ᤀᤡᤈᤁᤡᤀᤣᤗ 3 - LIFOTNT

¹ ᤂᤢᤏᤧ᤹ ᤔᤧᤳᤋᤠᤱ. “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤏᤠᤀᤣ. ᤀᤠᤱᤃᤠ᤹ ᤁᤴ ᤐᤡᤏᤧᤖ ᤐᤳᤋᤠᤒᤠ ᤛᤠᤵᤗᤠᤌᤱᤔᤠᤴ ᤆᤩᤧ᤹᥄ ᤂᤧᤒᤩᤠᤱ ᤂᤧᤏᤧ᤹ ᤐᤣᤃᤧ᤹ᤀᤠᤱ ᤁ᤹ᤕᤥ ᤁᤧᤒᤵᤐᤠ ᤐᤠ᤺ᤴᤈᤠ᤺ᤰᤁᤡᤴ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤔᤧᤳᤋᤧᤛᤧ᤹॥”

² ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤶᤒᤪᤠᤴ ᤜᤠ ᤔᤧᤳᤋᤢᤱ. ᤜᤧᤰᤁᤩᤠᤱ ᤂᤢᤏᤧ᤹ ᤀᤠᤱᤃᤠ᤹ ᤂᤧᤴ ᤛᤠᤵᤗᤠᤌᤱᤔᤠᤴ ᤆᤠᤔᤠ ᤐᤡᤖᤠᤱ॥

³ ᤂᤢᤏᤧ᤹ ᤔᤧᤳᤋᤠᤱ. “ᤁᤸᤗᤧ ᤂᤧᤏᤧ᤹ ᤁᤧᤛᤠᤵᤐᤥ᤺ᤰᤁᤧᤴ ᤌᤡᤶᤛᤧ᤹॥” ᤜᤧᤰᤁᤩᤠᤱ ᤀᤠᤱᤃᤠ᤹ ᤁᤴ ᤆᤠᤱᤅᤡᤸᤗᤧ ᤀᤠᤶᤒᤪᤠᤀᤥ ᤛᤰᤘᤠᤄᤢ ᤜᤧᤰᤁᤣ ᤐᤗᤡᤶᤗᤡᤶᤍᤧ॥

⁴ ᤂᤧᤒᤩᤠᤱ ᤂᤢᤏᤧ᤹ ᤔᤧᤳᤋᤠᤱ. “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤏᤠᤀᤣ. ᤂᤧᤏᤧ᤹ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ᤀᤥ ᤐᤣᤃᤧ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤀᤡᤱᤄᤱᤜᤠ᤹ ᤂᤧᤱᤜᤠ᤹ ᤔᤧᤳᤋᤧᤛᤧ᤹॥

⁵ ᤂᤢᤴᤇᤡ᤹ ᤐᤠ᤺ᤴᤍᤠᤱᤅᤡᤴᤏᤣ ᤁᤢᤛᤡᤱ ᤏᤡ᤺ᤵᤔᤠ ᤁᤧᤴᤇᤢᤰᤋᤢᤴᤒᤠ ᤘᤣ᤹ ᤗᤠᤈᤣ᤹ᤒᤠ ᤔᤏᤠᤜᤠ᤹ᤀᤥ ᤂᤧᤏᤧ᤹ ᤐᤠᤱᤏᤧᤍᤣᤏᤧᤖ ᤔᤧᤒᤳᤏᤧᤴ᤹. ᤁᤖ ᤂᤧᤏᤧ᤹ ᤀᤡᤛᤪᤠᤀᤡᤗᤡ ᤜᤡᤶᤛᤕᤱᤜᤠ᤹ᤀᤥ ᤐᤠᤱᤏᤧᤖ ᤐᤳᤋᤠ॥

⁶ ᤔᤣ᤺ᤴ. ᤁᤢᤛᤡᤱ ᤏᤡ᤺ᤵᤔᤠ ᤁᤧᤛᤠᤰᤐᤠ ᤏᤢ ᤗᤧᤔᤧᤴᤍᤧᤵᤔᤏᤠᤒᤠ ᤐᤠ᤺ᤴᤍᤠᤱ ᤁᤧᤒᤠ᤺ᤵᤐᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤀᤥ ᤂᤧᤏᤧ᤹ ᤐᤠᤱᤏᤧᤖ ᤔᤧᤒᤳᤋᤠᤴ॥ ᤀᤠᤱᤃᤠ᤹ ᤜᤧᤰᤁᤣ ᤆᤥᤃᤢᤱᤒᤠ ᤜᤧᤰᤁᤣ᤺ᤸᤗᤧ. ᤂᤧᤱᤜᤠ᤹ᤖᤧ ᤔᤧᤄᤧᤵᤛᤢᤒᤠ ᤘᤕᤧᤔᤧᤴ᥄

