ᤀᤡᤈᤁᤡᤀᤣᤗ 30 - LIFOTNT

ᤔᤡᤛᤪ ᤗᤠᤈᤣ᤹ᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤄᤢᤶᤍᤡᤱ

¹ ᤁᤴ ᤘᤣ᤹ ᤀᤡᤱᤄᤱᤅᤡᤴ ᤕᤜᤘᤣ ᤍᤠᤱᤒᤠᤗᤠᤶ ᤀᤠᤱᤃᤠ᤹ᤀᤥ ᤁᤧᤖᤧ—

² “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤔᤠᤱᤏᤡᤱᤘᤠ᤹ᤐᤠᤴ ᤐᤠᤖᤧ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ— “ᤂᤧᤸᤗᤧ ᤕᤠ᤺ᤴᤍᤡᤰ ᤂᤡᤏᤡ᤹ ᤜᤠᤒᤧᤶᤔᤧ᤹ᤀᤥ ᤜᤧᤰᤁᤩᤠᤱ ᤔᤧᤖᤡᤱ ᤌᤰᤋᤧᤶᤔᤧ᤹ᤀᤥ.

³ ᤌᤣᤀᤠᤱᤓᤧᤸᤗᤧ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤕᤧᤴ ᤁᤡᤵᤔᤠ ᤐᤄᤢᤃᤧᤄᤢᤒᤠ ᤕᤧᤴᤏᤡᤴ ᤂᤠ ᤁᤵᤔᤥᤀᤣ ᤘᤠ᤹ᤖᤥ᥄ ᤁᤱᤃ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤗᤠᤃᤡ ᤁᤡᤔᤠ ᤕᤱᤔᤠ ᤕᤧᤴᤗᤥ ᤂᤠ᤹ᤔᤡᤳ ᤏᤢ ᤔᤢᤍ᤺ᤵᤔᤠ ᤕᤧᤴᤗᤥ॥

⁴ ᤔᤡᤛᤪᤖᤧ ᤁᤢᤍᤰᤗᤧᤱᤘᤠᤀᤥ. ᤋᤠᤓᤣᤎᤡᤰ ᤁᤧᤍᤠᤒᤠ ᤘᤠ᤹ᤖᤥ. ᤜᤧᤰᤁᤩᤠᤱ ᤁᤢᤛ ᤗᤠᤈᤣ᤹ᤀᤥᤀᤠᤱ ᤁᤧᤛᤠᤰᤐᤠ ᤐᤥᤱᤍᤠᤖᤥ. ᤜᤧᤰᤁᤩᤠᤱ ᤂᤧᤴ ᤔᤧᤛᤧᤖᤢᤛᤡᤒᤠᤜᤠ᤹ ᤂᤠᤶᤒᤠᤱᤅᤥ ᤔᤧᤈᤥ᤺ᤴᤏᤡᤸᤗᤧ ᤁᤸᤗᤧ ᤁᤢᤕᤠᤱᤛᤠ ᤁᤢᤴᤎᤣᤜᤠ᤹ ᤔᤧᤃᤢᤕᤢ ᤔᤧᤍᤣ᤹ᤖᤢᤖᤥ. ᤜᤧᤰᤁᤩᤠᤱ ᤁᤸᤗᤧ ᤁᤢᤕᤢᤰᤏᤠᤜᤠ᤹ ᤔᤧᤎᤢᤵᤛᤢ ᤔᤧᤗᤢ᤺ᤴᤍᤢᤖᤥ॥

⁵ ᤂᤧᤴ ᤌᤱᤅᤥ ᤁᤢᤛ. ᤐᤢᤋ. ᤗᤡᤒᤡᤕᤠ. ᤗᤡᤍᤡᤕᤠ. ᤁᤧᤖᤧᤰ ᤀᤖᤒ ᤗᤠᤈᤣ᤹. ᤁᤢᤒ ᤜᤧᤰᤁᤩᤠᤱ ᤁᤧᤖᤧᤰ ᤆᤢᤶᤍᤣᤱ ᤗᤠᤈᤣ᤹ᤜᤠ᤹ᤀᤥᤒᤠ ᤔᤏᤠᤜᤠ᤹ ᤋᤠᤓᤣ᤺ᤸᤗᤧ ᤔᤧᤔᤧᤰᤗᤥ॥

