ᤀᤡᤈᤁᤡᤀᤣᤗ 27 - LIFOTNTᤋᤢᤖᤥᤛ ᤕᤧᤰᤕᤰᤁᤡᤸᤗᤧ ᤗᤠᤃᤡ ᤔᤧᤖᤡᤱ ᤛᤠᤶᤗᤥ 1 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠᤗᤠᤶ ᤁᤴ ᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤁᤧᤖᤧ— 2 “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤋᤢᤖᤥᤛᤖᤧ ᤁᤢᤗᤠᤃᤡ ᤗᤳᤇᤠ ᤔᤧᤖᤡᤱ ᤛᤠᤶᤗᤥᤎᤡᤰ ᤛᤠᤶᤔᤧᤳᤋᤧ᤹. 3 ᤘᤖ᤺ᤱᤅᤥ ᤗᤠ᤺ᤵᤔᤠ ᤕᤶᤒᤠ ᤗᤠᤶᤎᤣ᤺ᤵᤐᤥ ᤁᤧᤏᤧᤒᤠ. ᤘᤖ᤺ᤱᤅᤡᤸᤗᤧ ᤁᤢᤕᤠᤀᤥ ᤁᤧᤕᤢᤱᤒᤠ ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤧᤱᤜᤱ ᤆᤥ᤺ᤰᤔᤠᤍᤧᤴ ᤋᤢᤖᤥᤛ ᤕᤧᤰᤕᤰᤁᤡᤴ ᤔᤧᤳᤋᤧ᤹. ‘ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ— “‘ᤋᤢᤖᤥᤛᤀᤣ. ᤂᤧᤏᤧ᤹ ᤀᤠᤱᤍᤡᤱ ᤗ᤹ᤖᤡᤰ ᤁᤧᤒᤠ᤺ᤳᤋᤢᤖᤥ. “ᤀᤠᤱᤃᤠ᤹ ᤁᤢᤗᤡᤱᤍᤥ ᤁᤧᤃᤧᤵᤔᤠ ᤏᤢᤔᤠ ᤆᤥ᤺ᤰᤁᤠᤖᤥ᥄” 4 ᤂᤧᤏᤧ᤹ ᤁᤧᤀᤡ᤺ᤴᤍᤥᤜᤠ᤹ ᤘᤖ᤺ᤱᤜᤠ᤹ᤀᤥ ᤁᤧᤓᤥᤛᤢᤖᤥ॥ ᤂᤧᤏᤧ᤹ ᤁᤧᤈᤥ᤺ᤰᤐᤠᤜᤠ᤹ᤖᤧ ᤁᤢᤗᤡᤱᤍᤥ ᤁᤧᤃᤧᤵᤔᤠ ᤏᤢᤔᤠ ᤁᤧᤶᤈᤥᤃᤧᤖᤥ॥ 5 ᤂᤧᤏᤧ᤹ᤃ ᤜᤣᤷᤔᤥᤏ ᤁᤥ᤺ᤰᤔᤠᤗᤠᤶ ᤕᤢ᤺ᤵᤔᤏᤠᤒᤠ ᤁᤧᤖᤧᤰᤏᤢ᤺ᤸᤗᤧ ᤏᤢᤒᤠ ᤀᤠ᤺ᤱᤜᤠ᤹ᤗᤠᤶᤒᤠ ᤆᤥ᤺ᤰᤔᤏᤠᤒᤠ ᤕᤶᤒᤠ ᤘᤠᤗᤠᤎᤠ ᤜᤧᤰᤋᤱᤔᤠ ᤁᤧᤈᤥᤃᤧᤖᤥ॥ ᤂᤧᤏᤧ᤹ ᤁᤧᤗᤠᤃᤡ ᤘᤠᤗᤠᤎᤠ ᤛᤡᤳᤗᤠᤱ ᤆᤥ᤺ᤰᤛᤧ ᤂᤧᤱᤜᤠ᤹ᤖᤧ ᤗᤧᤒᤏᤠᤏᤗᤠᤶ ᤛᤠᤶᤔᤠᤱᤛᤡᤱᤅᤡᤴ ᤔᤧᤕᤢᤖᤢᤖᤥ॥ 