ᤀᤡᤈᤁᤡᤀᤣᤗ 35 - LIFOTNT

ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤣᤍᤥᤶᤔᤡᤴ ᤂᤢᤶᤍᤡᤱ ᤐᤡᤖᤢ

¹ ᤕᤜᤘᤣ ᤍᤠᤱᤒᤠᤗᤠᤶ ᤕᤠᤶᤔᤥ ᤀᤡᤱᤄᤱ ᤌᤡᤰ ᤀᤠᤱᤃᤠ᤹ᤀᤥ ᤁᤧᤖᤧ—

² “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤜᤡᤛᤡᤱᤅᤧ᤹ ᤜᤧᤰᤁᤩᤠᤱ ᤛᤣᤀᤡᤖ ᤁᤥ᤺ᤰᤔᤠ ᤗᤧᤵᤔᤠᤱ ᤁᤧᤏᤠᤖᤠᤴ ᤜᤡᤛᤧ᤹ᤀᤠᤱ ᤁᤸᤗᤧ ᤁᤢᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤔᤠᤱᤏᤡᤱᤘᤠ᤹ᤐᤠᤴ ᤐᤠᤖᤧ᤹॥

³ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤗᤠᤶ ᤂᤧᤏᤧ᤹ ᤁᤴ ᤀᤡᤱᤄᤱᤅᤡᤴ ᤂᤧᤱᤜᤠ᤹ ᤔᤧᤳᤋᤧᤛᤧ᤹ᤀᤥ— “ᤛᤣᤀᤡᤖ ᤁᤥ᤺ᤰᤔᤠᤀᤣ. ᤀᤠᤱᤃᤠ᤹ ᤂᤧᤏᤧ᤹ ᤁᤧᤏᤡᤱᤔᤡᤀᤠᤖᤥ. ᤀᤠᤱᤃᤠ᤹ ᤂᤧᤏᤧ᤹ ᤂᤠᤵᤐᤢᤌᤩ᤺ᤱ ᤔᤧᤱᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤀᤠᤜᤢᤰᤁᤡᤸᤗᤧ ᤛᤠ᤺ᤶᤏᤧᤖᤥ॥

⁴ ᤀᤠᤱᤃᤠ᤹ ᤂᤧᤏᤧ᤹ ᤁᤧᤕᤧᤰᤕᤰᤜᤠ᤹ ᤗᤢ᤺ᤴᤍᤢᤱ ᤌᤢᤵᤛᤢᤱᤗᤥ. ᤜᤧᤰᤁᤩᤠᤱ ᤂᤧᤏᤧ᤹ ᤔᤢᤖᤧᤰ ᤂᤠᤖᤧᤰ ᤆᤡᤈᤡ ᤂᤰᤂᤰ ᤆᤥ᤺ᤰᤏᤧᤖᤥ॥ ᤂᤧᤒᤩᤠᤱ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤂᤧᤏᤧ᤹ ᤏᤡᤱᤘᤠ᤹ ᤁᤧᤄᤥᤛᤢᤶᤗᤥ॥

⁵ “ᤀᤠᤱᤃᤠ᤹ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤗᤠᤕᤥᤜᤠ᤹ᤖᤧ ᤁᤢᤗᤧᤰᤘᤠ ᤋᤃᤡᤀᤣ ᤂᤧᤱᤜᤠ᤹ ᤂᤢᤶᤍᤡᤱ ᤐᤡᤖᤢᤱᤛᤡᤱᤅᤠᤱ ᤘᤕᤧ. ᤜᤧᤰᤁᤩᤠᤱ ᤂᤧᤱᤜᤠ᤹ ᤁᤧᤓᤠ᤹ᤒᤠ ᤔᤣ᤺ᤴᤏᤣ ᤔᤧᤘᤕᤧᤸᤗᤧ ᤂᤧᤏᤧ᤹ ᤀᤠᤓᤧᤸᤗᤧᤀᤠᤱ ᤔᤧᤴᤏᤢᤵᤐᤣ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤁᤧᤈᤡ᤺ᤳᤋᤢᤛᤡᤒᤠᤸᤗᤧ ᤂᤧᤏᤧ᤹ ᤂᤧᤱᤜᤠ᤹ ᤛᤧᤵᤔᤠᤛᤡ ᤗᤧᤵᤔᤠᤱ ᤗᤠᤶᤃᤧᤗᤥᤛᤢᤛᤡ॥

