ᤀᤡᤈᤁᤡᤀᤣᤗ 26 - LIFOTNT

ᤋᤢᤖᤥᤛᤖᤧ ᤁᤢᤕᤠ᤺ᤶᤒᤣᤀᤥ ᤔᤠᤱᤏᤡᤱᤘᤠ᤹ᤐᤠᤴ

¹ ᤕᤜᤥᤕᤠᤁᤡᤏ ᤜᤠᤱᤅᤡᤴ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤒᤠ ᤌᤡᤒᤥᤱᤅᤠᤱ ᤌᤡᤰᤛᤡᤃᤣᤰᤐᤠ ᤋᤱᤒᤣ ᤁᤧᤖᤧᤒᤠ ᤗᤠ᤺ᤸᤗᤧ ᤌᤡᤰᤛᤡᤃᤣᤰᤐᤠ ᤕᤧᤴᤏᤥ ᤕᤜᤘᤣ ᤍᤠᤱᤒᤠᤗᤠᤶ ᤁᤴ ᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤁᤧᤖᤧ—

² “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤕᤖᤢᤛᤗᤧ᤺ᤶᤔᤡᤴ ᤂᤠᤵᤐᤢᤌᤩ᤺ᤱ ᤐᤥ᤺ᤰᤂᤧᤸᤗᤧ ᤋᤢᤖᤥᤛᤧᤴ ᤁᤢᤏᤡᤱᤘᤠ᤹ ᤋᤩᤧᤀᤠᤱ ᤛ᤺ᤳᤋᤧᤀᤠᤱ ᤘᤠ᤹. ᤂᤧᤸᤗᤧ ᤐᤠ᤺ᤳᤋᤢ᤹. ‘ᤜᤠᤜᤥ. ᤂᤧᤴ ᤕᤠᤱᤛᤠᤁᤢᤴᤎᤣᤛᤠᤒᤠ ᤗᤧᤱᤜᤱ ᤆᤥ᤺ᤰᤔᤠ ᤕᤶᤒᤠ ᤗᤠᤶᤎᤣ᤺ᤳᤋᤡᤴ ᤗᤢ᤺ᤴᤍᤧᤀᤠᤱ ᤏᤧᤖᤥ. ᤜᤧᤰᤁᤩᤠᤱ ᤀᤠᤱᤃᤠ᤹ᤃ ᤗᤰᤂᤥᤔᤠᤀᤠᤖᤥ᥄ ᤂᤧᤴ ᤆᤡᤈᤡ ᤂᤰᤂᤰ ᤔᤧᤈᤥᤃᤢᤀᤠᤱ ᤏᤧᤒᤠᤸᤗᤧ ᤆᤥᤃᤢᤸᤗᤧ. ᤀᤠᤱᤃᤠ᤹ ᤕᤠᤱᤛᤠ ᤁᤢᤴᤎᤣᤛᤠᤔᤠ ᤐᤥᤱᤅᤠᤖᤥ᥄’

³ “ᤂᤧᤸᤗᤧᤆᤥᤃᤢᤸᤗᤧ. ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤱ᤹—ᤋᤢᤖᤥᤛ ᤕᤧᤰᤕᤰᤁᤣ. ᤀᤠᤱᤃᤠ᤹ ᤂᤧᤏᤧ᤹ ᤁᤧᤏᤡᤱᤔᤡᤀᤠ. ᤂᤧᤏᤧ᤹ ᤁᤧᤘ᤺ᤖᤱᤅᤡᤅᤡᤸᤗᤧ ᤁᤢᤕᤠᤀᤥ ᤋᤢᤱᤃᤥᤍᤡᤱ ᤘᤖ᤺ᤱᤅᤥᤒᤠ ᤘᤠᤓᤧᤸᤗᤧᤱᤅᤡᤴ ᤜᤢ᤺ᤰᤋᤢᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤕᤖᤡᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤋᤠᤖᤢᤱᤛᤡᤱ᤹॥

