ᤀᤡᤈᤁᤡᤀᤣᤗ 32 - LIFOTNTᤔᤡᤛᤪᤡ ᤜᤠᤱᤅᤡᤸᤗᤧ ᤁᤢᤗᤠᤃᤡ ᤔᤧᤖᤡᤱ 1 ᤕᤜᤥᤕᤠᤁᤡᤏ ᤜᤠᤱᤅᤡᤴ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤒᤠ ᤌᤡᤒᤥᤱᤅᤠᤱ ᤏᤧᤳᤇᤡᤃᤣᤰᤐᤠ ᤋᤱᤒᤣᤒᤠ ᤌᤡᤒᤥᤱᤅᤠᤱ ᤏᤧᤳᤇᤡᤃᤣᤰᤐᤠ ᤗᤠ᤺ᤸᤗᤧ ᤌᤡᤰᤛᤡᤃᤣᤰᤐᤠ ᤕᤧᤴᤏᤥ ᤕᤜᤘᤣ ᤍᤠᤱᤒᤠᤗᤠᤶ ᤁᤴ ᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤁᤧᤖᤧ— 2 “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤔᤡᤛᤪᤒᤠ ᤜᤠᤱ ᤑᤠᤖᤥᤸᤗᤧ ᤁᤢᤗᤠᤃᤡ ᤂᤧᤏᤧ᤹ ᤔᤧᤖᤡᤱ ᤌᤰᤋᤧ᤹ ᤜᤧᤰᤁᤩᤠᤱ ᤁᤴ ᤀᤡᤱᤄᤱᤅᤡᤴ ᤂᤢᤏᤧ᤹ ᤔᤧᤳᤋᤧ᤹ᤀᤥ— “ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤁᤧᤘᤧᤶᤒᤠ ᤂᤡᤖᤡᤱᤒᤠ ᤜᤧᤰᤁᤣ ᤂᤧᤏᤧ᤹ ᤁᤧᤎᤢᤶᤒᤠ ᤁᤧᤗᤣ᤺ᤳᤇᤡᤱᤗᤥ. ᤁᤖ ᤛᤧᤰᤂᤠ᤺ᤸᤗᤧ ᤂᤧᤏᤧ᤹ᤃ ᤀᤠᤵᤑᤣᤰ ᤁᤣᤘᤜ᤺ᤱᤜᤠ᤹ᤀᤥ ᤁᤧᤒᤥ᤺ᤰᤐᤠ ᤗᤧᤰᤘᤠᤴ ᤁᤧᤗᤠᤱᤅᤡᤸᤗᤧ ᤇᤡᤶᤗᤡᤱ ᤇᤡᤶᤗᤡᤱ ᤁᤧᤔᤧᤵᤐᤠ. ᤂᤧᤏᤧ᤹ ᤘᤖ᤺ᤱᤅᤥᤒᤠ ᤀᤠᤈᤠᤈᤠᤒᤠ ᤜᤧᤰᤋᤱᤒᤠᤏᤧᤖᤰᤗᤥ॥ 3 ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤗᤥ— ᤀᤠᤱᤃᤠ᤹ ᤀᤠᤕᤥ᤺ᤱᤅᤥ ᤂᤧᤏᤧ᤹ ᤌᤠᤔᤠᤖᤧ ᤗᤠᤃᤡ ᤜᤧᤰᤁᤩᤠᤱ ᤆᤫᤠ᤺ᤳ ᤗᤠ᤺ᤰᤁᤠᤳ ᤀᤢ᤺ᤱᤔᤠ ᤗ᤺ᤵᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤕᤖᤡᤰ ᤔᤏᤠᤜᤠ᤹ ᤐᤠᤱᤄᤢᤱᤛᤡᤱᤗᤥ॥ 4 ᤂᤧᤏᤧ᤹ ᤛᤡᤔᤠᤖᤧ ᤗᤠᤃᤡ ᤂᤠᤶᤒᤠᤱᤅᤥ ᤐᤵᤐᤪᤠ᤹ᤔᤠ ᤗᤧᤳᤏᤧ ᤏᤧᤏᤧᤖᤥ॥ ᤋᤠᤱᤛᤠᤰᤐᤥᤒᤠ ᤁᤧᤖᤧᤰ ᤐᤢᤛᤠᤜᤠ᤹ ᤂᤧᤏᤧ᤹ ᤁᤧᤛᤶᤎᤠᤱ ᤔᤧᤈᤢᤰᤗᤥ. ᤜᤧᤰᤁᤩᤠᤱ ᤁᤠᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤋᤠᤶᤓᤢᤱ ᤌᤰᤛᤠᤜᤠ᤹ᤖᤧ ᤂᤧᤏᤧ᤹ ᤁᤧᤏᤧᤰᤛᤠᤴ ᤔᤧᤀᤢ᤺ᤰᤂᤢ ᤔᤧᤈᤖᤥ॥ 