤀᤡᤈᤁᤡᤀᤣᤗ 43 - LIFOTNTᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱᤅᤡᤴ ᤔᤠᤱᤜᤡᤶᤔᤥ ᤏᤢ᤺ᤱ 1 ᤁᤴ ᤀᤣᤃᤠᤱ. ᤂᤧᤴ ᤔᤏᤠ᤺ᤸᤗᤧ ᤀᤠᤱᤃᤠ᤹ ᤏᤠᤱᤃᤧᤴ ᤐᤡᤛᤠᤱ ᤁᤧᤜᤡᤛᤡᤱᤒᤠ ᤕᤶᤒᤠ ᤗᤠᤶᤎᤣ᤺ᤳᤋᤥ ᤏᤢ᤺ᤰᤋᤠᤱ ᤋᤠᤖᤠᤱ॥ 2 ᤜᤧᤰᤁᤩᤠᤱ ᤆᤄᤵ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱᤅᤡᤴ ᤏᤠᤱᤃᤧᤴ ᤐᤡᤛᤠᤱᤗᤠᤶ ᤑᤧᤖᤧᤖ ᤐᤳᤇᤧᤒᤠ ᤏᤡᤛᤢᤱ॥ ᤂᤢᤏᤧ᤹ ᤁᤢᤛ᤺ᤰᤔᤧᤴ ᤆᤫᤠ᤺ᤳᤜᤠ᤹ ᤛ᤺ᤰᤋᤧᤒᤠ ᤁᤢᤀᤡᤛᤡᤰ ᤗ᤹ᤖᤧ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤔᤡᤔᤡᤍᤡᤱᤅᤡᤸᤗᤧ ᤂᤠᤶᤒᤠᤱᤅᤡᤴ ᤛᤧᤸᤗᤧᤱ ᤛᤧᤸᤗᤧᤱ ᤀᤥ᤺ᤳᤋᤧᤖ ᤌᤥ᤹ᤖᤢᤀᤠᤱ ᤏᤧᤛ᤻ᤛᤧ॥ 3 ᤀᤠᤱᤃᤠ᤹ ᤔᤡᤰ ᤏᤡᤛᤢᤱᤒᤠ ᤛᤢᤑᤥᤴ ᤂᤢᤏᤧ᤹ ᤕᤧᤰᤕᤰᤁᤡᤴ ᤂᤠᤵᤐᤢᤌᤩ᤺ᤱ ᤆᤥ᤺ᤰᤛᤧ ᤕᤧ᤺ᤸᤗᤧ ᤀᤠᤱᤃᤠ᤹ ᤔᤡᤰ ᤏᤡᤛᤢᤱᤅᤠᤱ ᤘᤕᤠᤱᤒᤠ ᤛᤢᤵᤑᤥᤴ ᤜᤧᤰᤋᤱᤒᤠ ᤏᤢ ᤀᤠᤱᤃᤠ᤹ ᤁᤒᤠᤖ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥ ᤏᤡᤛᤢᤱᤅᤠᤱ ᤘᤕᤠᤱᤒᤠ ᤛᤢᤑᤥᤜᤠ᤹ ᤜᤧᤰᤋᤱᤒᤠᤀᤣ ᤆᤥᤃᤧ॥ ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤠᤶᤒᤠᤱᤅᤥ ᤛᤠᤶᤒᤥᤴ ᤜᤒᤳ ᤑᤴᤇᤡᤱᤅᤠᤱ॥ 4 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤔᤡᤍᤡᤱᤅᤡᤴ ᤏᤠᤱᤃᤧᤴ ᤐᤡᤛᤠᤱ ᤁᤧᤜᤡᤛᤡᤱᤒᤠ ᤕᤶᤒᤠ ᤗᤠᤶᤎᤣ᤺ᤵᤐᤥᤗᤠᤶ ᤔᤠᤱᤜᤡᤶᤔᤥ ᤗᤠᤛᤧ॥ 