⁴ ᤂᤧᤱᤜᤠ᤹ᤖᤧ ᤋᤢᤖᤥᤛᤒᤠ ᤗᤢᤱᤎᤠᤰᤜᤠ᤹ ᤔᤧᤗᤢ᤺ᤴᤍᤢ᤹ ᤜᤧᤰᤁᤩᤠᤱ ᤆᤱᤜᤡᤶᤜᤠ᤹ ᤔᤧᤎᤢᤵᤛᤢ᤹॥ ᤀᤠᤱᤃᤠ᤹ ᤁᤵᤔᤥᤒᤠ ᤂᤠᤶᤔᤡᤴ ᤂᤖᤰ ᤂᤥ᤺ᤴᤍᤢᤱ ᤋᤣ᤹ᤖᤢᤱ᤹ ᤂᤶᤓᤩᤠᤱ ᤁᤴ ᤔᤢᤖᤧᤰ ᤂᤠᤖᤧᤰᤐᤠ ᤗᤢᤱᤄᤪᤧ᤺ᤰ ᤆᤥᤃᤢᤱ᤹᥄

⁵ ᤁᤱᤃ ᤘᤖ᤺ᤱ ᤗᤠᤁᤠᤳᤐᤠ ᤗᤢᤱᤄᤪᤧ᤺ᤰ ᤕᤥ᤺ᤱ ᤁᤧᤗᤧᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤕᤥ᤺ᤱᤜᤠ᤹ ᤂᤡᤱᤔᤠᤍᤧᤴᤗᤰ ᤐᤥᤱ᤹. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤴ ᤐᤠᤖᤠᤱᤅᤠᤱ ᤘᤠ᤹॥ ᤕᤖᤡᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤔᤧᤏᤠᤵᤋᤢ᤹.

⁶ ᤜᤧᤰᤁᤩᤠᤱ ᤁᤸᤗᤧ ᤁᤢᤗᤢᤶ ᤗᤠᤈᤣ᤹ᤒᤠ ᤐᤠᤱᤓᤣ᤹ᤜᤠ᤹ ᤋᤠᤓᤣ᤺ᤸᤗᤧ ᤔᤧᤔᤧᤰᤂᤢ᤹॥ ᤂᤧᤒᤩᤠᤱ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢ᤹॥

⁷ “ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤱ᤹—ᤋᤢᤖᤥᤛᤖᤧ ᤁᤢᤍᤰᤗᤧᤱᤘᤠᤀᤥ ᤀᤠᤱᤃᤠ᤹ ᤌᤠᤱᤃᤧᤳ ᤗᤧᤵᤔᤠᤱᤗᤠᤶ ᤒᤣᤒᤡᤗᤥᤏᤒᤠ ᤜᤠᤱ ᤏᤒᤢᤁᤍᤏᤣᤛᤖᤧᤴ ᤕᤢᤖᤢᤱ᤹॥ ᤂᤢᤏᤧ᤹ᤃ ᤜᤠᤱᤜᤠ᤹ᤖᤧ ᤂᤢᤴᤇᤡ᤹ ᤜᤠᤱᤗᤥ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤀᤴᤜᤠ᤹. ᤁᤢᤀᤴᤗᤠᤎᤠᤜᤠ᤹. ᤁᤢᤀᤴᤗᤠᤎᤠ ᤁᤧᤗᤥᤱᤒᤠᤜᤠ᤹ ᤏᤢ ᤛᤠ᤹ᤖᤡᤰ ᤕᤖᤡᤰ ᤌᤰᤛᤢᤒᤠᤜᤠ᤹ ᤕᤢᤖᤢᤛᤡ᤹॥

⁸ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤂᤧᤏᤧ᤹ ᤁᤧᤗᤢᤶ ᤗᤠᤈᤣ᤹ᤀᤥ ᤁᤧᤏᤧᤒᤠ ᤐᤠᤱᤓᤣ᤹ᤜᤠ᤹ ᤔᤧᤰᤂᤢ᤹॥ ᤂᤧᤒᤩᤠᤱ ᤁᤡᤷᤃᤵ ᤁᤵᤔᤠ ᤗᤢᤱᤎᤠᤰ. ᤆᤴᤇᤡᤱᤔᤠᤍᤧᤴ ᤏᤢ ᤁᤧᤍᤰᤗᤧᤱᤘᤠᤀᤥ ᤌᤣ᤺ᤰᤛᤡᤱᤔᤠ ᤂᤥᤴ ᤑᤥ᤺ᤰᤂᤢᤀᤠᤱ ᤂᤧᤏᤧ᤹ ᤌᤱᤅᤥ ᤁᤧᤓᤳ॥

