ᤀᤡᤈᤁᤡᤀᤣᤗ 4 - LIFOTNT

ᤕᤖᤢᤛᤗᤧ᤺ᤶᤔᤡᤴ ᤔᤧᤃᤒᤢᤒᤠ

¹ “ᤜᤧᤰᤁᤩᤠᤱ ᤀᤠᤸᤗ. ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤏᤠᤀᤣ. ᤗᤳᤇᤠ ᤕᤶᤒᤠ ᤂᤠᤶᤗᤧᤰ ᤌᤡᤰ ᤕᤠᤱᤛᤡᤱᤅᤧ᤹ ᤂᤧᤒᤩᤠᤱ ᤁᤴ ᤂᤧᤏᤧ᤹ ᤁᤧᤍᤃᤡ ᤔᤢ ᤏᤧᤛ᤻ᤛᤧ᤹॥ ᤂᤧᤒᤩᤠᤱ ᤁᤵᤔᤥ ᤕᤖᤢᤛᤗᤧᤔ ᤕᤧᤰᤕᤰᤁᤡᤸᤗᤧ ᤁᤢᤀᤡᤳᤇᤠᤵ ᤂᤧ᤺ᤴᤍᤧ᤹॥

² ᤕᤧᤰᤕᤰᤁᤡᤴ ᤌᤱᤅᤥ ᤔᤧᤃᤒᤢᤀᤠᤱ ᤏᤧᤒᤠ ᤀᤥᤛᤣ᤺ᤴᤎᤠᤱ ᤆᤥᤃᤧ᤹॥ ᤁᤴ ᤁᤒᤪᤡᤱ ᤗᤧᤵᤔᤠᤱ ᤗᤢᤱᤎᤠᤰ ᤕᤧᤵᤛᤧ᤹ ᤜᤧᤰᤁᤣᤗ᤹ᤖᤡᤰ ᤜᤠ᤺ᤳᤋᤠᤱ ᤂᤧᤳᤇᤡᤱᤔᤠ ᤔᤧᤴᤇᤢᤰᤏᤧᤴᤗ॥ ᤏᤡᤱᤔᤡ ᤌᤰᤛᤢᤒᤠ ᤋᤢᤖᤠᤜᤡᤶᤜᤠ᤹ ᤆᤥᤃᤧ᤹. ᤜᤧᤰᤁᤩᤠᤱ ᤗᤢᤱᤎᤠᤰ ᤗᤢ᤺ᤶᤔᤠ ᤆᤴᤈᤶᤒᤠᤍᤧᤴᤜᤠ᤹ ᤏᤢ ᤗᤢᤱᤎᤠᤰ ᤗᤢ᤺ᤶᤔᤠ ᤛᤡᤱᤀᤠ᤺ᤳᤜᤠ᤹ ᤏᤧᤛ᤻ᤛᤧᤀᤠᤱ ᤕᤧᤰᤕᤰᤁᤡᤴ ᤁᤒᤪᤡᤱ ᤁᤒᤧ᤹॥

³ ᤂᤧᤒᤩᤠᤱ ᤂᤖᤧ᤺ᤱ ᤗᤧ᤺ᤱᤔᤠ ᤑᤧᤴᤈᤣ᤹ ᤂᤣ᤺ᤰᤕᤠ ᤌᤡᤰ ᤕᤠᤱᤛᤡᤱᤅᤧ᤹ᤀᤠᤱ ᤂᤧᤴ ᤂᤧᤏᤧ᤹ ᤏᤢ ᤕᤧᤰᤕᤰᤁᤡᤸᤗᤧ ᤁᤢᤗᤢᤶᤔᤥ ᤕᤧᤵᤛᤧ᤹॥ ᤂᤧᤏᤧ᤹ ᤕᤧᤰᤕᤰ ᤗᤧᤵᤔᤠᤱ ᤜᤡᤛᤡᤱᤅᤧ᤹ ᤜᤧᤰᤁᤩᤠᤱ ᤕᤖᤢᤛᤗᤧ᤺ᤶᤔᤡᤴ ᤏᤡᤱᤔᤡᤜᤠ᤹ᤖᤧ ᤁᤡᤷᤃᤵ ᤔᤧᤃᤒᤢᤒᤠᤴ ᤀᤠᤰᤂᤩᤠᤖᤡᤰ ᤁᤧᤛᤠᤰᤐᤠ ᤐᤥᤱ᤹ ᤑᤠ᤹ᤀᤠᤱ ᤀᤥᤛᤣ᤺ᤴᤎᤠᤱ ᤆᤥᤃᤧ᤹॥ ᤁᤴ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ᤖᤧ ᤗᤠᤃᤡ ᤗᤳᤇᤠ ᤛᤠᤶᤍᤡᤱ ᤐᤥᤱ᤹॥

