ᤀᤡᤈᤁᤡᤀᤣᤗ 36 - LIFOTNTᤀᤡᤛᤪᤠᤀᤡᤗᤖᤧ ᤕᤠᤶᤔᤥ ᤁᤢᤏᤢ᤹ᤔᤠ ᤁᤢᤍᤠᤔᤠ 1 “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤀᤡᤛᤪᤠᤀᤡᤗᤒᤠ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ ᤂᤧᤏᤧ᤹ ᤔᤠᤱᤏᤡᤱᤘᤠ᤹ᤐᤠᤴ ᤔᤧᤳᤋᤧᤛᤧ᤹॥ ᤁᤴ ᤀᤡᤱᤄᤱᤅᤡᤴ ᤂᤧᤱᤜᤠ᤹ ᤔᤧᤳᤋᤧᤛᤧ᤹—ᤀᤡᤛᤪᤠᤀᤡᤗᤒᤠ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤛᤣ. ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤂᤧᤶᤛᤧᤶᤔᤧ᤹᥄ 2 ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤂᤡᤏᤡ᤹ ᤏᤡᤱᤔᤡᤜᤠ᤹ᤖᤧ ᤂᤡᤏᤡ᤹ ᤆᤠ᤺ᤳᤌᤡ ᤔᤧᤍᤣᤛᤢᤀᤠᤱ ᤀᤰᤂᤣ ᤔᤧᤒᤠ᤺ᤳᤋᤢ᤹. ‘ᤀᤠᤰᤁᤥ ᤜᤥ᥄ ᤀᤢᤴᤇᤣ᤺ᤴᤒᤠ ᤁᤣ᤺ᤶᤒᤠ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ ᤀᤠᤸᤗ ᤀᤠᤏᤡ᤹ᤀᤡᤴ ᤐᤥ᤺ᤰᤂᤧ᥄’ 3 ᤂᤧᤸᤗᤧᤆᤥᤃᤢᤸᤗᤧ ᤔᤠᤱᤏᤡᤱᤘᤠ᤹ᤐᤠᤴ ᤐᤠ᤺ᤳᤋᤧ᤹ᤀᤠᤱ ᤔᤧᤳᤋᤧᤛᤧ᤹—ᤕᤖᤡᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤕᤠᤱᤛᤠᤁᤢᤴᤎᤣ ᤁᤧᤶᤈᤥᤃᤡ ᤜᤧᤰᤁᤩᤠᤱ ᤛᤠ᤹ᤖᤡᤰ ᤏᤠᤔᤧᤴᤇᤠᤴ ᤔᤧᤵᤔᤠ ᤏᤢ ᤀᤡᤱᤍᤥ ᤔᤧᤵᤔᤠ ᤆᤠᤜᤠᤰ ᤁᤧᤶᤈᤥᤃᤡᤀᤠᤱ ᤁᤧᤖᤧᤰ ᤐᤡᤛᤠᤱᤗᤠᤶ ᤂᤡᤏᤡ᤹ ᤏᤡᤱᤔᤡᤜᤠ᤹ᤖᤧ ᤁᤧᤶᤓᤳᤋᤡᤀᤠᤱ ᤘᤠ᤹॥ 4 ᤂᤧᤸᤗᤧᤆᤥᤃᤢᤸᤗᤧ. ᤀᤡᤛᤪᤠᤀᤡᤗᤒᤠ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤛᤣ. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤂᤧᤵᤛᤧᤶᤔᤧ᤹॥ ᤌᤧᤃᤢ ᤔᤠᤱᤘᤠᤜᤠ᤹ ᤏᤢ ᤁᤥ᤺ᤰᤔᤠ ᤑᤠᤱᤈᤱᤜᤠ᤹. ᤐᤠᤰᤗᤢᤶᤗᤢᤶᤒᤠᤍᤧᤴᤜᤠ᤹ ᤏᤢ ᤏᤧᤏᤧᤒᤠᤍᤧᤴᤜᤠ᤹. ᤜᤧᤰᤁᤩᤠᤱ ᤁᤒᤪᤡᤱ ᤐᤡᤛᤠᤱᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤠᤵᤐᤢᤌᤩ᤺ᤱ ᤔᤧᤈᤥᤃᤢᤒᤠ ᤏᤢ ᤁᤢᤏᤠᤔᤧᤴᤇᤠ᤹ ᤔᤧᤔᤧᤳᤋᤢᤀᤠᤱ ᤁᤧᤏᤧᤒᤠ ᤜᤧᤰᤁᤩᤠᤱ ᤔᤧᤎᤢᤵᤛᤢ ᤔᤧᤗᤢ᤺ᤴᤍᤢᤀᤠᤱ ᤔᤧᤏᤠ᤹ᤖᤢᤒᤠᤜᤠ᤹ ᤏᤢ ᤀᤡᤖᤡᤰ ᤌᤠᤖᤡᤰ ᤗᤠᤵᤔᤧᤍᤣᤛᤢ ᤔᤧᤏᤧᤛ᤻ᤛᤢᤒᤠ ᤕᤧᤰᤕᤰᤜᤠ᤹ ᤂᤢᤏᤧ᤹ ᤔᤧᤳᤋᤢᤛᤡ॥ 