ᤀᤡᤈᤁᤡᤀᤣᤗ 20 - LIFOTNTᤐᤠᤴ ᤔᤧᤱᤄᤧᤶᤔᤏᤠᤒᤠ ᤀᤡᤛᤪᤠᤀᤡᤗᤡᤜᤠ᤹ 1 ᤕᤜᤥᤕᤠᤁᤡᤏ ᤜᤠᤱᤅᤡᤴ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤒᤠ. ᤏᤢᤛᤡᤃᤣᤰᤐᤠ ᤋᤱᤒᤣ. ᤅᤠᤛᤡᤃᤣᤰᤐᤠ ᤗᤠ ᤌᤡᤒᤥᤱᤃᤣᤰᤐᤠ ᤕᤧᤴᤏᤥ. ᤁᤢᤓᤠ ᤀᤡᤛᤪᤠᤀᤡᤗᤒᤠ ᤗᤠᤶᤗᤥᤒᤠᤜᤠ᤹ ᤕᤜᤘᤣ ᤍᤠᤱᤒᤠᤗᤠᤶ ᤀᤡᤱᤄᤱ ᤛᤣ᤺ᤴᤍᤥᤛᤧ ᤔᤧᤍᤩᤧ॥ ᤂᤢᤏᤧ᤹ᤗᤠᤶ ᤀᤡᤱᤄᤱ ᤂᤧᤶᤔᤠᤖᤧ ᤗᤠᤃᤡ ᤂᤧᤱᤜᤠ᤹ ᤀᤠᤱᤃᤠ᤹ ᤀᤠᤍᤃᤡ ᤔᤧᤕᤢᤱᤛᤡᤱᤅᤠᤱ ᤔᤧᤕᤢᤅᤧ॥ 2 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠᤗᤠᤶ ᤁᤴ ᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤁᤧᤖᤧ— 3 “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤂᤧᤏᤧ᤹ ᤀᤡᤛᤪᤠᤀᤡᤗᤒᤠ ᤗᤠᤶᤗᤥᤒᤠᤜᤠ᤹ ᤔᤧᤳᤋᤧᤛᤧ᤹. ‘ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤀᤠᤱᤃᤠ᤹ ᤗᤳᤇᤠ ᤀᤡᤱᤄᤱ ᤛᤣ᤺ᤴᤍᤥᤔᤠᤖᤧ ᤗᤠᤃᤡ ᤂᤡᤏᤡ᤹ ᤀᤠᤰᤂᤣᤗ᤹ᤖᤡᤰ ᤁᤧᤀᤠ᤺ᤴᤏᤠᤛᤡᤀᤠᤱ ᤁᤧᤍᤩᤧ᤹ᤀᤡᤒᤣ᥅ ᤀᤠᤱᤃᤠ᤹ ᤛᤧᤰᤂᤠᤀᤣ ᤁᤢᤜᤡᤱᤘᤧᤳ ᤘᤠ᤹ᤀᤠᤒᤠ ᤁᤢᤀᤡᤛᤡᤰ. ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱ᤹. ᤀᤠᤱᤃᤠ᤹ ᤂᤡᤏᤡ᤹ ᤌᤧᤔᤠᤀᤠᤱ ᤔᤧᤔᤧᤳᤏᤡᤱᤅᤡᤴ᤹᥄’ 4 “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤋᤢ᤺ᤴᤍᤣ᤹ ᤐᤠ᤺ᤴᤜᤠ᤹ ᤋᤠᤖᤧ᤹ ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤠᤵᤋᤡᤰ ᤁᤢ᤺ᤳᤋᤧᤛᤧ᤹॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤠ᤺ᤰᤌᤧᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤜᤠ᤹ ᤛᤧᤰᤂᤠᤀᤣ ᤀᤠᤰᤂᤧᤴ ᤛᤠ᤹ᤖᤡᤰ ᤕᤠᤶᤃᤧᤛᤡᤱᤒᤠ ᤆᤥᤃᤧ ᤑᤠ᤹ᤀᤠᤱ ᤂᤧᤱᤜᤠ᤹ ᤂᤢᤴᤇᤡ᤹ ᤏᤡᤱᤘᤠ᤹ᤛᤢᤶ ᤗ᤹ᤖ ᤕᤠ᤺ᤴᤍᤧᤛᤧ᤹॥ 5 ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤗᤠᤶ ᤁᤴ ᤀᤡᤱᤄᤱᤅᤡᤴ ᤂᤧᤏᤧ᤹ ᤂᤧᤱᤜᤠ᤹ ᤔᤧᤳᤋᤧᤛᤧ᤹—ᤀᤠᤱᤃᤠ᤹ ᤀᤡᤛᤪᤠᤀᤡᤗᤧᤴ ᤛᤣᤃᤢᤱᤅᤡᤸᤗᤧ. ᤀᤠᤱᤃᤠ᤹ ᤔᤡᤛᤪᤀᤥ ᤕᤠᤁᤢᤒᤖᤧ ᤁᤢᤔᤢ᤹ᤀᤡᤍᤠᤱᤛᤠᤜᤠ᤹ᤀᤥ ᤀᤥᤛᤣ᤺ᤴᤎᤠᤱ ᤆᤥ᤺ᤰᤛᤡᤱᤅᤠᤸᤗᤧ ᤀᤠᤱᤃᤠ᤹ ᤔᤠᤱᤜᤢᤵ ᤆᤥᤃᤢᤱᤅᤠᤱ ᤂᤧᤱᤜᤠ᤹ ᤔᤧᤳᤋᤢᤱᤛᤡᤱ. ‘ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠ॥’ 6 ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤗᤠᤃᤡ ᤂᤥᤛᤢᤱᤒᤠ ᤏᤢ ᤁᤥ᤺ᤶᤓᤥ ᤆᤥᤃᤢᤱᤅᤠᤱ ᤏᤧᤛ᤻ᤛᤧᤒᤠ. ᤁᤧᤖᤧᤰ ᤀᤠᤳᤋᤡᤴ ᤗᤠᤈᤣ᤹ᤜᤠ᤹ᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤏᤢᤒᤠ. ᤐᤡᤳᤏᤢ ᤏᤢ ᤛᤰᤘᤠᤄᤢ ᤁᤧᤃᤢᤱᤒᤠ. ᤗᤳᤇᤠ ᤏᤢᤒᤠ ᤗᤠᤈᤣ᤹ᤀᤥ ᤀᤠᤱᤃᤠ᤹ ᤔᤡᤛᤪᤗᤠᤶ ᤂᤡᤏᤡ᤹ ᤗ᤺ᤳᤏᤡᤱ ᤑᤧᤳᤏᤡᤱ᤹ ᤔᤧᤳᤋᤢᤱᤛᤡᤱᤅᤠᤱ ᤂᤧᤸᤗᤧ ᤕᤠ᤺ᤴᤍᤡᤰ ᤀᤠᤱᤃᤠ᤹ ᤗᤳᤇᤠ ᤔᤠᤱᤜᤧᤰ ᤌᤡᤰ ᤆᤥᤃᤢᤱᤅᤠᤱ ᤘᤕᤧ॥ 