ᤀᤡᤈᤁᤡᤀᤣᤗ 41 - LIFOTNT1 ᤂᤧᤴ ᤀᤣᤃᤠᤱ. ᤂᤧᤴ ᤔᤏᤠ᤺ᤸᤗᤧ ᤀᤠᤱᤃᤠ᤹ ᤔᤠᤱᤜᤡᤶᤔᤥᤒᤠ ᤕᤶᤒᤠ ᤕᤠᤰᤑᤠᤱᤅᤥ ᤋᤠᤖᤠᤱ॥ ᤂᤢᤏᤧ᤹ ᤁᤵᤔᤥᤒᤠ ᤗᤠᤶᤎᤣ᤺ᤳᤋᤥᤒᤠ ᤏᤠᤜᤠᤱ ᤁᤳᤏᤠᤜᤠᤱᤒᤠ ᤗᤠᤶᤎᤣᤳ ᤛᤡᤳᤗᤠᤱᤜᤠ᤹ ᤛᤡ᤺ᤰᤋᤢ. ᤜᤧᤰᤁᤩᤠᤱ ᤂᤧᤴ ᤗᤠᤶᤎᤣᤳ ᤛᤡᤳᤗᤠᤱᤜᤠ᤹ ᤋᤢᤰᤛᤡ ᤋᤢᤰᤛᤡ ᤜᤢᤰᤛᤡᤰ ᤁᤢᤓᤧᤖᤧ ᤐᤳᤇᤧ॥ 2 ᤛᤡᤃᤠᤱ ᤗᤠ᤺ᤵᤔᤠ ᤗᤠᤶᤔᤡᤴ ᤌᤡᤒᤥᤱ ᤜᤢᤰᤛᤡᤰ ᤁᤢᤓᤧᤖᤧ ᤏᤧᤛ᤻ᤛᤧ. ᤜᤧᤰᤁᤩᤠᤱ ᤏᤠᤜᤠᤱ ᤁᤳᤏᤠᤜᤠᤱ ᤆᤶᤒᤧᤳ ᤆᤶᤒᤧᤳ ᤁᤧᤗ᤺ᤶᤒᤠ ᤗᤢᤱᤎᤠᤰᤜᤠ᤹ᤖᤧ ᤜᤢᤰᤛᤡᤰ ᤅᤠᤛᤡ ᤅᤠᤛᤡ ᤁᤢᤓᤧᤖᤧ ᤐᤳᤇᤧ॥ ᤂᤢᤏᤧ᤹ ᤔᤠᤱᤜᤡᤶᤔᤥᤒᤠ ᤕᤶᤒᤠ ᤕᤠᤰᤑᤠᤱᤅᤡᤴᤏᤠᤱ ᤛᤡ᤺ᤰᤋᤢ. ᤁᤴ ᤗᤡᤒᤥᤱ ᤜᤢᤰᤛᤡᤰ ᤁᤣ᤺ᤶᤒᤠ ᤁᤢᤗᤠᤶᤋᤡ ᤏᤢ ᤏᤡᤒᤥᤱ ᤜᤢᤰᤛᤡᤰ ᤁᤢᤓᤧᤖᤧ ᤏᤧᤛ᤻ᤛᤧ॥ 3 ᤂᤧᤒᤩᤠᤱ ᤂᤢᤏᤧ᤹ ᤕᤶᤒᤠ ᤕᤠᤰᤑᤠᤱᤅᤡᤸᤗᤧ ᤏᤠᤜᤠᤱ ᤗᤧᤵᤔᤠᤱ ᤛᤡᤃᤠᤱᤒᤠ ᤕᤠᤰᤑᤠᤱᤅᤥ ᤐᤣ॥ ᤂᤢᤏᤧ᤹ ᤁᤴ ᤛᤡᤃᤠᤱ ᤗᤠ᤺ᤵᤔᤠ ᤗᤠᤶᤔᤡᤸᤗᤧ ᤏᤠᤜᤠᤱ ᤁᤳᤏᤠᤜᤠᤱᤒᤠ ᤗᤠᤶᤎᤣᤳ ᤛᤡᤳᤗᤠᤱᤜᤠ᤹ ᤛᤡ᤺ᤰᤋᤢ. ᤜᤧᤰᤁᤩᤠᤱ ᤁᤴ ᤗᤠᤶᤎᤣᤳ ᤛᤡᤳᤗᤠᤱᤜᤠ᤹ ᤜᤢᤰᤛᤡᤰ ᤏᤧᤳᤇᤡ ᤏᤧᤳᤇᤡ ᤁᤢᤓᤧᤖᤧ ᤐᤳᤇᤧ॥ ᤛᤡᤃᤠᤱ ᤗᤠ᤺ᤵᤔᤠ ᤗᤠᤶᤔᤡᤴ ᤜᤢᤰᤛᤡᤰ ᤋᤢᤰᤛᤡ ᤁᤢᤓᤧᤖᤧ ᤐᤳᤇᤧ. ᤜᤧᤰᤁᤩᤠᤱ ᤏᤠᤜᤠᤱ ᤁᤳᤏᤠᤜᤠᤱ ᤆᤶᤒᤧᤳ ᤆᤶᤒᤧᤳ ᤁᤧᤗ᤺ᤶᤒᤠ ᤗᤢᤱᤎᤠᤰᤜᤠ᤹ ᤜᤢᤰᤛᤡᤰ ᤏᤢᤛᤡ ᤁᤢᤓᤧᤖᤧ ᤐᤳᤇᤧ॥ 4 ᤜᤧᤰᤁᤩᤠᤱ ᤂᤢᤏᤧ᤹ ᤛᤡᤃᤠᤱ ᤗᤧᤵᤔᤠᤱᤒᤠ ᤕᤶᤒᤠ ᤕᤠᤰᤑᤠᤱᤅᤡᤸᤗᤧ ᤏᤠᤛᤔᤠ ᤆᤢᤰᤐᤠ ᤕᤠᤰᤑᤠᤱᤅᤡᤴ ᤛᤡ᤺ᤰᤋᤢ. ᤁᤴ ᤏᤡᤒᤥᤱ ᤜᤢᤰᤛᤡᤰ ᤏᤧᤛ᤻ᤛᤧ. ᤜᤧᤰᤁᤩᤠᤱ ᤗᤠᤁᤠᤳᤐᤠ ᤕᤠᤰᤑᤠᤱᤅᤡᤸᤗᤧ ᤁᤢᤏᤢᤵᤔᤥ ᤌᤠᤖᤡᤰ ᤁᤴ ᤏᤡᤒᤥᤱ ᤜᤢᤰᤛᤡᤰ ᤁᤢᤓᤧᤖᤧ ᤏᤧᤛ᤻ᤛᤧ॥ ᤂᤢᤏᤧ᤹ ᤀᤠᤱᤃᤠ᤹ ᤔᤧᤳᤋᤠᤱ. “ᤁᤴ ᤁᤧᤖᤧᤰᤏᤢ᤺ᤸᤗᤧ ᤛᤠ᤹ᤖᤡᤰ ᤛᤣᤛᤣᤒᤠᤍᤧᤴᤗᤥ॥” 5 ᤂᤧᤒᤩᤠᤱ ᤔᤠᤱᤜᤡᤶᤔᤥᤒᤠ ᤗᤢᤱᤎᤠᤰᤜᤠ᤹ ᤛᤡ᤺ᤰᤋᤢ. ᤜᤧᤰᤁᤩᤠᤱ ᤁᤴ ᤜᤢᤰᤛᤡᤰ ᤋᤢᤰᤛᤡ ᤁᤧᤎᤢᤱᤒᤠ ᤆᤥᤃᤧ॥ ᤂᤧᤵᤔᤥ ᤁᤴ ᤗᤢᤱᤎᤠᤰᤁᤡᤴᤏᤢ ᤛᤥᤛᤥᤖᤡᤰ ᤗᤠ᤺ᤰᤁᤠᤳ ᤗᤧᤵᤔᤠᤱ ᤌᤧ᤺ᤰᤐᤧᤳ ᤕᤠᤰᤑᤠᤱᤜᤠ᤹ ᤏᤧᤛ᤻ᤛᤧ. ᤁᤧᤖᤧᤰ ᤕᤠᤰᤑᤠᤱᤜᤠ᤹ᤖᤧ ᤜᤢᤰᤛᤡᤰ ᤗᤡᤛᤡ ᤗᤡᤛᤡ ᤁᤢᤓᤧᤖᤧ ᤏᤧᤛ᤻ᤛᤧ॥ 