ᤀᤡᤈᤁᤡᤀᤣᤗ 38 - LIFOTNT

ᤃᤥᤃᤖᤧ ᤁᤢᤍᤰᤗᤧᤱᤘᤠᤀᤥ ᤔᤠᤱᤏᤡᤱᤘᤠᤐᤠᤴ

¹ ᤕᤜᤘᤣ ᤍᤠᤱᤒᤠᤗᤠᤶ ᤁᤴ ᤘᤣ᤹ ᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤁᤧᤖᤧ—

² “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤂᤧᤏᤧ᤹ ᤜᤡᤛᤡᤱᤅᤧ᤹ ᤜᤧᤰᤁᤩᤠᤱ ᤔᤣᤛᤣᤁ ᤏᤢ ᤋᤢᤒᤗ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤀᤥ ᤕᤢᤰ ᤁᤧᤈᤥ᤺ᤰᤐᤠ ᤔᤠᤃᤥᤃ ᤗᤠᤈᤣ᤹ᤒᤠ ᤋᤢᤶ ᤕᤢᤰᤛᤠᤒᤠ ᤃᤥᤃᤧᤴ ᤗᤧᤵᤔᤠᤱ ᤁᤧᤏᤠᤖᤠᤴ ᤜᤡᤛᤧ᤹ᤀᤠᤱ ᤂᤢᤏᤧ᤹ ᤁᤢᤍᤰᤗᤧᤱᤘᤠᤀᤥ ᤔᤠᤱᤏᤡᤱᤘᤠᤴ ᤐᤠᤖᤧ᤹॥

³ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤗᤠᤶ ᤂᤧᤏᤧ᤹ ᤁᤴ ᤀᤡᤱᤄᤱᤅᤡᤴ ᤂᤢᤏᤧ᤹ ᤔᤧᤳᤋᤧ᤹—ᤔᤣᤛᤣᤁ ᤏᤢ ᤋᤢᤒᤗᤒᤠ ᤋᤢᤶ ᤕᤢᤰᤛᤠᤒᤠ. ᤃᤥᤃᤀᤣ. ᤀᤠᤱᤃᤠ᤹ ᤂᤧᤏᤧ᤹ ᤁᤧᤏᤡᤱᤔᤡᤀᤠ᥄

⁴ ᤀᤠᤱᤃᤠ᤹ ᤂᤧᤏᤧ᤹ ᤜᤡᤸᤗᤡᤰ ᤜᤡᤏᤧᤖᤥ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤎᤰᤛᤢᤒᤠᤜᤠ᤹ᤏᤢ ᤛᤥᤛᤥᤖᤡᤰ ᤂᤧᤏᤧ᤹ ᤁᤧᤀᤴᤜᤠ᤹ ᤏᤢ ᤑᤧᤈᤢᤶᤓᤧᤕᤠ ᤂᤈᤢᤶᤄᤕᤠ ᤁᤧᤃᤠᤵᤛᤡᤱᤒᤠ ᤀᤴᤗᤠᤎᤠ ᤁᤧᤗᤥᤱᤒᤠᤜᤠ᤹ ᤜᤧᤰᤁᤩᤠᤱ ᤂᤥᤜᤠ᤹ ᤏᤢ ᤋᤠᤓᤣᤜᤠ᤹ ᤁᤧᤃᤠᤵᤛᤡᤱᤒᤠ ᤀᤠᤳᤋᤠᤋᤠᤴᤏᤣ ᤕᤖᤡᤰ ᤌᤰᤛᤢᤒᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤗᤠ᤺ᤰᤁᤠᤳ ᤗᤠᤶᤗᤥᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤂᤧᤏᤧ᤹ ᤁᤧᤛᤡᤱᤍᤠᤱᤔᤥ ᤂᤣ᤺ᤱᤜᤠ᤹ᤖᤧ ᤘᤣ᤹ᤏᤧᤖᤥ॥

⁵ ᤑᤠᤖᤛ. ᤁᤢᤛ ᤜᤧᤰᤁᤩᤠᤱ ᤐᤢᤋᤒᤠᤜᤠ᤹ᤀᤠᤱ ᤂᤢᤴᤇᤡ᤹ ᤁᤧᤖᤧᤰ ᤂᤈᤢᤶᤄᤕᤠ ᤑᤧᤈᤢᤶᤓᤧᤕᤠᤜᤠ᤹ ᤔᤧᤃᤠᤵᤛᤡᤱᤅᤠᤱ ᤂᤧᤱᤜᤠ᤹ᤏᤢ ᤔᤧᤘᤠ᤹॥

