ᤀᤡᤈᤁᤡᤀᤣᤗ 21 - LIFOTNTᤕᤜᤘᤣ ᤍᤠᤱᤒᤧᤸᤗᤧ ᤁᤢᤍᤠᤓᤣᤴ ᤑᤡ᤺ᤰᤂᤢ 1 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠᤗᤠᤶ ᤁᤴ ᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤁᤧᤖᤧ— 2 “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤏᤠᤀᤣ. ᤂᤧᤏᤧ᤹ ᤜᤡᤛᤡᤱᤅᤧ᤹ ᤜᤧᤰᤁᤩᤠᤱ ᤕᤖᤢᤛᤗᤧ᤺ᤶᤔᤡᤴ ᤋᤰᤔᤧᤳᤋᤧ᤹ᤀᤠᤱ ᤛᤣᤛᤣᤍᤧᤴᤏᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤀᤡᤱᤄᤱ ᤛᤧᤛᤧ᤹॥ ᤀᤡᤛᤪᤠᤀᤡᤗ ᤗᤠᤈᤣ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤠᤱᤏᤡᤱᤘᤠ᤹ᤐᤠᤴ ᤐᤠᤖᤧ᤹॥ 3 ᤂᤧᤏᤧ᤹ ᤂᤧᤴ ᤀᤰᤂᤣ ᤔᤧᤳᤋᤧ᤹. ‘ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤀᤡᤛᤪᤠᤀᤡᤗᤀᤣ. ᤀᤠᤱᤃᤠ᤹ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥ ᤘᤠ᤹ᤀᤠᤖᤥ. ᤛᤠᤶᤕᤥᤒᤠ ᤏᤢ ᤋᤠᤰᤁᤧᤓᤧ᤹ᤒᤠ ᤁᤧᤖᤧᤰ ᤁᤧᤔᤏᤠᤜᤠ᤹ ᤔᤧᤱᤔᤠᤛᤡᤖᤧ ᤗᤠᤃᤡ ᤀᤠᤱᤃᤠ᤹ ᤀᤠᤍᤠᤓᤣᤴ ᤂᤠ ᤑᤡ᤺ᤱᤔᤠ ᤀᤡ᤺ᤳᤋᤢᤱᤗᤥ॥ 4 ᤀᤥᤖᤥ. ᤀᤠᤱᤃᤠ᤹ ᤛᤠᤶᤕᤥᤒᤠ ᤏᤢ ᤋᤠᤰᤁᤧᤓᤧ᤹ᤒᤠ ᤏᤧᤵᤔᤠᤱ ᤔᤧᤰᤂᤢᤱᤛᤡᤱ᤹᥄ ᤗᤠᤱᤃᤧᤳ ᤗᤧᤵᤔᤠᤱᤗᤠᤶ ᤌᤠᤱᤃᤧᤳ ᤗᤠᤈᤣ᤹ᤒᤠ ᤁᤧᤖᤧᤰᤗᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤀᤠᤱᤃᤠ᤹ ᤀᤠᤍᤠᤓᤣᤴ ᤋᤖᤵ ᤑᤡ᤺ᤰᤂᤢᤱ᤹॥ 5 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰᤗᤧ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤁᤢᤛᤡᤱ ᤔᤧᤏᤡ᤺ᤳᤋᤠᤖᤥ॥ ᤀᤠᤱᤃᤠ᤹ ᤀᤠᤍᤠᤓᤣᤴ ᤁᤢᤛᤢ᤺ᤵᤐᤥᤗᤠᤶ ᤗ᤺ᤳᤋᤢᤱᤅᤠᤱ ᤀᤠᤜᤢᤰᤁᤥ ᤘᤠ᤹. ᤜᤧᤰᤁᤩᤠᤱ ᤕᤠᤱᤕᤥ ᤔᤧᤏᤢ᤺ᤰᤋᤢᤱᤅᤡᤴ᤹॥’ 6 “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤏᤠᤀᤣ. ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤂᤧᤏᤧ᤹ ᤕᤠᤖᤧ᤹᥄ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤡᤰᤗᤢᤱᤔᤠ᤹ ᤛᤡ᤺ᤵᤔᤠᤖᤧ ᤗᤠᤃᤡ ᤂᤧᤏᤧ᤹ ᤕᤠᤖᤧ᤹॥ 7 ᤂᤧᤏᤧ᤹ ᤌᤣᤀᤠᤱ ᤁᤧᤕᤠ᤺ᤵᤐᤠᤒᤣ ᤑᤠ᤹ᤀᤠᤱ ᤛᤧ᤺ᤴᤁᤧᤶᤍᤥ᤺ᤸᤗᤧ. ᤂᤧᤏᤧ᤹ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤧᤛᤧ᤹. ‘ᤁᤡᤵᤔᤠ ᤁᤧᤄᤢᤒᤠ ᤂᤡᤏᤡ᤹ ᤀᤡᤱᤄᤱᤅᤡᤴ ᤀᤠᤱᤃᤠ᤹ ᤂᤧᤵᤛᤢᤱᤅᤠᤱ ᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤕᤠ᤺ᤳᤋᤠᤒᤠᤖᤥ॥ ᤁᤴ ᤛᤧᤰᤂᤠ ᤐᤥᤱᤅᤡᤸᤗᤧ. ᤜᤠᤱᤜᤠᤱᤒᤠ ᤛᤡᤰᤗᤢᤱᤔᤧᤴᤏᤠᤱ ᤁᤡᤔᤠᤖᤧ ᤌᤧᤃᤰᤁᤰᤏᤠ ᤕᤱ᤹. ᤌᤢᤶᤔᤠ ᤛᤠᤰᤔᤠᤜᤠ᤹ ᤁᤧᤖᤧᤰ ᤔᤠᤒᤣ᤺ᤰ॥ ᤁᤧᤖᤧᤰ ᤕᤠᤶᤛᤠᤶᤜᤠ᤹ ᤁᤢᤎᤏᤠ ᤁᤧᤗᤧᤱᤒᤠ ᤐᤥᤱ᤹. ᤁᤧᤖᤧᤰ ᤌᤢᤱᤒᤥ᤹ᤜᤠ᤹ ᤔᤧᤴᤎᤢᤶᤔᤏᤠᤒᤠ ᤗᤧ᤺ᤶᤈᤢᤈᤢ᤹ᤒᤠ ᤐᤥᤱ᤹॥ ᤜᤧᤰᤁᤩᤠᤱ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ—ᤁᤴ ᤋᤠᤖ ᤐᤳᤗᤥ᥄ ᤁᤴ ᤁᤢᤗᤠᤶᤔᤥ ᤘᤠ᤹ᤖᤥ᥄’” 8 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤁᤧᤖᤧ— 9 “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤏᤠᤀᤣ. ᤔᤠᤱᤏᤡᤱᤘᤠ᤹ᤐᤠᤴ ᤐᤠᤖᤧ᤹ᤀᤠᤱ ᤔᤧᤳᤋᤧᤛᤧ᤹. ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ— “ᤗᤳᤇᤠ ᤋᤠᤓᤣ. ᤋᤠᤓᤣᤎᤡᤰ. ᤕᤠᤔᤧᤖᤠᤵᤋᤢᤖ ᤘᤠ᤹ᤖᤥ ᤜᤧᤰᤁᤩᤠᤱ ᤛᤧᤸᤗᤧᤱ ᤛᤧᤸᤗᤧᤱ ᤗ᤹ᤖ ᤔᤧᤕᤢ᤺ᤳᤋᤢᤖ ᤘᤠ᤹ᤖᤥ॥ 10 ᤁᤴ ᤔᤏᤠᤜᤠ᤹ ᤛᤧᤵᤔᤠᤛᤡᤖᤧ ᤗᤠᤃᤡ ᤕᤠᤔᤧᤖᤠᤵᤋᤧᤒᤠᤖᤥ. ᤜᤧᤰᤁᤩᤠᤱ ᤛᤠ᤺ᤶᤓᤣ ᤁᤧᤗᤧᤰᤐᤠ ᤁᤢᤀᤡᤛᤡᤰ ᤋᤡᤸᤗᤧᤰ ᤋᤡᤸᤗᤧᤰ ᤗ᤹ᤖᤡᤰ ᤔᤧᤕᤢ᤺ᤳᤋᤢᤒᤠᤖᤥ᥄ ᤀᤠᤸᤗ ᤂᤡᤏᤡ᤹ ᤛ᤺ᤵᤔᤠ ᤁᤧᤛᤢᤰᤋᤡᤒᤡ᥅ ᤂᤡᤏᤡ᤹ᤏᤢ᤺ᤸᤗᤧ ᤀᤠᤳᤋᤠᤋᤠᤴᤏᤣ ᤛᤠ᤹ᤖᤡᤰ ᤁᤧᤎᤢᤶᤒᤠᤜᤠ᤹ ᤁᤸᤗᤧ ᤁᤢᤔᤢᤰᤛᤠᤶᤔᤥ ᤔᤧᤈᤥ᤺ᤴᤍᤧᤀᤠᤱ ᤔᤧᤏᤧᤖᤥ᥄ 11 ᤀᤥᤖᤥ. ᤋᤠᤓᤣᤴ ᤕᤠᤔᤧᤖᤠᤵᤋᤢᤖ ᤘᤠ᤹ᤖᤥ ᤜᤧᤰᤁᤩᤠᤱ ᤔᤧᤕᤢ᤺ᤳᤋᤢᤖ ᤘᤠ᤹ᤖᤥ. ᤂᤢᤶᤍᤡᤱ ᤁᤧᤒᤡᤒᤧᤸᤗᤧ ᤁᤢᤗᤠᤃᤡ ᤁᤴ ᤕᤠᤖᤡᤵ ᤐᤥᤱᤗ ᤘᤠ᤹ᤖᤥ॥ 12 “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤏᤠᤀᤣ. ᤂᤧᤏᤧ᤹ ᤜᤠᤒᤧ᤹ᤀᤠᤱ ᤔᤧᤖᤡᤱ ᤌᤰᤋᤧ᤹ᤀᤥ. ᤋᤢᤰᤂᤣᤀᤥ ᤁᤧᤗᤠᤱ ᤛᤧᤒᤱᤒᤠᤜᤠ᤹ ᤌᤃᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤂᤧᤴ ᤋᤠᤓᤣ᤺ᤸᤗᤧ ᤀᤠᤔᤏᤠᤜᤠ᤹ ᤛᤧᤖᤢᤛᤡᤖᤥ. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤒᤠ ᤗᤠᤶᤗᤥᤒᤠᤜᤠ᤹ ᤁᤧᤖᤧᤰ ᤔᤧᤛᤡᤖᤥ᥄ 13 ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ ᤛᤠ᤹ᤖᤢᤱᤗᤥ॥ ᤂᤧᤱᤜᤠ᤹ᤖᤧ ᤌᤧᤔᤠ ᤛᤢᤕᤧᤶ ᤔᤧᤃᤳᤋᤢᤒᤣ᥅ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ॥ 