7 ᤂᤧᤒᤩᤠᤱ ᤀᤠᤱᤃᤠ᤹ ᤂᤧᤱᤜᤠ᤹ ᤔᤧᤳᤋᤢᤱᤛᤡᤱ. ‘ᤂᤡᤏᤡ᤹ ᤁᤧᤖᤧᤰᤗᤧ ᤏᤡᤱᤘᤠ᤹ᤀᤥ ᤁᤧᤕᤢᤱᤒᤠ ᤛᤠ᤹ᤖᤡᤰ ᤆᤡ᤺ᤴᤈᤡ᤺ᤴᤃᤧᤄᤢᤒᤠ ᤆᤀᤡ᤺ᤳᤜᤠ᤹ ᤂᤡᤏᤡ᤹ ᤗᤠᤵᤑᤢᤛᤠᤶᤔᤧ᤹॥ ᤔᤡᤛᤪᤒᤠ ᤏᤠᤘᤠᤀᤡᤳᤗᤠᤜᤠ᤹ᤖᤧ ᤂᤡᤏᤡ᤹ ᤀᤠᤛᤢᤳᤌᤥ ᤔᤧᤈᤥ᤺ᤰᤁᤠᤛᤡᤶᤔᤡᤴᤏᤧ᤹. ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠ॥’ 8 “ᤁᤖ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤐᤡᤑᤩᤢᤱ ᤔᤧᤈᤥᤃᤢ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤔᤧᤱᤄᤧᤵᤛᤢᤴ॥ ᤂᤢᤴᤇᤡ᤹ ᤏᤡᤱᤘᤠ᤹ᤀᤥ ᤁᤧᤕᤢᤱᤒᤠ ᤆᤡ᤺ᤴᤈᤡ᤺ᤴᤃᤧᤄᤢᤒᤠ ᤆᤀᤡ᤺ᤳᤜᤠ᤹ᤗᤠᤶ ᤂᤧᤱᤜᤠ᤹ ᤗᤠ᤺ᤳᤗᤠ᤺ᤳ ᤔᤧᤶᤒᤥ᤺ᤰᤂᤧᤴ. ᤀᤡᤃᤪ ᤔᤡᤛᤪᤒᤠ ᤏᤠᤘᤠᤀᤡᤳᤗᤠᤜᤠ᤹ ᤗᤠᤵᤔᤧᤶᤓᤢᤛᤢᤛᤡᤴ॥ ᤂᤧᤒᤩᤠᤱ ᤂᤧᤱᤜᤠ᤹ ᤔᤡᤛᤪ ᤔᤧᤘᤕᤧᤸᤗᤧᤀᤣ ᤀᤠᤱᤃᤠ᤹ ᤀᤠᤛᤠᤰᤁᤧᤴᤏᤡᤴ ᤆᤡ᤺ᤱᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤛᤠ᤹ᤖᤡᤰ ᤀᤠᤕᤠ᤺ᤰᤗᤧ᤹ᤔᤧᤴ ᤂᤡᤏᤡ᤹ᤀᤥ ᤌᤠᤛᤢᤱ᤹ ᤑᤠ᤹ᤀᤠᤱ ᤂᤧᤱᤜᤠ᤹ ᤕᤱᤔᤠ ᤛᤧᤖᤢᤱᤛᤡᤱᤅᤠᤱ ᤘᤕᤧ॥ 9 ᤁᤖ ᤀᤠᤱᤃᤠ᤹ ᤀᤠᤔᤡᤱᤛᤥ ᤀᤠᤎᤠᤱᤛᤥᤴ ᤛᤧ᤺ᤵᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤔᤧᤴᤈᤥ᤺ᤰᤐᤠ॥ ᤔᤡᤛᤪᤗᤠᤶ ᤀᤠᤱᤃᤠ᤹ ᤀᤡᤛᤪᤠᤀᤡᤗᤡᤜᤠ᤹ ᤗ᤺ᤳᤋᤢᤱ ᤑᤧᤳᤋᤢᤱᤛᤡᤱᤅᤡᤸᤗᤧ ᤀᤠᤱᤃᤠ᤹ ᤜᤠ᤺ᤳᤀᤠ ᤑᤠ᤹ᤀᤠᤱ ᤀᤠᤵᤑᤣᤰ ᤀᤥᤛᤣ᤺ᤴᤎᤠᤱ ᤐᤥ᤺ᤰᤂᤠᤱᤒᤠ ᤁᤧᤏᤡᤒᤠ ᤁᤧᤖᤧᤰ ᤐᤡᤛᤠᤱᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤀᤠᤱᤃᤠ᤹ ᤀᤠᤔᤡᤱᤅᤥ ᤛᤡᤖᤡᤱᤔᤔᤠ ᤁᤧᤒᤥᤱᤒᤠ ᤐᤥ᤺ᤰᤂᤧᤖ ᤔᤧᤴᤈᤥᤰᤐᤧᤴ॥ 10 “ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤂᤧᤱᤜᤠ᤹ ᤔᤡᤛᤪᤗᤠᤶ ᤗ᤺ᤳᤋᤢᤱ ᤑᤧᤳᤋᤢᤱᤛᤡᤱ ᤜᤧᤰᤁᤩᤠᤱ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠ ᤀᤣ᤺ᤰᤛᤠᤍᤧᤴᤏᤥ ᤗᤠᤶᤗᤥᤛᤢᤱᤛᤡᤱ॥ 11 ᤂᤧᤵᤔᤥ ᤀᤠᤱᤃᤠ᤹ ᤀᤠᤀᤡᤱᤈᤠᤱᤜᤠ᤹ ᤏᤢ ᤀᤠᤎᤡᤶᤜᤠ᤹ ᤂᤧᤱᤜᤠ᤹ ᤐᤡᤖᤢᤱᤛᤡᤱ. ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢᤀᤠᤱ ᤂᤧᤱᤜᤠ᤹ᤖᤧ ᤜᤡᤱᤔᤴ ᤂᤥᤔᤠ ᤔᤧᤛᤢᤰᤋᤢᤖ॥ 12 ᤜᤧᤰᤁᤩᤠᤱ ᤀᤠᤱᤃᤠ᤹ ᤏᤢ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤔᤡᤰᤛᤣᤴ ᤁᤢᤀᤡᤛᤡᤰ ᤂᤧᤱᤜᤠ᤹ ᤀᤠᤱᤃᤠ᤹ ᤀᤠᤛᤠᤒᤠᤌ ᤏᤠ᤺ᤶᤛᤡᤱᤔᤠ ᤕᤧᤴᤜᤠ᤹ ᤐᤡᤖᤢᤱᤛᤡᤱ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ ᤛᤣᤛᤣ ᤆᤥ᤺ᤰᤔᤠᤛᤡᤖᤧ ᤗᤠᤃᤡ ᤀᤣ᤺ᤰ ᤛᤧᤴᤍᤢᤱᤛᤡᤱᤅᤠᤱ ᤘᤕᤧ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤛᤢᤶ ᤋᤠ᤺ᤵᤔᤠᤖᤧ ᤗᤠᤃᤡ ᤁᤴ ᤘᤕᤧ॥ 13 “ᤁᤖ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ᤖᤧ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤐᤡᤑᤩᤢᤱ ᤔᤧᤈᤥᤃᤢ. ᤜᤧᤰᤁᤩᤠᤱ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠ ᤀᤣ᤺ᤰᤛᤠᤍᤧᤴᤏᤥ ᤀᤠᤱᤃᤠ᤹ ᤀᤠᤎᤡᤶᤜᤠ᤹ ᤂᤢᤴᤇᤡ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤔᤧᤴᤍᤧᤴᤍᤧᤴ॥ ᤀᤡᤱᤈᤠᤱ ᤁᤧᤄᤧᤶᤒᤠ ᤐᤥᤱᤔᤠᤗᤠᤶ ᤂᤧᤱᤜᤠ᤹ᤖᤧ ᤜᤡᤱᤔᤴ ᤔᤧᤄᤥᤛᤢᤛᤠᤱ ᤀᤠᤱᤃᤠ᤹ ᤀᤠᤎᤡᤶᤜᤠ᤹ ᤂᤧᤱᤜᤠ᤹ᤖᤧ ᤔᤧᤴᤀᤡ᤺ᤳᤋᤢᤴ ᤔᤧᤴᤏᤠ᤺ᤳᤋᤢᤴ॥ ᤀᤠᤱᤃᤠ᤹ ᤀᤠᤛᤠᤒᤠᤌ ᤏᤠ᤺ᤶᤛᤡᤱᤔᤠ ᤕᤧᤴᤜᤠ᤹ᤀᤠᤱ ᤂᤧᤱᤜᤠ᤹ᤖᤧ ᤔᤧᤓᤣ᤺ᤴᤍᤢ॥ ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤛᤠᤰᤁᤧᤴᤏᤡᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤌᤠᤔᤠᤖᤧ ᤗᤠᤃᤡ ᤕᤱᤔᤠ ᤛᤧᤖᤢᤱᤛᤡᤱ. ᤂᤶᤓᤩᤠᤱ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠ ᤀᤣ᤺ᤰᤛᤠᤍᤧᤴᤏᤥ ᤂᤧᤱᤜᤠ᤹ ᤘᤖᤧᤱᤗᤧᤱ ᤂᤰᤐᤧᤳ ᤔᤧᤱᤔᤠᤛᤡ ᤏᤡᤱᤛᤣᤰ ᤆᤥᤃᤢᤱᤅᤠᤱ ᤘᤕᤧ॥ 14 ᤁᤖ ᤔᤡᤛᤪᤗᤠᤶ ᤀᤠᤱᤃᤠ᤹ ᤀᤡᤛᤪᤠᤀᤡᤗᤡᤜᤠ᤹ ᤗ᤺ᤳᤋᤢᤱ ᤌᤠᤰᤋᤢᤱᤛᤡᤱᤅᤡᤸᤗᤧ ᤀᤠᤱᤃᤠ᤹ ᤀᤠᤔᤢᤰᤛᤠᤶᤔᤡᤴ ᤁᤧᤏᤡᤒᤠᤀᤠᤱ ᤁᤧᤘᤠ᤹ᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤀᤠᤱᤃᤠ᤹ ᤀᤠᤔᤡᤱᤅᤥ ᤛᤡᤖᤡᤱᤔᤔᤠ ᤔᤧᤒᤥᤱᤏᤧᤴᤗ ᤑᤠ᤹ᤀᤠᤱ ᤀᤠᤱᤃᤠ᤹ ᤀᤠᤔᤡᤱᤛᤥ ᤀᤠᤎᤠᤱᤛᤥᤴ ᤛᤧ᤺ᤵᤔᤠᤖᤧ ᤗᤠᤃᤡ ᤜᤧᤰᤁᤣ ᤔᤧᤴᤈᤥ᤺ᤰᤐᤠ॥ 15 ᤁᤖ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠ ᤀᤣ᤺ᤰᤛᤠᤍᤧᤴᤏᤥ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤁᤧᤵᤔᤠᤀᤣ ᤁᤧᤒᤥᤱᤒᤠ ᤔᤠᤱᤜᤧᤰ ᤌᤡᤰ ᤆᤥᤃᤢᤱ॥ ᤀᤠᤱᤃᤠ᤹ ᤂᤧᤱᤜᤠ᤹ ᤐᤡᤖᤢᤱᤛᤡᤱᤅᤠᤱ ᤏᤧᤛ᤻ᤛᤧᤒᤠ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰᤏᤢ᤺ᤸᤗᤧ ᤆᤠ᤹ᤖᤡᤰ ᤏᤢᤒᤠ ᤋᤧᤴ. ᤐᤡᤳᤏᤢ ᤏᤢ ᤛᤰᤘᤠᤄᤢ ᤁᤧᤃᤢᤱᤒᤠ ᤗᤠᤈᤣ᤹ᤀᤥ ᤂᤧᤱᤜᤠ᤹ ᤔᤧᤓᤧᤳᤋᤢᤱᤛᤡᤱᤅᤡᤴ ᤑᤠ᤹ᤀᤠᤱ ᤀᤠᤱᤃᤠ᤹ ᤔᤠᤱᤜᤧᤰ ᤆᤥᤃᤢᤱ॥ 16 ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤀᤠᤎᤡᤶᤜᤠ᤹ ᤂᤧᤱᤜᤠ᤹ᤖᤧ ᤔᤧᤏᤠ᤹ᤖᤢᤀᤠᤱ ᤘᤕᤧ. ᤀᤠᤱᤃᤠ᤹ ᤀᤠᤀᤡᤱᤈᤠᤱᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤂᤧᤱᤜᤠ᤹ ᤔᤧᤴᤍᤧᤴᤍᤧᤴ. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤛᤠᤒᤠᤌ ᤏᤠ᤺ᤶᤛᤡᤱᤔᤠ ᤕᤧᤴᤜᤠ᤹ ᤔᤧᤓᤣ᤺ᤴᤍᤢ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤡᤰᤗᤢᤱᤔᤠ᤹ ᤏᤡᤱᤘᤠ᤹ᤜᤠ᤹ ᤂᤢᤴᤇᤡ᤹ ᤏᤠᤘᤠᤀᤡᤳᤗᤠᤜᤠ᤹ ᤔᤧᤒᤡᤖᤢᤛᤡᤀᤠᤱ ᤔᤧᤘᤕᤧ॥ 17 ᤁᤖᤛᤠᤱ ᤀᤠᤱᤃᤠ᤹ ᤂᤧᤱᤜᤠ᤹ ᤀᤠᤗᤢᤱᤔᤠ᤹ ᤔᤧᤍᤢᤃᤧ ᤜᤧᤰᤁᤩᤠᤱ ᤔᤢᤖᤧᤰ ᤂᤠᤖᤧᤰᤐᤠ ᤌᤣᤀᤠᤱ ᤁᤧᤜᤥᤵᤐᤠ ᤀᤣ᤺ᤰᤛᤠᤍᤧᤴᤏᤥ ᤂᤧᤱᤜᤠ᤹ ᤔᤧᤱᤔᤠᤛᤡᤗᤠᤶ ᤀᤣᤃᤠᤱ ᤏᤢ᤺ᤰᤂᤠᤱ॥ 18 “ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤜᤠ᤹ ᤀᤰᤂᤣ ᤔᤧᤳᤋᤢᤱᤛᤡᤱ. ‘ᤂᤡᤏᤡ᤹ ᤐᤠᤔᤠᤜᤠ᤹ᤖᤧ ᤂᤢᤴᤇᤡ᤹ ᤌᤡᤶᤜᤠ᤹ ᤀᤡᤃᤪ ᤂᤧᤱᤜᤠ᤹ᤖᤧ ᤔᤧᤈᤥᤃᤢ ᤔᤧᤕᤢᤖᤢᤒᤠ ᤐᤠ᤺ᤴᤜᤠ᤹ ᤔᤧᤀᤡ᤺ᤳᤋᤧᤶᤔᤡᤴᤏᤧ᤹ ᤀᤡᤃᤪ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤠᤘᤠᤀᤡᤳᤗᤠᤜᤠ᤹ᤗᤠᤶ ᤀᤠᤛᤢᤳᤌᤥ ᤔᤧᤈᤥ᤺ᤰᤁᤠᤛᤡᤶᤔᤧ᤹॥’ 