⁶ ᤃᤥᤔᤣᤖᤧᤴ ᤜᤧᤰᤁᤩᤠᤱ ᤂᤧᤸᤗᤧ ᤁᤧᤖᤧᤰ ᤁᤢᤎᤰᤛᤢᤒᤠᤜᤠ᤹ᤀᤠᤱ ᤌᤥ ᤔᤠ᤺ᤱᤄᤠ ᤌᤠᤱᤃᤧᤳ ᤗᤧᤵᤔᤠᤱᤒᤠ ᤒᤣᤌ-ᤋᤥᤃᤷᤔᤠᤒᤠ ᤌᤰᤛᤢᤒᤠᤜᤠ᤹ ᤂᤧᤒᤩᤠᤱ ᤕᤖᤡᤰ ᤘᤣ᤹ᤜᤠ᤹ᤏᤢ ᤛᤥᤛᤥᤖᤡᤰ ᤔᤧᤘᤠ᤹॥

⁷ “ᤂᤧᤏᤧ᤹ ᤋᤠᤶᤛᤡᤱᤅᤧ᤹. ᤂᤧᤏᤧ᤹ ᤕᤠᤖᤡᤵ ᤐᤥ᤺ᤰᤂᤧ᤹᥄ ᤂᤧᤏᤧ᤹ ᤁᤧᤃᤧᤖᤧᤰ ᤐᤡᤛᤠᤱ ᤁᤧᤖᤧᤰ ᤌᤰᤛᤢᤒᤠᤜᤠ᤹ ᤔᤢᤖᤠᤔᤧᤳᤋᤧᤛᤧ᤹. ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤡᤱᤈᤠᤱ ᤐᤡᤖᤧᤛᤧ᤹॥

⁸ ᤕᤖᤡᤰ ᤕᤧᤴ ᤀᤣᤃᤠᤱ ᤂᤡᤏᤡ᤹ ᤌᤱ ᤆᤥ᤺ᤰᤛᤧ ᤁᤧᤶᤀᤢ᤺ᤳᤋᤡ᤹॥ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤕᤖᤡᤰ ᤗᤠᤈᤣ᤹ᤜᤠ᤹ᤀᤥᤗᤠᤶ ᤁᤵᤔᤥᤒᤠ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ᤀᤥ ᤔᤧᤏᤢ᤺ᤱᤒᤠ ᤀᤣᤃᤠᤱ ᤏᤢ ᤋᤧᤴᤎᤱᤗᤠᤶ ᤏᤠᤍᤱ ᤐᤥᤱᤅᤠᤱ ᤏᤢ᤹ᤔᤠ ᤋᤠᤔᤠ ᤛᤏᤠᤖᤢᤱᤏᤢ ᤏᤡᤱᤘᤠ᤹ ᤜᤠᤱᤜᤠᤱ ᤔᤧᤕᤢᤱᤒᤠ ᤋᤠ᤺ᤴᤍᤡᤒᤠ ᤋᤠᤕᤧᤶᤔᤥ ᤀᤡᤛᤪᤠᤀᤡᤗᤒᤠ ᤗᤠᤈᤣᤴ ᤂᤡᤏᤡ᤹ ᤌᤱᤅᤥ ᤁᤧᤓᤳᤋᤢᤶ᤹॥

⁹ ᤛᤢᤖᤡᤳ ᤁᤣᤈᤱ ᤏᤢ ᤂᤠ᤹ᤔᤡ᤺ᤳᤋᤡᤸᤗᤧ ᤗᤠᤈᤣᤴ ᤆᤡᤒᤴ ᤐᤴᤇᤢᤒᤠ ᤁᤢᤀᤡᤛᤡᤰ ᤂᤧᤏᤧ᤹ ᤏᤢ ᤂᤧᤏᤧ᤹ ᤁᤧᤓᤠ᤹ᤒᤠ ᤁᤧᤖᤧᤰ ᤗᤠᤈᤣ᤹ᤜᤠ᤹. ᤀᤠᤳᤋᤠᤋᤠᤴᤏᤣ ᤕᤖᤡᤰ ᤜᤧᤰᤁᤩᤠᤱ ᤁᤡᤵᤔᤠᤃᤧᤄᤢᤒᤠ ᤌᤰᤛᤢᤒᤠᤜᤠ᤹ᤖᤧ ᤂᤧᤱᤜᤠ᤹ ᤁᤧᤒᤴᤇᤢᤶᤛᤡᤶ᤹॥

