ᤀᤡᤈᤁᤡᤀᤣᤗ 31 - LIFOTNT

ᤛᤠᤶᤔᤠᤱᤛᤡᤱ ᤏᤢ ᤔᤡᤛᤪ ᤗᤠᤈᤣ᤹

¹ ᤕᤜᤥᤕᤠᤁᤡᤏ ᤜᤠᤱᤅᤡᤴ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤒᤠ ᤌᤡᤒᤥᤱᤅᤠᤱ ᤌᤡᤰᤛᤡᤃᤣᤰᤐᤠ ᤋᤱᤒᤣ ᤛᤢᤶᤛᤡᤃᤣᤰᤐᤠ ᤗᤠ ᤌᤡᤰᤛᤡᤃᤣᤰᤐᤠ ᤕᤧᤴᤏᤥ ᤕᤜᤘᤣ ᤍᤠᤱᤒᤠᤗᤠᤶ ᤁᤴ ᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤁᤧᤖᤧ—

² “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤔᤡᤛᤪᤒᤠ ᤜᤠᤱ ᤑᤠᤖᤥᤴ ᤏᤢ ᤂᤧᤸᤗᤧ ᤁᤢᤎᤰᤛᤢᤒᤠ ᤛᤢᤶᤜᤠ᤹ ᤂᤧᤏᤧ᤹ ᤁᤴ ᤀᤡᤱᤄᤱᤅᤡᤴ ᤔᤧᤳᤋᤧᤛᤧ᤹ᤀᤥ— “ᤂᤧᤏᤧ᤹ ᤁᤧᤕᤶᤔᤠ ᤁᤣᤃᤣ᤺ᤶᤔᤠᤴ ᤜᤠ᤺ᤳᤏᤢ ᤋᤱᤔᤠ ᤛᤢᤰᤋᤧᤵᤐᤣ᥅

³ ᤀᤛ᤻ᤛᤢᤖᤧᤴ ᤂᤡᤏᤡ᤹ ᤏᤡᤱᤘᤠ᤹ ᤀᤡ᤺ᤳᤋᤧᤶᤔᤧ᤹ᤀᤥ. ᤌᤡᤰ ᤕᤧᤶᤔᤥ ᤂᤧᤴ ᤗᤧᤒᤏᤠᤏᤒᤠ ᤛᤠᤶᤔᤠᤱᤛᤡᤱ ᤜᤧᤰᤋᤱᤒᤠ ᤆᤥᤃᤧᤖᤥ. ᤁᤧᤄᤧᤶᤛᤡᤱᤒᤠ ᤁᤢᤒᤥᤖᤠᤰᤜᤠ᤹ᤖᤧ ᤋᤠᤶᤓᤢᤱᤅᤥ ᤛᤡᤃᤠᤱ ᤏᤠᤶᤀᤡ᤺ᤰᤂᤱ ᤆᤥᤃᤢᤖᤥ. ᤜᤧᤰᤁᤩᤠᤱ ᤁᤸᤗᤧ ᤁᤣ᤺ᤶᤒᤠ ᤁᤢᤛᤶᤔᤡᤸᤗᤧ ᤂᤠ᤹ᤔᤡ᤺ᤳᤜᤠ᤹ ᤛᤢᤛᤢᤖᤥ॥

⁴ ᤛᤡᤃᤠᤱ ᤁᤧᤏᤧᤒᤠ ᤆᤫᤠ᤺ᤳ ᤘᤒᤢᤴᤍᤠᤰᤜᤠ᤹ᤖᤧ ᤁᤴ ᤘᤠᤖᤰᤂᤢᤖᤥ ᤜᤧᤰᤁᤩᤠᤱ ᤁᤣ᤺ᤶᤒᤠ ᤐᤥᤔᤠ ᤏᤢ ᤛᤖᤣ᤺ᤰᤕᤠ᤺ᤵᤐᤠ ᤐᤥᤱᤔᤠ ᤁᤸᤗᤧ ᤑᤠ᤹ᤖᤢᤖᤥ॥ ᤁᤧᤖᤧᤰ ᤛᤡᤱᤒᤢᤱᤜᤠ᤹ᤖᤧ ᤁᤢᤒᤣᤛᤠᤱ ᤑᤈᤱᤈᤱ ᤗ᤹ᤖᤡᤰ ᤗᤳᤇᤠ ᤘᤜ᤺ᤱ ᤜᤧᤰᤁᤣ ᤁᤴ ᤁᤧᤖᤧᤰ ᤐᤡᤛᤠᤱ ᤆᤫᤠ᤺ᤳᤋᤡᤴ ᤁᤢᤰᤛᤧᤖᤥ॥

