ᤀᤡᤈᤁᤡᤀᤣᤗ 25 - LIFOTNT

ᤀᤶᤔᤥᤏᤖᤧ ᤁᤢᤕᤠ᤺ᤶᤒᤣᤀᤥ ᤔᤠᤱᤏᤡᤱᤘᤠ᤹ᤐᤠᤴ

¹ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠᤗᤠᤶ ᤁᤴ ᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤁᤧᤖᤧ—

² “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤜᤡᤛᤡᤱᤅᤧ᤹ᤀᤠᤱ ᤀᤶᤔᤥᤏ ᤗᤠᤈᤣᤴ ᤋᤰᤔᤧᤳᤋᤧ᤹ ᤂᤧᤒᤩᤠᤱ ᤁᤵᤔᤥᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤔᤠᤱᤏᤡᤱᤘᤠ᤹ᤐᤠᤴ ᤐᤠᤖᤧ᤹॥

³ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤗᤠᤶ ᤂᤧᤏᤧ᤹ ᤁᤴ ᤀᤡᤱᤄᤱᤅᤡᤴ ᤀᤶᤔᤥᤏᤡᤜᤠ᤹ ᤔᤧᤳᤋᤧᤛᤧ᤹—ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤂᤧᤵᤛᤧᤶᤔᤧ᤹᥄ ᤀᤠᤱᤃᤠ᤹ ᤀᤠᤜᤡᤶᤔᤡᤴ ᤀᤠᤛᤢᤳᤌᤥ ᤔᤧᤈᤥᤃᤢᤀᤠᤱ ᤘᤕᤧᤸᤗᤧ ᤂᤡᤏᤡ᤹ ᤁᤧᤛ᤺ᤳᤋᤡ. ᤀᤡᤛᤪᤠᤀᤡᤗᤧᤴ ᤂᤠᤵᤐᤢᤌᤩ᤺ᤱ ᤐᤥ᤺ᤰᤂᤧᤸᤗᤧ ᤂᤡᤏᤡ᤹ ᤁᤡᤏᤠ᤺ᤴᤍᤡ ᤁᤧᤒᤡᤖᤢᤶ. ᤜᤧᤰᤁᤩᤠᤱ ᤕᤜᤢᤍᤠᤴ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤸᤗᤧ ᤂᤡᤏᤡ᤹ ᤁᤧᤀᤣᤖᤡᤒᤠᤸᤗᤧ ᤆᤥᤃᤢᤸᤗᤧ.

⁴ ᤀᤠᤱᤃᤠ᤹ ᤏᤠᤱᤃᤧᤴ ᤐᤡᤛᤠᤱ ᤔᤢᤖᤧᤰ ᤂᤠᤖᤧᤰᤐᤠ ᤕᤧ᤺ᤱᤄᤠᤍᤧᤴᤏᤥ ᤋᤠᤰᤁᤧᤃᤶᤒᤠᤀᤠᤱ ᤁᤧᤘᤠ᤹ᤒᤠᤜᤠ᤹ᤖᤧ ᤂᤡᤏᤡ᤹ ᤗᤠᤈᤣᤴ ᤔᤧᤗᤠ᤺ᤰᤋᤢ ᤔᤧᤛ᤹ᤖᤢᤖ ᤕᤠ᤺ᤴᤍᤢᤱᤛᤡᤱ᤹॥ ᤂᤧᤱᤜᤠ᤹ᤖᤧ ᤂᤡᤏᤡ᤹ ᤗᤢᤶᤔᤥ ᤂᤢᤴᤇᤡ᤹ ᤌᤰᤛᤢᤒᤠ ᤋᤢᤖᤠᤜᤡᤶᤜᤠ᤹ ᤔᤧᤄᤡᤱᤄᤢ᤹ ᤜᤧᤰᤁᤩᤠᤱ ᤂᤡᤏᤡ᤹ ᤗᤠᤈᤣ᤹ᤀᤥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠ᤺ᤱᤃᤠᤜᤡᤶᤜᤠ᤹ ᤔᤧᤗᤣ᤺ᤳᤋᤢ᤹॥ ᤂᤧᤱᤜᤠ᤹ᤖᤧ ᤂᤡᤏᤡ᤹ ᤛᤡᤱᤛᤣ᤹ᤜᤠ᤹ ᤔᤧᤍᤢᤒᤢ ᤂᤶᤓᤩᤠᤱ ᤂᤡᤏᤡ᤹ ᤌᤰᤛᤠᤜᤠ᤹ᤗᤠᤶ ᤐᤡᤳᤏᤢᤴ ᤔᤧᤎᤢᤅᤢ᤹॥

