ᤀᤡᤈᤁᤡᤀᤣᤗ 29 - LIFOTNT

ᤔᤡᤛᤪ ᤗᤠᤈᤣ᤹ᤀᤥ ᤔᤠᤱᤏᤡᤱᤘᤠ᤹ᤐᤠᤴ

¹ ᤕᤜᤥᤕᤠᤁᤡᤏ ᤜᤠᤱᤅᤡᤴ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤒᤠ ᤌᤡᤒᤥᤱ ᤋᤱᤒᤣᤒᤠ ᤌᤡᤒᤥᤱ ᤗᤠ ᤌᤡᤒᤥᤱᤅᤠᤱ ᤏᤧᤳᤇᤡ ᤕᤧᤴ ᤁᤧᤖᤧᤸᤗᤧ ᤕᤠ᤺ᤴᤍᤡᤰ ᤕᤜᤘᤣ ᤍᤠᤱᤒᤠᤗᤠᤶ ᤁᤴ ᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤁᤧᤖᤧ—

² “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤜᤡᤛᤡᤱᤅᤧ᤹ ᤜᤧᤰᤁᤩᤠᤱ ᤁᤧᤏᤠᤖᤠᤴ ᤔᤡᤛᤪ ᤗᤧᤵᤔᤠᤱ ᤜᤡᤛᤧ᤹ᤀᤠᤱ ᤑᤠᤖᤥ ᤜᤠᤱᤅᤡᤴ ᤏᤢ ᤔᤡᤛᤪᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤔᤠᤱᤏᤡᤱᤘᤠ᤹ᤐᤠᤴ ᤐᤠᤖᤧ᤹॥

³ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ— “ᤏᤡᤗᤒᤠ ᤘᤀᤡᤰᤗᤠᤜᤠ᤹ᤀᤥ ᤛᤫᤠ᤺ᤳ ᤁᤧᤕᤠᤰᤐᤠ. ᤕᤶᤒᤠ ᤜᤥᤖᤢᤀᤣ ᤔᤡᤛᤪᤒᤠ ᤜᤠᤱ. ᤑᤠᤖᤥᤀᤣ. ᤀᤠᤱᤃᤠ᤹ ᤂᤧᤏᤧ᤹ ᤁᤧᤏᤡᤱᤔᤡᤀᤠᤖᤥ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤀᤰᤂᤣ ᤁᤧᤒᤠ᤺ᤳᤋᤢᤀᤠᤱ ᤘᤠ᤹ᤖᤥ. ‘ᤏᤡᤗ ᤘᤜ᤺ᤱᤅᤡᤴ ᤀᤠᤱᤃᤠ᤹ᤀᤡᤴᤗᤥ. ᤀᤠᤱᤃᤠ᤹ ᤁᤴ ᤀᤠᤵᤑᤣᤰ ᤀᤠᤗᤠᤃᤡ ᤆᤥᤃᤢᤱᤒᤠᤖᤥ॥’

⁴ ᤀᤠᤱᤃᤠ᤹ ᤂᤧᤏᤧ᤹ ᤁᤧᤛᤡᤱᤍᤠᤱᤒᤥ ᤂᤣ᤺ᤱᤜᤠ᤹ᤖᤧ ᤘᤣ᤹ᤏᤧᤖᤥ ᤜᤧᤰᤁᤩᤠᤱ ᤁᤧᤛᤣ᤺ᤰᤜᤠ᤹ᤀᤥ ᤁᤧᤄᤡᤶᤛᤡᤱᤒᤠ ᤅᤠᤜᤠ᤹ᤏᤢ ᤛᤥᤖᤡᤰ ᤂᤧᤏᤧ᤹ ᤁᤧᤈᤫᤠ᤺ᤳ ᤘᤀᤡᤰᤗᤠᤜᤠ᤹ᤀᤥᤗᤠᤶ ᤗᤠ᤺ᤰᤁᤠᤳ ᤀᤢ᤺ᤱᤏᤧ ᤗ᤺ᤳᤏᤧᤖᤥ॥

