ᤀᤡᤈᤁᤡᤀᤣᤗ 28 - LIFOTNTᤋᤢᤖᤥᤛ ᤗᤠᤈᤣ᤹ᤒᤠ ᤜᤠᤱᤅᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤠᤱᤏᤡᤱᤘᤠ᤹ᤐᤠᤴ 1 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠᤗᤠᤶ ᤁᤴ ᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤁᤧᤖᤧ— 2 “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤗᤠᤶ ᤂᤧᤏᤧ᤹ ᤁᤴ ᤀᤡᤱᤄᤱᤅᤡᤴ ᤋᤢᤖᤥᤛᤒᤠ ᤜᤠᤱᤅᤡᤴ ᤔᤧᤳᤋᤧ᤹ᤀᤥ— “ᤂᤧᤏᤧ᤹ ᤛᤠ᤹ᤖᤡᤰ ᤕᤶᤒᤠ ᤁᤧᤜᤧᤴᤇᤡᤱᤔᤥ. ᤁᤧᤏᤡᤱᤘᤠ᤹ᤀᤥ ᤀᤰᤂᤣ ᤁᤧᤒᤠ᤺ᤳᤋᤢᤖᤥ. ‘ᤀᤠᤱᤃᤠ᤹ᤃ ᤗᤳᤇᤠ ᤔᤠᤱᤀᤠᤖᤥ᥄ ᤀᤠᤱᤃᤠ᤹ ᤘᤖ᤺ᤱᤅᤡᤸᤗᤧ ᤁᤢᤗᤢᤶᤔᤥ ᤔᤠᤱ ᤜᤠᤱᤕᤢᤰᤏᤠᤀᤥ ᤕᤢᤱᤅᤠᤖᤥ॥’ ᤁᤖ ᤂᤧᤏᤧ᤹ᤃ ᤔᤧᤴᤇᤠᤶ ᤕᤠᤵᤔᤡᤏᤧᤖᤰᤗᤥ. ᤜᤧᤰᤁᤩᤠᤱ ᤗᤳᤇᤠ ᤔᤠᤱᤏᤧ ᤔᤣ᤺ᤴᤗᤥ॥ ᤜᤧᤰᤁᤣᤛᤠᤱ ᤔᤠᤱᤀᤠ ᤗ᤹ᤖᤡᤰ ᤕᤶᤒᤠ ᤁᤧᤜᤧᤴᤇᤡᤱᤗᤥ॥ 3 ᤂᤧᤏᤧ᤹ ᤍᤠᤏᤡᤀᤧᤗᤧᤴᤏᤢ᤺ᤸᤗᤧᤀᤠᤱ ᤛᤡᤰᤁᤢᤶᤛᤠᤒᤠ ᤁᤧᤗᤣ᤺ᤳᤇᤡᤱᤗᤥ ᤜᤧᤰᤁᤩᤠᤱ ᤂᤧᤏᤧ᤹ᤗᤠᤶ ᤌᤧᤔᤠ᤺ᤴᤏᤠᤱ ᤆᤡᤱᤛᤡᤱᤒᤠ ᤜᤥᤵ ᤑᤠ᤹ᤀᤠᤱ ᤁᤧᤀᤡ᤺ᤳᤋᤢᤖᤥ॥ 4 ᤁᤧᤛᤡᤰᤁᤢᤶ ᤏᤡᤱᤘᤠ᤹ ᤏᤢ ᤁᤧᤄᤠᤛᤡᤱ ᤏᤡ᤺ᤵᤔᤠᤸᤗᤧ ᤂᤧᤏᤧ᤹ ᤕᤖᤡᤰ ᤕᤠᤱᤛᤠᤁᤢᤴᤎᤣᤜᤠ᤹ ᤁᤧᤗᤢᤵᤛᤢᤀᤠᤱ ᤕᤢᤱᤗᤥ. ᤂᤧᤏᤧ᤹ ᤁᤧᤎᤠ᤺ᤱᤅᤥ ᤛᤠᤶᤔᤩᤠᤱ ᤏᤢ ᤕᤢᤵᤐᤠ ᤁᤧᤛᤢᤵᤛᤢᤀᤠᤱ ᤕᤢᤱᤗᤥ॥ 5 ᤀᤥᤖᤥ. ᤁᤧᤛᤡᤰᤁᤢᤶ ᤏᤡᤱᤘᤠ᤺ᤸᤗᤧ ᤂᤧᤏᤧ᤹ ᤕᤠᤱᤛᤠᤁᤢᤴᤎᤣᤛᤠᤒᤠ ᤁᤧᤈᤥᤃᤧᤀᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤕᤠᤱᤛᤠ ᤁᤢᤴᤎᤣ᤺ᤸᤗᤧ ᤂᤧᤏᤧ᤹ ᤛᤠ᤹ᤖᤡᤰ ᤁᤧᤜᤧᤴᤇᤡᤱᤒᤠ ᤁᤧᤈᤥᤃᤧᤀᤠᤱ ᤘᤠ᤹ᤖᤥ॥ 