¹⁰ “ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ᤂᤧᤴ ᤕᤧᤶᤔᤥ ᤂᤧᤏᤧ᤹ ᤁᤧᤏᤡᤱᤘᤠ᤹ᤀᤥ ᤋᤠᤵᤑᤧ᤺ᤶᤒᤠ ᤐᤠ᤺ᤴᤜᤠ᤹ ᤁᤧᤀᤡ᤺ᤳᤋᤢ᤹. ᤜᤧᤰᤁᤩᤠᤱ ᤑᤧᤴᤕᤠ᤺ᤶᤒᤰ ᤆᤥ᤺ᤰᤔᤠ ᤗᤠᤶᤀᤥᤔᤧᤵᤔᤠ ᤁᤧᤜᤣ᤺ᤰᤋᤢ᤹॥

¹¹ ᤂᤧᤏᤧ᤹ ᤀᤰᤂᤣ ᤁᤧᤒᤠ᤺ᤳᤋᤢ᤹. ‘ᤀᤡᤛᤪᤠᤀᤡᤗᤧᤱᤃ ᤗᤢᤱᤎᤠᤰ. ᤗᤠᤶᤎᤣᤳ ᤏᤢ ᤁᤢᤛᤠᤰᤔᤠ ᤔᤣ᤺ᤴᤏᤣᤒᤠ ᤐᤠᤱᤓᤣ᤹ᤜᤠ᤹ᤖᤧ ᤁᤧᤍᤡᤶᤒᤠ ᤁᤶᤒᤪᤠᤱ ᤔᤧᤶᤔᤧᤳᤋᤢᤶᤒᤠ ᤗᤠᤈᤣ᤹ᤖᤥ᥄ ᤀᤠᤱᤃᤠ᤹ ᤂᤧᤴ ᤆᤡᤖᤠᤰ ᤆᤡᤖᤠᤰ ᤗᤠ᤺ᤰᤋᤢᤱ᤹ ᤜᤧᤰᤁᤩᤠᤱ ᤁᤶᤓᤗ᤹ᤖᤡᤰ ᤜᤠᤱᤜᤠᤱ ᤁᤧᤕᤢᤱᤒᤠ ᤁᤴ ᤔᤏᤠᤜᤠ᤹ ᤔᤧᤰᤂᤢᤱᤛᤡᤱ᤹᥄

¹² ᤗᤠᤈᤣ᤹ᤗᤠᤶ ᤔᤧᤗ᤺ᤳᤋᤢ ᤔᤧᤍᤣᤛᤢᤛᤡᤒᤠ ᤕᤖᤡᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤀᤥᤗᤠᤶ ᤁᤧᤏᤢ᤺ᤱᤒᤠ ᤁᤧᤍᤠᤒᤠ ᤔᤏᤠᤜᤠ᤹ᤖᤧ ᤂᤧᤴ ᤋᤃᤡ ᤂᤠᤵᤐᤢᤌᤩ᤺ᤱ ᤆᤡᤈᤡ ᤂᤰᤂᤰ ᤁᤧᤒᤥᤱᤒᤠ ᤕᤧᤰᤕᤰᤜᤠ᤹ ᤀᤠᤸᤗᤥ ᤔᤧᤎᤡᤶᤛᤢᤀᤠᤱ ᤏᤧᤖᤥ॥ ᤂᤧᤱᤜᤠ᤹ᤖᤧ ᤌᤰᤛᤠᤜᤠ᤹ ᤏᤢ ᤘᤣ᤹ ᤆᤡᤃᤰᤘᤠᤜᤠ᤹ ᤔᤧᤃᤳᤋᤢᤀᤠᤱ ᤔᤧᤕᤢᤱ᤹. ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤔᤧᤃᤳᤋᤢᤒᤠ ᤁᤧᤖᤧᤰ ᤏᤠᤵᤋᤢᤱᤛᤡᤱᤅᤠᤱ ᤔᤧᤰᤂᤢᤱᤛᤡᤱ᤹. ᤂᤧᤱᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤗᤠᤶᤍᤥᤀᤥ ᤔᤧᤕᤢᤱ᤹᥄’