⁵ ᤁᤴ ᤕᤶᤒᤠ ᤛᤡᤱᤒᤢᤱᤅᤡᤴ ᤁᤧᤖᤧᤰ ᤐᤡᤛᤠᤱᤒᤠ ᤘᤣ᤹ ᤛᤡᤱᤒᤢᤱᤜᤠ᤹ ᤏᤢ᤺ᤸᤗᤧᤀᤠᤱ ᤁᤣ᤺ᤶᤒᤠ ᤐᤥ᤺ᤰᤂᤧᤖᤥ॥ ᤁᤴ ᤆᤠ᤹ᤖᤧᤀᤠᤱ ᤁᤣ᤺ᤶᤒᤠ ᤜᤢᤶᤒᤧᤵᤐᤠ ᤁᤢᤒᤥᤖᤠᤰ ᤗ᤺ᤴᤍᤧᤖᤥ ᤌᤣᤀᤠᤱᤓᤧᤸᤗᤧ ᤁᤧᤖᤧᤰ ᤁᤢᤛᤠ᤺ᤵᤜᤠ᤹ᤀᤥ ᤆᤫᤠ᤺ᤳᤋᤡᤸᤗᤧ ᤘᤠᤖᤰᤂᤢᤖᤥ॥

⁶ ᤁᤸᤗᤧ ᤁᤢᤒᤥᤖᤠᤰᤜᤠ᤹ᤀᤥ ᤐᤢᤜᤠ᤹ᤖᤧ ᤜᤠᤵ ᤔᤧᤈᤥᤃᤢᤖᤥ. ᤜᤧᤰᤁᤩᤠᤱ ᤁᤸᤗᤧ ᤀᤡ᤺ᤵᤋᤢᤒᤠ ᤏᤠᤶᤀᤡ᤺ᤰᤂᤱᤅᤥ ᤁᤧᤖᤧᤰ ᤋᤠᤶᤓᤢᤱ ᤌᤰᤛᤠᤜᤠ᤹ᤖᤧ ᤛᤠ ᤔᤧᤎᤠᤵᤋᤢᤛᤡᤖᤥ॥ ᤁᤸᤗᤧ ᤁᤢᤛᤡᤃᤠᤱ ᤀᤡ᤺ᤵᤋᤢᤒᤠ ᤏᤠᤶᤈᤡ᤺ᤰᤂᤥ᤹ᤀᤥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤕᤖᤡᤰ ᤛᤢᤘᤠᤱᤜᤠ᤹ ᤔᤧᤕᤢᤅᤧᤖᤥ॥

⁷ ᤁᤴ ᤁᤧᤎᤢᤶᤒᤠ ᤏᤢ ᤐᤄᤧᤶ ᤁᤧᤄᤧᤶᤛᤡᤱᤒᤠ ᤁᤢᤒᤥᤖᤠᤰᤜᤠ᤹ ᤜᤢᤶᤒᤧᤳ ᤁᤧᤛᤧᤒᤠ ᤆᤥᤃᤧᤖᤥ. ᤌᤣᤀᤠᤱᤓᤧᤸᤗᤧ ᤁᤴ ᤛᤡᤱᤒᤢᤱᤅᤡᤸᤗᤧ ᤁᤢᤛᤠ᤺ᤵᤜᤠ᤹ ᤕᤖᤡᤰ ᤆᤫᤠ᤺ᤳ ᤁᤧᤏᤧᤒᤠᤍᤧᤴᤏᤥ ᤕᤥ ᤐᤣᤀᤠᤱ ᤏᤧᤛ᤻ᤛᤧᤖᤥ॥