6 “ᤂᤧᤸᤗᤧᤆᤥᤃᤢᤸᤗᤧ. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ— ᤂᤧᤏᤧ᤹ ᤔᤠᤱ ᤜᤧᤰᤁᤣ ᤛᤡᤰᤁᤢᤶᤛᤠᤒᤠ ᤁᤧᤗᤣ᤺ᤳᤇᤡᤱᤗᤥ॥ 7 ᤂᤧᤸᤗᤧᤆᤥᤃᤢᤸᤗᤧ ᤀᤠᤸᤗ ᤀᤠᤱᤃᤠ᤹ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤛᤠ᤹ᤖᤡᤰ ᤁᤢ᤹ᤀᤡᤃᤧᤓᤧᤶᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤀᤥᤒᤠ ᤘᤣ᤹ ᤗᤠᤈᤣ᤹ᤒᤠ ᤌᤰᤛᤢᤒᤠᤜᤠ᤹ ᤋᤠᤖᤢᤱᤛᤡᤱᤗᤥ॥ ᤏᤡᤱᤘᤠ᤹ ᤁᤧᤔᤠᤒᤠ ᤁᤧᤛᤡᤰᤁᤢᤶ ᤏᤡᤱᤘᤠ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤠᤓᤣᤜᤠ᤹ ᤔᤧᤓᤡ᤺ᤰᤂᤢᤖᤥ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤜᤠᤱᤘᤠ ᤁᤧᤔᤠᤱᤘᤠᤴ ᤔᤧᤈᤡ᤺ᤴᤍᤢᤖᤥ᥄ 8 ᤂᤧᤱᤜᤠ᤹ᤖᤧ ᤂᤧᤏᤧ᤹ ᤗᤢᤶᤒᤠ᤺ᤳᤋᤥ ᤁᤧᤶᤕᤢ᤺ᤳᤗᤥ. ᤂᤧᤒᤩᤠᤱ ᤂᤧᤏᤧ᤹ ᤕᤖᤡᤰ ᤆᤡᤎᤢᤵ ᤆᤡᤎᤢᤵ ᤁᤧᤶᤎᤢᤵᤐᤠ ᤕᤠᤱᤄᤣ᤺ᤰ ᤀᤡᤛᤣ᤺ᤱ ᤘᤖ᤺ᤱᤅᤡᤸᤗᤧ ᤁᤢᤗᤢᤶᤔᤥ ᤁᤧᤛᤡᤖᤥ॥ 9 ᤂᤧᤒᤩᤠᤱ ᤂᤧᤴ ᤂᤧᤏᤧ᤹ ᤁᤧᤛᤧᤵᤐᤠᤜᤠ᤹ ᤀᤰᤂᤣ ᤁᤧᤔᤧᤳᤋᤢᤛᤡᤀᤠᤱ ᤕᤶᤒᤠ ᤁᤧᤜᤧᤴᤇᤡᤱᤒᤡ᥅ ‘ᤀᤠᤱᤃᤠ᤹ᤃ ᤗᤳᤇᤠ ᤔᤠᤱᤀᤠᤖᤥ᥄’ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤂᤧᤏᤧ᤹ ᤔᤠᤱ ᤁᤧᤶᤒᤥᤱᤏᤧᤴᤗᤥ. ᤁᤖ ᤂᤧᤏᤧ᤹ᤃ ᤔᤧᤴᤇᤠᤶ ᤕᤠᤵᤔᤡᤏᤧᤖᤰᤗᤥ᥄ 10 ᤘᤣ᤹ ᤗᤠᤈᤣ᤹ᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤀᤠᤛᤢᤛᤢᤒᤠ ᤛᤢᤘᤠᤱ ᤁᤢᤀᤡᤛᤡᤰ ᤂᤧᤏᤧ᤹ ᤁᤧᤛᤡᤖᤥ॥ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤴ ᤐᤠᤖᤠᤱᤅᤠᤱ ᤘᤠ᤹ᤖᤥ᥄” ᤋᤢᤖᤥᤛᤒᤠ ᤜᤠᤱᤅᤡᤸᤗᤧ ᤁᤢᤗᤠᤃᤡ ᤔᤧᤖᤡᤱ ᤛᤠᤶᤗᤥ 11 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠᤗᤠᤶ ᤁᤴ ᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤁᤧᤖᤧ— 12 “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤋᤢᤖᤥᤛᤒᤠ ᤜᤠᤱᤅᤡᤸᤗᤧ ᤁᤢᤗᤠᤃᤡ ᤂᤧᤏᤧ᤹ ᤁᤴ ᤔᤧᤖᤡᤱ ᤛᤠᤶᤗᤥᤴ ᤛᤠᤶᤔᤧᤳᤋᤧ᤹॥ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ— “ᤂᤧᤏᤧ᤹ᤃ ᤛᤡᤰᤁᤢᤶᤍᤡᤱ ᤏᤡᤱᤘᤠ᤹ᤖᤧ ᤁᤢᤎᤡᤶ ᤏᤢ ᤛᤠ᤹ᤖᤡᤰ ᤐᤏᤢᤏᤢᤒᤠ ᤁᤧᤈᤥ᤺ᤰᤐᤠ ᤁᤧᤄᤧᤶᤛᤡᤱᤔᤥ ᤁᤢᤗᤡᤱᤍᤥ ᤁᤧᤃᤧᤵᤐᤠ ᤂᤧᤏᤧ᤹ ᤗᤳᤇᤠ ᤁᤢᤒᤡᤏᤧᤖᤥ॥ 13 ᤂᤧᤏᤧ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤡᤱᤛᤣ᤹ᤀᤡᤰ ᤀᤍᤏᤀᤥ ᤁᤧᤘᤕᤧᤖᤥ॥ ᤂᤧᤏᤧ᤹ ᤁᤧᤈᤠᤱᤜᤠ᤹ ᤁᤢᤔᤧᤴ ᤁᤧᤄᤡ᤺ᤰᤐᤠ ᤁᤧᤖᤧᤰ ᤔᤢᤎᤡᤱᤗᤢᤱᤜᤠ᤹ᤖᤧ ᤁᤠᤵᤋᤢᤒᤠ ᤆᤥᤃᤧᤖᤥ. ᤜᤧ᤺ᤰᤁᤱᤃᤱᤒᤠ ᤔᤢᤎᤡᤱᤗᤢᤱ. ᤜᤡ᤺ᤰᤕᤱᤕᤱᤒᤠ ᤔᤠᤱᤗᤢᤱ. ᤑᤢ᤺ᤳᤋᤰᤋᤰᤐᤠ ᤔᤢᤎᤡᤱᤗᤢᤱ. ᤜᤡ᤺ᤰᤁᤥ᤺ᤶᤁᤥ᤺ᤶᤒᤠ ᤔᤢᤎᤡᤱᤗᤢᤱ. ᤔᤠᤰᤁᤢᤶᤃᤢᤶᤒᤠ ᤔᤢᤎᤡᤱᤗᤢᤱ. ᤗᤣ᤺ᤳᤋᤠᤱᤒᤠ ᤔᤢᤎᤡᤱᤗᤢᤱ. ᤑᤡᤱᤍᤠᤱᤒᤠ ᤔᤢᤎᤡᤱᤗᤢᤱ. ᤜᤡ᤺ᤰᤁᤥ᤺ᤶᤁᤥ᤺ᤶᤒᤠ ᤔᤢᤎᤡᤱ ᤏᤢ ᤜᤡ᤺ᤰᤕᤱᤕᤱᤒᤠ ᤔᤢᤎᤡᤱᤜᤠ᤹ ᤁᤧᤖᤧᤰ ᤁᤧᤗᤠᤃᤡ ᤔᤧᤈᤥᤃᤢᤖᤥ ᤜᤧᤰᤁᤩᤠᤱ ᤛᤠᤶᤔᤩᤠᤱ ᤀᤡᤛᤣ᤺ᤱᤒᤥ ᤔᤧᤍᤡ᤺ᤰᤂᤢᤀᤠᤱ ᤐᤳᤇᤧᤖᤥ॥ ᤂᤧᤏᤧ᤹ ᤏᤠᤘᤠᤃᤧᤴ ᤆᤀᤡ᤺ᤳ ᤁᤧᤒᤥ᤺ᤰᤂᤧᤒᤠ ᤕᤧᤴᤏᤥᤀᤣ ᤂᤧᤱᤜᤠ᤹ ᤂᤧᤏᤧ᤹ ᤁᤧᤗᤠᤃᤡ ᤔᤧᤈᤥᤃᤢᤀᤠᤱ ᤘᤕᤧᤖᤥ॥ 