¹³ ᤁᤖ ᤛᤣᤒᤠ ᤏᤢ ᤍᤍᤠᤏᤒᤠ ᤔᤏᤠᤜᤠ᤹ ᤜᤧᤰᤁᤩᤠᤱ ᤋᤷᤛᤡᤛᤒᤠ ᤗᤧᤱᤜᤱᤒᤠᤜᤠ᤹ᤖᤧ ᤂᤧᤏᤧ᤹ ᤛᤧ᤺ᤴᤃᤧᤶᤍᤥ. ‘ᤂᤧᤏᤧ᤹ ᤁᤧᤓᤢᤰᤂᤢᤛᤡᤀᤠᤱ ᤁᤧᤘᤠ᤹ᤒᤠ ᤌᤰᤛᤢᤒᤠᤜᤠ᤹ᤖᤧ ᤂᤧᤱᤜᤠ᤹ ᤕᤢᤵᤐᤠ ᤏᤢ ᤛᤠᤶᤔᤩᤠᤱ ᤏᤠᤵᤔᤠ ᤔᤧᤛᤢᤰᤋᤢᤛᤡ ᤑᤠ᤹ᤀᤠᤱ ᤂᤧᤏᤧ᤹ ᤁᤧᤀᤡ᤺ᤳᤋᤢᤒᤡ᥅ ᤌᤣ ᤂᤧᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤰᤛᤠᤜᤠ᤹ ᤏᤠ᤺ᤵᤔᤠᤍᤣ᤹ᤔᤠᤛᤡ ᤏᤢ ᤂᤢᤴᤇᤡ᤹ ᤆᤡᤃᤰᤘᤠ ᤛᤠᤔᤠᤜᤠ᤹ ᤜᤢᤰᤁᤠᤵ ᤆᤥ᤺ᤰᤔᤠ ᤜᤧᤰᤁᤩᤠᤱ ᤁᤧᤏᤠᤵᤋᤢᤛᤡᤒᤠ ᤛᤠᤔᤠᤜᤠ᤹ ᤁᤢᤔᤠᤍᤣ᤹ᤔᤠ ᤛᤢᤰᤔᤠ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤒᤡ᥅’

¹⁴ “ᤂᤧᤸᤗᤧᤆᤥᤃᤢᤸᤗᤧ. ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤂᤧᤏᤧ᤹ ᤃᤥᤃᤖᤧ ᤁᤢᤍᤰᤗᤧᤱᤘᤠᤀᤥ ᤔᤠᤱᤏᤡᤱᤘᤠ᤹ᤐᤠᤴ ᤐᤠ᤺ᤳᤋᤧ᤹॥ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤗᤠᤶ ᤂᤧᤏᤧ᤹ ᤁᤴ ᤀᤡᤱᤄᤱᤅᤡᤴ ᤂᤢᤏᤧ᤹ ᤔᤧᤳᤋᤧ᤹—ᤀᤠᤱᤃᤠ᤹ ᤀᤠᤔᤏᤠ ᤀᤡᤛᤪᤠᤀᤡᤗᤡᤜᤠ᤹ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤜᤠᤱᤜᤠᤱ ᤗ᤹ᤖᤡᤰ ᤛᤏᤠᤖᤢᤱ ᤔᤧᤕᤢᤱᤅᤡᤸᤗᤧ. ᤂᤧᤏᤧ᤹ ᤀᤠᤵᤑᤣᤰ ᤏᤡᤱᤘᤠ᤹ ᤁᤧᤴᤜᤧᤳᤇᤡᤱᤅᤧᤴᤒᤡ᥅

¹⁵ ᤂᤧᤏᤧ᤹ ᤜᤧᤰᤁᤩᤠᤱ ᤂᤧᤏᤧ᤹ᤏᤢ ᤕᤖᤡᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤌᤠᤱᤃᤧᤳ ᤔᤠ᤺ᤱᤄᤠᤒᤠ ᤁᤧᤗᤠᤈᤣ᤹ᤀᤥᤗᤠᤶ ᤀᤠᤳᤋᤠᤋᤠᤴᤏᤣ ᤕᤖᤡᤰ ᤀᤴᤃᤧᤕᤢᤰᤐᤠᤜᤠ᤹ ᤜᤧᤰᤁᤩᤠᤱ ᤔᤢᤰᤛᤠᤶᤒᤠ ᤁᤧᤎᤰᤛᤢᤒᤠᤜᤠ᤹ᤏᤢ ᤂᤧᤏᤧ᤹ ᤁᤧᤕᤢ.

