ᤀᤡᤈᤁᤡᤀᤣᤗ 24 - LIFOTNTᤜᤡᤱᤎᤥ᤺ᤰ ᤁᤧᤎᤥ᤺ᤰᤐᤠ ᤂᤵᤐᤩᤠ 1 ᤕᤜᤥᤕᤠᤁᤡᤏ ᤜᤠᤱᤅᤡᤴ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤒᤠ ᤑᤠᤱᤛᤡᤃᤣᤰᤐᤠ ᤋᤱᤒᤣ ᤌᤡᤒᤥᤱ ᤗᤠ ᤁᤧᤖᤧᤒᤠ ᤌᤡᤒᤥᤱ ᤕᤧᤴᤏᤥ ᤕᤜᤘᤣ ᤍᤠᤱᤒᤠᤗᤠᤶ ᤁᤴ ᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤁᤧᤖᤧ— 2 “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤀᤠᤀᤡᤴᤒᤠ ᤕᤧᤴᤏᤡ᤺ᤳᤋᤧᤴ ᤛᤠᤵᤋᤧ᤹. ᤌᤣᤀᤠᤱᤓᤧᤸᤗᤧ ᤁᤴ ᤕᤧᤴᤏᤡᤸᤗᤧ ᤕᤠ᤺ᤴᤍᤡᤰᤁᤣ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤕᤖᤢᤛᤗᤧ᤺ᤶᤔᤡᤴ ᤌᤱᤅᤥ ᤑᤵᤔᤠ ᤜᤣ᤺ᤰᤋᤢ॥ 3 ᤂᤧᤏᤧ᤹ ᤗᤳᤇᤠ ᤂᤧᤍᤠ᤹ ᤐᤠ᤺ᤳᤋᤧ᤹ᤀᤠᤱ ᤁᤴ ᤐᤡᤑᤩᤢᤱᤒᤠᤜᤠ᤹ ᤔᤧᤳᤋᤧᤛᤧ᤹—ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ— “ᤔᤡ᤺ᤸᤗᤧ ᤁᤢᤛᤶᤎᤠᤱ ᤂᤵᤐᤩᤠᤎᤡᤰ ᤕᤢᤰᤂᤧ᤹ᤀᤥ. ᤜᤧᤰᤁᤩᤠᤱ ᤂᤧᤵᤔᤥ ᤆᤒᤧ᤺ᤳᤇᤡᤰ ᤆᤫᤠ᤺ᤳ ᤕᤠᤰᤋᤧ᤹ᤀᤥ॥ 4 ᤁᤢᤔᤡᤒᤢᤱ ᤜᤧᤰᤁᤩᤠᤱ ᤁᤢᤓᤰᤋᤠᤱ ᤏᤢ ᤁᤢᤗᤠᤱᤛᤧᤒᤱᤒᤠ ᤜᤧᤰᤁᤩᤠᤱ ᤂᤰᤔᤏᤠᤒᤠ ᤁᤧᤖᤧᤰ ᤛᤠ᤹ᤖᤡᤰ ᤆᤢᤴᤈᤢᤶᤒᤠ ᤛᤣ᤺ᤰᤔᤏᤠᤒᤠ ᤛᤠᤔᤢᤸᤗᤠᤜᤠ᤹ᤖᤧ ᤁᤴ ᤌᤡᤶᤛᤧ᤹ᤀᤥ॥ 5 ᤔᤧᤸᤗᤢᤰ ᤗᤢᤵᤐᤥᤗᤠᤶ ᤁᤧᤖᤧᤰᤏᤢ᤺ᤸᤗᤧ ᤏᤢᤒᤠ ᤔᤧᤸᤗᤢᤰᤁᤡᤸᤗᤰ ᤂᤧᤏᤧ᤹ ᤀᤥᤃᤵ ᤆᤥᤃᤧ᤹ᤀᤥ. ᤜᤧᤰᤁᤩᤠᤱ ᤂᤵᤐᤩᤠ ᤛᤡᤃᤠᤱ ᤔᤡᤀᤥ ᤛᤡᤱᤅᤡᤴ ᤗᤢᤵᤛᤧ᤹ᤀᤥ॥ ᤂᤵᤐᤩᤠᤴ ᤗᤠᤰᤋᤢᤖ ᤕᤠ᤺ᤴᤍᤧ᤹ᤀᤥ. ᤜᤧᤰᤁᤩᤠᤱ ᤛᤠ᤺ᤴᤏᤢ ᤛᤥᤖᤡᤰ ᤛᤠᤕᤧᤵᤐᤠᤜᤠ᤹ ᤌᤧᤴᤍᤧ᤹ᤀᤥ॥ 6 “ᤀᤠᤸᤗ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤗᤥ— ᤆᤡ᤺ᤳᤋᤧᤛᤩᤧᤖᤥ ᤔᤏᤠ ᤁᤧᤛᤧᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤕᤧᤰᤕᤰ. ᤕᤖᤢᤛᤗᤧ᤺ᤶᤔᤡᤴ ᤀᤠᤰᤋᤱᤒᤠ ᤋᤢᤰᤂᤣ᤺ᤸᤗᤧ ᤜᤠᤱᤄᤢᤒᤣ. ᤂᤧᤱᤃ ᤗᤳᤇᤠ ᤁᤢᤎᤥ᤺ᤰᤔᤠ ᤂᤵᤐᤩᤠᤖᤥ ᤂᤧᤸᤗᤧ ᤁᤢᤓᤧᤳᤗᤠ᤹ᤔᤠᤴ ᤀᤡ᤺ᤱᤔᤠ ᤛᤢᤰᤔᤧᤍᤧᤳᤏᤧᤴᤗᤥ॥ ᤛᤠᤔᤢᤸᤗᤠ᤺ᤴ ᤗᤳᤇᤠ ᤗᤳᤇᤠ ᤗᤠ᤺ᤰᤁᤠᤳ ᤗ᤺ᤳᤋᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤀᤠᤳᤋᤡᤴ ᤛᤠᤔᤢᤸᤗᤠ᤺ᤴᤏᤠᤱ ᤘᤣ᤹ᤛᤔᤠᤴᤏᤢ᤺ᤸᤗᤧ ᤏᤢᤒᤠ ᤔᤧᤈᤥᤰᤏᤧᤴᤗᤥ॥ 7 ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤔᤏᤠᤜᤠ᤹ ᤛᤩᤧᤖᤢᤛᤡᤒᤠ ᤔᤠᤰᤂᤡᤴ ᤕᤠᤰᤐᤣ᤹ᤜᤠ᤹ᤀᤥ ᤑᤳᤇᤠ᤺ᤰ ᤐᤡᤳᤋᤢᤀᤠᤱ ᤐᤳᤗᤥ॥ ᤂᤠᤶᤜᤡ᤺ᤰᤁᤡᤸᤗᤧ ᤁᤴ ᤋᤧᤵᤔᤠ ᤏᤧᤔᤠ ᤛᤢᤰᤋᤢᤖ ᤕᤠᤖᤡᤰ. ᤂᤠᤶᤒᤠᤱᤅᤥᤀᤠᤱ ᤁᤴ ᤔᤧᤘᤧᤳᤋᤧᤴᤗᤥ᥄ 8 ᤂᤧᤸᤗᤧᤆᤥᤃᤢᤸᤗᤧ ᤀᤠᤛᤠᤰᤁᤧᤴᤏᤡᤴ ᤀᤥ᤺ᤴᤎᤠᤰᤔᤠᤖᤧ ᤗᤠᤃᤡ ᤜᤧᤰᤁᤩᤠᤱ ᤂᤧᤸᤗᤧ ᤁᤢᤗᤧᤰᤘᤠ ᤏᤢ᤺ᤰᤔᤠᤖᤧ ᤗᤠᤃᤡ ᤁᤧᤖᤧᤰᤗᤧ ᤔᤧᤏᤡᤛᤢᤖ ᤑᤠ᤹ᤀᤠᤱ ᤂᤧᤸᤗᤧ ᤁᤢᤔᤠᤰᤂᤡᤴ ᤀᤠᤱᤃᤠ᤹ ᤕᤠᤰᤐᤣ᤹ᤀᤥ ᤑᤳᤇᤠ᤺ᤰ ᤛᤧᤛᤢᤱᤗᤥ॥ 