5 ᤂᤧᤒᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠᤶᤛᤠᤶᤔᤡᤸᤗᤧ ᤀᤠᤱᤃᤠ᤹ ᤌᤠ᤺ᤱ ᤑᤥ᤺ᤰᤂᤠᤱ ᤜᤧᤰᤁᤩᤠᤱ ᤛᤡᤃᤠᤱ ᤗᤧᤵᤔᤠᤱᤒᤠ ᤗᤰᤂᤢᤶᤔᤥ ᤋᤠᤖᤠᤱ. ᤂᤶᤓᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤔᤡᤍᤡᤱᤅᤡᤸᤗᤧ ᤔᤠᤱᤜᤡᤶᤔᤡᤴ ᤛᤎᤧᤰ ᤋᤡᤶᤛᤧ॥ 6 ᤜᤧᤰᤁᤩᤠᤱ ᤂᤧᤴ ᤔᤏᤠᤴ ᤀᤠᤱᤃᤠ᤹ ᤀᤠᤒᤣᤛᤠᤱ ᤕᤧᤒᤧᤈᤩᤧ᤺ᤸᤗᤧ. ᤔᤠᤱᤜᤡᤶᤔᤥᤗᤠᤶ ᤁᤢᤓᤠ ᤗᤳᤇᤠ ᤔᤏᤠᤖᤧ ᤐᤠ᤺ᤴᤇᤠ᤺ᤳᤋᤠᤱᤒᤠ ᤂᤧᤵᤛᤢᤱ॥ 7 ᤂᤢᤏᤧ᤹ ᤀᤠᤱᤃᤠ᤹ ᤔᤧᤳᤋᤠᤱ. “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤁᤱᤃ ᤀᤠᤱᤃᤠ᤹ ᤀᤠᤜᤠᤱᤕᤢᤰᤏᤠᤍᤧᤴ ᤏᤢ ᤀᤠᤱᤃᤠ᤹ ᤀᤠᤗᤠᤱ ᤋᤥ᤹ᤓᤣ᤺ᤳ ᤋᤧᤴᤗᤥ॥ ᤀᤠᤱᤃᤠ᤹ ᤁᤵᤔᤥ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤛᤍᤠᤍᤡᤱ ᤀᤠᤓᤧᤸᤗᤧᤛᤠᤱ ᤘᤠ᤹ᤀᤠ॥ ᤀᤡᤛᤪᤠᤀᤡᤗᤒᤠ ᤜᤡᤶᤛᤕᤱᤜᤠ᤹ ᤏᤢ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤠᤱᤜᤠ᤹ᤖᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤠᤶᤒᤥ᤺ᤵᤔᤠᤗᤠᤶ ᤀᤡᤃᤪ ᤔᤠᤱᤜᤡᤶ ᤐᤣᤛᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤆᤣᤜᤠ᤹ ᤔᤧᤴᤗᤢᤵᤋᤢᤛᤡᤴ᤹ ᤜᤧᤰᤁᤩᤠᤱ ᤕᤠᤶᤔᤥ ᤀᤠᤓᤧᤸᤗᤧᤀᤠᤱ ᤀᤠᤱᤃᤠ᤹ ᤀᤠᤛᤣᤛᤣ ᤔᤡᤱᤅᤡᤴ ᤀᤠᤛᤢᤳᤌᤥ ᤔᤧᤴᤈᤥᤃᤢᤴ᤹॥ 8 ᤂᤧᤴ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤎᤣ᤺ᤳᤐᤢᤱᤅᤡᤴ ᤀᤠᤱᤃᤠ᤹ ᤀᤠᤗᤠᤶᤎᤣᤳ ᤐᤢᤱᤅᤡᤸᤗᤧ ᤁᤢᤒᤣᤛᤠᤱ ᤔᤧᤕᤢᤰᤂᤢ ᤜᤧᤰᤁᤩᤠᤱ ᤂᤢᤴᤇᤡ᤹ ᤗᤠᤶᤎᤣ᤺ᤳ ᤕᤧᤵᤏᤠᤜᤠ᤹ ᤀᤠᤱᤃᤠ᤹ ᤀᤠᤗᤠᤶᤎᤣᤳ ᤕᤧᤵᤏᤠᤜᤠ᤹ᤖᤧ ᤁᤢᤒᤣᤛᤠᤱ ᤔᤧᤈᤥᤃᤢ. ᤂᤶᤓᤩᤠᤱ ᤂᤧᤱᤜᤠ᤹ ᤏᤢ ᤀᤠᤱᤃᤠ᤹ ᤗᤢᤶᤔᤥ ᤗᤳᤇᤠ ᤗᤢᤱᤎᤠᤰ ᤌᤡᤰᤗᤰ ᤕᤠ᤺ᤰᤋᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤠᤶᤃᤧᤛᤡᤱᤒᤠ ᤕᤠ᤺ᤶᤒᤰᤜᤠ᤹ᤖᤧ ᤀᤠᤱᤃᤠ᤹ ᤀᤠᤛᤣᤛᤣ ᤔᤡᤱᤅᤡᤴ ᤀᤠᤛᤢᤳᤌᤥ ᤔᤧᤈᤥᤃᤢ॥ ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤕᤠ᤺ᤰᤗᤧ᤹ᤔᤥ ᤀᤠᤱᤃᤠ᤹ ᤂᤧᤱᤜᤠ᤹ ᤔᤧᤰᤂᤢᤱᤛᤡᤱ॥ 9 ᤀᤠᤸᤗ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰᤁᤡᤴ ᤔᤧᤗᤧᤖᤢᤖ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤆᤣᤜᤠ᤹ ᤔᤧᤗ᤺ᤳᤋᤢ ᤔᤧᤍᤣᤛᤢᤛᤡᤖ ᤐᤥᤱ᤹॥ ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤛᤍᤠᤍᤡᤱ ᤀᤠᤓᤧᤸᤗᤧᤛᤠᤱ ᤘᤠ᤹ᤀᤠ॥ 10 “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤔᤠᤱᤜᤡᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤂᤧᤏᤧ᤹ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤔᤧᤳᤋᤧᤛᤧ᤹. ᤜᤧᤰᤁᤣᤗ᤹ᤖᤡᤰ ᤂᤢᤴᤇᤡ᤹ ᤗᤠᤕᤥᤜᤠ᤹ᤖᤧ ᤗᤠᤃᤡ ᤂᤧᤱᤜᤠ᤹ ᤛᤡᤖᤡᤱᤔᤔᤥ ᤔᤧᤎᤠᤖ॥ ᤂᤧᤱᤜᤠ᤹ᤖᤧ ᤁᤴ ᤔᤠᤱᤜᤡᤶᤔᤥᤒᤠ ᤁᤢᤗᤡᤱᤍᤥ ᤁᤧᤃᤧᤵᤐᤠ ᤏᤡᤱᤛᤣ᤺ᤰᤁᤡᤴ ᤏᤡᤱᤘᤠ᤹ ᤔᤧᤀᤡ᤺ᤳᤋᤢᤖ॥ 