⁹ ᤗᤢᤱᤎᤠᤰ ᤗᤢ᤺ᤶᤔᤠ ᤛᤡᤱᤄᤱᤜᤠ᤹ᤖᤧ ᤆᤡᤖᤰ ᤆᤡᤖᤰ ᤗᤰᤋᤢᤀᤠᤱ ᤂᤧᤏᤧ᤹ ᤁᤧᤗᤢᤱᤎᤠᤰᤜᤠ᤹ ᤗᤢ᤺ᤴᤍᤢᤍᤣᤛᤢ᤹ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤈᤱᤜᤡᤶᤜᤠ᤹ ᤂᤈᤢᤶᤄᤕᤠ ᤑᤧᤈᤢᤶᤓᤧᤕᤠᤜᤠ᤹ᤖᤧ ᤔᤧᤛᤥ᤺ᤴᤍᤢ᤹॥

¹⁰ ᤂᤢᤏᤧ᤹ ᤁᤢᤀᤴᤜᤠ᤹ᤖᤧ ᤂᤢᤴᤇᤡ᤹ ᤗᤠᤱᤍᤠᤵᤐᤣ᤹ᤜᤠ᤹ᤀᤥᤒᤠ ᤂᤠᤶᤜᤡ᤺ᤰᤁᤡᤸᤗᤧ ᤆᤡᤈᤢ᤺ᤳ ᤁᤧᤈᤢ᤺ᤳᤗᤥ. ᤜᤧᤰᤁᤩᤠᤱ ᤁᤧᤗᤢ᤺ᤶᤒᤠᤀᤠᤱ ᤁᤧᤏᤧᤒᤠ ᤕᤶᤒᤠ ᤁᤧᤗᤠᤶᤎᤣ᤺ᤳᤜᤠ᤹ᤗᤠᤶ ᤀᤴᤗᤠᤎᤠ ᤁᤠᤵᤗᤥ᤺ᤰᤜᤠ᤹ ᤏᤢ ᤀᤴᤗᤠᤎᤠ ᤁᤧᤗᤥᤱᤒᤠᤜᤠ᤹ᤖᤧ ᤔᤧᤏᤢᤃᤢ ᤔᤧᤓᤧᤳᤋᤢᤸᤗᤧ. ᤂᤧᤴ ᤀᤡᤰᤗᤠ᤺ᤸᤗᤧ ᤂᤧᤏᤧ᤹ ᤁᤧᤗᤢᤱᤎᤠᤰᤜᤠ᤹ ᤌᤢᤖᤢᤵᤗᤢᤵᤏᤠ ᤕᤱ᤹॥

¹¹ ᤂᤢᤏᤧ᤹ ᤁᤢᤀᤴ ᤁᤧᤕᤢᤰᤐᤠᤜᤠ᤹ᤖᤧ ᤕᤧᤰᤕᤰᤁᤥᤒᤠ ᤁᤧᤖᤧᤰ ᤔᤠᤖᤠᤶᤜᤠ᤹ ᤆᤡᤖᤠᤰ ᤆᤡᤖᤠᤰ ᤔᤧᤗᤠ᤺ᤰᤋᤢ᤹॥ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤁᤧᤔᤏᤠᤜᤠ᤹ ᤔᤧᤈᤩᤧᤵᤋᤢ ᤔᤧᤛᤩᤧᤛᤡ᤹. ᤜᤧᤰᤁᤩᤠᤱ ᤌᤎᤵ ᤔᤧᤸᤗ᤹ᤔᤏᤠᤒᤠ ᤁᤧᤛᤡᤳᤗᤠᤱᤜᤠ᤹ ᤔᤧᤛᤥ᤺ᤴᤍᤢ᤹॥