⁴ “ᤀᤠᤸᤗ ᤂᤧᤏᤧ᤹ ᤑᤧᤴᤇᤠᤱ ᤗᤧᤵᤔᤠᤱ ᤆᤧ᤺ᤱᤕᤠ ᤏᤧᤛᤡᤱᤅᤧ᤹ᤀᤠᤱ ᤏᤧᤛ᤻ᤛᤧ᤹ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤜᤠ᤹ ᤂᤧᤏᤧ᤹ ᤁᤧᤛᤶᤎᤠᤱ ᤁᤧᤖᤧᤰ ᤏᤧᤛ᤻ᤛᤧ᤹॥ ᤂᤧᤵᤔᤥ ᤂᤧᤏᤧ᤹ ᤆᤧ᤺ᤱᤕᤠ ᤁᤧᤏᤧᤒᤠ ᤕᤧᤴ ᤌᤠᤖᤡᤰ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤜᤠ᤹ ᤂᤧᤏᤧ᤹ ᤁᤧᤃᤢᤕᤢᤖ ᤐᤥᤱ᤹॥

⁵ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤋᤱᤒᤣ ᤌᤰᤔᤠ ᤔᤧᤈᤥᤃᤢᤒᤠ ᤂᤢᤴᤇᤡ᤹ ᤗᤠᤕᤥᤸᤗᤧ ᤗᤠᤃᤡ ᤌᤡᤰᤕᤠᤴ ᤌᤡᤰᤕᤠᤴ ᥉᥏᥆ ᤕᤧᤴ ᤌᤠᤖᤡᤰ ᤂᤢᤴᤇᤡ᤹ ᤗᤠᤕᤥᤜᤠ᤹ ᤂᤧᤏᤧ᤹ ᤁᤧᤃᤢᤕᤢᤖ ᤐᤥᤱ᤹ ᤁᤧᤗ᤹ᤒᤠ ᤀᤠᤱᤃᤠ᤹ ᤀᤠᤏᤡᤱᤘᤠ᤹ ᤘᤠ᤹॥

⁶ ᤂᤧᤴ ᤀᤣᤃᤠᤱ. ᤕᤜᤢᤍᤠ᤺ᤸᤗᤧ ᤋᤱᤒᤣ ᤌᤰᤔᤠ ᤆᤥᤃᤢᤒᤠ ᤁᤢᤗᤠᤕᤥᤸᤗᤧ ᤗᤠᤃᤡ ᤌᤡᤰᤕᤠᤴ ᤌᤡᤰᤕᤠᤴ ᤗᤡᤒᤥᤱ ᤕᤧᤴ ᤌᤠᤖᤡᤰ ᤆᤢᤵᤛᤠᤱ ᤗᤧᤵᤔᤠᤱ ᤆᤧ᤺ᤱᤕᤠ ᤜᤡᤛᤡᤱᤅᤧ᤹ᤀᤠᤱ ᤏᤧᤛ᤻ᤛᤧ᤹॥

