ᤀᤡᤈᤁᤡᤀᤣᤗ 37 - LIFOTNTᤁᤧᤜᤣᤒᤠ ᤛᤠᤕᤧᤵᤜᤠ᤹ᤖᤧ ᤁᤧᤍᤡᤶᤒᤠ ᤏᤧᤏᤧᤒᤠᤍᤧᤴ 1 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤢᤰᤁᤡᤴ ᤀᤠᤱᤃᤠ᤹ ᤀᤠᤛᤶᤎᤠᤱ ᤐᤳᤇᤧ. ᤜᤧᤰᤁᤩᤠᤱ ᤛᤠᤕᤧᤵᤐᤠᤜᤠ᤹ᤖᤧ ᤛᤎᤧᤰ ᤁᤧᤍᤡᤶᤒᤠ ᤗᤳᤇᤠ ᤏᤧᤏᤧᤒᤠᤍᤧᤴᤏᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤕᤠᤶᤛᤠᤶᤔᤡᤸᤗᤧ ᤀᤠᤱᤃᤠ᤹ ᤐᤰᤂᤠᤱ ᤋᤣ᤹ᤖᤠᤱ॥ 2 ᤏᤧᤏᤧᤒᤠᤍᤧᤴᤏᤥᤒᤠ ᤂᤠᤶᤒᤠᤱᤅᤡᤴ ᤛᤡᤍᤧᤵ ᤋᤧᤵᤋᤢᤒᤠ ᤛᤠᤕᤧᤵᤐᤠᤜᤠ᤹ᤖᤧ ᤁᤢᤗᤢᤶᤔᤥ ᤁᤧᤖᤧᤰ ᤐᤡᤛᤠᤱ ᤂᤢᤏᤧ᤹ ᤀᤠᤱᤃᤠ᤹ ᤗᤠᤶᤗᤥᤛᤠᤱ॥ ᤂᤧᤴ ᤛᤠᤕᤧᤵᤜᤠ᤹ ᤂᤠᤶᤒᤠᤱᤅᤥ ᤂᤰᤐᤧᤳ ᤛᤷᤃᤧᤱ ᤜᤧᤖᤧᤀᤠᤱ ᤁᤧᤖᤧᤰ ᤐᤡᤛᤠᤱ ᤛᤧᤖᤧᤀᤠᤱ ᤏᤧᤛ᤻ᤛᤧ॥ 3 ᤂᤧᤒᤩᤠᤱ ᤂᤢᤏᤧ᤹ ᤀᤠᤱᤃᤠ᤹ ᤛᤣ᤺ᤴᤍᤥᤛᤠᤱ. “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤌᤣ ᤁᤴ ᤛᤠᤕᤧᤵᤐᤠᤜᤠ᤹ ᤕᤠᤶᤔᤥ ᤁᤢᤜᤡᤱᤘᤧᤳ ᤐᤥᤱᤔᤠ ᤔᤧᤛᤢᤰᤐᤡ᥅” ᤀᤠᤱᤃᤠ᤹ ᤏᤢᤃᤵ ᤐᤡᤖᤢᤱ. “ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤀᤣ. ᤂᤧᤴ ᤐᤠ᤺ᤴᤏᤡᤸᤗᤧ ᤏᤢᤃᤵᤐᤡᤱᤃ ᤂᤧᤏᤧ᤹ᤖᤰ ᤁᤧᤗᤧᤛᤢᤖᤥ॥” 4 ᤂᤧᤒᤩᤠᤱ ᤂᤢᤏᤧ᤹ ᤀᤠᤱᤃᤠ᤹ ᤔᤧᤳᤋᤠᤱ. “ᤁᤴ ᤛᤠᤕᤧᤵᤐᤠᤜᤠ᤹ᤖᤧ ᤔᤠᤱᤏᤡᤱᤘᤠ᤹ᤐᤠᤴ ᤔᤧᤳᤋᤧᤛᤧ᤹ᤀᤠᤱ ᤂᤧᤏᤧ᤹ ᤐᤠᤖᤧ᤹. ‘ᤁᤧᤜᤣᤒᤠ ᤛᤠᤕᤧᤵᤐᤠᤛᤧ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤅᤡᤴ ᤂᤧᤵᤛᤧᤶᤔᤧ᤹᥄ 5 ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤀᤥᤔᤧᤳᤋᤧᤶᤔᤧ᤹᥄ ᤀᤠᤱᤃᤠ᤹ ᤂᤡᤏᤡ᤹ᤀᤥ ᤛᤠ᤺ᤱᤃᤢᤃᤧᤴ ᤛᤰᤔᤠ ᤔᤢ᤺ᤳᤋᤢᤱ ᤁᤣ᤺ᤳᤋᤢᤱ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤡᤏᤡ᤹ ᤕᤠᤶᤔᤥ ᤁᤢᤜᤡᤱᤘᤧᤳ ᤆᤥ᤺ᤰᤏᤡᤱ᤹᥄ 6 ᤀᤠᤱᤃᤠ᤹ ᤂᤡᤏᤡ᤹ᤀᤥ ᤏᤧᤰᤛᤠ ᤏᤢ ᤜᤧᤴᤏᤧᤰᤛᤠ ᤁᤣ᤺ᤳᤋᤢᤱ᤹ ᤜᤧᤰᤁᤩᤠᤱ ᤜᤥᤖᤡᤰᤐᤠᤸᤗᤧ ᤐᤴᤏᤧᤏᤡᤱ᤹॥ ᤀᤠᤱᤃᤠ᤹ ᤂᤡᤏᤡ᤹ᤀᤥ ᤛᤠ᤺ᤱᤃᤢᤃᤧᤴ ᤛᤰᤔᤠ ᤔᤢ᤺ᤳᤋᤢᤱ ᤁᤣ᤺ᤳᤋᤢᤱ ᤐᤡᤏᤡᤱ᤹. ᤜᤧᤰᤁᤩᤠᤱ ᤂᤡᤏᤡ᤹ ᤁᤢᤜᤡᤱᤘᤧᤳ ᤁᤧᤒᤥ᤺ᤰᤂᤡ᤹॥ ᤂᤧᤒᤩᤠᤱ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤂᤡᤏᤡ᤹ ᤏᤡᤱᤘᤠ᤹ ᤁᤧᤄᤥᤛᤢᤶ᤹॥’” 7 ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤁᤴ ᤀᤡᤱᤄᤱᤅᤡᤴ ᤂᤢᤏᤧ᤹ ᤔᤧᤳᤋᤠᤱᤒᤠ ᤁᤢᤀᤡᤛᤡᤰ ᤐᤠ᤺ᤳᤋᤢᤱ॥ ᤆᤄᤵ ᤀᤠᤱᤃᤠ᤹ ᤐᤠᤖᤠᤱᤗ ᤐᤳᤇᤠᤱᤅᤡᤸᤗᤧ. ᤏᤧᤏᤧᤒᤠᤍᤧᤴ ᤁᤧᤖᤧᤰ ᤐᤡᤛᤠᤱ ᤂᤖᤠᤱ ᤂᤡᤖᤡᤱ ᤁᤧᤗ᤹ᤒᤠ ᤀᤡᤰᤗᤠ ᤗ᤺ᤴᤍᤧ॥ ᤁᤧᤖᤧᤰ ᤏᤠᤛᤡᤃᤧᤴ ᤌᤰᤗᤠᤀᤥᤒᤠ ᤛᤠᤕᤧᤵᤐᤠᤜᤠ᤹ ᤛᤥᤛᤥᤖᤡᤰ ᤔᤧᤍᤩᤧ ᤜᤧᤰᤁᤩᤠᤱ ᤂᤧᤴ ᤛᤠᤕᤧᤵᤐᤠᤜᤠ᤹ ᤔᤏᤠ ᤆᤀᤡ᤺ᤳᤋᤥ ᤀᤠᤵᤑᤣᤰ ᤂᤰᤐᤧᤳ ᤔᤧᤈᤰᤛᤡᤱ॥ 8 ᤂᤧᤒᤩᤠᤱ ᤀᤠᤱᤃᤠ᤹ ᤀᤥᤔᤧᤳᤋᤢᤱᤅᤠᤱ ᤐᤳᤇᤠᤱᤅᤡᤸᤗᤧ. ᤛᤠᤘᤣ᤺ᤳ ᤗᤢᤱᤛᤡᤜᤠ᤹ ᤏᤢ ᤏᤧᤰᤛᤠᤜᤠ᤹ᤖᤧ ᤛᤠᤕᤧᤵᤐᤠᤜᤠ᤹ ᤐᤴᤇᤢ॥ ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤰᤁᤡᤴ ᤋᤧᤵᤔᤠᤖᤧ ᤗᤠᤃᤡ ᤜᤥᤖᤡᤰᤐᤠᤸᤗᤧ ᤐᤴᤇᤢ. ᤁᤖ ᤀᤠᤸᤗᤛᤠᤱ ᤂᤧᤱᤜᤠ᤹ᤀᤥ ᤛᤠ᤺ᤱᤃᤢᤃᤧᤴ ᤛᤰᤔᤠ ᤜᤥ᤺ᤵᤋᤧ॥ 9 ᤂᤧᤒᤩᤠᤱ ᤂᤢᤏᤧ᤹ ᤀᤠᤱᤃᤠ᤹ ᤀᤰᤂᤣ ᤔᤧᤳᤋᤠᤱ. “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤛᤢᤖᤡᤳ ᤁᤣᤈᤱᤅᤡᤴ ᤔᤠᤱᤏᤡᤱᤘᤠ᤹ᤐᤠᤴ ᤀᤡᤱᤄᤱ ᤔᤧᤳᤋᤧ᤹॥ ᤔᤠᤱᤏᤡᤱᤘᤠ᤹ᤐᤠᤴ ᤀᤡᤱᤄᤱ ᤐᤠᤖᤧ᤹ᤀᤠᤱ ᤀᤰᤂᤣ ᤔᤧᤳᤋᤧ᤹. ‘ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤛᤠ᤺ᤱᤃᤥᤃᤧᤴ ᤛᤰᤔᤠᤀᤣ. ᤁᤧᤖᤧᤰ ᤐᤡᤛᤠᤱᤒᤠ ᤛᤢᤖᤡᤳ ᤁᤣᤈᤱᤜᤠ᤹ᤗᤠᤶ ᤋᤩᤧ᤹ᤀᤥ᥄ ᤁᤴ ᤁᤢᤛᤡᤘᤧᤳ ᤏᤠᤛᤡᤃᤧᤴ ᤌᤰᤜᤠ᤹ᤀᤥ ᤛᤰᤔᤠ ᤛᤥ᤺ᤴᤇᤡᤱᤅᤧ᤹ ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ ᤕᤠᤶᤔᤥ ᤁᤢᤜᤡᤱᤘᤧᤳ ᤔᤧᤒᤥᤱᤗᤖᤥ॥’” 10 ᤜᤧᤰᤁᤣᤗ᤹ᤖᤡᤰ ᤂᤢᤏᤧ᤹ ᤀᤡᤱᤈᤠᤱ ᤐᤡᤖᤠᤱᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤔᤠᤱᤏᤡᤱᤘᤠ᤹ᤐᤠᤴ ᤐᤠ᤺ᤳᤋᤢᤱ. ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤰᤜᤠ᤹ᤀᤥ ᤛᤠ᤺ᤱᤃᤢᤃᤧᤴ ᤛᤰᤔᤠ ᤗᤠᤛᤧ॥ ᤂᤧᤱᤜᤠ᤹ ᤁᤧᤖᤧᤰ ᤁᤢᤜᤡᤱᤘᤧᤳ ᤔᤧᤒᤥ᤺ᤰᤂᤧᤀᤠᤱ ᤀᤠᤳᤋᤠᤋᤠᤴᤏᤣ ᤕᤖᤡᤰ ᤌᤰᤛᤢᤒᤠ ᤁᤢᤀᤡᤛᤡᤰ ᤋᤰᤐᤧᤳ ᤔᤧᤕᤧᤶᤛᤡᤱ॥ 11 ᤂᤧᤒᤩᤠᤱ ᤂᤢᤏᤧ᤹ ᤀᤠᤱᤃᤠ᤹ ᤔᤧᤳᤋᤠᤱ. “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ᤃ ᤁᤴ ᤛᤠᤕᤧᤵᤐᤠᤜᤠ᤹ ᤜᤧᤰᤋᤱᤒᤠ ᤔᤧᤈᤥᤰ॥ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ᤹. ‘ᤀᤠᤏᤡᤃᤣ ᤁᤧᤜᤣᤒᤠ ᤛᤠᤕᤧᤵᤐᤠᤍᤡᤃᤧ. ᤀᤠᤏᤡᤃᤣ ᤌᤣᤀᤠᤱ ᤏᤡᤱᤛᤠᤱ ᤆᤥ᤺ᤰᤔᤠ ᤗᤠᤶ ᤜᤥᤵ. ᤀᤠᤏᤡᤃᤣ ᤗᤠᤈᤣᤴ ᤔᤧᤃᤧ॥’ 12 ᤂᤧᤸᤗᤧᤆᤥᤃᤢᤸᤗᤧ. ᤂᤧᤏᤧ᤹ ᤔᤠᤱᤏᤡᤱᤘᤠ᤹ᤐᤠᤴ ᤐᤠᤖᤧ᤹ᤀᤠᤱ ᤂᤧᤱᤜᤠ᤹ ᤔᤧᤳᤋᤧᤛᤧ᤹. ‘ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤀᤠᤱᤃᤠ᤹ ᤀᤠᤔᤏᤠᤛᤣ. ᤗᤠᤈᤣ᤹ᤗᤠᤶ ᤁᤧᤶᤗ᤺ᤳᤋᤡ ᤁᤧᤶᤍᤣᤛᤡᤒᤠ ᤂᤡᤏᤡ᤹ ᤀᤡᤐᤢᤱᤜᤠ᤹ ᤀᤠᤱᤃᤠ᤹ ᤜᤴᤍᤢᤱ᤹ ᤜᤧᤰᤁᤩᤠᤱ ᤂᤡᤏᤡ᤹ ᤕᤠᤶᤔᤥ ᤁᤧᤒᤥᤃᤡᤖ ᤕᤠ᤺ᤴᤏᤡᤱ᤹॥ ᤂᤧᤒᤩᤠᤱ ᤀᤠᤱᤃᤠ᤹ ᤀᤡᤛᤪᤠᤀᤡᤗ ᤗᤠᤈᤣ᤹ᤀᤥ ᤂᤡᤏᤡ᤹ ᤕᤠᤶᤔᤥ ᤏᤢ᤺ᤰᤏᤡᤱ ᤋᤠ᤺ᤳᤏᤡᤱ᤹॥ 