ᤀᤡᤈᤁᤡᤀᤣᤗ 42 - LIFOTNT

ᤏᤡᤱᤘᤠᤑᤢᤛᤠᤶᤒᤠᤜᤠ᤹ᤖᤧᤴ ᤕᤠᤰᤑᤠᤱ

¹ ᤂᤧᤒᤩᤠᤱ ᤂᤧᤴ ᤔᤏᤠ᤺ᤸᤗᤧ ᤀᤠᤱᤃᤠ᤹ ᤌᤠᤱᤃᤧᤳ ᤗᤧᤵᤔᤠᤱᤒᤠ ᤕᤶᤒᤠ ᤗᤠᤶᤎᤣ᤺ᤳᤋᤥᤗᤠᤶ ᤗᤠᤁᤠᤳᤐᤠ ᤗᤰᤂᤢᤶᤔᤥ ᤋᤣ᤹ᤖᤠᤱ॥ ᤀᤠᤴᤇᤡᤃᤣ ᤗᤠᤁᤠᤳᤐᤠ ᤗᤰᤂᤢᤶᤔᤥ ᤗᤠᤛᤧᤛᤡᤃᤧ ᤜᤧᤰᤁᤩᤠᤱ ᤔᤠᤱᤜᤡᤶ ᤛᤡᤃᤠᤱ ᤗᤰᤂᤢᤶᤔᤥᤒᤠ ᤌᤠᤱᤃᤧᤳ ᤗᤧᤵᤔᤠᤱᤒᤠ ᤕᤶᤒᤠ ᤜᤡᤶᤔᤡᤸᤗᤧ ᤁᤢᤒᤣᤛᤠᤱ ᤐᤈᤢ᤺ᤵ ᤁᤧᤏᤧᤒᤠ ᤕᤠᤰᤑᤠᤱᤜᤠ᤹ᤀᤥ ᤋᤩᤧᤛᤡᤃᤧ॥

² ᤌᤠᤱᤃᤧᤳ ᤗᤧᤵᤔᤠᤱ ᤗᤠᤶᤎᤣᤳ ᤁᤧᤜᤡᤛᤡᤱᤒᤠ ᤂᤧᤴ ᤜᤡᤶᤜᤠ᤹ ᤁᤡᤵ ᤌᤡᤰ ᤜᤢᤰᤛᤡᤰ ᤁᤢᤗᤠᤶᤋᤡ ᤏᤢ ᤅᤠᤒᤥᤱ ᤜᤢᤰᤛᤡᤰ ᤁᤢᤓᤧᤖᤧ ᤏᤧᤛ᤻ᤛᤧ॥

³ ᤛᤡᤃᤠᤱ ᤗᤧᤵᤔᤠᤱᤒᤠ ᤗᤰᤂᤢᤶᤔᤥᤗᤠᤶ ᤜᤢᤰᤛᤡᤰ ᤏᤡᤒᤥᤱᤒᤠ ᤁᤢᤗᤰᤁᤡᤴ ᤏᤢ ᤗᤠ᤺ᤰᤁᤠᤳ ᤗᤧᤵᤔᤠᤱ ᤗᤢᤱ ᤑᤧᤔᤏᤠᤒᤠ ᤂᤠᤶᤒᤠᤱᤅᤡᤸᤗᤧ ᤌᤡᤰᤏᤠᤜᤠᤱ ᤁᤧᤏᤧᤒᤠ ᤁᤢᤗᤰ ᤏᤧᤵᤔᤠᤱᤅᤥ ᤋᤰ ᤏᤢ ᤋᤰ ᤁᤧᤔᤧᤳᤇᤡᤱᤒᤠ ᤁᤦᤛᤡᤜᤠ᤹ ᤁᤢᤍᤠ᤺ᤳᤗᤠ ᤛᤢᤶᤛᤡᤀᤥ ᤏᤧᤛ᤻ᤛᤧ॥

