ᤀᤡᤈᤁᤡᤀᤣᤗ 40 - LIFOTNT

ᤋᤠᤕᤧᤶᤗᤧ ᤗᤠᤃᤡ ᤔᤠᤱᤜᤡᤶ ᤛᤢᤑᤥ ( ᥊᥆:᥇–᥊᥎:᥉᥋ ) ᤀᤡᤈᤁᤡᤀᤣ᤺ᤸᤗᤧᤴ ᤕᤖᤢᤛᤗᤧᤔ ᤔᤧᤍᤣ᤹ᤖᤢ

¹ ᤕᤖᤢᤛᤗᤧᤔ ᤕᤧᤰᤕᤰᤁᤡᤴ ᤂᤠᤵᤐᤢᤌᤩ᤺ᤱ ᤐᤥ᤺ᤰᤂᤧᤒᤠ ᤌᤡᤒᤥᤱᤅᤠᤱ ᤗᤡᤛᤡᤃᤣᤰᤐᤠ ᤋᤱᤒᤣ ᤁᤧᤖᤧᤒᤠ ᤕᤧᤴ ᤏᤢ ᤀᤠᤏᤡᤃᤣ ᤔᤧᤍᤧᤶᤛᤡ ᤔᤧᤍᤣ᤹ᤖᤡᤃᤧᤒᤠ ᤏᤡᤒᤥᤱᤅᤠᤱ ᤅᤠᤛᤡᤃᤣᤰᤐᤠ ᤋᤱᤒᤣ᤺ᤸᤗᤧ ᤁᤢᤜᤣ᤺ᤰᤛᤡᤱᤔᤠ. ᤗᤠᤀᤥᤒᤠ ᤌᤡᤒᤥᤱᤃᤣᤰᤐᤠ ᤁᤧᤖᤧᤒᤠ ᤜᤠᤒᤠ ᤂᤧᤴ ᤕᤧᤴᤏᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤢᤰᤁᤡᤴ ᤀᤠᤱᤃᤠ᤹ ᤀᤠᤛᤶᤎᤠᤱ ᤐᤳᤇᤧ ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤱᤃᤠ᤹ ᤂᤧᤵᤔᤥ ᤋᤣ᤹ᤖᤠᤱ॥

² ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤢᤑᤥᤜᤠ᤹ᤀᤥ ᤂᤢᤏᤧ᤹ ᤀᤠᤱᤃᤠ᤹ ᤀᤡᤛᤪᤠᤀᤡᤗ ᤗᤠᤈᤣ᤹ᤀᤥ ᤋᤣ᤹ᤖᤠᤱᤒᤠ ᤏᤡᤛᤢᤱ. ᤜᤧᤰᤁᤩᤠᤱ ᤗᤳᤇᤠ ᤛᤠ᤹ᤖᤡᤰ ᤁᤣ᤺ᤶᤒᤠ ᤁᤥ᤺ᤰᤔᤠ ᤛᤶᤎᤠᤱ ᤕᤢᤰᤂᤠᤱ॥ ᤂᤧᤵᤔᤥᤗᤠᤶ ᤀᤠᤱᤃᤠ᤹ ᤕᤥ ᤗᤠᤱᤃᤧᤳ ᤗᤧᤵᤔᤠᤱ ᤁᤢᤓᤠ ᤜᤡᤶᤜᤠ᤹ ᤁᤧᤕᤢᤱᤒᤠ ᤗᤳᤇᤠ ᤕᤧᤰᤕᤰ ᤜᤧᤰᤋᤱᤒᤠᤎᤡᤰ ᤏᤡᤛᤢᤱ॥

³ ᤂᤢᤏᤧ᤹ ᤀᤠᤱᤃᤠ᤹ ᤂᤧᤸᤗᤧ ᤁᤢᤒᤣᤛᤠᤱ ᤁᤧᤳᤋᤠᤱᤅᤡᤸᤗᤧ. ᤕᤧᤰᤕᤰᤁᤥ ᤗᤠ᤺ᤵᤔᤠ ᤕᤶᤒᤠ ᤗᤠᤶᤎᤣ᤺ᤳᤋᤡᤸᤗᤧ ᤁᤢᤒᤣᤛᤠᤱ ᤁᤠᤛᤠ ᤜᤧᤰᤁᤣ ᤁᤢᤏᤠ ᤋᤡᤸᤗᤧᤰ ᤋᤡᤸᤗᤧᤰ ᤁᤧᤗᤧᤰᤐᤠ ᤔᤏᤠᤎᤡᤰ ᤕᤧᤒᤧᤃᤖᤧᤒᤠ ᤏᤡᤛᤢᤱ॥ ᤂᤢᤏᤧ᤹ ᤁᤢᤜᤢᤰᤁᤥ ᤗᤳᤇᤠ ᤁᤢᤛᤡ᤺ᤰᤔᤠ ᤏᤤᤏᤠᤛᤢᤳ ᤗᤡᤵᤗᤡᤱᤃᤣ ᤂᤡᤎᤡᤰ ᤏᤢ ᤗᤳᤇᤠ ᤁᤢᤛᤡ᤺ᤰᤔᤠ ᤀᤍᤪᤠᤎᤡᤰ ᤐᤰᤂᤢᤀᤠᤱ ᤘᤕᤧ॥

⁴ ᤂᤢᤏᤧ᤹ ᤀᤠᤱᤃᤠ᤹ ᤔᤧᤳᤋᤠᤱ. “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤂᤧᤏᤧ᤹ ᤀᤥᤔᤧᤳᤋᤧ᤹ ᤜᤧᤰᤁᤩᤠᤱ ᤂᤧᤵᤛᤧ᤹॥ ᤀᤠᤱᤃᤠ᤹ ᤂᤧᤏᤧ᤹ ᤀᤥ᤺ᤴᤎᤠᤰᤏᤧᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ᤀᤥ ᤏᤢᤖᤡᤰ ᤏᤡᤱᤘᤠ᤹ ᤐᤡᤖᤧ᤹॥ ᤀᤠᤱᤃᤠ᤹ ᤂᤧᤏᤧ᤹ ᤕᤖᤡᤰ ᤐᤠ᤺ᤴᤜᤠ᤹ ᤀᤥ᤺ᤴᤎᤠᤰᤔᤠ ᤛᤢᤰᤏᤧᤖ ᤑᤠ᤹ᤀᤠᤱ ᤂᤧᤏᤧ᤹ ᤁᤵᤔᤥ ᤁᤧᤶᤓᤧᤳᤋᤧᤀᤠᤱ ᤘᤠ᤹॥ ᤂᤧᤒᤩᤠᤱ ᤂᤧᤏᤧ᤹ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ᤀᤥ ᤁᤧᤏᤢ᤺ᤱ ᤁᤧᤒᤣ᤺ᤰ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤏᤡᤛᤢᤀᤠᤱ ᤘᤠ᤹ᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤧᤱᤜᤠ᤹ ᤁᤧᤔᤧᤳᤋᤢᤛᤡᤖᤥ॥”

ᤏᤠᤱᤃᤧᤴ ᤐᤡᤛᤠᤱᤒᤠ ᤕᤶᤒᤠ ᤗᤠᤶᤎᤣᤳ

⁵ ᤔᤠᤱᤜᤡᤶ ᤁᤒᤪᤡᤱ ᤐᤡᤛᤠᤱᤒᤠ ᤋᤧᤴᤏᤡᤴ ᤁᤡᤷᤃᤵ ᤁᤧᤃᤵᤐᤠ ᤗᤢᤱᤎᤠᤰ ᤌᤡᤰ ᤀᤠᤱᤃᤠ᤹ ᤏᤡᤛᤢᤱ॥ ᤂᤧᤴ ᤔᤏᤠ᤺ᤸᤗᤧ ᤁᤢᤜᤢᤰᤁᤥ ᤁᤳᤋᤢᤒᤠ ᤁᤢᤛᤡ᤺ᤰᤔᤠ ᤀᤍᤪᤠᤴ ᤜᤢᤰᤛᤡᤰ ᤋᤢᤰᤛᤡ ᤕᤠᤖᤡᤰ ᤁᤣ᤺ᤶᤒᤠ ᤆᤥᤃᤧ. ᤀᤡᤃᤪ ᤜᤢᤰᤛᤡᤰ ᤌᤡᤰᤁᤠᤱ ᤜᤢᤰᤋᤠᤵᤐᤣ᤹ ᤌᤡᤰ ᤁᤢᤈᤰ ᤁᤣ᤺ᤶᤒᤠ ᤆᤥᤃᤧ॥ ᤜᤧᤰᤁᤩᤠᤱ ᤂᤢᤏᤧ᤹ ᤗᤢᤱᤎᤠᤰᤁᤡᤴ ᤛᤡ᤺ᤰᤋᤢ. ᤂᤧᤴ ᤗᤢᤱᤎᤠᤰᤁᤡᤴ ᤀᤍᤪᤠᤎᤡᤰ ᤕᤠᤖᤡᤰ ᤁᤧᤎᤢᤱᤒᤠ ᤏᤢ ᤀᤍᤪᤠᤎᤡᤰ ᤕᤠᤖᤡᤰ ᤁᤢᤗᤡᤱᤃᤧᤴ ᤁᤣ᤺ᤶᤒᤠ ᤆᤥᤃᤧ॥