⁶ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. ᤀᤠᤱᤃᤠ᤹ ᤁᤢᤜᤡᤱᤘᤧᤳ ᤘᤠ᤹ᤀᤠᤒᤠ ᤁᤢᤀᤡᤛᤡᤰ. ᤔᤠᤰᤂᤡ᤹ ᤛᤧᤔᤠ ᤕᤠ᤺ᤶᤒᤰᤁᤡᤴ ᤂᤡᤏᤡ᤹ ᤁᤧᤴᤈᤡ᤺ᤳᤋᤢᤶᤔᤡᤴᤒᤠᤸᤗᤧ ᤆᤥᤃᤢᤸᤗᤧ. ᤂᤡᤏᤡ᤹ ᤀᤠᤵᤑᤣᤰ ᤔᤠᤰᤂᤡ᤹ᤀᤡᤸᤗᤧ ᤁᤧᤗᤧ᤺ᤰᤋᤡᤖ ᤕᤠ᤺ᤴᤏᤡᤱ᤹॥ ᤔᤠᤰᤂᤡ᤹ ᤛᤧᤔᤠ ᤕᤠ᤺ᤶᤒᤰᤁᤡᤸᤗᤧ ᤂᤡᤏᤡ᤹ ᤁᤧᤏᤠ᤺ᤳᤋᤡ᤹᥄

⁷ ᤂᤧᤳᤇᤡᤱᤔᤠ ᤁᤧᤃᤥ᤺ᤵᤐᤠᤜᤠ᤹ ᤏᤢ ᤁᤧᤏᤢ᤺ᤱᤒᤠ ᤁᤧᤍᤠᤒᤠ ᤀᤠᤳᤋᤡᤴᤜᤠ᤹ᤛᤠᤱ ᤁᤧᤖᤧᤰ ᤛᤩᤧᤖᤢᤱᤛᤡᤱᤅᤠᤱ ᤀᤠᤱᤃᤠ᤹ ᤛᤣᤀᤡᤖ ᤁᤥ᤺ᤰᤔᤠᤴ ᤔᤢᤖᤧᤰ ᤂᤠᤖᤧᤰ ᤆᤡᤈᤡ ᤂᤰᤂᤰ ᤆᤥᤃᤢᤱ᤹॥

⁸ ᤀᤠᤱᤃᤠ᤹ ᤂᤧᤏᤧ᤹ ᤁᤧᤃᤥ᤺ᤰᤔᤠ ᤑᤠᤱᤈᤱᤜᤠ᤹ ᤁᤧᤛᤡᤒᤠᤜᤠ᤹ᤖᤧ ᤌᤡᤶᤛᤢᤱ᤹॥ ᤂᤧᤏᤧ᤹ ᤁᤧᤎᤧᤃᤢ ᤔᤠᤱᤘᤠᤜᤠ᤹. ᤁᤧᤏᤧᤏᤧᤒᤠᤍᤧᤴᤜᤠ᤹ ᤏᤢ ᤁᤧᤒᤠᤰᤗᤢᤶᤗᤢᤶᤒᤠ ᤋᤧᤴᤜᤠ᤹ ᤋᤠᤓᤣ᤺ᤸᤗᤧ ᤔᤧᤛᤧᤖᤢᤛᤡᤒᤠᤜᤠ᤹ᤖᤧ ᤛᤎᤧᤰ ᤔᤧᤎᤡᤶᤛᤢ᤹॥