⁶ “ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤱᤗᤥ— ᤔᤡᤛᤪᤖᤧ ᤁᤧᤖᤧᤰ ᤁᤢᤈᤢᤶ ᤁᤢᤍᤣ᤺ᤱᤜᤠ᤹ ᤔᤧᤔᤧᤰᤗᤥ. ᤜᤧᤰᤁᤩᤠᤱ ᤂᤧᤸᤗᤧ ᤁᤢᤔᤢᤰᤛᤠᤶᤔᤡᤸᤗᤧ ᤁᤢᤀᤠᤱᤍᤡᤱ ᤏᤢᤵᤗᤥ॥ ᤌᤥ ᤔᤡᤃ᤻ᤍᤥᤗᤗᤠᤶ ᤕᤥ ᤀᤠᤛᤫᤠᤏ ᤌᤠᤖᤡᤰ ᤂᤧᤱᤜᤠ᤹ ᤁᤧᤖᤧᤰ ᤋᤠᤓᤣ᤺ᤸᤗᤧ ᤔᤧᤛᤧᤖᤢᤛᤡᤖᤥ. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤗᤥ॥

⁷ ᤔᤡᤛᤪ᤺ᤴ ᤆᤡᤈᤡ ᤂᤰᤂᤰᤐᤠ ᤗᤠᤈᤣ᤹ᤜᤠ᤹ᤖᤧ ᤁᤒᤪᤡᤱ ᤔᤧᤃᤒᤢᤒᤠ. ᤏᤡᤱᤘᤠ᤹ ᤔᤢᤍᤥᤂᤠᤶᤍᤥ ᤁᤧᤒᤥᤱᤒᤠ ᤐᤥᤱᤗᤥ. ᤜᤧᤰᤁᤩᤠᤱ ᤁᤸᤗᤧ ᤁᤢᤕᤧᤰᤕᤰᤜᤠ᤹ ᤂᤠᤵᤐᤢᤌᤩ᤺ᤱ ᤐᤥᤱᤗᤥ. ᤂᤠᤵᤐᤢᤌᤩ᤺ᤱ ᤁᤧᤒᤥᤱᤒᤠ ᤘᤣ᤹ ᤕᤧᤰᤕᤰᤜᤠ᤹ᤖᤧ ᤁᤒᤪᤡᤱ ᤔᤧᤃᤒᤢᤖᤥ॥

⁸ ᤜᤧᤰᤁᤩᤠᤱ ᤔᤡᤛᤪᤀᤥ ᤔᤡᤓᤠ᤺ᤳᤋᤪᤠ ᤁᤣ᤺ᤳᤋᤢᤱᤅᤠᤱ ᤕᤠᤰᤁᤡᤸᤗᤧ ᤂᤧᤸᤗᤧ ᤁᤧᤖᤧᤰ ᤁᤢᤴᤈᤢᤶᤜᤠ᤹ ᤔᤧᤰᤂᤢᤱᤛᤡᤱᤅᤠᤱ ᤘᤠ᤹ᤀᤡᤸᤗᤧ. ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤔᤡᤛᤪᤒᤠ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢᤖᤥ॥

⁹ ᤂᤧᤴ ᤕᤧᤴᤏᤥ ᤏᤡᤱᤘᤠ᤹ ᤁᤧᤍᤠᤒᤠᤀᤠᤱ ᤁᤧᤘᤠ᤹ᤒᤠ ᤁᤢᤛᤡᤜᤠ᤹ ᤕᤱᤔᤠ ᤛᤧᤵᤔᤠᤛᤡᤖᤧ ᤗᤠᤃᤡ ᤘᤠᤗᤠᤎᤠᤜᤠ᤹ᤀᤥ ᤁᤧᤈᤠᤵᤐᤠ ᤀᤡᤱᤛᤠᤒᤠᤜᤠ᤹ ᤐᤠᤱᤄᤢᤱᤛᤡᤱᤗᤥ॥ ᤔᤡᤛᤪ᤺ᤴ ᤂᤠᤵᤐᤢᤌᤩ᤺ᤱ ᤐᤥᤱᤔᤠ ᤏᤡ᤺ᤴᤎᤥ ᤁᤧᤒᤥᤱᤒᤠ ᤕᤧᤴᤏᤥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤛᤠ᤹ᤖᤡᤰ ᤕᤶᤒᤠ ᤋᤢᤰᤂᤣ ᤋᤠᤖᤥ॥ ᤂᤧᤏᤧ᤹ ᤁᤴ ᤀᤥᤔᤧᤳᤋᤧ᤹᥄ ᤁᤴ ᤛᤧᤰᤂᤠᤀᤣ ᤋᤠᤖᤥ᥄