19 ᤀᤠᤱᤃᤠ᤹ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤢᤱᤛᤡᤱ. ‘ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠ॥ ᤀᤠᤱᤃᤠ᤹ ᤀᤠᤀᤡᤱᤈᤠᤱᤜᤠ᤹ ᤀᤡ᤺ᤳᤋᤧᤶ ᤏᤠ᤺ᤳᤋᤧᤶᤔᤧ᤹. ᤀᤠᤱᤃᤠ᤹ ᤀᤠᤎᤡᤶᤜᤠ᤹ᤀᤥ ᤏᤡᤱᤘᤠ᤹ ᤐᤡᤖᤧᤶᤔᤧ᤹॥’ 20 ᤀᤠᤱᤃᤠ᤹ ᤀᤠᤛᤠᤒᤠᤌ ᤏᤠ᤺ᤶᤛᤡᤱᤔᤠ ᤕᤧᤴᤜᤠ᤹ ᤛᤣᤛᤣ ᤗ᤹ᤖᤡᤰ ᤏᤧᤳᤋᤧᤶᤔᤧ᤹. ᤀᤠᤱᤃᤠ᤹ ᤏᤢ ᤂᤡᤏᤡ᤹ ᤗᤢᤶᤔᤥᤒᤠ ᤔᤡᤰᤛᤣᤴ ᤁᤢᤀᤡᤛᤡᤰ ᤀᤠᤱᤃᤠ᤹ ᤀᤠᤛᤠᤒᤠᤌ ᤏᤠ᤺ᤶᤛᤡᤱᤔᤠ ᤕᤧᤴᤜᤠ᤹ ᤂᤡᤏᤡ᤹ ᤐᤡᤏᤡᤱ॥ ᤂᤧᤒᤩᤠᤱ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤀᤠ ᤑᤠ᤹ᤀᤠᤱ ᤂᤡᤏᤡ᤹ ᤏᤡᤱᤘᤠ᤹ ᤁᤧᤄᤥᤛᤢᤶ᤹॥ 21 “ᤁᤖ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤜᤠ᤹ᤖᤧᤀᤠᤱ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤐᤡᤑᤩᤢᤱ ᤔᤧᤈᤥᤃᤢ॥ ᤀᤡᤱᤈᤠᤱ ᤁᤧᤄᤧᤶᤒᤠ ᤐᤥᤱᤔᤠᤗᤠᤶ ᤂᤧᤱᤜᤠ᤹ᤖᤧ ᤜᤡᤱᤔᤴ ᤔᤧᤄᤥᤛᤢᤒᤠ ᤘᤕᤧᤛᤠᤱ. ᤀᤠᤱᤃᤠ᤹ ᤀᤠᤀᤡᤱᤈᤠᤱᤜᤠ᤹ ᤀᤡ᤺ᤵᤔᤠ ᤏᤠ᤺ᤵᤔᤠ ᤏᤢ ᤀᤠᤱᤃᤠ᤹ ᤀᤠᤎᤡᤶᤜᤠ᤹ ᤋᤡᤶᤔᤠ ᤏᤠ᤺ᤵᤔᤠ ᤂᤧᤱᤜᤠ᤹ ᤔᤧᤴᤍᤧᤴᤍᤧᤴ॥ ᤂᤶᤓᤩᤠᤱ ᤀᤠᤱᤃᤠ᤹ ᤀᤠᤛᤠᤒᤠᤌ ᤕᤧᤴᤜᤠ᤹ᤀᤠᤱ ᤂᤧᤱᤜᤠ᤹ᤖᤧ ᤔᤧᤓᤣ᤺ᤴᤍᤢ॥ ᤂᤧᤸᤗᤧᤆᤥᤃᤢᤸᤗᤧ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠ ᤀᤣ᤺ᤰᤛᤠᤍᤧᤴᤏᤥ ᤀᤠᤱᤃᤠ᤹ ᤛᤠ᤹ᤖᤡᤰ ᤀᤠᤛᤡᤰ ᤐᤥ᤺ᤰᤔᤠᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤌᤠᤛᤢᤱ ᤑᤠ᤹ᤀᤠᤱ ᤀᤠᤱᤃᤠ᤹ ᤕᤠᤶᤔᤥ ᤂᤧᤱᤜᤠ᤹ ᤕᤱᤔᤠ ᤛᤧᤖᤢᤱᤛᤡᤱ॥ 22 ᤁᤖᤛᤠᤱ ᤔᤡᤛᤪᤗᤠᤶ ᤀᤠᤱᤃᤠ᤹ ᤀᤡᤛᤪᤠᤀᤡᤗᤡᤜᤠ᤹ ᤗ᤺ᤳᤋᤢᤱ ᤌᤠᤰᤋᤢᤱᤛᤡᤱᤅᤡᤸᤗᤧ ᤀᤠᤱᤃᤠ᤹ ᤀᤠᤔᤢᤰᤛᤠᤶᤔᤡᤴ ᤁᤧᤏᤡᤒᤠᤀᤠᤱ ᤁᤧᤘᤠ᤹ᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤀᤠᤱᤃᤠ᤹ ᤀᤠᤔᤡᤱᤅᤥ ᤛᤡᤖᤡᤱᤔᤔᤠ ᤔᤧᤒᤥᤱᤏᤧᤴᤗ ᤑᤠ᤹ᤀᤠᤱ ᤀᤠᤱᤃᤠ᤹ ᤀᤠᤔᤡᤱᤛᤥ ᤀᤠᤎᤠᤱᤛᤥᤴ ᤛᤧ᤺ᤵᤔᤠᤖᤧ ᤗᤠᤃᤡ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤀᤠᤱᤃᤠ᤹ ᤜᤧᤰᤁᤣ ᤔᤧᤴᤈᤥ᤺ᤰᤐᤠ॥ 23 ᤁᤖ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠ ᤀᤣ᤺ᤰᤛᤠᤍᤧᤴᤏᤥ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤁᤧᤵᤔᤠᤀᤣ ᤁᤧᤒᤥᤱᤒᤠ ᤗᤳᤇᤠ ᤔᤠᤱᤜᤧᤰ ᤆᤥᤃᤢᤱ॥ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤂᤧᤱᤜᤠ᤹ ᤑᤢᤳᤇᤡᤱᤈᤩᤠᤱ ᤛᤧᤔᤠᤍᤣᤔᤠᤛᤡᤖᤧ ᤗᤠᤃᤡ ᤔᤠᤱᤜᤧᤰᤛᤡᤱᤅᤠᤖᤥ॥ 