¹² “ᤂᤧᤱᤜᤠ᤹ᤖᤧ ᤂᤧᤏᤧ᤹ ᤁᤧᤕᤠᤱᤛᤠ ᤁᤢᤴᤎᤣᤜᤠ᤹ ᤏᤢ ᤛᤱᤔᤠ ᤀᤡᤱᤔᤠ ᤕᤠ᤺ᤶᤒᤰ ᤁᤧᤈᤥᤃᤢᤒᤠ ᤛᤠᤔᤠᤜᤠ᤹ ᤁᤧᤶᤏᤠᤵ ᤜᤧᤰᤁᤩᤠᤱ ᤁᤧᤗᤢᤱᤎᤠᤰᤜᤠ᤹ ᤔᤧᤗᤢ᤺ᤴᤍᤢ ᤁᤧᤶᤒᤡ॥ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤏᤢᤒᤠ ᤁᤧᤜᤡᤶᤜᤠ᤹ ᤔᤧᤕᤴᤇᤢ ᤁᤧᤶᤒᤡ ᤜᤧᤰᤁᤩᤠᤱ ᤁᤧᤗᤢᤱᤜᤠ᤹. ᤁᤧᤛᤡᤱᤜᤠ᤹ ᤏᤢ ᤁᤧᤗᤢ᤺ᤶᤒᤠ ᤁᤧᤄᤠᤶᤜᤡ᤺ᤰ ᤁᤧᤗᤢᤱᤜᤡ᤺ᤰᤜᤠ᤹ᤀᤠᤱ ᤘᤖ᤺ᤱᤅᤥ ᤗᤠᤵᤔᤧᤓᤢᤛᤢ ᤁᤧᤶᤒᤡ॥

¹³ ᤀᤠᤱᤃᤠ᤹ ᤂᤧᤏᤧ᤹ ᤁᤧᤛᤠᤶᤗᤥ ᤛᤠᤶᤔᤧᤵᤔᤠᤜᤠ᤹ ᤛᤠᤰᤋᤢᤱ ᤐᤡᤏᤧ॥ ᤂᤧᤏᤧ᤹ ᤁᤧᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤀᤠᤸᤗᤀᤠᤱᤎᤥ ᤋᤢ᤺ᤱᤃᤣᤜᤠ᤹ ᤗᤠᤀᤡᤰᤐᤠ ᤀᤡᤰᤗᤠ ᤂᤧᤶᤔᤧᤍᤧᤳᤏᤧᤴ॥

¹⁴ ᤀᤠᤱᤃᤠ᤹ ᤂᤧᤏᤧ᤹ ᤁᤧᤘᤠᤃᤵᤂᤠᤶᤔᤡᤴ ᤕᤥ᤺ᤱ ᤁᤧᤗᤧᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤕᤥ᤺ᤱᤜᤠ᤹ ᤂᤡᤱᤔᤠᤍᤧᤴ ᤔᤢᤖᤧ᤺ᤰ ᤂᤧᤖᤧ᤺ᤰᤐᤠ ᤗᤢᤱᤄᤪᤧ᤺ᤰ ᤆᤥᤃᤢᤱ᤹॥ ᤂᤧᤏᤧ᤹ ᤀᤠᤓᤧᤸᤗᤧᤀᤠᤱ ᤁᤧᤔᤧᤴᤈᤥ᤺ᤰᤏᤧᤴ. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤴ ᤐᤠᤖᤠᤱᤅᤠᤱ ᤘᤠ᤹॥ ᤀᤥᤖᤥ. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤢᤘᤠ ᤆᤥᤃᤢᤱᤗᤥ᥄”

ᤋᤢᤖᤥᤛᤖᤧ ᤁᤢᤔᤧᤰᤔᤧᤴ ᤛᤠ᤹ᤖᤡᤰ ᤋᤠᤵᤑᤧ᤺ᤶᤒᤠ ᤐᤥᤱ᤹

¹⁵ “ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤋᤢᤖᤥᤛᤧᤴ ᤀᤰᤂᤣ ᤔᤧᤳᤋᤢᤱ᤹—ᤆᤰᤔᤧᤸᤗ᤹ᤀᤣ ᤔᤧᤛᤧᤖᤢᤛᤡᤒᤠ ᤁᤧᤃᤠ᤺ᤶᤒᤠᤜᤠ᤹ ᤑᤡᤖᤡᤰ ᤑᤡᤖᤡᤰ ᤔᤧᤓᤡ᤺ᤰᤐᤠ ᤀᤡᤰᤗᤠ ᤁᤢᤀᤡᤛᤡᤰ. ᤂᤧᤏᤧ᤹ ᤁᤧᤔᤧᤰᤐᤠ ᤀᤡᤰᤗᤠ᤺ᤸᤗᤧ ᤘᤖ᤺ᤱᤅᤡᤸᤗᤧ ᤁᤧᤖᤧᤰ ᤁᤢᤕᤠᤜᤠ᤹ ᤌᤧᤃᤰᤁᤰᤏᤠ ᤕᤱ᤹॥