⁵ ᤜᤧᤰᤁᤩᤠᤱ ᤖᤒ᤻ᤒᤠ ᤕᤧᤰᤕᤰᤁᤡᤴ ᤀᤠᤱᤃᤠ᤹ ᤀᤢᤔᤣᤜᤠ᤹ᤖᤧ ᤗᤠᤃᤡ ᤆᤠᤖᤠᤶᤔᤠᤍᤧᤴ ᤐᤥᤱᤗ ᤆᤥᤃᤢᤱ᤹. ᤂᤧᤒᤩᤠᤱ ᤀᤶᤔᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤗᤠᤈᤣ᤹ᤜᤠ᤹ ᤔᤧᤸᤗᤢᤰ ᤏᤢ ᤔᤧ᤺ᤴᤍᤠᤜᤠ᤹ᤖᤧ ᤗᤠᤃᤡ ᤏᤠ᤺ᤶᤛᤡᤱᤔᤠᤍᤧᤴ ᤆᤥᤃᤢᤱ᤹॥ ᤂᤧᤒᤩᤠᤱ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤂᤡᤏᤡ᤹ ᤏᤡᤱᤘᤠ᤹ ᤁᤧᤄᤥᤛᤢᤶ᤹॥

⁶ “ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤱ᤹—ᤀᤠᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤔᤧᤰᤔᤠ ᤛᤡᤔᤠᤀᤥ ᤂᤡᤏᤡ᤹ ᤛᤠ᤹ᤖᤡᤰ ᤏᤡᤱᤘᤠ᤹ ᤕᤧᤕᤧ ᤗ᤹ᤔᤠᤖᤧ ᤂᤡᤏᤡ᤹ ᤁᤧᤗᤠ᤺ᤰᤂᤡ ᤁᤧᤛ᤺ᤳᤋᤡᤀᤠᤱ ᤜᤡᤵᤗᤠ ᤁᤧᤜᤡᤵᤋᤢᤶᤒᤠᤸᤗᤧ ᤆᤥᤃᤢᤸᤗᤧ.

⁷ ᤂᤠᤛᤧᤴ ᤆᤥ᤺ᤰᤔᤠ ᤀᤠᤜᤢᤰᤁᤡᤸᤗᤧ ᤀᤠᤱᤃᤠ᤹ ᤂᤡᤏᤡ᤹ ᤛᤠ᤺ᤶᤏᤡᤱ᤹॥ ᤏᤠᤵᤔᤏᤠᤒᤠ ᤆᤡᤃᤰᤘᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤕᤖᤡᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤌᤠᤏᤡᤱ᤹॥ ᤛᤢᤘᤠᤱ ᤐᤥᤱᤔᤠᤗᤠᤶ ᤀᤠᤱᤃᤠ᤹ ᤂᤡᤏᤡ᤹ ᤔᤡᤱ ᤂᤰᤋᤢᤱ ᤐᤡᤏᤡᤱ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤡᤏᤡ᤹ ᤘᤖᤧᤱᤗᤧᤱ ᤔᤧᤱᤏᤡᤱ᤹॥ ᤂᤶᤓᤩᤠᤱ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤂᤡᤏᤡ᤹ ᤏᤡᤱᤘᤠ᤹ ᤁᤧᤄᤥᤛᤢᤶᤗᤥ॥”

ᤔᤥᤀᤠᤒᤖᤧ ᤁᤢᤕᤠ᤺ᤶᤒᤣᤀᤥ ᤔᤠᤱᤏᤡᤱᤘᤠ᤹ᤐᤠᤴ

⁸ “ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤱ᤹—ᤔᤥᤀᤠᤒ ᤏᤢ ᤛᤣᤀᤡᤖᤒᤠ ᤔᤏᤠᤜᤠ᤹ᤖᤧ ᤕᤜᤢᤍᤠᤴ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤜᤧᤰᤋᤱᤒᤠᤀᤣ ᤆᤥᤰ ᤑᤠ᤹ᤀᤠᤱ ᤔᤧᤒᤠ᤺ᤳᤋᤢᤀᤠᤱ ᤔᤧᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ.

⁹ ᤀᤠᤱᤃᤠ᤹ ᤔᤥᤀᤠᤒ ᤐᤡᤛᤠᤱᤒᤠ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤡ᤺ᤴᤍᤥᤴ ᤜᤸᤗᤧᤰ ᤜᤴᤍᤢᤱ᤹ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤃᤠᤱ ᤗᤧᤵᤔᤠᤱᤒᤠ ᤒᤣᤌ-ᤕᤛᤡᤔᤥᤋ. ᤒᤠᤗ-ᤔᤥᤏ ᤏᤢ ᤁᤡᤷᤕᤠᤋᤤᤔ ᤂᤢᤴᤇᤡ᤹ ᤔᤡᤔᤡᤍᤡᤱᤃᤧᤴ ᤕᤧᤰᤕᤰᤜᤠ᤹ ᤂᤡᤍᤢ᤺ᤰ ᤋᤢᤃᤢᤱᤍᤣᤛᤢᤱ᤹॥