⁴ ᤕᤠᤰᤑᤠᤱᤜᤠ᤹ᤖᤧ ᤁᤢᤍᤃᤠᤱ ᤗᤧᤵᤔᤠᤱ ᤌᤡᤒᤥᤱ ᤜᤢᤰᤛᤡᤰ ᤁᤢᤓᤧᤖᤧ ᤏᤢ ᤁᤡᤵ ᤌᤡᤰ ᤜᤢᤰᤛᤡᤰ ᤁᤣ᤺ᤶᤒᤠ ᤁᤢᤗᤠᤶᤋᤡ ᤁᤧᤏᤧᤒᤠ ᤛᤡᤃᤠᤱ ᤗᤠᤱᤄᤣ᤺ᤰᤔᤠ ᤗᤳᤇᤠ ᤗᤠᤶ ᤏᤧᤛ᤻ᤛᤧ॥ ᤂᤧᤵᤔᤥᤒᤠ ᤗᤠᤶᤎᤣ᤺ᤳᤜᤠ᤹ ᤗᤠᤱᤃᤧᤳ ᤗᤧᤵᤔᤠᤱ ᤁᤧᤜᤡᤛᤡᤱᤒᤠ ᤐᤳᤇᤧ॥

⁵ ᤀᤠᤸᤗ ᤌᤥᤛᤔᤠ ᤕᤠᤰᤑᤠᤱᤜᤠ᤹ ᤆᤡᤜᤢ᤹ᤜᤢ᤹ᤒᤠ ᤆᤥᤃᤧ. ᤌᤣᤀᤠᤱᤓᤧᤸᤗᤧ ᤜᤡᤶᤔᤡᤸᤗᤧ ᤕᤥᤛᤔᤠ ᤏᤢ ᤁᤢᤗᤢᤶᤔᤥᤒᤠ ᤕᤠᤰᤑᤠᤱᤜᤠ᤹ᤏᤢ᤺ᤸᤗᤧ ᤁᤦᤛᤡᤜᤠ᤹ᤖᤧ ᤕᤖᤡᤰ ᤋᤧᤴ ᤕᤢᤰᤋᤢᤱᤀᤠᤱ ᤏᤧᤛ᤻ᤛᤧ॥

⁶ ᤗᤰᤂᤢᤶᤜᤠ᤹ᤀᤥᤒᤠ ᤕᤠᤰᤑᤠᤱᤜᤠ᤹ ᤁᤢᤀᤡᤛᤡᤰ ᤁᤢᤍᤠ᤺ᤳᤗᤠ ᤛᤢᤶᤛᤡᤀᤥᤒᤠ ᤁᤧᤖᤧᤰ ᤕᤠᤰᤑᤠᤱᤜᤠ᤹ᤀᤥ ᤛᤡᤳᤗᤠᤱᤜᤠ᤹ ᤔᤧᤕᤢᤅᤧᤴ. ᤂᤧᤸᤗᤧᤆᤥᤃᤢᤸᤗᤧ ᤕᤥᤛᤔᤠ ᤏᤢ ᤁᤢᤗᤢᤶᤔᤥᤒᤠ ᤁᤢᤍᤠ᤺ᤳᤗᤠᤀᤥᤒᤠ ᤕᤠᤰᤑᤠᤱᤜᤠ᤹ᤏᤢ᤺ᤸᤗᤧ ᤂᤧᤴ ᤌᤥᤛᤔᤠ ᤕᤠᤰᤑᤠᤱᤜᤠ᤹ ᤆᤢᤰᤛᤠ ᤆᤥᤃᤧ॥

⁷ ᤂᤧᤵᤔᤥ ᤕᤠᤰᤑᤠᤱᤜᤠ᤹ ᤏᤢ ᤗᤠᤁᤠᤳᤐᤠ ᤗᤰᤂᤢᤶᤔᤡᤴ ᤁᤧᤛᤧᤶᤒᤠ ᤐᤧᤴᤒᤧᤴ ᤁᤧᤍᤱᤒᤠ ᤗᤢᤱᤎᤠᤰ ᤌᤡᤰ ᤕᤧᤒᤧ. ᤕᤠᤰᤑᤠᤱᤜᤠ᤹ᤖᤧ ᤁᤢᤍᤃᤠᤱ ᤁᤴ ᤅᤠᤒᤥᤱ ᤜᤢᤰᤛᤡᤰ ᤌᤠᤖᤡᤰ ᤔᤧᤓᤥᤛᤢᤀᤠᤱ ᤏᤧᤛ᤻ᤛᤧ॥