⁵ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤂᤧᤏᤧ᤹ ᤏᤢ ᤁᤧᤖᤧᤰ ᤁᤧᤅᤠᤜᤠ᤹ ᤛᤡᤛᤧ ᤗᤧᤳᤏᤡᤱ ᤏᤧᤏᤡᤱᤗᤥ॥ ᤂᤧᤏᤧ᤹ ᤂᤠᤶᤒᤠᤱᤅᤥ ᤌᤠ᤺ᤱ ᤔᤧᤸᤗᤢᤵᤐᤣ ᤐᤡᤷᤃᤠᤱ ᤁᤧᤏᤧ ᤁᤧᤃᤴᤗᤥ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤂᤧᤏᤧ᤹ ᤁᤧᤎᤰᤁᤡᤴ ᤋᤠᤶᤓᤢᤱ ᤌᤰᤛᤠᤜᤠ᤹ ᤏᤢ ᤐᤢᤛᤠᤜᤠ᤹ ᤆᤠᤔᤠ ᤁᤢᤈᤠ ᤐᤡᤖᤢᤱᤛᤡᤱᤅᤠᤱ ᤏᤧᤖᤥ॥

⁶ ᤔᤡᤛᤪᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤏᤡᤱᤘᤠ᤹ ᤔᤧᤄᤥᤛᤢᤖᤥ. “ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡᤃ ᤂᤧᤏᤧ᤹ ᤛᤡᤍᤠᤰᤐᤠᤜᤠ᤹ᤗᤠᤶ ᤆᤥ᤺ᤰᤔᤏᤠᤒᤠ ᤋᤰᤁᤠᤳ ᤜᤧᤰᤋᤱᤒᤠ ᤁᤧᤘᤕᤧᤖᤥ॥

⁷ ᤂᤧᤏᤧ᤹ᤀᤥ ᤀᤡᤛᤪᤠᤀᤡᤗᤧᤴ ᤏᤠ᤺ᤶᤛᤡᤱᤅᤡᤸᤗᤧ. ᤁᤧᤗᤰᤋᤢ. ᤁᤧᤗᤰᤋᤢᤀᤠᤱ ᤁᤢᤗᤠᤵᤑᤡ᤺ᤵᤔᤥ ᤁᤧᤎᤢᤒᤢᤖᤥ॥ ᤂᤢᤏᤧ᤹ ᤁᤢᤎᤰᤁᤡᤴ ᤂᤧᤏᤧ᤹ᤀᤥ ᤑᤳᤇᤢᤸᤗᤧ. ᤂᤧᤏᤧ᤹ ᤂᤢᤏᤧ᤹ ᤐᤵᤔᤠᤗᤠᤶ ᤁᤧᤒᤡᤖᤢᤖᤥ. ᤜᤧᤰᤁᤩᤠᤱ ᤁᤢᤀᤣ᤺ᤰᤛᤡᤱᤔᤧᤴ ᤐᤡ᤺ᤰᤂᤧᤖ ᤗᤠᤵᤁᤧᤓᤢᤛᤢᤀᤠᤱ ᤘᤕᤧᤖᤥ॥

⁸ “ᤂᤧᤸᤗᤧᤆᤥᤃᤢᤸᤗᤧ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤔᤡᤛᤪᤀᤣ. ᤀᤠᤱᤃᤠ᤹ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤌᤰᤛᤢᤒᤠᤜᤠ᤹ ᤋᤠᤖᤢᤱᤛᤡᤱ᤹. ᤜᤧᤰᤁᤩᤠᤱ ᤔᤏᤠᤜᤠ᤹ ᤏᤢ ᤌᤰᤛᤠᤜᤠ᤹ ᤁᤧᤖᤧᤰ ᤔᤧᤰᤂᤢᤱᤛᤡᤱ᤹॥

⁹ ᤔᤡᤛᤪ ᤗᤠᤈᤣᤴ ᤆᤡᤈᤡ ᤂᤰᤂᤰ ᤔᤢᤖᤧᤰ ᤂᤠᤖᤧᤰ ᤐᤥᤱ᤹. ᤜᤧᤰᤁᤩᤠᤱ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤔᤡᤛᤪᤒᤠ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢ᤹॥ “ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤀᤰᤂᤣ ᤁᤧᤒᤠ᤺ᤳᤋᤢ. ‘ᤏᤡᤗ ᤘᤜ᤺ᤱᤅᤡᤴ ᤀᤠᤱᤃᤠ᤹ᤀᤡᤴ. ᤁᤴ ᤀᤠᤱᤃᤠ᤹ᤀᤣ ᤆᤥᤃᤢᤱᤒᤠ॥’

