ᤀᤡᤈᤁᤡᤀᤣᤗ 23 - LIFOTNTᤁᤢ᤹ᤀᤡᤃᤧᤓᤧᤶᤔᤠ ᤁᤢᤴᤏᤧ᤹ ᤁᤢᤴᤛᤠ᤹ 1 ᤕᤜᤘᤣ ᤍᤠᤱᤒᤠᤗᤠᤶ ᤁᤴ ᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤁᤧᤖᤧ— 2 “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤌᤡᤰᤗᤧᤱ ᤗᤳᤇᤠ ᤔᤠ᤺ᤸᤗᤧ ᤁᤢᤛ᤻ᤛᤠ ᤔᤧᤴᤇᤢᤔᤠ ᤏᤧᤳᤇᤡ ᤏᤧ᤹ᤏᤢᤛᤠ᤹ ᤘᤕᤧᤳᤇᤡ॥ 3 ᤔᤡᤛᤪ ᤗᤠᤈᤣ᤹ᤀᤥ ᤂᤧᤴ ᤏᤧᤵᤑᤢ ᤁᤧᤳᤏᤡᤔᤠ ᤐᤥ᤺ᤰᤂᤧᤳᤇᤡ॥ ᤛᤡᤛᤠᤃᤧᤴ ᤔᤧᤴᤇ᤻ᤕᤠ ᤁᤧᤖᤧᤳᤇᤡᤸᤗᤧᤛᤠ ᤂᤢᤴᤇᤡ᤹ ᤏᤢᤒᤰᤜᤠ᤹ᤖᤧ ᤕᤧᤶᤒᤡᤳᤇᤠᤜᤠ᤹ ᤂᤢᤴᤇᤡ᤹ ᤛᤡᤰᤆᤡᤔᤧᤖ ᤕᤠ᤺ᤶᤔᤠ ᤑᤠ᤺ᤰᤋᤧᤇᤢ॥ 4 ᤕᤶᤔᤧᤸᤗᤧ ᤁᤢᤔᤡᤱ ᤀᤥᤜᤥᤗᤠ ᤘᤕᤧ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤴᤛᤠ᤹ᤖᤧ ᤁᤢᤔᤡᤱ ᤀᤥᤜᤥᤗᤡᤒᤠ ᤘᤕᤧ॥ ᤀᤠᤱᤃᤠ᤹ ᤂᤢᤴᤇᤡ᤹ ᤋᤧᤴᤎᤠᤶ ᤔᤣ᤺ᤰᤂᤡᤶ ᤗᤡ᤺ᤰᤂᤢᤱᤛᤡᤱ. ᤂᤧᤒᤩᤠᤱ ᤂᤢᤴᤇᤡ᤹ ᤀᤠᤱᤃᤠ᤹ ᤀᤠᤗᤠᤃᤡ ᤕᤧᤶᤒᤡᤳᤇᤠᤛᤠᤜᤠ᤹ ᤏᤢ ᤔᤧᤴᤇᤢᤔᤠ ᤛᤠᤜᤠ᤹ ᤁᤳᤋᤧᤛᤢ ᤐᤡᤖᤠᤱᤛᤡᤱ॥ ᤀᤠᤱᤃᤠ᤹ ᤛᤠᤔᤖᤡᤕᤠ ᤏᤢ ᤕᤖᤢᤛᤗᤧᤔᤖᤧ ᤂᤢᤴᤇᤡ᤹ ᤕᤠ᤺ᤶᤒᤣᤀᤥ ᤐᤠ᤺ᤳᤋᤢᤱᤗ ᤐᤳᤋᤠ. ᤌᤣᤀᤠᤱᤓᤧᤸᤗᤧ ᤀᤥᤜᤥᤗᤠ᤺ᤴ ᤛᤠᤔᤖᤡᤕᤠ ᤏᤢ ᤀᤥᤜᤥᤗᤡᤒᤠ᤺ᤴ ᤕᤖᤢᤛᤗᤧᤔᤖᤥ॥ 5 “ᤂᤧᤒᤩᤠᤱ ᤀᤥᤜᤥᤗᤠ᤺ᤴ ᤀᤠᤱᤃᤠ᤹ᤀᤣ ᤀᤠᤔᤣᤳ ᤘᤕᤧᤛᤠᤱ ᤆᤠᤖᤠᤶᤔᤠ ᤕᤠ᤺ᤶᤒᤰ ᤆᤥᤃᤢ. ᤜᤧᤰᤁᤩᤠᤱ ᤂᤢᤏᤧ᤹ ᤀᤛ᤻ᤛᤢᤖᤡ ᤌᤰᤛᤢᤒᤠᤜᤠ᤹ ᤗᤧᤵᤔᤠᤱ ᤁᤢᤏᤡᤱᤘᤠ᤹ ᤀᤡᤃᤣ᤺ᤰ ᤗ᤹ᤖᤧ॥ 6 ᤂᤧᤱᤜᤠ᤹ ᤁᤧᤖᤧᤰ ᤐᤏᤢᤏᤢᤒᤠ ᤌᤠᤱᤒᤧᤴ ᤔᤏᤠ. ᤐᤄᤧᤶ ᤁᤧᤄᤧᤶᤒᤠ ᤜᤡ᤺ᤰᤕᤱᤕᤱᤒᤠ ᤋᤣᤳ ᤁᤧᤈᤠᤱᤒᤠ. ᤌᤰᤐᤣᤒᤠ ᤏᤢ ᤌᤰᤔᤥᤒᤠ ᤂᤢᤴᤇᤡ᤹ ᤀᤴᤜᤠ᤹ᤖᤧᤴ ᤀᤴᤗᤠᤎᤠ ᤁᤧᤗᤥᤱᤒᤠ ᤔᤧᤘᤕᤧ॥ 7 ᤜᤧᤰᤁᤣᤗ᤹ᤖᤡᤰ ᤀᤜᤥᤗᤡᤒᤠ᤺ᤸᤗᤧ ᤂᤢᤏᤧ᤹ ᤀᤠᤵᤑᤣᤰ ᤀᤛ᤻ᤛᤢᤖᤒᤠ ᤔᤧᤛᤣᤃᤢᤛᤡᤒᤠ ᤁᤧᤖᤧᤰ ᤔᤏᤠᤜᤠ᤹ᤏᤢ ᤁᤧᤳᤏᤡᤔᤠ ᤕᤠ᤺ᤶᤒᤰ ᤆᤥᤃᤢ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤠᤘᤠᤀᤡᤳᤗᤠᤜᤠ᤹ ᤛᤧᤘᤠ ᤔᤧᤳᤋᤢᤛᤡᤀᤠᤱ ᤂᤢᤏᤧ᤹ ᤀᤠᤵᤑᤣᤰ ᤀᤠᤛᤢᤳᤌᤥ ᤆᤥ᤺ᤰᤛᤡᤱ॥ 8 ᤂᤢᤏᤧ᤹ ᤔᤡᤛᤪᤗᤠᤶ ᤗ᤺ᤴᤍᤧᤌᤠᤅᤧᤸᤗᤧ. ᤂᤢᤏᤧ᤹ ᤁᤧᤳᤏᤡᤒᤠ ᤆᤥ᤺ᤰᤔᤠ ᤁᤢᤕᤠ᤺ᤶᤒᤰᤁᤡᤴ ᤀᤣᤃᤠᤱ ᤔᤧᤗᤧᤖᤢᤴ ᤔᤧᤎᤏᤧᤴ॥ ᤔᤡᤛᤪᤒᤠ ᤔᤏᤠᤜᤠ᤹ ᤂᤧᤴᤏᤢ ᤔᤧᤀᤡᤵᤛᤧᤸᤗᤧ. ᤂᤢᤏᤧ᤹ ᤁᤢᤏᤢᤒᤰᤜᤠ᤹ᤖᤧ ᤂᤢᤴᤇᤡ᤹ ᤛᤡᤰᤆᤡᤔᤧᤒᤠ ᤏᤢ ᤂᤢᤏᤧ᤹ ᤁᤧᤳᤏᤡᤔᤠ ᤔᤧᤃᤳᤋᤢᤸᤗᤧᤒᤠ ᤁᤢᤀᤡᤛᤡᤰ ᤔᤧᤴᤇ᤻ᤕᤠ ᤘᤕᤧᤸᤗᤧᤒᤠ ᤜᤧᤰᤁᤣᤀᤣ ᤂᤧᤴ ᤀᤠᤸᤗᤛᤠᤱ ᤆᤡ᤺ᤴᤈᤡ᤺ᤴ ᤁᤧᤄᤢᤔᤠ ᤆᤥᤃᤧ॥ 