24 ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤎᤡᤶᤜᤠ᤹ ᤔᤧᤴᤀᤡ᤺ᤳᤋᤢᤴ ᤔᤧᤴᤏᤠ᤺ᤳᤋᤢᤴ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤠ᤺ᤰᤌᤧᤒᤠᤜᤠ᤹ᤖᤧ ᤂᤢᤴᤇᤡ᤹ ᤏᤠᤘᤠᤀᤡᤳᤗᤠᤜᤠ᤹ᤀᤥ ᤏᤡᤱᤘᤠ᤹ ᤀᤡᤃᤣ᤺ᤰ ᤗ᤹ᤖᤧ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤛᤠᤒᤠᤌ ᤕᤧᤴᤜᤠ᤹ ᤔᤧᤓᤣ᤺ᤴᤍᤢᤀᤠᤱ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤀᤡᤱᤈᤠᤱᤜᤠ᤹ ᤁᤢᤏᤠᤔᤧᤴᤇᤠ᤹ ᤔᤧᤔᤧᤳᤋᤢ॥ 25 ᤀᤠᤱᤃᤠ᤹ ᤂᤧᤱᤜᤠ᤹ ᤐᤡᤖᤢᤱᤛᤡᤱᤒᤠ ᤌᤡᤶᤜᤠ᤹ ᤏᤢᤒᤠ ᤔᤧᤘᤕᤧᤏᤧᤴ ᤜᤧᤰᤁᤩᤠᤱ ᤂᤧᤴ ᤀᤡᤱᤈᤠᤱᤜᤠ᤹ᤖᤧ ᤂᤧᤱᤜᤠ᤹ ᤜᤡᤱᤔᤴᤏᤥ ᤗᤠᤶᤔᤧᤗᤥᤛᤢᤛᤡᤴ॥ 26 ᤀᤠᤱᤃᤠ᤹ ᤂᤧᤱᤜᤠ᤹ ᤐᤡᤖᤢᤱᤛᤡᤱᤅᤠᤱ ᤘᤕᤧᤒᤠ ᤔᤡᤰᤋᤥᤰ ᤐᤷᤎᤠ᤺ᤶᤜᤠ᤹ᤖᤧᤀᤣ ᤂᤢᤴᤇᤡ᤹ ᤀᤠᤒᤠᤅᤣ ᤀᤠᤛᤢᤳᤌᤥ ᤐᤥᤱᤔᤠ ᤑᤠ᤺ᤰᤋᤢᤱᤛᤡᤱ. ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ ᤔᤧᤱᤔᤠᤛᤡ ᤏᤢ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤁᤧᤗ᤹ᤒᤠ ᤐᤠ᤺ᤴᤏᤡᤴ ᤏᤡᤱᤘᤠ᤹ᤛᤢᤶ ᤋᤠᤖᤢᤱ ᤐᤡᤖᤢᤱᤛᤡᤱᤗ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤢᤶᤒᤠ ᤛᤠᤜᤠ᤹ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤁᤢᤀᤡᤛᤡᤰ ᤂᤢᤴᤇᤡ᤹ ᤔᤠᤱᤜᤠ᤹ᤀᤥ ᤋᤥ᤺ᤶᤔᤠ ᤑᤠ᤺ᤰᤋᤢᤱᤛᤡᤱ॥ 27 “ᤂᤧᤸᤗᤧᤆᤥᤃᤢᤸᤗᤧ ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤏᤠᤀᤣ. ᤁᤴ ᤀᤡᤱᤄᤱᤅᤡᤴ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤔᤧᤳᤋᤧᤛᤧ᤹. ‘ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤂᤡᤏᤡ᤹ ᤋᤠᤰᤌᤧᤒᤠᤜᤠ᤹ᤖᤧ ᤀᤠᤱᤃᤠ᤹ ᤆᤰᤔᤧᤸᤗ᤹ᤀᤣ ᤔᤠᤱᤆᤧᤰᤕᤠ ᤔᤧᤔᤧᤳᤋᤠᤱ. ᤜᤧᤰᤁᤩᤠᤱ ᤀᤠᤱᤃᤠ᤹ ᤔᤧᤏᤠ᤹ᤖᤠᤱ. 28 ᤂᤧᤱᤜᤠ᤹ ᤐᤡᤏᤡᤱ ᤔᤧᤳᤋᤢᤱᤛᤡᤱᤅᤠᤱ ᤔᤠᤱᤜᤢᤵ ᤆᤥᤃᤢᤱᤒᤠ ᤗᤠᤈᤣ᤹ᤀᤥ ᤂᤧᤱᤜᤠ᤹ ᤑᤧᤳᤋᤢᤱᤛᤡᤱᤅᤡᤸᤗᤧ. ᤂᤧᤱᤜᤠ᤹ᤖᤧ ᤔᤧᤏᤡᤛᤢᤒᤠ ᤁᤧᤖᤧᤰ ᤁᤣ᤺ᤶᤒᤠ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ᤀᤥ ᤜᤧᤰᤁᤩᤠᤱ ᤛᤖᤣ᤺ᤰᤕᤠ᤺ᤵᤐᤠ ᤜᤢᤶᤒᤧᤵᤐᤠ ᤛᤡᤱᤒᤢᤱᤜᤠ᤹ᤖᤧ ᤁᤢᤛᤡᤃᤠᤱ ᤂᤧᤱᤜᤠ᤹ᤖᤧ ᤛᤡᤍᤢᤱᤈᤓᤠ ᤔᤧᤍᤥᤴᤍᤢ᥄ ᤂᤧᤱᤜᤠ᤹ᤖᤧ ᤛᤡᤍᤢᤱᤈᤓᤠ ᤔᤧᤍᤥᤴᤍᤢᤀᤠᤱ ᤀᤠᤱᤃᤠ᤹ ᤀᤠᤳᤋᤡ ᤀᤠᤳᤋᤡ ᤛᤠ᤹ᤖᤡᤰ ᤀᤠᤛᤡᤰ ᤔᤧᤓᤥ᤺ᤰᤂᤢ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤠᤳᤋᤠᤖᤜᤠ᤹ ᤏᤢ ᤛᤢᤰᤐᤠ ᤔᤧᤍᤠᤖᤢ ᤜᤧᤰᤁᤩᤠᤱ ᤂᤢᤴᤇᤡ᤹ ᤘᤍᤢᤶᤒᤰᤘᤠ ᤛᤡᤍᤢᤱᤈᤓᤠᤜᤠ᤹ᤖᤧ ᤂᤧᤱᤜᤠ᤹ ᤔᤧᤗᤧ᤺ᤰᤋᤢᤛᤡ॥’ 29 ᤀᤠᤱᤃᤠ᤹ ᤂᤧᤱᤜᤠ᤹ ᤔᤧᤳᤋᤢᤱᤛᤡᤱ. ‘ᤂᤡᤏᤡ᤹ ᤁᤧᤒᤣᤃᤡᤖ ᤁᤧᤘᤕᤡᤒᤠ ᤁᤴ ᤆᤴᤈᤶᤒᤠᤍᤧᤴᤜᤠ᤹ ᤌᤧᤔᤠᤒᤣ᥅’ (ᤁᤴ ᤐᤖᤡᤰᤐᤠ ᤔᤠᤱᤎᤠ᤺ᤴᤜᤠ᤹ ᤂᤧᤴᤏᤠᤱᤎᤥ ᤒᤠᤔᤠ ᤔᤧᤔᤧᤳᤋᤢ ᤔᤧᤎᤠᤰᤋᤢᤀᤠᤱ ᤘᤠ᤹॥) 