⁷ “ᤜᤠᤒᤠ ᤂᤧᤴ ᤕᤧᤶᤔᤥ. ᤕᤖᤢᤛᤗᤧ᤺ᤶᤔᤡᤴ ᤁᤡᤷᤃᤵ ᤔᤧᤃᤒᤢ ᤔᤧᤏᤧᤛ᤻ᤛᤢᤒᤠᤀᤥ ᤁᤧᤔᤡᤰᤁᤡᤴ ᤜᤡᤛᤧ᤹॥ ᤗᤧᤰᤆᤠ᤹ᤒᤠ ᤁᤧᤜᤢᤰᤁᤡᤸᤗᤧ ᤋᤰᤛᤡᤱᤅᤧ᤹ᤀᤠᤱ ᤏᤧᤛ᤻ᤛᤧ᤹ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤔᤧᤰᤔᤠ ᤔᤠᤱᤏᤡᤱᤘᤠ᤹ᤐᤠᤴ ᤐᤠᤖᤧ᤹॥

⁸ ᤀᤠᤱᤃᤠ᤹ ᤂᤧᤏᤧ᤹ ᤀᤡᤍᤠ᤺ᤰᤜᤠ᤹ᤖᤧ ᤀᤡᤄᤣ᤺ᤱᤏᤧ ᤜᤧᤰᤁᤣᤗ᤹ᤖᤡᤰ ᤂᤧᤏᤧ᤹ ᤁᤒᤪᤡᤱ ᤁᤧᤃᤒᤢᤒᤠ ᤕᤧᤴᤏᤡᤴ ᤔᤧᤴᤈᤢ᤺ᤳᤋᤣ ᤌᤧᤶᤒᤠ ᤂᤧᤏᤧ᤹ ᤏᤠ ᤏᤢ ᤁᤳᤏᤠ ᤜᤡᤛᤡᤱᤔᤠ ᤁᤧᤴᤇᤢᤰᤏᤧᤴ॥

⁹ “ᤀᤠᤸᤗ ᤂᤧᤏᤧ᤹ ᤐᤣᤃᤧ᤹ᤀᤠᤱ ᤁᤢᤓᤠ ᤔᤠᤛᤡ. ᤜ᤺ᤰᤛᤡ. ᤛᤣ᤺ᤶᤒᤡ. ᤁᤠᤖᤡ᤹. ᤐᤧᤏᤠ ᤏᤢ ᤛᤡᤜᤠ᤹ ᤋᤠᤖᤧ᤹ ᤜᤧᤰᤁᤩᤠᤱ ᤗᤳᤇᤠ ᤂᤵᤐᤩᤠᤀᤥ ᤌᤡᤰᤔᤧᤳᤌᤡᤰ ᤑ᤺ᤴᤍᤧ ᤕᤢᤰᤂᤧ᤹॥ ᤂᤧᤏᤧ᤹ ᥉᥏᥆ ᤕᤧᤴ ᤌᤠᤖᤡᤰ ᤑᤧᤴᤇᤠᤱ ᤗᤧᤵᤔᤠᤱ ᤆᤧ᤺ᤱᤕᤠ ᤁᤧᤒᤥᤱᤅᤠᤱ ᤁᤧᤏᤧᤒᤠ ᤕᤧᤴᤗᤧ ᤗᤠᤃᤡ ᤂᤧᤴ ᤁᤢᤈᤠᤜᤠ᤹ ᤂᤧᤏᤧ᤹ ᤁᤧᤗᤠᤃᤡ ᤂᤖᤧ᤺ᤱ ᤗᤧ᤺ᤰᤛᤧ᤹॥

¹⁰ ᤌᤡᤰᤕᤠ᤺ᤴᤎᤰ ᤆᤠᤔᤠᤖᤧ ᤗᤠᤃᤡ ᥈᥆ ᤛᤣᤁᤣᤗ ᤂᤧᤏᤧ᤹ ᤁᤧᤈᤠᤔᤠ ᤁᤢᤈᤠ ᤛᤧᤴᤍᤧ᤹. ᤜᤧᤰᤁᤩᤠᤱ ᤆᤠᤔᤠ ᤕᤧᤶᤔᤥ ᤂᤧᤴ ᤆᤩᤧ᤹॥