14 “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤏᤠᤀᤣ. ᤂᤧᤱᤜᤠ᤹ ᤔᤠᤱᤏᤡᤱᤘᤠ᤹ᤐᤠᤴ ᤔᤧᤳᤋᤧᤛᤧ᤹ᤀᤥ॥ ᤜᤧᤰᤁᤩᤠᤱ ᤁᤧᤜᤢᤰᤋᤠᤵᤐᤣ᤹ᤜᤠ᤹ ᤜᤡᤵᤋᤧ᤹ᤀᤥ॥ ᤂᤧᤒᤩᤠᤱ ᤂᤧᤏᤧ᤹ ᤋᤠᤓᤣᤴ ᤕᤠᤱᤛᤡᤱᤅᤧ᤹ᤀᤥ ᤜᤧᤰᤁᤩᤠᤱ ᤁᤧᤖᤧᤰ ᤐᤡᤛᤠᤱ ᤕᤖᤡᤰ ᤔᤏᤠ ᤔᤧᤛᤧᤖᤢᤛᤡᤒᤠ. ᤀᤠᤳᤋᤠᤋᤠᤴᤏᤣ ᤕᤖᤡᤰ ᤔᤏᤠ ᤔᤧᤛᤧᤖᤢᤛᤡᤒᤠ ᤂᤢᤴᤇᤡ᤹ ᤔᤧᤍᤢᤔᤢᤒᤠ ᤐᤠ᤺ᤴᤏᤡᤴ ᤀᤥᤛᤣ᤺ᤴᤎᤠᤱ ᤆᤥ᤺ᤰᤔᤠ ᤔᤡᤰᤛᤣ᤺ᤴᤗᤧ ᤗᤠᤃᤡ ᤏᤡᤗᤧᤱ ᤌᤠᤖᤡᤰ. ᤛᤢᤶᤗᤧᤱ ᤌᤠᤖᤡᤰᤁᤠᤱ ᤂᤧᤏᤧ᤹ ᤁᤴ ᤛᤧᤸᤗᤧᤱ ᤛᤧᤸᤗᤧᤱ ᤜᤡᤰᤂᤧ᤹ᤀᤥ॥ 15 ᤁᤡᤔᤠ ᤕᤱᤔᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤶᤔᤡᤰ ᤔᤠᤖᤖᤥ. ᤜᤧᤰᤁᤩᤠᤱ ᤁᤧᤈᤥ᤺ᤶᤒᤠᤜᤠ᤹ ᤕᤖᤡᤰ ᤔᤧᤒᤥᤱᤗᤖᤥ. ᤌᤣᤀᤠᤱᤓᤧᤸᤗᤧ ᤁᤧᤖᤧᤰ ᤗᤠᤶᤎᤣ᤺ᤳᤜᤠ᤹ᤀᤥ ᤋᤠᤓᤣᤴ ᤛᤧᤸᤗᤧᤱ ᤛᤧᤸᤗᤧᤱ ᤗ᤹ᤖᤥ॥ ᤛᤠ᤺ᤶᤓᤣ ᤁᤢᤀᤡᤛᤡᤰ ᤁᤴ ᤋᤡᤸᤗᤧᤰ ᤋᤡᤸᤗᤧᤰ ᤗ᤹ᤖᤥ ᤜᤧᤰᤁᤩᤠᤱ ᤔᤏᤠ ᤛᤧᤵᤔᤠᤖᤧ ᤗᤠᤃᤡ ᤔᤧᤕᤢ᤺ᤳᤋᤢᤀᤠᤱ ᤘᤠ᤹ᤖᤥ᥄ 16 ᤋᤠᤓᤣᤀᤣ. ᤂᤧᤏᤧ᤹ ᤀᤠᤳᤋᤡ ᤐᤡᤛᤠᤱ ᤏᤡᤱᤘᤠ᤹ ᤁᤧᤈᤥᤃᤢ᤹. ᤂᤧᤏᤧ᤹ ᤀᤠᤳᤋᤡ ᤗᤧᤵᤛᤠᤱ ᤁᤧᤛᤡᤖᤠ᤹ᤌᤠᤱ ᤂᤧᤏᤧ᤹ ᤆᤢᤵᤛᤠᤱ ᤗᤧᤵᤔᤠᤱ ᤆᤩᤧᤵᤋᤧᤛᤧ᤹ᤀᤥ. ᤂᤧᤒᤩᤠᤱ ᤑᤧᤴᤇᤠᤱ ᤗᤧᤵᤔᤠᤱ ᤆᤩᤧᤵᤋᤧᤛᤧ᤹ᤀᤥ॥ 17 ᤀᤠᤱᤃᤠ᤹ᤀᤠᤱ ᤀᤠᤜᤢᤰᤋᤠᤵᤐᤣ᤹ᤜᤠ᤹ ᤜᤡᤵᤋᤢᤱᤗᤥ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤛᤡᤰ ᤐᤥ᤺ᤰᤔᤧᤴ ᤆᤡ᤺ᤰᤋᤢᤖᤥ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤴ ᤐᤠᤖᤠᤅᤠᤱ ᤘᤠ᤹ᤖᤥ᥄” ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤁᤢᤍᤠᤓᤣ 18 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠᤗᤠᤶ ᤁᤴ ᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤁᤧᤖᤧ— 19 “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤏᤠᤀᤣ. ᤗᤳᤇᤠ ᤆᤀᤡ᤺ᤳ ᤛᤠᤵᤋᤧ᤹ ᤜᤧᤰᤁᤩᤠᤱ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤁᤢᤍᤠᤓᤣᤴ ᤋᤡᤶᤔᤠᤖᤧ ᤗᤠᤃᤡ ᤁᤵᤔᤥ ᤏᤧᤳᤇᤡ ᤔᤠᤖᤠᤶᤜᤠ᤹ ᤕᤥ᤺ᤰᤌᤰᤋᤧ᤹॥ ᤒᤣᤒᤡᤗᤥᤏᤗᤠᤶ ᤁᤧᤗ᤺ᤶᤒᤠ ᤁᤧᤓᤧᤶᤒᤠ ᤗᤠᤶᤔᤡᤴ ᤏᤧᤳᤇᤡ ᤔᤠᤖᤠᤶ ᤁᤧᤛᤧᤒᤠᤍᤧᤴᤏᤥ ᤗᤠᤶ ᤀᤥ᤺ᤴᤎᤠᤰᤔᤠᤖᤧ ᤗᤠᤃᤡ ᤗᤳᤇᤠ ᤔᤡᤰᤛᤣ᤺ᤴ ᤗᤣ᤺ᤳᤋᤧ᤹॥ 20 ᤗᤳᤇᤠ ᤗᤠᤶᤔᤡᤴ ᤀᤶᤔᤥᤏᤒᤠ ᤜᤠᤱᤐᤠᤱ ᤖᤒ᤻ᤒᤠ ᤐᤣᤰ. ᤜᤧᤰᤁᤩᤠᤱ ᤘᤣ᤹ᤛᤔᤠ ᤗᤠᤶᤔᤡᤴ ᤕᤜᤢᤍᤠᤒᤠ ᤜᤠᤱᤕᤰ ᤕᤖᤢᤛᤗᤧᤔ ᤐᤣᤰ॥ 21 ᤒᤣᤒᤡᤗᤥᤏᤒᤠ ᤜᤠᤱᤅᤡᤴ ᤀᤠᤸᤗ ᤕᤖᤢᤛᤗᤧ᤺ᤶᤔᤡᤴ ᤑᤵᤔᤠᤒᤡ ᤀᤡ ᤖᤒ᤻ᤒᤠ᤺ᤴ ᤑᤵᤔᤠᤒᤡ ᤗ᤹ᤖᤡᤰ ᤏᤡ᤺ᤴᤎᤥ ᤔᤧᤶᤒᤥᤱᤅᤣ ᤗᤠᤶ ᤁᤧᤛᤧᤒᤠᤍᤧᤴᤏᤥ ᤕᤧᤵ॥ ᤂᤢᤏᤧ᤹ ᤌᤢᤶᤕᤠ ᤀᤡᤔᤠᤖᤧ ᤗᤠᤃᤡ ᤁᤢᤄᤠᤃᤧᤀᤡᤰᤐᤠᤜᤠ᤹ ᤀᤢ᤺ᤳᤋᤢᤛᤡ᤹॥ ᤋᤥᤱ ᤕᤠᤱᤔᤥᤗᤠᤶ ᤋᤥ᤺ᤱᤜᤠ᤹ ᤕᤃᤱ ᤕᤃᤱ ᤔᤧᤔᤢᤴᤍᤢᤀᤠᤱ ᤂᤧᤱᤜᤠ᤹ᤖᤧ ᤋ᤹ᤕᤠ᤺ᤴᤛᤥᤴ ᤔᤧᤃᤧᤛᤢ᤹॥ ᤂᤧᤱᤜᤠ᤹ᤖᤧ ᤌᤰᤛᤠ ᤋᤥ᤺ᤶᤔᤏᤠᤒᤠ ᤛᤡᤍᤢᤱᤈᤓᤠᤜᤠ᤹ᤖᤧ ᤁᤢᤏᤧᤖᤧᤳᤜᤠ᤹ ᤀᤥᤔᤧᤔᤧᤳᤋᤢ ᤔᤧᤛᤠ᤹ᤖᤢ॥ 22 ᤂᤢᤏᤧ᤹ ᤁᤢᤈᤢᤵᤛᤠᤱ ᤗᤧᤵᤔᤠᤱ ᤁᤧᤕᤧᤵᤐᤠ ᤂᤠᤃᤧᤀᤡᤰᤐᤠᤸᤗᤧ ᤐᤠ᤺ᤳᤋᤢ᤹. ‘ᤕᤖᤢᤛᤗᤧᤔ᥄’ ᤗᤢᤱᤎᤠᤰ ᤗᤢ᤺ᤶᤔᤠ ᤛᤡᤱᤀᤠ᤺ᤳᤜᤠ᤹ᤏᤢ. ᤔᤏᤠᤜᤠ᤹ ᤛᤧᤵᤔᤠᤛᤡ ᤕᤶᤒᤠ ᤀᤡᤰᤗᤠᤀᤥ ᤔᤧᤀ᤺ᤰᤗ. ᤕᤶᤒᤠ ᤗᤠᤶᤎᤣ᤺ᤵᤐᤠᤜᤠ᤹ᤖᤧ ᤁᤢᤍᤰᤗᤧᤱᤘᤠᤀᤥ ᤂᤢᤏᤧ᤹ ᤁᤢᤎᤰᤛᤢᤒᤠᤜᤠ᤹ ᤔᤧᤓᤧᤴ᤹॥ ᤂᤧᤱᤜᤠ᤹ᤖᤧ ᤁᤡᤷᤃᤵ ᤁᤵᤔᤠ ᤆᤱᤜᤡᤶᤜᤠ᤹ ᤔᤧᤕᤧᤵᤛᤢ᤹. ᤜᤧᤰᤁᤩᤠᤱ ᤗᤢᤱᤎᤠᤰᤜᤠ᤹ ᤗᤢ᤺ᤶᤔᤠᤖᤧ ᤗᤠᤃᤡ ᤂᤠᤶᤗᤢᤱᤜᤠ᤹ ᤌᤥ ᤔᤧᤓᤥ᤺ᤰᤂᤢ᤹॥ 23 ᤒᤣᤒᤡᤗᤥᤏ ᤁᤧᤕᤢᤱᤒᤠ ᤔᤏᤠᤜᤠ᤹ᤏᤢ ᤔᤧᤈᤥᤃᤢᤒᤠ ᤂᤢᤴᤇᤡ᤹ ᤏᤠᤍᤱ ᤐᤠ᤺ᤴᤏᤡᤸᤗᤧ ᤆᤥᤃᤢᤸᤗᤧ ᤕᤖᤢᤛᤗᤧᤔ ᤁᤧᤕᤢᤱᤒᤠ ᤕᤰᤕᤢᤱᤒᤠᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤀᤡᤱᤗᤧᤰᤁᤣ ᤂᤠᤀᤡᤰ ᤑᤠ᤹ᤀᤠᤱ ᤔᤧᤀᤡ᤺ᤳᤋᤢ᤹॥ ᤁᤖ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤂᤧᤴ ᤔᤏᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤂᤢᤴᤇᤡ᤹ ᤐᤡᤑᤩᤢᤱᤅᤡᤴ ᤏᤡᤱᤘᤠ᤹ᤛᤢᤶ ᤋᤠᤖᤢ ᤐᤡᤖᤢᤛᤡ᤹॥ ᤂᤧᤒᤩᤠᤱ ᤂᤢᤏᤧ᤹ ᤂᤧᤱᤜᤠ᤹ ᤌᤱᤅᤥ ᤑᤳᤋᤢᤛᤡᤀᤠᤱ ᤋᤧᤶᤛᤢᤛᤡ᤹॥ 24 “ᤂᤧᤸᤗᤧᤆᤥᤃᤢᤸᤗᤧ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤕᤧᤳᤗᤧᤱ ᤕᤧᤳᤗᤧᤱ ᤂᤡᤏᤡ᤹ ᤗᤠᤕᤥᤴ ᤏᤢ ᤂᤡᤏᤡ᤹ ᤀᤠᤵᤋᤡᤰᤁᤡᤴ ᤀᤠᤏᤡᤱᤘᤠ᤹ ᤛᤢᤶ ᤗ᤹ᤖ ᤁᤧᤕᤠ᤺ᤴᤍᤢᤶ᤹॥ ᤂᤡᤏᤡ᤹ ᤁᤴ ᤆᤡᤱᤔᤠᤀᤠᤱ ᤏᤡᤱᤘᤠ᤹ ᤁᤧᤴᤈᤥᤃᤢᤶᤔᤡᤴ᤹᥄ ᤂᤡᤏᤡ᤹ ᤁᤧᤈᤥᤃᤢᤶᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ᤀᤥ. ᤁᤧᤖᤧᤰᤗᤧ ᤀᤥᤔᤧᤵᤔᤠᤖᤧ ᤗᤠᤃᤡ ᤂᤧᤱᤜᤠ᤹ ᤏᤢᤖᤡᤰᤁᤠᤱ ᤏᤡᤎᤠᤵ॥ ᤂᤧᤸᤗᤧᤆᤥᤃᤢᤸᤗᤧ ᤀᤠᤸᤗ ᤂᤡᤏᤡ᤹ ᤂᤢᤶᤍᤡᤱ ᤂᤥᤔᤠ ᤕᤧᤶᤔᤡᤴ ᤋᤩᤧᤀᤠᤱ ᤘᤠ᤹᥄ 25 “ᤀᤡᤛᤪᤠᤀᤡᤗᤒᤠ ᤑᤧᤰᤁᤧᤗᤠ᤹ᤒᤠ ᤏᤢ ᤋᤠᤰᤁᤧᤓᤧ᤹ᤒᤠ ᤕᤢᤰᤛᤠᤒᤣ. ᤂᤧᤏᤧ᤹ ᤁᤧᤏᤢᤵᤔᤠ ᤕᤧᤴᤏᤡᤴ ᤁᤧᤖᤧᤀᤠᤱ ᤘᤠ᤹᥄ 26 ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ— “ᤔᤢᤎᤡᤱ ᤀᤡᤛᤣ᤺ᤱᤒᤠ ᤁᤧᤍᤡ᤺ᤳᤆᤴ ᤑᤢᤳᤆᤡᤰ ᤑᤢᤴᤍᤧᤍᤣᤛᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤋᤃᤡᤒᤧᤴ ᤌᤧᤵᤐᤧᤳ ᤗᤧᤱᤛᤡᤱᤗᤥ॥ ᤀᤠᤸᤗ ᤏ᤺ᤶᤏ᤺ᤶᤒᤧᤴ ᤌᤥ ᤔᤧᤓᤥ᤺ᤰᤂᤢᤖᤥ. ᤜᤧᤰᤁᤩᤠᤱ ᤐᤕᤶ ᤕᤶᤒᤧᤴ ᤕᤥ ᤔᤧᤎᤠᤛᤢᤖᤥ॥ 27 ᤂᤠᤵᤐᤢᤌᤩ᤺ᤱ᥄ ᤂᤠᤵᤐᤢᤌᤩ᤺ᤱ᥄ ᤀᤠᤱᤃᤠ᤹ ᤛᤧᤰᤂᤠᤀᤣ ᤜᤠᤱᤈᤢᤶᤔᤡᤴ ᤂᤠᤵᤐᤢᤌᤩ᤺ᤱ ᤆᤥᤃᤢᤱᤗᤥ॥ ᤜᤧᤰᤁᤩᤠᤱ ᤁᤢᤍᤥ᤺ᤵᤔᤠ ᤂᤠᤛᤧᤴ ᤗᤥ᤺ᤶᤔᤠ ᤕᤢᤰ ᤁᤧᤃᤵᤐᤠ ᤌᤡᤰ ᤀᤥᤛᤣ᤺ᤴᤎᤠᤱ ᤔᤧᤶᤒᤥᤱᤅᤣ ᤌᤠᤖᤡᤰ ᤁᤴ ᤕᤠᤶᤔᤥ ᤔᤧᤒᤥᤱᤏᤧᤴᤗᤥ॥ ᤂᤧᤒᤩᤠᤱ ᤀᤠᤱᤃᤠ᤹ ᤁᤴ ᤂᤢᤏᤧ᤹ ᤜᤢᤰᤛᤢᤵᤋᤢᤱᤗᤥ॥ ᤀᤶᤔᤥᤏᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤋᤠᤓᤣ 28 “ᤜᤧᤰᤁᤩᤠᤱ ᤀᤠᤸᤗ ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤏᤠᤀᤣ. ᤀᤶᤔᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤕᤠ᤺ᤶᤒᤣᤀᤥ ᤏᤢ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤠᤱᤆᤧᤰᤕᤠ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤠᤱᤏᤡᤱᤘᤠ᤹ᤐᤠᤴ ᤐᤠᤖᤧ᤹॥ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤗᤠᤶ ᤂᤧᤏᤧ᤹ ᤁᤴ ᤀᤡᤱᤄᤱᤅᤡᤴ ᤂᤧᤱᤜᤠ᤹ ᤔᤧᤳᤋᤧᤛᤧ᤹ᤀᤥ— “ᤗᤳᤇᤠ ᤋᤠᤓᤣ. ᤋᤠᤓᤣᤎᤡᤰ ᤂᤧᤏᤧ᤹ ᤛᤧᤵᤔᤠᤖᤧ ᤗᤠᤃᤡ ᤔᤧᤓᤡ᤺ᤰᤂᤢᤀᤠᤱ ᤘᤠ᤹ᤖᤥ॥ ᤋᤡᤸᤗᤧᤰ ᤋᤡᤸᤗᤧᤰ ᤛᤠ᤺ᤶᤓᤣ ᤁᤧᤗᤧᤰᤐᤠ ᤁᤢᤀᤡᤛᤡᤰ. ᤁᤸᤗᤧ ᤔᤧᤱᤔᤠᤖᤧ ᤗᤠᤃᤡ ᤔᤧᤀᤡ᤺ᤰᤂᤢᤀᤠᤱ ᤘᤠ᤹ᤖᤥ 29 ᤂᤡᤏᤡ᤹ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤀᤡᤱᤗᤧᤰ ᤛᤢᤑᤥᤜᤠ᤹ ᤔᤧᤒᤠ᤺ᤳᤋᤢᤀᤠᤱ ᤘᤠ᤹ᤖᤥ. ᤜᤧᤰᤁᤩᤠᤱ ᤂᤡᤏᤡ᤹ ᤋ᤹ᤕᤠᤴ ᤀᤥᤃᤧᤔᤧᤵᤐᤠᤜᤠ᤹ᤖᤧ ᤂᤡᤏᤡ᤹ ᤀᤡᤱᤗᤧᤰ ᤁᤧᤶᤔᤧᤳᤋᤡᤀᤠᤱ ᤘᤠ᤹ᤖᤥ॥ ᤂᤢᤶᤍᤡᤱ ᤂᤥᤔᤠ ᤁᤢᤏᤢᤵᤔᤠ ᤕᤧᤴ ᤏᤡ᤺ᤵᤔᤠ ᤁᤧᤃᤧᤵᤐᤠᤀᤠᤱ ᤁᤧᤘᤠ᤹ᤒᤠ ᤁᤢ᤹ᤀᤡᤃᤧᤓᤧᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤛᤡᤳᤗᤠᤜᤠ᤹ᤀᤥ ᤋᤠᤓᤣᤴ ᤆᤢᤰᤋᤧᤀᤠᤱ ᤐᤳᤗᤥ॥ 30 “ᤀᤠᤸᤗ ᤂᤡᤏᤡ᤹ ᤋᤠᤓᤣᤴ ᤁᤢᤛᤢ᤺ᤵᤐᤥ ᤕᤠᤰᤋᤧᤶᤔᤧ᤹ᤀᤥ. ᤌᤣᤀᤠᤱᤓᤧᤸᤗᤧ ᤛᤠᤃᤧᤘᤠ᤺ᤴᤏᤠᤛᤡᤒᤠ ᤂᤡᤏᤡ᤹ ᤗᤠᤈᤣ᤹ᤀᤥ. ᤂᤡᤏᤡ᤹ ᤂᤠᤛᤧᤴ ᤆᤥ᤺ᤰᤔᤠ ᤏᤡ᤺ᤴᤎᤥ ᤆᤥᤃᤢᤱᤗᤥ॥ 31 ᤀᤠᤛᤡᤰ ᤐᤥ᤺ᤰᤔᤠᤴ ᤂᤡᤏᤡ᤹ ᤛᤶᤎᤠᤱ ᤌᤠᤛᤢᤱᤗᤥ ᤀᤠᤛᤠᤰᤁᤧᤴ ᤐᤥ᤺ᤰᤔᤠ ᤔᤡᤴ ᤂᤡᤏᤡ᤹ ᤛᤶᤎᤠᤱ ᤔᤢ᤺ᤳᤋᤢᤱᤗᤥ॥ ᤂᤠᤵᤐᤢᤌᤩ᤺ᤱ ᤆᤥ᤺ᤰᤔᤠ ᤁᤢᤜᤢᤰᤘᤠ ᤁᤧᤏᤢ᤹ᤒᤠ ᤁᤢᤗᤢᤱᤔᤠ᤹ ᤛᤩᤠ᤺ᤳ ᤔᤧᤸᤗ᤹ᤔᤏᤠᤒᤠ ᤔᤏᤠᤜᤠ᤹ᤀᤥ ᤂᤡᤏᤡ᤹ ᤜᤢᤰᤛᤢᤵᤏᤡᤱᤗᤥ॥ 32 ᤔᤡ᤺ᤸᤗᤧ ᤗᤠᤃᤡ ᤂᤡᤏᤡ᤹ ᤏᤡ᤺ᤱᤃᤣ᤹ ᤁᤧᤒᤥᤰᤂᤡᤖᤥ. ᤂᤶᤓᤩᤠᤱ ᤂᤡᤏᤡ᤹ ᤔᤠᤰᤂᤡᤴ ᤀᤠᤒᤠᤅᤣ ᤂᤡᤏᤡ᤹ ᤗᤠᤈᤣ᤹ᤀᤥ ᤘᤧᤳᤗᤥ॥ ᤂᤡᤏᤡ᤹ ᤘᤖᤧᤱᤗᤧᤱ ᤂᤰᤐᤧᤳ ᤁᤧᤔᤧᤃᤡᤖᤥ. ᤛᤠᤵᤔᤢ᤺ᤴᤎᤢᤶᤔᤥ ᤂᤡᤏᤡ᤹ ᤏᤡᤱᤘᤠ᤹ᤛᤥᤰ ᤔᤠᤖᤥ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤴ ᤐᤠᤖᤠᤱᤅᤠᤱ ᤘᤠ᤹ᤖᤥ᥄” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.