5 ᤀᤠᤱᤃᤠ᤹ ᤂᤧᤏᤧ᤹ ᤁᤧᤏᤧᤰᤛᤠᤴ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ᤀᤥ ᤛᤧᤛᤢᤱ ᤏᤧᤛ᤻ᤛᤢᤱᤗᤥ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤕᤧᤳ ᤁᤧᤗᤢᤱᤛᤡᤜᤠ᤹ᤖᤧ ᤏᤧᤏᤧᤒᤠᤍᤧᤴᤜᤠ᤹ ᤌᤡᤶᤛᤢᤱᤗᤥ॥ 6 ᤀᤠᤱᤃᤠ᤹ ᤂᤧᤏᤧ᤹ ᤁᤧᤛᤧᤒᤠ ᤁᤧᤔᤠᤰᤂᤡᤸᤗᤧ ᤐᤠᤰᤗᤢᤶᤗᤢᤶᤒᤠᤍᤧᤴᤜᤠ᤹ ᤘᤧᤸᤗᤧᤰ ᤋᤡᤶᤗ. ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ᤀᤥᤗᤠᤶ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤘᤠᤓᤡ᤺ᤴᤍᤢᤱᤗᤥ॥ 7 ᤀᤠᤱᤃᤠ᤹ ᤂᤧᤏᤧ᤹ ᤔᤧᤱᤏᤧᤸᤗᤧ. ᤋᤠᤱᤛᤠᤱᤒᤠᤴ ᤋᤧᤵᤋᤢᤱᤗᤥ ᤜᤧᤰᤁᤩᤠᤱ ᤂᤣ᤺ᤶᤛᤡᤰᤐᤠᤜᤠ᤹ ᤂᤠᤔᤧᤔᤠᤰᤗ ᤕᤠ᤺ᤴᤍᤢᤱᤛᤡᤱᤗᤥ॥ ᤀᤠᤱᤃᤠ᤹ ᤏᤠᤶᤔᤡᤴ ᤂᤠ᤹ᤔᤡ᤺ᤳᤋᤡᤸᤗᤧ ᤐᤴᤇᤢᤱᤗᤥ ᤂᤧᤒᤩᤠᤱ ᤗᤠᤒᤧᤸᤗᤧ ᤂᤧᤏᤧ᤹ ᤁᤧᤴᤎᤥ᤹ᤏᤧᤸᤗᤥ॥ 8 ᤀᤠᤱᤃᤠ᤹ ᤁᤧᤀᤥ᤺ᤵᤐᤠ ᤂᤣ᤺ᤶᤛᤡᤰᤐᤠᤜᤠ᤹ ᤂᤠᤃᤧᤔᤠᤰᤐᤠ ᤆᤥᤃᤢᤱᤛᤡᤱᤗᤥ ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤏᤧ᤹ ᤁᤧᤗᤠᤈᤣᤴ ᤂᤠᤎᤠᤵᤋᤢᤖ ᤕᤠ᤺ᤴᤍᤢᤱᤗᤥ॥ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤴ ᤐᤠᤖᤠᤱᤅᤠᤱ ᤘᤠ᤹ᤖᤥ᥄ 9 ᤂᤧᤏᤧ᤹ ᤀᤠᤵᤑᤠᤸᤗᤧᤀᤠᤱ ᤔᤧᤴᤏᤡᤀᤣ ᤁᤧᤘᤕᤧᤒᤠ ᤔᤠ᤺ᤱᤄᤠᤒᤠ ᤗᤠᤈᤣ᤹ᤜᤠ᤹ ᤀᤠᤱᤃᤠ᤹ ᤂᤧᤏᤧ᤹ ᤁᤧᤔᤧᤰᤔᤠ ᤀᤡᤱᤄᤱᤅᤡᤴ ᤔᤧᤳᤋᤢᤱᤛᤡᤱᤅᤡᤸᤗᤧ. ᤀᤠᤱᤃᤠ᤹ ᤕᤖᤡᤰ ᤔᤏᤠᤜᤠ᤹ ᤏᤡᤱᤘᤠ᤹ ᤋᤢᤰᤂᤣ ᤆᤠᤔᤥ ᤌᤠᤛᤢᤱᤛᤡᤱᤗᤥ॥ 