⁷ ᤁᤖ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ᤖᤧ ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴᤏᤣ ᤔᤧᤱᤄᤧᤵᤛᤢᤴᤏᤡᤸᤗᤧ ᤂᤧᤏᤧ᤹ ᤁᤧᤒᤠ᤺ᤴᤏᤡᤴ ᤂᤧᤱᤜᤠ᤹ᤖᤧ ᤔᤧᤱᤄᤧᤵᤛᤢᤴ᤹᥄ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤁᤧᤖᤧᤰ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠ ᤏᤢ ᤐᤠᤴ ᤔᤧᤱᤄᤧᤶᤔᤏᤠᤒᤠ ᤔᤧᤘᤠ᤹॥

⁸ ᤁᤖ ᤀᤥᤔᤧᤳᤋᤧ᤹. ᤀᤠᤱᤃᤠ᤹ ᤂᤧᤏᤧ᤹ ᤂᤧᤱᤜᤠ᤹ ᤜᤧᤰᤁᤣᤀᤣ ᤜᤠᤍᤡᤱ ᤁᤧᤎᤰᤐᤠ ᤏᤢ ᤁᤢᤏᤠᤖᤠ ᤛᤡᤖᤣ᤺ᤵ ᤔᤧᤸᤗ᤹ᤔᤏᤠᤒᤠ ᤆᤥ᤺ᤰᤏᤧᤀᤠᤱ ᤘᤠ᤹॥

⁹ ᤀᤠᤱᤃᤠ᤹ ᤂᤧᤏᤧ᤹ ᤁᤧᤍᤫᤠᤒᤧᤴ ᤕᤠᤰᤐᤣ᤹ᤏᤢ᤺ᤸᤗᤧᤀᤠᤱ ᤐᤛᤠᤰᤁᤧᤛᤠᤰᤐᤠ ᤆᤥᤃᤢᤱ ᤐᤡᤏᤧᤀᤠᤱ ᤐᤳ᥄ ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ ᤐᤡᤑᤩᤢᤱᤒᤠᤛᤡᤛᤠᤱ ᤁᤧᤏᤡᤛᤢᤛᤡᤸᤗᤧ ᤂᤧᤱᤜᤠ᤹ᤏᤢ ᤔᤧᤃᤡᤛᤧᤴᤏᤧ᤹॥”

¹⁰ ᤂᤧᤒᤩᤠᤱ ᤂᤢᤏᤧ᤹ ᤕᤠᤶᤔᤥ ᤕᤥ᤹ᤖᤢ. “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤏᤠᤀᤣ. ᤀᤠᤱᤃᤠ᤹ ᤔᤧᤳᤏᤧᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤂᤧᤵᤛᤧ᤹ ᤜᤧᤰᤁᤩᤠᤱ ᤏᤡᤱᤘᤠ᤹ᤀᤥ ᤕᤢᤰᤂᤧ᤹॥

¹¹ ᤂᤧᤒᤩᤠᤱ ᤗᤠᤈᤣ᤹ᤗᤠᤶᤒᤠ ᤔᤧᤗ᤺ᤳᤋᤢ ᤔᤧᤍᤣᤛᤢᤛᤡᤒᤠ ᤁᤧᤗᤠᤈᤣ᤹ᤛᤠᤒᤠᤜᤠ᤹ᤀᤥ ᤐᤣᤃᤧ᤹ ᤜᤧᤰᤁᤩᤠᤱ ᤀᤰᤂᤣ ᤔᤧᤳᤋᤧᤛᤧ᤹. ‘ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹᥄’ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤁᤧᤒᤠ᤺ᤴᤏᤡᤴ ᤔᤧᤄᤧᤵᤛᤢᤛᤠᤱ ᤔᤧᤱᤄᤧᤵᤛᤢᤴᤇᤠᤱ ᤂᤧᤴ ᤂᤧᤱᤜᤠ᤹ ᤔᤧᤳᤋᤧᤛᤧ᤹॥”