14 ᤀᤠᤱᤃᤠ᤹ ᤂᤧᤏᤧ᤹ ᤁᤢᤔᤢᤰᤛᤠᤶ ᤁᤧᤕᤠᤰᤐᤠ ᤔᤠᤱᤗᤠᤀᤡᤱᤒᤠ ᤁᤶᤒᤪᤠᤱᤒᤠ ᤁᤢᤀᤡᤛᤡᤰ ᤕᤢᤰᤋᤡᤱ ᤆᤥ᤺ᤰᤏᤧᤀᤠᤱ ᤔᤠᤱᤌᤥ᤺ᤰᤏᤠ ᤐᤡᤏᤧᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤛᤣᤛᤣ ᤁᤥ᤺ᤰᤔᤠᤀᤥ ᤁᤧᤗᤠᤛᤧᤀᤠᤱ ᤁᤧᤘᤕᤧᤖᤥ ᤜᤧᤰᤁᤩᤠᤱ ᤔᤡᤖᤠᤰ ᤁᤧᤍᤡ᤺ᤵᤐᤠ ᤗᤢᤱᤜᤠ᤹ᤖᤧ ᤁᤢᤗᤢᤶᤔᤥ ᤗᤠᤱᤃᤧᤄᤣᤃᤧᤀᤠᤱ ᤘᤕᤧᤖᤥ॥ 15 “ᤂᤧᤏᤧ᤹ ᤏᤠᤘᤠᤃᤧᤴ ᤆᤀᤡ᤺ᤳ ᤁᤧᤒᤥ᤺ᤰᤂᤧᤒᤠ ᤕᤧᤴᤏᤠᤱᤎᤥ ᤂᤧᤏᤧ᤹ᤀᤥ ᤑᤧᤴᤕᤠ᤺ᤶᤒᤰ ᤔᤧᤱᤄᤥᤀᤣᤒᤠ ᤕᤧᤴ ᤌᤠᤖᤡᤰ ᤂᤧᤏᤧ᤹ ᤁᤧᤈᤥᤃᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ᤀᤥ ᤂᤧᤏᤧ᤹ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤁᤧᤈᤥᤃᤧᤖᤥ॥ 16 ᤂᤧᤏᤧ᤹ ᤕᤠᤱᤛᤠᤁᤢᤴᤎᤣᤛᤠᤒᤠ ᤁᤧᤗᤧᤱᤜᤱ ᤆᤥ᤺ᤰᤔᤧᤸᤗᤧ ᤂᤧᤏᤧ᤹ ᤁᤢ᤹ᤀᤡᤃᤧᤓᤧᤶᤔᤠ ᤗᤠᤶᤔᤥ ᤗᤠᤶᤃᤧᤗᤥᤛᤧᤖᤥ. ᤜᤧᤰᤁᤩᤠᤱ ᤂᤧᤏᤧ᤹ ᤗᤠᤕᤥ ᤗᤠᤛᤥᤳ ᤁᤧᤈᤥᤃᤢᤖᤥ॥ ᤂᤧᤸᤗᤧᤆᤥᤃᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤃᤥ᤺ᤰᤔᤠᤗᤠᤶ ᤀᤠᤱᤃᤠ᤹ ᤂᤧᤏᤧ᤹ ᤛᤡᤖᤡᤱᤔᤔᤥ ᤏᤠ᤺ᤳᤏᤧᤍᤣᤏᤧᤖᤥ॥ ᤁᤢᤔᤢᤰᤛᤠᤶ ᤁᤧᤕᤠᤰᤐᤠ ᤁᤶᤒᤪᤠᤱᤒᤠᤀᤣ. ᤔᤡᤖᤠᤰ ᤁᤧᤍᤡ᤺ᤵᤐᤠ ᤗᤢᤱᤜᤠ᤹ᤖᤧ ᤁᤢᤗᤢᤶᤔᤥᤗᤠᤶ ᤀᤠᤱᤃᤠ᤹ ᤗ᤺ᤳᤏᤧᤍᤣᤏᤧᤖᤥ॥ 17 ᤂᤧᤏᤧ᤹ ᤁᤧᤖᤧᤰ ᤁᤧᤄᤧᤶᤛᤡᤱᤔᤧᤸᤗᤧ ᤆᤥᤃᤢᤸᤗᤧ ᤂᤧᤏᤧ᤹ ᤁᤧᤏᤡᤱᤘᤠᤴ ᤀᤠᤱᤍᤡᤱ ᤀᤡᤛᤣ᤺ᤱᤒᤠ ᤐᤥ᤺ᤰᤂᤧᤀᤠᤱ ᤘᤕᤧᤖᤥ॥ ᤂᤧᤏᤧ᤹ ᤁᤧᤜᤠᤱᤘᤠ ᤁᤧᤔᤠᤱᤘᤠᤴ ᤁᤧᤛᤡᤖᤠ᤹ ᤌᤠᤅᤧᤒᤠᤸᤗᤧ ᤂᤧᤏᤧ᤹ ᤁᤧᤛᤡᤰᤁᤢᤶ ᤏᤡᤱᤘᤠᤴ ᤑᤧᤳᤗᤠ᤹ᤖᤧᤀᤠᤱ ᤘᤕᤧᤖᤥ॥ ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤂᤧᤏᤧ᤹ ᤂᤠᤶᤒᤠᤱᤅᤥ ᤗᤠᤵᤐᤢᤱᤍᤣᤏᤧᤖᤥ ᤜᤧᤰᤁᤩᤠᤱ ᤜᤠᤱᤜᤠ᤹ᤖᤧ ᤀᤍᤰᤋᤰ ᤀᤥᤔᤧᤵᤔᤠᤖᤧ ᤗᤠᤃᤡ ᤀᤥᤛᤣ᤺ᤴᤎᤠᤱ ᤆᤥ᤺ᤰᤏᤧᤖᤥ॥ 18 ᤂᤧᤏᤧ᤹ ᤕᤖᤡᤰ ᤁᤧᤗᤠᤕᤥᤜᤠ᤹ ᤏᤢ ᤀᤡᤱᤗᤧᤰ ᤁᤧᤗᤧᤱᤜᤱᤅᤡᤸᤗᤧ ᤂᤧᤏᤧ᤹ ᤁᤧᤛᤧᤘᤠ ᤆᤥ᤺ᤰᤔᤠᤍᤧᤴᤜᤠ᤹ ᤀᤠᤛᤢᤳᤌᤥ ᤁᤧᤈᤥᤃᤢᤖᤥ॥ ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤂᤧᤏᤧ᤹ ᤗᤠᤶᤒᤠᤀᤣ ᤔᤡ ᤗ᤺ᤳᤋᤢᤱᤗᤥ. ᤜᤧᤰᤁᤩᤠᤱ ᤁᤸᤗᤧ ᤂᤧᤏᤧ᤹ ᤂᤠᤵᤐᤢᤌᤩ᤺ᤱ ᤁᤧᤈᤥᤃᤧᤖᤥ॥ ᤂᤧᤏᤧ᤹ ᤀᤥᤃᤧᤔᤧᤵᤐᤠᤖ ᤁᤧᤒᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤔᤡᤰᤛᤠᤀᤥ ᤀᤠᤱᤃᤠ᤹ ᤂᤧᤏᤧ᤹ ᤂᤠᤶᤒᤠᤱᤅᤥ ᤂᤠᤵᤐᤢ ᤁᤧᤒᤥ᤺ᤰᤂᤧᤖ ᤕᤢᤶᤏᤧᤖᤥ॥ 19 ᤂᤧᤏᤧ᤹ ᤁᤧᤍ᤹ᤕᤠᤴ ᤑᤧᤶᤔᤧᤴ ᤔᤧᤏᤡᤛᤢᤀᤠᤱ ᤂᤧᤏᤧ᤹ ᤁᤢᤛᤡᤱ ᤁᤧᤏᤡ᤺ᤵᤐᤠᤜᤠ᤹ ᤁᤧᤖᤧᤰ ᤕᤱᤔᤠ᤹ ᤔᤧᤛᤡᤖᤥ॥ ᤛᤠ᤹ᤖᤡᤰ ᤁᤡᤵᤔᤠ ᤐᤄᤢᤄᤢᤛᤧᤖ ᤂᤧᤏᤧ᤹ ᤁᤧᤏᤢᤒᤧᤖᤥ. ᤜᤧᤰᤁᤩᤠᤱ ᤀᤠᤸᤗᤀᤠᤱᤎᤥ ᤂᤧᤏᤧ᤹ ᤕᤠᤶᤔᤥ ᤁᤧᤴᤘᤠ᤹ᤏᤧᤴᤗᤥ॥” ᤛᤡᤍᤥᤏᤗᤧ ᤁᤢᤕᤠ᤺ᤶᤒᤣᤀᤥ ᤔᤠᤱᤏᤡᤱᤘᤠ᤹ᤐᤠᤴ 20 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠᤗᤠᤶ ᤀᤡᤱᤄᤱ ᤌᤡᤰ ᤀᤠᤱᤃᤠ᤹ᤀᤥ ᤁᤧᤖᤧ— 21 “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤜᤡᤛᤡᤱᤅᤧ᤹ ᤜᤧᤰᤁᤩᤠᤱ ᤛᤡᤍᤥᤏ ᤕᤧᤰᤕᤰ ᤗᤧᤵᤔᤠᤱ ᤁᤧᤏᤠᤖᤠᤴ ᤜᤡᤛᤧ᤹ᤀᤠᤱ ᤁᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤠᤱᤏᤡᤱᤘᤠ᤹ᤐᤠᤴ ᤐᤠᤖᤧ᤹॥ 