5 ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤀᤠᤱᤃᤠ᤹ ᤀᤠᤏᤠᤃᤧᤜᤧᤶᤒᤠ ᤀᤠᤕᤠ᤺ᤰᤗᤧ᤹ᤔᤧᤸᤗᤧ ᤁᤴ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤔᤡᤎᤡᤰᤂᤢᤛᤡ᤹. ᤛᤧᤰᤂᤠ᤺ᤸᤗᤧ ᤀᤣᤍᤥᤔᤧᤴ ᤔᤡᤎᤡᤰᤂᤢ᤹. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤗᤠᤃᤡ ᤔᤧᤛ᤺ᤳᤗ ᤆᤠᤖᤠᤶᤔᤠᤍᤧᤴ ᤁᤢᤀᤡᤛᤡᤰ ᤀᤠᤱᤃᤠ᤹ ᤀᤠᤗᤠᤈᤣᤴ ᤔᤧᤍᤣ᤹ᤖᤢᤀᤠᤱ ᤀᤠᤱᤃᤠ᤹ ᤛᤠ᤹ᤖᤡᤰ ᤁᤢᤏᤠᤔᤧᤴᤇᤠ᤹ ᤔᤧᤔᤧᤳᤋᤠᤒᤠᤴ ᤀᤥᤛᤣ᤺ᤴᤎᤠᤱ ᤔᤧᤈᤥᤃᤢᤀᤠᤱ ᤘᤠ᤹॥ 6 “ᤂᤧᤸᤗᤧᤆᤥᤃᤢᤸᤗᤧ. ᤂᤧᤏᤧ᤹ ᤀᤡᤛᤪᤠᤀᤡᤗᤒᤠ ᤁᤥ᤺ᤰᤔᤠ ᤑᤠᤱᤈᤱᤜᤠ᤹ ᤏᤢ ᤌᤧᤃᤢ ᤔᤠᤱᤘᤠᤜᤠ᤹ ᤜᤧᤰᤁᤩᤠᤱ ᤐᤠᤰᤗᤢᤶᤗᤢᤶᤒᤠᤍᤧᤴᤜᤠ᤹ ᤏᤢ ᤏᤧᤏᤧᤒᤠᤍᤧᤴᤜᤠ᤹ᤖᤧ ᤁᤢᤕᤠ᤺ᤶᤒᤣᤀᤥ ᤔᤠᤱᤏᤡᤱᤘᤠ᤹ᤐᤠᤴ ᤔᤧᤳᤋᤧᤛᤧ᤹॥ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤁᤒᤪᤡᤱ ᤐᤡᤛᤠᤱᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤛᤡᤖᤡᤱᤔᤔᤥ ᤂᤡᤏᤡ᤹ ᤁᤧᤎᤩᤧ᤹ᤀᤡᤒᤠᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤏᤠᤜᤧᤴᤏᤠᤱ ᤛᤠ᤹ᤖᤡᤰ ᤀᤠᤛᤠᤰᤁᤧᤴ ᤐᤥᤰ॥ 7 ᤂᤧᤸᤗᤧᤆᤥᤃᤢᤸᤗᤧ. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤂᤧᤴ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤛᤡᤖᤡᤱᤔᤔᤧᤴ ᤜᤠᤖᤠᤀᤣ ᤌᤶᤔᤠ ᤁᤧᤒᤥᤱᤒᤠ ᤘᤠ᤹ ᤑᤠ᤹ᤀᤠᤱ ᤀᤠᤱᤃᤠ᤹ ᤗᤢᤱᤔᤠ᤹ ᤕᤠ᤺ᤵᤛᤢᤖ ᤔᤠᤱᤜᤧᤰ ᤆᤥᤃᤢᤱ᤹॥ 8 “ᤁᤖ ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤀᤡᤛᤪᤠᤀᤡᤗᤒᤠ ᤂᤡᤏᤡ᤹ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ᤖᤧ ᤐᤈᤠ᤹ ᤁᤧᤈᤠ᤹ᤒᤠ ᤛᤡᤱᤛᤣ᤹ᤜᤠ᤹ ᤁᤧᤓᤳᤇᤢᤶ ᤁᤧᤒᤡᤖᤢᤶᤛᤡᤶ᤹. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤕᤠᤶᤔᤥ ᤜᤠᤖᤠᤀᤣ ᤂᤢᤴᤇᤡ᤹ ᤜᤡᤶᤔᤥ ᤔᤧᤍᤠᤖᤥ᥄ 9 ᤀᤠᤱᤃᤠ᤹ ᤂᤡᤏᤡ᤹ ᤁᤶᤒᤪᤠᤱ ᤔᤧᤳᤏᤡᤱ᤹. ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤒᤠ᤺ᤳᤋᤢᤶᤒᤠ ᤐᤠ᤺ᤴᤜᤠ᤹ ᤀᤠᤱᤃᤠ᤹ ᤂᤧᤵᤛᤢᤱ᤹॥ ᤂᤡᤏᤡ᤹ ᤂᤠᤶᤒᤣ᤺ᤰᤁᤡᤴ ᤔᤧᤍᤥ᤺ᤰᤂᤢ ᤁᤧᤶᤒᤡᤖᤡ᤹ ᤜᤧᤰᤁᤩᤠᤱ ᤂᤡᤏᤡ᤹ ᤆᤠᤜᤠ᤹ ᤔᤧᤜᤣ᤹ᤖᤢ ᤁᤧᤶᤒᤡᤖᤡ᤹॥ 10 ᤀᤠᤱᤃᤠ᤹ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤂᤠᤏᤡ᤺ᤳᤋᤡᤴ ᤀᤠᤳᤋᤠᤋᤠᤴᤏᤣ ᤕᤖᤡᤰ ᤑᤥᤛᤢᤱ᤹. ᤜᤧᤰᤁᤩᤠᤱ ᤔᤧᤗᤢ᤺ᤴᤍᤢ ᤔᤧᤎᤢᤵᤛᤢᤀᤠᤱ ᤁᤧᤏᤧᤒᤠ ᤕᤧᤰᤕᤰᤜᤠ᤹ ᤕᤠᤶᤔᤥ ᤔᤧᤈᤥᤃᤢᤀᤠᤱ ᤔᤏᤠᤜᤠ᤹ᤖᤧ ᤛᤎᤧᤰ ᤔᤧᤎᤡᤶᤛᤢ᤹॥ 11 ᤀᤠᤱᤃᤠ᤹ ᤔᤏᤠᤜᤠ᤹ᤖᤰ ᤔᤣ᤺ᤴ. ᤁᤖ ᤌᤰᤛᤠᤜᤠ᤹ᤀᤠᤱ ᤑᤥᤛᤢᤱᤛᤡᤱ᤹॥ ᤀᤡᤛᤪᤠᤀᤡᤗᤒᤠ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤛᤣ. ᤂᤡᤏᤡ᤹ ᤛᤶᤎᤠᤱ ᤕᤢᤱᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤕᤠᤶᤔᤥ ᤌᤡᤰᤗᤧᤱ ᤔᤏᤠᤜᤠ᤹ ᤋᤠᤖᤢᤱᤛᤡᤱ᤹॥ ᤋᤃᤡᤏᤢ᤺ᤸᤗᤧᤀᤠᤱ ᤕᤖᤡᤰ ᤂᤡᤏᤡ᤹ ᤁᤧᤏᤢᤖᤡ ᤁᤧᤍᤠᤛᤡᤖ ᤆᤥ᤺ᤰᤏᤡᤱ᤹॥ ᤂᤧᤶᤒᤩᤠᤱ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤂᤡᤏᤡ᤹ ᤏᤡᤱᤘᤠ᤹ ᤁᤧᤄᤥᤛᤢᤶ᤹॥ 12 ᤕᤠᤶᤔᤥ ᤌᤡᤰᤗᤧᤱ ᤂᤧᤏᤧ᤹ ᤁᤧᤛᤶᤎᤠᤱ ᤀᤠᤱᤃᤠ᤹ ᤀᤡᤛᤪᤠᤀᤡᤗᤒᤠ ᤀᤠᤔᤏᤠᤜᤠ᤹ ᤔᤧᤕᤢᤱᤗ ᤕᤠ᤺ᤴᤍᤢᤱᤛᤡᤱ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤰ ᤜᤧᤰᤁᤣ ᤁᤧᤶᤕᤢᤰ॥ ᤂᤧᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤜᤠ᤹ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤁᤧᤴᤏᤠᤵᤋᤢᤛᤡᤴ᤹॥ 13 “ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤘᤣ᤹ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤡᤏᤡ᤹ ᤆᤧᤰᤕᤠ ᤀᤡᤱᤍᤥ ᤁᤧᤶᤔᤧᤳᤋᤡᤀᤠᤱ ᤀᤰᤂᤣ ᤁᤧᤶᤔᤧᤳᤋᤡᤀᤠᤱ ᤘᤠ᤹. ‘ᤀᤡᤛᤪᤠᤀᤡᤗᤧᤱᤃ ᤂᤢᤏᤧ᤹ ᤀᤠᤵᤑᤣᤰ ᤁᤢᤔᤏᤠᤜᤠ᤹ ᤁᤧᤗᤵᤐᤠ ᤏᤢ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤜᤠ᤹ ᤁᤧᤏᤠᤵᤐᤠ ᤗᤠᤈᤣ᤹ᤖᤥ᥄’ 14 ᤁᤖ ᤂᤧᤏᤧ᤹ ᤁᤧᤔᤏᤠᤜᤠ᤹ ᤕᤠᤶᤔᤥ ᤀᤠᤓᤧᤸᤗᤧᤀᤠᤱ ᤁᤧᤸᤗᤖᤢᤛᤡᤴ᤹ ᤀᤡᤃᤪ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤜᤠ᤹ ᤁᤧᤴᤏᤠᤵᤋᤢᤛᤡᤴ᤹॥ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤴ ᤐᤠᤖᤠᤱᤅᤠᤱ ᤘᤠ᤹॥ 15 ᤂᤧᤴ ᤘᤣ᤹ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤡᤏᤡ᤹ ᤁᤢᤏᤠᤔᤧᤴᤇᤠ᤹ ᤁᤧᤶᤔᤧᤳᤋᤡᤒᤠᤴ ᤀᤠᤱᤃᤠ᤹ ᤂᤡᤏᤡ᤹ ᤂᤧᤶᤔᤠ ᤔᤧᤓᤠ᤺ᤰᤏᤡᤱᤅᤡᤴ᤹. ᤜᤧᤰᤁᤩᤠᤱ ᤀᤠᤸᤗᤀᤠᤱᤎᤥ ᤂᤧᤱᤜᤠ᤹ᤖᤧ ᤂᤡᤏᤡ᤹ ᤁᤡᤏᤠ᤺ᤴᤍᤡ ᤁᤧᤔᤧᤶᤒᤡᤖᤡᤴ᤹॥ ᤁᤢᤔᤏᤠᤜᤠ᤹ ᤔᤧᤔᤧᤰᤗ ᤁᤧᤕᤠ᤺ᤶᤒᤠ ᤂᤡᤏᤡ᤹ ᤗᤳᤇᤠ ᤗᤠᤈᤣ᤹ ᤔᤧ᤺ᤴᤏᤡᤱ᤹. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ॥” ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤔᤧᤜᤡᤱ 16 ᤂᤧᤒᤩᤠᤱ ᤀᤠᤸᤗᤛᤠᤱ ᤕᤜᤘᤣ ᤍᤠᤱᤒᤠᤗᤠᤶ ᤁᤴ ᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤁᤧᤖᤧ— 17 “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤂᤢᤴᤇᤡ᤹ ᤀᤠᤒᤠᤅᤣ ᤗᤠᤈᤣ᤹ᤀᤥ ᤔᤧᤕᤢᤅᤧᤸᤗᤧ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤑᤧᤴᤕᤠ᤺ᤶᤒᤰᤁᤡᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤁᤴ ᤗᤠᤈᤣᤴ ᤔᤧᤈᤡ᤺ᤴᤍᤢ॥ ᤀᤠᤱᤃᤠ᤹ ᤀᤠᤗᤠᤃᤡ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤧᤵᤗᤧᤰᤁᤡᤴ ᤁᤢᤛᤡᤶ ᤘᤠᤜᤵᤔᤠ ᤁᤧᤘᤠ᤹ᤔᤠ ᤔᤧᤴᤇᤢᤔᤠ᤺ᤸᤗᤧ ᤁᤢᤈᤠᤱᤅᤡᤴ ᤁᤢᤀᤡᤛᤡᤰ ᤀᤠᤛᤢᤳᤌᤥ ᤆᤥᤃᤧ॥ 18 ᤂᤧᤱᤜᤠ᤹ᤖᤧ ᤔᤏᤠ ᤔᤧᤛᤩᤧᤖᤢᤛᤡ ᤜᤧᤰᤁᤩᤠᤱ ᤏᤠᤘᤠᤀᤡᤳᤗᤠᤜᤠ᤹ ᤛᤧᤘᤠ ᤔᤧᤔᤧᤳᤋᤢᤛᤡᤀᤠᤱ ᤗᤠᤈᤣᤴ ᤀᤠᤛᤢᤳᤌᤥ ᤔᤧᤈᤥᤃᤢ. ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤛᤠ᤹ᤖᤡᤰ ᤀᤠᤕᤠ᤺ᤰᤗᤧ᤹ᤔᤧᤴ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤌᤠᤛᤢᤱ॥ 19 ᤂᤧᤱᤜᤠ᤹ᤖᤧ ᤑᤧᤴᤕᤠ᤺ᤶᤒᤰ ᤔᤧᤈᤥᤃᤢᤀᤠᤱ ᤔᤧᤕᤢᤅᤧᤒᤠᤸᤗᤧ ᤁᤢᤗᤧᤰᤘᤠ᤹ ᤀᤠᤱᤃᤠ᤹ ᤂᤧᤱᤜᤠ᤹ ᤂᤢᤶᤍᤡᤱ ᤐᤡᤔᤠᤛᤡᤖᤧ ᤗᤠᤃᤡ ᤂᤧᤱᤜᤠ᤹ ᤕᤖᤡᤰ ᤗᤠᤈᤣ᤹ᤜᤠ᤹ᤀᤥ ᤑᤢᤳᤇᤡᤱᤈᤩᤠᤱ ᤛᤧᤛᤢᤱᤍᤣᤛᤢᤱᤛᤡᤱ॥ 20 ᤂᤧᤱᤜᤠ᤹ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤑᤢᤳᤇᤡᤱᤈᤩᤠᤱ ᤔᤧᤛᤧᤖᤧᤀᤠᤱ ᤔᤧᤕᤢᤅᤧᤸᤗᤧ. ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤛᤣᤛᤣ ᤔᤡᤱᤅᤥ ᤛᤡᤖᤡᤱᤔᤔᤠ ᤔᤧᤍᤠᤖᤢ॥ ᤌᤣᤀᤠᤱᤓᤧᤸᤗᤧ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢ. ‘ᤁᤴᤜᤠ᤹ᤃ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤏᤠᤛᤡᤖᤥ. ᤁᤖ ᤂᤧᤱᤜᤠ᤹ᤖᤧ ᤂᤢᤏᤧ᤹ ᤁᤢᤗᤠᤈᤣᤴ ᤗᤧᤵᤔᤠ ᤁᤧᤒᤥᤱᤒᤠ ᤐᤥ᤺ᤰᤂᤧ᥄’ 21 ᤂᤧᤒᤩᤠᤱ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤖᤧ ᤔᤧᤍᤠᤖᤢᤒᤠ ᤛᤡᤖᤡᤱᤔᤔᤠ ᤐᤠ᤺ᤴᤏᤥ. ᤀᤠᤱᤃᤠ᤹ ᤀᤠᤛᤣᤛᤣ ᤔᤡᤱᤅᤡᤸᤗᤧ ᤗᤠᤃᤡ ᤏᤡᤱᤘᤠ᤹ ᤀᤡ᤺ᤳᤇᤡᤱᤅᤠᤖᤥ॥ 22 “ᤂᤧᤸᤗᤧᤆᤥᤃᤢᤸᤗᤧ. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤗᤠᤶ ᤂᤧᤏᤧ᤹ ᤁᤴ ᤀᤡᤱᤄᤱᤅᤡᤴ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤔᤧᤳᤋᤧᤛᤧ᤹—ᤀᤠᤱᤃᤠ᤹ ᤂᤡᤏᤡ᤹ ᤏᤢ᤺ᤰᤏᤡᤱ ᤋᤠ᤺ᤳᤏᤡᤱ. ᤁᤖ ᤁᤴ ᤂᤡᤏᤡ᤹ ᤁᤧᤕᤠᤖᤢᤶᤒᤠᤸᤗᤧ ᤆᤥᤃᤢᤸᤗᤧ ᤔᤣ᤺ᤴ॥ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤂᤡᤏᤡ᤹ ᤑᤢᤳᤇᤡᤱᤈᤩᤠᤱ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡᤸᤗᤧ ᤂᤡᤏᤡ᤹ ᤁᤧᤍᤠᤖᤢᤶᤒᤠ ᤛᤡᤖᤡᤱᤔᤔᤠ ᤐᤠ᤺ᤴᤏᤥ. ᤀᤠᤱᤃᤠ᤹ ᤀᤠᤛᤣᤛᤣ ᤔᤡᤱᤅᤡᤴ ᤋᤠᤱᤛᤧ᤺ᤵᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤁᤴ ᤆᤥᤃᤢᤱᤒᤠᤖᤥ॥ 23 ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤂᤡᤏᤡ᤹ ᤁᤧᤍᤠᤖᤢᤶᤒᤠ ᤛᤡᤖᤡᤱᤔᤔᤠ ᤀᤠᤱᤃᤠ᤹ ᤀᤠᤔᤡᤱᤅᤡᤴ. ᤀᤠᤰᤂᤩᤠᤖᤡᤰ ᤕᤶᤒᤠ ᤏᤢ ᤛᤣᤛᤣᤒᤠ ᤆᤥᤰ ᤑᤠ᤹ᤀᤠᤱ ᤀᤠᤱᤃᤠ᤹ ᤀᤥᤛᤣ᤺ᤴᤎᤠᤱ ᤆᤥᤃᤢᤱ᤹॥ ᤜᤧᤰᤁᤩᤠᤱ ᤂᤡᤏᤡ᤹ ᤗᤠᤶᤒᤠᤀᤣ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤡᤰ ᤋᤃᤡ ᤀᤠᤱᤃᤠ᤹ ᤀᤠᤛᤣᤛᤣᤴ ᤀᤥᤛᤣ᤺ᤴᤎᤠᤱ ᤆᤥᤃᤢᤱ᤹. ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱ᤹. ᤂᤧᤒᤩᤠᤱ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢ᤹॥ 24 “ᤌᤣᤀᤠᤱᤓᤧᤸᤗᤧ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤗᤠᤶ ᤀᤠᤱᤃᤠ᤹ ᤂᤡᤏᤡ᤹ ᤛᤢᤶᤏᤡᤱ ᤌᤠᤰᤏᤡᤱ᤹ ᤜᤧᤰᤁᤩᤠᤱ ᤂᤡᤏᤡ᤹ ᤗᤠᤈᤣ᤹ᤀᤥᤒᤠ ᤜᤡᤶᤔᤥ ᤕᤠᤶᤔᤥ ᤏᤢ᤺ᤰᤏᤡᤱ ᤋᤠ᤺ᤳᤏᤡᤱ᤹॥ 25 ‘ᤂᤧᤒᤩᤠᤱ ᤛᤢᤳᤌᤥ ᤆᤫᤠ᤺ᤳᤋᤡᤴ ᤀᤠᤱᤃᤠ᤹ ᤂᤡᤏᤡ᤹ ᤛᤶᤎᤠᤱ ᤛᤠᤰᤂᤢᤱ᤹. ᤜᤧᤰᤁᤩᤠᤱ ᤂᤡᤏᤡ᤹ ᤛᤢᤳᤌᤥ ᤁᤧᤒᤥ᤺ᤰᤂᤡ᤹॥ ᤂᤡᤏᤡ᤹ ᤀᤠᤛᤢᤳᤌᤥᤴ ᤂᤧᤸᤗᤧ ᤘᤠᤜᤵᤋᤢ᤹. ᤜᤧᤰᤁᤩᤠᤱ ᤀᤠᤸᤗᤀᤠᤱᤎᤥ ᤏᤠᤘᤠᤀᤡᤳᤗᤠᤜᤠ᤹ ᤂᤡᤏᤡ᤹ ᤛᤧᤘᤠ ᤁᤧᤶᤔᤧᤳᤋᤢᤶᤛᤡᤶᤔᤧᤴ॥ 26 ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤡᤏᤡ᤹ ᤁᤢᤛᤱ ᤛᤡᤰᤗᤢᤱᤔᤠ᤹ ᤐᤡᤏᤡᤱ᤹. ᤂᤶᤓᤩᤠᤱ ᤀᤠᤱᤃᤠ᤹ ᤂᤡᤏᤡ᤹ᤀᤥ ᤁᤢᤛᤱ ᤏᤡᤱᤘᤠ᤹ ᤁᤣ᤺ᤳᤋᤢᤱ ᤐᤡᤏᤡᤱ᤹॥ ᤀᤠᤱᤃᤠ᤹ ᤂᤡᤏᤡ᤹ ᤜᤠᤍᤡᤱ ᤁᤧᤎᤰᤐᤠ ᤗᤢᤱ ᤜᤧᤰᤋᤱᤒᤠ ᤛᤡᤰᤗᤢᤱᤔᤧᤴ ᤂᤧᤳᤋᤢᤱᤍᤣᤛᤢᤱ ᤐᤡᤏᤡᤱ᤹ ᤂᤧᤶᤒᤩᤠᤱ ᤀᤠᤱᤃᤠ᤹ ᤏ᤺ᤶᤏ᤺ᤶᤒᤠ. ᤀᤡᤱᤈᤠᤱ ᤀᤡ᤺ᤵᤔᤠ ᤏᤠ᤺ᤵᤔᤠ ᤁᤧᤍᤧᤶᤒᤠ ᤛᤡᤰᤗᤢᤱᤔᤠ᤹ ᤌᤡᤰ ᤐᤡᤏᤡᤱ᤹॥ 27 ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤀᤡᤱᤈᤠᤱᤜᤠ᤹ ᤂᤡᤏᤡ᤹ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤶᤋᤢᤶᤗ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤎᤡᤶᤜᤠ᤹ ᤋᤡᤶᤔᤠ ᤏᤠ᤺ᤵᤔᤠᤖᤧ ᤗᤠᤃᤡ ᤂᤡᤏᤡ᤹ ᤛᤡᤱᤛᤡᤱ ᤕᤧᤰᤕᤧᤰ ᤁᤧᤗ᤹ᤖᤡᤖ ᤑᤠ᤹ᤀᤠᤱ ᤀᤠᤱᤃᤠ᤹ ᤀᤠᤕᤠᤶᤛᤠᤶᤔᤡᤴ ᤂᤡᤏᤡ᤹ᤀᤥ ᤁᤣ᤺ᤳᤋᤢᤱ ᤐᤡᤏᤡᤱ᤹॥ 28 “‘ᤜᤧᤰᤁᤩᤠᤱ ᤕᤖᤡᤰ ᤕᤧᤶ ᤋᤃᤡ ᤀᤠᤱᤃᤠ᤹ ᤂᤡᤏᤡ᤹ ᤐᤠᤎᤧᤒᤠᤜᤠ᤹ ᤐᤡᤖᤢᤱᤛᤡᤱᤒᤠ ᤗᤠᤈᤣ᤹ᤀᤥ ᤂᤡᤏᤡ᤹ ᤁᤧᤕᤢᤅᤡ᤹॥ ᤂᤡᤏᤡ᤹ ᤀᤠᤱᤃᤠ᤹ ᤀᤠᤔᤏᤠ ᤁᤧᤒᤥ᤺ᤰᤂᤡ᤹. ᤂᤶᤓᤩᤠᤱ ᤀᤠᤱᤃᤠ᤹ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱ ᤐᤥᤱᤅᤠᤖᤥ॥ 