¹⁰ “ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤱᤗᤥ— ᤒᤣᤒᤡᤗᤥᤏᤒᤠ ᤜᤠᤱ ᤏᤒᤢᤁᤍᤏᤣᤛᤖᤖᤧ ᤁᤢᤔᤢᤰᤛᤠᤶᤗᤠᤶ. ᤀᤠᤱᤃᤠ᤹ ᤔᤡᤛᤪᤒᤠ ᤌᤰᤛᤢᤒᤠ ᤛᤢᤶᤜᤠ᤹ ᤔᤧᤰᤂᤢᤱᤛᤡᤱᤗᤥ॥

¹¹ ᤂᤢᤏᤧ᤹ ᤏᤢ ᤂᤢᤏᤧ᤹ ᤁᤢᤎᤰᤛᤢᤒᤠᤜᤠ᤹ ᤜᤧᤰᤁᤩᤠᤱ ᤗᤠᤈᤣᤴ ᤔᤧᤱᤔᤠᤖᤧ ᤗᤠᤃᤡ ᤁᤧᤖᤧᤰᤏᤢ᤺ᤸᤗᤧ ᤁᤢ᤹ᤀᤡᤃᤧᤓᤧᤶᤒᤠᤜᤠ᤹ ᤔᤧᤒᤠᤱᤄᤢᤛᤡᤖᤥ॥ ᤔᤧᤛᤧᤖᤢᤛᤡᤒᤠ ᤔᤡᤛᤪᤒᤠᤜᤠ᤹ᤖᤧ ᤂᤠᤶᤒᤠᤱᤅᤡᤴ ᤔᤧᤴᤍᤧᤵᤐᤣ ᤌᤠᤖᤡᤰ ᤂᤧᤱᤜᤠ᤹ ᤔᤡᤛᤪᤖᤧ ᤁᤢᤍᤰᤗᤧᤱᤘᤠᤀᤥ ᤋᤧᤴᤎᤱ ᤔᤧᤈᤥᤰᤗᤥ॥

¹² ᤀᤠᤱᤃᤠ᤹ ᤏᤡᤗ ᤘᤜ᤺ᤱᤅᤡᤴ ᤆᤵᤐᤪᤧᤰ ᤆᤵᤋᤢᤖ ᤕᤠ᤺ᤴᤍᤢᤱᤗᤥ ᤜᤧᤰᤁᤩᤠᤱ ᤗᤠᤈᤣᤴ ᤋᤠᤰᤁᤧᤓᤧ᤹ᤒᤠ ᤔᤏᤠᤜᤠ᤹ᤀᤥ ᤛᤱᤄᤢᤱᤗᤥ॥ ᤘᤣ᤹ ᤗᤠᤈᤣ᤹ᤒᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥᤗᤠᤶ ᤀᤠᤱᤃᤠ᤹ ᤔᤡᤛᤪ ᤗᤠᤈᤣᤴ ᤏᤢ ᤁᤵᤔᤥᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤔᤧᤰᤂᤢᤱᤗᤥ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤴ ᤐᤠᤖᤠᤱᤅᤠᤱ ᤘᤠ᤹ᤖᤥ᥄

¹³ “ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤱᤗᤥ— ᤔᤡᤛᤪᤒᤠ ᤏᤠᤘᤠᤀᤡᤳᤗᤠᤜᤠ᤹ ᤏᤢ ᤏᤥᤐᤒᤠ ᤆᤀᤡ᤺ᤳᤜᤠ᤹ ᤀᤠᤱᤃᤠ᤹ ᤕᤓ᤹ ᤕᤓ᤹ ᤕ᤺ᤵᤛᤢᤱᤛᤡᤱᤗᤥ॥ ᤔᤡᤛᤪᤀᤥ ᤗᤳᤌᤡᤰᤁᤠᤱ ᤕᤢᤰᤛᤠᤒᤠ ᤔᤧᤴᤕᤠ᤺ᤰᤏᤧᤴᤗᤥ. ᤁᤡᤔᤠ ᤕᤱᤔᤧᤸᤗᤧ ᤗᤠᤈᤣᤴ ᤂᤡᤍᤢ᤺ᤰ ᤋᤢᤃᤢᤍᤣᤛᤢᤖᤥ॥