⁹ ᤀᤠᤱᤃᤠ᤹ ᤂᤧᤏᤧ᤹ ᤛᤍᤠᤍᤡᤱ ᤔᤢᤖᤧᤰ ᤂᤠᤖᤧᤰ ᤆᤡᤈᤡ ᤂᤰᤂᤰ ᤆᤥ᤺ᤰᤏᤧ॥ ᤂᤧᤏᤧ᤹ ᤁᤧᤕᤧᤰᤕᤰᤜᤠ᤹ ᤕᤠᤶᤔᤥ ᤀᤠᤓᤧᤸᤗᤧᤀᤠᤱ ᤔᤧᤴᤈᤥᤃᤢᤴ᤹॥ ᤂᤧᤒᤩᤠᤱ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤂᤧᤏᤧ᤹ ᤏᤡᤱᤘᤠ᤹ ᤁᤧᤄᤥᤛᤢ᤹॥

¹⁰ “ᤌᤣᤀᤠᤱᤓᤧᤸᤗᤧ ᤗᤠᤈᤣᤴ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧᤴ ᤘᤕᤧᤖᤀᤣ. ᤂᤡᤏᤡ᤹ ᤀᤰᤂᤣ ᤁᤧᤒᤠ᤺ᤳᤋᤢᤶ᤹. ‘ᤀᤡᤛᤪᤠᤀᤡᤗ ᤏᤢ ᤕᤜᤢᤍᤠ ᤁᤴ ᤏᤧᤳᤇᤡ ᤛᤢᤘᤠᤱᤜᤠ᤹. ᤜᤧᤰᤁᤩᤠᤱ ᤂᤢᤴᤇᤡ᤹ ᤗᤠᤈᤣ᤹ᤜᤠ᤹ ᤀᤠᤏᤡ᤹ᤀᤡᤴ ᤐᤥᤱ᤹ ᤜᤧᤰᤁᤩᤠᤱ ᤂᤧᤴ ᤋᤧᤴᤜᤠ᤹ᤀᤥ ᤀᤠᤏᤡ᤹ ᤕᤢᤰ ᤆᤥᤃᤢᤶ᤹॥’

¹¹ ᤂᤧᤸᤗᤧᤆᤥᤃᤢᤸᤗᤧ. ᤀᤠᤱᤃᤠ᤹ ᤁᤢᤜᤡᤱᤘᤧᤳ ᤘᤠ᤹ᤀᤠᤒᤠ ᤁᤢᤀᤡᤛᤡᤰ. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. ᤂᤡᤏᤡ᤹ ᤕᤠ᤺ᤰᤗᤧ᤹ᤔᤠ ᤕᤠ᤺ᤶᤒᤰᤜᤠ᤹ᤖᤧ ᤁᤢᤗᤧᤰᤘᤠ ᤀᤠᤱᤃᤠ᤹ ᤀᤠᤒᤠᤅᤣ ᤏᤢ᤺ᤰᤋᤢᤱ ᤐᤡᤏᤡᤱ᤹॥ ᤂᤡᤏᤡ᤹ ᤛᤡᤰᤐᤥ᤺ᤰᤔᤠ. ᤏᤠᤜᤧᤶᤔᤠ ᤏᤢ ᤆᤡ᤺ᤳᤇᤡᤱᤔᤠ ᤁᤧᤖᤧᤰ ᤕᤠ᤺ᤶᤒᤰᤜᤠ᤹ᤖᤧ ᤁᤢᤗᤧᤰᤘᤠ ᤀᤠᤱᤃᤠ᤹ ᤂᤡᤏᤡ᤹ ᤂᤢᤶᤍᤡᤱ ᤐᤡᤏᤡᤱ᤹॥ ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤡᤏᤡ᤹ᤀᤥ ᤆᤥᤃᤢᤱᤒᤠ ᤐᤠ᤺ᤴᤜᤠ᤹ᤗᤠᤶ ᤀᤡᤛᤪᤠᤀᤡᤗᤖᤧ ᤀᤠᤱᤃᤠ᤹ ᤀᤠᤵᤑᤣᤰ ᤁᤢᤛᤡᤱ ᤏᤡ᤺ᤳᤋᤠᤖ ᤆᤥᤃᤢᤱ᤹॥

