ᤀᤡᤈᤁᤡᤀᤣᤗ 33 - LIFOTNTᤀᤡᤈᤁᤡᤀᤣ᤺ᤸᤗᤧᤴ ᤀᤡᤰᤁᤧᤃᤥᤒᤠ ᤐᤥᤱ᤹ ( ᤀᤡᤈ ᥉:᥇᥌-᥈᥇ ) 1 ᤕᤠᤶᤔᤥ ᤌᤡᤰᤗᤧᤱ ᤕᤜᤘᤣ ᤍᤠᤱᤒᤠᤗᤠᤶ ᤀᤡᤱᤄᤱᤎᤡᤰ ᤀᤠᤱᤃᤠ᤹ᤀᤥ ᤁᤧᤖᤧ— 2 “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤂᤧᤏᤧ᤹ ᤁᤧᤔᤏᤠᤜᤠ᤹ ᤁᤴ ᤀᤡᤱᤄᤱᤅᤡᤴ ᤔᤧᤳᤋᤧᤛᤧ᤹—‘ᤀᤠᤱᤃᤠ᤹ ᤗᤳᤇᤠ ᤗᤠᤈᤣ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤌᤰᤛᤢᤒᤠᤜᤠ᤹ ᤋᤠᤖᤢᤱᤛᤡᤱᤅᤡᤸᤗᤧ. ᤂᤧᤴ ᤗᤠᤈᤣ᤹ᤀᤥᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤔᤏᤠᤎᤡᤰ ᤀᤡᤰᤁᤧᤃᤥᤒᤠ ᤐᤥᤱᤔᤠᤖᤧ ᤗᤠᤃᤡ ᤔᤧᤛᤣᤃᤢ᤹॥ 3 ᤀᤡᤰᤁᤧᤃᤥᤒᤠᤸᤗᤧ ᤏᤡᤱᤔᤡᤴ ᤋᤠᤖ ᤐᤵᤐᤠ ᤏᤡᤛᤢᤸᤗᤧ. ᤁᤧᤖᤧᤰ ᤔᤏᤠᤜᤠ᤹ ᤛᤠᤶᤍᤡᤱ ᤐᤡᤔᤠᤛᤡᤖᤧ ᤗᤠᤃᤡ ᤂᤢᤏᤧ᤹ ᤛᤠᤍᤠᤱᤅᤡᤴ ᤗᤠᤀᤡ᤺ᤰᤂᤢ॥ 4 ᤂᤧᤒᤩᤠᤱ ᤂᤧᤴ ᤛᤠᤍᤠᤱ ᤗᤠᤀᤡᤰᤐᤠ ᤀᤡᤰᤗᤠᤴ ᤀᤠᤳᤋᤡᤴᤜᤠ᤹ᤖᤧᤀᤠᤱ ᤂᤧᤶᤄᤧᤶ ᤔᤧᤸᤗᤠᤵᤋᤢᤴᤏᤠᤱ ᤂᤧᤱᤜᤠ᤹ ᤔᤧᤛᤡᤏᤧᤓᤃᤪ ᤁᤱᤃ ᤂᤢᤴᤇᤡ᤹ ᤀᤠᤵᤑᤣᤰ ᤕᤠ᤺ᤶᤒᤰ ᤔᤧᤓᤣ᤺ᤴᤍᤢᤒᤠ ᤐᤥᤱ᤹॥ 5 ᤂᤧᤱᤜᤠ᤹ᤖᤧ ᤛᤠᤍᤠᤱ ᤗᤠᤀᤡ᤺ᤰᤋᤧᤒᤠᤴ ᤔᤧᤄᤧᤵᤛᤢ ᤁᤖ ᤂᤧᤶᤄᤧᤶ ᤔᤧᤸᤗᤠᤵᤋᤢᤴ. ᤂᤧᤸᤗᤧᤆᤥᤃᤢᤸᤗᤧ ᤀᤠᤵᤑᤣᤰ ᤕᤠ᤺ᤶᤒᤰ ᤔᤧᤓᤣ᤺ᤴᤍᤢᤒᤠ ᤐᤥᤱ᤹॥ ᤂᤧᤱᤜᤠ᤹ᤖᤧ ᤂᤧᤴ ᤛᤠᤶᤍᤡᤱᤅᤡᤴ ᤔᤧᤄᤧᤵᤛᤢᤒᤠ ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ ᤔᤧᤜᤡᤅᤧᤒᤠ ᤘᤕᤧᤔᤧᤴ॥ 6 ᤁᤖ ᤀᤡᤰᤁᤧᤃᤥᤒᤧᤸᤗᤧ ᤏᤡᤱᤔᤡᤴ ᤋᤠᤖ ᤐᤵᤐᤠ ᤏᤡᤛᤢᤛᤠᤱ ᤔᤏᤠᤜᤠ᤹ ᤛᤠᤶᤍᤡᤱ ᤐᤡᤔᤠᤛᤡᤖᤧ ᤗᤠᤃᤡ ᤛᤠᤍᤠᤱᤅᤡᤴ ᤔᤧᤔᤢᤰᤂᤢᤴᤏᤧᤓᤃᤪ. ᤏᤡᤱᤔᤡᤴ ᤋᤠᤀᤠᤱ ᤂᤧᤱᤜᤠ᤹ ᤛᤧᤖᤢᤛᤡ᤹. ᤁᤖ ᤂᤧᤱᤜᤠ᤹ ᤔᤧᤛᤩᤧᤒᤠᤸᤗᤧ ᤁᤢᤗᤧᤰᤘᤠ ᤀᤠᤱᤃᤠ᤹ ᤀᤡᤰᤁᤧᤃᤥᤒᤠᤴ ᤗᤰᤐᤧᤴᤏᤥ ᤌᤠᤖ ᤆᤥᤃᤢᤱ᤹॥’ 