⁶ ᤂᤧᤒᤩᤠᤱ ᤂᤢᤏᤧ᤹ ᤏᤠᤱᤃᤧᤴ ᤐᤡᤛᤠᤱᤒᤠ ᤕᤶᤒᤠ ᤗᤠᤶᤎᤣᤳ ᤗᤧᤵᤔᤠᤱ ᤐᤣ॥ ᤂᤢᤏᤧ᤹ ᤏᤠᤜᤠᤱᤛᤣ᤺ᤰᤜᤠ᤹ ᤗᤡᤅᤢᤍᤣ᤹ᤖᤢᤀᤠᤱ ᤕᤶᤒᤠ ᤗᤠᤶᤎᤣ᤺ᤳᤐᤢᤱᤅᤡᤴ ᤛᤡ᤺ᤰᤋᤢ. ᤂᤧᤵᤔᤥ ᤗᤠᤶᤎᤣ᤺ᤳᤐᤢᤱᤅᤡᤴ ᤀᤍᤪᤠᤎᤡᤰ ᤕᤠᤖᤡᤰ ᤁᤣ᤺ᤶᤒᤠ ᤏᤧᤛ᤻ᤛᤧ॥

⁷ ᤕᤶᤒᤠ ᤗᤠᤶᤎᤣ᤺ᤳᤋᤡᤸᤗᤧ ᤁᤢᤗᤢᤶᤔᤥᤒᤠ ᤁᤣ᤺ᤶᤒᤠ ᤀᤠ᤺ᤶᤓᤥ᤺ᤸᤗᤧ ᤏᤠᤜᤠᤱ ᤁᤳᤏᤠᤜᤠᤱ ᤁᤶᤒᤪᤠᤱ ᤕᤧᤵᤏᤠ ᤕᤠᤰᤑᤠᤱᤜᤠ᤹ ᤔᤧᤈᤥᤃᤢᤀᤠᤱ ᤏᤧᤛ᤻ᤛᤧ॥ ᤀᤠ᤺ᤶᤓᤥ᤹ᤀᤥᤒᤠ ᤗᤢᤱᤎᤠᤰᤁᤡᤸᤗᤧ ᤁᤢᤗᤢᤶᤔᤥᤒᤠ ᤁᤶᤒᤪᤠᤱ ᤕᤧᤵᤏᤠ ᤕᤠᤰᤑᤠᤱᤜᤠ᤹ ᤀᤍᤪᤠᤎᤡᤰ ᤁᤢᤗᤠᤶᤋᤡ ᤏᤢ ᤀᤍᤪᤠᤎᤡᤰ ᤁᤢᤓᤧᤖᤧ ᤏᤧᤛ᤻ᤛᤧ॥ ᤂᤧᤴ ᤕᤠᤰᤑᤠᤱᤜᤠ᤹ᤖᤧ ᤁᤢᤗᤢᤶᤔᤥ ᤁᤢᤗᤢᤶᤔᤥ ᤆᤶᤒᤧᤳ ᤁᤧᤗ᤺ᤶᤒᤠ ᤗᤢᤱᤎᤠᤰᤜᤠ᤹ᤖᤧ ᤁᤢᤓᤧᤖᤧᤴ ᤜᤢᤰᤛᤡᤰ ᤅᤠᤛᤡ ᤁᤧᤎᤢᤱᤒᤠ ᤕᤧᤒᤧ॥ ᤔᤠᤱᤜᤡᤶ ᤗᤧᤵᤔᤠᤱ ᤁᤧᤜᤡᤒᤠ ᤀᤠ᤺ᤶᤓᤥ᤺ᤸᤗᤧ ᤁᤢᤕᤠᤀᤥ ᤁᤧᤏᤧᤒᤠ ᤗᤠᤶᤎᤣ᤺ᤳᤐᤢᤱᤅᤡᤴ ᤀᤍᤪᤠᤎᤡᤰ ᤏᤧᤛ᤻ᤛᤧ॥

⁸ ᤂᤢᤏᤧ᤹ ᤕᤶᤒᤠ ᤗᤠᤶᤎᤣ᤺ᤳᤋᤥᤒᤠ ᤀᤠ᤺ᤶᤓᤥ᤺ᤴᤏᤠᤱ ᤛᤡ᤺ᤰᤋᤢ॥

⁹ ᤂᤧᤴ ᤀᤠ᤺ᤶᤓᤥᤴ ᤜᤢᤰᤛᤡᤰ ᤕᤧᤳᤇᤡ ᤁᤢᤓᤧᤖᤧ ᤏᤧᤛ᤻ᤛᤧ ᤜᤧᤰᤁᤩᤠᤱ ᤂᤧᤵᤔᤥ ᤁᤧᤕᤧᤵᤐᤠ ᤗᤠᤶᤎᤣᤳ ᤛᤡᤳᤗᤠᤱᤜᤠ᤹ ᤜᤢᤰᤛᤡᤰ ᤏᤧᤳᤇᤡ ᤁᤧᤎᤢᤱᤒᤠ ᤆᤥᤃᤧ॥ ᤕᤶᤒᤠ ᤗᤠᤶᤎᤣ᤺ᤳᤋᤥᤒᤠ ᤀᤠ᤺ᤶᤓᤥ᤺ᤸᤗᤧ ᤔᤠᤱᤜᤡᤶᤔᤡᤴ ᤋᤰᤔᤧᤳᤋᤢᤀᤠᤱ ᤏᤧᤛ᤻ᤛᤧ॥

¹⁰ ᤕᤶᤒᤠ ᤗᤠᤶᤎᤣ᤺ᤳᤋᤥᤒᤠ ᤀᤠ᤺ᤶᤓᤥ᤹ᤀᤥ ᤏᤠᤜᤠᤱ ᤁᤳᤏᤠᤜᤠᤱ ᤁᤶᤒᤪᤠᤱ ᤕᤧᤵᤏᤠ ᤛᤢᤛᤢᤶᤛᤡ ᤕᤠᤰᤑᤠᤱᤜᤠ᤹ ᤏᤧᤛ᤻ᤛᤧ॥ ᤂᤧᤴ ᤁᤧᤖᤧᤰ ᤕᤠᤰᤑᤠᤱᤜᤠ᤹ᤖᤧ ᤁᤢᤓᤧᤖᤧ ᤏᤢ ᤁᤢᤗᤠᤶᤋᤡ ᤁᤢᤍᤱᤒᤠ ᤏᤧᤛ᤻ᤛᤧ॥ ᤜᤧᤰᤁᤩᤠᤱ ᤁᤢᤗᤢᤶᤔᤥ ᤁᤢᤗᤢᤶᤔᤥ ᤁᤧᤛᤧᤶᤒᤠ ᤁᤧᤕᤧᤵᤐᤠ ᤆᤶᤒᤧᤳ ᤆᤶᤒᤧᤳ ᤁᤧᤗ᤺ᤶᤒᤠ ᤗᤢᤱᤎᤠᤰᤜᤠ᤹ᤀᤠᤱ ᤗᤳᤇᤠ ᤐᤖᤡᤰᤐᤠ ᤁᤢᤓᤧᤖᤧ ᤏᤢ ᤁᤢᤗᤠᤶᤋᤡ ᤕᤧᤒᤧ॥

¹¹ ᤂᤧᤒᤩᤠᤱ ᤂᤧᤴ ᤔᤏᤠ᤺ᤸᤗᤧ ᤕᤶᤒᤠ ᤗᤠᤶᤎᤣ᤺ᤳᤋᤥ ᤗᤠ᤺ᤵᤔᤠ ᤗᤠᤶᤔᤡᤴ ᤛᤡ᤺ᤰᤋᤢ. ᤕᤶᤒᤠ ᤗᤠᤶᤎᤣ᤺ᤳᤋᤥᤒᤠ ᤀᤠ᤺ᤶᤓᤥ᤹ᤀᤥ ᤌᤡᤒᤥᤱ ᤜᤢᤰᤛᤡᤰ ᤁᤢᤓᤧᤖᤧ ᤏᤧᤛ᤻ᤛᤧ ᤜᤧᤰᤁᤩᤠᤱ ᤌᤡᤒᤥᤱᤅᤠᤱ ᤛᤢᤶᤛᤡ ᤜᤢᤰᤛᤡᤰ ᤁᤢᤗᤠᤶᤋᤡ ᤏᤧᤛ᤻ᤛᤧ॥

¹² ᤁᤶᤒᤪᤠᤱ ᤕᤧᤵᤏᤠ ᤁᤧᤖᤧᤰ ᤕᤠᤰᤑᤠᤱᤜᤠ᤹ᤖᤧ ᤁᤢᤍᤃᤠᤱ ᤗᤧᤵᤔᤠᤱ ᤜᤢᤰᤛᤡᤰ ᤌᤡᤰᤌᤡᤰ ᤕᤠᤖᤡᤰᤐᤠ ᤋᤠᤱᤛᤠ ᤁᤢᤎᤣ᤺ᤰᤔᤠ ᤗᤢᤱᤎᤠᤰᤜᤠ᤹ ᤕᤧᤒᤧ॥ ᤁᤶᤒᤪᤠᤱ ᤕᤧᤵᤏᤠ ᤁᤧᤖᤧᤰ ᤕᤠᤰᤑᤠᤱᤜᤠ᤹ ᤏᤧᤵᤔᤈᤠᤱ ᤗᤧᤵᤔᤠᤱ ᤜᤢᤰᤛᤡᤰ ᤋᤢᤰᤛᤡ ᤁᤢᤓᤧᤖᤧ ᤏᤢ ᤜᤢᤰᤛᤡᤰ ᤋᤢᤰᤛᤡ ᤁᤢᤗᤠᤶᤋᤡ ᤁᤧᤏᤧᤒᤠ ᤆᤥᤃᤧ॥

