ᤀᤡᤈᤁᤡᤀᤣᤗ 34 - LIFOTNTᤀᤡᤛᤪᤠᤀᤡᤗᤒᤠ ᤔᤧᤸᤗᤢᤰᤁᤶᤒᤠᤜᤠ᤹ 1 ᤂᤧᤒᤩᤠᤱ ᤁᤴ ᤀᤡᤱᤄᤱᤅᤡᤴ ᤕᤜᤘᤣ ᤍᤠᤱᤒᤠᤗᤠᤶ ᤀᤠᤱᤃᤠ᤹ᤀᤥ ᤁᤧᤖᤧ— 2 “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤂᤧᤏᤧ᤹ ᤀᤡᤛᤪᤠᤀᤡᤗᤒᤠ ᤔᤧᤸᤗᤢᤰᤁᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤔᤠᤱᤏᤡᤱᤘᤠ᤹ᤐᤠᤴ ᤐᤠᤖᤧ᤹॥ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤗᤠᤶ ᤂᤧᤏᤧ᤹ ᤁᤴ ᤀᤡᤱᤄᤱᤅᤡᤴ ᤂᤧᤱᤜᤠ᤹ ᤔᤧᤳᤋᤧᤛᤧ᤹—ᤂᤡᤏᤡ᤹ ᤌᤰᤛᤠᤗᤢᤵᤜᤠ᤹ ᤁᤶᤒᤪᤠᤱ ᤔᤧᤵᤔᤠᤛᤡᤖᤧ ᤁᤢᤗᤧᤰᤘᤠ ᤂᤡᤏᤡ᤹ ᤀᤠᤒᤠᤅᤣᤖᤰ ᤁᤶᤒᤪᤠᤱ ᤁᤧᤔᤧᤳᤇᤡᤱᤒᤠ ᤔᤧᤸᤗᤢᤰᤁᤶᤒᤠᤜᤠ᤹ ᤁᤧᤈᤡ᤺ᤳᤋᤡ ᤁᤧᤛᤩᤧ᤹ᤀᤡᤖᤥ॥ ᤌᤣ ᤔᤧᤸᤗᤢᤰᤁᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤔᤧᤸᤗᤢᤰᤜᤠ᤹ ᤁᤢᤈᤠ ᤆᤠ᤺ᤵᤔᤠᤛᤡ ᤔᤧᤒᤥᤱᤏᤧᤶᤒᤡ᥅ 3 ᤂᤡᤏᤡ᤹ ᤐᤡᤳᤏᤢ ᤁᤧᤎᤢᤅᤢᤶ᤹. ᤁᤢᤶᤒᤪᤡᤰᤁᤡᤴ ᤆᤠᤱ ᤁᤧᤈᤠᤰᤂᤢᤶ᤹. ᤜᤧᤰᤁᤩᤠᤱ ᤁᤧᤖᤧᤰᤏᤢ᤺ᤸᤗᤧ ᤘᤖᤢᤵᤗᤢᤵᤐᤠ ᤌᤰᤛᤠᤜᤠ᤹ ᤁᤧᤛᤧᤖᤢᤶ ᤁᤧᤈᤠᤶᤛᤡᤶ᤹. ᤁᤖ ᤂᤡᤏᤡ᤹ ᤌᤰᤛᤠᤗᤢᤵᤜᤠ᤹ ᤛᤠᤰᤁᤡᤸᤗᤧ ᤋᤖᤢᤛᤡᤖ ᤁᤧᤕᤠ᤺ᤴᤍᤢᤶᤛᤡᤶ᤹॥ 4 ᤔᤧᤴᤎᤢᤶᤔᤏᤠᤒᤧᤴ ᤂᤡᤏᤡ᤹ ᤁᤶᤒᤪᤠᤱ ᤔᤧᤶᤔᤧᤳᤋᤣ ᤁᤧᤘᤕᤡ᤹॥ ᤁᤧᤍᤢᤰᤐᤧᤴ ᤂᤡᤏᤡ᤹ ᤔᤧᤴᤘᤣ᤺ᤴᤏᤣ ᤁᤧᤘᤕᤡ᤹ ᤀᤡᤃᤪ ᤁᤧᤃᤠ᤺ᤶᤒᤧᤴ ᤛᤡᤍᤠ᤹ᤐᤠᤱᤍᤠ᤹ ᤔᤧᤱᤄᤣ᤺ᤱ ᤔᤧᤶᤒᤡᤀᤣ ᤁᤧᤘᤕᤡ᤹॥ ᤂᤧᤴ ᤔᤠ᤺ᤱᤄᤠ ᤁᤧᤗᤧᤱᤒᤠ ᤁᤧᤒᤣ᤺ᤰᤐᤠᤀᤠᤱ ᤁᤧᤘᤠ᤹ᤒᤠᤜᤠ᤹ ᤏᤢ ᤁᤧᤔᤠᤒᤠᤀᤠᤱ ᤁᤧᤘᤠ᤹ᤒᤠᤜᤠ᤹ ᤁᤥ᤺ᤵᤔᤠᤛᤡᤖᤧ ᤗᤠᤃᤡ ᤂᤡᤏᤡ᤹ ᤔᤧᤶᤒᤣ᤺ᤰᤁᤣ ᤁᤧᤘᤕᤡ᤹॥ ᤂᤧᤴᤏᤢ᤺ᤸᤗᤧᤃ. ᤂᤡᤏᤡ᤹ ᤂᤧᤱᤜᤠ᤹ ᤛᤠ᤹ᤖᤡᤰ ᤋᤠᤵᤑᤧ᤺ᤸᤗᤡᤰ ᤏᤢ ᤗᤢᤱᤔᤠ᤹ ᤛᤩᤠ᤺ᤳ ᤔᤧᤸᤗ᤹ᤀᤣ ᤕᤢᤰ ᤁᤧᤈᤥᤃᤢᤶᤛᤡᤶᤔᤠᤱ ᤔᤧᤘᤠ᤹॥ 