29 ᤂᤡᤏᤡ᤹ ᤆᤡ᤺ᤴᤈᤡ᤺ᤴ ᤁᤧᤄᤢᤒᤠ ᤐᤠ᤺ᤴᤜᤠ᤹ᤗᤠᤶ ᤀᤠᤱᤃᤠ᤹ ᤂᤡᤏᤡ᤹ ᤛᤧ᤺ᤵᤏᤡᤱ᤹॥ ᤀᤠᤱᤃᤠ᤹ ᤂᤡᤏᤡ᤹ ᤏᤢᤒᤠ ᤐᤥᤃᤢᤃᤧᤴ ᤁᤢᤈᤠᤜᤠ᤹ ᤐᤡᤏᤡᤱ᤹. ᤜᤧᤰᤁᤩᤠᤱ ᤀᤠᤸᤗᤀᤠᤱᤎᤥ ᤗᤠᤈᤣ᤹ᤀᤥ ᤀᤠᤱᤃᤠ᤹ ᤛᤠᤰᤘᤠ᤺ᤴᤜᤠ᤹ ᤐᤥ᤺ᤰᤗ ᤔᤧᤈᤥᤰᤁᤠᤴ॥ 30 ᤀᤠᤱᤃᤠ᤹ ᤂᤡᤏᤡ᤹ ᤛᤡᤱᤛᤣ᤹ ᤁᤧᤎᤥ᤺ᤰᤐᤠ ᤛᤡᤱᤒᤢᤱᤜᤠ᤹ ᤏᤢ ᤂᤡᤏᤡ᤹ ᤀᤡᤰᤋᤠᤵᤜᤠ᤹ᤀᤥᤗᤠᤶ ᤀᤠᤳᤋᤠᤋᤠᤴᤏᤣ ᤕᤖᤡᤰ ᤛᤡᤱᤛᤣ᤹ ᤁᤢᤈᤠᤜᤠ᤹ ᤁᤧᤛᤢᤵᤛᤢᤶᤗ ᤕᤠ᤺ᤴᤏᤡᤱ᤹. ᤜᤧᤰᤁᤩᤠᤱ ᤂᤡᤏᤡ᤹ ᤗᤠᤈᤣ᤹ᤀᤥᤒᤠ ᤛᤠᤰᤘᤠ᤺ᤴᤜᤠ᤹ᤖᤧ ᤆᤥᤃᤢᤸᤗᤧ ᤁᤒᤪᤡᤱ ᤐᤡᤛᤠᤱᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤡᤏᤡ᤹ ᤗᤠᤈᤣᤴ ᤕᤠᤶᤔᤥ ᤀᤠᤓᤧᤸᤗᤧᤀᤠᤱ ᤁᤢᤏᤠᤔᤧᤴᤇᤠ᤹ ᤔᤧᤵᤔᤠ ᤔᤧᤴᤇᤢᤰᤋᤢᤴ᤹॥ 31 ᤂᤧᤒᤩᤠᤱ ᤐᤣᤕᤧᤶᤔᤥᤒᤠ ᤂᤡᤏᤡ᤹ ᤗᤠᤕᤥᤜᤠ᤹ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤶ᤹ ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤈᤥᤃᤢᤶᤒᤠ ᤁᤧᤖᤧᤰ ᤕᤠᤶᤃᤧᤛᤡᤱᤒᤠ ᤐᤠ᤺ᤴᤜᤠ᤹ᤖᤧ ᤗᤠᤃᤡ ᤂᤡᤏᤡ᤹ ᤀᤠᤵᤑᤣᤰ ᤁᤢᤏᤠᤔᤧᤴᤇᤠ᤹ ᤁᤧᤔᤧᤳᤋᤠᤛᤡ᤹॥ 32 ᤁᤖ ᤂᤡᤏᤡ᤹ ᤁᤧᤕᤠᤖᤢᤶᤒᤧᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ ᤆᤥᤃᤢᤱᤒᤠ ᤔᤣ᤺ᤴ ᤑᤠ᤹ᤀᤠᤱ ᤁᤢᤛᤡᤱ ᤏᤡ᤺ᤳᤋᤧᤶᤔᤧ᤹॥ ᤀᤠᤱᤃᤠ᤹ ᤀᤡᤛᤪᤠᤀᤡᤗᤒᤠ ᤀᤠᤔᤏᤠᤛᤣ. ᤂᤡᤏᤡ᤹ ᤁᤧᤈᤥᤃᤢᤶᤔᤠᤱ ᤁᤧᤘᤕᤡᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ᤀᤥ ᤂᤡᤏᤡ᤹ ᤛᤡᤖᤡᤱᤔᤔᤥ ᤁᤧᤎᤩᤧ᤹ᤀᤡᤖ ᤐᤥᤱ᤹᥄ 33 “‘ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤱ᤹—ᤀᤠᤱᤃᤠ᤹ ᤂᤡᤏᤡ᤹ ᤗᤠᤕᤥᤜᤠ᤹ᤗᤠᤶ ᤛᤢᤳᤌᤥ ᤆᤥ᤺ᤰᤏᤡᤱᤅᤡᤸᤗᤧ. ᤀᤠᤱᤃᤠ᤹ ᤂᤡᤏᤡ᤹ ᤕᤧᤰᤕᤰᤜᤠ᤹ᤀᤥ ᤕᤠᤶᤔᤥ ᤔᤏᤠᤜᤠ᤹ ᤕᤢᤰᤂᤢᤱᤛᤡᤱ᤹. ᤜᤧᤰᤁᤩᤠᤱ ᤁᤧᤎᤢᤵᤐᤠ ᤁᤧᤗᤢ᤺ᤶᤒᤠᤜᤠ᤹ ᤕᤠᤶᤔᤥ ᤆᤥᤃᤢᤱ ᤐᤡᤏᤡᤱ᤹॥ 34 ᤁᤧᤖᤧᤰ ᤔᤏᤠᤜᤠ᤹ᤖᤧ ᤀᤥᤔᤧᤔᤧᤳᤋᤢᤸᤗᤧ ᤔᤢᤖᤧᤰ ᤂᤠᤖᤧᤰ ᤁᤢᤄᤠᤗᤧᤶ ᤁᤧᤏᤧᤒᤠ ᤏᤢ ᤘᤖᤧᤱᤗᤧᤱ ᤏᤡᤃᤧᤎᤠ᤺ᤵᤐᤠ ᤀᤡᤰᤋᤠᤵᤜᤠ᤹ ᤕᤠᤶᤔᤥ ᤔᤧᤔᤕᤢ᤹॥ 