11 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤀᤠᤱ ᤘᤠ᤹ᤒᤠ ᤂᤧᤴ ᤁᤧᤖᤧᤰ ᤐᤠ᤺ᤴᤜᤠ᤹ᤀᤥ ᤂᤢᤴᤇᤡ᤹ ᤛᤡᤖᤡᤱᤔᤔᤥ ᤔᤧᤎᤠᤏᤧᤓᤃᤪ ᤂᤧᤏᤧ᤹ ᤂᤧᤱᤜᤠ᤹ ᤁᤴ ᤔᤠᤱᤜᤡᤶᤔᤡᤴ ᤏᤢ ᤂᤧᤵᤔᤥ ᤆᤠᤜᤠ ᤁᤧᤈᤥ᤺ᤰᤐᤠ ᤁᤧᤖᤧᤰ ᤐᤠ᤺ᤴᤜᤠ᤹. ᤂᤧᤵᤔᤥ ᤗᤠ᤺ᤰᤁᤠᤳ ᤗ᤺ᤶᤔᤠ ᤏᤢ ᤛᤡᤃᤠᤱ ᤗᤠ᤺ᤵᤔᤠ ᤗᤠᤶᤎᤣ᤺ᤵᤐᤠᤜᤠ᤹. ᤂᤧᤵᤔᤥᤒᤠ ᤁᤧᤖᤧᤰ ᤆᤥ᤺ᤱᤜᤠ᤹ ᤜᤧᤰᤁᤩᤠᤱ ᤂᤧᤵᤔᤥᤒᤠ ᤁᤧᤖᤧᤰ ᤌᤡᤶᤜᤠ᤹ ᤏᤢ ᤀᤡᤱᤈᤠᤱᤜᤠ᤹ ᤂᤰᤐᤧᤳ ᤔᤧᤳᤋᤧᤛᤧ᤹॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤁᤴ ᤐᤠ᤺ᤴᤜᤠ᤹ ᤂᤧᤏᤧ᤹ ᤛᤠᤵᤋᤧ᤹. ᤜᤧᤰᤁᤣᤗ᤹ᤖᤡᤰ ᤂᤧᤵᤔᤥᤒᤠ ᤁᤢᤈᤥᤱ ᤐᤠ᤺ᤴᤏᤥ ᤂᤧᤱᤜᤠ᤹ ᤁᤢᤍᤥ᤺ᤵᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤔᤧᤒᤥᤱᤗ. ᤜᤧᤰᤁᤩᤠᤱ ᤂᤧᤵᤔᤥᤒᤠ ᤌᤡᤶᤜᤠ᤹ ᤏᤢ ᤀᤡᤱᤈᤠᤱᤜᤠ᤹ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢᤖ॥ 12 “ᤔᤠᤱᤜᤡᤶᤔᤥᤒᤠ ᤀᤡᤱᤈᤠᤱᤅᤡᤴ ᤜᤠᤒᤠ ᤁᤴᤗᤥ—ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠ ᤛᤶᤎᤠᤱᤒᤠ ᤁᤧᤖᤧᤰ ᤐᤡᤛᤠᤱᤒᤠ ᤋᤧᤴᤏᤡᤴ ᤛᤠ᤹ᤖᤡᤰ ᤛᤣᤛᤣᤒᤠ ᤐᤥᤱ᤹॥ ᤔᤠᤱᤜᤡᤶᤔᤥᤒᤠ ᤀᤡᤱᤈᤠᤱᤅᤡᤴ ᤜᤠᤒᤠ ᤁᤴᤏᤣᤖᤥ॥” ᤗᤧᤳᤋᤡ ᤋᤥ᤺ᤶᤔᤠᤍᤧᤴ 13 “ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤛᤡ᤺ᤰᤔᤠᤜᤠ᤹ ᤁᤣ᤺ᤶᤒᤠ ᤜᤢᤰᤛᤡᤰ ᤁᤢᤀᤡᤛᤡᤰ ᤜᤠᤒᤠ ᤁᤴᤜᤠ᤹ᤖᤥ—ᤁᤣ᤺ᤶᤒᤠ ᤜᤢᤰᤛᤡᤰᤁᤡᤸᤗᤧ ᤁᤢᤛᤡ᤺ᤰᤔᤧᤴ ᤜᤢᤰᤛᤡᤰ ᤌᤡᤰᤁᤠᤱ ᤜᤢᤰᤋᤠᤵᤐᤣ᤹ ᤌᤡᤰ ᤐᤧᤖᤧᤶᤒᤠ ᤕᤠᤖᤡᤰᤗᤥ॥ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤕᤢᤰᤏᤠ᤺ᤸᤗᤧ ᤁᤒᤪᤡᤱ ᤐᤡᤛᤠᤱ ᤜᤢᤰᤛᤡᤰᤌᤡᤰ ᤔᤢ ᤐᤠᤰᤗᤢᤶ ᤁᤧᤗ᤹ᤒᤠ ᤏᤢ ᤜᤢᤰᤛᤡᤰᤌᤡᤰ ᤁᤢᤓᤧᤖᤧ ᤁᤧᤏᤧᤒᤠ ᤘᤠᤗᤠᤶ ᤏᤧᤛ᤻ᤛᤧ. ᤂᤧᤸᤗᤧ ᤁᤢᤕᤠ ᤁᤒᤪᤡᤱ ᤛᤥ᤺ᤰᤐᤡᤳᤋᤠ ᤌᤡᤰ ᤁᤢᤃ᤺ᤱᤃᤩᤠ ᤐᤳᤇᤧ॥ ᤜᤧᤰᤁᤩᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤁᤢᤗᤡᤱᤃᤧᤴᤏᤡᤴᤃ ᤜᤠᤒᤠ ᤁᤴᤗᤥ— 14 ᤂᤠᤶᤒᤠᤱᤅᤥ ᤁᤧᤏᤧᤒᤠ ᤁᤢᤕᤢᤰᤏᤠᤀᤥᤗᤠᤶ ᤔᤢ᤺ᤛᤔᤠ ᤁᤢᤍᤠ᤺ᤳᤗᤠᤀᤥᤒᤠ ᤁᤢᤕᤠᤀᤥ ᤌᤠᤖᤡᤰ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤜᤢᤰᤛᤡᤰ ᤏᤧᤳᤇᤡ ᤁᤣ᤺ᤶᤒᤠ ᤏᤢ ᤜᤢᤰᤛᤡᤰᤌᤡᤰ ᤁᤢᤓᤧᤖᤧ ᤁᤧᤏᤧᤒᤠ ᤆᤥᤰ. ᤆᤢᤰᤐᤠ ᤁᤢᤛᤧᤳᤋᤥᤗᤠᤶ ᤆᤩᤶᤒᤠ ᤁᤢᤛᤧᤳᤋᤥ ᤌᤠᤖᤡᤰ ᤂᤧᤴ ᤜᤢᤰᤛᤡᤰ ᤗᤡᤛᤡ ᤁᤢᤗᤡᤱᤃᤧᤴ ᤁᤣ᤺ᤶᤒᤠ ᤏᤢ ᤜᤢᤰᤛᤡᤰᤌᤡᤰ ᤁᤢᤓᤧᤖᤧ ᤁᤧᤒᤵᤐᤠ ᤆᤥᤰ॥ 15 ᤗᤧᤳᤋᤡ ᤋᤥ᤺ᤶᤔᤠ ᤔᤡᤜᤠ᤺ᤳᤗᤢᤱᤅᤡᤴ ᤜᤢᤰᤛᤡᤰ ᤗᤡᤛᤡ ᤁᤢᤗᤡᤱᤃᤧᤴ ᤁᤣ᤺ᤶᤒᤠ ᤆᤥᤰ. ᤜᤧᤰᤁᤩᤠᤱ ᤗᤡᤛᤡ ᤁᤢᤛᤢᤰᤐᤥ ᤗᤡᤛᤡ ᤜᤠᤛᤶᤛᤶᤒᤠ ᤁᤢᤍᤠᤱᤜᤠ᤹ ᤆᤶᤒᤧᤳ ᤆᤶᤒᤧᤳ ᤕᤢᤱ॥ 16 ᤗᤧᤳᤋᤡ ᤋᤥ᤺ᤶᤔᤠ ᤔᤡᤜᤠ᤺ᤳᤗᤢᤱᤅᤡᤴ ᤜᤢᤰᤛᤡᤰ ᤌᤡᤒᤥᤱᤅᤠᤱ ᤏᤧᤳᤇᤡ ᤁᤢᤗᤠᤶᤋᤡ ᤏᤢ ᤌᤡᤒᤥᤱᤅᤠᤱ ᤏᤧᤳᤇᤡ ᤁᤢᤓᤧᤖᤧ ᤁᤧᤏᤧᤒᤠ ᤁᤢᤛᤢᤰᤐᤠ ᤗᤡᤛᤡ ᤁᤧᤒᤵᤐᤠ ᤆᤥᤰ॥ 17 ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤌᤠ᤺ᤱᤒᤠ ᤁᤢᤃ᤺ᤱᤃᤩᤠᤴᤏᤠᤱ ᤁᤢᤛᤢᤰᤐᤠ ᤗᤡᤛᤡ ᤁᤧᤒᤵᤐᤠ ᤆᤥᤰ. ᤌᤡᤒᤥᤱᤅᤠᤱ ᤗᤡᤛᤡ ᤜᤢᤰᤛᤡᤰ ᤁᤣ᤺ᤶᤒᤠ ᤁᤢᤗᤠᤶᤋᤡ᤺ᤴ ᤏᤢ ᤌᤡᤒᤥᤱᤅᤠᤱ ᤗᤡᤛᤡ ᤜᤢᤰᤛᤡᤰ ᤁᤧᤓᤧᤖᤧ ᤁᤧᤒᤵᤐᤠ. ᤁᤢᤓᤪᤧ᤺ᤱ ᤜᤢᤰᤛᤡᤰ ᤕᤠᤖᤡᤰ ᤁᤧᤎᤢᤱᤒᤠ ᤁᤢᤃ᤺ᤱᤃᤩᤠ ᤏᤢ ᤂᤧᤵᤔᤥ ᤁᤒᤪᤡᤱ ᤐᤡᤛᤠᤱ ᤜᤢᤰᤛᤡᤰᤌᤡᤰ ᤕᤠᤖᤡᤰ ᤔᤢ ᤐᤠᤰᤗᤢᤶ ᤁᤧᤗᤠ᤺ᤵᤐᤠ ᤘᤠᤗᤠᤶ ᤐᤳ॥ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥᤒᤠ ᤏᤠᤜᤠᤱᤛᤣ᤺ᤰᤜᤠ᤹ ᤏᤠᤱᤃᤧᤴ ᤐᤡᤛᤠᤱ ᤁᤧᤜᤡᤛᤡᤱᤒᤠ ᤆᤥᤰᤗᤥ॥” ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤔᤧᤍᤥᤴᤍᤢ 18 ᤂᤧᤒᤩᤠᤱ ᤂᤢᤏᤧ᤹ ᤀᤠᤱᤃᤠ᤹ ᤔᤧᤳᤋᤠᤱ. “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤆᤥ᤺ᤰᤔᤠ ᤆᤢ᤺ᤳᤋᤠᤱ ᤁᤵᤔᤥ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠᤜᤠ᤹ ᤏᤢ ᤘᤠᤕᤠᤃᤧᤴ ᤛᤡᤍᤢᤱᤈᤓᤠ ᤛᤠᤔᤠᤰᤂᤡᤴ ᤁᤸᤗᤧ ᤁᤢᤛᤶᤎᤠᤱ ᤛᤠᤱᤔᤠᤖᤧ ᤗᤠᤃᤡ ᤌᤡᤶᤜᤠ᤹ ᤜᤠᤒᤠ ᤁᤴᤜᤠ᤹ᤀᤣᤖᤥ— 19 ᤂᤧᤏᤧ᤹ ᤛᤢᤳᤌᤥ ᤐᤥᤱᤔᤠ ᤘᤠᤕᤠᤃᤧᤴ ᤛᤡᤍᤢᤱᤈᤓᤠᤖᤧ ᤗᤠᤃᤡ. ᤀᤠᤱᤃᤠ᤹ ᤀᤠᤒᤣᤛᤠᤱ ᤔᤠᤱᤛᤧᤘᤠ ᤆᤥ᤺ᤰᤛᤧ ᤁᤧᤍᤠᤒᤠ. ᤗᤧᤒᤡ ᤌᤠ᤺ᤰᤁᤥᤒᤠ ᤛᤠᤍᤥᤰᤁᤡᤸᤗᤧ ᤁᤢᤜᤡᤶᤛᤕᤱᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤂᤧᤏᤧ᤹ ᤗᤳᤇᤠ ᤁᤢᤶᤒᤠᤒᤠ ᤐᤡᤳᤛᤠᤳ ᤁᤧᤒᤡᤖᤢᤛᤡᤖ ᤐᤥᤱ᤹. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹॥ 20 ᤂᤧᤸᤗᤧ ᤁᤢᤓᤠ ᤁᤢᤔᤠᤰᤂᤡ᤹ᤜᤠ᤹ ᤋᤣ᤹ᤖᤧᤀᤠᤱ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤗᤡᤔᤪᤠᤱ ᤁᤢᤍᤠᤱᤜᤠ᤹ᤀᤥ ᤜᤧᤰᤁᤩᤠᤱ ᤌᤠ᤺ᤱᤛᤔᤠ ᤁᤢᤛᤧᤳᤋᤧᤸᤗᤧ ᤗᤡᤛᤡ ᤁᤢᤛᤢᤰᤐᤠᤜᤠ᤹ᤀᤥ ᤏᤢ ᤂᤧᤸᤗᤧ ᤁᤢᤕᤠᤜᤠ᤹ ᤁᤒᤪᤡᤱ ᤁᤧᤖᤧᤰ ᤜᤢ᤺ᤳᤋᤧ᤹. ᤜᤧᤰᤁᤣᤗ᤹ᤖᤡᤰ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤛᤢᤳᤌᤥ ᤆᤥᤃᤧ᤹ᤀᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤠᤱᤛᤧᤘᤠ ᤔᤧᤵᤔᤠᤖᤧ ᤗᤠᤃᤡ ᤕᤠᤖᤡᤵ ᤆᤥᤃᤧ᤹॥ 