6 ᤂᤧᤱᤜᤠ᤹ᤖᤧ ᤒᤠᤛᤠᤏᤒᤠ ᤕᤜᤡᤒᤠ ᤛᤡᤱᤜᤠ᤹ᤗᤠᤶ ᤂᤧᤏᤧ᤹ ᤁᤧᤈᤫᤠ᤺ᤳ ᤆᤠ᤺ᤰᤔᤠ ᤗᤱᤄᤳᤜᤠ᤹ ᤔᤧᤈᤥᤃᤢᤖᤥ ᤛᤠᤀᤡᤐᤪᤛᤖᤧ ᤁᤢᤕᤠᤜᤠ᤹ᤗᤠᤶ ᤔᤧᤍᤠᤖᤢᤒᤠ ᤀᤠ᤺ᤱᤛᤡᤱᤗᤠᤶ ᤁᤢᤍᤠ᤺ᤳᤗᤠᤜᤠ᤹ ᤔᤧᤈᤥᤃᤢᤖᤥ ᤜᤧᤰᤁᤩᤠᤱ ᤂᤧᤴ ᤋᤰᤔᤡᤒᤠ ᤁᤣ᤺ᤱᤅᤡᤸᤗᤧ ᤔᤧᤛᤢ᤺ᤵᤋᤢᤀᤠᤱ ᤐᤳᤇᤧᤖᤥ॥ 7 ᤂᤧᤏᤧ᤹ ᤁᤧᤘᤠᤗᤠᤎᤠᤀᤥ ᤂᤡᤱᤔᤏᤠᤒᤠ ᤆᤡᤖᤡᤰᤜᤠ᤹ᤃ ᤔᤡᤛᤪᤒᤠ ᤏᤢᤒᤠ ᤏᤤᤏᤠᤛᤢᤳᤗᤠᤶ ᤔᤧᤈᤥᤃᤢᤀᤠᤱ ᤐᤳᤇᤧᤖᤥ. ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤛᤶᤎᤠᤱ ᤂᤧᤱᤜᤠ᤹ ᤏᤡᤛᤠ ᤁᤢᤀᤡᤛᤡᤰ ᤑᤧᤖᤧᤖᤧ ᤐᤧᤖᤧᤀᤠᤱ ᤐᤳᤇᤧᤖᤥ॥ ᤀᤣᤗᤡᤛᤠᤜ ᤘᤖ᤺ᤱᤅᤡᤸᤗᤧ ᤁᤢᤕᤠᤜᤠ᤹ᤀᤥᤒᤠ ᤁᤢᤈᤠ᤺ᤶᤔᤥ ᤔᤧᤜᤢᤶᤛᤢᤀᤠᤱ ᤁᤧᤀᤥ᤺ᤵᤐᤠ ᤔᤧᤈᤥᤃᤢᤒᤠ ᤑᤡᤱᤍᤠᤱᤒᤠ ᤏᤢ ᤐᤖᤠᤴᤗᤠ ᤏᤠᤶ ᤌᤣ᤺ᤰᤔᤠᤜᤠ᤹ᤖᤧ ᤁᤢᤛᤡᤃᤠᤱ ᤂᤧᤏᤧ᤹ ᤁᤧᤕᤧᤒᤧᤖᤥ॥ 8 ᤛᤡᤍᤥᤏ ᤏᤢ ᤀᤷᤘᤠᤍᤗᤠᤶ ᤁᤧᤗᤱᤄᤳ ᤁᤧᤕᤠᤱᤒᤠᤜᤠ᤹ ᤔᤧᤍᤩᤧᤖᤥ॥ ᤂᤧᤏᤧ᤹ ᤁᤧᤘᤠᤍᤥᤒᤠᤜᤠ᤹ᤃ ᤋᤢᤖᤥᤛᤀᤥᤀᤣ ᤁᤧᤕᤢᤱᤒᤠ. ᤁᤢᤜᤢᤰᤘᤠ ᤁᤧᤏᤢ᤹ᤒᤠ ᤔᤏᤠᤜᤠ᤹ ᤔᤧᤘᤕᤧᤖᤥ॥ 9 ᤃᤒᤠᤗᤒᤠ ᤋᤢᤶᤓᤠᤰᤛᤠ ᤛᤡᤰᤁᤢᤶᤛᤠᤒᤠ ᤆᤥᤒᤣᤃᤢᤜᤠ᤹ᤖᤧ ᤘᤠᤗᤠᤎᤠ᤺ᤸᤗᤧ ᤁᤢᤜᤱᤜᤠ᤹ ᤜᤢ᤹ᤔᤠ ᤕᤠ᤺ᤶᤒᤰ ᤔᤧᤈᤥᤃᤢᤖᤥ॥ ᤂᤧᤏᤧ᤹ ᤁᤧᤗᤧᤱᤜᤱᤗᤧ ᤗᤠᤃᤡ ᤆᤡᤃᤰᤘᤠᤜᤠ᤹ ᤗᤧᤰᤛᤧ ᤘᤠᤗᤠᤎᤠᤜᤠ᤹ ᤁᤧᤖᤧᤰ ᤐᤡᤛᤠᤱᤒᤠ ᤗᤠᤈᤣ᤹ᤜᤠ᤹ᤗᤠᤶ ᤏᤢ᤺ᤒ᤻ᤏᤢᤒᤠ ᤛᤠᤔᤠᤜᤠ᤹ᤏᤢ ᤔᤧᤃᤢᤕᤢᤀᤠᤱ ᤔᤧᤍᤩᤧᤖᤥ॥ 