¹⁴ ᤀᤠᤱᤃᤠ᤹ ᤔᤡᤛᤪᤒᤠ ᤐᤠᤌᤪᤥᤛᤧᤴ ᤔᤧᤰᤂᤢᤱᤗᤥ. ᤀᤠᤱᤃᤠ᤹ ᤛᤥᤀᤏᤀᤥ ᤔᤡᤓᤠ᤺ᤳᤋᤪᤠ ᤁᤣ᤺ᤳᤋᤢᤱᤗᤥ. ᤜᤧᤰᤁᤩᤠᤱ ᤌᤣᤒᤣᤛ ᤕᤧᤰᤕᤰᤁᤡᤴ ᤂᤢᤶᤍᤡᤱ ᤐᤡᤖᤢᤱᤗᤥ॥

¹⁵ ᤔᤡᤛᤪᤒᤠ ᤛᤠ᤹ᤖᤡᤰ ᤁᤧᤎᤢᤶᤒᤠ ᤜᤠᤱᤕᤰ ᤐᤣᤗᤢᤛᤡᤕᤔᤀᤥ ᤀᤠᤱᤃᤠ᤹ ᤛᤠ᤹ᤖᤡᤰ ᤀᤠᤛᤡᤰ ᤐᤥ᤺ᤰᤔᤠᤴ ᤌᤠᤛᤢᤱᤗᤥ॥ ᤜᤧᤰᤁᤩᤠᤱ ᤌᤣᤒᤣᤛᤒᤠ ᤌᤰᤛᤢᤒᤠ ᤛᤢᤶᤜᤠ᤹ ᤋᤥ᤹ᤖᤢᤱᤛᤡᤱᤗᤥ॥

¹⁶ ᤀᤥᤘᤠ. ᤀᤠᤱᤃᤠ᤹ ᤔᤡᤛᤪᤀᤥ ᤁᤧᤖᤧᤰ ᤑᤠ᤺ᤳᤋᤪᤠ ᤁᤣ᤺ᤳᤋᤢᤱᤗᤥ᥄ ᤐᤣᤗᤢᤛᤡᤕᤔᤡᤴ ᤛᤠ᤹ᤖᤡᤰ ᤋᤢᤰᤔᤧᤸᤗᤧ ᤕᤠ᤺ᤴᤍᤢᤖᤥ. ᤌᤣᤒᤣᤛᤧᤴ ᤐᤢᤖᤢ᤺ᤱ ᤐᤢᤖᤢ᤺ᤱ ᤔᤧᤎᤢᤵᤛᤢ ᤔᤧᤗᤢ᤺ᤴᤍᤢᤖᤥ. ᤏᤥᤐᤧᤴ ᤆᤰᤔᤧᤸᤗ᤹ᤔᤏᤠᤒᤠ ᤁᤡᤔᤠ ᤕᤱᤔᤠᤀᤥ ᤌᤠᤖᤥ॥

¹⁷ ᤜᤣᤗᤡᤀᤥᤐᤥᤗᤡᤛ ᤏᤢ ᤒᤢᤒᤠᤛ᤻ᤋᤡᤛ ᤕᤧᤰᤕᤰᤐᤠ ᤏᤠᤗᤡᤃᤧᤴ ᤌᤠᤱᤒᤧᤴᤜᤠ᤹ ᤋᤧᤴᤎᤱᤅᤥ ᤔᤧᤛᤡᤖᤥ. ᤜᤧᤰᤁᤩᤠᤱ ᤔᤧᤴᤇᤢᤔᤠᤜᤠ᤹ ᤕᤥ᤺ᤃ᤻ᤔᤠ ᤆᤥ᤺ᤰᤛᤧ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤖᤥ॥