21 ᤂᤧᤒᤩᤠᤱ ᤛᤢᤳᤌᤥ ᤐᤥᤱᤔᤠ ᤘᤠᤕᤠᤃᤧᤴ ᤛᤡᤍᤢᤱᤈᤓᤠᤖᤧ ᤗᤠᤃᤡ ᤂᤧᤏᤧ᤹ ᤁᤢᤶᤒᤠᤒᤠ ᤛᤧᤃᤶᤒᤠ ᤐᤡᤳ ᤌᤡᤰ ᤁᤧᤕᤠᤱᤛᤡᤱᤗ ᤐᤥᤱ᤹. ᤜᤧᤰᤁᤩᤠᤱ ᤆᤥ᤺ᤰᤔᤠ ᤁᤧᤒᤥᤱᤒᤠ ᤔᤠᤱᤜᤡᤶ ᤗᤠ᤺ᤰᤁᤠᤳ ᤔᤡᤎᤡᤰᤂᤧᤍᤣᤛᤧ᤹॥ 22 “ᤂᤧᤸᤗᤧ ᤁᤢᤍᤠ᤺ᤴᤍᤡᤰ ᤏᤡᤛᤡᤃᤣᤰᤐᤠ ᤕᤧᤴᤏᤥ. ᤛᤢᤳᤌᤥ ᤐᤥᤱᤔᤠ ᤘᤠᤕᤠᤃᤧᤴ ᤛᤡᤍᤢᤱᤈᤓᤠ᤺ᤸᤗᤧ ᤗᤠᤃᤡ ᤂᤧᤏᤧ᤹ ᤗᤳᤇᤠ ᤕᤠᤱᤄᤣ᤺ᤰ ᤔᤧᤶᤒᤵᤔᤏᤠᤒᤠ ᤁᤢᤶᤒᤠᤒᤠ ᤔᤧ᤺ᤴᤍᤠᤎᤡᤰ ᤕᤠᤱᤛᤡᤱᤅᤧ᤹. ᤜᤧᤰᤁᤩᤠᤱ ᤁᤢᤶᤒᤠᤒᤠ ᤛᤧᤃᤶᤒᤠ ᤐᤡᤳᤋᤡᤸᤗᤧ ᤁᤢᤔᤠᤰᤂᤡᤸᤗᤧ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤴ ᤛᤢᤳᤌᤥ ᤁᤧᤈᤥᤃᤢᤒᤠ ᤁᤢᤀᤡᤛᤡᤰ ᤁᤴ ᤔᤧ᤺ᤴᤍᤠ᤺ᤸᤗᤧ ᤁᤢᤔᤠᤰᤂᤡᤸᤗᤧ ᤁᤴ ᤛᤢᤳᤌᤥ ᤁᤧᤈᤥᤃᤢᤖ ᤐᤥᤱ᤹॥ 23 ᤂᤧᤏᤧ᤹ ᤁᤴ ᤛᤢᤳᤌᤥ ᤆᤥ᤺ᤰᤔᤠ ᤁᤧᤛᤢᤖᤢᤀᤠᤱ ᤔᤧᤱᤃᤠ᤺ᤶᤔᤏᤠᤒᤠ ᤁᤢᤶᤒᤠᤒᤠ ᤐᤡᤳᤛᤠᤳ ᤌᤡᤰ ᤏᤢ ᤌᤰᤛᤠ ᤗᤢᤵᤐᤥᤗᤠᤶ ᤌᤢ᤺ᤶᤒᤠ ᤌᤡᤰ ᤁᤧᤍᤥ᤺ᤴᤍᤢᤛᤡᤖ ᤐᤥᤱ᤹. ᤂᤧᤴ ᤏᤧᤵᤔᤠᤱ ᤔᤧᤱᤃᤠ᤺ᤶᤔᤏᤠᤒᤠ ᤐᤥᤱᤛᤡᤖ ᤐᤥᤱ᤹॥ 24 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤂᤧᤏᤧ᤹ ᤂᤧᤱᤜᤠ᤹ ᤁᤧᤍᤥ᤺ᤴᤍᤢᤛᤡᤖ ᤐᤥᤱ᤹. ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤂᤧᤴ ᤌᤰᤛᤠᤜᤠ᤹ ᤛᤶᤎᤠᤱ ᤕᤢᤶᤔᤡᤸᤗᤧ ᤔᤧᤈᤢ᤺ᤳᤋᤢᤛᤡᤖ ᤐᤥᤱ᤹ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠᤀᤥ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤛᤡᤍᤢᤱᤈᤓᤠ ᤁᤢᤀᤡᤛᤡᤰ ᤛᤡᤍᤢᤱᤈᤓᤠ ᤁᤧᤍᤥ᤺ᤴᤍᤢᤛᤡᤖ ᤐᤥᤱ᤹॥ 