9 “ᤂᤧᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤛᤠ᤹ᤖᤡᤰ ᤗᤢᤱᤔᤠ᤹ ᤜᤠ᤺ᤳᤋᤢᤛᤡᤒᤠ ᤀᤛ᤻ᤛᤢᤖᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤀᤠᤱᤃᤠ᤹ ᤂᤧᤴ ᤌᤠᤛᤢᤱ᤹॥ 10 ᤂᤧᤱᤜᤠ᤹ᤖᤧ ᤂᤢᤏᤧ᤹ ᤗᤧᤰᤆᤠᤒᤧᤎᤡᤰ ᤔᤧᤈᤥᤃᤢ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤥᤃ᤻ᤒᤠ ᤕᤥ᤺ᤃ᤻ᤔᤠ ᤁᤢᤀᤡᤛᤡᤰ ᤂᤧᤸᤗᤧ ᤁᤢᤛ᤻ᤛᤠᤜᤠ᤹ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡ. ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤂᤧᤴ ᤔᤧᤛᤩᤧᤖᤢ॥ ᤂᤢᤏᤧ᤹ ᤂᤢᤶᤍᤡᤱ ᤂᤥᤛᤢᤀᤠᤱ ᤀᤣᤃᤠᤱ. ᤂᤢᤏᤧ᤹ ᤁᤢᤀᤡᤱ ᤁᤢᤏᤠᤶᤔᤡᤴ ᤗᤠᤈᤣ᤹ᤀᤥᤒᤠ ᤁᤧᤖᤧᤰ ᤔᤧᤴᤇᤢᤔᤠᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢ॥ 11 “ᤀᤥᤜᤥᤗᤠ᤺ᤸᤗᤧ ᤁᤢᤴᤏᤧ᤹ ᤀᤜᤥᤗᤡᤒᤠᤖᤧ ᤌᤧᤔᤠ ᤐᤥ᤺ᤰᤂᤧ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤂᤢᤏᤧ᤹ ᤏᤡᤛᤢᤀᤠᤱ ᤐᤳᤇᤧᤛᤠᤱ. ᤂᤢᤏᤧ᤹ ᤁᤢᤴᤏᤧ᤹ᤖᤧ ᤏᤠ᤺ᤳᤋᤢᤒᤠ ᤗᤠᤶᤜᤠ᤹ᤀᤣ ᤁᤢᤴᤛᤠ᤹ ᤀᤥᤜᤥᤗᤡᤒᤠ᤺ᤸᤗᤧ ᤏᤠ᤺ᤳᤋᤢ॥ ᤜᤧᤰᤁᤩᤠᤱ ᤂᤢᤏᤧ᤹ ᤕᤧᤶᤒᤠ ᤁᤥ᤺ᤵᤔᤠ ᤏᤢ ᤁᤧᤳᤏᤡᤔᤠ ᤆᤥ᤺ᤰᤔᤠ ᤕᤠ᤺ᤶᤒᤰᤁᤥ ᤗᤠᤵᤑᤣᤛᤡᤱᤅᤠᤱ ᤀᤠᤸᤗᤛᤠᤱ ᤛᤠ᤹ᤖᤡᤰ ᤂᤢᤏᤧ᤹ ᤑᤧᤳᤗᤠ᤹ᤖᤧ॥ 12 ᤂᤧᤴ ᤁᤧᤄᤧᤶᤛᤡᤱᤒᤠ ᤌᤰᤛᤢᤒᤠ ᤆᤠᤱᤜᤠ᤹ ᤁᤧᤈᤠᤱᤒᤠ. ᤂᤧᤴ ᤀᤛ᤻ᤛᤢᤖᤒᤠ ᤛᤢᤜᤠᤱᤃᤧᤶᤒᤠ. ᤌᤰᤐᤣᤒᤠᤜᤠ᤹ ᤏᤢ ᤌᤰᤔᤥᤒᤠ. ᤂᤧᤴ ᤂᤢᤴᤇᤡ᤹ ᤀᤴᤜᤠ᤹ᤖᤧᤴ ᤀᤴᤗᤠᤎᤠᤜᤠ᤹ ᤁᤧᤗᤥᤱᤒᤠ. ᤂᤧᤴ ᤁᤧᤖᤧᤰ ᤐᤏᤢᤏᤢᤒᤠ ᤌᤠᤱᤒᤧᤴ ᤔᤏᤠᤜᤠ᤹ᤀᤥ ᤂᤢᤏᤧ᤹ ᤔᤧᤴᤇ᤻ᤕᤠ ᤀᤥᤛᤣ᤺ᤴᤎᤠᤱ ᤆᤥ᤺ᤰᤛᤡᤱ॥ 13 ᤂᤢᤏᤧ᤹ ᤁᤢᤴᤏᤧ᤹ ᤜᤧᤰᤁᤣᤀᤣ ᤀᤠᤛᤢᤳᤌᤥ ᤆᤥ᤺ᤰᤛᤡᤱᤅᤠᤱ ᤂᤧᤴ ᤐᤖᤡᤰᤗᤧ ᤂᤢᤏᤧ᤹ ᤐᤣᤖ ᤐᤳᤇᤧᤒᤠ ᤀᤠᤱᤃᤠ᤹ ᤏᤡᤛᤢᤱ॥ 14 “ᤂᤧᤒᤩᤠᤱ ᤂᤧᤸᤗᤧ ᤁᤧᤳᤏᤡᤔᤠ ᤆᤥ᤺ᤰᤔᤠ ᤁᤢᤕᤠ᤺ᤶᤒᤰᤁᤡᤴ ᤀᤠᤸᤗᤛᤠᤱ ᤕᤖᤡᤰ ᤑᤥᤛᤢᤖ ᤋᤣ᤹ᤖᤢ॥ ᤗᤳᤇᤠ ᤗᤢᤱᤎᤠᤰᤁᤥ ᤔᤧᤗᤰᤋᤢᤀᤠᤱ ᤐᤳᤇᤧᤒᤠ ᤐᤄᤧᤶ ᤁᤧᤄᤧᤶᤒᤠ ᤁᤢᤜᤧ᤺ᤳᤗᤠ ᤆᤠᤱᤜᤠ᤹ ᤁᤧᤈᤠᤱᤒᤠ ᤒᤣᤒᤡᤗᤥᤏᤒᤠ ᤌᤰᤛᤢᤒᤠ ᤛᤢᤜᤠᤱᤃᤧᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤀᤡᤳᤇᤠᤵᤜᤠ᤹ᤀᤥ ᤂᤢᤏᤧ᤹ ᤗᤢᤱᤔᤠ᤹ᤜᤡ᤺ᤶᤔᤥ ᤌᤩᤧ॥ 