ᤀᤡᤈᤁᤡᤀᤣᤗ 22 - LIFOTNTᤕᤖᤢᤛᤗᤧ᤺ᤶᤔᤥ ᤑᤧᤴᤕᤠ᤺ᤶᤒᤰ ᤐᤥ᤺ᤰᤂᤧ 1 ᤀᤠᤸᤗ ᤕᤜᤘᤣ ᤍᤠᤱᤒᤠᤗᤠᤶ ᤁᤴ ᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤁᤧᤖᤧ— 2 “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤕᤖᤢᤛᤗᤧ᤺ᤶᤔᤡᤴ ᤂᤠᤛᤧᤴ ᤆᤥ᤺ᤰᤔᤠᤖᤧ ᤗᤠᤃᤡ ᤂᤧᤏᤧ᤹ ᤌᤣ ᤕᤠᤖᤡᤵ ᤁᤧᤘᤠ᤹ᤒᤡ᥅ ᤔᤏᤠ ᤁᤧᤛᤧᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤁᤴ ᤕᤧᤰᤕᤰᤁᤡᤴ ᤂᤠᤛᤧᤴ ᤆᤥ᤺ᤰᤔᤠᤖᤧ ᤗᤠᤃᤡ ᤂᤧᤏᤧ᤹ ᤕᤠᤖᤡᤵ ᤁᤧᤘᤠ᤹ᤒᤡ᥅ ᤂᤧᤸᤗᤧ ᤆᤥᤃᤢᤒᤠ ᤕᤠᤶᤃᤧᤛᤡᤱᤒᤠ ᤗᤠᤕᤥᤜᤠ᤹ ᤔᤏᤠᤜᤠ᤹ᤖᤧ ᤔᤧᤄᤧᤵᤛᤢᤖᤀᤣ ᤐᤠ᤺ᤳᤋᤧ᤹. 3 ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤳᤋᤧᤛᤧ᤹—‘ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤂᤧᤏᤧ᤹ ᤏᤠᤘᤠᤀᤡᤳᤗᤠᤜᤠ᤹ᤗᤠᤶ ᤀᤠᤵᤑᤣᤰ ᤁᤧᤈᤡ᤺ᤴᤇᤡᤱᤒᤠ ᤏᤢ ᤂᤧᤏᤧ᤹ ᤀᤠᤵᤑᤣᤰ ᤗᤢᤶᤔᤥ ᤔᤠᤰᤂᤡ᤹ᤛᤡᤘᤠ ᤛᤧᤔᤠᤗᤠᤶ ᤔᤧᤱᤛᤡᤱᤔᤠ ᤐᤠ᤺ᤴᤜᤠ᤹ ᤁᤧᤍᤠ᤺ᤵᤐᤠ ᤕᤧᤰᤕᤰᤁᤣ. 4 ᤂᤧᤏᤧ᤹ ᤔᤠᤰᤂᤡ᤹ ᤁᤧᤛᤧᤛᤢᤀᤠᤱ ᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤀᤠᤵᤋᤡᤰᤛᤠᤒᤠ ᤁᤧᤈᤥᤰ॥ ᤂᤧᤏᤧ᤹ ᤏᤠᤘᤠᤀᤡᤳᤗᤠᤜᤠ᤹ ᤁᤧᤈᤥᤃᤢᤛᤡᤀᤠᤱ ᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤂᤧᤏᤧ᤹ ᤀᤠᤛᤢᤳᤌᤥ ᤁᤧᤒᤥᤰᤂᤧᤀᤠᤱ ᤁᤧᤘᤠ᤹॥ ᤂᤧᤏᤧ᤹ ᤁᤧᤔᤧᤰᤔᤠ ᤕᤧᤴᤏᤡᤴ ᤋᤩᤧᤀᤠᤱ ᤘᤠ᤹᥄ ᤂᤧᤏᤧ᤹ ᤁᤧᤏᤢᤵᤔᤠ ᤋᤱᤒᤣᤜᤠ᤹ᤀᤥ ᤁᤧᤃᤧᤖᤧᤀᤠᤱ ᤁᤧᤘᤠ᤹॥ ᤀᤠᤱᤃᤠ᤹ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤁᤧᤖᤧᤰ ᤁᤢᤏᤠᤔᤧᤴᤇᤠ᤹ ᤔᤧᤵᤔᤠ ᤆᤠᤜᤠᤰ ᤆᤥ᤺ᤰᤏᤧᤖᤥ॥ 5 ᤜᤕᤱᤁᤡᤸᤗᤡᤱ ᤏᤠᤰᤔᤠ ᤐᤠ᤺ᤴᤜᤠ᤹ᤖᤧ ᤁᤧᤍᤡᤶᤒᤠ. ᤁᤢᤔᤡᤱ ᤔᤧᤴᤀᤡᤱᤔᤏᤠᤒᤠ ᤕᤧᤰᤕᤰᤁᤣ. ᤏᤡ᤺ᤳᤋᤠᤱ ᤏᤢ ᤔᤠ᤺ᤱᤄᤠᤒᤠ ᤔᤏᤠᤜᤠ᤹ᤖᤧ ᤂᤧᤏᤧ᤹ ᤁᤢᤏᤠᤔᤧᤴᤇᤠ᤹ ᤁᤧᤶᤔᤧᤳ॥ 6 “‘ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤗᤠᤶᤗᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤔᤢᤰᤛᤠᤶᤔᤡᤸᤗᤧ ᤔᤠᤰᤂᤡ᤹ ᤔᤧᤛᤧᤛᤢ᤹॥ 7 ᤐᤠᤏᤢᤍᤡᤱ ᤐᤠᤜᤠ᤹ ᤏᤢ ᤔᤠᤏᤢᤍᤡᤱ ᤔᤠᤜᤠ᤹ ᤆᤧᤰᤕᤠ ᤀᤡᤱᤍᤥ ᤔᤧᤔᤧᤳᤋᤢᤛᤡᤀᤠᤱ ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤢᤛᤡ᤹॥ ᤁᤶᤒᤪᤠᤱᤗᤧ ᤗᤠᤃᤡ ᤘᤣ᤹ ᤗᤠᤈᤣ᤹ᤒᤠᤜᤠ᤹ ᤋᤢᤰᤂᤣ ᤔᤧᤈᤠ᤺ᤳᤋᤢᤛᤡ᤹॥ ᤕᤧᤳᤇᤠ ᤜᤥ᤹ᤍᤥ᤺ᤰᤜᤠ᤹ ᤏᤢ ᤔᤣᤔᤣᤍᤢᤔᤠᤜᤠ᤹ ᤔᤧᤴᤘᤠ᤹ᤔᤏᤠ ᤔᤧᤔᤧᤳᤋᤢᤛᤡ᤹ ᤜᤧᤰᤁᤩᤠᤱ ᤂᤡᤏᤡ᤹ ᤗᤢᤶᤔᤥ ᤔᤧᤕᤢ᤺ᤳᤋᤢᤛᤡ᤹॥ 8 ᤀᤠᤱᤃᤠ᤹ ᤀᤠᤛᤣᤛᤣ ᤐᤠ᤺ᤴᤜᤠ᤹ ᤁᤢᤏᤠᤔᤧᤴᤇᤠ᤹ ᤁᤧᤔᤧᤳᤋᤢ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤛᤠᤒᤠᤌ ᤏᤠ᤺ᤶᤛᤡᤱᤔᤠ ᤕᤧᤴᤜᤠ᤹ ᤁᤧᤓᤣ᤺ᤴᤍᤢ᤹॥ 9 ᤔᤏᤠᤜᤠ᤹ᤖᤧ ᤘᤣ᤹ᤜᤠ᤹ ᤔᤧᤴᤘᤠ᤹ᤔᤏᤠᤒᤠ ᤐᤠ᤺ᤴᤏᤥ ᤔᤧᤎᤡᤰᤋᤢᤛᤡ᤹ ᤂᤧᤒᤩᤠᤱ ᤂᤧᤱᤜᤠ᤹ ᤛᤧᤳᤇᤧ ᤔᤧᤒᤠᤱᤄᤢᤔᤧᤍᤣᤛᤢᤛᤡ᤹॥ ᤂᤧᤏᤧ᤹ᤀᤥᤒᤠ ᤔᤏᤠᤜᤠ᤹ᤖᤧ ᤌᤧᤃᤢᤜᤠ᤹ᤀᤥ ᤁᤧᤏᤧᤒᤠ ᤔᤠᤱᤎᤠ᤺ᤴᤜᤠ᤹ᤀᤥᤒᤠ ᤁᤢᤈᤠᤜᤠ᤹ ᤔᤧᤈᤀᤠᤱ ᤔᤧᤴᤇᤪᤡᤰᤁᤪᤠ ᤔᤧᤴᤍᤠᤱᤃᤪᤠ ᤆᤥ᤺ᤰᤔᤠ ᤕᤠ᤺ᤶᤒᤰᤜᤠ᤹ ᤔᤧᤈᤥᤃᤢ᤹॥ 10 ᤔᤏᤠᤜᤠ᤹ ᤂᤢᤴᤇᤡ᤹ ᤐᤠᤜᤠ᤹ᤖᤧ ᤂᤢᤴᤇᤡ᤹ ᤔᤣ᤺ᤳᤜᤠ᤹ᤏᤢ ᤛᤥᤖᤡᤰ ᤔᤧᤀᤡᤶ᤹ ᤜᤧᤰᤁᤩᤠᤱ ᤁᤢᤛᤡᤶ ᤘᤠᤜᤵᤐᤠ ᤁᤧᤘᤠ᤹ᤔᤠ ᤔᤧᤴᤇᤢᤔᤠᤜᤠ᤹ ᤀᤡᤵᤔᤠᤛᤡ ᤕᤠ᤺ᤶᤒᤰ ᤔᤧᤈᤥᤃᤢᤀᤠᤱ ᤀᤠᤛᤢᤳᤌᤥ ᤔᤧᤈᤥ᤺ᤰᤛᤡᤱ᤹॥ 11 ᤀᤠᤵᤑᤣᤰ ᤂᤢᤴᤇᤡ᤹ ᤜᤡᤶᤒᤣᤛᤠᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤔᤣ᤺ᤳᤜᤠ᤹ᤏᤢ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤐᤠ. ᤂᤢᤴᤇᤡ᤹ ᤐᤠᤱᤗᤡᤔᤠᤜᤠ᤹ ᤁᤧᤈᤡ᤺ᤶᤒᤠ. ᤀᤡᤃᤪ ᤀᤠᤵᤑᤣᤰ ᤂᤢᤴᤇᤡ᤹ ᤏᤢᤛ᤻ᤛᤠ᤹ ᤔᤧᤴᤇᤢᤔᤠᤜᤠ᤹ ᤁᤧᤀᤢ᤺ᤱᤒᤠᤀᤠᤱ ᤔᤣ᤺ᤳ ᤁᤧᤔᤧᤵᤐᤠ ᤕᤧᤶᤒᤡᤳᤇᤠᤜᤠ᤹ ᤂᤧᤏᤧ᤹ ᤁᤧᤗᤢᤱᤎᤠᤰᤜᤠ᤹ᤀᤥ ᤔᤧᤘᤠ᤹॥ 12 ᤂᤧᤵᤔᤥ ᤔᤏᤠ ᤛᤧᤳᤇᤧ ᤔᤧᤀᤡᤅᤢᤛᤡᤒᤠᤜᤠ᤹. ᤔᤧᤛᤠᤅᤢᤛᤡᤒᤠ ᤑᤠ᤺ᤴᤍᤠᤜᤠ᤹ ᤏᤢ ᤁᤧᤏᤠᤵᤐᤠᤜᤠ᤹ ᤀᤠᤳᤋᤡᤛᤠᤱ ᤔᤧᤘᤠ᤹॥ ᤂᤧᤏᤧ᤹ ᤁᤧᤜᤡᤶᤒᤣᤛᤠᤱᤒᤠᤜᤠ᤹ ᤔᤧᤴᤘᤠ᤹ᤔᤏᤠᤒᤠ ᤁᤧᤔᤧᤳᤋᤢᤛᤡᤀᤠᤱ ᤂᤧᤏᤧ᤹ ᤛᤠ᤹ᤖᤡᤰ ᤂᤡ᤺ᤰᤗ ᤕᤠᤱᤗᤧ ᤁᤢᤛ᤻ᤛᤠ ᤁᤧᤈ᤹᤺॥ ᤜᤧᤰᤁᤩᤠᤱ ᤂᤧᤏᤧ᤹ ᤀᤠᤱᤃᤠ᤹ ᤏᤡᤱᤘᤠ᤹ ᤁᤧᤓᤣ᤺ᤳᤇᤠᤱᤅᤠᤱ ᤘᤠ᤹. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹॥ 13 “‘ᤁᤖ ᤂᤧᤏᤧ᤹ ᤔᤧᤴᤘᤠ᤹ᤔᤏᤠᤒᤠ ᤐᤠ᤺ᤴᤏᤥᤗᤠᤶ ᤁᤧᤎᤃᤢᤒᤠ ᤏᤢ ᤔᤠᤰᤂᤡ᤹ᤛᤡᤘᤠ ᤁᤧᤛᤧᤛᤢᤀᤠᤱ ᤘᤠ᤹ᤒᤠ ᤏᤧᤵᤔᤠᤱ ᤐᤠ᤺ᤴᤏᤥ ᤀᤠᤱᤃᤠ᤹ ᤀᤠᤜᤢᤰᤋᤠᤵᤐᤣ᤹ᤜᤠ᤹ ᤜᤡᤵᤋᤢᤱ᤹॥ 14 ᤀᤠᤱᤃᤠ᤹ ᤂᤧᤏᤧ᤹ ᤂᤢᤶᤍᤡᤱ ᤐᤡᤏᤧᤸᤗᤧ ᤕᤠ᤺ᤴᤍᤡᤰ ᤂᤧᤏᤧ᤹ ᤀᤠᤰᤂᤩᤠᤖᤡᤰ ᤁᤧᤎᤢᤶᤒᤠ ᤏᤢ ᤜᤠᤱᤜᤠᤱ ᤁᤧᤗ᤹ᤒᤠ ᤁᤧᤒᤥᤱᤒᤣ᥅ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤴ ᤐᤠᤖᤠᤱᤅᤠᤱ ᤘᤠ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤐᤠ᤺ᤳᤋᤢᤱᤒᤠ ᤐᤠ᤺ᤴᤏᤡᤴ ᤆᤥᤃᤢᤱ᤹॥ 15 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤀᤠᤱᤃᤠ᤹ ᤂᤡᤏᤡ᤹ ᤑᤢᤳᤇᤡᤱᤈᤩᤠᤱ ᤛᤧᤏᤡᤱᤍᤣᤏᤡᤱ᤹ ᤂᤧᤒᤩᤠᤱ ᤂᤡᤏᤡ᤹ ᤀᤠᤛᤢᤳᤌᤥ ᤐᤠ᤺ᤴᤜᤠ᤹ ᤏᤢᤵᤛᤢᤱ ᤐᤡᤏᤡᤱ᤹॥ 16 ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤔᤡᤰᤛᤠᤀᤥ ᤂᤡᤏᤡ᤹ ᤀᤠᤛᤢᤳᤌᤥ ᤁᤧᤒᤥ᤺ᤰᤂᤡᤀᤠᤱ ᤁᤧᤘᤕᤡᤸᤗᤧ. ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤂᤡᤏᤡ᤹ ᤏᤡᤱᤘᤠ᤹ ᤁᤧᤄᤥᤛᤢᤶᤗᤥ॥’” ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤑᤧᤴᤈᤣ᤹ ᤁᤢᤕᤥ᤺ᤶᤔᤠ ᤔᤡᤍ᤺ᤳ 17 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠᤗᤠᤶ ᤁᤴ ᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤁᤧᤖᤧ— 18 “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤏᤠᤀᤣ. ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ᤃ ᤕᤥ᤺ᤶᤔᤏᤠᤒᤠ ᤕᤢᤵᤐᤠ ᤁᤧᤍᤠᤱᤛᤡᤱᤒᤠ ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤕᤢᤵᤐᤠ ᤜᤡᤛᤡᤖᤥ॥ ᤂᤧᤱᤜᤠ᤹ᤃ ᤕᤥ᤺ᤶᤔᤠᤀᤠᤱ ᤀᤣᤃᤠᤱ ᤁᤧᤍᤠᤱᤛᤡᤱᤒᤠ ᤌᤣᤏᤠᤎᤣᤒᤠ ᤑᤧᤔᤡ. ᤋᤡᤴ. ᤑᤧᤴᤈᤣ᤹ ᤏᤢ ᤔᤠᤰᤗᤢᤶᤒᤠ ᤜᤡᤛᤡᤖᤥ॥ 19 ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤧᤛᤧ᤹. ‘ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹. ᤂᤡᤏᤡ᤹ ᤁᤧᤖᤧᤰ ᤁᤢᤛᤢᤶ ᤔᤧᤴᤍᤶᤔᤏᤠᤒᤠ ᤕᤥ᤺ᤶᤔᤏᤠᤒᤠ ᤕᤢᤵᤐᤠ ᤜᤡ ᤁᤧᤒᤥ᤺ᤰᤂᤡᤒᤠᤸᤗᤧ ᤆᤥᤃᤢᤸᤗᤧ. ᤀᤠᤱᤃᤠ᤹ ᤂᤡᤏᤡ᤹ ᤀᤠᤄᤵᤐᤩᤠ ᤕᤥ᤺ᤶᤔᤠ ᤕᤖᤢᤛᤗᤧ᤺ᤶᤔᤥ ᤑᤧᤳᤏᤡᤱ᤹॥ 20 ᤕᤢᤵᤐᤠ. ᤑᤧᤔᤡ. ᤑᤧᤴᤈᤣ᤹. ᤔᤠᤰᤗᤢᤶᤒᤠ ᤏᤢ ᤋᤡᤴᤜᤠ᤹ ᤔᤡᤍ᤺ᤳᤋᤥ ᤕᤥ᤺ᤶᤒᤣ᤺ᤰᤐᤠ ᤜᤧᤰᤁᤣ. ᤀᤠᤱᤃᤠ᤹ ᤂᤡᤏᤡ᤹ ᤛᤢᤶᤏᤡᤱᤅᤠᤱ ᤀᤠᤱᤃᤠ᤹ ᤆᤠ᤹ᤖᤡᤰ ᤀᤠᤛᤡᤰ ᤁᤧᤒᤥ᤺ᤰᤐᤠ ᤔᤡ᤺ᤸᤗᤧ ᤂᤡᤏᤡ᤹ ᤕᤥ᤺ᤴᤏᤡᤱ᤹॥ 21 ᤀᤠᤱᤃᤠ᤹ ᤂᤡᤏᤡ᤹ ᤛᤥᤖᤡᤰ ᤛᤢᤶᤏᤡᤱ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤛᤠᤰᤁᤧᤴᤏᤡᤸᤗᤧ ᤔᤡᤴ ᤂᤡᤏᤡ᤹ ᤛᤶᤎᤠᤱ ᤔᤢ᤺ᤳᤋᤢᤱ᤹. 22 ᤜᤧᤰᤁᤩᤠᤱ ᤀᤠᤳᤋᤠᤋᤠᤴᤏᤣ ᤁᤧᤃᤥᤒᤧᤸᤗᤧ ᤂᤡᤏᤡ᤹ ᤕᤢᤵᤐᤠ ᤜᤧᤰᤁᤣ ᤁᤧᤕᤥ᤺ᤴᤍᤡ᤹॥ ᤂᤧᤒᤩᤠᤱ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤛᤠ᤹ᤖᤡᤰ ᤁᤧᤒᤥ᤺ᤰᤐᤠ ᤀᤠᤛᤠᤰᤁᤧᤴᤏᤡᤴ ᤂᤡᤏᤡ᤹ ᤛᤶᤎᤠᤱ ᤌᤠᤛᤢᤱᤅᤠᤱ ᤘᤠ᤹ ᤑᤠ᤹ᤀᤠᤱ ᤂᤡᤏᤡ᤹ ᤏᤡᤱᤘᤠ᤹ ᤁᤧᤄᤥᤛᤢᤶᤗᤥ॥’” ᤀᤡᤛᤪᤠᤀᤡᤗᤒᤠ ᤗᤠᤶᤗᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥ 23 ᤕᤜᤘᤣ ᤍᤠᤱᤒᤠᤗᤠᤶ ᤕᤠᤶᤔᤥ ᤀᤡᤱᤄᤱᤎᤡᤰ ᤀᤠᤱᤃᤠ᤹ᤀᤥ ᤁᤧᤖᤧ— 24 “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤂᤧᤏᤧ᤹ ᤁᤴ ᤀᤡᤱᤄᤱᤅᤡᤴ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤔᤧᤳᤋᤧᤛᤧ᤹. ᤀᤠᤱᤃᤠ᤹ ᤀᤠᤛᤡᤰ ᤐᤥ᤺ᤰᤔᤠ ᤕᤧᤴᤏᤥ. ᤘᤜᤡᤳ ᤔᤧᤴᤎᤠᤀᤣ ᤁᤧᤏᤧᤒᤠ ᤂᤠᤶᤒᤣᤰ. ᤆᤡ᤺ᤶᤔᤏᤠᤒᤠ ᤗᤠᤈᤣ᤹ ᤜᤧᤰᤋᤱᤒᤠ ᤂᤡᤏᤡ᤹ ᤁᤧᤒᤥ᤺ᤰᤂᤡ᤹॥ 25 ᤜᤢᤖᤢᤶᤗᤢᤶᤒᤠ ᤑᤠᤵᤋᤠᤵᤐᤥ ᤁᤧᤜᤢ᤺ᤰᤐᤠᤖ ᤛᤠᤏᤠ᤺ᤳ ᤁᤧᤎᤧ᤺ᤱᤒᤠ ᤂᤡᤖᤡᤱᤒᤠᤜᤠ᤹ ᤁᤢᤀᤡᤛᤡᤰ ᤂᤧᤏᤧ᤹ ᤁᤧᤗᤠᤶᤗᤥᤒᤠᤜᤠ᤹ ᤆᤧᤶᤓᤴ ᤔᤧᤈᤥᤰ॥ ᤔᤧᤛᤢᤵᤛᤢ ᤔᤧᤕᤢᤰᤂᤢᤒᤠᤜᤠ᤹ ᤔᤧᤏᤠᤵᤋᤢᤛᤡ᤹ ᤜᤧᤰᤁᤩᤠᤱ ᤕᤠᤱᤛᤠᤁᤢᤴᤎᤣᤜᤠ᤹ ᤔᤧᤄᤢ᤺ᤳᤋᤢᤀᤠᤱ ᤂᤧᤱᤜᤠ᤹ᤖᤧ ᤔᤏᤠᤜᤠ᤹ ᤔᤧᤗᤖᤢᤛᤡ᤹॥ ᤂᤧᤱᤜᤠ᤹ᤖᤧ ᤗᤠᤈᤣ᤹ᤀᤥ ᤕᤖᤡᤰ ᤔᤣᤔᤣᤍᤢᤔᤠ ᤔᤧᤈᤥᤃᤢᤛᤡ᤹॥ 26 ᤂᤧᤏᤧ᤹ᤀᤥᤒᤠ ᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤀᤠᤱᤃᤠ᤹ ᤀᤠᤀᤡᤱᤈᤠᤱᤜᤠ᤹ ᤔᤧᤓᤣ᤺ᤴᤍᤢᤀᤠᤱ ᤘᤠ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤛᤣᤛᤣᤒᤠ ᤀᤠᤒᤠ᤺ᤴᤜᤠ᤹ ᤔᤧᤈᤡ᤺ᤴᤍᤢᤀᤠᤱ ᤘᤠ᤹॥ ᤀᤠᤳᤋᤡᤴ ᤛᤣᤛᤣᤒᤠ ᤐᤠᤴ ᤏᤢ ᤀᤠᤳᤋᤡᤴ ᤔᤧᤴᤈᤥᤒᤠ ᤐᤠᤴ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤔᤧᤴᤇᤧᤴᤍᤢᤴ᤹॥ ᤜᤧᤰᤁᤩᤠᤱ ᤌᤡᤶ ᤁᤢᤀᤡᤛᤡᤰ ᤛᤢᤳᤌᤥ ᤏᤢ ᤀᤠᤛᤢᤳᤌᤥ ᤐᤠ᤺ᤴᤜᤠ᤹ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤔᤧᤴᤜᤢ᤹ᤖᤢᤛᤡᤴ᤹॥ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤁᤢᤏᤠᤔᤧᤴᤇᤠ᤹ ᤐᤥᤱᤅᤠᤖ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤛᤠᤒᤠᤌ ᤏᤠ᤺ᤶᤛᤡᤱᤔᤠ ᤕᤧᤴᤜᤠ᤹ ᤏᤡᤏᤡ ᤂᤧᤶᤄᤧᤶ ᤔᤧᤸᤗᤠᤵᤋᤢᤴ᤹॥ 27 ᤂᤧᤏᤧ᤹ᤀᤥᤒᤠ ᤗᤠᤶᤗᤥᤒᤠᤜᤠ᤹ᤃ ᤛᤠᤏᤠ᤺ᤳᤜᤠ᤹ ᤁᤢᤈᤰᤋᤠ ᤁᤢᤗᤧᤶᤍᤠ ᤁᤧᤈᤥ᤺ᤰᤐᤠ ᤐᤖᤠᤒᤠᤜᤠ᤹ ᤜᤧᤰᤋᤱᤒᤠ ᤔᤧᤈᤥᤰ॥ ᤛᤧᤰᤂᤠ᤺ᤸᤗᤧ ᤂᤧᤱᤜᤠ᤹ᤖᤧ ᤕᤠᤱᤗᤧ ᤗᤠᤃᤡ ᤔᤏᤠᤜᤠ᤹ ᤔᤧᤛᤩᤧᤖᤢᤛᤡ᤹॥ 28 ᤜᤧᤰᤁᤩᤠᤱ ᤂᤧᤏᤧ᤹ᤀᤥᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤀᤡᤱᤗᤧᤰ ᤛᤢᤑᤥᤜᤠ᤹ ᤀᤢᤘᤠ ᤔᤧᤈᤥᤃᤢ᤹ ᤂᤶᤓᤩᤠᤱ ᤔᤧᤴᤘᤠ᤹ᤔᤏᤠᤒᤠ ᤔᤠᤱᤏᤡᤱᤘᤠ᤹ᤐᤠᤴᤜᤠ᤹ ᤔᤧᤒᤠ᤺ᤳᤋᤢᤀᤠᤱ ᤂᤢᤴᤇᤡ᤹ ᤗᤠᤃᤡ ᤔᤧᤍᤧᤵᤛᤡᤱ᤹॥ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤀᤠᤱ ᤔᤧᤘᤕᤧᤴᤇᤠᤱ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ᤹. ‘ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹॥’ 