10 ᤀᤥᤖᤥ. ᤀᤠᤱᤃᤠ᤹ ᤕᤖᤡᤰ ᤗᤠᤈᤣ᤹ᤜᤠ᤹ ᤆᤡᤈᤡᤱ ᤕᤱᤔᤠ ᤛᤧᤖᤢᤱᤛᤡᤱᤗᤥ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤍ᤹ᤕᤠᤴ ᤑᤧᤶᤔᤥ ᤂᤧᤵᤔᤥᤒᤠ ᤜᤠᤱᤜᤠ᤹ ᤁᤡᤔᤠ ᤕᤱᤔᤠᤀᤥ ᤔᤧᤎᤠᤖᤥ॥ ᤂᤧᤏᤧ᤹ ᤁᤧᤔᤧᤰᤔᤠ ᤕᤧᤴᤏᤥ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤀᤠᤍᤠᤓᤣᤴ ᤛᤧᤸᤗᤧᤱ ᤛᤧᤸᤗᤧᤱ ᤜᤡᤰᤂᤢᤱᤅᤡᤸᤗᤧ ᤂᤧᤱᤜᤠ᤹ ᤀᤠᤛᤧᤳ ᤑᤠ᤹ᤀᤠᤱ ᤁᤡᤔᤧᤸᤗᤧ ᤆᤡᤖᤡᤶᤗᤡᤶᤏᤠ ᤔᤧᤕᤱᤗᤥ॥ 11 ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤱᤗᤥ— ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤁᤢᤍᤠᤓᤣᤴ ᤂᤧᤏᤧ᤹ ᤔᤡᤛᤪᤖᤧ ᤁᤧᤍᤰᤗᤧᤱᤘᤠᤀᤥ ᤑᤧᤴᤗᤥ॥ 12 ᤛᤠ᤹ᤖᤡᤰ ᤁᤡᤵᤔᤠ ᤁᤧᤄᤢᤒᤠ ᤔᤧᤴᤇᤠᤶ ᤛᤢᤘᤠᤱᤒᤠ ᤔᤢᤰᤁᤧᤃᤢᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤠᤓᤣ᤺ᤸᤗᤧ ᤀᤠᤱᤃᤠ᤹ ᤂᤧᤏᤧ᤹ ᤁᤧᤎᤰᤛᤢᤒᤠ ᤛᤢᤶᤜᤠ᤹ ᤔᤧᤈᤥ᤺ᤴᤗ ᤕᤠ᤺ᤴᤍᤢᤱᤛᤡᤱᤗᤥ. ᤂᤧᤱᤜᤠ᤹ᤖᤧ ᤁᤧᤀᤠᤱᤍᤡᤱ ᤗ᤹ᤔᤠᤴ ᤂᤠᤵᤐᤢᤌᤩ᤺ᤱ ᤔᤧᤈᤥᤃᤢᤖᤥ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤖᤧᤰ ᤁᤧᤎᤰᤛᤢᤒᤠ ᤛᤢᤶᤜᤠ᤹ ᤔᤧᤔᤧᤰᤂᤢᤛᤡᤖᤥ॥ 13 ᤆᤫᤠ᤺ᤳ ᤁᤧᤏᤧᤒᤠᤍᤧᤴᤜᤠ᤹ᤖᤧ ᤁᤢᤕᤠᤀᤥ ᤆᤠᤃᤧᤖᤠᤶᤒᤠ ᤁᤧᤖᤧᤰ ᤁᤧᤎᤰᤛᤠᤜᤠ᤹ ᤏᤢ ᤁᤧᤎᤰᤛᤠ ᤛᤢᤶᤜᤠ᤹ ᤔᤧᤰᤂᤢᤱᤛᤡᤱᤗᤥ॥ ᤔᤏᤠᤜᤠ᤹ᤖᤧ ᤀᤡᤃᤪ ᤌᤰᤛᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤱᤅᤡᤸᤗᤧ ᤂᤧᤴ ᤆᤫᤠ᤺ᤳᤜᤠ᤹ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤔᤠᤰᤂᤢᤴᤍᤩᤠ ᤔᤧᤴᤈᤥᤃᤢᤴᤗᤥ॥ 