6 ᤁᤴ ᤁᤢᤕᤠᤀᤥᤒᤠ ᤕᤠᤰᤑᤠᤱᤜᤠ᤹ᤖᤧ ᤁᤢᤍᤠ᤺ᤳᤗᤠ ᤛᤢᤶᤛᤡ ᤏᤧᤛ᤻ᤛᤧ. ᤌᤡᤰ ᤏᤢ ᤘᤣ᤹ ᤁᤢᤎᤠ᤹ᤁᤢᤎᤠ᤹. ᤁᤢᤍᤠ᤺ᤳᤗᤠ ᤌᤡᤰᤁᤥ ᤛᤢᤶᤒᤥᤱ ᤕᤠᤰᤑᤠᤱᤜᤠ᤹ ᤏᤧᤛ᤻ᤛᤧ॥ ᤁᤴ ᤁᤢᤕᤠᤀᤥᤒᤠ ᤕᤠᤰᤑᤠᤱᤜᤠ᤹ᤖᤧ ᤁᤢᤍᤰᤔᤠᤜᤠ᤹ ᤔᤠᤱᤜᤡᤶ ᤗᤢᤱᤎᤠᤰᤁᤥᤒᤠ ᤗᤠ᤺ᤰᤁᤠᤳ ᤁᤧᤓᤧᤛᤡᤱᤒᤠᤍᤧᤴᤏᤥ ᤔᤧᤏᤠ᤺ᤵᤛᤢᤀᤠᤱ ᤐᤳᤇᤧ. ᤂᤧᤴ ᤁᤢᤍᤰᤔᤠᤜᤠ᤹ ᤗᤢᤱᤎᤠᤰᤁᤥ ᤏᤠ ᤔᤧᤴᤜᤠᤰᤁᤣ ᤐᤳᤇᤧ॥ 7 ᤔᤠᤱᤜᤡᤶᤔᤡᤸᤗᤧ ᤁᤢᤕᤠ ᤁᤒᤪᤡᤱᤒᤠ ᤕᤠᤰᤑᤠᤱᤜᤠ᤹ ᤁᤧᤖᤧᤰ ᤁᤢᤍᤠ᤺ᤳᤗᤠ ᤌᤰᤔᤠ ᤌᤠ᤺ᤱ ᤕᤶᤒᤠᤖ ᤕᤶᤒᤠ ᤁᤢᤓᤧᤖᤧ ᤁᤧᤏᤧᤒᤠ ᤆᤥᤃᤧ॥ ᤔᤠᤱᤜᤡᤶ ᤁᤒᤪᤡᤱᤒᤠ ᤕᤠᤰᤑᤠᤱᤜᤠ᤹ ᤌᤠ᤺ᤱᤗᤧ ᤌᤠ᤺ᤱ ᤘᤣ᤹ ᤁᤢᤍᤠ᤺ᤳᤗᤠ ᤁᤧᤕᤥ᤹ᤛᤡᤱᤒᤠᤖ ᤁᤧᤒᤣ᤺ᤰᤐᤠ ᤔᤧᤈᤥᤃᤢ. ᤁᤶᤓᤗ᤹ᤖᤡᤰ ᤌᤠ᤺ᤱ ᤕᤥ᤹ᤛᤡᤱᤗ ᤐᤣ᤺ᤸᤗᤧ ᤀᤠᤸᤗᤛᤠᤱ ᤕᤠᤰᤑᤠᤱᤜᤠ᤹ ᤕᤶᤒᤠ ᤑᤧᤓᤧᤒᤠ ᤐᤥ᤺ᤰᤂᤧᤖ ᤐᤣ॥ ᤁᤧᤖᤧᤰᤏᤢ᤺ᤸᤗᤧ ᤔᤢ᤺ᤛᤔᤠ ᤁᤢᤍᤠ᤺ᤳᤗᤠᤀᤥᤏᤢ ᤁᤧᤖᤧᤰᤏᤢ᤺ᤸᤗᤧ ᤌᤠ᤺ᤱᤛᤔᤠ ᤁᤢᤍᤠ᤺ᤳᤗᤠᤀᤥ ᤌᤠᤖᤡᤰ ᤁᤢᤗᤢᤶᤔᤥᤒᤠ ᤁᤢᤍᤠ᤺ᤳᤗᤠ ᤐᤥᤱᤔᤠᤀᤠᤱ ᤌᤒᤣ᤺ᤴᤗᤠᤶᤒᤠ ᤐᤥᤱᤔᤠᤖ ᤐᤣ᤺ᤰᤔᤠᤖᤧ ᤗᤠᤃᤡ ᤏᤠᤜᤠᤱᤛᤣᤰ ᤐᤳᤇᤧ॥ 