13 ᤀᤠᤱᤃᤠ᤹ ᤀᤠᤔᤏᤠᤛᤣ. ᤁᤴ ᤐᤠ᤺ᤴᤜᤠ᤹ ᤐᤥᤱᤅᤡᤸᤗᤧ. ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤂᤡᤏᤡ᤹ ᤏᤡᤱᤘᤠ᤹ ᤁᤧᤄᤥᤛᤢᤶ᤹॥ 14 ᤀᤠᤱᤃᤠ᤹ ᤀᤠᤕᤠᤶᤛᤠᤶᤔᤡᤴ ᤂᤡᤏᤡ᤹ᤀᤥ ᤁᤣ᤺ᤳᤋᤢᤱ᤹. ᤜᤧᤰᤁᤩᤠᤱ ᤂᤡᤏᤡ᤹ ᤁᤢᤜᤡᤱᤘᤧᤳ ᤁᤧᤒᤥ᤺ᤰᤂᤡᤀᤠᤱ ᤂᤡᤏᤡ᤹ ᤀᤠᤵᤑᤣᤰ ᤗᤠᤈᤣ᤹ᤒᤠ ᤜᤡᤶᤔᤥ ᤁᤧᤏᤢ᤺ᤰᤂᤡ᤹॥ ᤂᤧᤒᤩᤠᤱ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤴ ᤐᤠᤖᤠᤱᤅᤠᤱ ᤘᤠ᤹ᤀᤠ ᤑᤠ᤹ᤀᤠᤱ ᤂᤡᤏᤡ᤹ ᤏᤡᤱᤘᤠ᤹ ᤁᤧᤄᤥᤛᤢᤶ᤹. ᤂᤶᤓᤩᤠᤱ ᤀᤠᤱᤃᤠ᤹ ᤐᤠ᤺ᤳᤋᤢᤱᤒᤠᤴ ᤆᤥᤃᤢᤱᤅᤠᤱ ᤘᤠ᤹॥ ᤀᤥᤖᤥ. ᤕᤜᤘᤣ ᤍᤠᤱᤒᤧᤴ ᤐᤠᤖᤧᤀᤠᤱ ᤘᤠ᤹ᤖᤥ᥄’” ᤕᤜᤢᤍᤠ ᤏᤢ ᤀᤡᤛᤪᤠᤀᤡᤗ ᤜᤠᤱᤈᤢᤶᤔᤡᤴ ᤌᤡᤰᤜᤢᤵ ᤐᤥᤱᤛᤡ᤹ 15 ᤕᤠᤶᤔᤥ ᤕᤜᤘᤣ ᤍᤠᤱᤒᤠᤗᤠᤶ ᤀᤡᤱᤄᤱᤎᤡᤰ ᤀᤠᤱᤃᤠ᤹ᤀᤥ ᤁᤧᤖᤧ— 16 “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤛᤡᤱᤀᤠᤳ ᤌᤡᤰ ᤕᤠᤱᤛᤡᤱᤅᤧ᤹ᤀᤠᤱ ᤁᤴ ᤀᤡᤱᤄᤱᤜᤠ᤹ ᤁᤵᤔᤥ ᤗᤰᤋᤧ᤹—‘ᤁᤸᤗᤧ ᤕᤜᤢᤍᤠ ᤜᤠᤱᤈᤢᤶᤔᤡᤴ ᤀᤥᤛᤣ᤺ᤴᤎᤠᤱ ᤆᤥᤃᤢ᤹॥’ ᤂᤧᤒᤩᤠᤱ ᤘᤣ᤹ ᤛᤡᤱᤀᤠᤳ ᤌᤡᤰ ᤕᤠᤱᤛᤡᤱᤅᤧ᤹ ᤜᤧᤰᤁᤩᤠᤱ ᤁᤴ ᤀᤡᤱᤄᤱᤜᤠ᤹ ᤂᤧᤵᤔᤥ ᤗᤰᤋᤧ᤹—‘ᤁᤸᤗᤧ ᤀᤡᤛᤪᤠᤀᤡᤗᤒᤠ ᤜᤠᤱᤈᤢᤶᤔᤡᤴ ᤀᤥᤛᤣ᤺ᤴᤎᤠᤱ ᤆᤥᤃᤢ᤹॥’ 17 ᤀᤠᤸᤗ ᤗᤳᤇᤠ ᤛᤡᤱᤀᤠ᤺ᤳ ᤘᤕᤧᤒᤠ ᤁᤢᤀᤡᤛᤡᤰ ᤂᤧᤏᤧ᤹ ᤁᤧᤜᤢᤰᤁᤥ ᤂᤧᤱᤜᤠ᤹ ᤛᤥᤖᤡᤰ ᤐᤰᤂᤧ᤹॥ 18 ᤂᤧᤏᤧ᤹ ᤁᤧᤕᤠ᤺ᤶᤒᤰᤜᤠ᤹ᤖᤧ ᤁᤢᤒᤣ ᤌᤧᤔᤠᤒᤣ ᤑᤠ᤹ᤀᤠᤱ ᤁᤧᤔᤏᤠᤜᤠ᤹ᤖᤧ ᤛᤧ᤺ᤴᤃᤧᤶᤍᤥ᤺ᤸᤗᤧ. 