5 ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤔᤧᤸᤗᤢᤰᤜᤠ᤹ ᤔᤧᤸᤗᤢᤰᤁᤶᤒᤠ ᤔᤣ᤺ᤴᤏᤣ ᤑᤢᤳᤇᤡᤱᤈᤩᤠᤱ ᤔᤧᤛᤧᤖᤧ ᤔᤧᤒᤣᤀᤠᤱ ᤔᤧᤘᤠ᤹. ᤜᤧᤰᤁᤩᤠᤱ ᤀᤠᤳᤋᤡᤴ ᤋᤠᤶᤓᤢᤱ ᤌᤰᤛᤠ᤺ᤸᤗᤧ ᤗᤠᤃᤡᤛᤠᤱ ᤂᤧᤱᤜᤠ᤹ ᤁᤢᤍᤧᤶ ᤁᤧᤏᤢ᤹ᤒᤠ ᤛᤠᤏᤠ᤺ᤳ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹॥ 6 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤠᤰ ᤐᤡᤛᤠᤱ. ᤁᤧᤖᤧᤰ ᤁᤥ᤺ᤰᤔᤠ ᤑᤠᤱᤈᤱᤜᤠ᤹ ᤏᤢ ᤌᤧᤃᤢ ᤔᤠᤱᤘᤠᤜᤠ᤹ ᤁᤧᤖᤧᤰ ᤗᤧᤵᤔᤠᤱ ᤂᤧᤱᤜᤠ᤹ ᤔᤧᤗᤧᤅᤧᤀᤠᤱ ᤔᤧᤘᤠ᤹. ᤜᤧᤰᤁᤣᤛᤠᤱ ᤂᤧᤱᤜᤠ᤹ ᤁᤥ᤺ᤵᤔᤠᤛᤡᤖᤧ ᤗᤠᤃᤡ ᤜᤠ᤺ᤳᤋᤠᤱ ᤔᤧᤶᤒᤣ᤺ᤰᤁᤣ ᤘᤠ᤹॥ 7 “ᤂᤧᤸᤗᤧᤆᤥᤃᤢᤸᤗᤧ. ᤂᤡᤏᤡ᤹ ᤔᤧᤸᤗᤢᤰᤁᤶᤒᤠᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤂᤧᤵᤛᤧᤶᤔᤧ᤹— 8 ᤀᤠᤱᤃᤠ᤹ ᤁᤢᤜᤡᤱᤘᤧᤳ ᤘᤠ᤹ᤀᤠᤒᤠ ᤁᤢᤀᤡᤛᤡᤰ. ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤱ᤹. ᤀᤠᤱᤃᤠ᤹ ᤀᤠᤎᤰᤛᤠᤜᤠ᤹ ᤂᤡᤏᤡ᤹ ᤁᤧᤏᤠ᤹ᤖᤢᤶᤛᤡᤶ ᤜᤧᤰᤁᤩᤠᤱ ᤁᤧᤖᤧᤰ ᤋᤠᤶᤓᤢᤱ ᤌᤰᤛᤠᤜᤠ᤹ᤖᤧ ᤂᤧᤱᤜᤠ᤹ ᤑᤵᤔᤠᤛᤡᤖᤧ ᤗᤠᤃᤡ ᤂᤡᤏᤡ᤹ ᤁᤧᤗᤧᤖᤢᤶ ᤁᤧᤍᤣᤛᤢᤶᤛᤡᤶ॥ ᤜᤧᤰᤁᤩᤠᤱ ᤂᤡᤏᤡ᤹ ᤀᤠᤱᤃᤠ᤹ ᤀᤠᤔᤧᤸᤗᤢᤰᤁᤶᤒᤠ ᤁᤧᤘᤕᤡᤛᤠᤱ. ᤀᤠᤱᤃᤠ᤹ ᤀᤠᤔᤧᤸᤗᤢᤰᤜᤠ᤹ ᤔᤧᤔᤕᤧᤀᤠᤱ ᤔᤧᤘᤕᤧᤸᤗᤧ ᤂᤡᤏᤡ᤹ ᤂᤧᤱᤜᤠ᤹ ᤁᤧᤱᤃᤥ᤺ᤳᤋᤢᤶᤛᤡᤶᤔᤧᤴ॥ ᤂᤡᤏᤡ᤹ ᤀᤠᤒᤠᤅᤣ ᤁᤶᤒᤪᤠᤱ ᤁᤧᤔᤧᤳᤋᤠᤛᤡ ᤜᤧᤰᤁᤩᤠᤱ ᤔᤧᤸᤗᤢᤰᤜᤠ᤹ ᤛᤠᤰᤁᤡᤸᤗᤧ ᤋᤖᤢᤛᤡᤖ ᤁᤧᤗᤧᤖᤢᤶ ᤁᤧᤍᤣᤛᤢᤶᤛᤡᤶ॥ 9 ᤂᤧᤸᤗᤧᤆᤥᤃᤢᤸᤗᤧ. ᤂᤡᤏᤡ᤹ ᤔᤧᤸᤗᤢᤰᤁᤶᤒᤠᤜᤠ᤹ᤖᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤂᤧᤵᤛᤧᤶᤔᤧ᤹॥ 