7 “ᤀᤠᤸᤗ ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤀᤡᤛᤪᤠᤀᤡᤗᤒᤠ ᤔᤧᤏᤠᤜᤠ᤹ᤖᤧ ᤗᤠᤃᤡ ᤀᤠᤱᤃᤠ᤹ ᤂᤧᤏᤧ᤹ ᤀᤡᤰᤁᤧᤃᤥᤒᤠ ᤆᤥ᤺ᤰᤏᤧ॥ ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤐᤠ᤺ᤳᤋᤢᤱᤒᤠ ᤐᤠ᤺ᤴᤏᤡᤴ ᤂᤧᤏᤧ᤹ ᤂᤧᤵᤛᤧ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤗᤧᤰᤘᤠᤀᤥ ᤛᤠᤶᤍᤡᤱ ᤐᤡᤖᤧᤛᤧ᤹॥ 8 ᤁᤢᤓᤠ ᤁᤢ᤹ᤀᤡᤃᤧᤓᤧᤶᤒᤠ ᤔᤏᤠᤜᤠ᤹ ᤛᤧᤰᤂᤠᤀᤣ ᤔᤧᤛᤡᤖᤥ ᤑᤠ᤹ᤀᤠᤱ ᤀᤠᤱᤃᤠ᤹ ᤀᤢᤘᤠ ᤆᤥᤃᤢᤱ᤹ ᤜᤧᤰᤁᤩᤠᤱ ᤂᤧᤱᤜᤠ᤹ ᤂᤢᤴᤇᤡ᤹ ᤗᤠᤶᤜᤠ᤹ᤀᤥᤗᤠᤶ ᤏᤢ᤺ᤱᤔᤠᤖᤧ ᤗᤠᤃᤡ ᤂᤧᤏᤧ᤹ ᤁᤧᤶᤔᤧᤳᤋᤢᤛᤡᤴ. ᤂᤧᤒᤩᤠᤱ ᤂᤧᤱᤜᤠ᤹ ᤂᤢᤴᤇᤡ᤹ ᤗᤠᤕᤥᤜᤠ᤹ᤖᤧ ᤆᤥᤃᤢᤸᤗᤧ ᤔᤧᤛᤡᤏᤧᤓᤃᤪ. ᤂᤧᤱᤜᤠ᤹ ᤔᤧᤛᤩᤧᤒᤠᤸᤗᤧ ᤁᤢᤗᤧᤰᤘᤠ᤹ ᤀᤠᤱᤃᤠ᤹ ᤂᤧᤏᤧ᤹ ᤁᤧᤎᤠᤖ ᤗᤰᤐᤧᤴᤛᤠᤒᤠ ᤆᤥ᤺ᤰᤏᤧ᤹॥ 9 ᤁᤖ ᤗᤠᤕᤥᤗᤠᤶ ᤜᤡᤶᤔᤠᤖᤧ ᤂᤧᤏᤧ᤹ ᤂᤧᤱᤜᤠ᤹ ᤛᤠᤶᤍᤡᤱ ᤁᤧᤒᤡᤖᤢᤛᤡ ᤜᤧᤰᤁᤩᤠᤱ ᤂᤧᤱᤜᤠ᤹ ᤗᤠᤕᤥᤗᤠᤶ ᤔᤧᤴᤜᤡᤴᤏᤧᤴᤏᤧᤓᤃᤪ. ᤂᤧᤱᤜᤠ᤹ ᤂᤢᤴᤇᤡ᤹ ᤗᤠᤕᤥᤜᤠ᤹ᤀᤥ ᤔᤧᤛᤡᤖᤥ. ᤁᤖ ᤂᤧᤏᤧ᤹ᤃ ᤁᤧᤜᤡᤱᤔᤧᤴ ᤁᤧᤛᤧ᤺ᤵᤋᤢᤖᤥ॥” ᤁᤧᤖᤧᤰᤗᤧ ᤀᤠᤵᤑᤣᤰ ᤀᤠᤵᤑᤣᤰ ᤆᤥ᤺ᤰᤔᤠ ᤁᤧᤒᤥᤱᤒᤠ ᤗᤰᤐᤧᤴ 10 “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤂᤧᤏᤧ᤹ ᤁᤴ ᤀᤡᤱᤄᤱᤅᤡᤴ ᤔᤧᤳᤋᤧᤛᤧ᤹—‘ᤂᤡᤏᤡ᤹ ᤀᤰᤂᤣ ᤁᤧᤒᤠ᤺ᤳᤋᤢᤶ᤹. “ᤀᤠᤏᤡᤃᤣ ᤗᤠᤕᤥᤜᤠ᤹ ᤀᤠᤏᤡᤃᤣ ᤛᤶᤎᤠᤱ ᤐᤗᤡ᤺ᤵ ᤗᤡ᤺ᤵ. ᤀᤠᤏᤡᤃᤣ ᤗᤠᤕᤥᤜᤠ᤹ᤖᤧ ᤆᤥᤃᤢᤸᤗᤧ ᤏᤡᤱᤘᤠ᤹ ᤋᤢᤰᤂᤣ ᤆᤠᤔᤥ ᤌᤩᤧ᤹ᤀᤡᤃᤧᤀᤠᤱ ᤘᤠ᤹᥄ ᤀᤠᤏᤡᤃᤣ ᤀᤠᤰᤂᤣᤗ᤹ᤖᤡᤰ ᤜᤡᤱᤔᤠ ᤛᤢᤰᤋᤡᤃᤧᤒᤣ᥅”’ 11 ᤂᤧᤱᤜᤠ᤹ ᤔᤧᤳᤋᤧᤛᤧ᤹. ‘ᤀᤠᤱᤃᤠ᤹ ᤁᤢᤜᤡᤱᤘᤧᤳ ᤘᤠ᤹ᤀᤠᤒᤠ ᤁᤢᤀᤡᤛᤡᤰ. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. ᤋᤠᤰᤁᤧᤓᤧ᤹ᤒᤠ ᤔᤏᤠᤜᤠ᤹ ᤔᤧᤛᤡ᤺ᤸᤗᤧ ᤀᤠᤱᤃᤠ᤹ ᤔᤧᤛ᤺ᤳᤋᤠᤴ॥ ᤂᤧᤱᤜᤠ᤹ ᤂᤢᤴᤇᤡ᤹ ᤁᤢ᤹ᤀᤡᤓᤧᤶᤔᤠ ᤗᤠᤶᤜᤠ᤹ᤀᤥᤏᤢ ᤔᤧᤏᤢ᤺ᤱᤗ ᤁᤧᤗ᤹ᤒᤠᤖᤰ ᤀᤠᤱᤃᤠ᤹ ᤏᤡᤱᤘᤠ᤹ ᤆᤥᤃᤢᤱ᤹ ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ ᤜᤡᤱᤔᤠ ᤔᤧᤛᤢᤰᤗ॥ ᤀᤡᤛᤪᤠᤀᤡᤗᤒᤠ ᤔᤏᤠᤛᤣ᥄ ᤜᤡᤀᤠᤛᤡᤶᤔᤧ᤹᥄ ᤂᤡᤏᤡ᤹ ᤁᤢ᤹ᤀᤡᤓᤧᤶᤔᤠ ᤗᤠᤶᤔᤥᤏᤢ ᤏᤢ᤺ᤰᤂᤧᤶᤔᤧ᤹. ᤂᤡᤏᤡ᤹ ᤌᤣᤀᤠᤱ ᤁᤧᤛᤩᤧ᤹ᤀᤡᤒᤠᤒᤣ᥅’ 12 “ᤀᤠᤸᤗ ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤁᤴ ᤀᤡᤱᤄᤱᤅᤡᤴ ᤂᤧᤏᤧ᤹ ᤁᤧᤔᤏᤠᤜᤠ᤹ ᤔᤧᤳᤋᤧᤛᤧ᤹—‘ᤛᤠᤶᤕᤥᤒᤠ ᤔᤏᤠᤜᤠ᤹ ᤗᤠᤕᤥᤀᤥ ᤔᤧᤏᤢ᤺ᤱᤏᤧᤓᤃᤪ ᤂᤢᤴᤇᤡ᤹ ᤛᤠᤶᤕᤥᤒᤠ ᤕᤧᤵᤗᤧᤰᤁᤡᤸᤗᤧ ᤂᤧᤱᤜᤠ᤹ ᤔᤧᤛᤧ᤺ᤵᤋᤢᤛᤡᤴ᤹. ᤋᤠᤰᤁᤧᤓᤧ᤹ᤒᤠ ᤔᤏᤠᤜᤠ᤹ ᤂᤢᤴᤇᤡ᤹ ᤗᤠᤕᤥᤜᤠ᤹ᤗᤠᤶ ᤔᤧᤏᤢ᤺ᤱ ᤜᤧᤰᤁᤩᤠᤱ ᤗᤠᤕᤥᤗᤠᤶ ᤔᤧᤜᤡᤴᤏᤧᤓᤃᤪ ᤂᤧᤱᤜᤠ᤹ᤀᤠᤱ ᤂᤢᤴᤇᤡ᤹ ᤑᤧᤴᤕᤠ᤺ᤶᤒᤰᤁᤡᤸᤗᤧ ᤔᤧᤔᤧᤰᤂᤢᤛᤡᤴ᤹॥ ᤁᤢᤓᤠ ᤛᤠᤶᤕᤥᤒᤠ ᤔᤏᤠ᤺ᤸᤗᤧ ᤗᤠᤕᤥ ᤆᤥᤃᤢᤏᤧᤓᤃᤪ. ᤂᤧᤴ ᤋᤃᤡᤒᤠ ᤛᤠᤶᤕᤥᤒᤠ ᤁᤢᤕᤠ᤺ᤶᤒᤰᤁᤡᤸᤗᤧ ᤂᤧᤴ ᤘᤠ᤹ᤔᤠ ᤔᤧᤓᤠ᤺ᤰᤋᤢᤴ॥’ 13 ᤛᤠᤶᤕᤥᤒᤠ ᤔᤏᤠᤜᤠ᤹ ᤔᤧᤜᤡᤱ ᤑᤠ᤹ᤀᤠᤱ ᤀᤠᤱᤃᤠ᤹ ᤐᤠ᤺ᤳᤋᤢᤱ᤹. ᤁᤖ ᤂᤢᤴᤇᤡ᤹ ᤋᤃᤡᤒᤠ ᤛᤠᤶᤕᤥᤒᤠ ᤕᤠ᤺ᤶᤒᤰᤁᤡᤸᤗᤧ ᤛᤧ᤺ᤵᤔᤠ ᤏᤡᤱᤘᤠ᤹ ᤔᤧᤈᤥᤃᤢᤀᤠᤱ ᤂᤧᤱᤜᤠ᤹ᤖᤧ ᤗᤠᤕᤥ ᤔᤧᤈᤥᤃᤢᤏᤧᤓᤃᤪ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤠᤳᤋᤡᤴ ᤛᤠᤶᤕᤥᤒᤠ ᤕᤠ᤺ᤶᤒᤰᤜᤠ᤹ᤀᤠᤱ ᤏᤡᤱᤘᤠ᤹ᤛᤢᤶ ᤗ᤹ᤖᤡᤰ ᤀᤡ᤺ᤵᤔᤠ ᤔᤧᤒᤥᤱᤏᤧᤴ᤹॥ ᤀᤠᤱᤃᤠ᤹ ᤂᤧᤱᤜᤠ᤹ ᤂᤢᤴᤇᤡ᤹ ᤗᤠᤕᤥᤜᤠ᤹ᤖᤧ ᤆᤥᤃᤢᤸᤗᤧ ᤔᤧᤰᤂᤢᤱᤛᤡᤱ᤹॥ 