10 “‘ᤑᤠᤖᤛ. ᤗᤡᤍᤡᤕᤠ ᤏᤢ ᤗᤡᤒᤩᤠᤗᤠᤶ ᤔᤠ᤺ᤱᤄᤠᤒᤠ ᤔᤏᤠᤜᤠ᤹ᤖᤧ ᤂᤧᤏᤧ᤹ ᤕᤖᤡᤰ ᤁᤧᤎᤰᤛᤢᤒᤠᤜᤠ᤹ᤀᤥ ᤕᤠ᤺ᤶᤒᤰ ᤔᤧᤈᤥᤃᤢ॥ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤛᤠ᤹ᤖᤡᤰ ᤕᤶᤒᤠ ᤔᤡᤱᤛᤥ ᤀᤡᤱᤎᤠᤱ ᤁᤧᤶᤒᤡᤖᤧᤀᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤂᤥᤜᤠ᤹ ᤏᤢ ᤋᤠᤱᤄᤢ᤺ᤰᤜᤠ᤹ ᤂᤧᤏᤧ᤹ ᤁᤧᤗᤢᤱᤎᤠᤰᤜᤠ᤹ᤀᤥ ᤔᤧᤓᤥᤴᤍᤢ॥ 11 ᤀᤷᤘᤠᤍ ᤏᤢ ᤜᤣᤗᤣᤁᤗᤠᤶ ᤁᤧᤍᤠᤒᤠ ᤌᤰᤛᤢᤒᤠᤜᤠ᤹ ᤂᤧᤏᤧ᤹ ᤁᤧᤗᤢᤱᤎᤠᤰᤜᤠ᤹ᤀᤥ ᤔᤧᤕᤧᤒᤧ॥ ᤃᤔᤠᤍᤗᤠᤶ ᤁᤧᤍᤠᤒᤠ ᤔᤏᤠᤜᤠ᤹ᤖᤧ ᤂᤧᤏᤧ᤹ ᤁᤧᤈᤱᤜᤡᤶᤜᤠ᤹ ᤔᤧᤃᤥᤛᤢ॥ ᤂᤧᤏᤧ᤹ ᤁᤧᤄᤧᤶᤛᤡᤱᤔᤧᤴ ᤔᤧᤈᤥᤃᤢ ᤔᤧᤛᤢᤖᤢᤀᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤂᤥᤜᤠ᤹ ᤁᤧᤗᤢᤱᤎᤠᤰᤜᤠ᤹ᤀᤥ ᤔᤧᤓᤥᤴᤍᤢ॥ 12 “‘ᤕᤢᤵᤐᤠ. ᤑᤧᤴᤈᤣ᤹. ᤋᤡᤴ ᤏᤢ ᤔᤠᤰᤗᤢᤱᤜᤠ᤹ ᤁᤢᤗᤧᤰᤘᤠ ᤗᤧᤰᤔᤠᤖᤧ ᤗᤠᤃᤡ ᤁᤧᤈᤡᤃᤰᤘᤠᤜᤠ᤹ ᤀᤡᤱᤔᤠ ᤑᤠ᤹ᤀᤠᤱ ᤋᤷᤛᤡᤛᤖᤧ ᤗᤧᤱᤜᤱᤒᤠᤜᤠ᤹ ᤐᤠᤱᤄᤢ ᤑᤧᤴᤇᤢᤛᤡ॥ 13 ᤂᤧᤏᤧ᤹ᤏᤢ ᤗᤧᤱᤜᤱ ᤆᤥ᤺ᤰᤔᤠ ᤑᤠ᤹ᤀᤠᤱ ᤃᤪᤡᤛ. ᤋᤢᤒᤗ ᤏᤢ ᤔᤣᤛᤣᤁᤗᤠᤶ ᤁᤧᤓᤧᤶᤒᤠ ᤗᤧᤱᤜᤱᤒᤠᤜᤠ᤹ᤖᤧ ᤕᤥᤃ᤻ᤒᤠ ᤕᤥ᤺ᤃ᤻ᤔᤠᤜᤠ᤹ ᤏᤢ ᤁᤠᤛᤠ ᤂᤵᤐᤩᤠᤜᤠ᤹ ᤔᤧᤓᤧᤳᤋᤢ॥ 14 “‘ᤂᤧᤏᤧ᤹ ᤁᤧᤈᤡᤃᤰᤘᤠ ᤁᤧᤛᤠᤔᤠᤜᤠ᤹ ᤁᤧᤖᤧᤰ ᤗᤧᤰᤔᤠ ᤑᤠ᤹ᤀᤠᤱ ᤒᤣᤌ-ᤋᤥᤃᤷᤔᤠᤗᤠᤶ ᤀᤴᤜᤠ᤹. ᤀᤴᤗᤠᤎᤠᤜᤠ᤹ ᤏᤢ ᤀᤴᤕᤥᤰᤜᤠ᤹ ᤔᤧᤕᤢᤰᤋᤢᤛᤡᤀᤠᤱ ᤔᤧᤓᤧᤖᤧ॥ 15 ᤖᤥᤍᤛᤗᤠᤶ ᤗᤧᤱᤜᤱᤒᤠᤜᤠ᤹ ᤂᤧᤏᤧ᤹ᤀᤥ ᤔᤧᤓᤧᤖᤧ॥ ᤘᤖ᤺ᤱᤅᤡᤸᤗᤧ ᤁᤢᤕᤠᤀᤥᤒᤠ ᤕᤖᤡᤰ ᤗᤠᤈᤣ᤹ᤜᤠ᤹ᤖᤧ ᤂᤧᤏᤧ᤹ ᤁᤧᤈᤡᤃᤰᤘᤠᤜᤠ᤹ ᤔᤧᤀᤡᤅᤢᤖᤀᤣ ᤁᤧᤒᤥᤱᤒᤠ ᤘᤕᤧ. ᤂᤧᤱᤜᤠ᤹ᤖᤧ ᤋᤰᤔᤡᤒᤠᤸᤗᤧ ᤁᤢᤃᤣᤱᤜᤠ᤹ ᤏᤢ ᤀᤒ᤻ᤏᤢᤛ ᤛᤡᤱᤜᤠ᤹ ᤁᤢᤔᤧᤸᤗᤢᤱ ᤔᤧᤍᤠᤖᤢ॥ 16 “‘ᤂᤧᤏᤧ᤹ ᤀᤠᤳᤋᤠᤋᤠᤴᤏᤣ ᤕᤖᤡᤰ ᤁᤧᤃᤳᤋᤢᤒᤠ ᤐᤖᤡᤰ ᤐᤖᤡᤰᤐᤠ ᤁᤧᤈᤡᤃᤰᤘᤠᤜᤠ᤹ ᤀᤡᤱᤔᤠᤖᤧ ᤗᤠᤃᤡ ᤀᤖᤠᤔᤧᤸᤗᤧ ᤗᤧᤱᤜᤱᤒᤠᤜᤠ᤹ ᤐᤠᤱᤄᤢ ᤑᤧᤴᤇᤢᤛᤡ॥ ᤂᤧᤱᤜᤠ᤹ᤖᤧ ᤜᤡ᤺ᤰᤁᤥ᤺ᤶᤁᤥ᤺ᤶᤒᤠ ᤗᤢᤱ. ᤐᤖᤠᤴᤗᤠ ᤆᤠ᤺ᤶᤒᤠ ᤆᤡᤖᤡᤰ. ᤁᤢᤓᤢᤱ ᤁᤧᤒᤵᤐᤠ ᤆᤠᤱ. ᤆᤢᤴᤈᤢᤶᤒᤠ ᤏᤤᤏᤠᤛᤢᤳ ᤜᤧᤰᤁᤩᤠᤱ ᤆᤫᤠ᤺ᤳ ᤛᤡᤃᤠᤱ ᤁᤧᤕᤠᤰᤐᤠ ᤁᤢᤜᤧ᤺ᤳᤗᤢᤱ ᤏᤢ ᤜᤧ᤺ᤰᤁᤱᤃᤱᤒᤠ ᤔᤢᤎᤡᤱᤜᤠ᤹ᤖᤧ ᤁᤧᤈᤡᤃᤰᤘᤠᤜᤠ᤹ ᤔᤧᤗᤧᤰᤋᤢ॥ 17 ᤕᤜᤢᤍᤠ ᤏᤢ ᤀᤡᤛᤪᤠᤀᤡᤗᤖᤧ ᤂᤧᤏᤧ᤹ ᤁᤧᤈᤡᤃᤰᤘᤠᤜᤠ᤹. ᤔᤡᤴᤏᤡᤋᤗᤠᤶᤒᤠᤒᤠ ᤔᤠᤛᤡ. ᤛᤰᤘᤠᤄᤢ. ᤆᤤᤋᤢᤏ ᤏᤡ᤺ᤱᤃᤣ᤹ ᤏᤢ ᤏᤧᤰᤛᤠ ᤜᤢ᤺ᤵᤔᤠ ᤛᤡᤍᤠ᤹ᤜᤠ᤹ ᤗᤧᤱᤜᤱ ᤆᤥᤃᤢᤛᤡ॥ 18 “‘ᤂᤧᤏᤧ᤹ ᤀᤠᤳᤋᤠᤋᤠᤴᤏᤣ ᤕᤖᤡᤰ ᤁᤧᤃᤳᤋᤢᤒᤠ ᤐᤖᤡᤰ ᤐᤖᤡᤰᤐᤠ ᤁᤧᤈᤡᤰᤘᤠᤜᤠ᤹ ᤀᤡᤱᤔᤠᤖᤧ ᤗᤠᤃᤡ. ᤍᤔᤛ᤻ᤁᤛᤖᤧ ᤗᤧᤱᤜᤱᤒᤠᤜᤠ᤹ ᤐᤠᤱᤄᤢ ᤑᤧᤴᤇᤢᤛᤡ ᤂᤧᤱᤜᤠ᤹ᤖᤧ ᤜᤣᤗᤒᤥᤏᤗᤠᤶ ᤆᤧᤸᤗᤧᤰᤛᤣ᤹ ᤌᤡ ᤏᤢ ᤈᤠᤜᤠᤖᤗᤠᤶ ᤁᤢᤓᤖᤠ ᤛᤧᤔᤢᤖᤡᤰᤜᤠ᤹ ᤔᤧᤓᤧᤳᤋᤢ॥ 19 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤢᤈᤠᤗᤗᤠᤶ ᤆᤧᤸᤗᤧᤰᤛᤣ᤹ ᤌᤡ᤺ᤸᤗᤧ ᤔᤧᤎᤡᤶᤛᤢᤒᤠ ᤁᤢᤕᤠᤱᤔᤠᤜᤠ᤹ᤖᤧ ᤂᤧᤏᤧ᤹ ᤁᤧᤈᤡᤃᤰᤘᤠᤜᤠ᤹ ᤔᤧᤗᤧᤰᤋᤢ॥ ᤂᤧᤏᤧ᤹ ᤁᤧᤈᤡᤃᤰᤘᤠᤜᤠ᤹ᤖᤧ ᤗᤠᤃᤡ ᤔᤧᤓᤧ᤺ᤳᤇᤢᤒᤠ ᤑᤧᤴᤈᤣ᤹. ᤒᤒᤢᤗ ᤛᤡᤱ ᤏᤢ ᤁᤢᤏᤠᤶᤃᤧᤏᤢ᤹ᤒᤠ ᤔᤠᤖᤢᤰᤜᤠ᤹ ᤔᤧᤗᤧᤰᤋᤢᤀᤠᤱ ᤘᤕᤧ॥ 20 “‘ᤀᤴᤏᤡᤸᤗᤧ ᤁᤢᤛᤶᤎᤠᤱ ᤗᤥ᤺ᤵᤔᤏᤠᤒᤠ ᤁᤢᤔᤧᤴ ᤁᤧᤄᤡ᤺ᤰᤐᤠ ᤋᤣᤳᤜᤠ᤹ ᤂᤡᤏᤡ᤹ᤏᤢ ᤗᤧᤱᤜᤱ ᤆᤥ᤺ᤰᤔᤠᤖᤧ ᤗᤠᤃᤡ ᤍᤍᤠᤏᤖᤧ ᤗᤧᤱᤜᤱᤒᤠᤜᤠ᤹ ᤐᤠᤱᤄᤢ ᤑᤧᤴᤇᤢᤛᤡ॥ 21 ᤂᤧᤏᤧ᤹ ᤁᤧᤈᤡᤰᤘᤠᤜᤠ᤹ᤖᤧ ᤗᤠᤃᤡ ᤁᤢᤗᤧᤰᤘᤠᤀᤥ ᤔᤧᤸᤗᤢᤰᤛᤠ᤺ᤳᤜᤠ᤹ ᤏᤢ ᤌᤢ᤺ᤶᤒᤠᤜᤠ᤹. ᤜᤧᤰᤁᤩᤠᤱ ᤁᤢᤶᤒᤠᤒᤠ ᤔᤧ᤺ᤴᤍᤠᤜᤠ᤹ ᤗᤧᤱᤜᤱ ᤆᤥ᤺ᤰᤔᤠᤖᤧ ᤗᤠᤃᤡ ᤀᤖᤒᤡᤜᤠ᤹ ᤏᤢ ᤁᤣᤍᤠᤖᤒᤠ ᤕᤢᤰᤛᤠᤒᤠᤜᤠ᤹ᤖᤧ ᤗᤧᤱᤜᤱᤒᤠᤜᤠ᤹ ᤔᤧᤒᤠᤱᤄᤢ ᤔᤧᤓᤧᤴᤇᤢᤛᤡ॥ 22 ᤂᤧᤏᤧ᤹ ᤁᤧᤈᤡᤃᤰᤘᤠᤜᤠ᤹ᤖᤧ ᤗᤠᤃᤡ ᤁᤢᤗᤧᤰᤘᤠᤀᤥ ᤛᤣᤒᤠ ᤏᤢ ᤖᤠᤔᤠᤜᤒᤠ ᤗᤧᤱᤜᤱᤒᤠᤜᤠ᤹ ᤂᤢᤴᤇᤡ᤹ ᤁᤧᤖᤧᤰ ᤐᤖᤡᤰᤐᤠ ᤔᤠᤖᤢᤰᤜᤠ᤹. ᤔᤢᤎᤡᤱᤜᤠ᤹. ᤜᤧᤰᤁᤩᤠᤱ ᤛᤠᤶᤔᤩᤠᤱᤜᤠ᤹ ᤔᤧᤓᤧᤳᤋᤢᤀᤠᤱ ᤔᤧᤓᤧᤖᤧ॥ 23 “‘ᤜᤠᤖᤠᤏ. ᤁᤴᤏᤣᤜ. ᤀᤍᤏ. ᤛᤣᤒᤠ. ᤀᤛ᤻ᤛᤢᤖ ᤏᤢ ᤁᤡᤸᤔᤍᤜᤠ᤹ᤀᤠᤱ ᤂᤢᤴᤇᤡ᤹ ᤗᤧᤱᤜᤱᤒᤠᤜᤠ᤹ᤏᤢ ᤔᤧᤓᤧᤖᤧ॥ 24 ᤗᤧᤱᤜᤱ ᤆᤥ᤺ᤰᤔᤠᤖᤧ ᤗᤠᤃᤡ. ᤛᤣ᤺ᤰᤔᤏᤠᤒᤠ ᤆᤠᤱᤜᤠ᤹. ᤜᤡ᤺ᤰᤁᤥ᤺ᤶᤁᤥ᤺ᤶᤒᤠ ᤆᤠᤱᤜᤠ᤹. ᤁᤢᤓᤢᤱ ᤀᤡᤛᤣ᤺ᤱᤒᤠ ᤆᤡᤖᤡᤰᤜᤠ᤹ ᤏᤢ ᤐᤖᤡᤰ ᤐᤖᤡᤰᤐᤠ ᤀᤡᤍᤠ᤺ᤰᤜᤠ᤹ ᤔᤧᤔᤠ᤺ᤳᤋᤢᤀᤠᤱ ᤔᤧᤎᤠᤃᤢᤒᤠ ᤘᤣ᤹ᤘᤣ᤹ ᤐᤖᤡᤰᤗᤧ ᤔᤧᤈᤠ᤺ᤴᤍᤢᤒᤠ ᤕᤢᤰᤏᤠᤜᤠ᤹ ᤔᤧᤃᤡᤳᤋᤢᤀᤠᤱ ᤔᤧᤓᤧᤳᤋᤢ॥ 25 ᤋᤷᤛᤡᤛᤒᤠ ᤘᤠᤗᤠᤎᤠᤜᤠ᤹ ᤂᤧᤏᤧ᤹ ᤁᤧᤈᤡᤃᤰᤘᤠᤜᤠ᤹ ᤔᤧᤃᤢ᤺ᤳᤇᤡᤱᤅᤠᤱ ᤛᤥᤛᤥᤖᤡᤰ ᤋᤢᤱᤃᤥᤍᤡᤱ ᤁᤧᤘᤖ᤺ᤱᤅᤥ ᤗᤧᤱᤜᤱ ᤆᤥ᤺ᤰᤛᤧ ᤔᤧᤒᤣᤖᤥ॥ “‘ᤂᤧᤏᤧ᤹ ᤋᤢᤖᤥᤛᤧᤴ ᤐᤗᤡᤵ ᤁᤧᤗᤡ᤺ᤵᤐᤠ ᤆᤡᤃᤰᤘᤠᤜᤠ᤹ᤖᤧ ᤁᤧᤍᤡᤶᤒᤠ ᤘᤠᤗᤠᤎᤠ ᤜᤧᤰᤋᤱᤒᤠ ᤁᤧᤈᤥᤃᤧᤖᤥ॥ 26 ᤁᤖ ᤀᤥᤔᤧᤳᤋᤧ᤹᥄ ᤁᤧᤗᤱᤄᤳ ᤁᤧᤕᤠᤱᤒᤠᤜᤠ᤹ᤖᤧ ᤛᤢᤖᤡᤳ ᤁᤣᤈᤱ ᤂᤀᤡᤰ ᤂᤀᤡᤰ ᤁᤧᤀᤡᤰᤛᤡᤱᤒᤠ ᤘᤖ᤺ᤱᤜᤠ᤹ᤀᤥ ᤂᤧᤏᤧ᤹ ᤁᤧᤶᤍᤣ᤹ᤖᤧᤀᤠᤱ ᤘᤠ᤹ᤖᤥ᥄ ᤂᤀᤡᤰ ᤂᤀᤡᤰ ᤁᤧᤀᤡᤰᤛᤡᤱᤒᤠ ᤏᤠᤱᤃᤧᤴ ᤐᤡᤛᤠᤱᤒᤠ ᤛᤠᤶᤔᤡᤳ ᤁᤣᤈᤱᤅᤡᤸᤗᤧ ᤂᤧᤏᤧ᤹ ᤘᤖ᤺ᤱᤗᤢᤶᤔᤥ ᤁᤧᤔᤧᤰᤂᤧᤀᤠᤱ ᤘᤠ᤹ᤖᤥ᥄ 27 ᤂᤧᤏᤧ᤹ ᤁᤧᤕᤠᤱᤛᤠ ᤁᤢᤴᤎᤣᤜᤠ᤹ ᤏᤢ ᤁᤧᤈᤡᤃᤰᤘᤠᤜᤠ᤹. ᤂᤧᤏᤧ᤹ ᤁᤧᤖᤧᤰ ᤁᤧᤏᤠᤗᤡᤒᤠᤜᤠ᤹ ᤏᤢ ᤁᤧᤘᤠᤍᤥᤒᤠᤜᤠ᤹. ᤂᤧᤏᤧ᤹ ᤁᤧᤘᤠᤗᤠᤎᤠ ᤁᤧᤈᤥ᤺ᤰᤐᤠᤜᤠ᤹. ᤁᤧᤗᤧᤱᤜᤱᤒᤠᤜᤠ᤹. ᤜᤧᤰᤁᤩᤠᤱ ᤁᤧᤎᤰᤛᤢᤒᤠᤜᤠ᤹ ᤁᤧᤖᤧᤰ ᤔᤧᤔᤧᤰᤗᤥ॥ ᤂᤧᤏᤧ᤹ ᤂᤠᤵᤐᤢᤌᤩ᤺ᤱ ᤁᤧᤔᤧᤰᤔᤠ ᤕᤧᤴᤏᤥ ᤘᤠᤗᤠᤎᤠᤀᤥ ᤁᤧᤕᤠᤰᤐᤠᤜᤠ᤹ ᤁᤧᤖᤧᤰ ᤁᤢᤍᤡᤶᤒᤣ ᤁᤣ᤺ᤶᤒᤠ ᤘᤖ᤺ᤱᤗᤢᤶᤔᤥ ᤔᤧᤜᤢᤶ ᤔᤧᤗᤠ᤺ᤳᤗᤥ॥ 28 ᤁᤡᤔᤠ ᤕᤱᤔᤠᤖᤧ ᤁᤧᤘᤠᤍᤥᤒᤠᤜᤠ᤹ ᤔᤧᤓᤡ᤺ᤰᤁᤡᤸᤗᤧ ᤘᤖ᤺ᤱᤅᤡᤸᤗᤧ ᤁᤢᤕᤠᤀᤥᤒᤠ ᤁᤧᤕᤧᤰᤕᤰᤜᤠ᤹ ᤕᤱᤗᤥ॥ 29 ᤗᤱᤄᤳ ᤁᤧᤕᤠᤱᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤘᤠᤗᤠᤎᤠᤜᤠ᤹ ᤗᤠᤵᤔᤧᤛᤢᤖᤥ. ᤘᤠᤍᤥᤒᤠᤜᤠ᤹ ᤏᤢ ᤏᤠᤗᤡᤒᤠᤜᤠ᤹ ᤘᤖ᤺ᤱᤅᤡᤸᤗᤧ ᤁᤢᤕᤠᤀᤥᤒᤠ ᤕᤧ᤺ᤱᤄᤠᤀᤥ ᤕᤧᤵᤔᤠᤖᤧ ᤗᤠᤃᤡ ᤔᤧᤍᤠᤖᤥ॥ 