⁸ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤡᤱᤛᤣ᤹ ᤀᤡᤰᤁᤥᤒᤠ ᤀᤠᤳᤋᤡᤴ ᤛᤠᤶᤔᤠᤱᤛᤡᤱᤅᤡᤴᤏᤠᤱ ᤂᤧᤴᤏᤢ ᤁᤢᤍᤱᤒᤠ ᤋᤱᤔᤠ ᤛᤢᤰᤔᤧᤍᤧᤳᤏᤧᤴᤗᤥ. ᤀᤠᤳᤋᤡᤴ ᤀᤠ᤺ᤱᤅᤡᤸᤗᤧ ᤁᤢᤒᤥᤖᤠᤰᤜᤠ᤹ᤀᤠᤱ ᤁᤴᤏᤢ ᤁᤢᤍᤱᤒᤠ ᤔᤧᤒᤳᤇᤧᤴᤗᤥ. ᤀᤠᤳᤋᤡᤴ ᤐ᤺ᤱᤄᤣ᤹ᤒᤠ ᤛᤡᤱᤒᤢᤱᤅᤡᤸᤗᤧᤀᤠᤱ ᤁᤴᤏᤢ ᤁᤢᤍᤱᤒᤠ ᤁᤢᤓᤧᤰᤘᤠ ᤔᤧᤒᤴᤇᤧᤴᤗᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤓᤢᤱᤀᤡᤰᤁᤥᤒᤠ ᤀᤠᤳᤋᤡᤴ ᤛᤡᤱᤒᤢᤱᤅᤡᤴᤏᤠᤱ ᤁᤸᤗᤧ ᤁᤢᤄᤧᤶᤛᤡᤱᤔᤠᤴᤏᤢ ᤁᤢᤍᤱᤒᤠ ᤔᤧᤈᤥᤃᤧᤴᤗᤥ॥

⁹ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤁᤴ ᤛᤡᤱᤒᤢᤱᤅᤡᤴ ᤏᤢᤒᤠ ᤆᤥᤃᤢᤱᤗᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤁᤴ ᤜᤢᤶᤒᤧᤳ ᤁᤢᤓᤧᤰᤘᤠ ᤑᤳᤇᤢᤱ ᤐᤡᤖᤢᤱᤗᤥ. ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤡᤱᤛᤣ᤹ᤀᤡᤰ ᤀᤍᤏᤒᤠ ᤘᤣ᤹ ᤁᤧᤖᤧᤰ ᤛᤡᤱᤒᤢᤱᤜᤠ᤹ᤖᤧ ᤁᤴ ᤏᤠᤔᤧᤜᤧᤳᤋᤢᤀᤠᤱ ᤕᤢᤅᤧᤖᤥ॥

¹⁰ “ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤱ᤹—ᤂᤧᤴ ᤕᤶᤒᤠ ᤜᤧᤴᤇᤡᤱᤅᤠᤱ ᤀᤠᤱᤍᤡᤱ ᤗ᤹ᤖᤧᤒᤠᤸᤗᤧ ᤆᤥᤃᤢᤸᤗᤧ. ᤜᤧᤰᤁᤩᤠᤱ ᤁᤴ ᤀᤠᤵᤑᤣᤰ ᤁᤧᤖᤧᤰᤏᤢ᤺ᤸᤗᤧ ᤛᤠ᤹ᤖᤡᤰ ᤁᤣ᤺ᤶᤒᤠ. ᤁᤢᤛᤶᤔᤡᤸᤗᤧ ᤂᤠ᤹ᤔᤡ᤺ᤳᤜᤠ᤹ ᤁᤧᤛᤢᤒᤠ ᤆᤥ᤺ᤰᤛᤡᤱᤒᤠᤸᤗᤧ ᤆᤥᤃᤢᤸᤗᤧ.