¹⁰ ᤜᤧᤰᤁᤩᤠᤱ ᤀᤠᤱᤃᤠ᤹ ᤔᤥᤀᤠᤒᤧᤴ ᤀᤶᤔᤥᤏᤡᤜᤠ᤹ᤏᤢ ᤛᤥᤛᤥᤖᤡᤰ ᤏᤠᤱᤃᤧᤴ ᤐᤡᤛᤠᤱ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠ ᤕᤧ᤺ᤱᤄᤠᤍᤧᤴᤜᤠ᤹ᤀᤥᤗᤠᤶ ᤁᤧᤓᤧᤶᤒᤠ ᤋᤠᤰᤁᤧᤃᤶᤒᤠᤜᤠ᤹ ᤕᤠᤱᤛᤠᤁᤢᤴᤎᤣ ᤁᤢᤀᤡᤛᤡᤰ ᤂᤢᤴᤇᤡ᤹ ᤜᤢᤰᤛᤢᤵᤋᤢᤱᤛᤡᤱ॥ ᤀᤥᤖᤥ. ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤀᤠᤸᤗᤀᤠᤱᤎᤥ ᤀᤶᤔᤥᤏᤡᤜᤠ᤹ ᤛᤢᤘᤠᤱ ᤔᤧᤸᤗᤣ᤺ᤳᤋᤢᤛᤡᤏ᤹॥

¹¹ ᤜᤧᤰᤁᤣᤗ᤹ᤖᤡᤰᤁᤣ ᤀᤠᤱᤃᤠ᤹ ᤀᤠᤄᤠᤛᤧᤴᤏᤡᤴ ᤔᤥᤀᤠᤒᤡᤜᤠ᤹ᤀᤥ ᤌᤠᤛᤢᤱ᤹॥ ᤜᤧᤰᤁᤩᤠᤱ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢᤖᤥ॥”

ᤀᤣᤍᤥᤶᤔᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤠᤱᤏᤡᤱᤘᤠ᤹ᤐᤠᤴ

¹² “ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤱ᤹—ᤕᤜᤢᤍᤠᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤁᤢᤗᤧᤰᤘᤠ ᤔᤧᤏᤢ᤺ᤰᤋᤢᤀᤠᤱ ᤀᤣᤍᤥᤔᤒᤠ ᤔᤏᤠᤜᤠ᤹ᤖᤧ ᤀᤠᤵᤑᤣᤰ ᤛᤠ᤹ᤖᤡᤰ ᤕᤶᤒᤠ ᤗᤠᤕᤥ ᤔᤧᤈᤥᤃᤢᤀᤠᤱ ᤘᤠ᤹॥

¹³ ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤱ᤹—ᤂᤠᤛᤧᤴ ᤆᤥ᤺ᤰᤔᤠ ᤀᤠᤜᤢᤰᤁᤡᤸᤗᤧ ᤀᤠᤱᤃᤠ᤹ ᤀᤣᤍᤥᤶᤔᤡᤴ ᤛᤠ᤺ᤵᤛᤢᤱ᤹॥ ᤀᤠᤱᤃᤠ᤹ ᤁᤸᤗᤧ ᤁᤢᤔᤏᤠᤜᤠ᤹ ᤏᤢ ᤁᤢᤎᤰᤛᤠᤜᤠ᤹ ᤋᤠᤓᤣ᤺ᤸᤗᤧ ᤘᤖᤧᤱᤗᤧᤱ ᤛᤩᤧᤖᤢᤱᤛᤡᤱ᤹॥ ᤋᤣᤔᤠᤏᤗᤠᤶ ᤍᤍᤠᤏ ᤌᤠᤖᤡᤰ ᤁᤧᤖᤧᤰ ᤐᤠ᤺ᤴᤜᤠ᤹ᤀᤥ ᤀᤠᤱᤃᤠ᤹ ᤁᤴ ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤗᤠᤈᤣ᤹ ᤆᤥᤃᤢᤱ᤹॥