35 ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤡᤏᤡ᤹ ᤏᤢ᤺ᤰᤏᤡᤱ ᤋᤠ᤺ᤳᤏᤡᤱᤅᤡᤸᤗᤧ ᤔᤏᤠᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢ᤹. “ᤁᤴ ᤋᤃᤡᤒᤠ ᤔᤢᤖᤧᤰ ᤂᤠᤖᤧᤰᤐᤠ ᤗᤠᤈᤣᤴ ᤀᤠᤸᤗᤥᤃ ᤀᤍᤏᤒᤠ ᤛᤡᤱᤛᤣ᤹ᤀᤡᤰ ᤜᤧᤰᤁᤣ ᤗ᤹᥄ ᤗᤠᤵᤔᤧᤍᤣᤛᤢᤒᤠ ᤏᤢ ᤂᤠᤵᤐᤢᤌᤩ᤺ᤱ ᤁᤧᤒᤥᤱᤒᤠ ᤕᤧᤰᤕᤰᤜᤠ᤹ᤀᤥ ᤀᤠᤸᤗᤥ ᤁᤧᤎᤢᤶᤒᤠ ᤗᤢᤱᤎᤠᤰᤜᤠ᤹ ᤕᤧᤵ ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤛᤎᤧᤰ ᤔᤧᤎᤡᤶᤛᤢᤀᤠᤱ ᤏᤧᤖᤥ᥄”’ 36 ᤂᤧᤒᤩᤠᤱ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤂᤠᤵᤐᤢᤌᤩ᤺ᤱ ᤁᤧᤒᤥᤱᤒᤠ ᤕᤧᤰᤕᤰᤜᤠ᤹ ᤕᤠᤶᤔᤥ ᤆᤥᤃᤢᤱ ᤜᤧᤰᤁᤩᤠᤱ ᤔᤢᤖᤧᤰ ᤂᤠᤖᤧᤰ ᤁᤧᤒᤥᤱᤒᤠ ᤗᤠᤈᤣᤴ ᤕᤠᤶᤔᤥ ᤆᤠ ᤁᤧᤏᤢ᤹ᤒᤠ ᤆᤥᤃᤢᤱᤅᤠᤱ ᤏᤧᤖᤥ ᤑᤠ᤹ᤀᤠᤱ ᤁᤧᤜᤡᤱᤒᤠ ᤁᤧᤕᤠ᤺ᤰᤐᤠ ᤂᤡᤖᤡᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢ᤹॥ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤅᤠᤱ ᤘᤠ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤴ ᤆᤥᤃᤢᤱ᤹॥ 37 “ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤱ᤹—ᤀᤠᤱᤃᤠ᤹ ᤀᤡᤛᤪᤠᤀᤡᤗᤖᤧ ᤁᤢᤒᤣᤗᤡᤜᤠ᤹ ᤂᤧᤶᤔᤠ ᤏᤢ ᤔᤧᤸᤗᤢᤰ ᤔᤧ᤺ᤴᤍᤠᤗᤢᤵ ᤁᤢᤀᤡᤛᤡᤰ ᤂᤧᤱᤜᤠ᤹ ᤀᤠᤳᤋᤠᤋᤠᤴᤏᤣ ᤕᤖᤡᤰ ᤑᤥᤔᤠᤛᤡᤖᤧ ᤗᤠᤃᤡ ᤕᤠᤖᤡᤵ ᤘᤠ᤹ᤀᤠ॥ 38 ᤂᤧᤱᤜᤠ᤹ ᤋᤱᤏᤠᤶᤜᤠ᤹ᤀᤥᤒᤠ ᤕᤧᤶᤔᤥ ᤕᤖᤢᤛᤗᤧᤔᤒᤠ ᤔᤠᤖᤠᤶᤜᤠ᤹ ᤛᤡᤍᤢᤱᤈᤓᤠ ᤋᤥ᤺ᤶᤔᤠ ᤛᤢᤳᤌᤥ ᤔᤧᤸᤗᤢᤰ ᤔᤧ᤺ᤴᤍᤠ ᤗᤢᤵᤜᤠ᤹ᤖᤧ ᤔᤧᤎᤡᤶᤛᤢᤒᤠ ᤁᤢᤀᤡᤛᤡᤰ ᤏᤡ᤺ᤳᤔᤧᤴᤍᤧᤳ ᤀᤠᤳᤋᤠᤋᤠᤴᤏᤣ ᤕᤖᤡᤰ ᤔᤧᤒᤥᤱ᤹॥ ᤂᤠᤵᤐᤢᤌᤩ᤺ᤱ ᤁᤧᤒᤥᤱᤒᤠ ᤕᤧᤰᤕᤰᤜᤠ᤹ ᤕᤠᤶᤔᤥ ᤌᤡᤰᤗᤧᤱ ᤔᤏᤠᤜᤠ᤹ᤖᤧ ᤛᤎᤧᤰ ᤔᤧᤎᤡᤶᤛᤢ᤹. ᤂᤧᤒᤩᤠᤱ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤁᤧᤖᤧᤰᤗᤧ ᤏᤡᤱᤘᤠ᤹ ᤔᤧᤄᤥᤛᤢᤖᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.