¹³ ᤂᤧᤒᤩᤠᤱ ᤂᤢᤏᤧ᤹ ᤁᤶᤒᤪᤠᤱ ᤕᤧᤵᤔᤠ ᤕᤠᤰᤑᤠᤱᤅᤥᤒᤠ ᤗᤢᤱᤎᤠᤰᤁᤡᤸᤗᤧ ᤁᤢᤛᤶᤎᤠᤱᤗᤠᤶ ᤏᤠᤜᤠᤱ ᤁᤢᤍᤥ᤺ᤵᤔᤠ ᤗᤧᤵᤔᤠᤱᤒᤠ ᤁᤶᤒᤪᤠᤱ ᤕᤧᤵᤔᤠ ᤕᤠᤰᤑᤠᤱᤅᤥᤒᤠ ᤗᤢᤱᤎᤠᤰᤁᤥ ᤌᤠᤖᤡᤰ ᤕᤶᤒᤠ ᤗᤠᤶᤎᤣ᤺ᤳᤋᤡᤴ ᤛᤡ᤺ᤰᤋᤢ. ᤏᤠᤜᤠᤱ ᤁᤢᤍᤥ᤺ᤵᤔᤠ ᤗᤧᤵᤔᤠᤱᤗᤠᤶ ᤁᤢᤕᤠᤶᤗᤧᤱᤒᤥ ᤌᤠᤖᤡᤰᤐᤠ ᤔᤠ᤺ᤱᤗᤡᤰᤁᤡᤴ ᤏᤡᤒᤥᤱᤅᤠᤱ ᤅᤠᤛᤡ ᤜᤢᤰᤛᤡᤰ ᤏᤧᤛ᤻ᤛᤧ॥

¹⁴ ᤂᤢᤏᤧ᤹ ᤕᤶᤒᤠ ᤗᤠᤶᤎᤣᤳ ᤛᤡᤃᤠᤱ ᤗᤧᤵᤔᤠᤱ ᤁᤢᤗᤢᤶᤔᤥ ᤁᤢᤗᤢᤶᤔᤥ ᤁᤧᤛᤧᤶᤒᤠ ᤁᤧᤕᤧᤵᤐᤠ ᤆᤶᤒᤧᤳ ᤆᤶᤒᤧᤳ ᤁᤧᤗ᤺ᤶᤒᤠ ᤗᤢᤱᤎᤠᤰᤜᤠ᤹ ᤁᤢᤍᤰᤔᤠ ᤛᤡᤳᤗᤠᤱᤜᤠ᤹ᤖᤧ ᤁᤢᤗᤡᤱᤃᤧᤴᤜᤠ᤹ ᤛᤡ᤺ᤰᤋᤢᤸᤗᤧ ᤋᤢᤰᤐᤥᤱ ᤜᤢᤰᤛᤡᤰ ᤐᤳᤇᤧ॥ ᤕᤶᤒᤠ ᤗᤠᤶᤎᤣ᤺ᤳᤋᤥ ᤁᤧᤒᤣ᤺ᤰᤐᤠ ᤗᤠ᤺ᤶᤎᤣ᤺ᤳ ᤁᤒᤪᤡᤱ ᤗᤰᤂᤢᤶ ᤏᤧᤛ᤻ᤛᤧ॥

¹⁵ ᤕᤶᤒᤠ ᤗᤠᤶᤎᤣ᤺ᤳᤋᤥᤗᤠᤶ ᤀᤠ᤺ᤶᤓᤥ᤺ᤸᤗᤧ ᤏᤠᤛᤔᤠ ᤁᤢᤕᤠᤀᤥ ᤌᤠᤖᤡᤰᤐᤠ ᤁᤢᤗᤠᤶᤋᤡ᤺ᤴ ᤗᤧ᤹ᤗᤧ᤹ᤒᤠ ᤅᤠᤒᤥᤱ ᤜᤢᤰᤛᤡᤰ ᤏᤧᤛ᤻ᤛᤧ॥

¹⁶ ᤁᤶᤒᤪᤠᤱ ᤕᤧᤵᤏᤠ ᤁᤧᤖᤧᤰ ᤕᤠᤰᤑᤠᤱᤜᤠ᤹ᤀᤥᤒᤠ ᤗᤢᤱᤎᤠᤰᤜᤠ᤹ᤀᤥ ᤏᤢ ᤁᤧᤛᤧᤶᤒᤠ ᤁᤧᤕᤧᤵᤐᤠ ᤆᤶᤒᤧᤳ ᤆᤶᤒᤧᤳ ᤁᤧᤗ᤺ᤶᤒᤠ ᤗᤢᤱᤎᤠᤰᤜᤠ᤹ᤀᤥ ᤆᤡᤓᤡ᤹ᤑᤡ᤹ᤒᤠ ᤁᤢᤜᤱ ᤐᤳᤇᤧ॥ ᤂᤧᤵᤔᤥ ᤛᤡᤃᤠᤱ ᤗᤠ᤺ᤵᤔᤠ ᤀᤠ᤺ᤶᤓᤥ᤹ᤀᤥᤀᤠᤱ ᤆᤡᤓᤡ᤹ᤓᤡ᤹ᤒᤠ ᤁᤢᤜᤱᤜᤠ᤹ ᤐᤳᤇᤧ॥ ᤁᤧᤛᤧᤶᤒᤠ ᤁᤧᤕᤧᤵᤐᤠ ᤆᤶᤒᤧᤳ ᤆᤶᤒᤧᤳ ᤁᤧᤗ᤺ᤶᤒᤠ ᤗᤢᤱᤎᤠᤰᤜᤠ᤹ᤖᤧ ᤁᤢᤕᤠᤶᤗᤧᤱᤒᤠᤜᤠ᤹ᤀᤥ ᤂᤧᤒᤰᤛᤡᤱᤜᤠ᤹ ᤁᤢᤓᤢᤱ ᤔᤧᤗᤰᤋᤢᤀᤠᤱ ᤐᤳᤇᤧᤖᤥ॥

ᤗᤠᤰᤁᤠ᤺ᤳ ᤗᤧᤵᤔᤠᤱᤒᤠ ᤗᤰᤂᤢᤶ

¹⁷ ᤂᤧᤒᤩᤠᤱ ᤂᤧᤴ ᤔᤏᤠ᤺ᤸᤗᤧ ᤀᤠᤱᤃᤠ᤹ ᤕᤶᤒᤠ ᤗᤠᤶᤎᤣ᤺ᤳᤋᤥᤗᤠᤶ ᤔᤠᤱᤜᤡᤶ ᤗᤠᤁᤠᤳᤐᤠ ᤗᤰᤂᤢᤶᤔᤥ ᤋᤠᤖᤠᤱ॥ ᤗᤰᤂᤢᤶᤔᤥᤒᤠ ᤗᤢᤱᤎᤠᤰᤜᤠ᤹ᤏᤢ ᤛᤥᤛᤥᤖᤡᤰ ᤗᤢᤱ ᤑᤧᤔᤏᤠᤒᤠ ᤂᤠᤶᤒᤠᤱ ᤏᤧᤛ᤻ᤛᤧ. ᤜᤧᤰᤁᤩᤠᤱ ᤗᤢᤱ ᤑᤧᤔᤏᤠᤒᤠ ᤂᤠᤶᤒᤠᤱ ᤗᤧᤵᤔᤠᤱ ᤛᤢᤶᤒᤥᤱ ᤕᤠᤰᤑᤠᤱᤜᤠ᤹ ᤗᤢᤱᤎᤠᤰᤜᤠ᤹ᤀᤥ ᤔᤧᤈᤥᤃᤢᤀᤠᤱ ᤏᤧᤛ᤻ᤛᤧ॥

¹⁸ ᤁᤴ ᤗᤢᤱ ᤑᤧᤔᤏᤠᤒᤠ ᤂᤠᤶᤒᤠᤱᤅᤡᤴ ᤕᤶᤒᤠ ᤗᤠᤶᤎᤣ᤺ᤳᤜᤠ᤹ ᤐᤡᤛᤠᤱ ᤏᤧᤛ᤻ᤛᤧ ᤜᤧᤰᤁᤩᤠᤱ ᤛᤡᤃᤠᤱ ᤗᤠ᤺ᤵᤔᤠ ᤕᤶᤒᤠ ᤗᤠᤶᤎᤣ᤺ᤳᤋᤡᤸᤗᤧ ᤔᤠ᤺ᤱᤗᤡ᤺ᤰᤁᤡᤴ ᤁᤢᤀᤡᤛᤡᤰ ᤗᤢᤱᤎᤠᤰᤜᤠ᤹ᤀᤥᤗᤠᤶ ᤗᤰᤂᤢᤶᤔᤥ ᤔᤧᤓᤥᤛᤢᤀᤠᤱ ᤏᤧᤛ᤻ᤛᤧ॥ ᤁᤱᤃ ᤔᤢᤜᤠᤱ ᤗᤧᤵᤔᤠᤱ ᤗᤢᤱ ᤑᤧᤔᤏᤠᤒᤠ ᤂᤠᤶᤒᤠᤱ ᤏᤧᤛ᤻ᤛᤧ॥

¹⁹ ᤂᤧᤒᤩᤠᤱ ᤂᤢᤏᤧ᤹ ᤕᤥᤜᤠᤱ ᤗᤧᤵᤔᤠᤱᤒᤠ ᤕᤶᤒᤠ ᤗᤠᤶᤎᤣ᤺ᤳᤋᤥᤗᤠᤶ ᤛᤡᤃᤠᤱᤒᤠ ᤗᤰᤂᤢᤶ ᤌᤠᤖᤡᤰ ᤔᤠ᤺ᤱᤗᤡ᤺ᤰᤁᤡᤴ ᤛᤡ᤺ᤰᤋᤢ. ᤁᤴ ᤏᤠᤱᤃᤧᤴ ᤗᤧᤵᤔᤠᤱ ᤏᤢ ᤌᤠᤱᤃᤧᤳ ᤗᤧᤵᤔᤠᤱᤅᤠᤱ ᤁᤡᤵ ᤌᤡᤰ ᤜᤢᤰᤛᤡᤰ ᤏᤧᤛ᤻ᤛᤧᤖᤥ॥

