ᤀᤡᤈᤁᤡᤀᤣᤗ 39 - LIFOTNTᤃᤥᤃᤧᤴ ᤜᤠᤖᤡᤍᤠ 1 ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤃᤥᤃᤖᤧ ᤁᤢᤍᤰᤗᤧᤱᤘᤠᤀᤥ ᤔᤠᤱᤏᤡᤱᤘᤠ᤹ᤐᤠᤴ ᤐᤠᤖᤧ᤹॥ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤗᤠᤶ ᤂᤧᤏᤧ᤹ ᤁᤴ ᤀᤡᤱᤄᤱᤅᤡᤴ ᤂᤢᤏᤧ᤹ ᤔᤧᤳᤋᤧ᤹—ᤔᤣᤛᤣᤁ ᤏᤢ ᤋᤢᤒᤗ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤀᤥᤒᤠ ᤋᤢᤶ ᤕᤢᤰᤛᤠᤒᤠ ᤃᤥᤃᤀᤣ. ᤀᤠᤱᤃᤠ᤹ ᤂᤧᤏᤧ᤹ ᤁᤧᤏᤡᤱᤔᤡᤀᤠ॥ 2 ᤀᤠᤱᤃᤠ᤹ ᤂᤧᤏᤧ᤹ ᤁᤒᤪᤡᤱ ᤜᤡᤸᤗᤡᤰ ᤜᤡᤏᤧ ᤜᤧᤰᤁᤩᤠᤱ ᤌᤥ ᤔᤠ᤺ᤱᤄᤠᤒᤠ ᤌᤠᤱᤃᤧᤳᤗᤠᤶ ᤕᤢ᤺ᤳᤏᤧᤀᤠᤱ ᤀᤡᤛᤪᤠᤀᤡᤗᤒᤠ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠ ᤗᤧᤵᤔᤠᤱ ᤌᤱ ᤆᤥ᤺ᤰᤛᤧ ᤏᤠ᤺ᤳᤏᤧᤍᤣᤏᤧ᤹॥ 3 ᤀᤠᤱᤃᤠ᤹ ᤂᤧᤏᤧ᤹ ᤁᤧᤓᤧᤴᤇᤠᤱ ᤜᤢᤰᤁᤥᤗᤠᤶ ᤗᤡᤴ ᤏᤢ ᤁᤧᤈᤢᤵᤛᤠᤱ ᤜᤢᤰᤁᤥᤗᤠᤶ ᤋᤥ᤺ᤱᤜᤠ᤹ ᤜᤡᤵᤋᤢᤱ ᤌᤠᤛᤢᤱ᤹॥ 4 ᤂᤧᤏᤧ᤹ ᤏᤢ ᤂᤧᤏᤧ᤹ ᤁᤧᤎᤰᤛᤢᤒᤠᤜᤠ᤹ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤓᤠ᤹ᤒᤠᤱᤜᤠ᤹ ᤁᤧᤖᤧᤰ ᤀᤡᤛᤪᤠᤀᤡᤗᤒᤠ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ᤀᤥ ᤁᤧᤛᤩᤧᤀᤡ᤹॥ ᤀᤠᤱᤃᤠ᤹ ᤂᤡᤏᤡ᤹ ᤆᤣᤜᤠ᤹ ᤁᤡ᤺ᤳᤌᤜᤠ᤹ ᤏᤢ ᤋᤠᤶᤓᤢᤱ ᤌᤰᤛᤠᤜᤠ᤹ ᤆᤠ᤺ᤳᤋᤢᤱᤛᤡᤱ᤹॥ 5 ᤔᤢᤖᤧᤰ ᤂᤠᤖᤧᤰ ᤁᤧᤒᤥᤱᤒᤠ ᤋᤠᤶᤍᤠᤶᤒᤠ ᤋᤧᤴᤜᤠ᤹ᤀᤥ ᤂᤡᤏᤡ᤹ ᤁᤧᤛᤩᤧᤀᤡ᤹. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤐᤠ᤺ᤳᤋᤢᤱᤅᤠᤱ ᤘᤠ᤹. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤢᤘᤠ ᤆᤥᤃᤢ᤹॥ 6 ᤜᤧᤰᤁᤩᤠᤱ ᤔᤠᤃᤥᤃ ᤏᤢ ᤘᤖ᤺ᤱᤅᤡᤸᤗᤧ ᤁᤢᤕᤠᤜᤠ᤹ᤀᤥ ᤏᤡᤱᤘᤠ᤹ ᤋᤠᤶᤍᤠᤶ ᤗ᤹ᤖᤡᤰ ᤁᤧᤕᤢᤱᤒᤠ ᤂᤧᤏᤧ᤹ ᤁᤧᤖᤧᤰ ᤁᤧᤓᤠ᤹ᤒᤠᤱᤜᤠ᤹ᤀᤥ ᤀᤠᤱᤃᤠ᤹ ᤔᤡᤎᤢᤱᤍᤡᤱ ᤔᤡᤖᤠ᤺ᤰ ᤌᤠᤛᤢᤱ᤹॥ ᤂᤧᤒᤩᤠᤱ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢ᤹॥ 7 “ᤁᤶᤓᤗ᤹ᤖᤡᤰ. ᤀᤠᤱᤃᤠ᤹ ᤀᤡᤛᤪᤠᤀᤡᤗᤒᤠ ᤀᤠᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤀᤠᤱᤃᤠ᤹ ᤀᤠᤛᤣᤛᤣᤒᤠ ᤀᤠᤔᤡᤱᤅᤡᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤖ ᤆᤥᤃᤢᤱ᤹॥ ᤀᤠᤱᤃᤠ᤹ ᤜᤠ᤺ᤳᤋᤠᤱ ᤁᤵᤔᤥ ᤛᤡᤖᤡᤱᤔᤔᤠ ᤐᤠᤴ ᤋᤠ᤺ᤵᤔᤠ ᤔᤧᤓᤠ᤺ᤰᤋᤢᤱᤅᤡᤴ᤹॥ ᤜᤧᤰᤁᤩᤠᤱ ᤀᤠᤱᤃᤠ᤹ᤀᤣ ᤀᤡᤛᤪᤠᤀᤡᤗᤒᤠ ᤛᤣᤛᤣᤒᤠ. ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧᤀᤠᤱ ᤏᤡᤱᤘᤠ᤹ ᤔᤧᤄᤥᤛᤢ᤹॥ 8 ᤂᤧᤴ ᤂᤠᤛᤧᤴ ᤆᤥ᤺ᤰᤔᤠ ᤕᤧᤴᤏᤡᤴ ᤋᤠᤖᤥ. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹॥ ᤀᤠᤱᤃᤠ᤹ ᤀᤢᤘᤠ ᤆᤥᤃᤢᤱᤅᤠᤱ ᤘᤠ᤹ᤒᤠ ᤁᤢᤀᤡᤛᤡᤰ ᤁᤧᤖᤧᤰ ᤐᤠ᤺ᤴᤜᤠ᤹ ᤐᤥᤱ᤹॥ 9 “ᤂᤧᤒᤩᤠᤱ ᤀᤡᤛᤪᤠᤀᤡᤗᤒᤠ ᤕᤧᤰᤕᤰᤜᤠ᤹ᤀᤥᤒᤠ ᤔᤏᤠᤜᤠ᤹ ᤗᤠ᤺ᤰᤁᤠᤳ ᤔᤧᤒᤣ᤺ᤰ ᤜᤧᤰᤁᤩᤠᤱ ᤆᤢᤰᤐᤠ ᤏᤢ ᤕᤶᤒᤠ ᤁᤧᤄᤥᤜᤠ᤹. ᤁᤧᤗᤡᤜᤠ᤹ ᤏᤢ ᤁᤧᤍᤥ᤺ᤱᤜᤠ᤹. ᤁᤧᤗᤠ᤺ᤰᤜᤠ᤹ ᤏᤢ ᤁᤧᤕᤧᤴᤜᤠ᤹ ᤔᤧᤄᤛ᤻ᤛᤢᤀᤠᤱ ᤂᤧᤱᤜᤠ᤹ᤖᤧ ᤛᤡᤱ ᤔᤧᤜᤠ᤺ᤴᤍᤢ᤹॥ ᤂᤧᤸᤗᤧ ᤋᤱᤒᤣ ᤏᤢᤛᤡ ᤌᤠᤖᤡᤰ ᤂᤧᤱᤜᤠ᤹ ᤕᤥᤖᤢᤛᤡ᤹᥄ 10 ᤂᤧᤱᤜᤠ᤹ᤖᤧ ᤀᤡᤰᤋᤠᤵᤜᤠ᤹ᤗᤠᤶ ᤀᤡᤃᤪ ᤋᤠᤶᤓᤢᤱᤜᤠ᤹ᤀᤥᤗᤠᤶ ᤛᤡᤱ ᤀᤠ᤺ᤵᤔᤠ ᤆᤠᤜᤠ ᤔᤧᤈᤥ᤺ᤰᤏᤧᤴ᤹. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤆᤠᤜᤠ ᤔᤧᤈᤥ᤺ᤰᤐᤠ ᤁᤧᤖᤧᤰ ᤛᤡᤱᤜᤠ᤹ ᤁᤴ ᤂᤈᤢᤶᤄᤕᤠ ᤑᤧᤈᤢᤶᤓᤧᤕᤠᤜᤠ᤹ᤖᤧ ᤂᤢᤴᤇᤡ᤹ ᤕᤥᤖᤢᤛᤡ᤹॥ ᤂᤢᤴᤇᤡ᤹ ᤁᤧᤏᤠᤵᤐᤠᤜᤠ᤹ ᤂᤧᤱᤜᤠ᤹ᤖᤧ ᤕᤠᤱᤏᤠ ᤔᤧᤏᤠᤵᤋᤢᤛᤡ᤹. ᤂᤢᤴᤇᤡ᤹ ᤁᤧᤄᤢ᤺ᤵᤐᤠᤜᤠ᤹ ᤂᤧᤱᤜᤠ᤹ᤖᤧ ᤔᤧᤄᤢ᤺ᤳᤋᤢᤛᤡ᤹॥” ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ॥ ᤃᤥᤃᤧᤴ ᤔᤧᤗᤢᤵᤋᤢ᤹ 11 “ᤜᤧᤰᤁᤩᤠᤱ ᤗᤢᤶᤒᤠᤱ ᤘᤖ᤺ᤱᤅᤡᤸᤗᤧ ᤏᤠᤱᤃᤧᤱ ᤐᤡᤛᤠᤱ. ᤗᤠᤶᤍᤡ᤺ᤵᤐᤠᤱᤜᤠ᤹ᤖᤧ ᤂᤢᤴᤇᤡ᤹ ᤏᤧᤏᤧᤒᤠᤍᤧᤴᤏᤥ ᤀᤠᤱᤃᤠ᤹ ᤃᤥᤃᤖᤧ ᤁᤢᤗᤠᤃᤡ ᤏᤢ ᤂᤢᤏᤧ᤹ ᤁᤢᤎᤰᤛᤢᤒᤠ ᤛᤢᤶᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤛᤠ᤹ᤖᤡᤰ ᤕᤶᤒᤠ ᤀᤡᤐᤢᤱ ᤌᤡᤰ ᤆᤥᤃᤢᤱ᤹॥ ᤂᤧᤵᤔᤥᤗᤠᤶ ᤁᤧᤒᤥᤱᤒᤠᤀᤠᤱ ᤗᤠᤱᤃᤧᤄᤣ᤺ᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤔᤡᤴ ᤁᤸᤗᤧ ᤌᤣ᤺ᤰᤋᤢ᤹. ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤁᤴ ᤋᤧᤴᤏᤡᤸᤗᤧ ᤁᤢᤔᤡᤱ ᤜᤠᤔᤥᤏ ᤃᤥᤃᤖᤧ ᤁᤢᤏᤧᤏᤧᤒᤠᤍᤧᤴ ᤑᤠ᤹ᤀᤠᤱ ᤔᤧᤗᤧᤰᤂᤢ᤹॥ 12 ᤁᤧᤛᤡᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤌᤰᤜᤠ᤹ ᤗᤢᤵᤔᤠ ᤏᤢ ᤗᤠᤈᤣᤴ ᤛᤢᤳᤌᤥ ᤆᤥ᤺ᤰᤔᤠᤖᤧ ᤗᤠᤃᤡ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤏᤢᤛᤡ ᤗᤠ ᤌᤠᤖᤡᤰ ᤌᤖᤢᤛᤡ॥ 13 ᤗᤠᤈᤣ᤹ᤀᤥᤒᤠ ᤁᤧᤖᤧᤰᤗᤧ ᤀᤡᤛᤪᤠᤀᤡᤗᤡᤜᤠ᤹ ᤆᤣᤜᤠ᤹ ᤗᤢᤵᤔᤠ ᤔᤧᤓᤠ᤹ᤖᤢᤛᤡ᤹. ᤜᤧᤰᤁᤩᤠᤱ ᤀᤠᤔᤡᤔᤡᤍᤡᤱᤅᤡᤴ ᤀᤥᤛᤣ᤺ᤴᤎᤠᤱ ᤆᤥᤃᤢᤱᤒᤠ ᤕᤧᤴᤏᤥ ᤂᤧᤱᤜᤠ᤹ ᤔᤡᤱᤛᤥ ᤌᤠᤱᤛᤥ ᤔᤧᤒᤡᤖᤢᤛᤡ᤹. ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱ᤹॥ 14 “ᤗᤠᤈᤣᤴ ᤛᤢᤳᤌᤥ ᤆᤥ᤺ᤰᤔᤠᤖᤧ ᤗᤠᤃᤡ ᤆᤰᤔᤧᤸᤗ᤹ᤀᤣ ᤔᤏᤠᤜᤠ᤹ ᤕᤠ᤺ᤶᤒᤰᤁᤥ ᤔᤧᤓᤳᤇᤢᤛᤡ᤹॥ ᤗᤠᤈᤣ᤹ ᤁᤧᤖᤧᤰ ᤐᤡᤛᤠᤱ ᤁᤢᤓᤠ ᤔᤧᤒᤣ᤺ᤰ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤥ᤹ᤒᤠ. ᤂᤠᤶᤒᤠᤱᤅᤥ ᤁᤧᤏᤧᤒᤠ ᤁᤧᤕᤠ᤺ᤰᤐᤠᤜᤠ᤹ ᤘᤣ᤹ᤜᤠ᤹ᤖᤧ ᤔᤧᤗᤢᤵᤋᤢᤛᤡ᤹॥ ᤏᤢᤛᤡ ᤗᤠ ᤀᤣᤃᤠᤱ. ᤂᤧᤱᤜᤠ᤹ᤖᤧ ᤂᤧᤴ ᤔᤏᤠᤜᤠ᤹ ᤁᤥ᤺ᤵᤔᤠᤛᤡ ᤕᤠ᤺ᤶᤒᤰ ᤆᤥ᤺ᤰᤔᤠ ᤔᤧᤜᤣ᤺ᤰᤋᤢ᤹॥ 15 ᤂᤧᤱᤜᤠ᤹ ᤗᤠᤈᤣ᤹ᤀᤥ ᤔᤧᤒᤥᤱᤅᤠᤱ ᤔᤧᤒᤣ᤺ᤰᤁᤡᤸᤗᤧ ᤌᤡᤰᤐᤠᤖᤧ ᤗᤳᤇᤠ ᤔᤏᤠ ᤕᤧᤳ ᤏᤡᤛᤢ᤹. ᤜᤠᤔᤥᤏ-ᤃᤥᤃᤒᤠ ᤏᤧᤏᤧᤒᤠᤍᤧᤴᤏᤥ ᤁᤧᤏᤧᤒᤠ ᤀᤡᤐᤢᤱᤜᤠ᤹ᤀᤥ ᤔᤧᤸᤗᤢᤵᤐᤣ ᤌᤠᤖᤡᤰ ᤂᤢᤏᤧ᤹ ᤂᤧᤸᤗᤧ ᤁᤢᤒᤣᤛᤠᤱ ᤗᤳᤇᤠ ᤔᤡᤰᤛᤣ᤺ᤴ ᤑᤳᤇᤢᤎ᤹᤺॥ 16 (ᤂᤧᤵᤔᤥ ᤜᤠᤔᤥᤏᤠ ᤔᤧᤵᤔᤏᤠᤒᤠ ᤕᤧᤰᤕᤰᤌᤡᤰ ᤆᤢᤰ॥) ᤜᤧᤰᤁᤣᤗ᤹ᤖᤡᤰ ᤏᤡᤴᤎᤠᤛᤣ᤺ᤰᤀᤥ ᤗᤠᤈᤣᤴ ᤛᤢᤳᤌᤥ ᤐᤥᤱ᤹॥ 17 “ᤜᤧᤰᤁᤩᤠᤱ ᤀᤠᤸᤗ. ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤱ᤹—ᤁᤧᤖᤧᤰ ᤐᤖᤡᤰᤐᤠ ᤐᤢᤛᤠᤜᤠ᤹ ᤏᤢ ᤁᤧᤖᤧᤰ ᤋᤠᤶᤓᤢᤱ ᤌᤰᤛᤠᤜᤠ᤹ ᤂᤧᤏᤧ᤹ ᤀᤢ᤺ᤳᤋᤧᤛᤧ᤹॥ ᤂᤧᤏᤧ᤹ ᤂᤧᤱᤜᤠ᤹ ᤔᤧᤳᤋᤧᤛᤧ᤹—‘ᤀᤠᤱᤃᤠ᤹ ᤐᤕᤶ ᤕᤶᤒᤠ ᤛᤡᤍᤢᤱᤈᤓᤠ ᤀᤠᤛᤠᤓ᤺ᤱᤈᤠ᤺ᤸᤗᤧ ᤗᤠᤃᤡ ᤂᤡᤏᤡ᤹ ᤛᤥᤖᤡᤰ ᤑᤢᤱᤅᤠᤛᤡᤶᤔᤧ᤹॥ ᤔᤠ᤺ᤱᤄᤠ ᤏᤢ ᤏᤡ᤺ᤳᤋᤠᤱᤗᤠᤶ ᤀᤡᤛᤪᤠᤀᤡᤗᤒᤠ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ᤀᤥ ᤋᤩᤧᤶᤔᤧ᤹. ᤜᤧᤰᤁᤩᤠᤱ ᤂᤡᤏᤡ᤹ ᤂᤧᤵᤔᤥ ᤏᤧᤰᤛᤠᤴ ᤏᤢ ᤛᤠᤔᤠᤰᤂᤡᤴ ᤆᤩᤧᤶᤔᤧ᤹ ᤌᤢᤅᤧᤶᤔᤧ᤹᥄ 18 ᤒᤠᤛᤠᤏᤗᤠᤶᤒᤠᤒᤠ ᤛᤔᤧ᤹ ᤁᤧᤔᤧ᤹ᤒᤠ ᤁᤧᤖᤧᤰ ᤛᤧᤃᤶᤒᤠᤜᤠ᤹. ᤁᤢᤒᤢ ᤌᤰᤛᤠᤜᤠ᤹. ᤔᤧ᤺ᤴᤍᤠᤜᤠ᤹. ᤔᤧᤸᤗᤢᤰᤛᤠ᤺ᤳᤜᤠ᤹ ᤏᤢ ᤌᤢ᤺ᤶᤒᤠᤜᤠ᤹ ᤜᤧᤰᤁᤣ ᤔᤢᤰᤛᤠᤶᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤏᤧᤰᤛᤠᤴ ᤂᤡᤏᤡ᤹ ᤆᤩᤧᤶᤔᤧ᤹ ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤕᤢᤰᤛᤠᤒᤠᤜᤠ᤹ᤖᤧ ᤂᤢᤴᤇᤡ᤹ ᤔᤠᤰᤂᤡᤴ ᤂᤡᤏᤡ᤹ ᤌᤢᤅᤧᤶᤔᤧ᤹᥄ 19 ᤂᤡᤏᤡ᤹ ᤏᤡᤱᤕᤠ᤺ᤰᤕᤠ᤺ᤰ ᤗ᤹ᤖ ᤌᤠᤖᤡᤰ ᤏᤧᤰᤛᤠ᤺ᤸᤗᤧ ᤂᤡᤏᤡ᤹ ᤏᤡᤃᤡ᤺ᤱᤔᤧᤴ ᤘᤧᤸᤗᤧᤰ ᤌᤡᤶᤛᤧᤶᤔᤧ᤹. ᤂᤡᤏᤡ᤹ ᤁᤧᤔᤀᤡᤖ ᤌᤠᤖᤡᤰ ᤔᤠᤰᤂᤡᤴ ᤌᤢᤅᤧᤶᤔᤧ᤹॥ ᤀᤠᤱᤃᤠ᤹ ᤂᤡᤏᤡ᤹ ᤗᤠᤃᤡ ᤕᤠᤖᤡᤵ ᤆᤥᤃᤢᤱᤅᤠᤱ ᤘᤠ᤹ᤒᤠ ᤛᤡᤍᤢᤱᤓᤈᤠ ᤛᤠᤓ᤺ᤱᤈᤠᤴ ᤜᤠᤒᤠ ᤁᤴᤗᤥ॥ 