14 ᤜᤧᤰᤁᤩᤠᤱ ᤀᤠᤱᤃᤠ᤹ ᤁᤢᤓᤠ ᤋᤠᤰᤁᤧᤓᤧ᤹ᤒᤠ ᤔᤏᤠᤜᤠ᤹ ᤛᤧᤰᤂᤠᤀᤣ ᤔᤧᤛᤡ ᤑᤠ᤹ᤀᤠᤱ ᤔᤧᤳᤋᤢᤱᤛᤡᤱᤔᤢ. ᤁᤖ ᤂᤧᤱᤜᤠ᤹ ᤂᤢᤴᤇᤡ᤹ ᤗᤠᤕᤥᤜᤠ᤹ᤀᤥᤏᤢ ᤔᤧᤏᤢ᤺ᤱ ᤜᤧᤰᤁᤩᤠᤱ ᤛᤠᤶᤕᤥᤒᤠ ᤏᤢ ᤁᤢᤍᤥ᤺ᤵᤔᤠ ᤐᤠ᤺ᤴᤏᤡᤴ ᤔᤧᤈᤥᤃᤢ᤹॥ 15 ᤁᤢᤒᤡᤖᤧ ᤗᤠᤃᤡ. ᤛᤡᤱᤏᤠᤳ ᤁᤧᤍᤣ᤹ᤒᤠᤸᤗᤧ ᤕᤢᤰᤂᤢᤒᤠ ᤆᤡᤃᤰᤘᤠᤴ ᤂᤧᤱᤜᤠ᤹ᤖᤧ ᤕᤠᤱᤏᤠ ᤔᤧᤏᤢ᤺ᤰᤋᤢ ᤔᤧᤒᤡᤖᤢ᤹. ᤂᤧᤱᤜᤠ᤹ᤖᤧ ᤔᤧᤄᤢ᤺ᤳᤋᤢᤀᤠᤱ ᤁᤧᤘᤠ᤹ᤒᤠ ᤆᤡᤃᤰᤘᤠᤜᤠ᤹ ᤔᤧᤏᤢ᤺ᤰᤋᤢ ᤔᤧᤒᤡᤖᤢᤛᤡ᤹. ᤜᤧᤰᤁᤩᤠᤱ ᤜᤡᤱᤔᤴ ᤁᤧᤒᤡᤒᤠ ᤀᤠᤱᤃᤠ᤹ ᤀᤠᤛᤠᤶᤕᤥ ᤌᤡᤶᤜᤠ᤹ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢ. ᤀᤠᤸᤗᤀᤠᤱᤎᤥ ᤑᤧᤴᤕᤠ᤺ᤶᤒᤰ ᤔᤧᤴᤈᤥᤃᤢᤴ᤹॥ ᤂᤧᤱᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤔᤧᤈᤥᤃᤢᤏᤧᤓᤃᤪ. ᤂᤧᤱᤜᤠ᤹ ᤛᤧᤰᤂᤠᤀᤣ ᤔᤧᤜᤡᤱ᤹ ᤜᤧᤰᤁᤩᤠᤱ ᤔᤧᤴᤇᤡᤏᤧᤴ᤹॥ 16 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤃᤡᤒᤠ ᤀᤠᤳᤋᤡᤴ ᤗᤠᤕᤥᤜᤠ᤹ᤀᤠᤱ ᤕᤠᤶᤔᤥ ᤋᤠ᤺ᤵᤔᤠ ᤔᤧᤒᤥᤱᤏᤧᤴ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤛᤠᤶᤕᤥᤒᤠ ᤏᤢ ᤁᤢᤍᤥ᤺ᤵᤔᤠ ᤕᤠ᤺ᤶᤒᤰ ᤔᤧᤈᤥᤃᤢᤀᤠᤱ ᤘᤠ᤹. ᤂᤧᤒᤩᤠᤱ ᤂᤧᤱᤜᤠ᤹ ᤛᤧᤰᤂᤠᤛᤠᤱ ᤔᤧᤜᤡᤱ᤹॥ 17 “ᤂᤧᤏᤧ᤹ ᤁᤧᤔᤏᤠᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢᤖ ᤔᤧᤘᤠ᤹. ‘ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤥ᤺ᤵᤔᤠ ᤐᤠ᤺ᤴᤏᤡᤴ ᤔᤧᤈᤥᤃᤢᤴᤗ ᤔᤧᤘᤠ᤹ᤏᤧᤴ.’ ᤁᤖ ᤂᤧᤱᤜᤠ᤹ᤖᤧᤏᤣ ᤁᤢᤍᤥ᤺ᤵᤔᤠ ᤔᤧᤴᤈᤥ᤺ᤰᤁᤣ ᤔᤧᤘᤠ᤹ᤖᤥ॥ 