⁸ ᤗᤠ᤺ᤰᤁᤠᤳ ᤗᤧᤵᤔᤠᤱᤒᤠ ᤗᤰᤂᤢᤶᤔᤡᤸᤗᤧ ᤁᤢᤕᤠᤀᤥ ᤌᤧ᤺ᤰᤐᤧᤳ ᤁᤧᤏᤧᤒᤠ ᤕᤠᤰᤑᤠᤱᤜᤠ᤹ᤖᤧ ᤁᤢᤗᤠᤶᤋᤡ ᤅᤠᤒᤥᤱ ᤜᤢᤰᤛᤡᤰ ᤏᤧᤛ᤻ᤛᤧ. ᤕᤶᤒᤠ ᤕᤠᤰᤑᤠᤱᤅᤡᤸᤗᤧ ᤁᤢᤒᤣᤛᤠᤱ ᤌᤧ᤺ᤰᤐᤧᤳ ᤁᤧᤏᤧᤒᤧᤴ ᤁᤡᤵ ᤌᤡᤰ ᤜᤢᤰᤛᤡᤰ ᤁᤢᤗᤠᤶᤋᤡ ᤏᤧᤛ᤻ᤛᤧ॥

⁹ ᤕᤥᤛᤔᤠ ᤕᤠᤰᤑᤠᤱᤜᤠ᤹ᤀᤥ ᤗᤠ᤺ᤵᤔᤠᤖᤧ ᤗᤠᤃᤡ ᤗᤠ᤺ᤰᤁᤠᤳ ᤗᤧᤵᤔᤠᤱᤒᤠ ᤗᤰᤂᤢᤶᤔᤥᤗᤠᤶ ᤛᤡᤃᤠᤱ ᤗᤠ᤺ᤵᤔᤠ ᤏᤠᤱᤃᤧᤴ ᤐᤡᤛᤠᤱᤒᤠ ᤗᤳᤇᤠ ᤗᤠᤶᤎᤣᤳ ᤐᤳᤇᤧ॥

¹⁰ ᤔᤠᤱᤜᤡᤶᤔᤥᤒᤠ ᤗᤠᤱᤃᤧᤳ ᤗᤧᤵᤔᤠᤱ ᤗᤠᤁᤠᤳᤐᤠ ᤗᤰᤂᤢᤶᤔᤡᤴ ᤏᤢ ᤛᤡᤃᤠᤱᤒᤠ ᤗᤰᤂᤢᤶᤔᤡᤸᤗᤧ ᤕᤥᤜᤠᤱ ᤏᤧᤳᤇᤡ ᤜᤡᤶᤜᤠ᤹ ᤏᤧᤛ᤻ᤛᤧ॥ ᤁᤴ ᤕᤠᤰᤑᤠᤱᤜᤠ᤹ ᤌᤠᤱᤃᤧᤳ ᤐᤡᤛᤠᤱᤒᤠ ᤕᤠᤰᤑᤠᤱᤜᤠ᤹ ᤁᤢᤀᤡᤛᤡᤰ ᤔᤧᤍᤱᤄᤢᤀᤠᤱ ᤏᤧᤛ᤻ᤛᤧ. ᤗᤠᤁᤠᤳᤐᤠ ᤗᤢᤱᤎᤠᤰᤜᤠ᤹ᤖᤧ ᤁᤢᤗᤠᤶᤋᤡ᤺ᤴᤏᤢ ᤛᤥᤛᤥᤖᤡᤰ ᤔᤠᤱᤜᤡᤶ ᤗᤰᤂᤢᤶᤔᤡᤸᤗᤧ ᤁᤢᤍᤢᤶᤒᤣᤀᤥ ᤏᤢ ᤕᤶᤒᤠ ᤜᤡᤶᤗᤧᤵᤔᤠᤱ ᤁᤧᤜᤡᤛᤡᤱᤒᤠ ᤏᤧᤛ᤻ᤛᤧ॥