20 ᤀᤠᤱᤃᤠ᤹ ᤀᤠᤓᤋᤩᤠᤖ ᤆᤥ᤺ᤰᤔᤠ ᤆᤵᤋᤧᤴᤏᤥ ᤀᤴᤜᤠ᤹ᤖᤧ ᤗᤠᤃᤡ ᤏᤢ ᤀᤴᤃᤧᤗᤥᤱᤒᤠᤜᤠ᤹ᤖᤧ ᤗᤠᤃᤡ. ᤔᤢᤰᤛᤠᤶᤒᤠ ᤔᤏᤠᤜᤠ᤹ᤖᤧ ᤗᤠᤃᤡ ᤏᤢ ᤁᤧᤖᤧᤰ ᤔᤧᤱᤃᤡᤔᤏᤠᤒᤠ ᤌᤰᤛᤢᤒᤠᤜᤠ᤹ᤖᤧ ᤗᤠᤃᤡ ᤂᤡᤏᤡ᤹ ᤛᤠᤓ᤺ᤱᤈᤠ ᤆᤩᤧᤶᤔᤧ᤹.’ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ॥” ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤧᤴ ᤕᤠᤶᤔᤥ ᤑᤥ᤺ᤰᤂᤢ 21 “ᤁᤶᤓᤗ᤹ᤖᤡᤰ. ᤀᤠᤱᤃᤠ᤹ ᤀᤠᤔᤡᤔᤡᤍᤡᤱᤅᤡᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤀᤥᤛᤣ᤺ᤴᤎᤠᤰᤋᤢᤱᤛᤡᤱ᤹॥ ᤀᤠᤱᤃᤠ᤹ ᤂᤧᤱᤜᤠ᤹ ᤐᤡᤖᤢᤱᤛᤡᤱᤅᤠᤱ ᤘᤠ᤹ᤒᤠ ᤂᤢᤶᤍᤡᤱᤅᤡᤴ ᤏᤢ ᤀᤠᤱᤃᤠ᤹ ᤂᤧᤱᤜᤠ᤹ ᤜᤡᤵᤋᤢᤱᤛᤡᤱᤅᤡᤸᤗᤧ ᤀᤠᤜᤢᤰᤁᤡᤸᤗᤧ ᤛᤠ᤺ᤵᤛᤢᤱᤛᤡᤱᤒᤠ ᤀᤠᤔᤢᤰᤛᤠᤶᤔᤡᤴ ᤁᤧᤖᤧᤰᤗᤧ ᤔᤧᤏᤡᤛᤢ᤹॥ 22 ᤜᤧᤰᤁᤩᤠᤱ ᤂᤧᤴ ᤕᤧᤶᤔᤠᤱᤎᤥ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ᤖᤧ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢ᤹॥ 23 ᤂᤧᤒᤩᤠᤱ ᤀᤡᤛᤪᤠᤀᤡᤗᤡᤜᤠ᤹ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴᤏᤢ ᤏᤛᤠ᤺ᤴᤛᤠᤒᤠ ᤔᤧᤶᤒᤥ᤺ᤰᤂᤧᤶᤒᤠᤸᤗᤧ ᤁᤢᤗᤧᤰᤘᤠ ᤂᤢᤶᤍᤡᤱᤗᤧ ᤗᤠᤃᤡ ᤂᤧᤱᤜᤠ᤹ ᤗᤠᤈᤣ᤹ᤗᤠᤶ ᤔᤧᤗ᤺ᤳᤋᤢᤛᤡᤀᤠᤱ ᤔᤠ᤺ᤱᤄᤠ ᤔᤧᤒᤠᤱᤄᤢ ᤔᤧᤍᤣᤛᤢᤛᤡᤀᤠᤱ ᤔᤧᤘᤕᤧᤒᤠ ᤑᤠ᤹ᤀᤠᤱ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢ᤹॥ ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤗᤠᤶᤒᤠ ᤀᤠᤱᤃᤠ᤹ ᤀᤠᤏᤠᤖᤠᤴ ᤆᤡᤰᤂᤢᤱ ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤢᤴᤇᤡ᤹ ᤏᤡᤱᤔᤡᤜᤠ᤹ᤀᤥ ᤜᤢᤰᤛᤢᤵᤋᤢᤱᤛᤡᤱ. ᤂᤧᤒᤩᤠᤱ ᤂᤧᤱᤜᤠ᤹ ᤁᤧᤖᤧᤰ ᤋᤠᤓᤣ᤺ᤸᤗᤧ ᤔᤧᤛᤥ᤺ᤴᤍᤢᤛᤡ॥ 24 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤠᤛᤢᤳᤌᤥ ᤏᤢ ᤂᤢᤴᤇᤡ᤹ ᤗᤠᤕᤥ ᤗᤠᤛᤥ᤺ᤳᤜᤠ᤹ᤖᤧ ᤆᤥᤃᤢᤸᤗᤧ. ᤀᤠᤱᤃᤠ᤹ ᤀᤠᤏᤠᤖᤠᤴ ᤌᤡᤰᤏᤠᤜᤠᤱ ᤜᤡᤛᤢᤱᤍᤣᤛᤢᤱᤅᤠᤱ ᤂᤧᤱᤜᤠ᤹ ᤂᤢᤶᤍᤡᤱ ᤐᤡᤖᤢᤱᤛᤡᤱᤗᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤏᤠᤜᤠ᤹ ᤕᤠᤶᤔᤥ ᤌᤥᤒᤥ ᤔᤧᤒᤥᤱ᤹ 25 “ᤂᤧᤸᤗᤧᤆᤥᤃᤢᤸᤗᤧ ᤀᤠᤸᤗ. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤗᤠᤈᤣ᤹ᤗᤠᤶ ᤔᤧᤍᤣ᤹ᤖᤢᤛᤡᤒᤠᤜᤠ᤹ ᤏᤢ᤺ᤰᤋᤢᤱ ᤑᤧᤳᤋᤢᤱᤛᤡᤱ᤹. ᤀᤠᤱᤃᤠ᤹ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤀᤠᤗᤢᤱᤔᤠ᤹ ᤛᤩᤠ᤺ᤳ ᤔᤧᤗ᤹. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤛᤣᤛᤣ ᤀᤠᤔᤡᤱᤛᤥ ᤀᤠᤎᤠᤱᤛᤥᤴ ᤀᤠᤏᤠᤜᤧᤴᤗ ᤁᤶᤒᤪᤠᤱ ᤔᤧᤳᤋᤢᤱ᤹᥄ 26 ᤂᤧᤱᤜᤠ᤹ ᤋᤢᤰᤂᤣ ᤁᤧᤈᤠ᤺ᤵᤐᤠ ᤜᤠ᤺ᤳᤋᤠᤱ ᤁᤧᤜᤥᤵᤐᤠ ᤀᤠᤵᤑᤣᤰ ᤂᤢᤴᤇᤡ᤹ ᤗᤠᤈᤣ᤹ᤀᤥᤒᤠ ᤜᤡᤶᤔᤥ ᤜᤠᤱᤜᤠᤱ ᤗ᤹ᤖᤡᤰ ᤕᤢᤱᤛᤧ ᤔᤧᤍᤠᤀᤠᤱ ᤀᤣᤃᤠᤱ. ᤂᤧᤱᤜᤠ᤹ᤖᤧ ᤐᤣᤕᤧᤶᤔᤥ ᤔᤧᤈᤥᤃᤢᤒᤠ ᤂᤢᤴᤇᤡ᤹ ᤛᤡᤖᤡᤱᤔᤔᤧᤴ ᤏᤢ ᤂᤢᤴᤇᤡ᤹ ᤀᤡᤱᤗᤧᤰᤐᤠ ᤏᤛᤠ᤺ᤴᤏᤡᤴ ᤏᤡᤱᤘᤠ᤹ ᤔᤧᤓᤣ᤺ᤳᤇᤢ᤹॥ 