30 ᤂᤧᤱᤜᤠ᤹ ᤁᤧᤖᤧᤰ ᤂᤧᤏᤧ᤹ ᤁᤧᤗᤠᤃᤡ ᤔᤧᤖᤡᤱ ᤔᤧᤎᤰᤗᤥ ᤂᤧᤱᤜᤠ᤹ ᤕᤶᤒᤠ ᤀᤡᤰᤗᤠᤀᤥ ᤔᤧᤀ᤺ᤰᤗᤥ ᤜᤧᤰᤁᤩᤠᤱ ᤀᤢ᤺ᤰᤁᤠᤱ ᤀᤢᤰ ᤔᤧᤜᤠ᤺ᤵᤗᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤧᤃᤣ᤺ᤰᤁᤡᤴ ᤂᤠᤶᤜᤡ᤺ᤰᤁᤡᤸᤗᤧ ᤔᤧᤈᤢ᤺ᤳᤋᤢᤖᤥ ᤂᤧᤒᤩᤠᤱ ᤂᤠᤵᤐᤢᤀᤥ ᤔᤧᤜᤥ᤺ᤳᤇᤡᤱ ᤔᤧᤎᤠᤶᤛᤡᤱᤗᤥ॥ 31 ᤂᤧᤏᤧ᤹ ᤁᤧᤗᤠᤃᤡ ᤂᤢᤴᤇᤡ᤹ ᤏᤡᤱᤘᤠ᤹ ᤋᤢᤰᤂᤣ ᤆᤠᤔᤥ ᤂᤧᤱᤜᤠ᤹ᤖᤧ ᤆᤠᤔᤠᤖᤧ ᤂᤢᤴᤇᤡ᤹ ᤌᤧᤃᤣᤰᤐᤠᤜᤠ᤹ ᤔᤧᤏ᤺ᤰᤂᤢᤖᤥ ᤜᤧᤰᤁᤩᤠᤱ ᤔᤧᤖᤡᤱ ᤌᤰᤔᤠ ᤛᤃᤡᤋᤣᤳ ᤔᤧᤈᤠᤰᤛᤡᤱᤗᤥ॥ ᤂᤧᤱᤜᤠ᤹ᤖᤧ ᤛᤠ᤹ᤖᤡᤰ ᤂᤢᤴᤇᤡ᤹ ᤏᤡᤱᤘᤠ᤹ ᤋᤢᤰᤂᤣ ᤆᤠᤖᤥ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤗᤠᤃᤡ ᤂᤧᤱᤜᤠ᤹ ᤔᤧᤜᤠ᤺ᤵ ᤔᤧᤈᤡ᤺ᤱᤗᤥ ᤂᤧᤒᤩᤠᤱ ᤆᤠ᤹ᤖᤡᤰ ᤔᤧᤖᤡᤱ ᤔᤧᤎᤰᤗᤥ॥ 32 ᤂᤧᤏᤧ᤹ ᤁᤧᤗᤠᤃᤡ ᤂᤧᤱᤜᤠ᤹ ᤔᤧᤖᤡᤱ ᤔᤧᤎᤰᤁᤠᤱ ᤔᤧᤜᤠ᤺ᤵᤐᤡᤸᤗᤧ ᤂᤧᤱᤜᤠ᤹ᤖᤧ ᤁᤴ ᤋᤢᤰᤂᤣᤘᤠ ᤔᤧᤖᤡᤱ ᤛᤠᤶᤗᤥᤴ ᤛᤠᤶᤔᤧᤔᤧᤳᤋᤢᤖᤥ— “‘ᤌᤣ ᤂᤧᤵᤔᤥ ᤋᤢᤖᤥᤛ ᤜᤧᤰᤋᤱᤒᤠ ᤕᤧᤰᤕᤰ ᤏᤧᤛ᤻ᤛᤧᤒᤡ᥅ ᤀᤠᤸᤗᤥ ᤘᤖ᤺ᤱᤅᤡᤸᤗᤧ ᤁᤒᤢᤀᤠᤱ ᤆᤡᤈᤡ ᤂᤰᤂᤰ ᤏᤧᤖᤥ॥ 33 ᤂᤧᤏᤧ᤹ ᤗᤧᤱᤜᤱ ᤁᤧᤈᤥᤃᤢᤒᤠ ᤆᤡᤃᤰᤘᤠᤜᤠ᤹ᤖᤧ ᤕᤖᤡᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤔᤧᤀᤡ᤺ᤳᤋᤢᤒᤠ ᤐᤠ᤺ᤴᤜᤠ᤹ᤀᤥ ᤂᤢᤴᤇᤡ᤹ ᤏᤡᤱᤘᤠ᤹ ᤁᤧᤍᤠᤛᤢ ᤁᤧᤒᤡᤖᤢᤛᤡᤖᤥ॥ ᤂᤧᤏᤧ᤹ ᤗᤧᤱᤜᤱ ᤁᤧᤈᤥᤃᤢᤒᤠ ᤆᤡᤃᤰᤘᤠᤜᤠ᤹ᤖᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤁᤢᤕᤠᤀᤥᤒᤠ ᤜᤠᤱᤜᤠ᤹ ᤕᤠᤱᤛᤠᤁᤢᤴᤎᤣᤛᤠᤒᤠ ᤔᤧᤒᤥ᤺ᤰᤂᤧᤖᤥ॥ 