¹¹ ᤂᤧᤴ ᤕᤠᤰᤑᤠᤱᤜᤠ᤹ᤖᤧ ᤁᤢᤍᤃᤡ ᤗᤧᤵᤔᤠᤱ ᤗᤠᤱᤄᤣ᤺ᤰᤔᤠ ᤗᤠᤶ ᤀᤠ᤺ᤶᤓᤥ᤹ ᤏᤧᤛ᤻ᤛᤧ॥ ᤁᤴ ᤕᤠᤰᤑᤠᤱᤜᤠ᤹ ᤌᤠᤱᤃᤧᤳ ᤗᤧᤵᤔᤠᤱ ᤁᤧᤏᤧᤒᤠᤜᤠ᤹ ᤜᤧᤰᤋᤱᤒᤠᤀᤣ ᤆᤥᤃᤧ. ᤂᤧᤵᤔᤥᤒᤠ ᤗᤠ᤺ᤰᤁᤠᤳ ᤗ᤺ᤶᤔᤠ ᤗᤠᤶᤎᤣ᤺ᤳᤜᤠ᤹ ᤁᤧᤖᤧᤰ ᤁᤢᤍᤱᤒᤠ ᤏᤧᤛ᤻ᤛᤧ. ᤜᤧᤰᤁᤩᤠᤱ ᤂᤧᤵᤔᤥᤒᤠ ᤁᤢᤗᤠᤶᤋᤡ ᤏᤢ ᤁᤢᤓᤧᤖᤧᤜᤠ᤹ ᤗᤳᤇᤠ ᤐᤖᤡᤰᤗᤧ ᤁᤢᤍᤱᤒᤠ ᤆᤥᤃᤧ॥ ᤌᤠᤱᤃᤧᤳ ᤗᤧᤵᤔᤠᤱ ᤁᤧᤏᤧᤒᤠ ᤕᤠᤰᤑᤠᤱᤜᤠ᤹ ᤁᤢᤀᤡᤛᤡᤰ

¹² ᤗᤠᤱᤃᤧᤳ ᤐᤡᤛᤠᤱᤒᤠ ᤕᤠᤰᤑᤠᤱᤜᤠ᤹ᤀᤥᤒᤠ ᤗᤠᤶᤎᤣ᤺ᤳᤜᤠ᤹ᤀᤠᤱ ᤜᤧᤰᤋᤱᤒᤠᤀᤣ ᤆᤥᤃᤧ॥ ᤂᤧᤵᤔᤥ ᤜᤡᤶᤔᤡᤴ ᤏᤢ ᤁᤢᤍᤱᤒᤠ ᤐᤧᤴᤒᤧᤶ ᤁᤧᤕᤧᤵᤐᤠ ᤗᤢᤱᤎᤠᤰᤁᤡᤸᤗᤧ ᤁᤢᤗᤢᤶᤔᤥ ᤗᤠᤱᤄᤣ᤺ᤰᤔᤠᤍᤧᤴ ᤏᤧᤛ᤻ᤛᤧ ᤂᤧᤸᤗᤧ ᤗᤠᤁᤠᤳᤐᤠ ᤗᤰᤂᤢᤶᤔᤡᤴ ᤛᤧᤴᤍᤢᤀᤠᤱ ᤏᤧᤛ᤻ᤛᤧ॥ ᤗᤠᤱᤄᤣ᤺ᤰᤔᤠᤍᤧᤴᤏᤡᤸᤗᤧ ᤁᤢᤜᤣ᤺ᤰᤛᤡᤱᤔᤥ ᤋᤠᤶᤍᤠᤶᤒᤠᤍᤧᤴ ᤏᤧᤛ᤻ᤛᤧ ᤂᤧᤵᤔᤥᤗᤠᤶ ᤔᤏᤠᤜᤠ᤹ ᤗᤠ᤺ᤵᤔᤠ ᤔᤧᤛᤢᤰᤋᤧ॥ ᤋᤠᤶᤍᤠᤶᤒᤠᤍᤧᤴᤏᤡᤴ ᤏᤠᤱᤃᤧᤴ ᤐᤡᤛᤠᤱ ᤁᤧᤜᤡᤛᤡᤱᤒᤠ ᤆᤥᤃᤧ॥