ᤌᤠᤱᤃᤧᤳ ᤗᤧᤵᤔᤠᤱᤒᤠ ᤕᤶᤒᤠ ᤗᤠᤶᤎᤣᤳ

²⁰ ᤂᤧᤒᤩᤠᤱ ᤂᤢᤏᤧ᤹ ᤗᤠᤁᤠᤳᤐᤠ ᤗᤰᤂᤢᤶ ᤗᤧᤵᤔᤠᤱ ᤁᤧᤒᤣ᤺ᤰᤐᤠ. ᤌᤠᤱᤃᤧᤳ ᤗᤧᤵᤔᤠᤱᤒᤠ ᤕᤶᤒᤠ ᤗᤠᤶᤎᤣ᤺ᤵᤐᤠᤴ ᤛᤡ᤺ᤰᤋᤢ॥

²¹ ᤁᤵᤔᤥᤀᤠᤱ ᤛᤢᤶᤛᤡ ᤛᤢᤶᤛᤡ ᤏᤠᤜᤠᤱ ᤁᤳᤏᤠᤜᤠᤱ ᤁᤶᤒᤪᤠᤱ ᤕᤧᤵᤏᤠ ᤕᤠᤰᤑᤠᤱᤜᤠ᤹. ᤁᤧᤛᤧᤶᤒᤠ ᤁᤧᤕᤧᤵᤐᤠ ᤆᤶᤒᤧᤳ ᤆᤶᤒᤧᤳ ᤁᤧᤗ᤺ᤶᤒᤠ ᤗᤢᤱᤎᤠᤰᤜᤠ᤹ ᤏᤢ ᤛᤡᤃᤠᤱ ᤗᤠ᤺ᤵᤔᤠ ᤗᤳᤇᤠ ᤕᤠᤰᤑᤠᤱ ᤏᤧᤛ᤻ᤛᤧ॥ ᤂᤧᤴ ᤁᤶᤒᤪᤠᤱ ᤕᤧᤵᤏᤠ ᤕᤠᤰᤑᤠᤱᤜᤠ᤹ ᤏᤢ ᤗᤢᤱᤎᤠᤰᤜᤠ᤹ ᤜᤧᤰᤁᤩᤠᤱ ᤀᤠ᤺ᤶᤓᤥ᤺ᤸᤗᤧ ᤁᤧᤖᤧᤰ ᤁᤢᤓᤧᤖᤧ ᤁᤢᤗᤠᤶᤋᤡᤜᤠ᤹ ᤂᤧᤴ ᤏᤠᤱᤃᤧᤴ ᤐᤡᤛᤠᤱᤒᤠ ᤕᤶᤒᤠ ᤗᤠᤶᤎᤣ᤺ᤵᤐᤥ ᤁᤧᤏᤧᤒᤠᤜᤠ᤹ᤏᤢ ᤁᤢᤍᤱᤒᤠ ᤆᤥᤃᤧ॥ ᤕᤶᤒᤠ ᤗᤠᤶᤎᤣ᤺ᤳᤋᤥ ᤅᤠᤒᤥᤱ ᤜᤢᤰᤛᤡᤰ ᤁᤢᤗᤠᤶᤋᤡ ᤏᤢ ᤏᤡᤒᤥ᤺ᤅᤠᤱ ᤅᤠᤛᤡ ᤜᤢᤰᤛᤡᤰ ᤁᤧᤓᤧᤖᤧ ᤏᤧᤛ᤻ᤛᤧ॥

²² ᤆᤡᤓᤡ᤹ᤑᤡ᤹ᤒᤠ ᤁᤢᤜᤱᤜᤠ᤹. ᤛᤡᤃᤠᤱ ᤗᤠ᤺ᤵᤔᤠ ᤀᤠ᤺ᤶᤓᤥᤴ ᤏᤢ ᤂᤧᤒᤰᤛᤡᤱ ᤁᤢᤓᤢᤱ ᤔᤧᤗᤰᤋᤢᤒᤠᤜᤠ᤹ ᤏᤠᤱᤃᤧᤴ ᤗᤧᤵᤔᤠᤱᤒᤠ ᤕᤶᤒᤠ ᤗᤠᤶᤎᤣ᤺ᤳᤋᤥᤒᤠᤜᤠ᤹ᤏᤢ ᤁᤢᤍᤱᤒᤠ ᤆᤥᤃᤧ॥ ᤛᤡᤃᤠᤱ ᤗᤠ᤺ᤵᤔᤠ ᤕᤶᤒᤠ ᤗᤠᤶᤎᤣ᤺ᤳᤋᤥ ᤁᤧᤵᤔᤠᤖᤧ ᤗᤠᤃᤡ ᤂᤧᤵᤔᤥ ᤏᤢᤛᤡ ᤏᤠᤜᤠᤱᤛᤣ᤺ᤰᤜᤠ᤹ ᤐᤳᤇᤧ. ᤕᤶᤒᤠ ᤗᤠᤶᤎᤣᤳ ᤀᤣᤃᤠᤱ ᤗᤧᤵᤔᤠᤱᤒᤠ ᤀᤠ᤺ᤶᤓᤥᤴ ᤗᤰᤂᤢᤶᤔᤡᤸᤗᤧ ᤁᤢᤏᤢᤵᤔᤠ ᤐᤡᤛᤠᤱ ᤁᤧᤜᤡᤛᤡᤱᤒᤠ ᤆᤥᤃᤧ॥

²³ ᤏᤠᤱᤃᤧᤴ ᤗᤧᤵᤔᤠᤱ ᤁᤧᤏᤧᤒᤠ ᤁᤢᤀᤡᤛᤡᤰ. ᤁᤴ ᤌᤠᤱᤃᤧᤳ ᤗᤧᤵᤔᤠᤱ. ᤁᤴ ᤗᤠᤁᤠᤳᤐᤠ ᤕᤶᤒᤠ ᤗᤠᤶᤎᤣ᤺ᤳᤋᤡᤸᤗᤧ ᤁᤢᤍᤥ᤺ᤵᤔᤠ ᤛᤡᤃᤠᤱᤒᤠ ᤗᤰᤂᤢᤶ ᤌᤠᤖᤡᤰ ᤀᤠᤃᤧᤳᤃᤧᤵᤐᤠ ᤂᤧᤵᤔᤥ ᤘᤣ᤹ ᤗᤳᤇᤠ ᤕᤶᤒᤠ ᤗᤠᤶᤎᤣᤳ ᤏᤧᤛ᤻ᤛᤧ॥ ᤁᤴ ᤏᤧᤳᤇᤡ ᤕᤶᤒᤠ ᤗᤠᤶᤎᤣ᤺ᤳᤜᤠ᤹ᤖᤧ ᤁᤢᤗᤢᤶᤔᤥᤒᤠ ᤔᤠ᤺ᤱᤗᤡᤰᤁᤡᤴ ᤁᤡᤵ ᤌᤡᤰ ᤜᤢᤰᤛᤡᤰ ᤏᤧᤛ᤻ᤛᤧᤖᤥ॥

ᤗᤠᤱᤃᤧᤳ ᤗᤧᤵᤔᤠᤱᤒᤠ ᤕᤶᤒᤠ ᤗᤠᤶᤎᤣᤳ

²⁴ ᤂᤧᤒᤩᤠᤱ ᤂᤧᤴ ᤔᤏᤠ᤺ᤸᤗᤧ ᤀᤠᤱᤃᤠ᤹ ᤗᤠᤱᤃᤧᤳ ᤗᤧᤵᤔᤠᤱᤒᤠ ᤕᤶᤒᤠ ᤗᤠᤶᤎᤣᤳ ᤁᤧᤖᤧᤰ ᤐᤡᤛᤠᤱ ᤋᤣ᤹ᤖᤠᤱ ᤜᤧᤰᤁᤩᤠᤱ ᤂᤢᤏᤧ᤹ ᤗᤠᤶᤎᤣᤳ ᤛᤡᤳᤗᤠᤱᤜᤠ᤹ ᤏᤢ ᤀᤠ᤺ᤶᤓᤥᤴ ᤛᤡ᤺ᤰᤋᤢᤸᤗᤧ ᤘᤣ᤹ᤜᤠ᤹ ᤜᤧᤰᤁᤣᤀᤣ ᤀᤠᤳᤋᤡᤀᤠᤱ ᤔᤧᤶᤒᤣ᤺ᤰᤁᤣ ᤁᤢᤍᤱᤒᤠ ᤏᤧᤛ᤻ᤛᤧ॥

²⁵ ᤁᤵᤔᤥ ᤘᤣ᤹ᤜᤠ᤹ᤀᤥ ᤐᤳᤇᤧᤒᤠ ᤁᤢᤀᤡᤛᤡᤰ ᤗᤢᤱᤎᤠᤰᤜᤠ᤹ᤏᤢ ᤛᤥᤛᤥᤖᤡᤰ ᤆᤡᤓᤡ᤹ᤑᤡ᤹ᤒᤠ ᤁᤢᤜᤱᤜᤠ᤹ ᤐᤳᤇᤧ ᤜᤧᤰᤁᤩᤠᤱ ᤀᤠ᤺ᤶᤓᤥ ᤏᤧᤛ᤻ᤛᤧ॥ ᤕᤶᤒᤠ ᤗᤠᤶᤎᤣ᤺ᤳᤋᤥ ᤅᤠᤒᤥᤱ ᤜᤢᤰᤛᤡᤰ ᤁᤢᤗᤠᤶᤋᤡ ᤏᤢ ᤅᤠᤒᤥᤱᤅᤠᤱ ᤅᤠᤛᤡ ᤜᤢᤰᤛᤡᤰ ᤁᤧᤓᤧᤖᤧ ᤏᤧᤛ᤻ᤛᤧ॥