¹⁰ ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤂᤧᤏᤧ᤹ ᤏᤢ ᤁᤧᤘᤜ᤺ᤱ ᤏᤧᤵᤔᤠᤱᤗᤧ ᤂᤧᤴᤇᤡ᤹ ᤏᤡᤱᤔᤡᤀᤠ॥ ᤀᤠᤱᤃᤠ᤹ ᤔᤡᤛᤪ ᤗᤠᤈᤣᤴ ᤔᤡᤃ᤻ᤍᤥᤗᤗᤠᤶ ᤀᤠᤛᤫᤠᤏ ᤌᤧᤶᤒᤠ. ᤗᤠᤱᤃᤧᤳ ᤗᤧᤵᤔᤠᤱ ᤁᤢᤛᤖᤧ ᤁᤢᤀᤡ᤺ᤴᤍᤥ ᤌᤠᤖᤡᤰ ᤂᤰᤐᤧᤳ ᤆᤡᤈᤡ ᤂᤰᤂᤰ ᤔᤢᤖᤧᤰ ᤂᤠᤖᤧᤰ ᤆᤥᤃᤢᤱ᤹॥

¹¹ ᤂᤧᤵᤔᤥᤗᤠᤶᤒᤠ ᤋᤱᤒᤣ ᤗᤡᤒᤥᤱ ᤌᤠᤖᤡᤰ ᤔᤏᤠᤜᤠ᤹ ᤀᤡᤃᤪ ᤌᤰᤛᤠᤜᤠ᤹ ᤀᤠᤳᤋᤡᤴᤜᤠ᤹ᤀᤠᤱ ᤗᤠᤱᤔᤧᤱᤄᤣ᤺ᤰᤏᤧᤴ॥ ᤁᤴ ᤌᤧᤔᤠᤀᤠᤱ ᤜᤠ᤺ᤳᤋᤠᤱ ᤔᤧᤴᤕᤢᤱᤔᤏᤠᤒᤠ ᤐᤥᤱ᤹॥

¹² ᤀᤠᤱᤃᤠ᤹ ᤔᤡᤛᤪ ᤗᤠᤈᤣᤴ ᤆᤡᤈᤡ ᤂᤰᤂᤰᤐᤠ ᤆᤥᤃᤢᤱ᤹. ᤂᤶᤓᤩᤠᤱ ᤘᤣ᤹ ᤆᤡᤈᤡ ᤂᤰᤂᤰᤐᤠ ᤗᤠᤈᤣ᤹ᤜᤠ᤹ᤖᤧ ᤁᤴ ᤁᤡᤷᤃᤵ ᤔᤧᤃᤒᤢᤖᤥ॥ ᤁᤵᤔᤥᤒᤠ ᤕᤧᤰᤕᤰᤜᤠ᤹ ᤘᤣ᤹ ᤁᤧᤎᤢᤵᤐᤠ ᤁᤧᤗᤢ᤺ᤶᤒᤠ ᤕᤧᤰᤕᤰᤜᤠ᤹ᤖᤧ ᤔᤧᤃᤒᤢ ᤔᤧᤏᤧᤛ᤻ᤛᤢᤒᤠ. ᤋᤱᤒᤣ ᤗᤡᤒᤥᤱ ᤌᤠᤖᤡᤰ ᤜᤠ᤺ᤳᤋᤠᤱ ᤁᤧᤜᤥᤵᤐᤠ ᤏᤢ ᤆᤡᤈᤡ ᤂᤰᤂᤰᤐᤠ ᤐᤥᤱ᤹॥ ᤀᤠᤱᤃᤠ᤹ ᤔᤡᤛᤪᤒᤠ ᤔᤏᤠᤜᤠ᤹ ᤔᤠ᤺ᤱᤄᤠᤒᤠ ᤗᤠᤈᤣ᤹ᤜᤠ᤹ᤀᤥ ᤑᤢᤳᤇᤡᤱᤈᤩᤠᤱ ᤛᤧᤛᤢᤱᤍᤣᤛᤢᤱᤛᤡᤱ᤹॥