¹³ ᤂᤧᤒᤩᤠᤱ ᤂᤢᤏᤧ᤹ ᤀᤠᤱᤃᤠ᤹ ᤔᤧᤳᤋᤠᤱ. “ᤔᤠᤱᤜᤡᤶ ᤗᤰᤂᤢᤶ ᤗᤧᤵᤔᤠᤱ ᤁᤧᤜᤡᤒᤠ ᤌᤠᤱᤃᤧᤳ ᤏᤢ ᤗᤠᤱᤃᤧᤳ ᤗᤧᤵᤔᤠᤱᤒᤠ ᤕᤠᤰᤑᤠᤱᤜᤠ᤹ᤃ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤕᤠᤰᤑᤠᤱᤛᤡᤖᤥ. ᤂᤧᤵᤔᤥ ᤁᤧᤖᤧᤰᤏᤢ᤺ᤸᤗᤧ ᤛᤠ᤹ᤖᤡᤰ ᤛᤣᤛᤣᤒᤠ ᤜᤢᤰᤘᤠᤜᤠ᤹ ᤕᤜᤘᤣ ᤍᤠᤱᤒᤠᤀᤥ ᤁᤧᤃᤧᤵᤐᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤔᤧᤈᤖᤥ॥ ᤂᤧᤱᤜᤠ᤹ᤖᤧ ᤂᤧᤵᤔᤥ ᤁᤧᤖᤧᤰᤏᤢ᤺ᤸᤗᤧ ᤛᤠ᤹ᤖᤡᤰ ᤛᤣᤛᤣᤒᤠ ᤛᤡᤍᤢᤱᤈᤓᤠᤜᤠ᤹ ᤏᤢ ᤜᤢᤰᤘᤠᤜᤠ᤹ ᤔᤧᤍᤥᤴᤍᤢ᤹—ᤐᤥᤃᤢᤃᤧᤴ ᤁᤢᤈᤠ ᤛᤡᤍᤢᤱᤈᤓᤠᤜᤠ᤹. ᤛᤢᤳᤌᤥ ᤐᤥᤱᤔᤠ ᤘᤠᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ ᤏᤢ ᤀᤠᤵᤋᤡᤰᤗᤠᤶ ᤗᤧᤵᤔᤡ ᤂᤥᤔᤠ ᤘᤠᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ ᤂᤧᤵᤔᤥ ᤔᤧᤏᤧᤛ᤻ᤛᤢ᤹. ᤌᤣᤀᤠᤱᤓᤧᤸᤗᤧ ᤂᤧᤴ ᤋᤧᤴᤏᤡᤴ ᤛᤣᤛᤣᤒᤠ ᤆᤥᤰ॥

¹⁴ ᤌᤡᤰᤗᤧᤱ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ ᤛᤣᤛᤣᤒᤠᤍᤧᤴᤏᤥ ᤔᤧᤗᤠ᤺ᤳᤋᤠᤱ ᤔᤠᤱᤛᤧᤘᤠ ᤕᤠ᤺ᤶᤒᤰ ᤔᤧᤈᤥ᤺ᤰᤁᤡᤸᤗᤧ ᤔᤧᤈᤠᤰᤂᤢᤒᤠ ᤆᤠᤱᤜᤠ᤹ ᤂᤧᤵᤔᤥ ᤔᤧᤶᤓᤧᤴ ᤔᤧᤴᤎᤠᤀᤣ ᤂᤧᤵᤔᤥᤗᤠᤶ ᤗᤠ᤺ᤰᤁᤠᤳ ᤗᤰᤂᤢᤶᤔᤥ ᤗ᤺ᤶᤔᤠ ᤔᤧᤏᤢ᤹ᤏᤧᤴ᤹. ᤌᤣᤀᤠᤱᤓᤧᤸᤗᤧ ᤂᤧᤴ ᤆᤠᤱᤜᤠ᤹ ᤛᤣᤛᤣᤒᤠ ᤆᤥᤰ॥ ᤔᤏᤠᤜᤠ᤹ ᤆᤢᤶᤔᤠᤖᤧ ᤗᤠᤃᤡ ᤔᤧᤈᤥᤃᤢᤒᤠᤍᤧᤴᤜᤠ᤹ᤖᤧ ᤁᤢᤏᤡ᤺ᤳᤋᤠᤱ ᤋᤠᤔᤠᤏᤢ᤺ᤸᤗᤧ ᤋᤃᤡ ᤂᤧᤱᤜᤠ᤹ᤖᤧ ᤘᤣ᤹ᤛᤔᤠ ᤆᤠᤱ ᤔᤧᤈᤠᤰᤂᤢᤖ ᤐᤥᤱᤗᤥ॥”

¹⁵ ᤂᤢᤏᤧ᤹ ᤔᤠᤱᤜᤡᤶ ᤛᤡᤃᤠᤱᤒᤠ ᤁᤧᤖᤧᤰ ᤋᤧᤴᤜᤠ᤹ ᤛᤡ᤺ᤰᤋᤢ ᤛᤢᤖᤢᤀᤠᤱ ᤂᤧᤸᤗᤧ ᤀᤠᤱᤃᤠ᤹ ᤏᤠᤱᤃᤧᤴ ᤗᤧᤵᤔᤠᤱᤒᤠ ᤕᤶᤒᤠ ᤗᤠᤶᤎᤣ᤺ᤵᤐᤥᤗᤠᤶ ᤗᤠ᤺ᤰᤁᤠᤳ ᤗ᤺ᤳᤋᤠᤱ ᤜᤧᤰᤁᤩᤠᤱ ᤁᤒᤪᤡᤱ ᤐᤡᤛᤠᤱᤒᤠ ᤁᤧᤖᤧᤰ ᤋᤧᤴᤜᤠ᤹ ᤛᤡ᤺ᤰᤋᤢ॥