¹¹ ᤂᤧᤒᤩᤠᤱ ᤁᤧᤖᤧᤰ ᤕᤧᤴᤜᤠ᤹ᤖᤧ ᤗᤠᤃᤡ ᤑᤱᤏᤠᤀᤥ ᤀᤠᤈᤧ᤺ᤳᤇᤡᤰ ᤆᤫᤠ᤺ᤳ ᤛᤡ᤺ᤰᤋᤧ ᤕᤢᤰᤂᤧ᤹. ᤜᤧᤰᤁᤩᤠᤱ ᤁᤧᤛᤧᤴᤍᤢᤒᤠ ᤕᤧᤶᤔᤥ ᤁᤴ ᤌᤢᤅᤧ᤹॥

¹² ᤂᤧᤏᤧ᤹ ᤜ᤺ᤰᤛᤡᤴ ᤆᤠᤖ᤺ᤵᤐᤠ ᤁᤧᤀᤥ᤹ᤖᤢᤸᤗᤧ ᤁᤴ ᤕᤠᤖᤡᤵ ᤆᤥᤃᤧ᤹ᤀᤠᤱ ᤁᤢᤈᤠ ᤆᤩᤧ᤹॥ ᤁᤧᤖᤧᤰ ᤔᤏᤠᤜᤠ᤹ᤖᤧ ᤀᤥᤔᤧᤔᤧᤳᤋᤢᤀᤠᤱ ᤔᤧᤒᤳᤋᤡᤸᤗᤧᤛᤠ. ᤁᤧᤜᤣᤒᤠ ᤔᤏᤠ ᤜᤡ᤺ᤴ ᤔᤡ ᤜᤠ᤺ᤴᤍᤧ᤹ᤀᤠᤱ ᤂᤧᤸᤗᤧ ᤁᤢᤛᤶᤎᤠᤱ ᤗᤧ᤺ᤰᤛᤧ᤹ ᤂᤧᤒᤩᤠᤱ ᤂᤖᤧ᤺ᤱᤅᤡᤴ ᤂᤧᤏᤧ᤹ ᤆᤩᤧ᤹॥”

¹³ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ. “ᤀᤰᤂᤣᤗ᤹ᤖᤡᤰ ᤀᤠᤱᤃᤠ᤹ ᤌᤡᤶᤔᤧᤴᤍᤱ ᤛᤢᤘᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤏᤠ᤺ᤳᤋᤢᤱᤍᤣᤛᤢᤱᤛᤡᤱᤒᤠ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ᤖᤧ ᤀᤠᤛᤢᤳᤌᤥ ᤂᤖᤧ᤺ᤱᤅᤡᤴ ᤔᤧᤈᤖᤥ॥”

¹⁴ ᤂᤧᤒᤩᤠᤱ ᤀᤠᤱᤃᤠ᤹ ᤔᤧᤳᤋᤢᤱ. “ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤀᤣ. ᤀᤠᤱᤃᤠ᤹ ᤔᤏᤠ ᤜᤡ᤺ᤴ ᤀᤥᤃᤵ ᤆᤥ᤺ᤰᤔᤠᤀᤠᤱ ᤀᤠᤛᤢᤳᤌᤥ ᤆᤥ᤺ᤰᤛᤡᤱᤔᤠᤀᤣ ᤐᤥᤱᤒᤠᤒᤡ᥅ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤋᤃᤡ ᤀᤠᤵᤑᤠᤸᤗᤧᤀᤠᤱ ᤀᤠᤛᤢᤳᤌᤥ ᤔᤧᤶᤒᤥᤱᤅᤣ ᤘᤠ᤹ᤀᤠ॥ ᤀᤠᤱᤃᤠ᤹ ᤜᤡᤴᤈᤠ᤹ ᤘᤕᤠᤱᤅᤠᤱᤎᤥ ᤀᤠᤸᤗᤥ ᤌᤠᤖᤡᤰ ᤀᤠᤵᤑᤣᤰ ᤁᤧᤍᤢᤰᤐᤠᤀᤠᤱ ᤁᤧᤛᤡᤒᤠ ᤀᤡᤃᤪ ᤋᤠᤶᤓᤢᤱ ᤌᤰᤛᤠᤜᤠ᤹ᤖᤧ ᤔᤧᤛᤧᤖᤢᤒᤠ ᤌᤧᤔᤠ ᤌᤰᤛᤠ ᤛᤠᤀᤠᤱ ᤀᤠᤱᤃᤠ᤹ ᤀᤠᤵᤑᤠᤸᤗᤧᤀᤠᤱ ᤔᤧᤴᤈᤠᤀᤣ ᤘᤠ᤹ᤀᤠ॥ ᤛᤠᤶᤕᤥᤌᤡᤶ ᤀᤡᤱᤈᤠᤱᤅᤡᤸᤗᤧ ᤆᤠᤔᤠ ᤀᤠᤶᤓᤠ᤺ᤰᤏᤧᤶᤒᤠ ᤌᤧᤔᤠ ᤛᤠᤀᤠᤱ ᤀᤠᤱᤃᤠ᤹ ᤀᤠᤓᤧᤸᤗᤧᤀᤠᤱ ᤔᤧᤴᤈᤠᤀᤣ ᤘᤠ᤹ᤀᤠ॥”