¹⁶ ᤁᤧᤖᤧᤰ ᤘᤠᤃᤵᤂᤣ᤺ᤱᤜᤠ᤹ᤀᤥ ᤏᤢ ᤘᤖ᤺ᤱᤅᤡᤸᤗᤧ ᤁᤢᤕᤠᤜᤠ᤹ᤀᤥᤒᤠ ᤁᤧᤖᤧᤰ ᤕᤢᤰᤛᤠᤒᤠᤜᤠ᤹ ᤂᤢᤴᤇᤡ᤹ ᤜᤠᤱᤕᤢᤰᤏᤠᤜᤠ᤹ᤀᤥᤗᤠᤶ ᤕᤥ ᤔᤧᤎᤠᤛᤡᤱ ᤔᤧᤕᤢᤖᤥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤠᤱᤗᤃᤣ᤺ᤳᤜᤠ᤹ ᤏᤢ ᤆᤠᤱᤜᤠ᤹ ᤔᤧᤓᤧᤴᤍᤢᤖᤥ॥ ᤂᤧᤏᤧ᤹ ᤁᤧᤔᤧᤰᤁᤡᤸᤗᤧ ᤂᤧᤱᤜᤠ᤹ ᤕᤱᤔᤠ ᤔᤧᤛᤡᤀᤠᤱ ᤌᤧᤃᤰᤁᤰᤏᤠ ᤔᤧᤕᤱᤗ ᤂᤠᤶᤒᤠᤱᤅᤥ ᤔᤧᤕᤢᤱᤛᤡᤱ᤹॥

¹⁷ ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤁᤴ ᤔᤧᤖᤡᤱ ᤛᤠᤶᤗᤥᤴ ᤛᤠᤶᤔᤧᤔᤧᤳᤋᤢᤖ ᤂᤧᤏᤧ᤹ ᤁᤧᤗᤠᤃᤡ ᤔᤧᤜᤠ᤺ᤵ ᤔᤧᤈᤡᤱᤗᤥ— “‘ᤘᤠᤃᤵᤂᤠᤶᤔᤥᤒᤠ ᤁᤢᤔᤡᤱ ᤁᤧᤍᤡ᤺ᤵᤔᤠ ᤕᤧᤰᤕᤰᤁᤣ. ᤂᤧᤏᤧ᤹ ᤀᤠᤰᤂᤣᤗ᤹ᤖᤡᤰ ᤁᤧᤔᤧᤃᤧᤀᤠᤱ ᤁᤧᤔᤕᤧᤒᤣ᥄ ᤂᤧᤏᤧ᤹ ᤁᤧᤔᤏᤠᤜᤠ᤹ᤖᤧ ᤘᤖ᤺ᤱᤅᤥᤒᤠ ᤂᤢᤴᤇᤡ᤹ ᤔᤢᤰᤛᤠᤶᤔᤡᤸᤗᤧ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤖᤧᤰ ᤐᤡᤛᤠᤱ ᤁᤡᤔᤧᤴ ᤛᤧᤖᤧᤖᤥ॥

¹⁸ ᤀᤠᤸᤗ ᤂᤧᤏᤧ᤹ ᤂᤠᤵᤐᤢᤌᤩ᤺ᤱ ᤔᤧᤰᤔᤠ ᤁᤧᤕᤧᤶᤔᤥ ᤘᤖ᤺ᤱᤅᤡᤸᤗᤧ ᤁᤢᤕᤠᤀᤥᤒᤠ ᤗᤠᤈᤣ᤹ᤜᤠ᤹ ᤔᤧᤕᤱᤗᤥ॥ ᤂᤧᤏᤧ᤹ ᤂᤠᤵᤐᤢᤌᤩ᤺ᤱ ᤁᤧᤔᤧᤰᤁᤡᤸᤗᤧ ᤘᤠᤃᤵᤂᤠᤶᤜᤠ᤹ ᤏᤡᤱᤘᤠ᤹ᤛᤪᤥᤴ ᤗ᤹ᤔᤥ ᤔᤧᤎᤠᤖᤥ॥’