¹² ᤂᤧᤒᤩᤠᤱ ᤀᤡᤛᤪᤠᤀᤡᤗᤒᤠ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ᤖᤧ ᤁᤢᤍᤰᤗᤧᤱᤘᤠᤀᤥ ᤂᤡᤏᤡ᤹ ᤁᤧᤒᤠ᤺ᤳᤋᤢᤶᤒᤠ ᤁᤧᤖᤧᤰ ᤁᤢᤏᤠᤔᤧᤴᤇᤠ᤹ ᤐᤠ᤺ᤴᤜᤠ᤹ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤵᤛᤢᤱᤅᤠᤱ ᤘᤠ᤹ ᤑᤠ᤹ᤀᤠᤱ ᤂᤡᤏᤡ᤹ ᤏᤡᤱᤘᤠ᤹ ᤁᤧᤄᤥᤛᤢᤶ᤹॥ ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤀᤰᤂᤣ ᤁᤧᤒᤠ᤺ᤳᤋᤢᤶ. ‘ᤂᤧᤱᤜᤠ᤹ ᤔᤢᤖᤧᤰ ᤂᤠᤖᤧᤰ ᤆᤡᤈᤡ ᤂᤰᤂᤰ ᤐᤥ᤺ᤰᤂᤧᤀᤠᤱ ᤏᤧᤖᤥ. ᤀᤠᤏᤡ᤹ ᤂᤧᤱᤜᤠ᤹ ᤕᤢᤰᤔᤠᤖᤧ ᤗᤠᤃᤡ ᤆᤠᤔᤠ ᤁᤢᤈᤠ ᤁᤢᤀᤡᤛᤡᤰ ᤀᤠᤶᤒᤡᤖᤧᤀᤠᤱ ᤏᤧᤖᤥ᥄’

¹³ ᤜᤧᤰᤁᤣᤗ᤹ᤖᤡᤰ ᤁᤧᤒᤠ᤺ᤳᤋᤢᤶᤔᤠᤱ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤂᤡᤏᤡ᤹ ᤛᤠ᤹ᤖᤡᤰ ᤐᤜᤧᤴ ᤁᤧᤜᤧᤴᤏᤠᤛᤡᤖ ᤁᤧᤘᤕᤡ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤁᤴᤜᤠ᤹ ᤁᤧᤖᤧᤰ ᤂᤧᤵᤛᤢᤱᤅᤠᤱ ᤘᤠ᤹᥄

¹⁴ “ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤀᤠᤱᤃᤠ᤹ ᤂᤧᤏᤧ᤹ ᤔᤢᤖᤧᤰ ᤂᤠᤖᤧᤰ ᤆᤡᤈᤡ ᤂᤰᤂᤰ ᤆᤥ᤺ᤰᤏᤧᤸᤗᤧ ᤁᤧᤖᤧᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤐᤛ᤺ᤳᤛ᤺ᤳᤗᤥ॥

¹⁵ ᤀᤡᤛᤪᤠᤀᤡᤗᤒᤠ ᤋᤧᤱᤃᤵᤐᤡᤴ ᤔᤢᤖᤧᤰ ᤂᤠᤖᤧᤰ ᤆᤡᤈᤡ ᤂᤰᤂᤰ ᤐᤥ᤺ᤰᤂᤧᤸᤗᤧ ᤂᤧᤏᤧ᤹ ᤁᤧᤛ᤺ᤳᤋᤧ॥ ᤀᤠᤸᤗ ᤂᤧᤏᤧ᤹ ᤔᤢᤖᤧᤰ ᤂᤠᤖᤧᤰ ᤆᤡᤈᤡ ᤂᤰᤂᤰ ᤁᤧᤒᤥᤱᤅᤡᤸᤗᤧ ᤀᤠᤱᤃᤠ᤹ ᤛ᤺ᤳᤋᤠ᥄ ᤛᤣᤀᤡᤖ ᤁᤥ᤺ᤰᤔᤠᤀᤥᤒᤠ ᤂᤡᤏᤡ᤹ ᤔᤏᤠᤜᤠ᤹ ᤏᤢ ᤀᤣᤍᤥᤔᤀᤥ ᤁᤧᤕᤢᤱᤒᤠᤜᤠ᤹ ᤘᤖᤧᤱᤗᤧᤱ ᤁᤧᤔᤧᤃᤡ᤹᥄ ᤂᤧᤒᤩᤠᤱ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢᤖᤥ॥