10 ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤱ᤹—ᤀᤠᤸᤗ ᤀᤠᤱᤃᤠ᤹ ᤁᤴ ᤔᤧᤸᤗᤢᤰᤁᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤔᤡᤀᤠᤖᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤔᤧᤸᤗᤢᤰᤜᤠ᤹ ᤌᤧᤔᤠ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ᤹ ᤂᤧᤸᤗᤧ ᤗᤠᤃᤡ ᤀᤠᤱᤃᤠ᤹ ᤂᤧᤱᤜᤠ᤹ ᤗᤰᤐᤧᤴᤏᤥ ᤌᤠᤛᤢᤱᤛᤡᤱ᤹॥ ᤀᤠᤱᤃᤠ᤹ ᤔᤧᤸᤗᤢᤰ ᤁᤶᤒᤪᤠᤱ ᤔᤧᤵᤔᤠ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤢᤰᤁᤡᤴ ᤋᤣ᤹ᤖᤢᤱ ᤐᤡᤖᤢᤱᤛᤡᤱ᤹. ᤂᤧᤒᤩᤠᤱ ᤂᤧᤱᤜᤠ᤹ ᤀᤠᤒᤠᤅᤣ ᤁᤢᤈᤠ ᤆᤠ᤺ᤳᤇᤡᤱᤔᤠ ᤗᤠᤶᤔᤡᤴ ᤛᤠᤰᤋᤢᤱ ᤐᤡᤖᤢᤱᤛᤡᤱ᤹॥ ᤀᤠᤱᤃᤠ᤹ ᤀᤠᤎᤰᤛᤠᤜᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤢᤖᤠᤀᤥᤗᤠᤶ ᤛᤧ᤺ᤵᤋᤢᤱᤛᤡᤱ᤹. ᤀᤠᤸᤗᤀᤠᤱᤎᤥ ᤔᤧᤸᤗᤢᤰᤜᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤆᤠᤔᤠ ᤁᤢᤈᤠ ᤔᤧᤶᤒᤥᤱᤏᤧᤴᤗᤥ॥ ᤏᤢᤒᤠ ᤔᤧᤸᤗᤢᤰᤁᤶᤒᤠ 11 “ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤱ᤹—ᤀᤠᤱᤃᤠ᤹ ᤀᤠᤔᤧᤸᤗᤢᤰᤜᤠ᤹ ᤀᤠᤱᤃᤠ᤹ ᤀᤠᤵᤑᤣᤰ ᤁᤥ᤺ᤳᤋᤢᤱᤛᤡᤱᤅᤠᤱ ᤂᤥᤛᤢᤱᤛᤡᤱ᤹॥ 12 ᤑᤢᤳᤇᤡᤱᤈᤩᤠᤱ ᤁᤧᤒᤥᤱᤒᤠ ᤁᤢᤔᤧᤸᤗᤢᤰᤜᤠ᤹ ᤁᤧᤃᤥ᤺ᤵᤐᤠ ᤔᤧᤸᤗᤢᤰᤁᤶᤒᤠ ᤜᤧᤰᤋᤱᤒᤠ ᤀᤠᤱᤃᤠ᤹ ᤐᤥᤱᤅᤠᤖᤥ॥ ᤂᤧᤴ ᤂᤠᤃᤧᤔᤠᤰᤐᤠ ᤏᤢ ᤂᤠ᤹ᤔᤡᤳ ᤁᤧᤍ᤺ᤶᤒᤠ ᤕᤧᤴᤏᤥ ᤑᤢᤳᤇᤡᤱᤈᤩᤠᤱ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤕᤧᤒᤠ ᤁᤧᤖᤧᤰ ᤋᤧᤴᤜᤠ᤹ᤀᤥᤗᤠᤶ ᤀᤠᤱᤃᤠ᤹ ᤂᤧᤱᤜᤠ᤹ ᤛᤧ᤺ᤵᤋᤢᤱᤛᤡᤱ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤔᤧᤸᤗᤢᤰᤜᤠ᤹ ᤂᤥᤛᤢᤱᤛᤡᤱ᤹॥ 