¹² ᤂᤧᤴ ᤀᤣᤃᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠᤶᤛᤠᤶᤔᤡᤸᤗᤧ ᤀᤠᤱᤃᤠ᤹ ᤌᤠ᤺ᤱ ᤗᤧᤵᤔᤠᤱ ᤐᤰᤂᤠᤱ. ᤜᤧᤰᤁᤩᤠᤱ ᤀᤠᤀᤣᤃᤠᤱ ᤗᤠᤶᤒᤠ ᤁᤢᤍᤢᤱᤍᤢᤱ ᤁᤧᤗ᤹ᤒᤠ ᤕᤶᤒᤠ ᤀᤡᤰᤗᤠᤎᤡᤰ ᤂᤧᤵᤛᤢᤱ॥ (ᤂᤢᤏᤧ᤹ ᤁᤢᤕᤢᤰᤏᤠᤍᤧᤴᤏᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤔᤡᤍᤡᤱᤸᤗᤧ ᤁᤢᤏᤠᤖᤠ ᤑᤥᤛᤧᤶᤔᤧ᤹ᤀᤥ᥄)

¹³ ᤁᤱᤃ ᤂᤧᤴ ᤁᤢᤜᤡᤱᤘᤧᤳ ᤏᤠᤘᤠᤃᤧᤴ ᤆᤀᤡ᤺ᤳᤜᤠ᤹ᤖᤧ ᤂᤢᤴᤇᤡ᤹ ᤗᤠᤵᤜᤠ᤹ ᤌᤡᤰᤏᤢ ᤘᤣ᤹ᤀᤡᤴ ᤀᤡ᤹ᤛᤡᤱᤒᤠ ᤏᤢ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤡ᤺ᤰᤋᤥ ᤁᤠᤵᤗᤥ᤺ᤰᤜᤠ᤹ ᤌᤢᤖᤢᤵᤗᤢᤵ ᤗ᤹ᤖᤡᤰ ᤗᤠᤀᤡᤰᤋᤧᤒᤠ ᤀᤡᤰᤗᤠ ᤘᤕᤧ॥

¹⁴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠᤶᤛᤠᤶᤔᤡᤸᤗᤧ ᤀᤠᤱᤃᤠ᤹ ᤌᤠ᤺ᤱ ᤐᤰᤂᤠᤱᤅᤠᤱ ᤔᤠ᤺ᤱᤄᤠ ᤋᤣ᤹ᤖᤠᤱ॥ ᤀᤠᤱᤃᤠ᤹ ᤀᤠᤏᤡᤱᤘᤠ᤹ ᤔᤧᤴᤍᤠᤀᤣ ᤏᤢ ᤁᤧᤛᤠᤰᤐᤠ ᤋᤢᤔᤢᤱᤗ ᤐᤣᤃᤠᤱ. ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤢᤰᤁᤡᤴ ᤀᤠᤱᤃᤠ᤹ ᤀᤠᤛᤶᤎᤠᤱ ᤐᤳᤇᤧ॥

¹⁵ ᤂᤧᤒᤩᤠᤱ ᤁᤒᤠᤖ ᤘᤜ᤺ᤱᤅᤡᤸᤗᤧ ᤁᤢᤒᤣᤛᤠᤱ. ᤗᤠᤈᤣ᤹ᤗᤠᤶᤒᤠ ᤔᤧᤗ᤺ᤳᤋᤢ ᤔᤧᤍᤣᤛᤢᤛᤡᤒᤠ ᤕᤜᤢᤍᤠᤒᤠ ᤔᤏᤠᤜᤠ᤹ ᤔᤧᤕᤢᤅᤧᤒᤠᤍᤧᤴ ᤋᤣᤗ-ᤀᤒᤡᤒᤀᤥ ᤋᤩᤠᤱ॥ ᤀᤠᤱᤃᤠ᤹ ᤀᤠᤏᤡᤱᤘᤠ᤹ ᤐᤅᤧᤀᤠᤱ ᤘᤕᤠᤱ ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤱᤜᤠ᤹ᤏᤢ ᤏᤢᤛᤡ ᤕᤧᤴ ᤌᤠᤖᤡᤰ ᤕᤢᤅᤠᤱᤗᤥ॥

ᤀᤡᤛᤪᤠᤀᤡᤗᤡᤜᤠ᤹ ᤛᤠᤶᤍᤡᤱ

¹⁶ ᤏᤢᤛᤡ ᤕᤧᤴ ᤀᤣᤃᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤁᤧᤖᤧ॥ ᤂᤢᤏᤧ᤹ ᤔᤧᤳᤋᤠᤱ.