¹⁴ ᤀᤡᤛᤪᤠᤀᤡᤒᤠ ᤀᤠᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥᤗᤠᤶ ᤀᤠᤱᤃᤠ᤹ ᤁᤴ ᤕᤠ᤺ᤶᤒᤰᤁᤡᤴ ᤁᤢᤗᤡᤱᤍᤥ ᤁᤧᤳᤋᤢᤱ᤹॥ ᤀᤠᤱᤃᤠ᤹ ᤏᤢ᤺ᤰᤔᤠ ᤁᤧᤒᤥᤱᤒᤠ ᤁᤢᤗᤧᤰᤘᤠᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤰᤁᤧᤴᤏᤡᤸᤗᤧ ᤁᤢᤗᤡᤱᤍᤥ ᤔᤧᤃᤧᤳᤋᤢ᤹. ᤜᤧᤰᤁᤩᤠᤱ ᤁᤴ ᤁᤢᤗᤧᤰᤘᤠᤴ ᤀᤠᤱᤃᤠ᤹ᤗᤠᤶ ᤋᤩᤧᤒᤠ ᤑᤠ᤹ᤀᤠᤱ ᤀᤣᤍᤥᤔᤖᤧ ᤏᤡᤱᤘᤠ᤹ ᤂᤥᤛᤢ᤹॥ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤴ ᤐᤠᤖᤠᤱᤅᤠᤱ ᤘᤠ᤹ᤖᤥ᥄”

ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤕᤠ᤺ᤶᤒᤣᤀᤥ ᤔᤠᤱᤏᤡᤱᤘᤠ᤹ᤐᤠᤴ

¹⁵ “ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤱ᤹—ᤐᤗᤡᤛ᤻ᤋᤡᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤠᤵᤑᤧ᤺ᤶᤒᤠ ᤏᤡᤱᤘᤠ᤺ᤸᤗᤧ ᤆᤥᤃᤢᤸᤗᤧ ᤁᤢᤗᤧᤰᤘᤠ ᤔᤧᤏᤢ᤺ᤰᤋᤢ ᤜᤧᤰᤁᤩᤠᤱ ᤁᤢᤗᤧᤰᤘᤠ ᤔᤧᤜᤢᤅᤢ. ᤜᤧᤰᤁᤩᤠᤱ ᤋᤃᤡᤀᤠᤱᤎᤥ ᤁᤧᤘᤠ᤹ᤒᤠ ᤏᤡᤱᤔᤡ ᤏᤡᤱᤘᤠ᤺ᤸᤗᤧ ᤕᤜᤢᤍᤠᤴ ᤔᤧᤱᤔᤠ ᤔᤧᤃᤥ᤺ᤳᤋᤢ॥

¹⁶ ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤱ᤹—ᤀᤠᤄᤠᤛᤧᤴ ᤆᤥ᤺ᤰᤔᤠ ᤀᤠᤜᤢᤰᤁᤡᤸᤗᤧ ᤀᤠᤱᤃᤠ᤹ ᤐᤗᤡᤛ᤻ᤋᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣᤴ ᤛᤠ᤺ᤵᤛᤢᤱ᤹॥ ᤀᤠᤱᤃᤠ᤹ ᤁᤖᤣᤋᤡᤜᤠ᤹ ᤘᤖᤧᤱᤗᤧᤱ ᤔᤧᤰᤂᤢᤱᤛᤡᤱ᤹ ᤂᤶᤓᤩᤠᤱ ᤘᤖ᤺ᤱᤅᤡᤸᤗᤧ ᤁᤢᤕᤠᤀᤥ ᤁᤧᤕᤢᤱᤒᤠ ᤔᤏᤠᤜᤠ᤹ ᤀᤠᤱᤃᤠ᤹ ᤂᤡᤍᤢ᤺ᤰ ᤋᤢᤃᤢᤱᤍᤣᤛᤢᤱᤛᤡᤱ᤹॥

¹⁷ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤀᤠᤱ ᤘᤠ᤹ᤒᤠ ᤐᤠ᤺ᤴᤜᤠ᤹ᤖᤧ ᤗᤠᤃᤡ ᤂᤧᤱᤜᤠ᤹ ᤂᤢᤶᤍᤡᤱ ᤐᤡᤔᤠᤛᤡᤖᤧ ᤗᤠᤃᤡ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤀᤠᤱᤃᤠ᤹ ᤛᤠ᤹ᤖᤡᤰ ᤁᤡᤵᤔᤠ ᤁᤧᤄᤢᤒᤠ ᤀᤠᤛᤠᤰᤁᤧᤴᤏᤡᤸᤗᤧ ᤂᤢᤶᤍᤡᤱ ᤐᤡᤖᤢᤱᤛᤡᤱ᤹॥ ᤜᤧᤰᤁᤩᤠᤱ ᤀᤠᤱᤃᤠ᤹ ᤁᤢᤗᤧᤰᤘᤠ ᤏᤢ᤺ᤰᤔᤠ ᤀᤠᤕᤠ᤺ᤶᤒᤰᤁᤡᤸᤗᤧ ᤂᤧᤱᤜᤠ᤹ ᤆᤠ᤹ᤖᤡᤰ ᤋᤢᤰᤂᤣ ᤆᤠ᤺ᤳᤋᤢᤱᤛᤡᤱᤅᤠᤱ ᤘᤠ᤹ᤀᤠᤸᤗᤧ. ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢᤖᤥ॥”