8 ᤀᤠᤱᤃᤠ᤹ ᤔᤠᤱᤜᤡᤶ ᤁᤧᤖᤧᤰ ᤐᤡᤛᤠᤱ ᤔᤧᤓᤥᤰᤂᤢᤒᤠ ᤁᤢᤕᤢᤰᤏᤠ ᤏᤡᤛᤢᤱ. ᤁᤢᤕᤠᤀᤥᤒᤠ ᤕᤠᤰᤑᤠᤱᤜᤠ᤹ᤖᤧ ᤗᤠᤃᤡ ᤂᤧᤴ ᤁᤢᤒᤢᤱ ᤐᤥ᤺ᤰᤂᤧ॥ ᤂᤧᤸᤗᤧ ᤁᤢᤗᤡᤱᤃᤧᤴ ᤀᤍᤪᤠᤎᤡᤰ ᤕᤠᤖᤡᤰ ᤁᤣ᤺ᤶᤒᤠ ᤆᤥᤃᤧ ᤀᤡᤃᤪ ᤜᤢᤰᤛᤡᤰ ᤋᤢᤰᤛᤡ ᤕᤠᤖᤡᤰ ᤁᤣ᤺ᤶᤒᤠ ᤆᤥᤃᤧ॥ 9 ᤔᤠᤱᤜᤡᤶᤔᤡᤸᤗᤧ ᤁᤢᤕᤠᤀᤥᤒᤠ ᤕᤠᤰᤑᤠᤱᤜᤠ᤹ᤖᤧ ᤗᤠᤁᤠᤳᤐᤠ ᤗᤢᤱᤎᤠᤰᤁᤡᤴ ᤜᤢᤰᤛᤡᤰ ᤅᤠᤛᤡ ᤁᤧᤎᤢᤱᤒᤠ ᤆᤥᤃᤧ॥ ᤔᤠᤱᤜᤡᤶᤔᤡᤸᤗᤧ ᤁᤢᤕᤠᤀᤥᤒᤠ ᤕᤠᤰᤑᤠᤱᤜᤠ᤹ᤖᤧ ᤁᤢᤗᤢᤶᤔᤥᤒᤠ ᤋᤠᤶᤍᤠᤶᤒᤠ ᤋᤧᤴᤏᤡᤴ 10 ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤕᤠᤰᤑᤠᤱᤜᤠ᤹ᤖᤧ ᤁᤢᤗᤢᤶᤔᤥ ᤔᤠᤱᤜᤡᤶ ᤁᤧᤖᤧᤰ ᤐᤡᤛᤠᤱ ᤏᤡᤒᤥᤱ ᤜᤢᤰᤛᤡᤰ ᤏᤧᤛ᤻ᤛᤧ॥ 11 ᤂᤧᤴ ᤋᤠᤶᤍᤠᤶᤒᤠ ᤋᤧᤴᤏᤥᤗᤠᤶ ᤁᤢᤕᤠᤀᤥᤒᤠ ᤕᤠᤰᤑᤠᤱᤜᤠ᤹ᤀᤥ ᤗᤠ᤺ᤵᤔᤠ ᤗᤠᤶᤎᤣᤳ ᤏᤧᤳᤇᤡ ᤐᤳᤇᤧ. ᤌᤡᤰ ᤌᤠᤱᤃᤧᤳ ᤗᤧᤵᤔᤠᤱ ᤁᤧᤜᤡᤛᤡᤱᤒᤠ ᤏᤢ ᤌᤡᤰ ᤗᤠᤱᤃᤧᤳ ᤐᤡᤛᤠᤱ ᤁᤧᤜᤡᤛᤡᤱᤒᤠ ᤐᤳᤇᤧ. ᤁᤧᤏᤧᤒᤠ ᤋᤠᤶᤍᤠᤶᤒᤠ ᤋᤧᤴᤏᤡᤸᤗᤧ ᤏᤧᤵᤔᤠᤱ ᤁᤢᤕᤠ᤺ᤸᤗᤧ ᤁᤢᤍᤢᤶᤒᤣ ᤁᤧᤖᤧᤰ ᤐᤡᤛᤠᤱ ᤜᤢᤰᤛᤡᤰ ᤅᤠᤛᤡ ᤅᤠᤛᤡ ᤁᤢᤓᤧᤖᤧ ᤏᤧᤛ᤻ᤛᤧᤖᤥ॥ 