9 “ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤗᤥ— ᤔᤏᤠ ᤁᤧᤛᤧᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤕᤧᤰᤕᤰᤁᤡᤴ ᤆᤡ᤺ᤳᤋᤧᤛᤩᤧᤖᤥ. ᤀᤠᤱᤃᤠ᤹ ᤀᤠᤒᤠᤅᤣᤀᤣ ᤂᤧᤸᤗᤧ ᤁᤢᤛᤡᤃᤠᤱ ᤔᤡ ᤜᤠ᤺ᤶᤔᤠ ᤛᤡᤱᤅᤡᤴ ᤗᤢᤵᤛᤢᤱᤗᤥ॥ 10 ᤀᤥᤘᤠ. ᤛᤡᤱᤅᤡᤸᤗᤧ ᤁᤢᤛᤶᤎᤠᤱ ᤛᤡᤱ ᤗᤢᤵᤛᤧ᤹ᤀᤥ᥄ ᤜᤢᤖᤢᤖᤢᤏᤠ ᤁᤧᤍᤡ᤺ᤵᤐᤠ ᤔᤡ᤺ᤸᤗᤧ ᤂᤵᤐᤩᤠᤴ ᤗᤠᤰᤋᤢᤖ ᤕᤠ᤺ᤴᤍᤧ᤹ᤀᤥ॥ ᤕᤖᤡᤰ ᤁᤢᤏᤡ᤺ᤵᤔᤠ ᤁᤢᤄᤠᤵᤔᤠᤜᤠ᤹ᤏᤢ ᤛᤠᤴ ᤌᤥ᤺ᤰᤋᤧ᤹ᤀᤥ. ᤂᤧᤒᤩᤠᤱ ᤂᤧᤴ ᤀᤣᤃᤠᤱ ᤛᤠᤕᤧᤵᤐᤠᤜᤠ᤹ ᤔᤡᤎᤡᤰᤂᤧ᤹ᤀᤥ॥ 11 ᤀᤠᤸᤗ ᤁᤢᤄᤠᤗᤧᤶᤒᤠ ᤂᤵᤐᤩᤠᤴ ᤔᤡᤄᤠᤱᤃᤪᤥ᤺ᤰ ᤛᤶᤎᤠᤱ ᤕᤢᤰᤂᤧ᤹ᤀᤥ॥ ᤔᤖᤠᤰ ᤕᤠᤖᤡᤰ ᤁᤴ ᤐᤕᤧᤶ ᤁᤧᤕᤧᤶᤒᤠ ᤆᤥᤃᤧ᤹ᤀᤥ᥄ ᤁᤢᤄ᤺ᤰᤁᤡᤴ ᤏᤢ ᤜᤡᤱᤎᤥ᤺ᤰᤁᤡᤴ ᤔᤡᤎᤡᤰᤂᤧᤍᤣᤛᤧ᤹ᤀᤥ॥ 12 ᤁᤖ ᤁᤱᤃ ᤌᤣᤏᤠᤎᤣᤖᤰ ᤐᤥᤱᤗᤥ. ᤜᤡᤱᤎᤥ᤺ᤰᤁᤡᤴ ᤀᤡ᤺ᤱᤔᤠᤍᤣᤔᤠ ᤛᤢᤰᤔᤧᤍᤧᤳᤏᤧᤴᤗᤥ॥ ᤂᤧᤸᤗᤧᤆᤥᤃᤢᤸᤗᤧ ᤔᤡᤀᤥ ᤁᤴ ᤗᤠᤵᤑᤢᤛᤧ᤹ᤀᤥ॥ 13 ᤂᤧᤏᤧ᤹ ᤁᤧᤀᤠᤛᤢᤳᤌᤥ᤺ᤴᤃ ᤆᤡ᤺ᤴᤈᤡ᤺ᤴᤃᤧᤄᤢᤒᤠ ᤁᤧᤕᤠᤶᤒᤥ᤺ᤵᤔᤧᤴ ᤏᤢ ᤏᤠᤘᤠᤀᤡᤳᤗᤠ ᤛᤧᤘᤠ ᤔᤧᤵᤔᤠ ᤂᤧᤏᤧ᤹ ᤁᤧᤓᤧᤴᤕᤠ᤺ᤶᤒᤰᤁᤡᤴᤗᤥ॥ ᤀᤠᤱᤃᤠ᤹ ᤀᤡ᤺ᤱᤔᤠ ᤁᤥ᤺ᤳᤏᤧ. ᤁᤖ ᤁᤧᤴᤍᤧᤴᤍᤧᤴᤗᤥ॥ ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤛᤠᤰᤁᤧᤴᤏᤡᤴ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤀᤠᤛᤡᤰᤔᤧᤴᤈᤡᤶᤔᤣ ᤌᤠᤖᤡᤰ ᤀᤠᤸᤗ ᤂᤧᤏᤧ᤹ ᤁᤧᤈᤡ᤺ᤴᤈᤡ᤺ᤴᤄᤢᤔᤥᤀᤣ ᤁᤧᤘᤠ᤹ᤖᤥ॥ 