15 ᤐᤄᤧᤶ ᤁᤧᤄᤧᤶᤒᤠ ᤑ᤹ᤀᤡᤜᤠ᤹ ᤂᤢᤴᤇᤡ᤹ ᤁᤣᤱᤜᤠ᤹ᤀᤥ ᤁᤒᤪᤡᤱ ᤔᤧᤕᤢᤵᤛᤢᤀᤠᤱ ᤐᤳᤇᤧ. ᤜᤧᤰᤁᤩᤠᤱ ᤂᤢᤴᤇᤡ᤹ ᤌᤧᤃᤣ᤺ᤰᤐᤥ ᤋᤧᤸᤗᤧᤶ ᤐᤠᤃᤖᤡᤜᤠ᤹ ᤔᤧᤄᤢ᤺ᤰᤂᤢᤀᤠᤱ ᤐᤳᤇᤧ॥ ᤒᤣᤒᤡᤗᤥᤏ ᤗᤠᤈᤣ᤹ᤗᤠᤶ ᤁᤧᤓᤧᤶᤒᤠ ᤀᤴᤗᤠᤎᤠ ᤁᤧᤗᤥᤱᤒᤠ ᤛᤢᤜᤠᤱᤕᤢᤰᤐᤠᤜᤠ᤹ ᤁᤢᤀᤡᤛᤡᤰ ᤂᤧᤱᤜᤠ᤹ᤖᤧ ᤆᤠᤱ ᤔᤧᤈᤠᤰᤂᤢᤀᤠᤱ ᤘᤕᤧ॥ 16 ᤂᤢᤏᤧ᤹ ᤁᤴ ᤀᤡᤳᤇᤠᤵᤜᤠ᤹ ᤏᤡᤛᤢᤛᤡᤸᤗᤧ. ᤂᤢᤏᤧ᤹ ᤀᤠᤵᤑᤣᤰ ᤁᤢᤎᤰᤁᤡᤴ ᤂᤧᤱᤜᤠ᤹ ᤐᤡᤔᤠᤛᤡᤖᤧ ᤗᤠᤃᤡ ᤁᤢᤏᤡᤱᤘᤠ᤹ ᤀᤡᤃᤣ᤺ᤰ ᤗ᤹ᤖᤧ. ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ ᤂᤢᤏᤧ᤹ᤀᤥ ᤔᤧᤓᤧᤴᤗ ᤑᤠ᤹ᤀᤠᤱ ᤀᤡᤱᤛᤠᤒᤠᤜᤠ᤹ ᤂᤢᤏᤧ᤹ ᤒᤣᤒᤡᤗᤥᤏ ᤐᤠᤱᤄᤢᤍᤣᤛᤢᤛᤡ॥ 17 ᤂᤧᤒᤩᤠᤱ ᤂᤧᤱᤜᤠ᤹ ᤔᤧᤓᤧᤖᤧᤀᤠᤱ ᤂᤢᤴᤇᤡ᤹ ᤛᤡᤖᤠ᤹ ᤁᤧᤎᤠᤱᤒᤠ ᤀᤡᤵᤏᤠᤀᤥ ᤂᤧᤴ ᤔᤧᤈᤡ᤺ᤴᤍᤢᤀᤠᤱ ᤂᤢᤏᤧ᤹ᤏᤢ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤔᤧᤈᤥᤃᤢ॥ ᤜᤧᤰᤁᤣᤃ ᤂᤢᤏᤧ᤹ ᤔᤧᤈᤡ᤺ᤴᤍᤢᤀᤠᤱ ᤀᤣᤃᤠᤱ ᤂᤢᤏᤧ᤹ ᤂᤧᤱᤜᤠ᤹ ᤆᤡ᤺ᤳᤋᤢᤛᤡᤀᤠᤱ ᤏᤠ᤹ᤖᤢᤛᤡ॥ 18 “ᤜᤧᤰᤁᤣᤗ᤹ᤖᤡᤰᤁᤣ. ᤂᤧᤸᤗᤧ ᤁᤢᤴᤏᤧ᤹ ᤏᤠ᤹ᤖᤢᤱᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤀᤜᤥᤗᤡᤒᤠ᤺ᤴᤏᤢ ᤁᤢᤛᤡᤰᤁᤧᤗᤧ᤺ᤱᤒᤠ ᤐᤥ᤺ᤰᤂᤠᤱ. ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤀᤠᤵᤑᤣᤰ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤛᤠᤰᤛᤠᤰᤔᤠ ᤗᤧᤱᤛᤡᤱ ᤜᤧᤰᤁᤩᤠᤱ ᤛᤥᤖᤡᤰ ᤀᤡᤶᤔᤠ ᤕᤠ᤺ᤶᤒᤰᤁᤥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤡᤰᤆᤡᤔᤧᤖ ᤁᤢᤎᤰᤁᤡᤴ ᤐᤡᤖᤢᤛᤡ॥ 19 ᤜᤧᤰᤁᤣᤛᤠᤱ ᤂᤢᤏᤧ᤹ ᤘᤧᤴᤍᤢᤀᤠᤱ ᤘᤕᤧᤸᤗᤧ ᤔᤡᤛᤪ ᤗᤠᤈᤣ᤹ᤀᤥ ᤁᤧᤳᤏᤡᤔᤠ ᤆᤥᤃᤢᤒᤠ ᤕᤠ᤺ᤶᤒᤰᤁᤡᤴ ᤏᤡᤱᤘᤠ᤹ ᤀᤡ᤺ᤵᤔᤧᤸᤗᤧ. ᤀᤠᤸᤗᤛᤠᤱ ᤛᤠ᤹ᤖᤡᤰ ᤁᤧᤳᤏᤡᤔᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤗᤧᤵᤔᤠᤱ ᤂᤢᤏᤧ᤹ ᤗᤠᤛᤧ॥ 20 ᤀᤍᤱᤅᤡᤸᤗᤧᤴ ᤕᤠᤖᤡᤰ ᤕᤶᤒᤠ ᤗᤢᤱᤔᤠ᤹ ᤜᤡ᤺ᤵᤋᤢᤛᤡᤒᤠᤜᤠ᤹ᤖᤧ ᤂᤢᤴᤇᤡ᤹ ᤛᤠᤷᤍᤠᤶᤜᤠ᤹ ᤏᤢ ᤀᤴᤏᤡᤸᤗᤧ ᤗ᤺ᤳᤋᤢᤒᤠ ᤂᤧᤴ ᤛᤧᤔᤧᤘᤠᤜᤠ᤹ ᤂᤢᤏᤧ᤹ ᤁᤢᤛᤡᤖᤠ᤹ ᤌᤠᤅᤧ॥ 