12 ᤔᤠᤱᤜᤡᤶ ᤗᤰᤂᤢᤶᤔᤡᤴ ᤋᤰᤁᤧᤔᤧᤵᤐᤠ ᤏᤠᤶᤎᤠ ᤐᤡᤛᤠᤱᤒᤠ ᤕᤶᤒᤠ ᤜᤡᤶᤔᤡᤴ ᤏᤢᤒᤥᤱ ᤜᤢᤰᤛᤡᤰ ᤁᤢᤓᤧᤖᤧ ᤁᤧᤏᤧᤒᤠ ᤆᤥᤃᤧ॥ ᤂᤧᤴ ᤜᤡᤶᤔᤡᤴ ᤑᤠᤱᤒᤥᤱ ᤜᤢᤰᤛᤡᤰ ᤁᤢᤗᤠᤶᤋᤡ ᤏᤧᤛ᤻ᤛᤧ ᤜᤧᤰᤁᤩᤠᤱ ᤗᤢᤱᤎᤠᤰᤁᤡᤸᤗᤧ ᤁᤢᤓᤧᤖᤧᤴ ᤜᤢᤰᤛᤡᤰ ᤅᤠᤛᤡ ᤁᤧᤎᤢᤱᤒᤠ ᤆᤥᤃᤧ॥ 13 ᤂᤧᤒᤩᤠᤱ ᤂᤢᤏᤧ᤹ ᤔᤠᤱᤜᤡᤶᤔᤡᤴ ᤛᤡ᤺ᤰᤋᤢ. ᤁᤴ ᤁᤡᤵ ᤌᤡᤰ ᤜᤢᤰᤛᤡᤰ ᤁᤣ᤺ᤶᤒᤠ ᤁᤢᤗᤠᤶᤋᤡ ᤏᤧᤛ᤻ᤛᤧ. ᤜᤧᤰᤁᤩᤠᤱ ᤔᤠᤱᤜᤡᤶ ᤗᤰᤂᤢᤶᤔᤡᤴ ᤏᤢ ᤕᤶᤒᤠ ᤜᤡᤶᤔᤡᤴ ᤛᤥᤛᤥᤖᤡᤰ ᤗᤢᤱᤎᤠᤰᤜᤠ᤹ᤀᤠᤱ ᤁᤡᤵ ᤌᤡᤰ ᤜᤢᤰᤛᤡᤰ ᤁᤣ᤺ᤶᤒᤠ ᤁᤢᤗᤠᤶᤋᤡ ᤏᤧᤛ᤻ᤛᤧ॥ 14 ᤔᤠᤱᤜᤡᤶ ᤋᤃᤠᤱ ᤗᤧᤵᤔᤠᤱᤒᤠᤴᤏᤢ ᤛᤥᤛᤥᤖᤡᤰ. ᤏᤠᤱᤃᤧᤴ ᤐᤡᤛᤠᤱ ᤔᤠᤱᤜᤡᤶ ᤗᤰᤂᤢᤶᤔᤡᤸᤗᤧ ᤁᤢᤓᤧᤖᤧ᤺ᤴᤏᤠᤱ ᤁᤡᤵ ᤌᤡᤰ ᤜᤢᤰᤛᤡᤰ ᤏᤧᤛ᤻ᤛᤧ॥ 15 ᤂᤧᤒᤩᤠᤱ ᤂᤢᤏᤧ᤹ ᤔᤠᤱᤜᤡᤶ ᤗᤰᤂᤢᤶᤔᤡᤴ ᤋᤰᤁᤧᤔᤧᤵᤐᤠ ᤏᤠᤶᤎᤠ ᤐᤡᤛᤠᤱᤒᤠ ᤕᤶᤒᤠ ᤜᤡᤶᤔᤡᤴ ᤏᤢ ᤂᤧᤵᤔᤥᤒᤠ ᤗᤢᤱᤎᤠᤰᤁᤥ ᤔᤧᤈᤥᤃᤢᤒᤠ ᤏᤠᤜᤠᤱ ᤁᤳᤏᤠᤜᤠᤱᤒᤠ ᤁᤦᤛᤡᤜᤠ᤹ᤀᤠᤱ ᤏᤧᤵᤔᤠᤱ ᤛᤡ᤺ᤰᤋᤢᤸᤗᤧ ᤂᤧᤴ ᤁᤡᤵ ᤌᤡᤰ ᤜᤢᤰᤛᤡᤰ ᤏᤧᤛ᤻ᤛᤧᤖᤥ॥ ᤔᤠᤱᤜᤡᤶ ᤛᤡᤃᤠᤱᤒᤠ ᤕᤶᤒᤠ ᤕᤠᤰᤑᤠᤱᤅᤥᤒᤠ ᤗᤢᤱᤎᤠᤰᤁᤡᤴ ᤏᤢ ᤗᤰᤂᤢᤶ ᤗᤧᤵᤔᤠᤱ ᤋᤰᤁᤧᤔᤧᤵᤐᤠ ᤀᤠ᤺ᤶᤓᤥᤴ. 16 ᤂᤧᤴᤏᤢ ᤛᤥᤛᤥᤖᤡᤰ ᤗᤠᤶᤎᤣ᤺ᤳᤐᤢᤱᤜᤠ᤹ ᤜᤧᤰᤁᤩᤠᤱ ᤆᤡᤓᤡ᤹ᤑᤡ᤹ᤒᤠ ᤁᤢᤜᤱᤜᤠ᤹ ᤏᤢ ᤁᤦᤛᤡᤜᤠ᤹ ᤂᤧᤴ ᤛᤢᤶᤛᤡ ᤁᤧᤖᤧᤰ ᤐᤡᤛᤠᤱ ᤏᤢ ᤛᤡᤃᤠᤱ ᤗᤠᤶᤎᤣ᤺ᤳᤐᤢᤱᤅᤡᤴᤏᤠᤱ ᤛᤡᤱ ᤔᤧᤎᤧᤵᤋᤢᤒᤠ ᤆᤥᤃᤧ॥ ᤂᤠᤶᤒᤠᤱᤅᤡᤴ. ᤆᤡᤓᤡ᤹ᤑᤡ᤹ᤒᤠ ᤁᤢᤜᤱᤜᤠ᤹ ᤌᤠᤖᤡᤰᤁᤣ ᤁᤧᤕᤧᤵᤐᤠ ᤗᤢᤱᤎᤠᤰᤁᤡᤴ ᤏᤢ ᤐᤣᤎᤠ᤺ᤵᤜᤠ᤹ᤀᤠᤱ ᤛᤡᤱᤅᤡᤸᤗᤧ ᤔᤧᤒᤴᤇᤢᤀᤠᤱ ᤐᤳᤇᤧ॥ 17 ᤕᤠᤰᤑᤠᤱᤜᤠ᤹ᤀᤥ ᤗᤠ᤺ᤵᤔᤠ ᤗᤠᤶᤎᤣ᤺ᤳᤋᤡᤸᤗᤧ ᤁᤢᤛᤶᤎᤠᤱ ᤁᤢᤄᤠᤗᤧᤶ ᤁᤧᤒᤵᤐᤠᤍᤧᤴᤏᤥ ᤏᤢ ᤛᤡᤃᤠᤱ ᤜᤧᤰᤁᤩᤠᤱ ᤗᤠᤁᤠᤳᤐᤠ ᤗᤢᤱᤎᤠᤰᤜᤠ᤹ᤀᤥᤀᤠᤱ 18 ᤁᤖᤢᤒᤜᤠ᤹ ᤏᤢ ᤂᤧᤒᤰᤛᤡᤱᤜᤠ᤹ ᤔᤧᤈᤧ᤺ᤰᤋᤢᤀᤠᤱ ᤀᤡᤳᤇᤠᤵ ᤔᤧᤗᤰᤋᤢᤀᤠᤱ ᤐᤳᤇᤧ॥ ᤂᤧᤒᤰᤛᤡᤱᤜᤠ᤹ᤖᤧ ᤁᤢᤗᤢᤶᤔᤥ ᤁᤢᤗᤢᤶᤔᤥ ᤁᤖᤢᤒ ᤀᤡᤳᤇᤠᤵᤜᤠ᤹ ᤐᤳᤇᤧ॥ ᤁᤧᤖᤧᤰ ᤁᤖᤢᤒᤜᤠ᤹ᤖᤧ ᤏᤧᤳᤇᤡ ᤏᤧᤳᤇᤡ ᤂᤢᤴᤇᤡ᤹ ᤏᤠᤖᤠ ᤐᤳᤇᤧ— 19 ᤗᤳᤇᤠ ᤔᤏᤠ ᤏᤠᤖᤠᤴ ᤌᤡᤰ ᤗᤧᤵᤔᤠᤱᤒᤠ ᤂᤧᤒᤰᤛᤡᤱ ᤗᤧᤵᤔᤠᤱ ᤁᤧᤜᤡᤛᤡᤱᤒᤠ ᤆᤥᤃᤧ. ᤜᤧᤰᤁᤩᤠᤱ ᤂᤡᤖᤡᤱᤒᤠ ᤏᤠᤖᤠᤴ ᤘᤣ᤹ ᤗᤧᤵᤔᤠᤱᤒᤠ ᤂᤧᤒᤰᤛᤡᤱ ᤗᤧᤵᤔᤠᤱ ᤁᤧᤜᤡᤛᤡᤱᤒᤠ ᤆᤥᤃᤧ॥ ᤔᤠᤱᤜᤡᤶ ᤁᤧᤖᤧᤰ ᤐᤡᤛᤠᤱ ᤂᤧᤴ ᤜᤧᤰᤋᤱᤒᤠ ᤀᤡᤳᤇᤠᤵ ᤔᤧᤗᤰᤋᤢᤛᤡᤀᤠᤱ ᤐᤳᤇᤧ॥ 20 ᤂᤠᤶᤒᤠᤱᤅᤥᤗᤠᤶ ᤛᤡᤃᤠᤱ ᤗᤠ᤺ᤵᤔᤠ ᤗᤠᤶᤎᤣ᤺ᤳᤋᤡᤸᤗᤧ ᤁᤢᤛᤶᤎᤠᤱ ᤌᤠᤖᤡᤰ. ᤛᤡᤃᤠᤱ ᤕᤠᤰᤑᤠᤱᤅᤥᤒᤠ ᤗᤢᤱᤎᤠᤰᤁᤥ ᤁᤖᤢᤒᤜᤠ᤹ ᤏᤢ ᤂᤧᤒᤰᤛᤡᤱᤅᤡᤸᤗᤧ ᤁᤢᤒᤢᤱᤜᤠ᤹ ᤔᤧᤗᤰᤋᤢᤀᤠᤱ ᤐᤳᤇᤧ॥ 21 ᤗᤠ᤺ᤰᤁᤠᤳ ᤕᤠᤰᤑᤠᤱᤅᤥᤒᤠ ᤗᤠᤶᤎᤣᤳ ᤕᤧᤵᤏᤠᤜᤠ᤹ ᤌᤠᤶᤔᤠᤱᤔᤠᤱᤒᤠ ᤆᤥᤃᤧ. ᤜᤧᤰᤁᤩᤠᤱ ᤛᤠ᤹ᤖᤡᤰ ᤛᤣᤛᤣᤒᤠᤍᤧᤴᤏᤡᤸᤗᤧ ᤁᤢᤍᤃᤠᤱ ᤗᤳᤇᤠ ᤜᤠᤒᤠ ᤜᤧᤰᤋᤱᤒᤠᤀᤣ ᤆᤥᤃᤧ॥ 22 ᤂᤧᤵᤔᤥ ᤜᤢᤰᤛᤡᤰ ᤛᤢᤶᤛᤡ ᤁᤣ᤺ᤶᤒᤠ ᤁᤢᤗᤡᤱᤃᤧᤴ ᤏᤢ ᤜᤢᤰᤛᤡᤰ ᤏᤧᤳᤇᤡ ᤁᤢᤓᤧᤖᤧ ᤁᤧᤒᤵᤐᤠ ᤛᤡᤱᤅᤡᤸᤗᤧᤴ ᤗᤳᤇᤠ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤕᤢᤅᤧ. ᤁᤸᤗᤧ ᤁᤢᤛᤢᤰᤐᤠᤜᤠ᤹. ᤁᤢᤕᤢᤰᤏᤠ ᤏᤢ ᤁᤢᤕᤠᤜᤠ᤹ ᤛᤡᤱᤅᤡᤸᤗᤧᤴ ᤐᤳᤇᤧ॥ ᤂᤧᤴ ᤔᤏᤠ᤺ᤸᤗᤧ ᤀᤠᤱᤃᤠ᤹ ᤔᤧᤳᤋᤠᤱ. “ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤃᤡ ᤁᤧᤕᤧᤵᤐᤠ ᤆᤵᤋᤧᤴᤏᤡᤴ ᤜᤠᤒᤠ ᤁᤴᤗᤥ॥” ᤔᤠᤱᤜᤡᤶ ᤗᤠᤶᤎᤣᤳ ᤛᤡᤱᤓᤧᤸᤗᤧᤰᤜᤠ᤹ 23 ᤕᤶᤒᤠ ᤕᤠᤰᤑᤠᤱᤅᤥ ᤏᤢ ᤛᤠ᤹ᤖᤡᤰ ᤛᤣᤛᤣᤍᤧᤴᤏᤥ ᤏᤧᤳᤇᤡ ᤏᤧᤳᤇᤡ ᤗᤠᤶᤎᤣ᤺ᤳᤜᤠ᤹ ᤐᤳᤇᤧ॥ 24 ᤗᤠᤶᤎᤣ᤺ᤵᤐᤠ ᤌᤵᤔᤣ ᤜᤸᤗᤧᤰ ᤁᤧᤜᤶᤒᤠ ᤏᤧᤳᤇᤡ ᤛᤡᤱᤓᤧᤸᤗᤧᤰᤜᤠ᤹ ᤐᤳᤇᤧ॥ 25 ᤜᤧᤰᤁᤩᤠᤱ ᤗᤢᤱᤎᤠᤰᤜᤠ᤹ᤀᤥ ᤔᤧᤗᤰᤋᤢᤀᤠᤱ ᤐᤳᤇᤧᤒᤠ ᤜᤧᤰᤁᤣ ᤗᤠ᤺ᤰᤁᤠᤳ ᤕᤶᤒᤠ ᤕᤠᤰᤑᤠᤱᤅᤥᤒᤠ ᤗᤠᤶᤎᤣ᤺ᤵᤐᤠᤜᤠ᤹ᤀᤥ ᤁᤖᤢᤒᤜᤠ᤹ ᤏᤢ ᤂᤧᤒᤰᤛᤡᤱᤜᤠ᤹ ᤔᤧᤗᤰᤋᤢᤀᤠᤱ ᤐᤳᤇᤧ. ᤜᤧᤰᤁᤩᤠᤱ ᤂᤧᤵᤔᤥ ᤀᤠ᤺ᤶᤓᤥ᤺ᤸᤗᤧ ᤁᤢᤍᤃᤠᤱ ᤐᤡᤛᤠᤱ ᤗᤳᤇᤠ ᤛᤡᤱᤅᤡᤸᤗᤧᤴ ᤗᤡᤱᤄᤠᤶᤒᤢ ᤐᤳᤇᤧ॥ 26 ᤀᤠ᤺ᤶᤓᤥ᤺ᤸᤗᤧ ᤁᤢᤕᤠᤜᤠ᤹ᤀᤥᤒᤠ ᤗᤢᤱᤎᤠᤰᤜᤠ᤹ᤀᤥ ᤏᤧᤵᤔᤈᤠᤱ ᤗᤧᤵᤔᤠᤱ ᤂᤧᤒᤰᤛᤡᤱ ᤔᤧᤗᤰᤋᤢᤒᤠ ᤆᤡᤓᤡ᤹ᤑᤡ᤹ᤒᤠ ᤁᤢᤜᤱᤜᤠ᤹ ᤐᤳᤇᤧ॥ ᤔᤠᤱᤜᤡᤶᤔᤥᤒᤠ ᤁᤧᤖᤧᤰ ᤐᤡᤛᤠᤱᤒᤠ ᤕᤠᤰᤑᤠᤱᤜᤠ᤹ᤀᤥᤀᤠᤱ ᤗᤡᤱᤄᤠᤶᤒᤢᤜᤠ᤹ ᤐᤳᤇᤧᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.