¹⁶ ᤜᤧᤰᤁᤩᤠᤱ ᤂᤠ᤹ᤔᤡ᤺ᤳᤋᤧᤸᤗᤧ ᤗᤠᤈᤣᤴ ᤐᤴᤇᤢᤒᤠ ᤁᤢᤀᤡᤛᤡᤰ ᤂᤧᤏᤧ᤹ ᤀᤠᤱᤃᤠ᤹ ᤀᤠᤔᤏᤠ ᤀᤡᤛᤪᤠᤀᤡᤗᤡᤜᤠ᤹ ᤌᤱᤅᤥ ᤁᤧᤓᤳᤋᤢᤛᤡ᤹॥ ᤋᤠ᤺ᤴᤍᤡ ᤁᤧᤍᤠᤒᤠ ᤕᤧᤶᤔᤥ. ᤃᤥᤃᤀᤣ. ᤀᤠᤱᤃᤠ᤹ ᤀᤠᤗᤠᤈᤣ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤂᤧᤏᤧ᤹ ᤋᤠ᤺ᤳᤏᤧᤖᤥ. ᤜᤧᤰᤁᤣᤗ᤹ᤖᤡᤰ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤂᤧᤏᤧ᤹ᤗᤠᤶᤒᤠ ᤀᤠᤛᤣᤛᤣᤴ ᤀᤥᤛᤣ᤺ᤴᤎᤠᤱ ᤆᤥᤃᤢᤱᤅᤡᤸᤗᤧ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢᤖᤥ॥

¹⁷ “ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤋᤠ᤺ᤴᤍᤡᤒᤠ ᤋᤠᤕᤧᤶᤔᤥ ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤂᤧᤏᤧ᤹ ᤋᤠ᤺ᤳᤏᤧ ᤑᤠ᤹ᤀᤠᤱ ᤀᤡᤛᤪᤠᤀᤡᤗᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤀᤠᤛᤧᤘᤠᤖᤥᤒᤠᤜᤠ᤹ᤗᤠᤶ ᤀᤢᤘᤠ ᤆᤥᤃᤢᤱᤅᤡᤸᤗᤧ. ᤀᤠᤱᤃᤠ᤹ ᤕᤖᤡᤰ ᤕᤧᤶ ᤋᤃᤡ ᤐᤠ᤺ᤳᤋᤢᤱᤅᤠᤱ ᤘᤕᤠᤱᤒᤠ ᤔᤏᤠᤴ ᤌᤣ ᤂᤧᤏᤧ᤹ᤀᤣᤏᤧᤒᤡ᥅

¹⁸ ᤁᤖ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤃᤥᤃᤧᤸᤗᤧ ᤀᤡᤛᤪᤠᤀᤡᤗ ᤗᤠᤈᤣᤴ ᤗᤡᤛᤢ ᤋᤠᤖᤢᤸᤗᤧ. ᤀᤠᤱᤃᤠ᤹ ᤀᤠᤛᤠᤰᤁᤧᤴᤏᤡᤴ ᤔᤡ ᤜᤧᤰᤁᤣ ᤋᤡ᤺ᤳ᥄

¹⁹ ᤀᤠᤱᤃᤠ᤹ ᤀᤠᤏᤠᤜᤧᤶᤔᤠ ᤏᤢ ᤔᤡ ᤜᤧᤰᤁᤣ ᤁᤧᤍᤡ᤺ᤵᤐᤠ ᤀᤠᤛᤡᤰ ᤐᤥ᤺ᤰᤔᤥ. ᤂᤧᤴ ᤕᤧᤴᤏᤥ ᤀᤡᤛᤪᤠᤀᤡᤗ ᤗᤠᤈᤣ᤹ᤀᤥ ᤗᤳᤇᤠ ᤕᤶᤒᤠ ᤗᤢᤵᤗᤡ ᤌᤠᤱ ᤑᤠ᤹ᤀᤠᤱ ᤀᤠᤸᤗ ᤀᤢᤘᤠ ᤆᤥᤃᤢᤱ᤹॥