¹⁶ ᤂᤢᤏᤧ᤹ ᤁᤢᤛᤡ᤺ᤰᤔᤠ ᤀᤍᤪᤠ᤺ᤸᤗᤧ ᤏᤠᤱᤃᤧᤴ ᤗᤧᤵᤔᤠᤱ ᤛᤡ᤺ᤰᤋᤢ. ᤂᤧᤴ ᤁᤡᤵ ᤅᤠᤛᤡ ᤜᤢᤰᤛᤡᤰ ᤁᤢᤗᤠᤶᤋᤡ ᤏᤧᤛ᤻ᤛᤧ॥

¹⁷ ᤂᤧᤒᤩᤠᤱ ᤂᤢᤏᤧ᤹ ᤌᤠᤱᤃᤧᤳ ᤗᤧᤵᤔᤠᤱ ᤛᤡ᤺ᤰᤋᤢ. ᤁᤢᤛᤡ᤺ᤰᤔᤠ ᤀᤍᤪᤠᤴ ᤁᤢᤀᤡᤛᤡᤰ ᤂᤧᤴ ᤁᤡᤵ ᤅᤠᤛᤡ ᤜᤢᤰᤛᤡᤰ ᤁᤢᤗᤠᤶᤋᤡ ᤏᤧᤛ᤻ᤛᤧ॥

¹⁸ ᤂᤢᤏᤧ᤹ ᤗᤠᤱᤃᤧᤳ ᤗᤧᤵᤔᤠᤱ ᤛᤡ᤺ᤰᤋᤢ. ᤁᤢᤛᤡ᤺ᤰᤔᤠ ᤀᤍᤪᤠᤴ ᤁᤢᤀᤡᤛᤡᤰ ᤂᤧᤴᤏᤠᤱ ᤁᤡᤵ ᤅᤠᤛᤡ ᤜᤢᤰᤛᤡᤰ ᤁᤢᤗᤠᤶᤋᤡ ᤏᤧᤛ᤻ᤛᤧ॥

¹⁹ ᤂᤧᤒᤩᤠᤱ ᤂᤢᤏᤧ᤹ ᤏᤠᤶᤎᤠ ᤗᤧᤵᤔᤠᤱ ᤜᤡᤛᤡᤱᤅᤠᤱ ᤛᤡ᤺ᤰᤋᤢ. ᤁᤢᤛᤡ᤺ᤰᤔᤠ ᤀᤍᤪᤠᤴ ᤁᤢᤀᤡᤛᤡᤰ ᤂᤧᤴᤏᤠᤱ ᤁᤡᤵ ᤅᤠᤛᤡ ᤜᤢᤰᤛᤡᤰ ᤁᤢᤗᤠᤶᤋᤡ ᤏᤧᤛ᤻ᤛᤧ॥

²⁰ ᤀᤰᤂᤣᤗ᤹ᤖᤡᤰ ᤂᤢᤏᤧ᤹ ᤗᤡᤛᤡ ᤗᤧᤵᤔᤠᤱ ᤁᤧᤖᤧᤰ ᤐᤡᤛᤠᤱ ᤛᤡ᤺ᤰᤋᤢ॥ ᤛᤣᤛᤣᤒᤠ ᤏᤢ ᤔᤧᤴᤈᤥᤒᤠ ᤐᤠ᤺ᤴᤜᤠ᤹ᤗᤠᤶ ᤗᤠ᤺ᤳᤗᤠ᤺ᤳ ᤛᤧᤶᤔᤠᤖᤧ ᤗᤠᤃᤡ ᤁᤵᤔᤥ ᤁᤒᤪᤡᤱ ᤗᤢᤱᤎᤠᤰ ᤕᤧᤒᤧ. ᤁᤴ ᤗᤢᤱᤎᤠᤰᤁᤡᤴ ᤁᤡᤵ ᤅᤠᤛᤡ ᤜᤢᤰᤛᤡᤰ ᤁᤣ᤺ᤶᤒᤠ ᤁᤢᤗᤠᤶᤋᤡ ᤏᤢ ᤁᤡᤵ ᤅᤠᤛᤡ ᤁᤢᤓᤧᤖᤧ ᤐᤳᤇᤧᤖᤥ॥