30 “ᤂᤧᤸᤗᤧᤆᤥᤃᤢᤸᤗᤧ ᤂᤧᤏᤧ᤹ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤔᤧᤳᤋᤧ᤹ᤛᤧ᤹—‘ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤂᤡᤏᤡ᤹ ᤌᤠ᤺ᤰᤌᤧᤒᤠᤜᤠ᤹ᤖᤧ ᤔᤧᤈᤥᤃᤢᤒᤠ ᤁᤢᤀᤡᤛᤡᤰ ᤂᤡᤏᤡ᤹ ᤀᤠᤵᤑᤣᤰ ᤀᤠᤛᤢᤳᤌᤥ ᤆᤥ᤺ᤰᤛᤡᤱᤔᤠ ᤏᤡᤱᤛᤣᤰ ᤁᤧᤈᤥᤃᤢᤶᤒᤡ᥅ ᤆᤡ᤺ᤴᤈᤡ᤺ᤴᤃᤧᤄᤢᤒᤠ ᤆᤀᤡ᤺ᤳᤜᤠ᤹ ᤛᤧᤘᤠ ᤁᤧᤔᤧᤳᤋᤢᤶᤛᤡᤶᤔᤠᤱ ᤂᤡᤏᤡ᤹ ᤀᤠᤵᤑᤣᤰ ᤆᤰᤔᤧᤸᤗ᤹ᤀᤣ ᤁᤧᤳᤏᤡᤔᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤏᤡᤱᤘᤠ᤹ ᤁᤧᤈᤥᤃᤢᤶᤒᤡ᥅ 31 ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤂᤧᤱᤜᤠ᤹ ᤜᤢᤰᤘᤠ ᤁᤧᤒᤡᤖᤢᤶᤛᤡᤶ᤹ ᤜᤧᤰᤁᤩᤠᤱ ᤂᤡᤏᤡ᤹ ᤀᤅᤧ᤺ᤰᤘᤠ ᤛᤠᤜᤠ᤹ ᤔᤡᤎᤡᤱᤔᤠᤛᤡᤖᤧ ᤗᤠᤃᤡ ᤛᤡᤍᤢᤱᤈᤓᤠ ᤁᤧᤍᤥ᤺ᤴᤍᤢᤶᤛᤡᤶᤔᤡᤸᤗᤧ ᤂᤡᤏᤡ᤹ ᤀᤠᤵᤑᤣᤰ ᤆᤰᤔᤧᤸᤗ᤹ᤀᤣ ᤏᤠᤘᤠᤀᤡᤳᤗᤠᤜᤠ᤹ᤏᤢ ᤀᤠᤀᤡᤴ ᤌᤠᤖᤡᤰ ᤀᤠᤛᤢᤳᤌᤥ ᤁᤧᤈᤥ᤺ᤰᤁᤠᤛᤡᤖ ᤁᤧᤘᤕᤡ᤹॥ ᤀᤡᤛᤪᤠᤀᤡᤗᤒᤠ ᤔᤏᤠᤛᤣ. ᤌᤣ ᤀᤠᤱᤃᤠ᤹ᤗᤠᤶ ᤗᤳᤇᤠ ᤀᤡᤱᤄᤱᤎᤡᤰ ᤂᤡᤏᤡ᤹ ᤛᤣ᤺ᤴᤍᤥᤔᤠ ᤑᤠ᤺ᤰᤏᤡᤱᤒᤠᤒᤡ᥅ ᤀᤠᤱᤃᤠ᤹ ᤛᤧᤰᤂᤠᤀᤣ ᤁᤢᤜᤡᤱᤘᤧᤳ ᤘᤠ᤹ᤀᤠᤒᤠ ᤁᤢᤀᤡᤛᤡᤰ. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. ᤀᤠᤱᤃᤠ᤹ ᤂᤡᤏᤡ᤹ ᤌᤧᤔᤠᤀᤠᤱ ᤔᤧᤔᤧᤳᤏᤡᤱᤅᤡᤴ᤹॥ 32 “‘ᤂᤡᤏᤡ᤹ ᤁᤧᤒᤠ᤺ᤳᤋᤢᤶ᤹. ᤛᤡᤱ ᤏᤢ ᤗᤢᤱ ᤏᤠᤘᤠᤀᤡᤳᤗᤠ ᤛᤧᤘᤠ ᤁᤧᤔᤧᤵᤐᤠ. ᤀᤠᤏᤡᤃᤣ ᤁᤧᤖᤧᤰ ᤐᤡᤛᤠᤱᤒᤠ. ᤔᤧᤴᤇᤠᤶ ᤛᤢᤘᤠᤱᤜᤠ᤹ ᤜᤧᤰᤋᤱᤒᤠ ᤐᤥᤱᤔᤠ ᤀᤠᤏᤡᤃᤣ ᤛᤡᤖᤠ᤹ᤌᤠᤱ॥’ ᤁᤖ ᤂᤡᤏᤡ᤹ ᤏᤡᤱᤘᤠ᤹ᤀᤥ ᤌᤣ ᤘᤠ᤹ ᤂᤧᤴ ᤀᤠᤵᤑᤠᤸᤗᤧᤀᤠᤱ ᤔᤧᤒᤥᤱᤏᤧᤴᤗᤥ॥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤄᤢᤶᤍᤡᤱ ᤏᤢ ᤗᤧᤵᤔᤡ 33 “ᤀᤠᤱᤃᤠ᤹ ᤛᤧᤰᤂᤠᤀᤣ ᤁᤢᤜᤡᤱᤘᤧᤳ ᤘᤠ᤹ᤀᤠᤒᤠ ᤁᤢᤀᤡᤛᤡᤰ. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. ᤀᤠᤱᤃᤠ᤹ ᤛᤠ᤹ᤖᤡᤰ ᤀᤠᤛᤡᤰ ᤐᤥ᤺ᤰᤔᤥ ᤁᤧᤎᤢᤶᤒᤠ ᤜᤢᤰᤁᤡᤸᤗᤧ. ᤛᤴᤇᤢᤱᤒᤠ ᤀᤠᤜᤢᤰᤁᤡᤸᤗᤧ ᤜᤧᤰᤁᤩᤠᤱ ᤁᤡᤵᤔᤠ ᤁᤧᤄᤢᤒᤠ ᤔᤢᤰᤛᤠᤶᤔᤡᤸᤗᤧ ᤂᤡᤏᤡ᤹ ᤛᤶᤎᤠᤱ ᤕᤢᤰ ᤆᤥᤃᤢᤱ᤹॥ 34 ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤛᤠᤰᤁᤧᤴᤏᤥ ᤁᤧᤎᤢᤶᤒᤠ ᤀᤠᤜᤢᤰᤁᤡᤴ ᤏᤢ ᤔᤢᤰᤛᤠᤶᤒᤠ ᤀᤠᤜᤢᤰᤆᤧᤰᤁᤡᤴ ᤂᤡᤏᤡ᤹ᤀᤥ ᤛᤴᤇᤢᤱ᤹. ᤂᤧᤒᤩᤠᤱ ᤂᤡᤏᤡ᤹ ᤑᤢᤳᤇᤡᤱᤈᤩᤠᤱ ᤁᤧᤛᤧᤖᤡ ᤁᤧᤒᤣᤃᤡᤀᤠᤱ ᤁᤧᤘᤕᤡᤒᤠ ᤗᤠᤈᤣ᤹ᤜᤠ᤹ᤗᤠᤶ ᤀᤠᤱᤃᤠ᤹ ᤛᤢᤶᤏᤡᤱᤅᤠᤱ ᤏᤢ᤺ᤰᤏᤡᤱ ᤋᤠ᤺ᤳᤏᤡᤱ᤹॥ 35 ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠ ᤀᤣ᤺ᤰᤛᤠᤍᤧᤴᤏᤥ ᤀᤠᤱᤃᤠ᤹ ᤂᤡᤏᤡ᤹ ᤋᤠ᤺ᤳᤏᤡᤱ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤵᤔᤥ ᤂᤡᤏᤡ᤹ ᤏᤠᤍᤢᤶᤍᤢᤶᤒᤠ ᤂᤠᤛᤧᤴᤗᤥ᤺ᤴᤏᤡᤱ᤹॥ 36 ᤀᤠᤱᤃᤠ᤹ ᤂᤡᤏᤡ᤹ ᤌᤠ᤺ᤰᤌᤧᤒᤠᤜᤠ᤹ ᤔᤡᤛᤪᤗᤠᤶ ᤗ᤺ᤳᤋᤢᤱ ᤌᤠᤰᤋᤢᤱᤛᤡᤱᤅᤠᤱ ᤀᤣᤃᤠᤱ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠ ᤀᤣ᤺ᤰᤛᤠᤍᤧᤴᤏᤥ ᤂᤠᤛᤧᤴ ᤆᤥᤃᤢᤱᤛᤡᤱᤒᤠ ᤁᤢᤀᤡᤛᤡᤰ ᤂᤧᤵᤔᤥ ᤀᤠᤱᤃᤠ᤹ ᤂᤡᤏᤡ᤹ ᤂᤠᤛᤧᤴ ᤆᤥ᤺ᤰᤏᤡᤱ᤹. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹॥ 37 ᤀᤠᤱᤃᤠ᤹ ᤂᤡᤏᤡ᤹ ᤏᤢᤖᤡᤰᤁᤠᤱ ᤂᤡᤏᤡ᤹ ᤏᤡᤱᤘᤠ᤹ ᤛᤠ᤹ᤖᤢᤱ᤹ ᤜᤧᤰᤁᤩᤠᤱ ᤔᤠᤱᤜᤢᤵᤐᤥᤒᤠ ᤐᤠ᤺ᤴᤜᤠ᤹ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶᤗ ᤕᤠ᤺ᤴᤏᤡᤱ᤹॥ 38 ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤐᤡᤑᤩᤢᤱ ᤏᤢ ᤂᤧᤔᤠ᤹ ᤁᤧᤈᤥ᤺ᤰᤐᤠ ᤂᤧᤴ ᤁᤧᤖᤧᤰᤗᤠᤶ ᤂᤡᤏᤡ᤹ ᤛᤢᤳᤌᤥ ᤆᤥ᤺ᤰᤏᤡᤱ᤹॥ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤀᤠᤱ ᤔᤧᤘᤠ᤹ᤒᤠ ᤗᤠᤈᤣ᤹ᤜᤠ᤹ᤀᤥᤗᤠᤶ ᤀᤠᤱᤃᤠ᤹ ᤂᤧᤱᤜᤠ᤹ ᤋᤠᤖᤢᤱᤛᤡᤱ᤹. ᤁᤖ ᤂᤧᤱᤜᤠ᤹ ᤀᤡᤛᤪᤠᤀᤡᤗ ᤗᤠᤈᤣ᤹ᤀᤥ ᤀᤠᤵᤑᤠᤸᤗᤧᤀᤠᤱ ᤗᤠ᤺ᤵᤔᤠ ᤔᤧᤱᤄᤥᤏᤧᤴ᤹॥ ᤂᤧᤒᤩᤠᤱ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤂᤡᤏᤡ᤹ ᤏᤡᤱᤘᤠ᤹ ᤁᤧᤄᤥᤛᤢᤶ᤹॥ 39 “ᤀᤡᤛᤪᤠᤀᤡᤗᤒᤠ ᤔᤏᤠᤛᤣ. ᤂᤡᤏᤡ᤹ ᤗᤠᤃᤡᤃ. ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤱ᤹—ᤂᤡᤏᤡ᤹ ᤋᤃᤡ ᤐᤣᤃᤧᤶᤔᤧ᤹. ᤜᤧᤰᤁᤩᤠᤱ ᤂᤡᤏᤡ᤹ ᤏᤠᤘᤠᤀᤡᤳᤗᤠᤜᤠ᤹ ᤛᤧᤘᤠ ᤔᤧᤶᤋᤧᤶᤛᤡᤶᤔᤧ᤹. ᤁᤖ ᤜᤠᤖᤠᤀᤣ ᤀᤡᤃᤪ ᤕᤠᤱᤛᤡ ᤂᤡᤏᤡ᤹ ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤁᤧᤄᤧᤵᤛᤢᤶ᤹ ᤂᤶᤓᤩᤠᤱ ᤏᤠᤘᤠᤀᤡᤳᤗᤠᤜᤠ᤹ ᤛᤧᤘᤠ ᤔᤧᤵᤔᤠᤛᤡᤗᤠᤶ ᤂᤡᤏᤡ᤹ ᤀᤠᤱᤃᤠ᤹ ᤀᤠᤛᤣᤛᤣ ᤀᤠᤔᤡᤱᤅᤥ ᤛᤡᤖᤡᤱᤔᤔᤠ ᤋᤠ᤺ᤵᤔᤠ ᤁᤧᤏᤠ᤹ᤖᤢᤶ᤹॥ 40 ᤌᤣᤀᤠᤱᤓᤧᤸᤗᤧ ᤀᤡᤛᤪᤠᤀᤡᤗᤒᤠ ᤁᤣ᤺ᤶᤒᤠ ᤁᤥ᤺ᤰᤔᤠ. ᤀᤠᤱᤃᤠ᤹ ᤀᤠᤛᤣᤛᤣ ᤁᤥ᤺ᤰᤔᤠᤀᤥ. ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤀᤠᤱᤃᤠ᤹ ᤔᤠᤱᤛᤧᤘᤠ ᤔᤧᤔᤧᤳᤋᤠ. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤱᤜᤠ᤹ ᤋᤠ᤺ᤰᤋᤢᤱᤛᤡᤱ᤹. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹॥ ᤂᤧᤵᤔᤥ ᤂᤡᤏᤡ᤹ ᤁᤧᤖᤧᤰ ᤜᤢᤰᤘᤠᤜᤠ᤹ ᤜᤧᤰᤁᤩᤠᤱ ᤂᤡᤏᤡ᤹ ᤛᤠ᤹ᤖᤡᤰ ᤀᤡᤔᤧᤸᤗᤢᤱᤒᤠ ᤔᤡᤰᤋᤥ᤺ᤰᤜᤠ᤹ ᤏᤢ ᤛᤡᤍᤢᤱᤈᤓᤠᤜᤠ᤹ ᤜᤧᤰᤁᤩᤠᤱ ᤁᤧᤖᤧᤰ ᤛᤣᤛᤣ ᤛᤡᤍᤢᤱᤈᤓᤠᤜᤠ᤹ᤏᤢ ᤛᤥᤖᤡᤰ ᤁᤧᤍᤠᤖᤢᤶᤗ ᤐᤥᤱ᤹ ᤁᤧᤗ᤹ᤒᤠ ᤀᤠᤱᤃᤠ᤹ ᤀᤠᤏᤡᤱᤘᤠ᤹ ᤘᤠ᤹॥ 41 ᤂᤡᤏᤡ᤹ ᤁᤧᤶᤍᤧᤶᤛᤡ ᤁᤧᤶᤍᤣ᤹ᤖᤡᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤗᤠᤶ ᤜᤧᤰᤁᤩᤠᤱ ᤑᤢᤳᤇᤡᤱᤈᤩᤠᤱ ᤁᤧᤛᤧᤖᤡ ᤁᤧᤒᤣᤃᤡᤒᤠᤗᤠᤶ ᤛᤢᤶᤏᤡᤱ ᤋᤠ᤺ᤳᤏᤡᤱᤅᤡᤸᤗᤧ ᤀᤠᤱᤃᤠ᤹ ᤀᤠᤏᤡᤱᤘᤠ᤹ ᤁᤧᤍᤠᤒᤠ ᤛᤡᤍᤢᤱᤈᤓᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤋᤠ᤺ᤰᤏᤡᤱ᤹॥ ᤜᤧᤰᤁᤩᤠᤱ ᤂᤡᤏᤡ᤹ ᤗᤢᤶᤔᤥ ᤀᤠᤱᤃᤠ᤹ ᤛᤣᤛᤣᤒᤠ ᤆᤥ᤺ᤰᤁᤠᤒᤠ ᤐᤠ᤺ᤴᤏᤡᤴ ᤀᤥᤛᤣ᤺ᤴᤎᤠᤱ ᤆᤥᤃᤢᤱᤅᤡᤸᤗᤧ ᤁᤧᤖᤧᤰ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤔᤧᤏᤡᤛᤢ᤹॥ 42 ᤂᤧᤒᤩᤠᤱ ᤀᤠᤱᤃᤠ᤹ ᤔᤠᤱᤜᤧᤰᤁᤠᤛᤡᤱᤅᤠᤀᤠᤱ ᤂᤡᤏᤡ᤹ ᤌᤠ᤺ᤰᤌᤧᤒᤠᤜᤠ᤹ ᤐᤡᤏᤡᤱ ᤔᤧᤳᤋᤢᤱᤛᤡᤱᤒᤠ ᤔᤠᤱᤜᤢᤵ ᤆᤥᤃᤢᤱᤒᤠ ᤀᤡᤛᤪᤠᤀᤡᤗ ᤗᤠᤈᤣ᤹ᤀᤥ ᤂᤡᤏᤡ᤹ ᤋᤠ᤺ᤳᤏᤡᤱᤅᤠᤱ ᤁᤧᤘᤕᤡᤸᤗᤧ. ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤂᤡᤏᤡ᤹ ᤏᤡᤱᤘᤠ᤹ ᤁᤧᤄᤥᤛᤢᤶ᤹॥ 