¹⁹ “ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤱ—ᤘᤣ᤹ ᤕᤖᤡᤰ ᤋᤧᤴᤜᤠ᤹ ᤁᤢᤀᤡᤛᤡᤰ. ᤀᤠᤱᤃᤠ᤹ ᤋᤢᤖᤥᤛᤧᤴ ᤔᤏᤠ ᤔᤧᤴᤕᤢᤱᤔᤏᤠ ᤆᤡᤈᤡ ᤂᤰᤂᤰᤐᤠ ᤆᤥᤃᤢᤱ᤹॥ ᤀᤠᤱᤃᤠ᤹ ᤂᤧᤏᤧ᤹ ᤁᤡᤵᤔᤠ ᤁᤧᤄᤢᤒᤠ ᤘᤠᤓᤧᤸᤗᤧᤱᤜᤠ᤹ᤖᤧ ᤁᤢᤛᤡᤃᤠᤱ ᤜᤢᤶᤏᤧ ᤁᤣ᤺ᤳᤏᤧᤖᤥ॥ ᤐᤕᤶ ᤕᤶᤒᤠ ᤋᤢᤱᤃᤥᤍᤡᤱ ᤘᤖ᤺ᤱᤅᤡᤸᤗᤧ ᤂᤧᤏᤧ᤹ ᤁᤧᤗᤳ॥

²⁰ ᤀᤢᤴᤇᤥᤴ ᤀᤢᤴᤇᤥᤴ ᤂᤧᤵᤔᤥ ᤁᤧᤗᤠ᤺ᤵᤐᤠ ᤁᤧᤒᤣ᤺ᤰᤐᤠᤜᤠ᤹ᤏᤢ ᤋᤱᤛᤧ ᤀᤠᤱᤃᤠ᤹ ᤂᤧᤏᤧ᤹ ᤂᤧᤔᤠᤍᤡᤱ ᤕᤱᤛᤱᤅᤥ ᤐᤠᤱᤏᤧᤖᤥ॥ ᤛᤡᤔᤧᤸᤗᤧᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤗᤢᤶᤒᤠ᤺ᤳᤋᤥ ᤁᤧᤗᤠ᤺ᤵᤐᤠᤀᤠᤱ ᤁᤧᤘᤠ᤹ᤒᤠᤜᤠ᤹ ᤁᤢᤀᤡᤛᤡᤰ. ᤂᤧᤏᤧ᤹ ᤁᤧᤕᤧᤰᤕᤰᤁᤡᤴ ᤂᤠᤵᤐᤢᤌᤩ᤺ᤱ ᤐᤥᤱᤅᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤸᤗᤧ ᤗᤢᤵᤋᤢ ᤏᤧᤛ᤻ᤛᤢ॥ ᤁᤢᤜᤡᤱᤘᤧᤳᤜᤠ᤹ᤖᤧ ᤂᤢᤴᤇᤡ᤹ ᤁᤴ ᤗᤠᤈᤣ᤹ᤀᤥ ᤂᤧᤏᤧ᤹ ᤁᤧᤗᤠᤃᤡ ᤀᤡᤱᤎᤠᤱ ᤐᤡᤔᤠᤍᤧᤴ ᤜᤥᤵ॥

²¹ ᤁᤡᤵᤔᤠ ᤐᤄᤢᤃᤧᤄᤢᤒᤠ ᤂᤧᤏᤧ᤹ ᤁᤧᤏᤢᤵᤔᤧᤴ ᤀᤠᤱᤃᤠ᤹ ᤋᤠᤖᤢᤱ᤹. ᤜᤧᤰᤁᤩᤠᤱ ᤀᤠᤸᤗᤀᤠᤱᤎᤥ ᤂᤧᤏᤧ᤹ ᤁᤧᤴᤏᤧᤏᤧᤴ॥ ᤂᤧᤏᤧ᤹ ᤁᤧᤶᤃᤥᤳ. ᤁᤖ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤁᤧᤔᤧᤱᤄᤥᤏᤧᤴ॥ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤀᤠᤱ ᤘᤠ᤹ᤖᤥ᥄”