14 “ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤴ ᤐᤠᤖᤠᤱᤅᤠᤱ ᤘᤠ᤹᥄ ᤕᤧᤶᤔᤡᤴ ᤁᤧᤖᤧᤀᤠᤱ ᤘᤠ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤣᤃᤠᤱ ᤔᤧᤏᤢ᤺ᤱᤅᤠᤱ॥ ᤀᤠᤱᤃᤠ᤹ ᤀᤠᤏᤡᤱᤘᤠ᤹ ᤔᤧᤏᤢ᤺ᤰᤅᤠᤴ᤹. ᤜᤧᤰᤁᤩᤠᤱ ᤂᤧᤏᤧ᤹ ᤀᤠᤱᤃᤠ᤹ ᤂᤧᤏᤧ᤹ ᤀᤠᤗᤢᤱᤔᤠ᤹ ᤛᤩᤠ᤺ᤳ ᤁᤧᤸᤗ᤹ᤏᤧᤴ॥ ᤂᤧᤏᤧ᤹ ᤁᤧᤈᤥᤃᤢᤒᤠ ᤑᤧᤴᤕᤠ᤺ᤶᤒᤰᤜᤠ᤹ᤖᤧ ᤁᤢᤗᤧᤰᤘᤠ ᤀᤠᤱᤃᤠ᤹ ᤂᤠᤛᤧᤴ ᤆᤥ᤺ᤰᤏᤧ᤹.” ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ॥ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤸᤗᤧ ᤁᤢᤔᤣ᤺ᤳᤋᤡᤴ ᤔᤠᤛᤡᤱ 15 ᤂᤧᤒᤩᤠᤱ ᤁᤴ ᤀᤡᤱᤄᤱᤅᤡᤴ ᤕᤜᤘᤣ ᤍᤠᤱᤒᤠᤗᤠᤶ ᤀᤠᤱᤃᤠ᤹ᤀᤥ ᤁᤧᤖᤧ— 16 “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤂᤧᤏᤧ᤹ ᤛᤠ᤹ᤖᤡᤰ ᤁᤧᤛᤡᤖᤠ᤹ ᤁᤧᤎᤠᤱᤒᤠ ᤁᤧᤕᤠᤱᤛᤠ ᤁᤢᤴᤎᤣ᤺ᤴ ᤀᤠᤱᤃᤠ᤹ ᤌᤡᤰᤗᤧᤱ ᤌᤡᤰᤗᤧ ᤋᤣ᤹ᤖᤢᤱ ᤐᤡᤏᤧ॥ ᤜᤧᤰᤁᤣᤛᤠᤱ ᤂᤢᤏᤧ᤹ ᤁᤢᤔᤠᤛᤡᤱᤔᤠᤀᤥ ᤀᤠᤳᤋᤡᤴ ᤏᤧᤋᤩᤢᤰᤔᤠ ᤐᤠ᤺ᤴᤏᤡᤴᤏᤠᤱ ᤀᤥᤛᤣ᤺ᤴᤎᤠᤱ ᤔᤧᤈᤥᤃᤧᤴᤏᤧ᤹॥ ᤂᤧᤏᤧ᤹ ᤔᤧᤜᤠᤒᤧᤴᤏᤧ᤹. ᤂᤧᤵᤔᤥ ᤔᤡᤰᤘᤠ ᤌᤠᤔᤠ ᤕᤠ᤺ᤶᤒᤰ ᤔᤧᤒᤥᤱᤏᤧᤸᤗ॥ 17 ᤂᤧᤏᤧ᤹ ᤕᤠᤖᤧ᤹ᤖ ᤜᤠᤒᤧ᤹. ᤁᤖ ᤁᤧᤛᤡᤔᤧᤸᤗᤧ ᤗᤠᤃᤡ ᤔᤧᤖᤡᤱ ᤔᤧᤎᤰᤋᤧᤴᤏᤧ᤹॥ ᤂᤧᤏᤧ᤹ ᤁᤢᤎᤧᤃᤣᤰᤐᤠᤴ ᤔᤧᤓᤠ᤺ᤰᤂᤧᤴᤏᤧ᤹ ᤀᤡᤃᤪ ᤁᤧᤗᤠᤱᤛᤢ᤺ᤵᤜᤠ᤹ ᤔᤧᤓᤧᤴᤍᤧᤴᤏᤧ᤹॥ ᤁᤧᤒᤥᤱᤒᤠ ᤁᤧᤕᤢᤒᤠ ᤁᤢᤀᤡᤛᤡᤰ ᤆᤣᤗᤢᤵ ᤂ᤺ᤱᤗᤢᤵ ᤏᤧᤋᤩᤢᤰᤔᤠ ᤛᤠᤰᤌᤡᤶᤜᤠ᤹ ᤀᤥᤛᤣ᤺ᤴᤎᤠᤱ ᤔᤧᤈᤥᤃᤧᤴᤏᤧ᤹ ᤀᤡᤃᤪ ᤀᤠ᤺ᤴᤇᤡᤱᤔᤠ ᤁᤧᤒᤡᤒᤠ ᤋᤣ᤺ᤱᤈᤢᤶᤜᤠ᤹ᤖᤧ ᤔᤧᤍᤠᤖᤢᤒᤠ ᤁᤢᤈᤠᤴ ᤔᤧᤍᤠ᤺ᤰᤋᤧᤴᤏᤧ᤹॥” 18 ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤁᤴ ᤁᤢᤍᤠ᤺ᤴᤍᤡᤰᤔᤠ ᤋᤠᤏᤠᤶ ᤔᤏᤠᤜᤠ᤹ ᤔᤧᤳᤋᤢᤱᤛᤡᤱ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤔᤣ᤺ᤳᤋᤧᤴ ᤕᤢ᤺ᤴᤇᤡᤰ ᤔᤠᤛᤡᤱ॥ ᤆᤥᤃᤧ᤹ ᤔᤧᤳᤋᤠᤱᤅᤠᤱ ᤘᤕᤧᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤢᤍᤠ᤺ᤴᤍᤡᤰᤔᤠ ᤋᤠᤏᤠᤶ ᤀᤠᤱᤃᤠ᤹ ᤆᤥᤃᤢᤱ॥ 19 ᤂᤧᤒᤩᤠᤱ ᤔᤏᤠᤜᤠ᤹ᤖᤧ ᤀᤠᤱᤃᤠ᤹ ᤛᤣ᤺ᤴᤔᤧᤍᤥᤛᤠᤱ. “ᤁᤴ ᤁᤧᤖᤧᤰ ᤐᤠ᤺ᤴᤜᤠ᤹ᤖᤧ ᤁᤢᤒᤣᤴ ᤌᤧᤔᤠᤒᤣ᥅ ᤂᤧᤏᤧ᤹ ᤀᤠᤏᤡᤃᤣ ᤌᤧᤔᤠ ᤔᤧᤵᤔᤠ ᤕᤠᤵᤔᤡ ᤁᤧᤃᤥ᤺ᤵᤐᤠᤒᤣ᥅” 20 ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤂᤧᤱᤜᤠ᤹ ᤔᤧᤳᤋᤢᤱᤛᤡᤱ. “ᤕᤜᤘᤣ ᤍᤠᤱᤒᤠᤗᤠᤶ ᤀᤡᤱᤄᤱᤎᤡᤰ ᤀᤠᤱᤃᤠ᤹ᤀᤥ ᤁᤧᤖᤧ— 21 ᤁᤴ ᤀᤡᤱᤄᤱᤅᤡᤴ ᤀᤡᤛᤪᤠᤀᤡᤗᤒᤠ ᤜᤡᤶᤛᤕᤱᤜᤠ᤹ ᤔᤧᤳᤋᤧᤛᤧ᤹. ‘ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤂᤡᤏᤡ᤹ ᤁᤶᤒᤪᤠᤱ ᤔᤧᤵᤔᤠᤗᤠᤶ ᤏᤢ ᤂᤡᤏᤡ᤹ ᤏᤧᤒᤥ ᤐᤵᤔᤠ. ᤂᤡᤏᤡ᤹ ᤛᤡᤰᤁᤢᤶ ᤏᤡᤱᤘᤠ᤹ ᤛ᤺ᤵᤔᤠᤍᤧᤴ. ᤀᤠᤱᤃᤠ᤹ ᤀᤠᤜᤡᤶᤔᤡᤴ ᤀᤠᤛᤢᤳᤌᤥ ᤆᤥᤃᤢᤱ᤹॥ ᤕᤜᤢᤍᤠᤀᤥ ᤁᤧᤗᤧᤖᤢᤶ ᤁᤧᤎᤠᤶᤛᤡᤶᤒᤠ ᤂᤡᤏᤡ᤹ ᤕᤧᤶᤒᤡᤳᤇᤠᤛᤠᤜᤠ᤹ ᤏᤢ ᤔᤧᤴᤇᤢᤔᤠ ᤛᤠᤜᤠ᤹ ᤋᤠᤓᤣ᤺ᤸᤗᤧ ᤔᤧᤛᤧᤖᤢᤛᤡ᤹॥ 22 ᤂᤧᤒᤩᤠᤱ ᤀᤡᤈᤁᤡᤀᤣᤗᤖᤧ ᤆᤥᤃᤢᤱᤀᤠᤱ ᤘᤠ᤹ᤒᤠ ᤜᤧᤰᤁᤣ ᤂᤡᤏᤡ᤹ ᤁᤧᤈᤥᤃᤢᤶ᤹॥ ᤔᤏᤠᤜᤠ᤹ᤖᤧ ᤔᤧᤏᤡᤛᤢᤖ ᤂᤡᤏᤡ᤹ ᤔᤧᤖᤡᤱ ᤁᤧᤴᤎᤰᤋᤡᤴ᤹ ᤀᤡᤃᤪ ᤋᤣ᤺ᤱᤈᤢᤶᤜᤠ᤹ᤖᤧ ᤔᤧᤍᤠᤖᤢᤒᤠ ᤁᤢᤈᤠᤴ ᤁᤧᤈᤠᤶᤔᤠᤱ ᤀᤠᤵᤑᤣᤰ ᤀᤠ᤺ᤴᤇᤡᤱᤔᤠ ᤁᤧᤶᤒᤡᤀᤠᤛᤡᤴ᤹॥ 23 ᤂᤡᤏᤡ᤹ ᤌᤧᤃᤣᤰᤐᤠᤜᤠ᤹ ᤁᤧᤛᤢ᤺ᤵᤋᤢᤶ ᤁᤧᤓᤳᤇᤢᤶ᤹. ᤜᤧᤰᤁᤩᤠᤱ ᤂᤡᤏᤡ᤹ ᤗᤠᤱᤛᤢ᤺ᤵᤜᤠ᤹ ᤁᤧᤶᤓᤧᤴᤍᤢᤶᤔᤡᤴ᤹॥ ᤂᤡᤏᤡ᤹ ᤔᤧᤖᤡᤱ ᤁᤧᤴᤎᤰᤋᤡᤴ ᤀᤡᤃᤪ ᤁᤧᤴᤜᤠᤒᤡᤴ᤹. ᤁᤖ ᤂᤡᤏᤡ᤹ ᤗᤠᤕᤥᤜᤠ᤹ᤖᤧ ᤆᤥᤃᤢᤸᤗᤧ ᤂᤡᤏᤡ᤹ ᤔᤢᤍᤥᤂᤠᤶᤍᤥ ᤁᤧᤒᤥ᤺ᤰᤂᤡ᤹॥ ᤂᤡᤏᤡ᤹ ᤁᤧᤖᤧᤰ ᤑᤧᤴᤕᤠ᤺ᤶᤒᤰ ᤁᤧᤈᤥᤃᤢᤶᤔᤠᤱ ᤁᤧᤘᤕᤡᤒᤠᤸᤗᤧ ᤁᤢᤗᤧᤰᤘᤠ ᤂᤡᤏᤡ᤹ ᤛᤫᤠ᤺ᤳᤋᤠᤱ ᤔᤧᤖᤡᤱ ᤁᤧᤎᤰᤋᤡ᤹॥ 24 ᤀᤡᤈᤁᤡᤀᤣ᤺ᤸᤗᤧᤴ ᤂᤡᤏᤡ᤹ ᤗᤠᤃᤡ ᤗᤳᤇᤠ ᤔᤡᤰᤛᤣ᤺ᤴᤗᤥ. ᤂᤢᤏᤧ᤹ ᤆᤥᤃᤢᤀᤠᤱ ᤘᤠ᤹ᤒᤠ ᤜᤧᤰᤁᤣᤀᤣ ᤂᤡᤏᤡ᤹ ᤁᤧᤈᤥᤃᤢᤶ᤹॥ ᤜᤧᤰᤁᤩᤠᤱ ᤂᤧᤴ ᤕᤧᤶᤔᤡᤴ ᤋᤠ᤺ᤸᤗᤧ. ᤀᤠᤱᤃᤠ᤹ᤀᤣ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠ ᤑᤠ᤹ᤀᤠᤱ ᤂᤡᤏᤡ᤹ ᤏᤡᤱᤘᤠ᤹ ᤁᤧᤄᤥᤛᤢᤶᤗᤥ॥’” 