22 ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ— “ᤛᤡᤍᤥᤏᤀᤣ. ᤀᤠᤱᤃᤠ᤹ ᤂᤧᤏᤧ᤹ ᤁᤧᤏᤡᤱᤔᤡᤀᤠᤖᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤏᤧ᤹ ᤌᤧᤔᤠ ᤔᤧᤳᤏᤧ ᤂᤧᤴᤗᤠᤶᤒᤠ ᤀᤠᤔᤡᤔᤡᤍᤡᤱᤅᤡᤴ ᤀᤥᤛᤣ᤺ᤴᤎᤠᤱ ᤆᤥᤃᤢᤱᤗᤥ. ᤀᤠᤱᤃᤠ᤹ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤂᤠᤛᤧᤴ ᤆᤥ᤺ᤰᤏᤧᤸᤗᤧ ᤂᤶᤓᤩᤠᤱ ᤂᤧᤏᤧ᤹ ᤁᤧᤗᤢᤶᤔᤥ ᤀᤠᤱᤃᤠ᤹ ᤛᤣᤛᤣᤴ ᤀᤥᤛᤣ᤺ᤴᤎᤠᤱ ᤆᤥᤃᤢᤱᤅᤡᤸᤗᤧ ᤀᤥᤃᤧᤔᤒᤠ ᤁᤧᤖᤧᤰᤗᤧ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤏᤡᤱᤘᤠ᤹ ᤔᤧᤄᤥᤛᤢᤖᤥ॥ 23 ᤀᤠᤱᤃᤠ᤹ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤔᤡᤱᤍᤣ᤹ᤜᤠ᤹ ᤐᤠᤱᤄᤢᤱ ᤋᤠᤛᤢᤱᤗᤥ. ᤜᤧᤰᤁᤩᤠᤱ ᤁᤧᤔᤠᤖᤠᤶᤜᤠ᤹ᤀᤥ ᤔᤠᤰᤂᤡ᤹ ᤛᤧᤖᤥ॥ ᤁᤧᤖᤧᤰ ᤐᤡᤛᤠᤱᤗᤠᤶ ᤌᤱᤅᤥ ᤁᤧᤓᤵᤐᤠᤜᤠ᤹ ᤔᤧᤍᤠᤖᤥ. ᤜᤧᤰᤁᤩᤠᤱ ᤔᤧᤛᤧᤖᤢᤛᤡᤒᤠ ᤁᤧᤔᤏᤠᤜᤠ᤹ ᤁᤧᤗᤢᤱᤎᤠᤰᤜᤠ᤹ᤀᤥ ᤔᤧᤏᤧᤖᤥ॥ ᤂᤧᤒᤩᤠᤱ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤁᤧᤖᤧᤰᤗᤧ ᤏᤡᤱᤘᤠ᤹ ᤔᤧᤄᤥᤛᤢᤖᤥ॥ 24 ᤀᤡᤛᤪᤠᤀᤡᤗᤧᤴ ᤁᤧᤈᤡ᤺ᤵᤐᤠ ᤁᤢᤏᤡᤱᤔᤡᤜᤠ᤹ᤖᤧ ᤛᤣᤷᤍᤠ᤺ᤰᤔᤠᤜᤠ᤹ ᤏᤢ ᤋᤡᤱᤜᤠ᤹ᤖᤧ ᤁᤢᤀᤡᤛᤡᤰ ᤀᤠᤸᤗᤀᤠᤱᤎᤥ ᤂᤧᤴ ᤔᤧᤸᤗᤰᤋᤢᤴ ᤜᤧᤰᤁᤩᤠᤱ ᤔᤧᤱᤄᤧ᤺ᤴᤍᤢᤴᤗᤥ॥ ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ᤀᤣ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤏᤡᤱᤘᤠ᤹ ᤔᤧᤄᤥᤛᤢᤖᤥ॥” ᤀᤡᤛᤪᤠᤀᤡᤗᤖᤧ ᤕᤠᤶᤔᤥ ᤁᤢᤏᤢ᤹ᤔᤠ ᤁᤢᤍᤠᤔᤠ 25 ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. “ᤀᤠᤱᤃᤠ᤹ ᤀᤠᤛᤧᤘᤠᤖᤥᤒᤠ ᤕᤠᤁᤢᤒᤧᤴ ᤐᤡᤖᤢᤱᤒᤠ ᤗᤠᤈᤣ᤹. ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤀᤠᤵᤑᤣᤰ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤕᤠᤶᤔᤥ ᤔᤧᤕᤢᤱ᤹॥ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤂᤧᤱᤜᤠ᤹ ᤑᤢᤳᤇᤡᤱᤈᤩᤠᤱ ᤛᤧᤛᤢᤱᤍᤣᤛᤢᤱᤛᤡᤱᤅᤠᤱ ᤔᤧᤘᤕᤧᤒᤠ ᤔᤠ᤺ᤱᤄᤠᤒᤠ ᤗᤠᤈᤣ᤹ᤜᤠ᤹ᤀᤥᤗᤠᤶ ᤕᤠᤶᤔᤥ ᤛᤢᤵᤛᤢᤱᤛᤡᤱ᤹॥ ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤀᤠᤱᤃᤠ᤹ ᤀᤠᤛᤣᤛᤣᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤀᤥᤛᤣ᤺ᤴᤎᤠᤰᤋᤢᤱᤛᤡᤱ᤹॥ 26 ᤀᤡᤛᤪᤠᤀᤡᤗᤀᤥ ᤂᤧᤱᤜᤠ᤹ ᤋᤠᤵᤌᤣᤰ ᤕᤠᤶᤎᤣᤰ ᤔᤧᤕᤢᤱ᤹ ᤜᤧᤰᤁᤩᤠᤱ ᤜᤡᤶᤎᤠ᤺ᤱᤜᤠ᤹ ᤔᤧᤈᤥᤃᤢᤀᤠᤱ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵᤜᤠ᤹ ᤔᤧᤗᤣ᤺ᤳᤋᤢ᤹॥ ᤂᤶᤓᤩᤠᤱ ᤂᤧᤱᤜᤠ᤹ ᤀᤠᤵᤋᤡᤰ ᤁᤧᤃᤢ᤺ᤵᤐᤠᤀᤠᤱ ᤋᤠᤵᤑᤧ᤺ᤸᤗᤡᤰ ᤁᤧᤔᤧᤵᤐᤠ ᤜᤡᤶᤒᤣᤛᤠᤱᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤀᤠᤱᤃᤠ᤹ ᤂᤢᤶᤍᤡᤱ ᤐᤡᤖᤢᤱᤛᤡᤱᤅᤡᤸᤗᤧ. ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢᤖᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.