¹³ “ᤁᤖ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣᤀᤠᤱ ᤐᤠ᤺ᤳᤋᤢ᤹—ᤋᤱᤒᤣ ᤗᤡᤒᤥᤱ ᤁᤧᤵᤔᤠ ᤆᤢ᤺ᤳᤋᤠᤱ ᤔᤡᤛᤪᤡᤜᤠ᤹ ᤑᤢᤳᤇᤡᤱᤈᤩᤠᤱ ᤔᤧᤛᤧᤖᤧ ᤔᤧᤄᤧᤖᤧᤀᤠᤱ ᤔᤧᤘᤠ᤹ᤒᤠ ᤗᤠᤈᤣ᤹ᤜᤠ᤹ᤀᤥᤗᤠᤶ ᤀᤠᤱᤃᤠ᤹ ᤕᤠᤶᤔᤥ ᤂᤧᤱᤜᤠ᤹ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤏᤢ᤺ᤰᤋᤢᤱ ᤋᤠᤖᤢᤱᤛᤡᤱ᤹॥

¹⁴ ᤀᤠᤱᤃᤠ᤹ ᤔᤡᤛᤪ᤺ᤸᤗᤧ ᤁᤢᤏᤢ᤹ᤔᤠ ᤁᤢᤍᤠᤔᤧᤴ ᤕᤠᤶᤔᤥ ᤏᤢ᤺ᤰᤋᤢᤱ᤹ ᤜᤧᤰᤁᤩᤠᤱ ᤁᤸᤗᤧ ᤁᤢᤔᤏᤠᤜᤠ᤹ ᤔᤧᤍᤩᤧᤒᤠᤗᤠᤶ ᤕᤥ ᤋᤧᤔᤧᤴ ᤗᤧᤵᤔᤠᤱᤒᤠ ᤔᤡᤛᤪᤒᤠ ᤐᤠᤌᤪᤥᤛ ᤗᤠᤈᤣ᤹ᤀᤥ ᤂᤧᤱᤜᤠ᤹ ᤏᤢ᤺ᤰᤋᤢᤱ ᤋᤠᤖᤢᤱᤛᤡᤱ᤹॥ ᤁᤖ ᤔᤡᤛᤪ᤺ᤴ ᤁᤢᤔᤡᤱ ᤔᤧᤴᤀᤡᤱᤔᤏᤠᤒᤠ. ᤗᤳᤇᤠ ᤆᤢᤰᤛᤠ ᤜᤠᤱᤈᤢᤶ ᤐᤥᤱᤅᤠᤱ ᤏᤧᤖᤥ॥

¹⁵ ᤁᤴ ᤁᤧᤖᤧᤰ ᤜᤠᤱᤈᤢᤶᤜᤠ᤹ᤏᤢ᤺ᤸᤗᤧ ᤛᤠ᤹ᤖᤡᤰ ᤆᤢᤰᤐᤠ ᤐᤥᤱ᤹. ᤀᤠᤱᤃᤠ᤹ ᤁᤴ ᤕᤠᤶᤔᤥ ᤀᤠᤓᤧᤸᤗᤧᤀᤠᤱ ᤘᤣ᤹ ᤛᤢᤜᤠᤱᤜᤠ᤹ᤀᤥ ᤕᤢᤰ ᤆᤥ᤺ᤰᤔᤠ ᤔᤧᤴᤇᤢᤰᤔᤏᤠᤒᤠ ᤛᤠ᤹ᤖᤡᤰ ᤆᤢᤰᤐᤠ ᤆᤥᤃᤢᤱ᤹॥