²⁶ ᤁᤴ ᤕᤶᤒᤠ ᤗᤠᤶᤎᤣ᤺ᤳᤋᤥᤀᤠᤱ ᤁᤵᤔᤥ ᤗᤠ᤺ᤵᤔᤠᤖᤧ ᤗᤠᤃᤡ ᤏᤢᤛᤡ ᤏᤠᤜᤠᤱᤛᤣ᤺ᤰᤜᤠ᤹ ᤁᤧᤒᤵᤐᤠ ᤗᤳᤇᤠ ᤌᤒᤣ᤺ᤳ ᤕᤧᤒᤧ. ᤜᤧᤰᤁᤩᤠᤱ ᤛᤡᤃᤠᤱ ᤗᤧᤵᤔᤠᤱᤒᤠ ᤁᤢᤏᤢᤵᤔᤥ ᤗᤳᤇᤠ ᤛᤡᤃᤠᤱ ᤗᤠ᤺ᤵᤔᤠ ᤀᤠ᤺ᤶᤓᤥ᤹ ᤏᤧᤛ᤻ᤛᤧ. ᤜᤧᤰᤁᤩᤠᤱ ᤁᤢᤗᤢᤶᤔᤥ ᤁᤢᤗᤢᤶᤔᤥ ᤁᤧᤛᤧᤶᤒᤠ ᤁᤧᤕᤧᤵᤐᤠ ᤆᤶᤒᤧᤳ ᤆᤶᤒᤧᤳ ᤁᤧᤗ᤺ᤶᤒᤠ ᤏᤧᤵᤔᤠᤱ ᤐᤡᤛᤠᤱᤒᤠ ᤗᤢᤱᤎᤠᤰᤜᤠ᤹ᤖᤧ ᤁᤢᤕᤠᤶᤗᤧᤱᤒᤠᤜᤠ᤹ᤀᤥ ᤂᤧᤒᤰᤛᤡᤱᤜᤠ᤹ ᤁᤢᤓᤢᤱ ᤔᤧᤗᤰᤋᤢᤀᤠᤱ ᤐᤳᤇᤧ॥

²⁷ ᤛᤡᤃᤠᤱ ᤗᤧᤵᤔᤠᤱᤒᤠ ᤗᤰᤂᤢᤶᤔᤥᤀᤠᤱ ᤗᤠᤱᤃᤧᤳ ᤗᤧᤵᤔᤠᤱ ᤁᤧᤜᤡᤛᤡᤱᤒᤠ ᤕᤶᤒᤠ ᤗᤠᤶᤎᤣᤳ ᤌᤡᤰ ᤕᤧᤒᤧ॥ ᤂᤢᤏᤧ᤹ ᤂᤧᤴ ᤏᤧᤳᤇᤡ ᤕᤶᤒᤠ ᤗᤠᤶᤎᤣ᤺ᤳᤜᤠ᤹ᤖᤧ ᤁᤢᤗᤢᤶᤔᤥᤒᤠ ᤔᤠ᤺ᤱᤄᤠ᤺ᤴ ᤛᤡ᤺ᤰᤋᤢᤸᤗᤧ ᤁᤡᤵ ᤌᤡᤰ ᤜᤢᤰᤛᤡᤰ ᤏᤧᤛ᤻ᤛᤧᤖᤥ॥

ᤛᤡᤃᤠᤱ ᤗᤰᤂᤢᤶᤔᤥᤒᤠ ᤗᤠᤶᤎᤣᤳ

²⁸ ᤂᤧᤒᤩᤠᤱ ᤂᤧᤴ ᤔᤏᤠ᤺ᤸᤗᤧ ᤀᤠᤱᤃᤠ᤹ ᤗᤠᤱᤃᤧᤳ ᤗᤧᤵᤔᤠᤱᤒᤠ ᤕᤶᤒᤠ ᤗᤠᤶᤎᤣ᤺ᤵᤐᤥᤗᤠᤶ ᤛᤡᤃᤠᤱᤒᤠ ᤗᤰᤂᤢᤶᤔᤥ ᤋᤣ᤹ᤖᤠᤱ॥ ᤂᤢᤏᤧ᤹ ᤁᤴ ᤕᤶᤒᤠ ᤗᤠᤶᤎᤣ᤺ᤳᤋᤡᤴ ᤛᤡ᤺ᤰᤋᤢ. ᤜᤧᤰᤁᤩᤠᤱ ᤘᤣ᤹ ᤕᤶᤒᤠ ᤗᤠᤶᤎᤣ᤺ᤳᤜᤠ᤹ ᤁᤢᤀᤡᤛᤡᤰ ᤁᤴ ᤁᤢᤍᤱᤒᤠ ᤁᤢᤗᤠᤶᤋᤡ ᤏᤢ ᤁᤢᤓᤧᤖᤧ ᤁᤧᤏᤧᤒᤠ ᤆᤥᤃᤧ॥

²⁹ ᤁᤵᤔᤥᤒᤠ ᤁᤶᤒᤪᤠᤱ ᤕᤧᤵᤏᤠ ᤕᤠᤰᤑᤠᤱᤜᤠ᤹. ᤁᤢᤗᤢᤶᤔᤥ ᤁᤢᤗᤢᤶᤔᤥ ᤁᤧᤛᤧᤶᤒᤠ ᤁᤧᤕᤧᤵᤐᤠ ᤆᤶᤒᤧᤳ ᤆᤶᤒᤧᤳ ᤁᤧᤗ᤺ᤶᤒᤠ ᤗᤢᤱᤎᤠᤰᤜᤠ᤹ ᤏᤢ ᤀᤠ᤺ᤶᤓᤥᤴ ᤂᤧᤴ ᤘᤣ᤹ᤜᤠ᤹ ᤁᤢᤀᤡᤛᤡᤰ ᤁᤢᤍᤱᤒᤠ ᤁᤢᤗᤠᤶᤋᤡ ᤁᤢᤓᤧᤖᤧ ᤏᤧᤛ᤻ᤛᤧ॥ ᤁᤵᤔᤥᤀᤠᤱ ᤛᤥᤛᤥᤖᤡᤰ ᤗᤢᤱᤎᤠᤰᤜᤠ᤹ ᤏᤢ ᤛᤡᤃᤠᤱ ᤗᤠ᤺ᤵᤔᤠ ᤕᤠᤰᤑᤠᤱᤅᤥ ᤆᤡᤓᤡ᤹ᤑᤡ᤹ᤒᤠ ᤁᤢᤜᤱᤜᤠ᤹ ᤐᤳᤇᤧ॥ ᤂᤶᤓᤩᤠᤱ ᤘᤣ᤹ᤜᤠ᤹ ᤁᤢᤀᤡᤛᤡᤰ. ᤕᤶᤒᤠ ᤗᤠᤶᤎᤣᤳ ᤗᤧᤵᤔᤠᤱ ᤐᤣ᤺ᤰᤔᤠ ᤗᤠ᤺ᤵᤔᤠ ᤀᤠ᤺ᤶᤓᤥᤴ ᤅᤠᤒᤥᤱ ᤜᤢᤰᤛᤡᤰ ᤁᤣ᤺ᤶᤒᤠ ᤁᤢᤗᤠᤶᤋᤡ ᤏᤢ ᤏᤡᤒᤥᤱᤅᤠᤱ ᤅᤠᤛᤡ ᤜᤢᤰᤛᤡᤰ ᤁᤢᤓᤧᤖᤧ ᤏᤧᤛ᤻ᤛᤧ॥

³⁰ (ᤛᤡᤃᤠᤱ ᤗᤧᤵᤔᤠᤱᤒᤠ ᤗᤰᤂᤢᤶᤔᤥ ᤁᤧᤒᤣ᤺ᤰᤐᤠ ᤕᤶᤒᤠ ᤗᤠᤶᤎᤣ᤺ᤳᤜᤠ᤹ᤀᤥᤒᤠ ᤛᤡᤃᤠᤱ ᤗᤠ᤺ᤵᤔᤠ ᤕᤠᤰᤑᤠᤱᤜᤠ᤹ ᤏᤡᤒᤥᤱᤅᤠᤱ ᤅᤠᤛᤡ ᤜᤢᤰᤛᤡᤰ ᤁᤢᤓᤧᤖᤧ ᤏᤢ ᤜᤢᤰᤛᤡᤰ ᤅᤠᤛᤡ ᤏᤠᤏᤠᤰ ᤐᤠᤰᤗᤢᤶ ᤁᤧᤗᤠ᤺ᤵᤐᤠ ᤏᤧᤛ᤻ᤛᤧ॥)