21 ᤂᤧᤸᤗᤧᤆᤥᤃᤢᤸᤗᤧ. ᤀᤥᤜᤥᤗᤡᤒᤠᤀᤣ. ᤂᤧᤏᤧ᤹ ᤔᤡᤛᤪᤀᤥ ᤔᤧᤴᤇ᤻ᤕᤠ ᤁᤧᤘᤕᤧᤸᤗᤧ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤛᤡᤰᤆᤡᤶᤔᤠᤖᤧ ᤗᤠᤃᤡ ᤂᤧᤏᤧ᤹ ᤁᤧᤏᤢᤒᤰᤜᤠ᤹ ᤕ᤹ᤔᤠ ᤁᤧᤓᤠ᤺ᤰᤋᤢᤛᤡᤒᤠ ᤁᤢᤀᤡᤛᤡᤰ ᤁᤧᤒᤣ᤺ᤰᤐᤠ ᤁᤧᤕᤧᤴᤜᤠ᤹ ᤂᤧᤏᤧ᤹ ᤁᤢᤈᤠᤓᤧᤸᤗ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤖᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤀᤥᤜᤥᤗᤡᤒᤠ᤺ᤴ ᤂᤠᤛᤧᤴ ᤆᤥᤃᤢ 22 “ᤂᤧᤸᤗᤧᤆᤥᤃᤢᤸᤗᤧ ᤀᤥᤜᤥᤗᤡᤒᤠᤀᤣ. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤂᤧᤏᤧ᤹ ᤁᤧᤛᤡᤰ ᤗᤧ᤺ᤰᤂᤧᤀᤠᤱ ᤌᤡᤰᤏᤠᤜᤠᤱ ᤁᤧᤜᤡᤛᤡᤱ ᤁᤧᤒᤣᤒᤠ ᤂᤧᤏᤧ᤹ ᤗᤢᤱᤔᤠ᤹ ᤁᤧᤜᤡ᤺ᤵᤋᤢᤛᤡᤒᤠ ᤛᤢᤘᤠᤱᤜᤠ᤹ᤀᤣ ᤁᤧᤖᤧᤰ ᤐᤡᤛᤠᤱᤗᤠᤶ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤐᤠᤱᤄᤢᤱ ᤋᤠᤛᤢᤱᤛᤡᤱ᤹॥ 23 ᤒᤣᤒᤡᤗᤥᤏᤒᤠ ᤕᤧᤰᤕᤰ ᤏᤢ ᤒᤣᤒᤡᤗᤥᤏᤒᤠ ᤁᤧᤖᤧᤰ ᤗᤠᤈᤣ᤹ᤜᤠ᤹ᤗᤠᤶ ᤜᤧᤰᤁᤩᤠᤱ ᤐᤁᤥᤍ. ᤛᤥᤀ. ᤁᤥᤀᤗᤠᤶ ᤔᤏᤠᤜᤠ᤹ ᤔᤧᤍᤠᤖᤥ॥ ᤜᤧᤰᤁᤩᤠᤱ ᤐᤏᤢᤏᤢᤒᤠ ᤌᤠᤱᤒᤧᤴ ᤌᤰᤐᤣᤒᤠᤜᤠ᤹. ᤌᤰᤔᤥᤒᤠᤜᤠ᤹ ᤀᤴᤗᤠᤎᤠ ᤁᤧᤗᤥᤱᤒᤠ ᤛᤢᤜᤠᤱᤕᤢᤰᤐᤠᤜᤠ᤹. ᤂᤶᤓᤩᤠᤱ ᤘᤣ᤹ ᤌᤥᤎᤥᤰᤐᤠ ᤋᤠᤰᤑᤠᤀᤥᤒᤠ ᤛᤢᤜᤠᤱᤕᤢᤰᤐᤠᤜᤠ᤹ ᤂᤢᤴᤇᤡ᤹ ᤁᤧᤖᤧᤰ ᤀᤴᤃᤧᤕᤢᤰᤐᤠᤜᤠ᤹ᤏᤢ ᤛᤥᤖᤡᤰ ᤀᤛ᤻ᤛᤢᤖᤡᤜᤠ᤹ ᤔᤧᤍᤠᤖᤥ॥ 24 ᤌᤠᤱᤃᤧᤳ ᤌᤥ ᤗᤠᤶ ᤂᤧᤱᤜᤠ᤹ ᤁᤧᤖᤧᤰ ᤀᤴᤗᤠᤎᤠᤜᤠ᤹. ᤐᤡᤳᤗᤠᤎᤠᤜᤠ᤹ᤏᤢ ᤛᤥᤛᤥᤖᤡᤰ. ᤜᤧᤰᤁᤩᤠᤱ ᤌᤱᤗᤧ ᤗᤠᤃᤡ ᤕᤠᤖᤡᤵ ᤁᤧᤒᤥᤱᤒᤠ ᤛᤠ᤹ᤖᤡᤰ ᤕᤖᤡᤰ ᤌᤰᤛᤢᤒᤠᤜᤠ᤹ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤔᤧᤕᤢᤖᤢᤖᤥ॥ ᤂᤧᤱᤜᤠ᤹ ᤁᤧᤖᤧᤰ ᤐᤡᤛᤠᤱ ᤂᤢᤴᤇᤡ᤹ ᤕᤧᤵᤔᤠᤍᤧᤴᤏᤥ ᤔᤧᤕᤧᤶᤛᤡᤱ᤹. ᤂᤥᤜᤠ᤹ ᤏᤢ ᤋᤠᤱᤄᤢ᤺ᤰᤜᤠ᤹ ᤁᤧᤕᤠᤱᤛᤡᤱᤒᤠ ᤑᤧᤈᤢᤶᤓᤧᤕᤠ ᤂᤈᤢᤶᤄᤕᤠ ᤁᤧᤜᤣᤒᤠ ᤔᤏᤠᤜᤠ᤹ᤖᤧ ᤂᤧᤏᤧ᤹ ᤁᤡᤷᤃᤵ ᤁᤧᤶᤃᤵ॥ ᤜᤧᤰᤁᤩᤠᤱ ᤂᤢᤶᤍᤡᤱᤗᤧ ᤗᤠᤃᤡ ᤀᤠᤱᤃᤠ᤹ ᤂᤧᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤜᤢᤰᤛᤢᤵᤏᤧᤖᤥ ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ ᤋᤠᤍᤠ ᤂᤧᤏᤧ᤹ ᤁᤧᤶᤔᤧᤳ॥ 25 ᤀᤠᤏᤠᤜᤧᤶᤔᤠ ᤀᤠᤛᤠᤰᤁᤧᤴᤏᤡᤴ ᤀᤠᤱᤃᤠ᤹ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤜᤡᤛᤢᤱ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠ᤹ᤖᤡᤰ ᤕᤠ᤺ᤰᤗᤧ᤹ᤀᤠᤱ ᤂᤧᤏᤧ᤹ ᤋᤠᤵᤑᤧ᤺ᤸᤗᤡᤰ ᤁᤧᤶᤔᤧᤳ॥ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤁᤧᤴᤒᤥ᤺ᤴ ᤏᤢ ᤁᤧᤏᤧᤰᤂᤥ᤹ᤜᤠ᤹ ᤔᤧᤗᤧᤒᤢ ᤁᤧᤶᤒᤡᤖᤥ ᤂᤧᤒᤩᤠᤱ ᤁᤧᤜᤡᤱᤒᤠ ᤁᤧᤕᤠ᤺ᤰᤐᤠᤀᤠᤱ ᤁᤧᤘᤠ᤹ᤒᤠ ᤀᤠᤳᤋᤡᤴᤜᤠ᤹ᤛᤠᤱ ᤋᤠᤓᤣ᤺ᤸᤗᤧ ᤔᤧᤛᤩᤧᤖᤢᤛᤡ᤹॥ ᤂᤧᤏᤧ᤹ ᤁᤧᤛ᤻ᤛᤠᤜᤠ᤹ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡ᤹. ᤜᤧᤰᤁᤩᤠᤱ ᤁᤧᤖᤧᤰ ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠᤜᤠ᤹ ᤔᤡᤔᤧᤎᤡᤰᤂᤢ ᤔᤧᤍᤣᤛᤢᤛᤡᤖᤥ॥ 26 ᤂᤧᤱᤜᤠ᤹ᤖᤧ ᤂᤧᤏᤧ᤹ ᤏᤢᤒᤠ ᤁᤧᤈᤠᤱᤜᤠ᤹ ᤏᤢ ᤁᤧᤔᤢᤎᤡᤱᤜᤠ᤹ ᤔᤧᤓᤧᤴᤍᤢᤀᤠᤱ ᤗᤧᤰᤆᤠᤒᤧᤎᤡᤰ ᤁᤧᤶᤈᤥᤰ॥ 27 ᤁᤶᤓᤗ᤹ᤖᤡᤰ ᤂᤧᤏᤧ᤹ ᤔᤡᤛᤪᤗᤠᤶ ᤁᤧᤎᤠᤰᤋᤢᤒᤠ ᤆᤠᤖᤠᤶᤔᤠ ᤁᤧᤕᤠ᤺ᤶᤒᤰᤁᤡᤴ ᤏᤢ ᤁᤧᤳᤏᤡᤔᤠ ᤆᤥ᤺ᤰᤔᤠ ᤁᤧᤕᤠ᤺ᤶᤒᤰᤁᤡᤴ ᤀᤠᤱᤃᤠ᤹ ᤛᤠᤰᤋᤢᤱ ᤐᤡᤏᤧᤖᤥ॥ ᤂᤧᤏᤧ᤹ ᤕᤠᤶᤔᤥ ᤀᤠᤓᤧᤸᤗᤧᤀᤠᤱ ᤂᤧᤴ ᤐᤠ᤺ᤴᤜᤠ᤹ᤀᤥ ᤁᤧᤏᤡᤱᤘᤠ᤹ ᤀᤡᤃᤣ᤺ᤰᤁᤠᤱ ᤔᤡᤰ ᤁᤧᤱᤃᤣ᤺ᤳᤋᤢᤴ᤹ ᤀᤡᤃᤪ ᤂᤧᤏᤧ᤹ ᤔᤡᤛᤪ ᤁᤧᤘᤕᤧᤒᤠ ᤁᤧᤕᤧᤶᤔᤡᤴ ᤁᤧᤗᤢᤱᤔᤠ᤹ ᤜᤡ᤺ᤶᤗ ᤂᤧᤏᤧ᤹ ᤏᤡᤱᤘᤠ᤹ ᤁᤧᤴᤀᤡ᤺ᤳᤋᤢᤴ᤹॥ 28 “ᤌᤣᤀᤠᤱᤓᤧᤸᤗᤧ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤀᤠᤱᤃᤠ᤹ ᤛᤧᤰᤂᤠᤀᤣ ᤂᤧᤏᤧ᤹ ᤂᤧᤴ ᤁᤧᤛᤡᤰ ᤁᤧᤗᤧ᤺ᤱᤒᤠ ᤏᤢ ᤁᤧᤈᤡ᤺ᤳᤋᤢᤛᤡᤒᤠ ᤂᤧᤏᤧ᤹ ᤁᤧᤏᤡᤱᤔᤡᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤜᤢᤰᤛᤢᤵᤏᤧᤖᤥ॥ 29 ᤂᤧᤱᤜᤠ᤹ᤖᤧ ᤂᤧᤏᤧ᤹ ᤐᤈᤡ᤺ᤳ ᤁᤧᤶᤈᤡ᤺ᤳᤋᤠᤱ ᤋᤠᤵᤑᤧ᤺ᤸᤗᤡᤰ ᤁᤧᤶᤔᤧᤳ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤃᤳᤋᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤁᤧᤶᤏᤠᤵᤐᤠᤱ ᤗᤧᤰᤆᤠᤒᤧᤎᤢ᤺ᤰᤛᤠ ᤁᤧᤶᤗᤧᤳ॥ ᤂᤧᤏᤧ᤹ ᤁᤧᤳᤏᤡᤔᤠ ᤆᤥ᤺ᤰᤔᤠ ᤁᤧᤕᤠ᤺ᤶᤒᤰᤁᤡᤸᤗᤧ ᤏᤠᤎᤠᤔᤧᤴ ᤁᤧᤖᤧᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤀᤥᤛᤣ᤺ᤴᤎᤠᤱ ᤐᤥᤱ᤹॥ ᤂᤧᤏᤧ᤹ ᤁᤧᤈᤠᤖᤠᤶᤔᤠ ᤁᤧᤕᤠ᤺ᤶᤒᤰᤁᤡᤴ ᤏᤢ ᤁᤧᤈᤧᤸᤗᤧᤰᤗᤧᤰ ᤗ᤹ᤔᤧᤸᤗᤧ 30 ᤁᤴ ᤂᤧᤏᤧ᤹ ᤁᤧᤛᤶᤎᤠᤱ ᤋᤠᤖᤢᤀᤠᤱ ᤘᤠ᤹. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤀᤠᤒᤠᤅᤣ ᤘᤣ᤹ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤏᤢ ᤁᤧᤳᤏᤡᤔᤠ ᤕᤠ᤺ᤶᤒᤰ ᤁᤧᤈᤥᤃᤢ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤏᤠᤘᤠᤀᤡᤳᤗᤠᤜᤠ᤹ ᤛᤧᤘᤠ ᤁᤧᤔᤧᤳᤋᤢᤛᤡᤀᤠᤱ ᤂᤧᤏᤧ᤹ ᤀᤠᤒᤠᤅᤣ ᤀᤠᤛᤢᤳᤌᤥ ᤁᤧᤈᤥ᤺ᤰᤛᤡᤱ॥ 