²⁰ ᤁᤧᤖᤧᤰ ᤁᤢᤜᤡᤱᤘᤧᤳ ᤌᤰᤛᤠᤜᤠ᤹. ᤘᤖ᤺ᤱᤅᤥᤒᤠ ᤅᤠᤜᤠ᤹. ᤋᤠᤱᤛᤠᤱᤒᤥᤒᤠ ᤐᤢᤛᤠᤜᤠ᤹. ᤂᤠᤶᤒᤠᤱᤅᤥᤒᤠ ᤌᤰᤛᤠᤜᤠ᤹. ᤂᤠᤶᤒᤣ᤺ᤰᤔᤥ ᤏᤠᤏᤠ ᤁᤳᤏᤠ ᤁᤧᤀᤢ᤺ᤱᤛᤡᤱᤒᤠ ᤁᤧᤛ᤺ᤴᤇᤡᤱᤒᤠ ᤆᤢᤈᤢᤰᤛᤠ ᤌᤰᤛᤠᤜᤠ᤹. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤀᤠᤱᤃᤠ᤹ ᤀᤠᤒᤣᤛᤠᤱ ᤐᤃᤡ ᤔᤧᤃᤡᤀᤠᤱ ᤌᤧᤃᤰᤁᤰᤏᤠ ᤔᤧᤕᤱ᤹॥ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ ᤆᤥ᤺ᤴᤎᤠ. ᤛᤡᤕᤠᤰᤐᤣ᤹ ᤌᤧᤕᤠᤰᤐᤣ᤹ᤜᤠ᤹ ᤐᤰᤁᤪᤧ᤹ ᤐᤰᤁᤪᤧ᤹ ᤐ᤺ᤱᤎᤠ ᤂᤶᤓᤩᤠᤱ ᤗᤢᤱᤎᤠᤰᤜᤠ᤹ ᤂᤠᤶᤒᤠᤱᤅᤥ ᤗᤢ᤺ᤴ॥

²¹ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤜᤠ᤹ᤀᤥ ᤀᤠᤱᤃᤠ᤹ ᤃᤥᤃᤖᤧ ᤁᤢᤍᤰᤗᤧᤱᤘᤠᤀᤥ ᤋᤠᤓᤣᤴ ᤀᤢ᤺ᤳᤋᤢᤱ᤹. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹॥ ᤔᤏᤠᤜᤠ᤹ ᤂᤢᤴᤇᤡ᤹ ᤀᤠᤵᤑᤣᤰ ᤋᤠᤓᤣᤜᤠ᤹ᤖᤧ ᤐᤠᤰᤗᤧ ᤐᤠᤰᤗᤧ ᤔᤧᤈᤩᤧᤵᤛᤡᤱ᤹॥

²² ᤀᤠᤱᤃᤠ᤹ ᤂᤢᤏᤧ᤹ ᤏᤢ ᤁᤢᤎᤰᤛᤢᤒᤠᤜᤠ᤹ ᤔᤡᤱᤍᤣ᤹ ᤏᤢ ᤔᤠᤰᤂᤡ᤹ ᤛᤡᤘᤠᤖᤧ ᤂᤢᤶᤍᤡᤱ ᤐᤡᤖᤢᤱᤛᤡᤱ᤹. ᤀᤠᤱᤃᤠ᤹ ᤀᤠᤳᤋᤠᤋᤠᤴᤏᤣ ᤕᤶᤒᤠ ᤘᤜᤡᤳ. ᤑ᤺ᤴ. ᤔᤡᤎᤢᤱ ᤔᤡᤖᤠ᤺ᤰ ᤏᤢ ᤔᤡ ᤁᤧᤍᤡ᤺ᤵᤐᤠ ᤁᤠᤴᤎᤠᤰ ᤌᤠᤖ ᤕᤠ᤺ᤴᤍᤢᤱ᤹॥

²³ ᤁᤶᤓᤗ᤹ᤖᤡᤰ. ᤀᤠᤱᤃᤠ᤹ ᤐᤕᤶ ᤕᤶᤒᤠ ᤆᤥ᤺ᤰᤁᤠᤒᤠᤴ ᤏᤢ ᤀᤠᤱᤃᤠ᤹ ᤛᤣᤛᤣᤒᤠ ᤆᤥ᤺ᤰᤁᤠᤒᤠᤴ ᤀᤥᤛᤣ᤺ᤴᤎᤠᤱ ᤆᤥᤃᤢᤱ᤹. ᤜᤧᤰᤁᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤵᤑᤣᤰ ᤁᤢᤛᤡᤱ ᤔᤧᤏᤡ᤺ᤳᤋᤠᤖ ᤆᤥᤃᤢᤱ᤹॥ ᤂᤧᤒᤩᤠᤱ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢᤖᤥ॥”