18 ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤕᤠᤶᤔᤥ ᤐᤠ᤺ᤳᤋᤢᤱ᤹. ᤛᤠᤶᤕᤥᤒᤠ ᤔᤏᤠᤜᤠ᤹ ᤂᤢᤴᤇᤡ᤹ ᤛᤠᤶᤕᤥᤒᤠ ᤕᤧᤵᤗᤧᤰᤁᤥᤗᤠᤶ ᤔᤧᤏᤢ᤺ᤱ ᤔᤧᤒᤣ᤺ᤰ ᤜᤧᤰᤁᤩᤠᤱ ᤑᤧᤴᤕᤠ᤺ᤶᤒᤰᤁᤥ ᤔᤧᤜᤡᤛᤡᤱᤏᤧᤓᤃᤪ. ᤂᤧᤱᤜᤠ᤹ ᤔᤧᤛᤡᤖᤥ॥ 19 ᤁᤖ ᤋᤠᤰᤁᤧᤓᤧ᤹ᤒᤠ ᤔᤏᤠᤜᤠ᤹ ᤂᤢᤴᤇᤡ᤹ ᤑᤧᤴᤕᤠ᤺ᤶᤒᤰᤁᤥᤏᤢ ᤔᤧᤏᤢ᤺ᤱ᤹ ᤜᤧᤰᤁᤩᤠᤱ ᤛᤠᤶᤕᤥᤒᤠ ᤏᤢ ᤁᤢᤍᤥ᤺ᤵᤔᤠ ᤕᤠ᤺ᤶᤒᤰ ᤔᤧᤈᤥᤃᤢ᤹. ᤂᤧᤱᤜᤠ᤹ ᤔᤧᤜᤡᤱ᤹॥ 20 ᤀᤡᤛᤪᤠᤀᤡᤗᤒᤠ ᤔᤏᤠᤛᤣ. ᤂᤡᤏᤡ᤹ ᤀᤰᤂᤣ ᤁᤧᤒᤠ᤺ᤳᤋᤢᤶᤗ ᤁᤧᤘᤕᤡ᤹. ‘ᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤥ᤺ᤵᤔᤠ ᤆᤥᤃᤢᤖ ᤔᤧᤘᤠ᤹ᤏᤧᤴ॥’ ᤁᤖ ᤀᤠᤱᤃᤠ᤹ ᤂᤧᤏᤡ᤹ ᤕᤠ᤺ᤶᤒᤰᤜᤠ᤹ᤖᤧ ᤁᤢᤗᤧᤰᤘᤠᤀᤥ ᤌᤡᤰᤌᤡᤰ ᤂᤡᤏᤡ᤹ ᤁᤧᤖᤧᤰ ᤂᤠᤛᤧᤴ ᤆᤥ᤺ᤰᤏᤡᤱᤗᤥ॥” ᤕᤖᤢᤛᤗᤧ᤺ᤶᤔᤡᤴ ᤜᤢᤰᤁᤠᤵ ᤔᤧᤈᤥᤃᤢᤒᤠ ᤀᤡᤱᤄᤱ 21 ᤀᤠᤏᤡᤃᤣ ᤔᤧᤍᤧᤶᤛᤡ ᤔᤧᤍᤣ᤹ᤖᤡᤃᤧᤒᤠ ᤌᤡᤒᤥᤱᤅᤠᤱ ᤏᤧᤳᤇᤡᤃᤣᤰᤐᤠ ᤋᤱᤒᤣ ᤌᤡᤒᤥᤱᤃᤣᤰᤐᤠ ᤗᤠ ᤅᤠᤛᤡᤃᤣᤰᤐᤠ ᤕᤧᤴᤏᤥ ᤁᤧᤜᤡᤱᤒᤠ ᤁᤧᤕᤠ᤺ᤰᤐᤠ ᤔᤏᤠᤎᤡᤰ ᤕᤖᤢᤛᤗᤧ᤺ᤶᤗᤠᤶ ᤑᤧᤖᤧᤀᤠᤱ ᤀᤠᤱᤃᤠ᤹ ᤔᤧᤳᤋᤠᤱ. “ᤕᤧᤰᤕᤰᤁᤡᤴ ᤜᤢᤰᤁᤠᤵ ᤔᤧᤈᤥᤃᤢᤀᤠᤱ ᤏᤧᤖᤥ᥄” 22 ᤂᤧᤴᤏᤢ᤺ᤸᤗᤧ ᤋᤃᤡᤒᤠ ᤕᤢ᤺ᤴᤇᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤢᤰᤁᤡᤴ ᤀᤠᤱᤃᤠ᤹ ᤀᤠᤛᤶᤎᤠᤱ ᤐᤳᤇᤧ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤀᤡᤰᤗᤠᤴ ᤏᤢ᤺ᤰᤋᤠᤱ ᤐᤡᤖᤠᤱ॥ ᤂᤧᤸᤗᤧᤆᤥᤃᤢᤸᤗᤧ ᤁᤴ ᤔᤏᤠᤴ ᤁᤧᤖᤧᤓᤧᤖᤧᤒᤠ ᤁᤢᤍᤠ᤺ᤴᤍᤡᤰᤔᤠ ᤋᤠᤏᤠᤶ ᤀᤠᤱᤃᤠ᤹ ᤐᤠ᤺ᤵᤔᤠ ᤛᤢᤰᤋᤠᤱᤗᤥ॥ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥ 23 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠᤗᤠᤶ ᤁᤴ ᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤁᤧᤖᤧ— 24 “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤂᤠᤵᤐᤢᤌᤩ᤺ᤱ ᤁᤧᤒᤥᤱᤒᤠ ᤕᤧᤰᤕᤰᤜᤠ᤹ᤖᤧ ᤁᤢᤗᤢᤶᤔᤥ ᤁᤧᤕᤢᤱᤒᤠ ᤕᤜᤢᤍᤠᤒᤠ ᤔᤏᤠᤜᤠ᤹ᤖᤧ ᤆᤰᤔᤧᤸᤗ᤹ᤀᤣ ᤀᤰᤂᤣ ᤔᤧᤒᤠ᤺ᤳᤋᤢᤖ ᤔᤧᤘᤠ᤹. ‘ᤀᤒᤪᤠᤜᤠᤶᤔᤡᤴ ᤗᤳᤇᤠᤖᤰ ᤔᤏᤠ ᤘᤕᤧ. ᤁᤖᤛᤠᤱ ᤗᤠᤈᤣ᤹ᤀᤥᤒᤠ ᤁᤧᤖᤧᤰ ᤕᤠᤱᤛᤠᤁᤢᤴᤎᤣᤜᤠ᤹ ᤂᤢᤏᤧ᤹ ᤂᤥᤛᤢ॥ ᤀᤠᤏᤡ᤹ ᤕᤖᤡᤰ ᤀᤠᤘᤠ᤹. ᤛᤧᤰᤂᤠᤛᤠᤱ ᤕᤠᤱᤛᤠᤁᤢᤴᤎᤣ ᤁᤢᤀᤡᤛᤡᤰ ᤗᤠᤈᤣᤴ ᤀᤠᤏᤡ᤹ ᤀᤠᤶᤒᤡᤖᤧᤀᤠᤱ ᤏᤧᤖᤥ॥’ 25 ᤂᤧᤸᤗᤧᤆᤥᤃᤢᤸᤗᤧ ᤂᤧᤏᤧ᤹ ᤁᤴ ᤔᤏᤠᤜᤠ᤹ ᤔᤧᤳᤋᤧᤛᤧ᤹. ‘ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤁᤵᤔᤥ ᤂᤡᤏᤡ᤹ ᤁᤢᤔᤠᤰᤂᤡ᤹ᤏᤢ ᤛᤥᤖᤡᤰ ᤛᤠ ᤁᤧᤈᤠᤶ᤹. ᤏᤠᤘᤠᤀᤡᤳᤗᤠᤜᤠ᤹ ᤂᤡᤏᤡ᤹ ᤛᤧᤘᤠ ᤁᤧᤔᤧᤳᤋᤢᤶᤛᤡᤶ᤹. ᤜᤧᤰᤁᤩᤠᤱ ᤁᤢᤍᤥ᤺ᤵᤔᤠ ᤔᤏᤠᤜᤠ᤹ ᤂᤡᤏᤡ᤹ ᤁᤧᤛᤩᤧᤖᤢᤶᤛᤡᤶ᤹॥ ᤌᤣ ᤂᤡᤏᤡ᤹ ᤛᤧᤰᤂᤠᤀᤣ ᤗᤠᤈᤣᤴ ᤀᤠᤏᤡᤃᤧᤴ ᤑᤠ᤹ᤀᤠᤱ ᤁᤧᤀᤡ᤺ᤳᤋᤢᤶᤒᤡ᥅ 26 ᤔᤏᤠ ᤁᤧᤛᤧᤵᤐᤠᤛᤣ᥄ ᤏᤠᤘᤠᤀᤡᤳᤗᤠ ᤛᤧᤘᤠ ᤁᤧᤔᤧᤵᤐᤠᤛᤣ᥄ ᤆᤠᤖᤠᤶᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤛᤣ᥄ ᤌᤣ ᤗᤠᤈᤣᤴ ᤂᤡᤏᤡ᤹ᤀᤡᤴ ᤐᤥᤱᤗᤒᤡ᥅’ 27 “ᤂᤧᤏᤧ᤹ ᤂᤧᤱᤜᤠ᤹ ᤔᤧᤳᤋᤧᤛᤧ᤹. ‘ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹—ᤀᤠᤱᤃᤠ᤹ ᤁᤢᤜᤡᤱᤘᤧᤳ ᤘᤠ᤹ᤀᤠᤒᤠ ᤁᤢᤀᤡᤛᤡᤰ. ᤂᤧᤴ ᤂᤠᤵᤐᤢᤌᤩ᤺ᤱ ᤁᤧᤒᤥᤱᤒᤠ ᤕᤧᤰᤕᤰᤜᤠ᤹ᤀᤥ ᤁᤧᤕᤢᤱᤒᤠᤜᤠ᤹ ᤋᤠᤓᤣ᤺ᤸᤗᤧ ᤔᤧᤛᤡᤖᤥ॥ ᤜᤧᤰᤁᤩᤠᤱ ᤂᤧᤴ ᤕᤧᤰᤕᤰ ᤗᤠ᤺ᤰᤁᤠᤳ ᤂᤠᤶᤒᤠᤱᤜᤠ᤹ᤀᤥ ᤁᤧᤕᤢᤱᤒᤠᤜᤠ᤹ ᤆᤠᤔᤠᤛᤡᤖᤧ ᤗᤠᤃᤡ ᤀᤠᤱᤃᤠ᤹ ᤋᤠᤶᤓᤢᤱ ᤌᤰᤛᤠᤜᤠ᤹ ᤐᤠᤱᤄᤢᤱᤛᤡᤱ᤹॥ ᤂᤧᤴ ᤕᤰᤜᤠ᤹ᤀᤥ ᤏᤢ ᤗᤢᤱᤑᤢᤰᤁᤥᤜᤠ᤹ᤀᤥ ᤁᤧᤈᤡᤱᤛᤡᤱᤒᤠᤀᤠᤱ ᤁᤧᤕᤢᤱᤒᤠᤜᤠ᤹ ᤔᤡᤱᤍᤣᤸᤗᤧ ᤔᤧᤛᤡᤖᤥ॥ 28 ᤀᤠᤱᤃᤠ᤹ ᤗᤠᤈᤣᤴ ᤘᤖᤧᤱᤗᤧᤱ ᤂᤠᤵᤐᤢᤌᤩ᤺ᤱ ᤆᤥᤃᤢᤱ᤹ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤀᤠᤱᤍᤡᤱ ᤗ᤹ᤔᤠᤴ ᤕᤢᤔᤪᤧᤰ ᤔᤧᤰᤂᤢᤱ᤹॥ ᤂᤧᤸᤗᤧ ᤕᤶᤒᤠ ᤁᤢᤜᤧᤴᤇᤡᤱᤔᤠ ᤁᤢᤔᤢᤰᤛᤠᤶᤔᤡᤴ ᤏᤢᤵ॥ ᤀᤡᤛᤪᤠᤀᤡᤗᤒᤠ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ ᤜᤠ᤺ᤳᤋᤠᤱ ᤗᤠᤱᤔᤧᤱᤄᤣ᤺ᤰᤔᤏᤠᤒᤠ ᤆᤡᤈᤡ ᤂᤰᤂᤰ ᤔᤢᤖᤧᤰ ᤂᤠᤖᤧᤰ ᤐᤥᤱ᤹॥ 29 ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤕᤠᤶᤃᤧᤛᤡᤱᤒᤠ ᤂᤢᤴᤇᤡ᤹ ᤗᤠᤕᤥᤜᤠ᤹ᤖᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤗᤠᤈᤣᤴ ᤂᤠᤵᤐᤢᤌᤩ᤺ᤱ ᤔᤧᤰᤂᤢᤱ᤹. ᤂᤧᤒᤩᤠᤱ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢᤖᤥ॥’” ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤸᤗᤧ ᤁᤢᤀᤡᤱᤄᤱᤅᤡᤴ ᤁᤧᤖᤧ 30 “ᤁᤖ ᤂᤧᤏᤧ᤹ᤃ. ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤂᤧᤏᤧ᤹ ᤁᤧᤕᤠ᤺ᤶᤒᤣᤀᤥ ᤁᤧᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤜᤡᤶ ᤁᤧᤶᤈᤧᤱ᤹ ᤜᤧᤰᤁᤩᤠᤱ ᤗᤠᤶᤎᤣ᤺ᤳᤜᤠ᤹ᤀᤥ ᤂᤧᤏᤧ᤹ ᤁᤧᤕᤠ᤺ᤶᤒᤣᤀᤥ ᤂᤢᤛᤢᤰ ᤂᤢᤛᤢᤰ ᤔᤧᤗ᤹॥ ᤂᤧᤱᤜᤠ᤹ ᤀᤰᤂᤣ ᤔᤧᤔᤧᤳᤇᤡᤱ᤹. ‘ᤋᤩᤧᤶᤔᤧ᤹ᤀᤥ. ᤀᤠᤏᤡ᤹ ᤐᤣᤃᤡᤀᤠᤱ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤸᤗᤧ ᤀᤠᤔᤧᤵᤐᤠ ᤐᤠ᤺ᤴᤏᤡᤴ ᤂᤧᤵᤛᤢᤶ ᤕᤜᤘᤣ ᤍᤠᤱᤒᤧᤸᤗᤧ ᤌᤧᤔᤠᤛᤡᤰ ᤐᤠ᤺ᤳᤋᤢᤖ ᤐᤵᤐᤡ᥄’ 31 ᤜᤧᤰᤁᤣᤗ᤹ᤖᤡᤰ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤕᤧᤰᤕᤧᤰᤐᤠ ᤔᤧᤗᤧᤱᤛᤡᤱᤅᤠᤱ ᤂᤧᤏᤧ᤹ ᤁᤧᤍᤃᤡ ᤔᤧᤕᤢᤱᤛᤡᤱ᤹॥ ᤂᤧᤏᤧ᤹ ᤁᤧᤒᤠ᤺ᤴᤜᤠ᤹ ᤂᤧᤱᤜᤠ᤹ᤖᤧ ᤔᤧᤄᤧᤵᤛᤢ᤹. ᤁᤖ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠ ᤜᤧᤰᤁᤣ ᤆᤥ᤺ᤰᤔᤠ ᤏᤡᤱᤘᤠ᤹ ᤔᤧᤱᤃᤳᤋᤢᤴ᤹॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤢᤖᤠᤴ ᤔᤢᤷᤗᤧ᤺ᤶᤒᤠ ᤐᤠ᤺ᤴᤏᤡᤸᤗᤧ ᤁᤧᤍᤡᤶᤒᤠ ᤆᤥᤰ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤕᤠᤱ ᤂᤥᤔᤠᤖᤰ ᤏᤡᤱᤘᤠ᤹ ᤔᤧᤈᤥᤃᤢ॥ 32 ᤁᤢᤓᤠ ᤌᤡᤰᤗᤧ ᤛᤠ᤹ᤖᤡᤰ ᤏᤢᤒᤠ ᤀᤡᤰᤗᤠ᤺ᤸᤗᤧ ᤗᤢᤱᤔᤠ᤹ ᤜᤡ᤺ᤵᤛᤡᤱᤔᤠ ᤛᤠᤶᤗᤥᤴ ᤛᤠᤶᤔᤧᤳᤋᤢᤒᤠ ᤀᤡᤃᤪ ᤗᤳᤇᤠ ᤔᤢᤰᤗᤠᤀᤥ ᤛᤠᤶᤗᤥ ᤛᤠᤶᤔᤧᤵᤔᤠᤎᤡᤰ ᤔᤢᤰᤂᤢᤒᤠ ᤁᤢᤀᤡᤛᤡᤰ. ᤂᤧᤏᤧ᤹ᤃ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤛᤠ᤹ᤖᤡᤰ ᤛᤥᤛᤥ᤺ᤳ ᤗᤖᤠᤱᤒᤠ ᤁᤧᤈᤥ᤺ᤰᤐᤠᤖᤰ ᤁᤧᤈᤥᤰ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤁᤧᤒᤠ᤺ᤴᤜᤠ᤹ ᤂᤧᤶᤔᤠᤃ ᤔᤧᤄᤧᤵᤛᤢ ᤁᤖ ᤂᤧᤴ ᤁᤢᤀᤡᤛᤡᤰ ᤔᤧᤴᤈᤥᤃᤢᤴ᤹॥ 33 ᤁᤖ ᤁᤴ ᤁᤧᤖᤧᤰ ᤁᤡᤵᤔᤠ ᤁᤧᤄᤢᤒᤠ ᤐᤠ᤺ᤴᤜᤠ᤹ ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠ ᤁᤢᤀᤡᤛᤡᤰ ᤐᤥᤱ᤹. ᤂᤧᤴ ᤐᤠ᤺ᤴᤜᤠ᤹ ᤛᤧᤰᤂᤠᤀᤣ ᤐᤥᤱᤅᤡᤸᤗᤧ ᤂᤢᤴᤇᤡ᤹ ᤗᤢᤶᤔᤥ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤎᤡᤰ ᤘᤕᤧᤖᤳᤇ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢᤖᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.