¹⁷ “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤏᤠᤀᤣ. ᤀᤠᤱᤃᤠ᤹ ᤂᤧᤏᤧ᤹ ᤀᤡᤛᤪᤠᤀᤡᤗᤡ ᤛᤢᤘᤠᤱᤜᤠ᤹ ᤀᤥᤃᤧᤔᤧᤵᤐᤠ ᤆᤥ᤺ᤰᤏᤧᤀᤠᤱ ᤘᤠ᤹॥ ᤀᤠᤵᤑᤠᤸᤗᤧᤛᤠᤱ ᤀᤠᤱᤃᤠ᤹ᤗᤠᤶ ᤂᤧᤏᤧ᤹ᤀᤥ ᤀᤡᤱᤄᤱ ᤁᤧᤳᤋᤡᤸᤗᤧ ᤂᤧᤏᤧ᤹ ᤂᤡᤔᤥ ᤔᤏᤠᤜᤠ᤹ ᤛᤠᤶᤍᤡᤱ ᤐᤡᤖᤧᤛᤧ᤹॥

¹⁸ ᤀᤠᤱᤃᤠ᤹ ᤋᤠᤰᤁᤧᤓᤧ᤹ᤒᤠ ᤔᤏᤠᤴ ᤀᤰᤂᤣ ᤔᤧᤳᤋᤢᤱ᤹. ‘ᤂᤧᤏᤧ᤹ ᤛᤡᤔᤧᤸᤗᤧ ᤂᤢᤶᤍᤡᤱᤅᤥ ᤁᤧᤎᤩᤧᤀᤠᤱ ᤁᤧᤘᤠ᤹’ ᤁᤖ ᤂᤧᤏᤧ᤹ ᤂᤧᤴ ᤛᤠᤶᤍᤡᤱ ᤁᤧᤶᤒᤡᤖᤢᤴ᤹. ᤂᤧᤱᤜᤠ᤹ ᤂᤢᤴᤇᤡ᤹ ᤗᤠᤕᤥᤀᤥᤀᤣ ᤔᤧᤛᤡᤖᤥ॥ ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤡᤔᤠᤀᤥ ᤂᤧᤏᤧ᤹ ᤁᤧᤎᤠᤖ ᤕᤠ᤺ᤴᤏᤧᤖᤥ॥

¹⁹ ᤁᤖ ᤂᤧᤏᤧ᤹ ᤂᤧᤱᤜᤠ᤹ ᤛᤠᤶᤍᤡᤱ ᤁᤧᤒᤡᤖᤢᤛᤡᤛᤠᤱ ᤗᤠᤕᤥᤗᤠᤶ ᤜᤡᤶᤔᤠ ᤔᤧᤴᤍᤧᤴᤏᤧᤴ ᤜᤧᤰᤁᤩᤠᤱ ᤆᤰᤔᤧᤸᤗ᤹ᤀᤣ ᤗᤠᤕᤥ ᤔᤧᤈᤥᤃᤢᤀᤠᤱ ᤔᤧᤒᤳᤏᤧᤓᤃᤪ. ᤂᤧᤱᤜᤠ᤹ ᤂᤢᤴᤇᤡ᤹ ᤗᤠᤕᤥᤀᤥ ᤔᤧᤛᤡᤖᤥ॥ ᤁᤖ ᤂᤧᤏᤧ᤹ᤃ ᤀᤠᤵᤑᤣᤰ ᤁᤧᤛᤧ᤺ᤵᤛᤡᤱ᤹ ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤀᤠᤱᤃᤠ᤹ ᤀᤠᤀᤡᤱᤈᤠᤱᤅᤡᤴ ᤁᤧᤄᤧᤵᤛᤢ॥