19 ᤂᤧᤏᤧ᤹ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤧᤛᤧ᤹. ‘ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤀᤠᤱᤃᤠ᤹ ᤀᤡᤛᤪᤠᤀᤡᤗ ᤜᤠᤱᤈᤢᤶᤔᤡᤸᤗᤧ ᤁᤢᤍᤰᤁᤠ᤺ᤳᤋᤡᤴ ᤏᤢ ᤕᤜᤢᤍᤠ ᤜᤠᤱᤈᤢᤶᤔᤡᤸᤗᤧ ᤁᤢᤍᤰᤁᤠ᤺ᤳᤋᤡᤴ ᤕᤠᤱᤛᤡᤱᤅᤠ᤹ ᤜᤧᤰᤁᤩᤠᤱ ᤂᤧᤱᤜᤠ᤹ ᤗᤳᤇᤠ ᤁᤠᤶᤛᤢᤱᤛᤡᤱ᤹॥ ᤂᤧᤴ ᤛᤡᤱᤀᤠ᤺ᤳᤜᤠ᤹ ᤀᤠᤱᤃᤠ᤹ ᤀᤠᤜᤢᤰᤁᤥ ᤗᤳᤇᤠ ᤛᤡᤱᤀᤠᤳ ᤆᤥᤃᤢᤱ᤹॥’ 20 “ᤂᤧᤒᤩᤠᤱ ᤂᤧᤏᤧ᤹ ᤁᤧᤗᤰᤋᤢᤀᤠᤱ ᤁᤧᤒᤵᤐᤠ ᤛᤡᤱᤀᤠ᤺ᤳᤜᤠ᤹ ᤐᤰᤂᤧ ᤑᤳᤇᤧ᤹. ᤜᤧᤰᤁᤣᤗ᤹ᤖᤡᤰ ᤔᤏᤠᤜᤠ᤹ᤖᤧ ᤂᤧᤱᤜᤠ᤹ ᤏᤡᤔᤠ ᤔᤧᤛᤢᤰᤋᤢᤖ॥ 21 ᤜᤧᤰᤁᤩᤠᤱ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤗᤠᤶ ᤂᤧᤏᤧ᤹ ᤁᤴ ᤀᤡᤱᤄᤱᤅᤡᤴ ᤂᤧᤱᤜᤠ᤹ ᤔᤧᤳᤋᤧᤛᤧ᤹—ᤀᤠᤱᤃᤠ᤹ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥᤗᤠᤶ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤑᤢᤰᤂᤢᤱᤛᤡᤱ᤹॥ ᤂᤧᤱᤜᤠ᤹ ᤑᤢᤳᤇᤡᤱᤈᤩᤠᤱ ᤔᤧᤛᤧᤖᤧᤀᤠᤱ ᤔᤧᤘᤠ᤹ᤒᤠᤍᤧᤴᤜᤠ᤹ᤀᤥᤗᤠᤶ ᤀᤠᤱᤃᤠ᤹ ᤂᤧᤱᤜᤠ᤹ ᤂᤢᤴᤇᤡ᤹ ᤀᤠᤵᤑᤣᤰ ᤗᤠᤈᤣ᤹ᤀᤥᤒᤠ ᤜᤡᤶᤔᤥ ᤏᤢ᤺ᤰᤋᤢᤱ ᤋᤠᤖᤢᤱᤛᤡᤱ᤹॥ 22 ᤀᤠᤱᤃᤠ᤹ ᤂᤧᤱᤜᤠ᤹ ᤀᤡᤛᤪᤠᤀᤡᤗᤒᤠ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ᤀᤥ ᤗᤳᤇᤠ ᤔᤧᤴᤇᤠᤶ ᤛᤢᤘᤠᤱ ᤆᤥᤃᤢᤱᤛᤡᤱ᤹॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤗᤳᤇᤠ ᤜᤠᤱᤅᤡᤸᤗᤧ ᤕᤢᤰ ᤆᤥᤃᤢ᤹. ᤀᤠᤸᤗᤀᤠᤱᤎᤥ ᤂᤧᤱᤜᤠ᤹ ᤏᤧᤳᤇᤡ ᤛᤢᤘᤠᤱᤜᤠ᤹ᤀᤥ ᤀᤡᤃᤪ ᤏᤧᤳᤇᤡ ᤜᤠᤱᤈᤢᤶᤜᤠ᤹ᤀᤥ ᤔᤧᤶᤒ᤺ᤱᤏᤧᤴ॥ 23 ᤂᤧᤱᤜᤠ᤹ ᤕᤠᤶᤔᤥ ᤀᤠᤓᤧᤸᤗᤧᤀᤠᤱ ᤂᤢᤴᤇᤡ᤹ ᤏᤠᤘᤠᤀᤡᤳᤗᤠᤜᤠ᤹ᤗᤠᤶ ᤜᤧᤰᤁᤩᤠᤱ ᤕᤠᤶᤃᤧᤛᤡᤱᤒᤠ ᤏᤢ ᤐᤡᤑᤩᤢᤱᤒᤠ ᤆᤀᤡ᤺ᤳᤜᤠ᤹ᤗᤠᤶ ᤀᤠᤛᤢᤳᤌᤥ ᤔᤧᤴᤈᤥ᤺ᤰᤛᤡᤱᤏᤧᤴ᤹. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤂᤧᤱᤜᤠ᤹ ᤂᤢᤴᤇᤡ᤹ ᤀᤣᤃᤠᤱ ᤏᤢ᤺ᤱᤔᤠ ᤐᤣ᤺ᤰᤔᤠ ᤗᤠᤕᤥᤗᤠᤶ ᤋᤠᤱᤛᤧ᤺ᤵᤋᤢᤱᤛᤡᤱ᤹॥ ᤀᤠᤱᤃᤠ᤹ ᤂᤧᤱᤜᤠ᤹ ᤛᤣᤛᤣᤛᤠᤱᤛᤠᤱ ᤆᤥᤃᤢᤱᤛᤡᤱ᤹॥ ᤂᤧᤒᤩᤠᤱ ᤂᤧᤱᤜᤠ᤹ ᤀᤠᤱᤃᤠ᤹ ᤀᤠᤔᤏᤠ ᤔᤧᤒᤥᤱ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱ ᤐᤥᤱᤅᤠ॥ 24 “ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠ ᤍᤠᤀᤢᤍᤧᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤠᤱ ᤐᤥᤱ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤳᤇᤠᤖᤰ ᤔᤧᤸᤗᤢᤁᤶᤒᤠ ᤐᤥᤱ᤹॥ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤎᤡᤶᤜᤠ᤹ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤎᤡᤶᤜᤠ᤹ ᤋᤡᤶᤔᤠ ᤏᤠ᤺ᤵᤔᤠᤖᤧ ᤗᤠᤃᤡ ᤛᤡᤱᤛᤡᤱ ᤕᤧᤰᤕᤧᤰ ᤔᤧᤗ᤹॥ 25 ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠ ᤕᤠᤁᤢᤒᤧᤴ ᤐᤡᤖᤢᤱᤒᤠ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠᤎᤧᤒᤠᤜᤠ᤹ ᤔᤧᤕᤢᤅᤧᤒᤠ ᤗᤠᤈᤣ᤹ᤀᤥ ᤂᤧᤱᤜᤠ᤹ ᤔᤧᤕᤢᤱ॥ ᤂᤧᤱᤜᤠ᤹ ᤏᤢ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤜᤠ᤹. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤣᤃᤠᤱ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤧᤴᤇᤠ᤹ᤜᤠ᤹. ᤌᤠ᤺ᤰᤜᤠ᤹ᤖᤧ ᤂᤢᤴᤇᤡ᤹ ᤀᤣᤃᤠᤱ ᤌᤠ᤺ᤰᤜᤠ᤹ ᤛᤍᤠᤍᤡᤱ ᤀᤠᤓᤧᤸᤗᤧᤛᤠᤱ ᤂᤧᤵᤔᤥ ᤔᤧᤕᤢᤱ᤹॥ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠ ᤍᤠᤀᤢᤍᤧᤴ ᤛᤍᤠᤍᤡᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤠᤱ ᤐᤥᤱ᤹॥ 26 ᤀᤠᤱᤃᤠ᤹ ᤂᤧᤱᤜᤠ᤹ᤏᤢ ᤛᤍᤠᤍᤡᤱ ᤀᤠᤓᤧᤸᤗᤧᤛᤠᤱ ᤁᤧᤘᤠ᤹ᤒᤠ ᤔᤠᤱᤜᤢᤵ. ᤛᤏᤠᤖᤢᤱ ᤔᤠᤱᤜᤢᤵ ᤌᤡᤰ ᤆᤥᤃᤢᤱ᤹॥ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣᤴ ᤐᤡᤖᤢᤱᤛᤡᤱ᤹ ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤖᤡᤰ ᤂᤠᤏᤡ᤺ᤳ ᤆᤥᤃᤢᤱᤛᤡᤱ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤛᤣᤛᤣᤍᤧᤴᤏᤡᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤛᤍᤠᤍᤡᤱ ᤀᤠᤓᤧᤸᤗᤧᤛᤠᤱ ᤕᤢᤰᤂᤢᤱ᤹॥ 27 ᤀᤠᤱᤃᤠ᤹ ᤀᤠᤜᤡᤶᤔᤡᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤆᤥᤃᤢᤱ᤹॥ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱ ᤐᤥᤱᤅᤠ. ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤠᤱᤃᤠ᤹ ᤀᤠᤔᤏᤠ ᤔᤧᤒᤥᤱ᤹॥ 28 ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤜᤡᤶᤔᤡᤴ ᤛᤍᤠᤍᤡᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤕᤢᤱᤅᤡᤸᤗᤧ. ᤀᤡᤛᤪᤠᤀᤡᤗᤧᤴ ᤛᤣᤛᤣ ᤁᤧᤈᤥ᤺ᤰᤐᤠ ᤕᤜᤘᤣ ᤍᤠᤱᤒᤧᤴ ᤀᤠᤱᤃᤠ᤹ᤀᤣ ᤑᤠ᤹ᤀᤠᤱ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢᤖᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.