¹⁶ “ᤂᤧᤒᤩᤠᤱ ᤕᤠᤶᤔᤥ ᤀᤠᤓᤧᤸᤗᤧᤀᤠᤱ ᤁᤢᤓᤠ᤹ ᤏᤠ᤺ᤰᤔᤠᤖᤧ ᤗᤠᤃᤡ ᤀᤡᤛᤪᤠᤀᤡᤗᤖᤧ ᤔᤡᤛᤪ᤺ᤴ ᤁᤢᤏᤠᤔᤧᤛᤠ᤹ᤖᤢᤴ᤹॥ ᤁᤧᤒᤣ᤺ᤰᤐᤠ ᤕᤧᤴᤜᤠ᤹ᤀᤥ ᤔᤡᤛᤪ᤺ᤴ ᤏᤠᤛᤠ᤹ᤖᤢᤒᤠ ᤐᤠ᤺ᤴᤏᤡᤴ ᤀᤠᤰᤂᤩᤠᤖᤡᤰ ᤗᤠᤕᤥᤒᤠ ᤆᤥᤃᤧ ᤑᤠ᤹ᤀᤠᤱ ᤔᤡᤛᤪᤖᤧ ᤋᤢᤔᤢᤒᤠ ᤁᤢᤔᤧᤰᤔᤠ ᤕᤠᤰᤏᤠᤶᤔᤡᤸᤗᤧ ᤀᤡᤛᤪᤠᤀᤡᤗᤧᤴ ᤏᤡᤱᤘᤠ᤹ᤛᤢᤶ ᤋᤠᤖᤢᤐᤡᤖᤢ᤹॥ ᤂᤧᤒᤩᤠᤱ ᤀᤠᤱᤃᤠ᤹ᤀᤣ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤀᤡᤛᤪᤠᤀᤡᤗᤖᤧ ᤏᤡᤱᤘᤠ᤹ ᤂᤥᤛᤢᤖᤥ॥”

ᤏᤒᤢᤁᤍᤏᤣᤛᤖ ᤜᤠᤱᤅᤡᤸᤗᤧ ᤔᤡᤛᤪ ᤗᤠᤈᤣᤴ ᤏᤠ᤺ᤴᤍᤢ

¹⁷ ᤕᤜᤥᤕᤠᤁᤡᤏ ᤜᤠᤱᤅᤡᤴ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤒᤠ ᤏᤡᤒᤥᤱᤅᤠᤱ ᤏᤢᤛᤡᤃᤣᤰᤐᤠ ᤋᤱᤒᤣ ᤌᤡᤰᤛᤡᤃᤣᤰᤐᤠ ᤗᤠ ᤌᤡᤰᤛᤡᤃᤣᤰᤐᤠ ᤕᤧᤴᤏᤥ ᤕᤜᤘᤣ ᤍᤠᤱᤒᤠᤗᤠᤶ ᤁᤴ ᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤁᤧᤖᤧ—

¹⁸ “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤒᤣᤒᤡᤗᤥᤏᤒᤠ ᤏᤒᤢᤁᤍᤏᤣᤛᤖ ᤜᤠᤱᤅᤡᤸᤗᤧ ᤁᤢᤎᤰᤛᤢᤒᤠᤜᤠ᤹ ᤋᤢᤖᤥᤛᤖᤧ ᤁᤢᤍᤰᤗᤧᤱᤘᤠᤀᤥ ᤛᤠ᤹ᤖᤡᤰ ᤛᤠᤰᤋᤧᤖ ᤌᤱ ᤔᤧᤈᤥᤃᤧ. ᤂᤧᤴ ᤌᤰᤛᤢᤒᤠᤜᤠ᤹ᤖᤧ ᤂᤢᤴᤇᤡ᤹ ᤌᤧᤃᤣ᤺ᤰᤜᤠ᤹ ᤗᤡᤵᤛᤡᤱᤅᤠᤱ ᤂᤸᤗᤧ᤺ᤰ ᤗᤧ᤺ᤰᤋᤧ ᤜᤧᤰᤁᤩᤠᤱ ᤂᤢᤴᤇᤡ᤹ ᤑᤰᤋᤠᤱᤜᤠ᤹ ᤀᤡ᤹ᤛᤡᤱᤅᤠᤱ ᤋᤡ᤺ᤰᤋᤧᤀᤠᤱ ᤑᤰᤘᤠ ᤆᤢᤰᤋᤧ॥ ᤁᤖᤛᤠᤱ ᤏᤒᤢᤁᤍᤏᤣᤛᤖᤧᤴ ᤏᤢ ᤂᤢᤏᤧ᤹ ᤁᤢᤎᤰᤛᤢᤒᤠᤜᤠ᤹ᤖᤧ ᤁᤧᤖᤧᤰ ᤂᤢᤴᤇᤡ᤹ ᤕᤠ᤺ᤶᤒᤰᤁᤡᤸᤗᤧ ᤁᤢᤗᤧᤰᤘᤠ ᤌᤧᤔᤠᤀᤠᤱ ᤏᤠ᤺ᤶᤔᤠᤀᤠᤱ ᤏᤠᤵᤔᤠ ᤔᤧᤴᤇᤢᤰᤋᤢᤛᤡᤴ॥