²⁰ “ᤛᤠᤶᤕᤥᤒᤠ ᤔᤏᤠᤜᤠ᤹ ᤂᤢᤴᤇᤡ᤹ ᤛᤠᤶᤕᤥᤒᤠ ᤕᤠ᤺ᤶᤒᤰᤜᤠ᤹ᤗᤠᤶ ᤔᤧᤏᤢ᤺ᤱ ᤔᤧᤒᤣ᤺ᤰ ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤔᤥ ᤏᤧᤛ᤻ᤛᤢᤱᤒᤠ ᤀᤠᤄᤄᤒᤠ ᤐᤠ᤺ᤴᤜᤠ᤹ ᤏᤡᤏᤡ ᤔᤧᤸᤗᤠᤵᤋᤢᤴᤏᤧᤓᤃᤪ. ᤂᤧᤱᤜᤠ᤹ ᤔᤧᤛᤡᤖᤥ॥ ᤂᤧᤒᤩᤠᤱ ᤂᤧᤏᤧ᤹ ᤂᤧᤱᤜᤠ᤹ ᤛᤠᤶᤍᤡᤱ ᤁᤧᤶᤒᤡᤖᤢᤛᤡᤴᤏᤧᤓᤃᤪ. ᤂᤧᤱᤜᤠ᤹ ᤂᤢᤴᤇᤡ᤹ ᤗᤠᤕᤥᤀᤥ ᤔᤧᤛᤡᤖᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤠᤳᤋᤡᤴ ᤛᤠᤶᤕᤥᤒᤠ ᤕᤠ᤺ᤶᤒᤰᤜᤠ᤹ᤀᤠᤱ ᤏᤡᤱᤘᤠ᤹ᤛᤢᤶ ᤔᤧᤒᤥᤱᤏᤧᤴ. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤡᤔᤠᤀᤥ ᤂᤧᤏᤧ᤹ ᤁᤧᤎᤠᤖ ᤕᤠ᤺ᤴᤏᤧᤖᤥ॥

²¹ ᤁᤖ ᤂᤧᤏᤧ᤹ ᤛᤠᤶᤕᤥᤒᤠ ᤔᤏᤠᤜᤠ᤹ ᤗᤠᤕᤥ ᤔᤧᤴᤈᤥ᤺ᤰᤔᤠ ᤛᤠᤶᤍᤡᤱ ᤁᤧᤒᤡᤖᤢᤛᤡ᤹ ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤁᤧᤒᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤗᤠᤕᤥ ᤆᤥ᤺ᤰᤔᤠ ᤔᤧᤗᤧᤖᤢᤏᤧᤓᤃᤪ. ᤂᤧᤱᤜᤠ᤹ ᤔᤧᤜᤡᤱ᤹. ᤜᤧᤰᤁᤩᤠᤱ ᤂᤧᤏᤧ᤹ ᤀᤠᤵᤑᤣᤰᤁᤠᤱ ᤋᤠᤱᤁᤣᤛᤧ᤺ᤵᤛᤡᤱᤗᤥ॥”

²² ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤢᤰᤁᤡᤴ ᤀᤠᤱᤃᤠ᤹ ᤀᤠᤛᤶᤎᤠᤱ ᤐᤳᤇᤧ ᤜᤧᤰᤁᤩᤠᤱ ᤂᤢᤏᤧ᤹ ᤔᤧᤳᤋᤠᤱ. “ᤐᤥᤃᤧ᤹ ᤜᤧᤰᤁᤩᤠᤱ ᤏᤧᤏᤧᤒᤠᤍᤧᤴᤏᤥ ᤐᤣᤃᤧ᤹. ᤀᤠᤱᤃᤠ᤹ ᤂᤧᤵᤔᤥ ᤂᤧᤏᤧ᤹ᤏᤢ ᤋᤠ᤹ᤈᤧᤱᤅᤠ॥”

²³ ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤐᤥᤃᤠᤱᤅᤠᤱ ᤐᤣᤃᤠᤱ. ᤂᤶᤓᤩᤠᤱ ᤁᤒᤠᤖ ᤘᤜ᤺ᤱᤅᤡᤸᤗᤧ ᤁᤢᤒᤣᤛᤠᤱ ᤋᤃᤡ ᤏᤡᤛᤢᤱᤒᤠ ᤛᤢᤑᤥ ᤜᤧᤰᤁᤣ ᤀᤠᤱᤃᤠ᤹ ᤂᤧᤵᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤔᤡᤍᤡᤱᤅᤡᤴ ᤏᤡᤛᤢᤱ॥ ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤠᤶᤒᤠᤱᤅᤥ ᤛᤠᤶᤒᤥᤴ ᤜᤒᤳ ᤑᤴᤇᤡᤱᤅᤠᤱ॥