¹¹ ᤀᤠᤱᤃᤠ᤹ ᤁᤴ ᤔᤧᤴᤇᤠᤶ ᤛᤢᤘᤠᤱ ᤕᤢᤰᤛᤠᤒᤠᤎᤡᤰ ᤜᤢᤰᤛᤢᤵᤋᤢᤱ ᤁᤸᤗᤧ ᤂᤥᤔᤠ ᤕᤠᤖᤢᤒᤠ ᤁᤢᤓᤧᤴ ᤕᤠ᤺ᤶᤒᤰ ᤁᤢᤀᤡᤛᤡᤰ ᤂᤧᤸᤗᤧ ᤁᤴ ᤔᤧᤰᤂᤢ॥ ᤀᤠᤱᤃᤠ᤹ ᤁᤴ ᤀᤠᤛᤣ᤺ᤴᤇᤠ ᤏᤠ᤹ᤖᤢᤱᤅᤠᤱ ᤘᤕᤧ॥

¹² ᤛᤠ᤹ᤖᤡᤰ ᤁᤢ᤹ᤀᤡᤃᤧᤓᤧᤶᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤀᤥᤒᤠ ᤘᤣ᤹ ᤗᤠᤈᤣ᤹ᤒᤠ ᤌᤰᤛᤢᤒᤠᤜᤠ᤹ᤖᤧ ᤁᤴ ᤔᤧᤍᤠᤅᤢ ᤜᤧᤰᤁᤩᤠᤱ ᤂᤠᤶᤒᤠᤱᤅᤥ ᤔᤧᤛᤥ᤺ᤴᤍᤢᤀᤠᤱ ᤏᤧᤛ᤻ᤛᤧ॥ ᤁᤸᤗᤧ ᤁᤢᤒᤥᤖᤠᤰᤜᤠ᤹ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ᤀᤥ ᤜᤧᤰᤁᤩᤠᤱ ᤏᤧᤏᤧᤒᤠᤍᤧᤴᤜᤠ᤹ᤀᤥ ᤏᤢ ᤐᤠᤰᤗᤢᤶᤗᤢᤶᤒᤠᤜᤠ᤹ᤀᤥ ᤁᤧᤖᤧᤰ ᤐᤡᤛᤠᤱ ᤜᤳᤇᤧ ᤜᤳᤇᤧ ᤛᤧᤖᤧᤀᤠᤱ ᤏᤧᤛ᤻ᤛᤧ॥ ᤁᤸᤗᤧ ᤀᤡ᤺ᤵᤋᤢᤒᤠᤍᤧᤴᤏᤥ ᤁᤧᤕᤢᤱᤒᤠ ᤁᤧᤖᤧᤰ ᤔᤠ᤺ᤱᤄᤠ ᤔᤧᤒᤣᤀᤠᤱ ᤔᤧᤘᤕᤧ ᤜᤧᤰᤁᤩᤠᤱ ᤁᤴ ᤁᤧᤈᤥ᤺ᤶᤒᤠᤴ ᤂᤧᤵᤔᤥ ᤔᤧᤗᤧᤖᤢᤖᤥ॥

¹³ “ᤁᤸᤗᤧ ᤁᤧᤈᤥ᤺ᤶᤒᤠ ᤁᤢᤔᤢ᤺ᤳᤋᤥ ᤐᤢᤜᤠ᤹ ᤕᤠᤱᤔᤧᤎᤥ᤺ᤰᤗᤥ. ᤜᤧᤰᤁᤩᤠᤱ ᤁᤸᤗᤧ ᤁᤢᤒᤥᤖᤠᤰᤜᤠ᤹ᤀᤥ ᤋᤠᤶᤓᤢᤱ ᤌᤰᤛᤠᤜᤠ᤹ ᤔᤧᤏᤧᤖᤥ॥