29 ᤗᤠᤈᤣ᤹ᤀᤥᤒᤠ ᤔᤏᤠᤜᤠ᤹ᤖᤧ ᤂᤢ᤺ᤵᤔᤠ ᤏᤢ ᤏᤠᤵᤔᤠ ᤕᤠ᤺ᤶᤒᤰ ᤔᤧᤈᤥᤃᤢ᤹. ᤂᤧᤱᤜᤠ᤹ᤖᤧ ᤕᤠᤱᤃᤧᤛᤠ᤹ᤒᤠᤜᤠ᤹. ᤌᤣᤀᤠᤱ ᤔᤧᤱᤃᤵᤔᤏᤠᤒᤠᤜᤠ᤹ ᤋᤠᤵᤑᤧ᤺ᤸᤗᤡᤰ ᤔᤧᤔᤧᤳᤋᤢᤛᤡ᤹. ᤜᤧᤰᤁᤩᤠᤱ ᤘᤣ᤹ ᤗᤠᤈᤣ᤹ᤒᤠᤜᤠ᤹ ᤁᤢᤍᤥ᤺ᤵᤔᤠ ᤂᤠᤛᤧᤴᤗᤥᤶᤔᤠ ᤐᤡᤔᤠᤛᤡ ᤛᤢᤕᤧᤶ ᤔᤧᤶᤒᤡᤖᤢᤛᤡᤴ᤹॥ 30 “ᤀᤠᤱᤃᤠ᤹ ᤗᤠᤈᤣᤴ ᤔᤧᤔᤧᤱᤅᤠᤴᤗ ᤑᤠ᤹ᤀᤠᤱ ᤗᤢᤱᤎᤠᤰᤁᤥᤒᤠ ᤜᤠᤷᤃᤠ᤺ᤱᤃᤠ᤺ᤱᤒᤠᤍᤧᤴᤏᤥ ᤕᤧᤵᤔᤠᤖᤧ ᤗᤠᤃᤡ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤗᤠᤈᤣᤴ ᤁᤶᤒᤪᤠᤱ ᤁᤧᤔᤧᤵᤐᤠ ᤜᤧᤰᤁᤩᤠᤱ ᤗᤢᤱᤎᤠᤰᤜᤠ᤹ ᤆᤠ᤺ᤱᤘᤠ ᤔᤧᤵᤔᤠ ᤁᤧᤛᤢᤰᤐᤠ ᤁᤢᤓᤠ ᤔᤏᤠᤎᤡᤰ ᤀᤠᤱᤃᤠ᤹ ᤀᤥᤔᤧᤳᤋᤢᤱ. ᤁᤖ ᤀᤠᤱᤃᤠ᤹ ᤜᤠ᤺ᤳᤋᤠᤱ ᤔᤧᤱᤄᤥᤒᤠᤴ॥ 31 ᤂᤧᤸᤗᤧᤆᤥᤃᤢᤸᤗᤧ ᤀᤠᤸᤗ ᤀᤠᤱᤃᤠ᤹ ᤛᤠ᤹ᤖᤡᤰ ᤀᤠᤛᤡᤰ ᤐᤥ᤺ᤰᤔᤠᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤌᤠᤛᤢᤱ᤹. ᤜᤧᤰᤁᤩᤠᤱ ᤀᤠᤛᤠᤰᤁᤧᤴ ᤐᤥ᤺ᤰᤔᤠ ᤔᤡ᤺ᤸᤗᤧ ᤂᤧᤱᤜᤠ᤹ ᤂᤠᤵᤐᤢᤌᤩ᤺ᤱ ᤆᤥᤃᤢᤱᤛᤡᤱ᤹॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤥᤒᤠ ᤁᤧᤖᤧᤰ ᤗᤠᤕᤥᤜᤠ᤹ᤖᤧ ᤂᤢᤶᤍᤡᤱᤅᤡᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤧᤃᤣᤰ ᤛᤶᤎᤠᤱ ᤗᤢᤵᤛᤢᤱ᤹॥ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤀᤠᤱ ᤘᤠ᤹ᤖᤥ᥄” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.