¹⁹ ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤱ᤹—ᤀᤠᤱᤃᤠ᤹ ᤒᤣᤒᤡᤗᤥᤏᤒᤠ ᤜᤠᤱ ᤏᤒᤢᤁᤍᤏᤣᤛᤖᤧᤴ ᤔᤡᤛᤪ ᤗᤠᤈᤣᤴ ᤐᤡᤖᤢᤱ᤹॥ ᤂᤢᤏᤧ᤹ ᤂᤧᤸᤗᤧ ᤁᤳᤋᤢᤒᤠ ᤁᤢᤕᤠᤱᤛᤠᤁᤢᤴᤎᤣ ᤁᤧᤖᤧᤰ ᤐᤠ᤺ᤴᤜᤠ᤹ ᤏᤠᤵᤋᤢᤛᤡᤀᤠᤱ ᤋᤣ᤹ᤖᤢ᤹. ᤜᤧᤰᤁᤣᤗ᤹ᤖᤡᤰ ᤂᤢᤏᤧ᤹ ᤁᤢᤎᤰᤛᤢᤒᤠ ᤏᤠᤶᤕᤠᤰ ᤐᤡᤔᤠ ᤛᤢᤰᤋᤢᤛᤡ᤹॥

²⁰ ᤀᤥᤖᤥ. ᤂᤢᤏᤧ᤹ ᤁᤢᤕᤠ᤺ᤶᤒᤰᤁᤡᤸᤗᤧ ᤗᤠᤃᤡ ᤌᤢᤶᤄᤥ ᤁᤢᤀᤡᤛᤡᤰ ᤀᤠᤱᤃᤠ᤹ ᤔᤡᤛᤪ ᤗᤠᤈᤣᤴ ᤂᤢᤏᤧ᤹ ᤐᤡᤖᤢᤱᤅᤠᤱ ᤏᤧᤖᤥ. ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤱ᤹. ᤌᤣᤀᤠᤱᤓᤧᤸᤗᤧ ᤂᤧᤸᤗᤧ ᤋᤢᤖᤥᤛᤧᤴ ᤔᤧᤰᤂᤢᤸᤗᤧ ᤂᤢᤏᤧ᤹ ᤀᤠᤱᤃᤠ᤹ ᤀᤠᤗᤠᤃᤡ ᤕᤠ᤺ᤶᤒᤰ ᤆᤥᤃᤠᤱ ᤐᤡᤖᤠᤱᤅᤠᤱ ᤘᤕᤧ॥

²¹ “ᤜᤧᤰᤁᤩᤠᤱ ᤂᤧᤸᤗᤧ ᤕᤠ᤺ᤴᤍᤡᤰ ᤀᤠᤱᤃᤠ᤹ ᤀᤡᤛᤪᤠᤀᤡᤗᤧᤴ ᤔᤢᤰᤛᤠᤶᤛᤠᤒᤠ ᤐᤥᤱᤗ ᤆᤥᤃᤢᤱ᤹. ᤂᤧᤒᤩᤠᤱ ᤀᤡᤈᤁᤡᤀᤣᤗᤀᤣ. ᤂᤧᤏᤧ᤹ ᤁᤧᤒᤠ᤺ᤴᤈᤠ᤺ᤴᤜᤠ᤹ ᤀᤡᤱᤎᤠᤱ ᤔᤧᤒᤡᤖᤢᤖᤥ॥ ᤂᤧᤶᤒᤩᤠᤱ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢᤖᤥ॥”