31 ᤁᤧᤴᤏᤧ᤹ᤖᤧ ᤁᤢᤗᤠᤶᤜᤠ᤹ ᤂᤧᤏᤧ᤹ ᤁᤧᤏᤠ᤺ᤳᤋᤢᤀᤠᤱ ᤁᤧᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤂᤢᤏᤧ᤹ ᤌᤢᤅᤢᤒᤠ ᤜᤠᤒᤠ ᤂᤧᤴ ᤂᤥᤷᤕᤠᤴ ᤀᤠᤱᤃᤠ᤹ ᤂᤧᤏᤧ᤹ ᤌᤢᤱᤔᤠ ᤐᤠᤱᤏᤧᤖᤥ॥ 32 “ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ— “ᤂᤧᤏᤧ᤹ ᤁᤧᤴᤏᤧ᤹ᤖᤧ ᤗᤳᤇᤠ ᤕᤶᤒᤠ ᤏᤢ ᤐᤠᤰᤗᤢᤶᤗᤢᤶᤒᤠ ᤁᤢᤄᤥᤷᤕᤠᤀᤥᤗᤠᤶ ᤂᤧᤏᤧ᤹ ᤁᤧᤎᤢᤅᤢᤖᤥ॥ ᤁᤱᤃ ᤁᤢᤏᤠᤔᤧᤴᤇᤠ᤹ ᤏᤢ ᤁᤡᤏᤠ᤺ᤴᤍᤡ᤺ᤸᤗᤧ ᤁᤢᤶᤒᤪᤠᤀᤥ ᤌᤠᤖᤡᤰ ᤛᤎᤧᤰ ᤁᤧᤍᤡᤶᤒᤡ ᤆᤥᤰᤗᤥ॥ 33 ᤔᤛᤡᤱᤔᤠ ᤏᤢ ᤏᤡᤱᤘᤠ᤹ ᤋᤢᤰᤂᤣ᤺ᤸᤗᤧ ᤂᤧᤏᤧ᤹ ᤁᤧᤛᤢ᤺ᤵᤗᤥ. ᤌᤣᤀᤠᤱᤓᤧᤸᤗᤧ ᤁᤧᤄᤥᤷᤕᤠ᤺ᤱᤃ ᤏᤡᤱᤛᤠᤶ ᤏᤢ ᤔᤢᤍᤥᤂᤠᤶᤍᤥᤖᤧ ᤁᤢᤶᤒᤪᤠᤀᤥ ᤌᤧᤶᤒᤠ ᤘᤧᤸᤗᤧᤰ ᤁᤧᤍᤡᤶᤒᤠ ᤆᤥᤰᤗᤥ. ᤜᤠᤒᤠ ᤂᤧᤴ ᤂᤥᤷᤕᤠᤴ ᤁᤧᤴᤏᤧ᤹ ᤛᤠᤔᤖᤡᤕᤠ᤺ᤸᤗᤧ ᤌᤢᤅᤢᤖᤥ॥ 34 ᤂᤧᤏᤧ᤹ ᤂᤧᤴ ᤂᤥᤷᤕᤠᤴ ᤂᤳᤋᤪᤧᤰ ᤁᤢᤄᤠᤗᤧᤶ ᤐᤥᤱᤗ ᤌᤠᤖᤡᤰ ᤂᤧᤏᤧ᤹ ᤁᤧᤎᤢᤅᤢᤖᤥ ᤂᤧᤒᤩᤠᤱ ᤂᤧᤏᤧ᤹ ᤁᤴ ᤂᤥᤷᤕᤠᤴ ᤁᤢᤶᤈᤡᤰ ᤐᤥᤱᤗ ᤁᤧᤕ᤺ᤵᤛᤢᤖᤥ ᤜᤧᤰᤁᤩᤠᤱ ᤏᤡᤱᤘᤠ᤹ ᤋᤢᤰᤂᤣ ᤆᤠᤔᤥ ᤁᤧᤏᤢᤜᤠ᤹ ᤂᤠᤍᤢ᤺ᤰ ᤂᤠᤍᤢ᤺ᤰ ᤁᤧᤀᤢᤃᤢᤖᤥ॥ ᤀᤠᤱᤃᤠ᤹. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤴ ᤐᤠᤖᤠᤱᤅᤠᤱ ᤘᤠ᤹ᤖᤥ᥄ 35 “ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤜᤧᤰᤁᤩᤠᤱ ᤂᤧᤏᤧ᤹ ᤀᤠᤱᤃᤠ᤹ ᤏᤡᤱᤘᤠ᤹ ᤁᤧᤓᤣ᤺ᤳᤇᤠᤱᤅᤠᤱ ᤁᤧᤘᤠ᤹ᤒᤠ ᤏᤢ ᤂᤧᤏᤧ᤹ ᤁᤧᤀᤣ᤺ᤰᤁᤧᤴ ᤁᤧᤜᤡᤛᤠᤱ ᤁᤧᤒᤡᤖᤠᤱᤅᤠᤱ ᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ. ᤂᤧᤏᤧ᤹ ᤁᤧᤈᤥᤃᤢᤒᤠ ᤁᤧᤖᤧᤰ ᤆᤠᤖᤠᤶᤔᤠ ᤕᤠ᤺ᤶᤒᤰ ᤁᤧᤈᤥᤃᤢᤒᤠ ᤏᤢ ᤁᤧᤳᤏᤡᤔᤠ ᤕᤠ᤺ᤶᤒᤰ ᤁᤧᤈᤥᤃᤢᤒᤠᤸᤗᤧ ᤁᤢᤗᤧᤰᤘᤠᤴ ᤂᤧᤏᤧ᤹ ᤁᤧᤎᤖᤢᤖ ᤐᤥᤱᤗᤥ॥” ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤏᤧ᤹ᤏᤢᤛᤠ᤹ ᤏᤧᤵᤔᤠᤱ ᤂᤢᤶᤍᤡᤱ ᤐᤡᤖᤢᤛᤡ 36 ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤔᤧᤳᤋᤠᤱ. “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤂᤧᤏᤧ᤹ ᤀᤥᤜᤥᤗᤠ᤺ᤴ ᤏᤢ ᤀᤥᤜᤥᤗᤡᤒᤠ᤺ᤴ ᤂᤢᤴᤇᤡ᤹ ᤆᤥᤃᤧᤛᤢᤒᤠ ᤁᤧᤖᤧᤰ ᤕᤠᤶᤃᤧᤛᤡᤱᤒᤠ ᤗᤠᤕᤥᤜᤠ᤹ᤖᤧ ᤗᤠᤃᤡ ᤀᤠᤵᤋᤡᤰ ᤁᤢ᤺ᤳᤋᤧᤛᤧ᤹॥ 