25 “ᤛᤢᤳᤌᤥ ᤐᤥᤱᤔᤠ ᤘᤠᤕᤠᤃᤧᤴ ᤛᤡᤍᤢᤱᤈᤓᤠ᤺ᤸᤗᤧ ᤗᤠᤃᤡ ᤏᤢᤛᤡ ᤕᤧᤴ ᤌᤠᤖᤡᤰ ᤂᤧᤏᤧ᤹ ᤌᤡᤰᤕᤠ᤺ᤴᤎᤰ ᤔᤧ᤺ᤴᤍᤒᤁᤠ ᤌᤡᤰ ᤁᤧᤍᤠᤖᤢᤖ ᤐᤥᤱ᤹. ᤔᤧᤱᤃᤠ᤺ᤶᤔᤏᤠᤒᤠ ᤁᤢᤶᤒᤠᤒᤠ ᤐᤡᤳᤛᤠᤳ ᤌᤡᤰ ᤏᤢ ᤔᤧᤸᤗᤢᤰ ᤗᤢᤵᤐᤥᤗᤠᤶ ᤌᤢ᤺ᤶᤒᤠ ᤌᤡᤰᤁᤠᤱ ᤂᤧᤏᤧ᤹ ᤁᤧᤍᤠᤖᤢᤖ ᤐᤥᤱ᤹॥ 26 ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤗᤠᤃᤡ ᤏᤢ ᤛᤢᤳᤌᤥ ᤆᤥ᤺ᤰᤛᤡᤱᤔᤠᤖᤧ ᤗᤠᤃᤡ ᤂᤧᤱᤜᤠ᤹ᤖᤧ ᤏᤢᤛᤡ ᤕᤧᤴ ᤌᤠᤖᤡᤰ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤔᤠᤱᤛᤧᤘᤠ ᤔᤧᤵᤔᤠᤖᤧ ᤗᤠᤃᤡ ᤕᤠᤖᤡᤵ ᤔᤧᤈᤥᤃᤢᤖ ᤜᤧᤰᤁᤩᤠᤱ ᤂᤧᤴ ᤛᤢᤳᤌᤥ ᤔᤧᤈᤥᤃᤢᤖ. ᤁᤶᤓᤗ᤹ᤖᤡᤰ ᤂᤧᤱᤜᤠ᤹ᤖᤧ ᤁᤴ ᤔᤧᤍᤥᤴᤍᤢ᤹॥ 27 ᤁᤴ ᤏᤢᤛᤡ ᤕᤧᤴᤜᤠ᤹ᤖᤧ ᤁᤢᤏᤢᤵᤔᤥ. ᤕᤧᤳᤇᤡ ᤕᤧᤴᤏᤠᤱᤎᤥ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤂᤡᤏᤡ᤹ ᤔᤡᤎᤡᤱᤔᤏᤠᤍᤣᤔᤏᤠᤒᤠ ᤘᤠᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ ᤏᤢ ᤋᤱᤈᤢᤶ ᤘᤠᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤁᤧᤍᤥ᤺ᤴᤍᤢᤶᤗ ᤐᤥᤱ᤹॥ ᤂᤧᤒᤩᤠᤱ ᤀᤠᤱᤃᤠ᤹ ᤂᤡᤏᤡ᤹ ᤋᤠ᤺ᤰᤏᤡᤱ᤹॥ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤗᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.