13 ᤔᤏᤠᤜᤠ᤹ ᤏᤢ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥᤗᤠᤶ ᤀᤠᤱᤃᤠ᤹ ᤂᤧᤱᤜᤠ᤹ ᤂᤢᤴᤇᤡ᤹ ᤀᤠᤵᤑᤣᤰ ᤀᤡᤛᤪᤠᤀᤡᤗ ᤗᤠᤈᤣ᤹ᤒᤠ ᤜᤡᤶᤔᤥ ᤏᤢ᤺ᤰᤋᤢᤱ ᤋᤠᤖᤢᤱᤛᤡᤱ᤹॥ ᤀᤡᤛᤪᤠᤀᤡᤗᤒᤠ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ᤀᤥ ᤏᤢ ᤐᤠᤰᤗᤢᤶᤗᤢᤶᤒᤠᤍᤧᤴᤜᤠ᤹ᤖᤧ ᤁᤢᤕᤠᤀᤥ ᤜᤧᤰᤁᤩᤠᤱ ᤔᤏᤠ ᤁᤧᤕᤢᤱᤒᤠ ᤁᤧᤖᤧᤰ ᤋᤧᤴᤜᤠ᤹ᤀᤥ ᤀᤠᤱᤃᤠ᤹ ᤂᤧᤱᤜᤠ᤹ ᤁᤢᤈᤠ ᤆᤠ᤺ᤳᤋᤢᤱᤛᤡᤱ᤹॥ 14 ᤀᤥᤘᤠ. ᤀᤠᤱᤃᤠ᤹ ᤂᤧᤱᤜᤠ᤹ ᤀᤡᤛᤪᤠᤀᤡᤒᤠ ᤆᤴᤈᤶᤒᤠ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ᤀᤥᤒᤠ ᤏᤢᤒᤠ ᤆᤠᤖᤠᤶᤔᤠᤍᤧᤴᤜᤠ᤹ ᤐᤡᤖᤢᤱᤛᤡᤱ᤹॥ ᤂᤧᤱᤜᤠ᤹ ᤂᤧ᤹ᤕᤥᤒᤠ ᤛᤡᤖᤠ᤹ ᤐᤎᤠᤱᤃᤧᤎᤠᤱᤒᤠ ᤋᤧᤴᤜᤠ᤹ᤀᤥ ᤁᤧᤱᤃᤪᤥᤒᤠ ᤔᤧᤈᤠᤀᤠᤱ ᤔᤧᤏᤧᤖᤥ ᤜᤧᤰᤁᤩᤠᤱ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ᤀᤥᤒᤠ ᤛᤖᤣ᤺ᤰᤕᤠᤵᤐᤠ ᤆᤠᤖᤠᤶᤔᤠᤍᤧᤴᤜᤠ᤹ᤀᤥ ᤆᤠᤔᤧᤗᤠᤶ॥ 15 ᤀᤠᤱᤃᤠ᤹ ᤀᤠᤒᤠᤅᤣ ᤀᤠᤔᤧᤸᤗᤢᤰᤜᤠ᤹ ᤀᤥᤔᤧᤳᤋᤢᤱᤛᤡᤱ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤱᤜᤠ᤹ ᤏᤧᤔᤠᤖᤧ ᤗᤠᤃᤡ ᤛᤏᤠᤖᤢᤱ ᤜᤠᤱᤜᤠᤱᤒᤠᤍᤧᤴ ᤌᤡᤰ ᤐᤡᤖᤢᤱᤛᤡᤱ᤹. ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱ᤹॥ 16 ᤁᤧᤔᤠᤒᤠ. ᤂᤧᤴ ᤁᤧᤗᤧᤱᤒᤠ ᤁᤧᤒᤣ᤺ᤰᤐᤠᤜᤠ᤹ ᤀᤠᤱᤃᤠ᤹ ᤁᤥ᤺ᤳᤋᤢᤱᤛᤡᤱ᤹. ᤜᤧᤰᤁᤩᤠᤱ ᤛᤧ᤺ᤵᤋᤢᤱᤛᤡᤱᤅᤠᤱ ᤂᤧᤱᤜᤠ᤹ ᤕᤠᤶᤔᤥ ᤜᤡᤶᤔᤥ ᤋᤠᤖᤢᤱᤛᤡᤱ᤹॥ ᤀᤠᤱᤃᤠ᤹ ᤁᤧᤃᤠ᤺ᤶᤒᤠᤜᤠ᤹ ᤛᤡᤍᤠ᤹ᤐᤠᤱᤍᤠ᤹ ᤂᤣ᤺ᤰᤂᤢᤱ ᤐᤡᤖᤢᤱᤛᤡᤱ᤹ ᤜᤧᤰᤁᤩᤠᤱ ᤔᤧᤴᤎᤢᤶᤔᤏᤠᤒᤠᤜᤠ᤹ ᤁᤧᤎᤢᤶᤒᤠ ᤆᤥᤃᤢᤱᤛᤡᤱ᤹॥ ᤁᤖ ᤀᤠᤱᤃᤠ᤹ ᤂᤧᤴ ᤁᤧᤔᤧ᤹ᤒᤠᤜᤠ᤹ ᤏᤢ ᤁᤧᤎᤢᤶᤒᤠᤜᤠ᤹ ᤔᤧᤰᤂᤢᤱᤛᤡᤱ᤹॥ ᤀᤠᤱᤃᤠ᤹ ᤂᤧᤱᤜᤠ᤹ ᤁᤢᤈᤠ ᤆᤠ᤺ᤳᤋᤢᤱᤛᤡᤱ᤹. ᤀᤥᤘᤠ ᤀᤠᤱᤃᤠ᤹ ᤂᤧᤱᤜᤠ᤹ ᤁᤢᤍᤥ᤺ᤵᤔᤠ ᤂᤠᤛᤧᤴ ᤆᤥᤃᤢᤱᤛᤡᤱ᤹᥄ 17 “ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤔᤏᤠᤜᤠ᤹ ᤔᤧᤳᤋᤢᤱᤛᤡᤱ᤹—ᤂᤡᤏᤡ᤹ ᤗᤠᤃᤡᤃ. ᤀᤠᤱᤃᤠ᤹ ᤀᤠᤎᤰᤛᤠᤗᤢᤵᤛᤣ. ᤀᤠᤱᤃᤠ᤹ ᤗᤳᤇᤠ ᤌᤰᤛᤠᤗᤢᤵ ᤗᤢᤶᤔᤥᤒᤠ ᤌᤰᤛᤠ ᤌᤡᤰᤁᤧᤴ ᤏᤢ ᤘᤣ᤹ᤀᤡᤴ. ᤔᤧ᤺ᤴᤍᤠᤜᤠ᤹ᤗᤠᤶᤒᤠ ᤔᤧᤸᤗᤢᤰᤜᤠ᤹ ᤛᤧᤴᤏᤡᤱᤅᤠᤱ ᤂᤠᤛᤧᤴ ᤆᤥ᤺ᤰᤏᤡᤱ᤹॥ 18 ᤂᤡᤏᤡ᤹ ᤀᤠᤵᤑᤣᤰ ᤗᤠᤃᤡ ᤁᤧᤖᤧᤰᤏᤢ᤺ᤸᤗᤧ ᤏᤢᤒᤠ ᤆᤠᤖᤠᤶᤔᤠᤍᤧᤴᤜᤠ᤹ ᤂᤡᤏᤡ᤹ ᤗᤠᤃᤡ ᤁᤧᤏᤧᤛ᤻ᤛᤢᤶᤔᤡᤸᤗᤧ ᤌᤣ ᤁᤸᤗᤧ ᤂᤡᤏᤡ᤹ ᤁᤧᤴᤕᤥᤖᤡᤶᤒᤡ᥅ ᤂᤡᤏᤡ᤹ ᤘᤣ᤹ᤀᤡᤴᤏᤠᤱ ᤆᤡᤖᤠᤰ ᤆᤡᤖᤠᤰ ᤗᤠ᤺ᤰᤔᤠ ᤐᤥᤱᤒᤡ᥅ ᤛᤣᤛᤣᤒᤠ ᤆᤫᤠ᤺ᤳᤋᤡᤴ ᤂᤡᤏᤡ᤹ ᤀᤠᤵᤑᤣᤰ ᤗᤠᤃᤡ ᤁᤧᤎᤢᤅᤢᤶᤔᤡᤸᤗᤧ ᤌᤣ ᤁᤸᤗᤧ ᤂᤡᤏᤡ᤹ ᤁᤧᤴᤕᤥᤖᤡᤶᤒᤡ᥅ ᤂᤡᤏᤡ᤹ ᤗᤠᤱᤅᤡᤸᤗᤧ ᤘᤣ᤹ᤀᤡᤴᤏᤠᤱ ᤔᤠᤰᤂᤢᤴᤍᤩᤠ ᤌᤢᤶᤔᤠ ᤐᤥᤱᤒᤡ᥅ 19 ᤂᤡᤏᤡ᤹ ᤆᤡᤖᤠᤰ ᤆᤡᤖᤠᤰ ᤁᤧᤗᤠ᤺ᤰᤋᤢᤶᤔᤠᤱ ᤁᤧᤏᤧᤒᤠᤴ ᤌᤣᤀᤠᤱ ᤀᤠᤱᤃᤠ᤹ ᤀᤠᤎᤰᤛᤠᤗᤢᤵᤜᤠ᤹ᤖᤧ ᤆᤠᤔᤠᤀᤣ ᤐᤥᤱᤒᤠᤒᤣ᥅ ᤜᤧᤰᤁᤩᤠᤱ ᤂᤡᤏᤡ᤹ ᤔᤠᤰᤂᤢᤴᤍᤩᤠ ᤁᤧᤎᤢᤴᤍᤢᤶᤔᤠᤱ ᤁᤧᤏᤧᤒᤠ ᤆᤫᤠ᤺ᤳᤋᤡᤴ ᤌᤣᤀᤠᤱ ᤌᤢᤱᤔᤠᤀᤣ ᤐᤥᤱᤒᤠᤒᤣ᥅ 20 “ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤔᤧᤳᤋᤢᤱᤛᤡᤱ᤹—ᤀᤠᤱᤃᤠ᤹ ᤀᤠᤵᤑᤣᤰ ᤘᤖᤡᤰᤗᤡᤰᤐᤠ ᤁᤧᤔᤧ᤹ᤒᤠ ᤔᤧᤸᤗᤢᤰᤜᤠ᤹ ᤜᤧᤰᤁᤩᤠᤱ ᤕᤧᤵᤐᤠ ᤏᤢ ᤜᤥᤖᤡᤰᤗᤰ ᤁᤧᤒᤵᤐᤠ ᤛᤢ᤺ᤱᤃᤡᤰᤁᤡ᤺ᤰᤐᤠ ᤔᤧᤸᤗᤢᤰᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤂᤠᤛᤧᤴ ᤆᤥᤃᤢᤱᤛᤡᤱ᤹॥ 