14 ᤂᤧᤒᤩᤠᤱ ᤔᤡᤛᤪᤒᤠ ᤆᤫᤠ᤺ᤳᤜᤠ᤹ ᤕᤠᤶᤔᤥ ᤀᤠᤱᤃᤠ᤹ ᤆᤡᤈᤡ ᤕᤧᤶᤕᤧᤶ ᤐᤥᤱᤗ ᤕᤠ᤺ᤴᤍᤢᤱᤗᤥ. ᤜᤧᤰᤁᤩᤠᤱ ᤂᤧᤴ ᤆᤫᤠ᤺ᤳᤜᤠ᤹ ᤆᤤᤋᤢᤏ ᤏᤡ᤺ᤱᤃᤣ᤹ ᤁᤢᤀᤡᤛᤡᤰ ᤏᤢᤖᤡᤰᤁᤠᤱ ᤁᤢᤱᤗᤥ. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤗᤥ॥ 15 ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤏᤧ᤹ ᤔᤡᤛᤪ᤺ᤴ ᤔᤢᤖᤧᤰ ᤂᤠᤖᤧᤰ ᤆᤥ᤺ᤰᤏᤧᤖᤥ ᤂᤶᤓᤩᤠᤱ ᤂᤧᤏᤧ᤹ ᤁᤧᤗᤠᤈᤣ᤹ᤀᤥ ᤁᤧᤘᤠ᤹ᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤀᤠᤱᤃᤠ᤹ ᤛᤢᤖᤢᤰ ᤛᤢ᤺ᤴᤍᤢᤱ ᤋᤣ᤹ᤖᤢᤱᤗᤥ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤔᤏᤠᤜᤠ᤹ ᤁᤧᤖᤧᤰ ᤛᤩᤧᤖᤢᤱᤛᤡᤱᤗᤥ. ᤂᤧᤒᤩᤠᤱ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤁᤧᤔᤏᤠᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢᤖᤥ॥ 16 “ᤀᤥᤖᤥ. ᤜᤠᤒᤠ ᤁᤴ ᤔᤧᤖᤡᤱ ᤛᤠᤶᤗᤥᤴ ᤂᤧᤱᤜᤠ᤹ᤖᤧ ᤔᤡᤛᤪᤖᤧ ᤁᤢᤗᤠᤃᤡ ᤛᤠᤶᤔᤧᤔᤧᤳᤋᤢ᤹॥ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤒᤠ ᤔᤧᤴᤇᤢᤔᤠᤜᤠ᤹ ᤏᤧᤳᤔᤧᤕᤢᤰᤗ॥ ᤔᤡᤛᤪ᤺ᤴ ᤏᤢ ᤂᤧᤸᤗᤧ ᤁᤢᤎᤰᤛᤢᤒᤠ ᤛᤢᤶᤜᤠ᤹ᤖᤧ ᤗᤠᤃᤡ ᤂᤧᤱᤜᤠ᤹ᤖᤧ ᤔᤧᤖᤡᤱ ᤛᤠᤶᤗᤥᤴ ᤛᤠᤶᤔᤧᤔᤧᤳᤋᤢᤖ॥ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤴ ᤐᤠᤖᤠᤱᤅᤠᤱ ᤘᤠ᤹ᤖᤥ᥄” ᤂᤧᤔᤠᤍᤡᤱ ᤕᤱᤛᤱ 17 ᤌᤡᤒᤥᤱᤅᤠᤱ ᤏᤡᤛᤡᤃᤣᤰᤐᤠ ᤋᤱᤒᤣᤀᤥᤒᤠ ᤗᤠ ᤌᤡᤒᤥᤱᤅᤠᤱ ᤅᤠᤛᤡᤃᤣᤰᤐᤠ ᤕᤧᤴᤏᤥ. ᤕᤜᤘᤣ ᤍᤠᤱᤒᤠᤗᤠᤶ ᤘᤣ᤹ ᤀᤡᤱᤄᤱᤎᤡᤰ ᤀᤠᤱᤃᤠ᤹ᤀᤥ ᤁᤧᤖᤧ— 18 “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤔᤡᤛᤪᤒᤠ ᤌᤰᤛᤢᤒᤠ ᤛᤢᤶᤜᤠ᤹ ᤏᤢ ᤔᤢᤰᤛᤠᤶᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤂᤧᤏᤧ᤹ ᤜᤠᤒᤧ᤹॥ ᤌᤣᤀᤠᤱᤓᤧᤸᤗᤧ ᤗᤢᤶᤒᤠ᤺ᤳᤋᤥ ᤁᤧᤒᤣ᤺ᤰᤐᤠᤜᤠ᤹ᤏᤢ ᤛᤥᤖᤡᤰ ᤆᤢᤶᤍᤧ᤺ᤱ ᤐᤥᤱᤛᤧ ᤀᤠᤱᤃᤠ᤹ ᤂᤧᤱᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣᤰ ᤛᤡᤃᤠᤱ ᤔᤢ ᤐᤠᤱᤄᤢᤱᤛᤡᤱ᤹॥ 19 ᤂᤧᤏᤧ᤹ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤧᤛᤧ᤹ᤀᤥ. “‘ᤔᤡᤛᤪᤀᤣ. ᤘᤣ᤹ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤏᤢ᤺ᤸᤗᤧ ᤛᤠ᤹ᤖᤡᤰ ᤏᤢᤒᤠ ᤆᤥ᤺ᤰᤁᤠ ᤑᤠ᤹ᤀᤠᤱ ᤁᤧᤀᤡ᤺ᤳᤋᤢᤒᤡ᥅ ᤁᤧᤴᤈᤥ᤺ᤰᤏᤧᤴ᥄ ᤂᤧᤸᤗᤧᤆᤥᤃᤢᤸᤗᤧ ᤂᤧᤏᤧ᤹ ᤗᤢᤶᤒᤠ᤺ᤳᤋᤥ ᤐᤣᤃᤧ᤹ᤀᤥ ᤜᤧᤰᤁᤩᤠᤱ ᤀᤠᤛᤢᤛᤢᤒᤠ ᤛᤢᤘᤠᤱᤜᤠ᤹ᤏᤢ ᤂᤧᤏᤧ᤹ ᤂᤧᤵᤔᤥ ᤏᤧᤛ᤻ᤛᤧ᤹ᤀᤥ॥’ 20 “ᤋᤠᤓᤣᤗᤠᤶ ᤁᤧᤛᤡᤒᤠᤜᤠ᤹ᤏᤢ ᤛᤥᤖᤡᤰ ᤔᤡᤛᤪᤒᤠ ᤔᤏᤠᤜᤠ᤹ ᤔᤧᤈᤥᤴ᤹. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤋᤠᤓᤣᤴ ᤔᤧᤓᤡ᤺ᤰᤂᤢᤀᤠᤱ ᤘᤠ᤹॥ ᤔᤡᤛᤪ᤺ᤴ ᤏᤢ ᤂᤧᤸᤗᤧ ᤁᤢᤎᤰᤛᤢᤒᤠ ᤛᤢᤶᤜᤠ᤹ ᤂᤠᤛᤧᤴ ᤆᤥ᤺ᤰᤔᤠᤛᤡᤖᤧ ᤗᤠᤃᤡ ᤔᤧᤀᤢ᤺ᤰᤂᤢ ᤔᤧᤎᤧᤔᤢ ᤔᤧᤍᤣ᤹ᤖᤢᤛᤡ᤹॥ 21 ᤔᤢ ᤂᤧᤔᤠᤍᤡᤱ ᤕᤱᤛᤱᤅᤥ ᤔᤢᤰᤛᤠᤶᤒᤠ ᤗᤠᤶᤗᤥᤒᤠᤜᤠ᤹ᤖᤧ ᤔᤡᤛᤪ᤺ᤴ ᤏᤢ ᤂᤧᤸᤗᤧ ᤁᤢᤴᤈᤢᤶ ᤁᤢᤴᤍᤣᤱ ᤗᤠᤈᤣ᤹ᤜᤠ᤹ ᤁᤢᤏᤠᤔᤧᤴᤇᤠ᤹ ᤔᤧᤔᤧᤳᤋᤢᤛᤡᤖ ᤀᤰᤂᤣᤗ᤹ᤖᤡᤰ ᤗᤠᤶᤍᤠᤰ ᤔᤧᤔᤧᤳᤋᤢᤛᤡ᤹. ‘ᤂᤧᤱᤜᤠ᤹ ᤔᤢ ᤔᤧᤕᤧᤀᤠᤱ ᤔᤧᤘᤠ᤹. ᤋᤠᤓᤣ᤺ᤸᤗᤧ ᤔᤧᤛᤧᤖᤢᤛᤡᤒᤠ ᤌᤰᤛᤢᤒᤠ ᤛᤢᤶ. ᤀᤠᤛᤢᤛᤢᤒᤠ ᤔᤧᤴᤇᤠᤶ ᤛᤢᤘᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤂᤧᤱᤜᤠ᤹ ᤔᤧᤏᤧᤖᤥ॥’ 