37 ᤂᤢᤴᤇᤡ᤹ ᤀᤠᤱᤃᤠ᤹ᤗᤠᤶ ᤛᤠᤘᤠ᤺ᤴᤍᤧᤇᤢᤛᤡᤒᤠ ᤛᤠᤜᤠ᤹ ᤛᤡᤍᤢᤱᤈᤓᤠ ᤁᤢᤀᤡᤛᤡᤰ ᤔᤡᤎᤡᤰᤂᤧᤇᤢᤛᤡᤀᤠᤱ ᤛᤧᤖᤧᤳᤇᤢᤛᤡ ᤜᤧᤰᤁᤩᤠᤱ ᤏᤠᤘᤠᤀᤡᤳᤗᤠᤜᤠ᤹ ᤛᤧᤘᤠ ᤔᤧᤳᤋᤧᤛᤢᤀᤠᤱ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤏᤢ ᤔᤏᤠᤛᤧᤵᤔᤠ ᤏᤧᤵᤔᤠᤱ ᤕᤠ᤺ᤶᤒᤰ ᤆᤥᤃᤧᤇᤢᤀᤠᤱ ᤘᤠ᤹ᤛᤡ॥ 38 ᤂᤧᤴᤏᤢ᤺ᤸᤗᤧᤀᤠᤱ ᤕᤖᤡᤰ. ᤀᤠᤱᤃᤠ᤹ ᤀᤠᤜᤡᤶᤔᤡᤴ ᤂᤢᤴᤇᤡ᤹ ᤆᤡ᤺ᤴᤍᤧᤳᤇᤢ ᤂᤶᤓᤩᤠᤱ ᤀᤠᤱᤃᤠ᤹ ᤀᤠᤛᤠᤒᤠᤌ ᤕᤧᤴᤏᤡᤴ ᤑᤣ᤺ᤴᤍᤧᤳᤇᤢᤀᤠᤱ ᤘᤠ᤹᥄ 39 ᤂᤢᤴᤇᤡ᤹ ᤏᤠᤘᤠᤀᤡᤳᤗᤠᤜᤠ᤹ᤀᤥ ᤂᤢᤴᤇᤡ᤹ ᤛᤠᤜᤠ᤹ ᤛᤡᤍᤢᤱᤈᤓᤠ ᤋᤥ᤺ᤴᤍᤧᤇᤢᤒᤠ ᤕᤧᤴᤏᤡᤸᤗᤧ ᤕᤠ᤺ᤴᤍᤡᤰᤁᤣ ᤜᤠᤱᤜᤠᤱ ᤗ᤹ᤖᤡᤰ ᤀᤠᤱᤃᤠ᤹ ᤀᤠᤜᤡᤶᤔᤥ ᤔᤠᤱᤛᤧᤘᤠ ᤆᤥ᤺ᤰᤛᤧ ᤂᤢᤴᤇᤡ᤹ ᤋᤩᤧᤛᤡ᥄ ᤂᤢᤴᤇᤡ᤹ ᤛᤡᤃᤠᤱ ᤗᤠᤛᤧᤛᤡᤀᤠᤱ ᤀᤠᤱᤃᤠ᤹ ᤀᤠᤜᤡᤶᤔᤧᤴ ᤆᤡ᤺ᤴᤍᤧᤳᤇᤢ॥ 40 “ᤂᤧᤴᤇᤡ᤹ ᤏᤧ᤹ᤏᤢᤛᤠ᤹ᤖᤧ ᤕᤧᤶᤒᤡᤳᤇᤠᤜᤠ᤹ ᤂᤥᤔᤠᤛᤡᤖᤧ ᤗᤠᤃᤡ ᤔᤠ᤺ᤱᤄᤠ ᤔᤠ᤺ᤱᤄᤠᤒᤠ ᤗᤠᤈᤣ᤹ᤜᤠ᤹ᤀᤥ ᤀᤡᤱᤛᤠᤒᤠᤜᤠ᤹ ᤁᤧᤒᤠᤱᤄᤧᤇᤢᤛᤡ॥ ᤂᤧᤒᤩᤠᤱ ᤂᤧᤱᤜᤠ᤹ ᤔᤧᤃᤧᤖᤧ ᤔᤧᤍᤩᤧ᤺ᤸᤗᤧ ᤂᤧᤴᤇᤡ᤹ ᤘᤠᤃᤧᤖᤢ᤺ᤶᤏᤧᤇᤡ. ᤂᤧᤴᤇᤡ᤹ ᤔᤡᤰᤛᤠᤱᤜᤠ᤹ ᤔᤠᤰᤛᤢ᤺ᤴᤍᤠ ᤁᤧᤈᤠ᤺ᤴᤍᤧᤇᤢ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤂᤧᤴᤇᤡ᤹ ᤁᤧᤖᤧᤰᤏᤢ᤺ᤸᤗᤧ ᤏᤢᤒᤠ ᤔᤢᤎᤡᤱᤜᤠ᤹ ᤁᤧᤘᤠ᤺ᤳᤏᤧᤳᤇᤡ॥ 41 ᤛᤧᤔᤢᤖᤡᤰᤁᤡᤸᤗᤧ ᤑᤔᤏᤠᤒᤠ ᤛᤠ᤹ᤖᤡᤰ ᤏᤢᤒᤠ ᤕᤢᤰᤏᤠᤀᤥ ᤂᤧᤴᤇᤡ᤹ ᤂᤧᤱᤜᤠ᤹ᤏᤢ ᤁᤧᤕᤢᤅᤧᤛᤡ ᤜᤧᤰᤁᤩᤠᤱ ᤀᤠᤱᤃᤠ᤹ ᤁᤢᤳᤆᤡᤒᤠ ᤀᤠᤛᤢᤰᤐᤠ ᤏᤢ ᤀᤠᤏᤡ᤺ᤱᤃᤣᤴ ᤂᤧᤴᤇᤡ᤹ ᤋᤃᤠᤱ ᤆᤵᤋᤧᤴ ᤁᤢᤗᤧ᤺ᤶ ᤁᤧᤕᤢᤰᤂᤧᤛᤢ॥ 42 ᤂᤧᤴᤇᤡ᤹ ᤕᤠᤰᤑᤠᤱᤅᤥᤗᤠᤶ ᤌᤡ᤺ᤸᤗᤧ ᤁᤧᤔᤒᤠ ᤕᤖᤡᤰ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤀᤡᤰᤗᤠᤴ ᤂᤧᤶᤍᤧᤳᤋᤧ॥ ᤂᤧᤴ ᤕᤧᤶᤒᤡᤳᤇᤠᤜᤠ᤹ ᤔᤢᤖᤧᤰ ᤂᤠᤖᤧᤰᤐᤠ ᤌᤣᤀᤠᤱ ᤁᤧᤜᤥ᤺ᤵᤐᤠᤍᤧᤴᤏᤥᤗᤠᤶ ᤁᤧᤍᤠᤒᤠ ᤆᤠᤃᤧᤖᤠᤶᤒᤠ ᤏᤢ ᤌᤡ᤺ᤸᤗᤧ ᤁᤧᤔᤒᤠ ᤔᤧᤈᤥᤃᤧ. ᤂᤧᤱᤜᤠ᤹ᤖᤧ ᤂᤧᤴᤇᤡ᤹ ᤜᤢᤰᤁᤥ ᤜᤢᤰᤐᤠ᤺ᤱᤃᤡᤜᤠ᤹ ᤁᤧᤶᤘᤠ᤺ᤳᤋᤧᤇᤡ ᤜᤧᤰᤁᤩᤠᤱ ᤂᤧᤴᤇᤡ᤹ ᤌᤧᤃᤣ᤺ᤰᤜᤠ᤹ᤀᤥ ᤛᤠᤶᤔᤩᤠᤱᤑᤢᤱᤜᤠ᤹ ᤁᤧᤶᤄᤢ᤺ᤰᤋᤧᤛᤡ॥ 