21 ᤂᤡᤏᤡ᤹ ᤁᤧᤔᤧ᤹ᤒᤠ ᤔᤧᤸᤗᤢᤰᤜᤠ᤹ᤖᤧ ᤁᤧᤍᤢᤰᤐᤠ ᤏᤢ ᤛᤠᤰᤁᤧᤸᤗᤧ ᤋᤖᤢᤛᤡᤒᤠ ᤀᤠᤱᤃᤠ᤹ ᤀᤠᤎᤰᤛᤠᤜᤠ᤹ ᤔᤠ᤺ᤱᤄᤠᤒᤠ ᤗᤠᤈᤣ᤹ᤜᤠ᤹ᤀᤥ ᤑᤢᤳᤇᤡᤱᤈᤩᤠᤱ ᤔᤧᤴᤇᤧ ᤔᤧᤴᤍᤣᤛᤡᤱᤅᤣ ᤌᤠᤖᤡᤰ ᤂᤡᤏᤡ᤹ ᤂᤧᤱᤜᤠ᤹ ᤁᤧᤈᤴᤍᤢᤶᤛᤡᤶᤔᤠᤱ ᤁᤧᤒᤢ᤺ᤴᤍᤢᤶᤛᤡᤶ॥ 22 ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤔᤧᤸᤗᤢᤰᤜᤠ᤹ ᤋᤠᤱᤛᤧ᤺ᤵᤋᤢᤱᤛᤡᤱ᤹. ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤠᤸᤗᤀᤠᤱᤎᤥ ᤋᤠᤵᤑᤧ᤺ᤸᤗᤡᤰ ᤔᤧᤴᤔᤧᤳᤋᤢᤛᤡᤴ᤹॥ ᤌᤰᤛᤠᤗᤢᤵ ᤗᤢᤶᤔᤥᤒᤠ ᤌᤰᤛᤠ ᤌᤡᤰᤁᤧᤴ ᤏᤢ ᤘᤣ᤹ᤀᤡᤴ ᤀᤠᤱᤃᤠ᤹ ᤂᤠᤛᤧᤴ ᤆᤥᤃᤢᤱᤛᤡᤱ᤹॥ 23 ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤗᤳᤇᤠ ᤔᤧᤸᤗᤢᤰᤁᤶᤒᤠ. ᤀᤠᤛᤧᤘᤠᤖᤥᤒᤠ ᤍᤠᤀᤢᤍᤧᤴ ᤁᤣ᤺ᤳᤋᤢᤱ᤹॥ ᤂᤢᤏᤧ᤹ ᤂᤧᤱᤜᤠ᤹ ᤁᤶᤒᤪᤠᤱ ᤔᤧᤳᤋᤢᤛᤡ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤗᤠᤃᤡ ᤂᤢᤏᤧ᤹ ᤔᤧᤸᤗᤢᤰᤁᤶᤒᤠ ᤐᤥᤱ᤹॥ 24 ᤜᤧᤰᤁᤩᤠᤱ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱ ᤐᤥᤱᤅᤠ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠ ᤍᤠᤀᤢᤍᤧᤴ ᤕᤢᤰᤛᤠᤒᤠ ᤐᤥᤱ᤹॥ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤴ ᤐᤠᤖᤠᤱᤅᤠᤱ ᤘᤠ᤹ᤖᤥ᥄ ᤕᤜᤘᤣ ᤍᤠᤱᤒᤧᤸᤗᤧ ᤆᤥᤃᤢᤒᤠ ᤛᤏᤠᤖᤢᤱ ᤔᤠᤱᤜᤢᤵ 25 “ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤏᤢ ᤛᤏᤠᤖᤢᤱ ᤔᤠᤱᤜᤢᤵ ᤌᤡᤰ ᤆᤥᤃᤢᤱ᤹ ᤜᤧᤰᤁᤩᤠᤱ ᤗᤠᤈᤣ᤹ᤀᤥᤗᤠᤶ ᤁᤧᤀᤠ᤺ᤵᤐᤠ ᤌᤰᤛᤠᤜᤠ᤹ ᤏᤠ᤺ᤳᤋᤢᤱᤍᤣᤛᤢᤱᤛᤡᤱ᤹॥ ᤂᤧᤒᤩᤠᤱ ᤂᤧᤱᤜᤠ᤹ ᤀᤠᤵᤑᤣᤰ ᤛᤠ᤹ᤖᤡᤰ ᤋᤠᤶᤓᤢᤱᤅᤥᤒᤠ ᤋᤧᤴᤜᤠ᤹ᤀᤥ ᤏᤢ ᤛᤡᤱᤜᤠ᤹ᤀᤥ ᤜᤠᤱᤜᤠᤱᤅᤠᤱ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤕᤠᤱᤎᤥ᤺ᤰᤔᤠ ᤏᤢ ᤔᤧᤱᤃᤡᤀᤣ ᤀᤡᤶᤔᤠ ᤔᤧᤛᤢᤰ॥ 26 ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤏᤢ ᤀᤠᤛᤣᤛᤣ ᤁᤥ᤺ᤰᤔᤠ ᤁᤒᤪᤡᤱ ᤐᤡᤛᤠᤱ ᤁᤧᤏᤧᤒᤠ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤜᤠ᤹ᤀᤥ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶ ᤌᤠᤛᤢᤱ᤹॥ ᤜᤧᤰᤁᤩᤠᤱ ᤕᤠᤰᤘᤠ ᤌᤠᤔᤠ ᤕᤧᤶᤔᤥ ᤂᤧᤱᤜᤠ᤹ ᤆᤠᤜᤠ ᤔᤧᤈᤥ᤺ᤰᤐᤠ ᤐᤠᤱᤃᤧᤴᤍᤡᤱ ᤘᤜᤡᤳ ᤌᤠᤛᤢᤖ ᤕᤠ᤺ᤴᤍᤢᤱ᤹॥ ᤂᤧᤵᤔᤥ ᤜᤠᤱᤘᤠᤃᤧᤴ ᤔᤢ᤹ᤀᤡᤛᤠᤶᤗᤧᤴ ᤐᤠᤱᤃᤧᤴᤍᤡᤱ ᤘᤜᤡᤳ ᤌᤠᤖᤥ॥ 27 ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤡᤱᤛᤣ᤹ᤀᤡᤰᤜᤠ᤹ᤀᤥ ᤏᤢ ᤀᤡᤰᤋᤠᤵᤜᤠ᤹ᤀᤥ ᤀᤠᤳᤋᤠᤋᤠᤴᤏᤣ ᤕᤖᤡᤰ ᤁᤢᤈᤠ᤹ ᤌᤥᤰ. ᤜᤧᤰᤁᤩᤠᤱ ᤁᤧᤖᤧᤰ ᤔᤏᤠᤜᤠ᤹ ᤜᤠᤱᤜᤠᤱ ᤗ᤹ᤖᤡᤰ ᤔᤧᤕᤢᤱ᤹॥ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤕᤥᤃ᤻ᤒᤠ ᤕᤥ᤺ᤃ᤻ᤔᤠ ᤔᤧᤈᤥᤃᤢᤛᤡᤒᤠ ᤂᤢᤴᤇᤡ᤹ ᤀᤡᤄᤣ᤺ᤱᤔᤠ ᤑᤧᤴᤌᤰᤁᤪᤱᤜᤠ᤹ ᤑᤢ᤹ᤖᤢᤱ᤹ ᤐᤡᤖᤢᤱᤛᤡᤱ᤹ ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤥᤰ ᤁᤧᤈᤥ᤺ᤰᤐᤠᤜᤠ᤹ᤖᤥᤗᤠᤶ ᤛᤧ᤺ᤴᤍᤢᤱᤛᤡᤱᤅᤡᤸᤗᤧ. ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢ᤹॥ 28 ᤀᤠᤸᤗᤀᤠᤱᤎᤥ ᤂᤧᤱᤜᤠ᤹ ᤘᤣ᤹ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤔᤧᤴᤎᤠᤏᤧᤴ. ᤜᤧᤰᤁᤩᤠᤱ ᤋᤠᤶᤓᤢᤱ ᤌᤰᤛᤠᤜᤠ᤹ᤖᤧ ᤀᤠᤸᤗᤀᤠᤱᤎᤥ ᤔᤧᤴᤈᤛᤡᤴ᤹॥ ᤂᤧᤱᤜᤠ᤹ ᤜᤠᤱᤜᤠᤱᤅᤠᤱ ᤔᤧᤘᤠ᤹ ᤔᤧᤕᤢᤱ᤹. ᤜᤧᤰᤁᤩᤠᤱ ᤀᤠᤳᤋᤡᤸᤗᤧᤀᤠᤱ ᤂᤧᤱᤜᤠ᤹ ᤕᤱᤔᤠ ᤔᤧᤛᤧᤖᤢᤛᤡᤴ᤹॥ 29 “ᤜᤧᤰᤁᤩᤠᤱ ᤁᤵᤔᤥ ᤁᤧᤎᤥ᤺ᤰᤐᤠ ᤁᤢᤈᤠᤜᤠ᤹ᤖᤧ ᤗᤠᤃᤡ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣᤴ ᤁᤢᤔᤡᤱ ᤁᤧᤀᤡᤱᤒᤠ ᤆᤥᤃᤢᤱ᤹. ᤜᤧᤰᤁᤣᤗ᤹ᤖᤡᤰ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤀᤠᤵᤑᤠᤸᤗᤧᤀᤠᤱ ᤛᤠᤰᤘᤠ᤺ᤴᤗᤧ ᤔᤧᤍᤖᤢᤛᤡᤴ᤹ ᤀᤡᤃᤪ ᤘᤣ᤹ ᤗᤠᤈᤣ᤹ᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤁᤢᤏᤠᤔᤧᤴᤇᤠ᤹ ᤔᤧᤶᤔᤧᤋᤢᤛᤡᤴ᤹॥ 30 ᤁᤶᤓᤗ᤹ᤖᤡᤰ. ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤂᤢᤴᤇᤡ᤹ᤏᤢ ᤘᤠ᤹ᤀᤠ. ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢ᤹॥ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹. ᤀᤠᤱᤃᤠ᤹ ᤀᤠᤔᤏᤠᤛᤡ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢ᤹. ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱ᤹॥ 31 “ᤂᤡᤏᤡ᤹ᤃ ᤀᤠᤱᤃᤠ᤹ ᤀᤠᤎᤰᤛᤠ ᤆᤠᤖᤠᤶᤔᤠᤍᤧᤴᤏᤥᤒᤠ ᤀᤠᤔᤧᤸᤗᤢᤰ ᤗᤢᤵᤏᤡᤱ॥ ᤂᤡᤏᤡ᤹ ᤀᤠᤱᤃᤠ᤹ ᤀᤠᤔᤏᤠᤏᤡᤱ ᤂᤶᤓᤩᤠᤱ ᤀᤠᤱᤃᤠ᤹ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠ॥ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤴ ᤐᤠᤖᤠᤱᤅᤠᤱ ᤘᤠ᤹ᤖᤥ᥄” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.