22 “ᤀᤛ᤻ᤛᤢᤖᤧᤴ ᤂᤧᤵᤔᤥ ᤋᤠᤓᤣ᤺ᤸᤗᤧ ᤔᤧᤛᤧᤖᤢᤛᤡᤒᤠ ᤂᤢᤏᤧ᤹ ᤁᤢᤎᤰᤛᤢᤒᤠᤜᤠ᤹ᤖᤧ ᤂᤢᤴᤇᤡ᤹ ᤀᤡᤐᤢᤱᤜᤠ᤹ᤖᤧ ᤁᤒᤪᤡᤱ ᤔᤧᤃᤒᤢᤀᤠᤱ ᤏᤧᤖᤥ॥ 23 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤡᤐᤢᤱᤜᤠ᤹ ᤁᤧᤖᤧᤰᤏᤢ᤺ᤸᤗᤧ ᤁᤣ᤺ᤶᤒᤠ ᤗᤢᤶᤒᤠ᤺ᤳᤋᤥ ᤏᤧᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤣ᤺ᤱᤈᤢᤶ ᤗᤠᤈᤣ᤹ᤒᤠᤜᤠ᤹ᤖᤧ ᤂᤢᤴᤇᤡ᤹ ᤁᤒᤪᤡᤱ ᤔᤧᤃᤒᤢᤛᤡᤀᤠᤱ ᤏᤧᤖᤥ॥ ᤂᤧᤱᤜᤠ᤹ᤖᤧ ᤀᤠᤳᤋᤠᤴᤇᤠᤱ ᤔᤏᤠᤜᤠ᤹ ᤂᤢᤴᤇᤡ᤹ ᤛᤡᤰᤗᤢᤱᤔᤥ ᤔᤧᤃᤡᤔᤧᤛᤡᤖ ᤔᤧᤕᤠ᤺ᤴᤍᤢᤛᤡ. ᤁᤖ ᤀᤠᤸᤗᤥ ᤂᤧᤱᤜᤠ᤹ ᤋᤠᤓᤣ᤺ᤸᤗᤧ ᤔᤧᤛᤧᤖᤢᤛᤡᤀᤠᤱ ᤔᤧᤏᤧᤖᤥ॥ 24 “ᤀᤣᤗᤠᤔᤧᤴ ᤂᤧᤵᤔᤥ ᤋᤠᤓᤣ᤺ᤸᤗᤧ ᤔᤧᤛᤧᤖᤢᤛᤡᤒᤠ ᤂᤢᤏᤧ᤹ ᤁᤧᤖᤧᤰ ᤁᤢᤎᤰᤛᤢᤒᤠ ᤛᤢᤶᤜᤠ᤹ᤖᤧ ᤂᤢᤴᤇᤡ᤹ ᤀᤡᤐᤢᤱᤜᤠ᤹ᤖᤧ ᤁᤒᤪᤡᤱ ᤔᤧᤃᤒᤢᤀᤠᤱ ᤏᤧᤖᤥ. ᤂᤧᤱᤜᤠ᤹ᤖᤧ ᤀᤠᤳᤋᤠᤴᤇᤠᤱ ᤔᤏᤠᤜᤠ᤹ ᤂᤢᤴᤇᤡ᤹ ᤛᤡᤰᤗᤢᤱᤔᤥ ᤔᤧᤃᤡᤛᤧᤖ ᤔᤧᤕᤠ᤺ᤴᤍᤢᤛᤡ. ᤁᤖ ᤀᤠᤸᤗᤥ ᤂᤧᤱᤜᤠ᤹ ᤀᤠᤛᤢᤛᤢᤒᤠ ᤔᤧᤴᤇᤠᤶ ᤛᤢᤘᤠᤱ ᤁᤢᤀᤡᤛᤡᤰ ᤀᤡᤰᤛᤠᤍᤡᤱ ᤂᤠᤶᤒᤣᤰ ᤛᤡᤃᤠᤱ ᤔᤧᤕᤧᤀᤠᤱ ᤔᤧᤘᤠ᤹॥ ᤀᤠᤸᤗᤥ ᤂᤧᤱᤜᤠ᤹ ᤗᤢᤶᤒᤠ᤺ᤳᤋᤥ ᤔᤧᤏᤧᤖᤥ ᤜᤧᤰᤁᤩᤠᤱ ᤂᤢᤴᤇᤡ᤹ᤏᤢ᤺ᤸᤗᤧ ᤋᤃᤡ ᤁᤧᤕᤢᤒᤠᤜᤠ᤹ᤏᤢ ᤁᤢᤍᤱᤒᤠ ᤛᤡᤖᤡᤱᤔᤔᤥ ᤔᤧᤎᤩᤧᤀᤠᤱ ᤔᤧᤘᤠ᤹॥ 25 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤌᤰᤛᤢᤒᤠ ᤛᤢᤶᤜᤠ᤹ᤖᤧ ᤂᤢᤴᤇᤡ᤹ ᤀᤡᤐᤢᤱᤜᤠ᤹ᤖᤧ ᤁᤒᤪᤡᤱ ᤁᤒᤢᤒᤠ. ᤔᤧᤛᤩᤧᤖᤢᤛᤡᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤂᤧᤱᤜᤠ᤹ᤖᤧ ᤗᤳᤇᤠ ᤏᤠ᤺ᤶᤛᤡᤱᤔᤠᤍᤧᤴ ᤔᤧᤃᤳᤋᤢ᤹॥ ᤀᤥᤘᤠ. ᤁᤢᤜᤡᤱᤘᤧᤳ ᤔᤧᤘᤕᤧ᤺ᤸᤗᤧ ᤂᤧᤱᤜᤠ᤹ᤖᤧ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤕᤱᤔᤠ ᤔᤧᤛᤧᤖᤢᤛᤡ. ᤁᤖ ᤀᤠᤸᤗᤥ ᤂᤧᤴ ᤁᤧᤖᤧᤰ ᤋᤠᤓᤣ᤺ᤸᤗᤧ ᤔᤧᤛᤩᤧᤖᤢᤛᤡᤒᤠ. ᤀᤠᤛᤢᤛᤢᤒᤠ ᤛᤢᤘᤠᤱᤜᤠ᤹ᤏᤢ ᤛᤥᤖᤡᤰ ᤗᤢᤶᤒᤠ᤺ᤳᤋᤥ ᤂᤧᤱᤜᤠ᤹ ᤛᤡᤖᤡᤱᤔᤔᤥ ᤔᤧᤎᤩᤧᤀᤠᤱ ᤔᤧᤕᤠᤰ॥ 26 “ᤔᤣᤛᤣᤁ ᤏᤢ ᤋᤢᤒᤗᤧᤴ ᤂᤧᤵᤔᤥ ᤂᤢᤴᤇᤡ᤹ ᤁᤧᤖᤧᤰ ᤌᤰᤛᤢᤒᤠ ᤛᤢᤶᤜᤠ᤹ᤖᤧ ᤂᤢᤏᤡ᤹ ᤀᤡᤐᤢᤱᤜᤠ᤹ᤖᤧ ᤁᤧᤖᤧᤰ ᤐᤡᤛᤠᤱ ᤔᤧᤃᤒᤢᤛᤡᤀᤠᤱ ᤏᤧᤛᤡ॥ ᤂᤧᤴ ᤏᤧᤵᤑᤢᤖᤧ ᤀᤠᤳᤋᤠᤴᤇᤠᤱ ᤔᤏᤠᤜᤠ᤹ ᤂᤢᤴᤇᤡ᤹ ᤛᤡᤰᤗᤢᤱᤔᤥ ᤔᤧᤃᤡᤔᤧᤛᤡᤖ ᤕᤠ᤺ᤴᤍᤧᤛᤢᤛᤡ॥ ᤁᤖ ᤀᤠᤸᤗᤥ ᤂᤧᤴ ᤏᤧᤵᤑᤢᤜᤠ᤹ᤃ ᤋᤠᤓᤣ᤺ᤸᤗᤧ ᤔᤧᤛᤧᤖᤢᤛᤡᤒᤠ ᤀᤠᤛᤢᤛᤢᤒᤠ ᤔᤧᤴᤇᤠᤶ ᤛᤢᤘᤠᤱᤛᤡᤖᤥ॥ 27 ᤀᤢᤴᤇᤥᤴ ᤀᤢᤴᤇᤥ᤺ᤴᤒᤠ ᤔᤢᤰᤁᤧᤃᤢᤒᤠ ᤌᤰᤛᤢᤒᤠᤜᤠ᤹ ᤜᤧᤰᤁᤣ ᤂᤢᤴᤇᤡ᤹ ᤔᤡᤱᤛᤥ ᤀᤡᤱᤎᤠᤱᤏᤢ ᤂᤧᤔᤠᤍᤡᤱ ᤕᤱᤛᤱᤅᤥ ᤔᤧᤒᤣᤛᤡᤴ॥ ᤂᤧᤴ ᤔᤢᤰᤁᤧᤃᤢᤒᤠᤜᤠ᤹ᤃ ᤁᤧᤖᤧᤰ ᤂᤈᤢᤶᤄᤕᤠ ᤑᤧᤈᤢᤶᤓᤧᤕᤠᤜᤠ᤹ᤏᤢ ᤛᤥᤖᤡᤰ ᤌᤧᤃᤣᤰ ᤛᤡᤃᤠᤱ ᤋᤠᤓᤣᤜᤠ᤹ ᤏᤢ ᤆᤣ ᤛᤶᤎᤠᤱ ᤂᤥᤜᤠ᤹ ᤔᤧᤏᤧᤛ᤻ᤛᤢᤀᤠᤱ ᤀᤡᤐᤢᤱᤅᤥ ᤔᤧᤗᤢᤵᤋᤢᤛᤡ॥ ᤌᤡᤰ ᤕᤧᤶᤔᤥ ᤁᤴ ᤔᤢᤰᤁᤧᤃᤢᤒᤠᤜᤠ᤹ ᤁᤢᤜᤡᤱᤘᤧᤳ ᤘᤕᤧᤛᤡᤸᤗᤧ ᤁᤢᤜᤡᤱᤘᤧᤳᤜᤠ᤹ ᤕᤱᤔᤠᤛᤧᤵᤔᤠ ᤔᤢᤰᤛᤠᤶ ᤁᤳᤋᤧᤛᤢ॥ 28 “ᤂᤧᤏᤧ᤹ ᤔᤡᤛᤪ᤺ᤴᤏᤠᤱ ᤋᤠᤓᤣ᤺ᤸᤗᤧ ᤔᤧᤛᤧᤖᤢᤛᤡᤒᤠ ᤂᤧᤴ ᤀᤠᤛᤢᤛᤢᤒᤠ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤁᤢᤓᤢᤍᤢᤰᤔᤠ ᤂᤠᤵᤐᤢᤌᤩ᤺ᤱ ᤁᤧᤒᤥᤱᤅᤠᤱ ᤁᤧᤏᤧᤖᤥ॥ 29 “ᤀᤣᤍᤥᤶᤔᤡᤴᤏᤠᤱ ᤂᤢᤏᤧ᤹ ᤁᤢᤜᤠᤱᤜᤠ᤹ ᤜᤧᤰᤁᤩᤠᤱ ᤁᤢᤗᤠᤶᤗᤥᤒᤠᤜᤠ᤹ᤏᤢ ᤛᤥᤖᤡᤰ ᤂᤧᤵᤔᤥ ᤏᤧᤛ᤻ᤛᤧ॥ ᤂᤧᤱᤜᤠ᤹ ᤔᤢᤰᤁᤧᤃᤢᤒᤠ ᤔᤧᤘᤕᤧᤛᤠᤱ. ᤋᤠᤓᤣ᤺ᤸᤗᤧ ᤔᤧᤛᤧᤖᤢᤛᤡᤒᤠ ᤗᤢᤶᤒᤠ᤺ᤳᤋᤥ ᤔᤢ ᤁᤧᤒᤣ᤺ᤰᤐᤠ. ᤀᤠᤛᤢᤛᤢᤒᤠ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤂᤧᤱᤜᤠ᤹ᤀᤠᤱ ᤔᤧᤏᤧ ᤔᤧᤈᤠᤖᤥ॥ 