43 ᤂᤡᤏᤡ᤹ ᤀᤠᤒᤠᤅᤣ ᤀᤠᤛᤢᤳᤌᤥ ᤁᤧᤈᤥ᤺ᤰᤁᤠᤛᤡᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤂᤡᤏᤡ᤹ ᤕᤠᤱᤏᤠ ᤀᤥᤃᤧᤔᤧᤳᤋᤢᤶ᤹ ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤈᤥᤃᤢᤶᤒᤠ ᤋᤠᤵᤑᤧ᤺ᤶᤒᤠ ᤐᤠ᤺ᤴᤏᤡᤸᤗᤧ ᤆᤥᤃᤢᤸᤗᤧ ᤀᤠᤒᤠᤅᤣ ᤂᤡᤏᤡ᤹ ᤁᤧᤈᤡ᤺ᤳᤋᤠᤛᤡ᤹॥ 44 ᤀᤡᤛᤪᤠᤀᤡᤗᤒᤠ ᤔᤏᤠᤛᤣ. ᤂᤡᤏᤡ᤹ ᤁᤢ᤹ᤀᤡᤓᤧᤶᤔᤠ ᤕᤠ᤺ᤶᤒᤰ ᤁᤧᤈᤥᤃᤢᤶᤒᤠ ᤏᤢ ᤂᤡᤏᤡ᤹ ᤑᤧᤴᤕᤠ᤺ᤶᤒᤰ ᤁᤧᤈᤥᤃᤢᤶᤒᤠ ᤁᤢᤀᤡᤛᤡᤰ ᤂᤢᤶᤍᤡᤱ ᤐᤡᤏᤡᤱᤒᤠᤸᤗᤧ ᤔᤣ᤺ᤴ. ᤁᤖ ᤀᤠᤱᤃᤠ᤹ ᤀᤠᤔᤡᤱᤛᤥ ᤀᤠᤎᤠ᤺ᤱᤛᤥ᤺ᤸᤗᤧ ᤆᤥᤃᤢᤸᤗᤧ ᤂᤡᤏᤡ᤹ ᤗᤢᤱᤔᤠ᤹ ᤋᤢᤰᤏᤡᤱᤅᤠᤱ ᤏᤢᤖᤡᤰ ᤔᤧᤳᤏᤡᤱᤒᤠᤗᤠᤶ. ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤂᤡᤏᤡ᤹ ᤏᤡᤱᤘᤠ᤹ ᤁᤧᤄᤥᤛᤢᤶ᤹॥ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤴ ᤐᤠᤖᤠᤱᤅᤠᤱ ᤘᤠ᤹ᤖᤥ᥄” ᤗᤠᤱᤃᤧᤳ ᤗᤧᤵᤔᤠᤱ ᤗᤠᤈᤣ᤹ᤀᤥ ᤔᤡᤓᤠ᤺ᤳᤋᤪᤠ 45 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠᤗᤠᤶ ᤁᤴ ᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤁᤧᤖᤧ— 46 “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤏᤠᤀᤣ. ᤗᤠᤱᤃᤧᤳ ᤗᤧᤵᤔᤠᤱ ᤁᤧᤏᤠᤖᤠᤴ ᤜᤡᤛᤧ᤹ ᤜᤧᤰᤁᤩᤠᤱ ᤗᤠᤱᤃᤧᤳᤗᤧ ᤁᤢᤍᤰᤗᤧᤱᤘᤠᤀᤥ ᤐᤠᤖᤧ᤹. ᤜᤧᤰᤁᤩᤠᤱ ᤛᤡᤱᤗᤠᤖᤧ ᤁᤢᤎᤡᤶᤒᤠ ᤗᤠᤱᤃᤧᤳ ᤗᤠᤈᤣ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤔᤠᤱᤏᤡᤱᤘᤠ᤹ᤐᤠᤴ ᤐᤠᤖᤧ᤹॥ 47 ᤗᤠᤱᤃᤧᤳ ᤗᤧᤵᤔᤠᤱᤒᤠ ᤋᤠᤶᤓᤢᤱᤅᤡᤴ ᤂᤧᤏᤧ᤹ ᤀᤰᤂᤣ ᤔᤧᤳᤋᤧ᤹—‘ᤕᤜᤘᤣ ᤍᤠᤱᤒᤧᤸᤗᤧ ᤁᤢᤀᤡᤱᤄᤱᤅᤡᤴ ᤂᤧᤵᤛᤧ᤹॥ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤀᤠᤱᤃᤠ᤹ ᤂᤧᤏᤧ᤹ ᤑᤠ᤺ᤳᤋᤪᤠ ᤁᤣ᤺ᤳᤏᤧᤖᤥ. ᤜᤧᤰᤁᤩᤠᤱ ᤁᤧᤖᤧᤰ ᤛᤡᤱᤒᤢᤱᤜᤠ᤹. ᤛᤖᤣ᤺ᤰᤕᤠ᤺ᤵᤐᤠ ᤏᤢ ᤁᤧᤜᤣᤒᤠ ᤏᤧᤵᤔᤠᤱ ᤔᤡᤍᤡᤰᤗᤥ॥ ᤁᤡᤵᤔᤠ ᤐᤄᤢᤃᤧᤄᤢᤒᤠ ᤔᤡᤎᤢᤱ ᤔᤡᤖᤠ᤺ᤰᤜᤠ᤹ ᤔᤧᤴᤇᤧᤖᤢᤴ᤹. ᤜᤧᤰᤁᤩᤠᤱ ᤕᤥ ᤋᤧᤔᤧᤏᤗᤠᤶ ᤌᤠᤱᤃᤧᤳ ᤗᤧᤵᤔᤠᤱ ᤁᤧᤖᤧᤰ ᤐᤠ᤺ᤴᤜᤠ᤹ ᤕᤧᤶᤍᤢᤖᤥ॥ 48 ᤜᤧᤰᤁᤩᤠᤱ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤔᤡᤓᤠ᤺ᤳᤋᤪᤠ᤺ᤴ ᤁᤣ᤺ᤳᤋᤢᤱᤅᤠᤱ ᤏᤧᤒᤠ ᤑᤠ᤹ᤀᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤧᤖᤧᤰᤗᤧ ᤔᤧᤏᤡᤛᤢ᤹॥ ᤁᤴ ᤔᤡᤓᤠ᤺ᤳᤋᤪᤠ᤺ᤴ ᤔᤧᤴᤇᤧᤖᤢᤴᤗᤥ॥’” 49 ᤂᤧᤒᤩᤠᤱ ᤀᤠᤱᤃᤠ᤹ ᤔᤧᤳᤋᤢᤱ. “ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤀᤣ. ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤰᤂᤣ ᤔᤧᤔᤧᤳᤋᤠᤖ ᤔᤧᤒᤳ. ‘ᤂᤢᤏᤧ᤹ᤃ ᤋᤠ᤹ᤍᤡ ᤂᤧᤍᤠ᤹ ᤐᤠ᤺ᤴᤜᤠ᤹ᤀᤥᤖᤰ ᤐᤠ᤺ᤳᤗᤥ᥄’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.