43 ᤂᤧᤒᤩᤠᤱ ᤀᤠᤱᤃᤠ᤹ ᤀᤰᤂᤣ ᤔᤧᤳᤋᤢᤱᤛᤡᤱ. ‘ᤂᤧᤱᤜᤠ᤹ᤖᤧ ᤀᤰᤋᤱᤔᤠ ᤀᤡᤃᤧᤛᤢ᤹ᤔᤠ ᤁᤠᤵᤔᤢᤔᤠ ᤁᤧᤳᤏᤡᤔᤠᤜᤠ᤹ ᤀᤡᤵᤔᤠᤛᤡ ᤏᤡᤱᤘᤠ᤹ ᤔᤧᤈᤥᤃᤢᤏᤧᤓᤃᤪ. ᤂᤧᤱᤜᤠ᤹ᤖᤧ ᤔᤧᤀᤡᤵᤋᤢᤛᤡᤖ᥄’ 44 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤜᤧᤰᤁᤣᤀᤣ ᤔᤧᤈᤥᤃᤢ॥ ᤂᤢᤴᤇᤡ᤹ ᤏᤠᤖᤠ ᤛᤡᤖᤣ᤺ᤵ ᤔᤧᤸᤗ᤹ᤔᤏᤠᤔᤠ ᤁᤴ ᤁᤧᤳᤏᤡᤔᤠ ᤀᤜᤥᤗᤠ ᤏᤢ ᤀᤥᤜᤥᤗᤡᤒᤠ᤺ᤴ ᤂᤧᤱᤜᤠ᤹ᤖᤧ ᤔᤧᤀᤡᤵᤋᤢᤛᤡ॥ 45 ᤁᤖ ᤛᤠᤶᤕᤥᤒᤠ ᤔᤏᤠᤜᤠ᤹ᤖᤧ ᤕᤠᤶᤒᤥ᤺ᤵᤔᤠ ᤏᤢ ᤔᤠᤰᤂᤡ᤹ᤛᤡᤘᤠ ᤛᤧᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤔᤠ ᤁᤴ ᤏᤧ᤹ᤏᤢᤛᤠ᤹ ᤕᤧᤰᤕᤰᤜᤠ᤹ ᤂᤠᤛᤧᤴ ᤔᤧᤈᤥᤃᤢᤛᤡ᤹. ᤌᤣᤀᤠᤱᤓᤧᤸᤗᤧ ᤛᤧᤰᤂᤠ᤺ᤸᤗᤧ ᤂᤢᤴᤇᤡ᤹ᤃ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤔᤠ ᤏᤢ ᤔᤏᤠ ᤁᤧᤛᤧᤵᤔᤠᤛᤡᤖᤥ॥ 46 “ᤀᤠᤸᤗ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—‘ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤔᤏᤠᤗᤢᤵᤗᤡᤜᤠ᤹ ᤋᤠᤖᤧᤶᤛᤡᤶᤔᤧ᤹ ᤜᤧᤰᤁᤩᤠᤱ ᤕᤱᤔᤠ ᤁᤡᤔᤠᤀᤥ ᤌᤠᤔᤠᤛᤡ ᤏᤢ ᤏᤠᤵᤔᤠᤛᤡᤖᤧ ᤗᤠᤃᤡ ᤂᤢᤴᤇᤡ᤹ ᤂᤧᤱᤜᤠ᤹ᤀᤥ ᤜᤢᤰᤛᤢᤵᤋᤧᤶᤛᤡᤶᤔᤧ᤹॥’ 47 ᤌᤣᤀᤠᤱᤓᤧᤸᤗᤧ ᤂᤢᤴᤇᤡ᤹ ᤏᤡᤱᤔᤡᤜᤠ᤹ᤖᤧ ᤗᤢᤱᤅᤡᤸᤗᤧ ᤔᤧᤗᤧᤵᤋᤢᤛᤡ᤹ ᤜᤧᤰᤁᤩᤠᤱ ᤋᤠᤓᤣᤜᤠ᤹ᤖᤧ ᤂᤢᤴᤇᤡ᤹ ᤔᤧᤛᤧᤖᤢᤛᤡ᤹॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤧᤶᤒᤡᤳᤇᤠ ᤏᤢ ᤔᤧᤴᤇᤢᤔᤠ ᤛᤠᤜᤠ᤹ ᤔᤧᤗᤧᤒᤢ ᤔᤧᤛᤧᤖᤢᤛᤡ᤹ ᤜᤧᤰᤁᤩᤠᤱ ᤂᤢᤴᤇᤡ᤹ ᤜᤡᤶᤜᤠ᤹ ᤔᤡᤔᤧᤎᤡᤰᤂᤢ ᤔᤧᤒᤡᤖᤢᤛᤡ᤹॥ 48 ᤁᤶᤓᤗ᤹ᤖᤡᤰ. ᤀᤠᤱᤃᤠ᤹ ᤗᤠᤈᤣ᤹ᤀᤥᤒᤠ ᤆᤠᤖᤠᤶᤔᤠ ᤕᤠ᤺ᤶᤒᤰᤁᤡᤴ ᤏᤢ ᤏᤠᤘᤠᤀᤡᤳᤗᤠ ᤛᤧᤘᤠ ᤔᤧᤵᤔᤠ ᤕᤠ᤺ᤶᤒᤰᤁᤡᤴ ᤏᤢᤵᤛᤢᤱ᤹. ᤀᤠᤱᤃᤠ᤹ ᤀᤠᤄᤠᤛᤧᤴᤏᤡᤴ ᤂᤧᤴ ᤏᤧᤳᤇᤡᤖᤧ ᤂᤢᤴᤇᤡ᤹ ᤁᤢᤒᤡ᤺ᤴ ᤏᤠ᤺ᤵᤔᤠ ᤔᤣ᤺ᤴ ᤁᤧᤗ᤹ᤒᤠ ᤘᤣ᤹ᤜᤠ᤹ᤖᤧ ᤗᤠᤃᤡ ᤛᤠᤶᤍᤡᤱ ᤐᤥᤱ᤹॥ 49 ᤏᤠᤘᤠᤀᤡᤳᤗᤠᤜᤠ᤹ ᤂᤧᤴᤇᤡ᤹ ᤛᤧᤘᤠ ᤁᤧᤔᤧᤳᤋᤧᤇᤢᤒᤠ ᤁᤧᤳᤏᤡᤔᤠ ᤕᤠ᤺ᤶᤒᤰ ᤁᤧᤈᤥᤃᤧᤇᤢᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ᤖᤧ ᤁᤢᤗᤧᤰᤘᤠ ᤁᤧᤳᤗ ᤁᤧᤍᤢᤶᤛᤢ᤹॥ ᤀᤥᤘᤠ. ᤁᤠᤰ ᤂᤢᤶᤍᤡᤱᤅᤡᤸᤗᤧ ᤂᤡᤴᤇᤡ᤹ ᤕᤧᤳᤋᤢᤰᤂᤣ ᤁᤧᤈᤠᤛᤡ᤹॥ ᤂᤧᤒᤩᤠᤱ ᤀᤠᤱᤃᤠ᤹ᤀᤣ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤂᤧᤴᤇᤡ᤹ ᤏᤡᤱᤘᤠ᤹ ᤁᤧᤄᤥᤛᤢᤖᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.