³¹ ᤗᤠᤱᤃᤧᤳ ᤐᤡᤛᤠᤱᤒᤠ ᤕᤶᤒᤠ ᤗᤠᤶᤎᤣ᤺ᤳᤋᤥᤒᤠ ᤛᤡᤃᤠᤱ ᤗᤠ᤺ᤵᤔᤠ ᤀᤠ᤺ᤶᤓᤥ᤺ᤸᤗᤧ ᤗᤠᤁᤠᤳᤐᤠ ᤗᤰᤂᤢᤶᤔᤡᤴ ᤋᤰᤔᤧᤳᤋᤢᤀᤠᤱ ᤏᤧᤛ᤻ᤛᤧ॥ ᤁᤵᤔᤥᤒᤠ ᤗᤠᤶᤎᤣᤳ ᤛᤡᤳᤗᤠᤱᤜᤠ᤹ᤀᤥ ᤂᤧᤒᤰᤛᤡᤱᤜᤠ᤹ ᤁᤢᤓᤢᤱ ᤔᤧᤗᤰᤋᤢᤀᤠᤱ ᤐᤳᤇᤧ. ᤜᤧᤰᤁᤩᤠᤱ ᤁᤵᤔᤥᤒᤠ ᤛᤡᤃᤠᤱᤒᤠ ᤗᤠᤶᤎᤣ᤺ᤳᤋᤥ ᤁᤧᤵᤔᤠᤖᤧ ᤗᤠᤃᤡ ᤕᤧᤳᤇᤡ ᤏᤠᤜᤠᤱᤛᤣ᤺ᤰᤜᤠ᤹ ᤐᤳᤇᤧᤖᤥ॥

³² ᤂᤧᤒᤩᤠᤱ ᤂᤢᤏᤧ᤹ ᤀᤠᤱᤃᤠ᤹ ᤏᤠᤱᤃᤧᤴ ᤐᤡᤛᤠᤱᤒᤠ ᤕᤶᤒᤠ ᤗᤠᤶᤎᤣ᤺ᤳᤋᤥᤗᤠᤶ ᤛᤡᤃᤠᤱ ᤗᤰᤂᤢᤶᤔᤥ ᤋᤠᤖᤠᤱ॥ ᤜᤧᤰᤁᤩᤠᤱ ᤂᤢᤏᤧ᤹ ᤁᤴ ᤕᤶᤒᤠ ᤗᤠᤶᤎᤣ᤺ᤳᤋᤡᤴ ᤛᤡ᤺ᤰᤋᤢ. ᤜᤧᤰᤁᤩᤠᤱ ᤘᤣ᤹ ᤕᤶᤒᤠ ᤗᤠᤶᤎᤣ᤺ᤳᤜᤠ᤹ᤏᤢ ᤁᤢᤍᤱᤒᤠ ᤁᤸᤗᤧ ᤁᤢᤗᤠᤶᤋᤡ ᤏᤢ ᤁᤢᤓᤧᤖᤧ ᤏᤧᤛ᤻ᤛᤧ॥

³³ ᤁᤵᤔᤥᤒᤠ ᤁᤶᤒᤪᤠᤱ ᤕᤧᤵᤏᤠ ᤕᤠᤰᤑᤠᤱᤜᤠ᤹. ᤁᤢᤗᤢᤶᤔᤥ ᤁᤢᤗᤢᤶᤔᤥ ᤁᤧᤛᤧᤶᤒᤠ ᤁᤧᤕᤧᤵᤐᤠ ᤆᤶᤒᤧᤳ ᤆᤶᤒᤧᤳ ᤁᤧᤗ᤺ᤶᤒᤠ ᤗᤢᤱᤎᤠᤰᤜᤠ᤹ ᤏᤢ ᤛᤡᤃᤠᤱ ᤗᤠ᤺ᤵᤔᤠ ᤀᤠ᤺ᤶᤓᤥᤴ ᤂᤧᤴ ᤘᤣ᤹ᤜᤠ᤹ ᤁᤢᤀᤡᤛᤡᤰ ᤁᤢᤍᤱᤒᤠ ᤁᤢᤗᤠᤶᤋᤡ ᤁᤢᤓᤧᤖᤧ ᤏᤧᤛ᤻ᤛᤧ. ᤜᤧᤰᤁᤩᤠᤱ ᤂᤧᤵᤔᤥ ᤗᤢᤱᤎᤠᤰᤜᤠ᤹ᤀᤥ ᤏᤢ ᤛᤡᤃᤠᤱ ᤗᤠ᤺ᤵᤔᤠ ᤕᤠᤰᤑᤠᤱᤅᤥ ᤆᤡᤓᤡ᤹ᤑᤡ᤹ᤒᤠ ᤁᤢᤜᤱᤜᤠ᤹ ᤐᤳᤇᤧ॥ ᤕᤶᤒᤠ ᤗᤠᤶᤎᤣ᤺ᤳᤋᤥᤒᤠ ᤐᤣ᤺ᤰᤔᤠ ᤗᤠ᤺ᤵᤐᤠ ᤀᤠ᤺ᤶᤓᤥᤴ ᤛᤡ᤺ᤰᤋᤢᤸᤗᤧ ᤁᤸᤗᤧ ᤅᤠᤒᤥᤱ ᤜᤢᤰᤛᤡᤰ ᤁᤣ᤺ᤶᤒᤠ ᤁᤢᤗᤠᤶᤋᤡ ᤏᤢ ᤏᤡᤒᤥᤱᤅᤠᤱ ᤅᤠᤛᤡ ᤜᤢᤰᤛᤡᤰ ᤁᤢᤓᤧᤖᤧ ᤏᤧᤛ᤻ᤛᤧ॥

³⁴ ᤁᤵᤔᤥᤒᤠ ᤛᤡᤃᤠᤱ ᤗᤠ᤺ᤵᤔᤠ ᤀᤠ᤺ᤶᤓᤥᤴ ᤗᤠᤁᤠᤳᤐᤠ ᤗᤰᤂᤢᤶ ᤗᤧᤵᤔᤠᤱ ᤋᤰᤁᤧᤔᤧᤵᤐᤠ ᤏᤧᤛ᤻ᤛᤧ॥ ᤁᤵᤔᤥ ᤗᤠᤶᤎᤣᤳ ᤛᤡᤳᤗᤠᤱᤜᤠ᤹ᤀᤥ ᤂᤧᤒᤰᤛᤡᤱᤜᤠ᤹ ᤁᤢᤓᤢᤱ ᤔᤧᤗᤰᤋᤢᤀᤠᤱ ᤐᤳᤇᤧ. ᤜᤧᤰᤁᤩᤠᤱ ᤁᤵᤔᤥ ᤛᤡᤃᤠᤱᤒᤠ ᤗᤠᤶᤎᤣ᤺ᤳᤋᤥ ᤁᤧᤵᤔᤠᤖᤧ ᤗᤠᤃᤡ ᤕᤧᤳᤇᤡ ᤏᤠᤜᤠᤱᤛᤣ᤺ᤰᤜᤠ᤹ ᤐᤳᤇᤧᤖᤥ॥

³⁵ ᤂᤧᤒᤩᤠᤱ ᤂᤢᤏᤧ᤹ ᤀᤠᤱᤃᤠ᤹ ᤛᤡᤃᤠᤱ ᤗᤧᤵᤔᤠᤱᤒᤠ ᤗᤰᤂᤢᤶᤔᤥ ᤁᤧᤒᤣ᤺ᤰᤐᤠ ᤌᤠᤱᤃᤧᤳ ᤗᤧᤵᤔᤠᤱᤒᤠ ᤕᤶᤒᤠ ᤗᤠᤶᤎᤣᤳ ᤁᤧᤖᤧᤰ ᤐᤡᤛᤠᤱ ᤋᤣ᤹ᤖᤠᤱ॥ ᤂᤢᤏᤧ᤹ ᤁᤴ ᤛᤡ᤺ᤰᤋᤢ. ᤜᤧᤰᤁᤩᤠᤱ ᤘᤣ᤹ ᤕᤶᤒᤠ ᤗᤠᤶᤎᤣ᤺ᤳᤜᤠ᤹ ᤁᤢᤀᤡᤛᤡᤰ ᤁᤴ ᤁᤢᤍᤱᤒᤠ ᤁᤢᤗᤠᤶᤋᤡ ᤏᤢ ᤁᤢᤓᤧᤖᤧ ᤏᤧᤛ᤻ᤛᤧ॥

³⁶ ᤁᤶᤒᤪᤠᤱ ᤕᤧᤵᤏᤠ ᤕᤠᤰᤑᤠᤱᤜᤠ᤹. ᤁᤢᤗᤢᤶᤔᤥ ᤁᤢᤗᤢᤶᤔᤥ ᤆᤶᤒᤧᤳ ᤆᤶᤒᤧᤳ ᤁᤧᤛᤧᤶᤒᤠ ᤁᤧᤕᤧᤵᤐᤠ ᤗᤢᤱᤎᤠᤰᤜᤠ᤹. ᤜᤧᤰᤁᤩᤠᤱ ᤁᤴ ᤕᤶᤒᤠ ᤗᤠᤶᤎᤣ᤺ᤳᤋᤥᤒᤠ ᤀᤠ᤺ᤶᤓᤥᤴ ᤏᤢ ᤘᤣ᤹ᤜᤠ᤹ᤀᤥ ᤁᤢᤀᤡᤛᤡᤰ ᤁᤧᤖᤧᤰ ᤐᤡᤛᤠᤱ ᤁᤧᤒᤵᤐᤠ ᤆᤡᤓᤡ᤹ᤑᤡ᤹ᤒᤠ ᤁᤢᤜᤱᤜᤠ᤹ᤖᤧ ᤁᤢᤗᤠᤶᤋᤡ ᤁᤢᤓᤧᤖᤧᤜᤠ᤹ ᤁᤢᤍᤱᤒᤠ ᤆᤥᤃᤧ॥ ᤕᤶᤒᤠ ᤗᤠᤶᤎᤣ᤺ᤳᤋᤥ ᤗᤠ᤺ᤵᤔᤠ ᤐᤣ᤺ᤰᤔᤠ ᤀᤠ᤺ᤶᤓᤥᤴ ᤅᤠᤒᤥᤱ ᤜᤢᤰᤛᤡᤰ ᤁᤣ᤺ᤶᤒᤠ ᤁᤢᤗᤠᤶᤋᤡ ᤏᤢ ᤏᤡᤒᤥᤱᤅᤠᤱ ᤅᤠᤛᤡ ᤜᤢᤰᤛᤡᤰ ᤁᤢᤓᤧᤖᤧ ᤏᤧᤛ᤻ᤛᤧ॥