¹⁸ ᤀᤠᤱᤃᤠ᤹ ᤔᤡᤛᤪᤖᤧ ᤁᤧᤎᤢᤶᤒᤠ ᤁᤢᤜᤧᤴᤇᤡᤱᤔᤧᤴ ᤔᤧᤱᤛᤧ ᤋᤠᤀᤠᤸᤗᤧ. ᤋᤜᤐᤏᤣᤛᤖᤧ ᤁᤢᤗᤠᤃᤡᤀᤠᤱ ᤁᤴ ᤂᤠᤔᤠᤰᤔᤠ ᤕᤧᤴ ᤐᤥᤱᤗᤥ॥ ᤔᤠᤰᤛ᤻ᤍᤡ᤺ᤱᤃᤩᤠ᤺ᤵᤐᤠ ᤂᤠ᤹ᤔᤡ᤺ᤳᤋᤡᤸᤗᤧ ᤋᤜᤐᤏᤣᤛᤧᤴ ᤋᤧᤵᤋᤢᤖᤥ. ᤜᤧᤰᤁᤩᤠᤱ ᤁᤵᤔᤥᤒᤠ ᤔᤧᤴᤇᤢᤔᤠ ᤛᤠᤜᤠ᤹ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤖᤥ॥

¹⁹ ᤜᤧᤰᤁᤣᤗ᤹ᤖᤡᤰ ᤀᤠᤱᤃᤠ᤹ ᤔᤡᤛᤪ᤺ᤴ ᤕᤶᤒᤠ ᤂᤢᤶᤍᤡᤱ ᤐᤡᤖᤢᤱᤗᤥ. ᤂᤧᤒᤩᤠᤱ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢᤖᤥ॥”

ᤔᤡᤛᤪ ᤗᤠᤈᤣ᤹ᤒᤠ ᤜᤠᤱᤅᤡᤸᤗᤧ ᤁᤢᤔᤢᤰᤛᤠᤶᤔᤡᤴ ᤔᤠᤳ

²⁰ ᤕᤜᤥᤕᤠᤁᤡᤏ ᤜᤠᤱᤅᤡᤴ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤒᤠ ᤌᤡᤒᤥᤱᤅᤠᤱ ᤌᤡᤰᤛᤡᤃᤣᤰᤐᤠ ᤋᤱᤒᤣ ᤌᤡᤰᤛᤡᤃᤣᤰᤐᤠ ᤗᤠ ᤏᤢᤛᤡᤃᤣᤰᤐᤠ ᤕᤧᤴᤏᤥ ᤕᤜᤘᤣ ᤍᤠᤱᤒᤠᤗᤠᤶ ᤁᤴ ᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤁᤧᤖᤧ—

²¹ “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤀᤠᤱᤃᤠ᤹ ᤔᤡᤛᤪᤒᤠ ᤜᤠᤱ ᤑᤠᤖᤥᤸᤗᤧ ᤁᤢᤜᤢᤰᤁᤡᤴ ᤀᤧᤰᤂᤢᤱ ᤐᤡᤖᤢᤱᤅᤠᤱ ᤘᤠ᤹॥ ᤜᤧᤰᤁᤣᤗ᤹ᤖᤡᤰ ᤂᤧᤴ ᤁᤢᤜᤢᤰᤁᤡᤴ ᤘᤣ᤺ᤵᤔᤠ ᤛᤢᤰᤗ ᤑᤠ᤹ᤀᤠᤱ ᤗᤳᤇᤠ ᤁᤢᤃᤡᤵᤔᤠᤀᤠᤱ ᤔᤧᤶᤓᤴᤏᤣ ᤐᤳ॥ ᤋᤠᤓᤣ ᤐᤱᤔᤠ ᤁᤧᤛᤢᤰᤐᤠ ᤆᤥ᤺ᤰᤔᤠᤖᤧ ᤗᤠᤃᤡ ᤁᤠ᤺ᤶᤒᤪᤥᤀᤠᤱ ᤔᤧᤱᤄᤣ᤺ᤱᤅᤣ ᤐᤳ॥

²² ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤱ᤹—ᤀᤠᤱᤃᤠ᤹ᤃ ᤔᤡᤛᤪᤒᤠ ᤜᤠᤱ ᤑᤠᤖᤥᤸᤗᤧ ᤁᤢᤏᤡᤱᤔᤡᤀᤠ᥄ ᤀᤠᤱᤃᤠ᤹ ᤂᤧᤸᤗᤧ ᤏᤢᤒᤠ ᤁᤢᤜᤢᤰᤁᤡᤴᤏᤢ ᤛᤥᤛᤥᤖᤡᤰ ᤏᤧᤵᤔᤠᤱ ᤁᤢᤜᤢᤰᤜᤠ᤹ ᤀᤧᤰᤂᤢᤱ ᤐᤡᤖᤢᤱ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤸᤗᤧ ᤁᤢᤍᤠᤓᤣᤴ ᤂᤠᤶᤒᤠᤱᤅᤥ ᤂᤡᤴᤍᤪᤡᤱ ᤂᤡᤴᤍᤪᤡᤱ ᤗ᤹ᤀᤠᤱ ᤏᤧᤖ ᤆᤥᤃᤢᤱ᤹॥