27 ᤀᤠᤱᤃᤠ᤹ ᤂᤢᤴᤇᤡ᤹ ᤏᤡᤱᤔᤡᤜᤠ᤹ᤖᤧ ᤗᤠᤈᤣ᤹ᤜᤠ᤹ᤀᤥᤗᤠᤶ ᤂᤧᤱᤜᤠ᤹ ᤜᤡᤶᤔᤥ ᤋᤠᤖᤢᤱᤛᤡᤱᤅᤡᤸᤗᤧ. ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤜᤠ᤹ᤖᤧ ᤀᤥᤔᤧᤔᤧᤳᤋᤢᤖ ᤑᤠ᤹ᤀᤠᤱ ᤀᤠᤱᤃᤠ᤹ ᤛᤣᤛᤣᤒᤠ ᤆᤥ᤺ᤰᤁᤠᤒᤠ ᤐᤠ᤺ᤴᤏᤡᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤀᤥᤛᤣ᤺ᤴᤎᤠᤱ ᤆᤥᤃᤢᤱ᤹॥ 28 ᤂᤧᤒᤩᤠᤱ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠ ᤑᤠ᤹ᤀᤠᤱ ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢ᤹. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤂᤧᤱᤜᤠ᤹ ᤗᤠᤈᤣ᤹ᤗᤠᤶ ᤗ᤺ᤳᤋᤢᤛᤡᤱᤅᤠᤱ ᤔᤠ᤺ᤱᤄᤠ ᤐᤠᤱᤄᤢᤱᤍᤣᤛᤢᤱᤛᤡᤱ ᤜᤧᤰᤁᤩᤠᤱ ᤜᤡᤶᤔᤥ ᤕᤠᤶᤔᤥ ᤏᤢ᤺ᤰᤋᤢᤱ ᤋᤠᤖᤢᤱᤛᤡᤱ᤹॥ ᤀᤠᤱᤃᤠ᤹ ᤀᤠᤳᤋᤡᤴ ᤀᤠᤔᤏᤠᤜᤠ᤹ᤀᤠᤱ ᤀᤣᤃᤠᤱ ᤔᤧᤗᤧᤖᤢᤱ ᤔᤧᤎᤠᤱᤛᤡᤱᤅᤡᤴ᤹॥ 29 ᤜᤧᤰᤁᤩᤠᤱ ᤂᤧᤱᤜᤠ᤹ᤗᤠᤶ ᤀᤠᤱᤃᤠ᤹ ᤀᤠᤏᤠᤖᤠᤴ ᤀᤠᤓᤧᤸᤗᤧᤀᤠᤱ ᤌᤡᤰᤏᤠᤜᤠᤱ ᤔᤧᤜᤡᤀᤠᤴ ᤔᤧᤍᤣᤀᤠᤴ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤀᤠᤕᤠᤶᤛᤠᤶᤔᤡᤴ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ᤀᤥ ᤐᤠᤱᤄᤢᤱ ᤕᤢᤛᤢᤱ᤹॥ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤴ ᤐᤠᤖᤠᤱᤅᤠᤱ ᤘᤠ᤹ᤖᤥ᥄” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.