¹⁴ ᤂᤠ᤹ᤔᤡ᤺ᤳᤜᤠ᤹ᤏᤢ᤺ᤸᤗᤧᤀᤠᤱ ᤁᤴ ᤁᤣ᤺ᤶᤒᤠ ᤐᤥᤱᤛᤠᤱ ᤜᤧᤰᤁᤩᤠᤱ ᤔᤢ ᤛᤡᤃᤠᤱᤗᤠᤶ ᤆᤫᤠ᤺ᤳᤋᤡᤸᤗᤧ ᤘᤠᤖᤰᤂᤢᤛᤠᤱ ᤘᤣ᤹ ᤗᤠᤈᤣ᤹ᤒᤠ ᤀᤠᤳᤋᤡᤴ ᤛᤡᤱᤒᤢᤱᤅᤡᤴᤏᤠᤱ ᤀᤠᤵᤑᤣᤰ ᤁᤢᤏᤢ᤹ᤔᤠ ᤁᤢᤍᤠᤔᤥ ᤀᤠᤱᤍᤡᤱ ᤗ᤹ᤖᤡᤰ ᤔᤧᤛ᤺ᤳᤏᤧᤴᤗᤖᤥ॥ ᤌᤣᤀᤠᤱᤓᤧᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤧᤸᤗᤧ ᤁᤢᤛᤡᤃᤠᤱ ᤗᤢᤶᤒᤠ᤺ᤳᤋᤥ ᤐᤣ᤺ᤰᤔᤠ. ᤛᤡᤔᤠᤖᤧ ᤗᤠᤃᤡ ᤁᤧᤖᤧᤰ ᤔᤧᤔᤧᤰᤗᤥ॥ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰᤏᤢ ᤛᤥᤛᤥᤖᤡᤰ ᤂᤧᤱᤜᤠ᤹ ᤂᤧᤔᤠᤍᤡᤱ ᤕᤱᤛᤱᤅᤥ ᤔᤧᤈᤢᤰᤗᤥ॥”

¹⁵ “ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤱ᤹—ᤁᤴ ᤔᤢ ᤂᤧᤔᤠᤍᤡᤱ ᤕᤱᤛᤱᤅᤥ ᤐᤣ᤺ᤸᤗᤧ ᤕᤠ᤺ᤴᤍᤡᤰ. ᤀᤠᤱᤃᤠ᤹ ᤛᤡᤃᤠᤱᤒᤠ ᤆᤫᤠ᤺ᤳ ᤘᤠᤒᤢᤴᤍᤠᤰᤜᤠ᤹ ᤔᤧᤖᤡᤱ ᤔᤧᤎᤰᤋᤧᤖ ᤕᤠ᤺ᤴᤍᤢᤱᤛᤡᤱ॥ ᤀᤠᤱᤃᤠ᤹ ᤁᤸᤗᤧ ᤁᤢᤘᤜ᤺ᤱᤜᤠ᤹ ᤛᤠᤰᤋᤢᤱ ᤜᤧᤰᤁᤩᤠᤱ ᤁᤸᤗᤧ ᤀᤠᤳᤋᤠᤋᤠᤴᤏᤣ ᤕᤖᤡᤰ ᤁᤢᤈᤫᤠ᤺ᤳᤜᤠ᤹ ᤜᤣᤛᤢᤱ ᤐᤡᤖᤢᤱ॥ ᤀᤠᤱᤃᤠ᤹ ᤗᤧᤒᤏᤠᤏᤧᤴ ᤏᤧᤋᤩᤢᤰᤔᤠ ᤆᤠᤱ ᤆᤠᤰᤋᤢᤱ. ᤂᤧᤒᤩᤠᤱ ᤀᤡᤰᤋᤠᤵᤐᤥᤒᤠ ᤛᤡᤱᤒᤢᤱᤜᤠ᤹ ᤘᤠ᤺ᤴᤈᤥᤈᤥᤒᤠ ᤐᤥ᤺ᤰᤂᤧᤖ ᤕᤠ᤺ᤴᤍᤢᤱ॥