²³ ᤀᤠᤱᤃᤠ᤹ ᤔᤡᤛᤪᤡᤒᤠ ᤔᤏᤠᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤕᤖᤡᤰ ᤗᤠᤈᤣ᤹ᤜᤠ᤹ᤀᤥ ᤁᤧᤖᤧᤰ ᤐᤡᤛᤠᤱ ᤑᤢᤳᤇᤡᤱᤈᤩᤠᤱ ᤛᤧᤛᤢᤱᤍᤣᤛᤢᤱᤛᤡᤱ᤹॥

²⁴ ᤀᤠᤱᤃᤠ᤹ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤁᤢᤜᤢᤰᤜᤠ᤹ ᤁᤧᤎᤢᤶᤒᤠ ᤆᤥᤃᤢᤱ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤍᤠᤓᤣᤴ ᤂᤧᤸᤗᤧ ᤁᤢᤜᤢᤰᤁᤥ ᤁᤣ᤺ᤳᤋᤢᤱ᤹॥ ᤁᤖ ᤀᤠᤱᤃᤠ᤹ ᤔᤡᤛᤪᤒᤠ ᤜᤠᤱ ᤑᤠᤖᤥᤸᤗᤧ ᤁᤢᤜᤢᤰᤜᤠ᤹ ᤀᤧᤰᤂᤢᤱ ᤐᤡᤖᤢᤱ᤹. ᤂᤧᤶᤒᤩᤠᤱ ᤂᤢᤏᤧ᤹ ᤂᤧᤵᤔᤥ ᤛᤡᤔᤠᤗᤡᤱᤍᤥ ᤁᤧᤳᤗ ᤌᤠᤖᤡᤰ ᤁᤠ᤺ᤴᤏᤠᤱ ᤋᤢᤰᤔᤧᤸᤗᤧ ᤀᤠᤀᤡᤕᤠᤀᤠᤱ ᤀᤠᤀᤡᤕᤠ ᤕᤠ᤺ᤳᤗ ᤏᤧᤖᤥ॥

²⁵ ᤑᤠᤖᤥᤸᤗᤧ ᤁᤢᤜᤢᤰᤜᤠ᤹ ᤔᤰᤌᤠᤀᤠᤱ ᤂᤢᤏᤧ᤹ ᤁᤢᤒᤣᤛᤠᤱ ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤐᤥᤱᤅᤠᤱᤏᤧ᤺ᤸᤗᤧ. ᤀᤠᤱᤃᤠ᤹ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤁᤢᤜᤢᤰᤜᤠ᤹ ᤁᤧᤎᤢᤶᤒᤠ ᤆᤥᤃᤢᤱ ᤐᤡᤖᤢᤱ᤹॥ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤍᤠᤓᤣᤴ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤁᤢᤜᤢᤰᤁᤥ ᤁᤣ᤺ᤳᤋᤢᤱ ᤐᤡᤖᤢᤱᤅᤠᤱ ᤂᤢᤏᤧ᤹ ᤔᤡᤛᤪ ᤗᤠᤈᤣ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤁᤴ ᤑᤧᤳᤋᤢᤀᤠᤱ ᤑᤧᤴᤏᤡᤸᤗᤧ. ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠ ᤑᤠ᤹ᤀᤠᤱ ᤔᤡᤛᤪ ᤗᤠᤈᤣ᤺ᤸᤗᤧ ᤏᤡᤱᤘᤠ᤹ ᤂᤥᤛᤢ᤹॥

²⁶ ᤀᤠᤱᤃᤠ᤹ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤔᤡᤛᤪᤒᤠ ᤔᤏᤠᤜᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤖᤧᤰ ᤐᤡᤛᤠᤱ ᤑᤢᤳᤇᤡᤱᤈᤩᤠ᤺ᤱ ᤛᤧᤛᤢᤱᤍᤣᤛᤢᤱᤛᤡᤱ᤹॥ ᤂᤧᤒᤩᤠᤱ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢᤖᤥ॥”