30 “ᤌᤠᤱᤃᤧᤳ ᤗᤧᤵᤔᤠᤱᤒᤠ ᤁᤧᤖᤧᤰ ᤗᤠᤶᤗᤥᤒᤠᤜᤠ᤹ ᤏᤢ ᤁᤧᤖᤧᤰ ᤛᤡᤍᤥᤏᤡᤜᤠ᤹ ᤘᤣ᤹ ᤁᤧᤛᤡᤒᤠᤜᤠ᤹ᤏᤢ ᤛᤥᤖᤡᤰ ᤂᤧᤵᤔᤥ ᤔᤧᤏᤧᤛ᤻ᤛᤧ॥ ᤌᤡᤰ ᤕᤧᤶᤔᤥ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤁᤡᤔᤠ ᤕᤱᤔᤧᤸᤗᤧ ᤂᤧᤱᤜᤠ᤹ ᤛᤡᤖᤡᤱᤔᤔᤥ ᤌᤠᤛᤢᤛᤡᤀᤠᤱ ᤔᤧᤘᤕᤧ॥ ᤀᤠᤛᤢᤛᤢᤒᤠ ᤛᤢᤘᤠᤱᤜᤠ᤹ ᤁᤢᤀᤡᤛᤡᤰ ᤋᤠᤓᤣ᤺ᤸᤗᤧ ᤛᤩᤧᤖᤢᤛᤡᤀᤠᤱ ᤘᤕᤧᤒᤠ ᤘᤣ᤹ᤜᤠ᤹ᤏᤢ ᤛᤥᤖᤡᤰ ᤂᤧᤱᤜᤠ᤹ ᤂᤧᤵᤔᤥ ᤔᤧᤏᤧᤛ᤻ᤛᤧ॥ ᤗᤢᤶᤒᤠ᤺ᤳᤋᤥ ᤁᤧᤕᤢᤒᤠᤀᤠᤱ ᤁᤧᤕᤠᤰᤐᤠ ᤁᤧᤖᤧᤰᤏᤢ ᤛᤥᤖᤡᤰ ᤂᤧᤱᤜᤠ᤹ ᤛᤡᤖᤡᤱᤔᤔᤥ ᤔᤧᤎᤩᤧ॥ 31 “ᤑᤠᤖᤥᤴ ᤏᤢ ᤂᤢᤏᤧ᤹ ᤁᤢᤎᤰᤛᤢᤒᤠᤜᤠ᤹ ᤁᤧᤖᤧᤰᤗᤧ ᤂᤧᤱᤜᤠ᤹ ᤔᤧᤏᤡᤛᤢᤛᤡ᤹. ᤜᤧᤰᤁᤩᤠᤱ ᤂᤢᤏᤧ᤹ᤖᤰ ᤁᤧᤖᤧᤰ ᤁᤢᤎᤰᤛᤢᤒᤠ ᤛᤢᤶᤜᤠ᤹ ᤔᤧᤛᤧᤖᤢᤛᤡᤒᤠ ᤔᤧ᤺ᤴᤗᤳᤇ ᤑᤠ᤹ᤀᤠᤱ ᤂᤢᤏᤧ᤹ ᤀᤠ᤺ᤴᤇᤡᤱᤔᤠ ᤂᤥᤛᤢ᤹. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹॥ 32 ᤜᤧᤰᤁᤣᤛᤠᤱ ᤀᤠᤱᤃᤠ᤹ ᤂᤢᤏᤧ᤹ᤗᤠᤶ ᤁᤡᤔᤠ ᤕᤱᤔᤧᤴ ᤁᤧᤖᤧᤰ ᤁᤢᤜᤡᤱᤘᤧᤳᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤌᤩᤧᤖ ᤕᤠ᤺ᤴᤍᤢᤱᤅᤠᤱ ᤘᤠ᤹. ᤂᤧᤵᤔᤥ ᤋᤠᤓᤣ᤺ᤸᤗᤧ ᤔᤧᤛᤧᤖᤢᤛᤡᤒᤠ ᤀᤠᤛᤢᤛᤢᤒᤠ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤑᤠᤖᤥᤴ ᤏᤢ ᤂᤢᤏᤧ᤹ ᤁᤢᤎᤰᤛᤢᤒᤠ ᤛᤢᤶᤜᤠ᤹ ᤔᤧᤏᤧᤖᤥ. ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤴ ᤐᤠᤖᤠᤱᤅᤠᤱ ᤘᤠ᤹ᤖᤥ᥄” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.