²⁴ ᤂᤧᤒᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠᤶᤛᤠᤶᤔᤡᤴ ᤀᤠᤱᤃᤠ᤹ᤀᤥ ᤕᤧ ᤜᤧᤰᤁᤩᤠᤱ ᤀᤠᤱᤃᤠ᤹ ᤋᤰᤐᤧᤳ ᤕᤧᤵᤛᤠᤱ॥ ᤂᤢᤏᤧ᤹ ᤀᤠᤱᤃᤠ᤹ᤏᤢ ᤐᤠᤖᤧᤀᤠᤱ ᤔᤧᤳᤋᤠᤱ. “ᤁᤧᤜᤡᤶᤔᤥ ᤐᤣᤃᤧ᤹. ᤜᤧᤰᤁᤩᤠᤱ ᤀᤠᤵᤑᤣᤰ ᤛᤠᤰᤛᤡᤱᤅᤧ᤹ᤀᤠᤱ ᤕᤢᤅᤧ᤹॥

²⁵ ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤏᤠᤀᤣ. ᤂᤧᤏᤧ᤹ ᤂᤧᤵᤔᤥ ᤀᤡᤍᤠ᤺ᤰᤜᤠ᤹ᤖᤧ ᤁᤧᤶᤄᤣ᤺ᤱ᤹ ᤂᤧᤸᤗᤧᤆᤥᤃᤢᤸᤗᤧ ᤂᤧᤏᤧ᤹ ᤔᤏᤠᤜᤠ᤹ᤀᤥ ᤐᤣ᤺ᤰᤔᤠ ᤁᤧᤴᤇᤢᤰᤏᤧᤴ॥

²⁶ ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤏᤧ᤹ ᤁᤧᤸᤛᤥ᤺ᤵᤐᤠᤴ ᤁᤧᤄᤠ᤺ᤶᤍᤠ᤺ᤰᤔᤥ ᤂᤡᤵᤋᤢᤀᤠᤱ ᤐᤳᤗ ᤆᤥᤃᤢᤱ᤹ ᤜᤧᤰᤁᤣᤗ᤹ᤖᤡᤰ ᤂᤧᤏᤧ᤹ ᤔᤧᤶᤒᤠ᤺ᤵᤔᤏᤠᤒᤠ ᤏᤢ ᤂᤧᤱᤜᤠ᤹ ᤑᤧ᤺ᤰᤔᤠᤛᤡ ᤔᤧᤴᤇᤢᤰᤔᤏᤠᤒᤠ ᤁᤧᤒᤥᤱ᤹. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤐᤡᤑᤩᤢᤱᤒᤠ ᤔᤧᤈᤥᤰ॥

²⁷ ᤁᤖ ᤀᤠᤱᤃᤠ᤹ ᤀᤠᤀᤡᤱᤄᤱᤅᤡᤴ ᤂᤧᤏᤧ᤹ᤀᤥ ᤁᤧᤳᤋᤡᤸᤗᤧ. ᤀᤠᤱᤃᤠ᤹ ᤂᤧᤏᤧ᤹ ᤁᤧᤸᤛᤥ᤺ᤵᤐᤠᤴ ᤑᤠ᤺ᤰᤂᤢᤱ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤏᤧ᤹ ᤁᤧᤒᤠ᤺ᤳᤗ ᤕᤠ᤺ᤴᤏᤧ॥ ᤂᤧᤒᤩᤠᤱ ᤂᤧᤏᤧ᤹ ᤂᤧᤱᤜᤠ᤹ ᤀᤰᤂᤣ ᤁᤧᤔᤧᤳᤋᤢᤛᤡ᤹. ‘ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹᥄’ ᤀᤠᤳᤋᤡᤴᤜᤠ᤹ᤖᤧ ᤂᤧᤶᤔᤠ ᤏᤡᤱᤘᤠ᤹ ᤔᤧᤈᤥᤃᤢ᤹ ᤂᤧᤱᤜᤠ᤹ᤖᤧ ᤔᤧᤄᤧᤵᤛᤢ᤹. ᤁᤖ ᤀᤠᤳᤋᤡᤴᤜᤠ᤹ ᤂᤧᤶᤔᤠ ᤔᤧᤴᤍᤧᤴᤏᤧᤴ ᤂᤧᤱᤜᤠ᤹ᤖᤧ ᤔᤧᤱᤄᤧᤵᤛᤢᤴ᤹. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤃ ᤐᤡᤑᤩᤢᤱᤒᤠᤛᤡᤖᤥ॥”