³⁷ ᤁᤵᤔᤥᤒᤠ ᤛᤡᤃᤠᤱ ᤗᤠ᤺ᤵᤔᤠ ᤀᤠ᤺ᤶᤓᤥᤴ ᤗᤠ᤺ᤰᤁᤠᤳ ᤗᤰᤂᤢᤶᤔᤡᤴ ᤋᤰᤁᤧᤔᤧᤵᤐᤠ ᤏᤧᤛ᤻ᤛᤧ. ᤜᤧᤰᤁᤩᤠᤱ ᤗᤠᤶᤎᤣᤳ ᤛᤡᤳᤗᤠᤱᤜᤠ᤹ᤀᤥ ᤂᤧᤒᤰᤛᤡᤱᤜᤠ᤹ ᤁᤢᤓᤢᤱ ᤔᤧᤗᤰᤋᤢᤀᤠᤱ ᤐᤳᤇᤧ॥ ᤁᤵᤔᤥᤒᤠ ᤛᤡᤃᤠᤱᤒᤠ ᤗᤠᤶᤎᤣ᤺ᤳᤋᤥ ᤁᤧᤵᤔᤠᤖᤧ ᤗᤠᤃᤡ ᤕᤧᤳᤇᤡ ᤏᤠᤜᤠᤱᤛᤣ᤺ᤰᤜᤠ᤹ ᤐᤳᤇᤧᤖᤥ॥

ᤛᤡᤍᤢᤱᤈᤓᤠ ᤕᤠᤖᤡᤵ ᤆᤥ᤺ᤰᤔᤠ ᤕᤠᤰᤑᤠᤱᤜᤠ᤹

³⁸ ᤛᤡᤃᤠᤱᤒᤠ ᤕᤶᤒᤠ ᤗᤳᤇᤠ ᤗᤠᤶᤎᤣ᤺ᤳᤜᤠ᤹ ᤌᤰᤔᤠ ᤀᤠ᤺ᤶᤓᤥ᤹ᤀᤥᤗᤠᤶ ᤁᤢᤕᤠᤀᤥᤒᤠ ᤕᤠᤰᤑᤠᤱᤅᤥ ᤗᤠ᤺ᤵᤔᤠ ᤗᤳᤇᤠ ᤗᤠᤶᤎᤣᤳ ᤐᤳᤇᤧ. ᤂᤧᤵᤔᤥ ᤛᤡᤍᤢᤱᤈᤓᤠ ᤔᤧᤍᤥᤴᤍᤢᤛᤡᤒᤠ ᤛᤠᤜᤠ᤹ ᤘᤠᤔᤧᤜᤵᤋᤢ॥

³⁹ ᤁᤴ ᤛᤡᤃᤠᤱ ᤗᤠ᤺ᤵᤔᤠ ᤀᤠ᤺ᤶᤓᤥ᤹ᤀᤥ ᤏᤧᤵᤔᤠᤱ ᤁᤢᤕᤠᤀᤥ ᤏᤧᤳᤇᤡ ᤏᤧᤳᤇᤡ ᤆᤵᤋᤧᤴᤜᤠ᤹ ᤕᤢᤅᤧ. ᤂᤧᤵᤔᤥ ᤔᤡᤎᤡᤱᤔᤏᤠᤍᤣ᤺ᤶᤏᤠᤒᤠ ᤛᤡᤍᤢᤱᤈᤓᤠᤜᤠ᤹. ᤛᤢᤳᤌᤥ ᤐᤥᤱᤔᤠ ᤘᤠᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ ᤏᤢ ᤀᤠᤵᤋᤡᤰᤗᤠᤶ ᤗᤧᤵᤔᤡ ᤂᤥᤔᤠ ᤘᤠᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ᤖᤧ ᤗᤠᤃᤡ ᤔᤧᤍᤥᤴᤍᤢᤛᤡᤒᤠ ᤌᤰᤛᤠᤜᤠ᤹ ᤔᤧᤛᤧᤖᤢᤛᤡ॥

⁴⁰ ᤀᤠ᤺ᤶᤓᤥ᤹ᤀᤥᤒᤠ ᤗᤠ᤺ᤰᤁᤠᤳ ᤗᤰᤂᤢᤶᤔᤡᤸᤗᤧ ᤁᤢᤕᤠ ᤗᤧᤵᤔᤠᤱ. ᤌᤠᤱᤃᤧᤳ ᤗᤧᤵᤔᤠᤱᤒᤠ ᤕᤶᤒᤠ ᤗᤠᤶᤎᤣ᤺ᤳᤋᤥ ᤗᤠ᤺ᤵᤔᤠ ᤏᤠᤜᤠᤱᤛᤣ᤺ᤰᤜᤠ᤹ᤖᤧ ᤁᤢᤒᤣᤛᤠᤱ ᤏᤧᤳᤇᤡ ᤆᤵᤋᤧᤴᤜᤠ᤹ ᤕᤢᤅᤧ. ᤜᤧᤰᤁᤩᤠᤱ ᤏᤠᤜᤠᤱᤛᤣ᤺ᤰᤜᤠ᤹ᤖᤧ ᤘᤣ᤹ ᤗᤧᤵᤔᤠᤱ ᤏᤧᤳᤇᤡ ᤆᤵᤋᤧᤴ ᤕᤢᤅᤧ॥

⁴¹ ᤜᤧᤰᤁᤣᤗ᤹ᤖᤡᤰ ᤂᤧᤵᤔᤥ ᤛᤡᤃᤠᤱ ᤗᤠ᤺ᤶᤔᤠ ᤗᤠᤶᤎᤣ᤺ᤳᤋᤡᤸᤗᤧ ᤁᤢᤕᤠᤀᤥ ᤗᤡᤛᤡ ᤆᤵᤋᤧᤴᤜᤠ᤹ ᤕᤢᤅᤧ ᤜᤧᤰᤁᤩᤠᤱ ᤘᤣ᤹ ᤗᤧᤵᤔᤠᤱ ᤗᤡᤛᤡ ᤆᤵᤋᤧᤴᤜᤠ᤹ ᤕᤢᤅᤧ. ᤁᤧᤖᤧᤰᤗᤧ ᤕᤧᤳᤇᤡ ᤆᤵᤋᤧᤴᤜᤠ᤹ ᤕᤢᤅᤧ. ᤂᤧᤵᤔᤥ ᤛᤡᤍᤢᤱᤈᤓᤠ ᤌᤰᤛᤠᤜᤠ᤹ ᤔᤧᤈᤧᤵᤋᤢ ᤔᤧᤛᤧᤖᤢᤛᤡ॥

⁴² ᤂᤧᤵᤔᤥ ᤔᤡᤎᤡᤱᤔᤏᤠᤍᤣ᤺ᤶᤏᤠᤒᤠ ᤛᤡᤍᤢᤱᤈᤓᤠ᤺ᤸᤗᤧ ᤗᤠᤃᤡ ᤘᤖᤧᤱᤗᤧᤱ ᤔᤧᤄᤰᤋᤢᤒᤠ ᤗᤢᤱᤅᤡᤸᤗᤧᤴ ᤗᤡᤛᤡ ᤆᤵᤋᤧᤴᤜᤠ᤹ᤀᤠᤱ ᤕᤢᤅᤧ. ᤁᤧᤖᤧᤰ ᤜᤢᤰᤛᤡᤰ ᤌᤡᤰᤁᤠᤱ ᤁᤢᤓᤪᤧ᤺ᤱ ᤁᤣ᤺ᤶᤒᤠ ᤁᤢᤗᤠᤶᤋᤡ. ᤜᤢᤰᤛᤡᤰ ᤌᤡᤰᤁᤠᤱ ᤁᤢᤓᤪᤧ᤺ᤱ ᤁᤢᤓᤧᤖᤧ ᤏᤢ ᤜᤢᤰᤛᤡᤰᤌᤡᤰ ᤁᤢᤗᤡᤱᤃᤧᤴ ᤁᤣ᤺ᤶᤒᤠ ᤆᤥᤃᤧ॥ ᤂᤧᤴ ᤆᤵᤋᤧᤴᤜᤠ᤹ᤀᤥ ᤔᤡᤎᤡᤱᤔᤏᤠᤍᤣ᤺ᤶᤏᤠᤒᤠ ᤛᤡᤍᤢᤱᤈᤓᤠᤜᤠ᤹ ᤏᤢ ᤘᤣ᤹ ᤘᤕᤠᤃᤧᤴ ᤛᤡᤍᤢᤱᤈᤓᤠᤜᤠ᤹ᤖᤧ ᤗᤠᤃᤡ ᤛᤠᤔᤠᤜᤠ᤹ ᤔᤧᤕᤢᤰᤂᤢᤛᤡᤀᤠᤱ ᤕᤢᤅᤧ॥