¹⁶ ᤁᤴ ᤆᤥ᤺ᤴᤍᤧᤒᤠ ᤀᤡᤰᤗᤠ᤺ᤸᤗᤧ ᤀᤠᤱᤃᤠ᤹ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤁᤡᤔᤧᤸᤗᤧ ᤌᤧᤃᤰᤁᤰᤏᤠ ᤔᤧᤕᤰᤂᤧᤖ ᤆᤥᤃᤢᤱ. ᤌᤣᤀᤠᤱᤓᤧᤸᤗᤧ ᤂᤧᤔᤠᤍᤡᤱ ᤕᤱᤛᤱᤅᤥ ᤁᤧᤎᤠᤛᤡᤱᤒᤠ ᤘᤣ᤹ ᤁᤧᤖᤧᤰᤏᤢ ᤛᤥᤖᤡᤰ ᤀᤡᤐᤢᤱᤅᤥ ᤀᤠᤱᤃᤠ᤹ ᤁᤴ ᤔᤢ ᤐᤠᤱᤄᤢᤱ॥ ᤜᤧᤰᤁᤩᤠᤱ ᤀᤍᤏᤒᤠ ᤁᤧᤖᤧᤰ ᤛᤡᤱᤒᤢᤱᤜᤠ᤹. ᤗᤧᤒᤏᤠᤏᤒᤠ ᤛᤠ᤹ᤖᤡᤰ ᤏᤢᤒᤠ ᤏᤢ ᤆᤠ᤹ᤖᤡᤰ ᤁᤧᤄᤧᤶᤛᤡᤱᤒᤠ ᤕᤖᤡᤰ ᤆᤫᤠ᤺ᤳᤜᤠ᤹ᤀᤥ ᤌᤠᤖᤡᤰ ᤁᤧᤒᤣ᤺ᤰᤐᤠ ᤛᤡᤱᤒᤢᤱᤜᤠ᤹ᤖᤧ. ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤗᤢᤶᤒᤠ᤺ᤳᤜᤠ᤹ᤏᤢ ᤜᤠᤱᤜᤠᤱ ᤔᤧᤳᤇᤡᤱᤔᤠ ᤔᤧᤄᤥᤛᤢ॥

¹⁷ ᤁᤸᤗᤧ ᤀᤡ᤺ᤵᤋᤢᤒᤠᤍᤧᤴᤏᤥ ᤁᤧᤕᤢᤱᤒᤠᤜᤠ᤹. ᤀᤡᤃᤪ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤀᤥᤒᤠ ᤁᤢᤓᤠ᤹ᤒᤠᤱ ᤁᤢᤈᤢᤶ ᤁᤢᤍᤣ᤺ᤱᤜᤠ᤹ᤀᤠᤱ ᤋᤠᤓᤣ᤺ᤸᤗᤧ ᤔᤧᤛᤧᤖᤢᤛᤡᤒᤠᤜᤠ᤹ᤏᤢ ᤛᤥᤛᤥᤖᤡᤰ ᤔᤢ ᤂᤧᤔᤠᤍᤡᤱ ᤕᤱᤛᤱᤅᤥ ᤋᤱᤛᤡᤱᤛᤧ ᤔᤧᤒᤣᤀᤠᤱ ᤔᤧᤘᤕᤧ॥

¹⁸ “ᤀᤍᤏᤒᤠ ᤀᤠᤳᤋᤡᤴ ᤛᤡᤱᤒᤢᤱᤜᤠ᤹ᤏᤢ ᤂᤧᤏᤧ᤹ ᤁᤧᤎᤢᤶᤔᤧᤴ ᤜᤧᤰᤁᤩᤠᤱ ᤁᤧᤔᤡᤔᤡᤍᤡᤱᤅᤡᤴ ᤋᤱᤔᤠ ᤛᤢᤰᤋᤧᤵᤐᤣ᥅ ᤁᤴ ᤘᤣ᤹ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤏᤢ ᤛᤥᤛᤥᤖᤡᤰ ᤂᤧᤏᤧ᤹ᤀᤠᤱ ᤗᤢᤶᤒᤠ᤺ᤳᤜᤠ᤹ᤀᤥ ᤁᤧᤶᤎᤠᤖᤥ॥ ᤋᤠᤓᤣᤗᤠᤶ ᤁᤧᤛᤡᤒᤠ ᤀᤠᤛᤢᤛᤢᤒᤠ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤂᤧᤏᤧ᤹ ᤂᤧᤵᤔᤥ ᤁᤧᤏᤧ ᤁᤧᤃᤴᤗᤥ॥ ᤑᤠᤖᤥᤴ ᤏᤢ ᤂᤢᤏᤧ᤹ ᤁᤢᤎᤰᤛᤢᤒᤠ ᤛᤢᤶᤜᤠ᤹ᤖᤧ ᤂᤢᤴᤇᤡ᤹ ᤁᤴ ᤋᤠᤵᤑᤧ᤺ᤶᤒᤠ ᤋ᤹ᤕᤠᤴ ᤐᤥᤱ᤹॥ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤅᤠᤱ ᤘᤠ᤹ᤖᤥ᥄”