¹⁵ ᤕᤜᤘᤣ ᤍᤠᤱᤒᤧᤸᤗᤧ ᤔᤧᤳᤋᤠᤱ. “ᤏᤢᤒᤠᤖᤥ. ᤔᤏᤠ ᤜᤡ᤺ᤸᤗᤧ ᤁᤢᤗᤧᤰᤘᤠᤀᤥ ᤂᤧᤏᤧ᤹ ᤐᤡ᤹ᤜᤡᤀᤥ ᤂᤖᤧ᤺ᤱ ᤗᤧ᤺ᤱᤔᤠ ᤁᤧᤛᤢᤰᤋᤢ᤹॥”

¹⁶ ᤂᤧᤒᤩᤠᤱ ᤂᤢᤏᤧ᤹ ᤔᤧᤳᤋᤠᤱ. “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤏᤠᤀᤣ. ᤕᤖᤢᤛᤗᤧ᤺ᤶᤔᤥ ᤀᤠᤱᤃᤠ᤹ ᤀᤠᤈᤧᤳ ᤀᤠᤈᤧ᤺ᤳᤗᤰ ᤐᤥᤃᤢᤃᤧᤴ ᤁᤢᤈᤠ ᤂᤥᤍᤧᤳᤗ ᤆᤥᤃᤢᤱ᤹॥ ᤛᤠ᤹ᤖᤡᤰ ᤛᤡᤱᤛᤡᤱᤅᤠᤱ ᤁᤢᤈᤠᤴ ᤔᤧᤎᤠᤱᤄᤢ ᤜᤧᤰᤁᤩᤠᤱ ᤐᤃᤡ ᤔᤧᤃᤡᤖ ᤔᤧᤈᤖᤥ॥ ᤆᤫᤠ᤺ᤳᤋᤡᤴ ᤁᤢᤍᤧᤵᤐᤰᤘᤠ ᤁᤢᤍᤧᤵᤐᤰᤘᤠ ᤔᤧᤛᤡ᤺ᤰᤋᤢ. ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤁᤴ ᤏᤡᤱᤛᤠᤶᤔᤥ ᤔᤧᤎᤢᤅᤢ᤹॥

¹⁷ ᤁᤢᤈᤠ ᤏᤢ ᤆᤫᤠ᤺ᤳ ᤛᤢ᤺ᤸᤗᤡᤰ ᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤔᤏᤠᤜᤠ᤹ ᤌᤡᤰ ᤏᤢ ᤘᤣ᤹ ᤀᤥᤔᤧᤔᤧᤳᤇᤡᤱᤅᤠᤱ ᤆᤡᤈᤡᤱ ᤕᤱᤔᤠ ᤔᤧᤛᤡᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤢᤴᤇᤡ᤹ ᤗᤠᤕᤥᤀᤥ ᤕᤧᤳ ᤏᤢ ᤜᤥᤖᤡᤰᤗᤰ ᤔᤧᤒᤥᤱ ᤔᤧᤒᤣ᤺ᤰᤗᤥ॥”