34 ᤀᤠᤸᤗ ᤂᤧᤏᤧ᤹ᤃ ᤋᤢᤱᤃᤥᤍᤡᤱ ᤘᤖ᤺ᤱᤛᤡᤃᤠᤱ ᤁᤧᤏᤧᤒᤠ. ᤁᤧᤕᤶᤒᤠ ᤑᤧᤰᤁᤧᤗᤠ᤹ᤒᤠ ᤘᤠᤗᤠᤎᤠᤏᤧᤖᤥ॥ ᤂᤧᤏᤧ᤹ ᤁᤧᤗᤧᤱᤜᤱ ᤆᤥ᤺ᤰᤔᤠ ᤆᤡᤃᤰᤘᤠᤜᤠ᤹ᤏᤢ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠᤜᤠ᤹ ᤁᤧᤖᤧᤰ ᤂᤧᤏᤧ᤹ᤏᤢᤀᤣ ᤔᤢ ᤔᤧᤒᤣᤀᤠᤱ ᤔᤧᤕᤠᤰᤗᤥ॥ 35 ᤂᤧᤏᤧ᤹ ᤁᤧᤍᤢᤔᤢᤒᤠ ᤁᤡᤵᤔᤠ ᤁᤧᤄᤢᤒᤠ ᤋᤢᤰᤂᤣᤴ ᤔᤧᤏᤡᤛᤢᤀᤠᤱ ᤘᤖ᤺ᤱᤅᤡᤸᤗᤧ ᤁᤢᤕᤠᤀᤥ ᤁᤧᤕᤢᤱᤒᤠᤜᤠ᤹ ᤁᤧᤖᤧᤰ ᤕᤱᤔᤠ ᤔᤧᤛᤩᤧᤀᤠᤱ ᤔᤧᤘᤠ᤹ᤖᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤠᤱᤜᤠ᤹ᤀᤠᤱ ᤁᤡᤔᤠᤀᤥ ᤔᤧᤎᤩᤧᤀᤠᤱ ᤔᤧᤘᤠ᤹ᤖᤥ ᤂᤧᤒᤩᤠᤱ ᤂᤢᤴᤇᤡ᤹ ᤏᤠᤖᤠᤴ ᤔᤧᤃᤡ᤺ᤴᤍᤢᤀᤠᤱ ᤀᤥᤔᤧᤔᤖᤥ॥ 36 ᤂᤧᤏᤧ᤹ ᤁᤧᤶᤏᤡᤀᤠᤱ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤗᤢᤶᤔᤥᤒᤠ ᤗᤧᤱᤜᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤌᤧᤃᤣ᤺ᤰᤜᤠ᤹ ᤋᤄᤢᤶᤋᤄᤢᤶ ᤔᤧᤔᤧᤳᤋᤢᤖᤥ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤛᤠ᤹ᤖᤡᤰ ᤁᤡᤵᤔᤠ ᤐᤄᤢᤄᤢᤖ ᤁᤧᤏᤢᤵᤔᤠ ᤕᤧᤴᤏᤡᤴ ᤋᤩᤧᤀᤠᤱ ᤘᤠ᤹ᤖᤥ ᤜᤧᤰᤁᤩᤠᤱ ᤀᤠᤸᤗ ᤂᤧᤏᤧ᤹ ᤕᤠᤶᤔᤥ ᤀᤠᤓᤧᤸᤗᤧᤀᤠᤱ ᤁᤧᤴᤏᤧᤏᤧᤴᤗᤥ॥’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.