⁴³ ᤂᤶᤓᤩᤠᤱ ᤁᤧᤖᤧᤰ ᤜᤢᤰᤋᤠᤵᤐᤣ᤹ ᤌᤡᤰ ᤕᤠᤖᤡᤰ ᤁᤢᤓᤧᤖᤧ ᤁᤧᤒᤵᤐᤠ ᤏᤧᤳᤇᤡ ᤜᤠᤛᤶᤛᤶᤒᤠ ᤁᤢᤛᤶ ᤁᤧᤒᤵᤐᤠ ᤀ᤺ᤰᤂᤢᤖᤡᤜᤠ᤹ ᤗᤢᤱᤎᤠᤰᤁᤥ ᤁᤧᤖᤧᤰ ᤐᤡᤛᤠᤱ ᤔᤧᤓᤳᤇᤢᤀᤠᤱ ᤐᤳᤇᤧ॥ ᤆᤵᤋᤧᤴᤜᤠ᤹ ᤛᤡᤍᤢᤱᤈᤓᤠ ᤔᤧᤍᤥᤴᤍᤢᤛᤡᤒᤠ ᤛᤠᤜᤠ᤹ᤖᤧ ᤗᤠᤃᤡ ᤕᤢᤅᤧᤖᤥ॥

ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧᤴ ᤕᤠᤰᤑᤠᤱ

⁴⁴ ᤛᤡᤃᤠᤱᤒᤠ ᤕᤶᤒᤠ ᤗᤠᤶᤎᤣ᤺ᤳᤋᤡᤸᤗᤧ ᤗᤠ᤺ᤰᤁᤠᤳ ᤗᤧᤵᤔᤠᤱ. ᤛᤡᤃᤠᤱ ᤗᤰᤂᤢᤶᤔᤥ ᤕᤠᤰᤑᤠᤱ ᤏᤧᤳᤇᤡ ᤏᤧᤛ᤻ᤛᤧ॥ ᤗᤳᤇᤠ ᤕᤠᤰᤑᤠᤱ ᤌᤠᤱᤃᤧᤳ ᤗᤧᤵᤔᤠᤱᤒᤠ ᤁᤧᤜᤡᤛᤡᤱᤒᤠ ᤆᤥᤃᤧ. ᤜᤧᤰᤁᤩᤠᤱ ᤘᤣ᤹ᤀᤡᤴ ᤗᤠᤱᤃᤧᤳ ᤗᤧᤵᤔᤠᤱᤒᤠ ᤕᤶᤒᤠ ᤗᤠᤶᤎᤣ᤺ᤳᤋᤡᤸᤗᤧ ᤁᤢᤒᤣᤛᤠᤱ ᤌᤠᤱᤗᤧᤳ ᤗᤧᤵᤔᤠᤱ ᤁᤧᤜᤡᤛᤡᤱᤒᤠ ᤆᤥᤃᤧ॥

⁴⁵ ᤜᤧᤰᤁᤩᤠᤱ ᤂᤧᤴ ᤔᤏᤠ᤺ᤸᤗᤧ ᤀᤠᤱᤃᤠ᤹ ᤔᤧᤳᤋᤠᤱ. “ᤗᤠᤱᤃᤧᤳ ᤗᤧᤵᤔᤠᤱ ᤁᤧᤜᤡᤱᤒᤠ ᤕᤠᤰᤑᤠᤱᤅᤡᤴ ᤔᤠᤱᤜᤡᤶ ᤆᤠ᤺ᤱᤘᤠ ᤁᤧᤔᤧᤵᤐᤠ ᤔᤠᤱᤛᤧᤘᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡᤖᤥ॥

⁴⁶ ᤌᤠᤱᤃᤧᤳ ᤗᤧᤵᤔᤠᤱ ᤁᤧᤜᤡᤛᤡᤱᤒᤠ ᤕᤠᤰᤑᤠᤱᤅᤡᤴ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤏᤥ ᤔᤠᤱᤛᤧᤘᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡᤖᤥ॥ ᤁᤧᤖᤧᤰ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤃ ᤛᤠᤍᤥᤰᤁᤡᤸᤗᤧ ᤁᤢᤔᤢ᤹ᤀᤡᤍᤠᤱᤛᤠᤛᤡᤖᤥ. ᤂᤧᤱᤜᤠ᤹ᤖᤰ ᤗᤧᤒᤡ ᤌᤠ᤺ᤰᤁᤥᤒᤠ ᤔᤏᤠᤛᤡᤖᤥ. ᤂᤧᤱᤜᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤣᤛᤠᤱ ᤔᤠᤱᤛᤧᤘᤠ ᤆᤥ᤺ᤰᤛᤧ ᤂᤢᤏᤧ᤹ᤀᤥ ᤁᤧᤵᤔᤠ ᤔᤧᤛᤢᤰᤗᤥ॥”

⁴⁷ ᤂᤧᤒᤩᤠᤱ ᤂᤧᤴ ᤔᤏᤠ᤺ᤸᤗᤧ ᤛᤡᤃᤠᤱ ᤗᤧᤵᤔᤠᤱᤒᤠ ᤗᤰᤂᤢᤶᤔᤡᤴ ᤛᤡ᤺ᤰᤋᤢ. ᤜᤧᤰᤁᤩᤠᤱ ᤁᤴ ᤁᤡᤵ ᤌᤡᤰ ᤜᤢᤰᤛᤡᤰ ᤁᤢᤗᤠᤶᤋᤡ ᤏᤢ ᤁᤡᤵ ᤌᤡᤰ ᤜᤢᤰᤛᤡᤰ ᤁᤢᤓᤧᤖᤧ ᤁᤢᤍᤱᤒᤠ ᤁᤧᤏᤧᤒᤠ ᤆᤥᤃᤧ॥ ᤔᤠᤱᤜᤡᤶᤔᤡᤸᤗᤧ ᤁᤢᤍᤃᤠᤱ ᤗᤧᤵᤔᤠᤱᤒᤠ ᤗᤰᤂᤢᤶᤔᤥ ᤗᤧᤳᤋᤡ ᤋᤥ᤺ᤶᤔᤠᤍᤧᤴ ᤌᤠ᤺ᤶᤒᤪᤢᤱᤅᤡᤴ ᤕᤢᤅᤧ॥

ᤁᤢᤛᤱ ᤔᤠᤱᤜᤡᤶ

⁴⁸ ᤂᤧᤒᤩᤠᤱ ᤂᤢᤏᤧ᤹ ᤀᤠᤱᤃᤠ᤹ ᤔᤠᤱᤜᤡᤶᤔᤥᤒᤠ ᤀᤠ᤺ᤶᤓᤥ᤹ᤀᤥ ᤋᤣ᤹ᤖᤠᤱ॥ ᤂᤧᤸᤗᤧ ᤀᤠ᤺ᤶᤓᤥ᤹ᤀᤥᤒᤠ ᤗᤠᤶᤎᤣᤳ ᤛᤡᤳᤗᤠᤱᤜᤠ᤹ ᤛᤡ᤺ᤰᤋᤢ. ᤂᤧᤴ ᤏᤧᤵᤔᤠᤱ ᤜᤢᤰᤛᤡᤰ ᤅᤠᤛᤡ ᤅᤠᤛᤡ ᤕᤠᤖᤡᤰ ᤁᤧᤎᤢᤱᤒᤠ ᤆᤥᤃᤧ॥ ᤛᤡᤃᤠᤱ ᤗᤠ᤺ᤵᤔᤠ ᤗᤠᤶᤔᤡᤴ ᤌᤡᤒᤥᤱᤅᤠᤱ ᤗᤡᤛᤡ ᤜᤢᤰᤛᤡᤰ ᤁᤢᤓᤧᤖᤧ ᤏᤧᤛ᤻ᤛᤧ. ᤜᤧᤰᤁᤩᤠᤱ ᤂᤧᤵᤔᤥ ᤁᤧᤕᤧᤵᤐᤠ ᤏᤧᤵᤔᤈᤠᤱ ᤗᤧᤵᤔᤠᤱᤒᤠ ᤗᤠ᤺ᤵᤔᤠ ᤗᤠᤶᤔᤥᤒᤠ ᤁᤢᤍᤰᤔᤠ ᤗᤢᤱᤎᤠᤰᤜᤠ᤹ ᤁᤢᤈᤰᤐᤠ ᤜᤢᤰᤛᤡᤰ ᤛᤢᤶᤛᤡ ᤛᤢᤶᤛᤡ ᤕᤠᤖᤡᤰ ᤁᤢᤓᤧᤖᤧ ᤐᤳᤇᤧ॥

⁴⁹ ᤛᤡᤃᤠᤱ ᤗᤠ᤺ᤵᤔᤠ ᤀᤠ᤺ᤶᤓᤥᤴ ᤏᤡᤒᤥᤱ ᤜᤢᤰᤛᤡᤰ ᤁᤢᤓᤧᤖᤧ ᤏᤢ ᤌᤡᤒᤥᤱᤅᤠᤱ ᤏᤧᤳᤇᤡ ᤜᤢᤰᤛᤡᤰ ᤔᤢ ᤐᤠᤰᤗᤢᤶ ᤁᤧᤗᤠ᤺ᤵᤐᤠ ᤏᤧᤛ᤻ᤛᤧ॥ ᤂᤧᤵᤔᤥ ᤌᤥ᤺ᤰᤛᤡᤱᤔᤠᤖᤧ ᤗᤠᤃᤡ ᤗᤠᤶᤎᤣᤳ ᤛᤡᤳᤗᤠᤱᤜᤠ᤹ ᤏᤠᤜᤠᤱ ᤁᤳᤏᤠᤜᤠᤱ ᤁᤧᤕᤧᤵᤐᤠ ᤁᤢᤍᤰᤔᤠᤜᤠ᤹ ᤕᤧᤒᤧ. ᤜᤧᤰᤁᤩᤠᤱ ᤌᤡᤒᤥᤱ ᤏᤠᤜᤠᤱᤛᤣ᤺ᤰᤜᤠ᤹ ᤐᤳᤇᤧᤖᤥ॥