25 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤔᤧᤳᤋᤠᤱ. “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤂᤧᤸᤗᤧ ᤕᤠ᤺ᤴᤍᤡᤰ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤎᤢᤶᤒᤠ ᤜᤠᤱᤕᤰᤁᤡᤴ. ᤂᤢᤴᤇᤡ᤹ ᤏᤡᤱᤘᤠ᤹ ᤕᤧᤕᤧ ᤗ᤹ᤔᤠᤴ ᤏᤢ ᤔᤡᤔᤡᤍᤡᤱᤅᤡᤴ. ᤂᤢᤴᤇᤡ᤹ ᤏᤡᤱᤘᤠ᤹ᤖᤧ ᤏᤠ᤺ᤰᤋᤢᤒᤠ ᤐᤠ᤺ᤴᤏᤡᤴ. ᤂᤢᤴᤇᤡ᤹ ᤛᤠ᤹ᤖᤡᤰ ᤛᤡᤖᤠ᤹ ᤁᤧᤎᤠᤱᤒᤠ ᤕᤠᤱᤛᤠᤁᤢᤴᤎᤣᤴ ᤀᤠᤱᤃᤠ᤹ ᤋᤣ᤹ᤖᤢᤱ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤧᤶᤒᤡᤳᤇᤠᤛᤠᤜᤠ᤹ ᤏᤢ ᤔᤧᤴᤇᤢᤔᤠ ᤛᤠᤜᤠ᤹ᤀᤠᤱ ᤀᤠᤱᤃᤠ᤹ ᤋᤣ᤹ᤖᤢᤱᤛᤡᤱᤅᤠᤱ ᤐᤣ᤺ᤰᤁᤠ॥ 26 ᤜᤧᤰᤁᤩᤠᤱ ᤂᤧᤸᤗᤧ ᤕᤠ᤺ᤴᤍᤡᤰ ᤁᤧᤜᤡᤱᤒᤠ ᤁᤧᤕᤠ᤺ᤰᤐᤠ ᤗᤳᤇᤠ ᤔᤏᤠᤎᤡᤰ ᤕᤖᤢᤛᤗᤧᤔᤗᤠᤶ ᤒᤣᤒᤡᤗᤥᤏᤀᤥ ᤂᤧᤏᤧ᤹ᤀᤥ ᤑᤧᤴ᤹ ᤜᤧᤰᤁᤩᤠᤱ ᤌᤧᤔᤠ ᤐᤥ᤺ᤰᤂᤧᤀᤠᤱ ᤘᤠ᤹ ᤑᤠ᤹ᤀᤠᤱ ᤂᤧᤸᤗᤧ ᤂᤧᤏᤧ᤹ ᤁᤧᤔᤧᤳ॥ 27 ᤜᤧᤰᤁᤩᤠᤱ ᤂᤢᤏᤧ᤹ ᤁᤧᤳᤋᤠ᤺ᤸᤗᤧ. ᤂᤧᤏᤧ᤹ ᤁᤧᤀᤡᤰᤗᤠᤴ ᤂᤡᤔᤥ ᤏᤢ᤺ᤱ᤹ ᤜᤧᤰᤁᤣᤗ᤹ᤖᤡᤰ ᤂᤧᤏᤧ᤹ ᤂᤢᤏᤧ᤹ᤏᤢ ᤋᤠ᤹ᤈᤧᤱᤔᤠ ᤁᤧᤛᤢᤰ. ᤜᤧᤰᤁᤩᤠᤱ ᤁᤴ ᤔᤏᤠᤜᤠ᤹ᤖᤧ ᤗᤠᤃᤡ ᤂᤧᤏᤧ᤹ ᤔᤡᤰᤛᤣᤴ ᤁᤧᤒᤥᤱ᤹॥ ᤂᤶᤓᤩᤠᤱ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢᤖᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.