ᤀᤡᤈᤁᤡᤀᤣᤗ 2 - LIFOTNT

ᤀᤡᤈᤁᤡᤀᤣᤗᤖᤧ ᤀᤢ᤺ᤳᤇᤡᤱ ᤂᤥᤛᤢ

¹ ᤂᤢᤏᤧ᤹ ᤀᤠᤱᤃᤠ᤹ ᤀᤰᤂᤣ ᤔᤧᤳᤋᤠᤱ. “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤂᤧᤏᤧ᤹ ᤕᤧᤒᤧ᤹. ᤀᤠᤱᤃᤠ᤹ ᤂᤧᤏᤧ᤹ᤏᤢ ᤋᤠ᤹ᤈᤧᤱᤔᤠ ᤀᤠᤏᤡᤱᤘᤠ᤹ ᤘᤠ᤹॥”

² ᤂᤢᤏᤧ᤹ ᤐᤠᤖᤧᤖ ᤐᤳᤇᤧᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠᤶᤛᤠᤶᤔᤡᤴ ᤀᤠᤱᤃᤠ᤹ᤀᤥ ᤕᤧ. ᤂᤧᤒᤩᤠᤱ ᤂᤢᤏᤧ᤹ ᤀᤠᤱᤃᤠ᤹ ᤕᤧᤒᤠᤱᤗ ᤕᤠ᤺ᤴᤍᤠᤱ॥ ᤀᤠᤱᤃᤠ᤹ ᤛᤡᤱᤛᤡᤱ ᤕᤧᤰᤕᤧᤰᤁᤠᤱ ᤂᤢᤏᤧ᤹ ᤁᤢᤒᤠ᤺ᤴᤜᤠ᤹ ᤂᤧᤵᤛᤢᤱ॥

³ ᤂᤢᤏᤧ᤹ ᤀᤠᤱᤃᤠ᤹ ᤔᤧᤳᤋᤠᤱ. “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤐᤡᤑᤩᤢᤱ ᤁᤧᤈᤥ᤺ᤰᤐᤠᤀᤠᤱ ᤁᤧᤘᤠ᤹ᤒᤠ. ᤀᤡᤛᤪᤠᤀᤡᤗᤡ ᤛᤢᤘᤠᤱᤜᤠ᤹ᤀᤥ ᤀᤠᤱᤃᤠ᤹ ᤂᤧᤏᤧ᤹ ᤐᤠᤱᤏᤧᤖ ᤐᤳᤋᤠ॥ ᤂᤧᤱᤜᤠ᤹ ᤏᤢ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤌᤠ᤺ᤰᤌᤧᤒᤠᤜᤠ᤹ᤖᤧ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤀᤠᤀᤡᤴ ᤌᤠᤖᤡᤰ ᤐᤡᤑᤩᤢᤱ ᤔᤧᤈᤥᤃᤢᤖ ᤔᤧᤘᤠ᤹॥

⁴ ᤂᤧᤱᤜᤠ᤹ ᤐᤠᤴ ᤔᤧᤱᤄᤧᤶᤔᤏᤠᤒᤠ ᤏᤢ ᤁᤢᤏᤠ ᤛᤡᤖᤣ᤺ᤵ ᤔᤧᤸᤗ᤹ᤔᤏᤠᤒᤠ ᤔᤏᤠ ᤔᤧᤈᤥᤰ॥ ᤁᤖ ᤂᤧᤱᤜᤠ᤹ ᤀᤰᤂᤣ ᤔᤧᤵᤔᤠᤛᤡᤖᤧ ᤗᤠᤃᤡ ᤂᤧᤏᤧ᤹ ᤐᤠᤱᤏᤧᤖ ᤐᤳᤋᤠ. ‘ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹᥄’

⁵ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤧᤄᤧᤵᤛᤢᤛᤠᤱ ᤀᤡᤃᤪ ᤔᤧᤱᤄᤧᤵᤛᤢᤴᤇᤠᤱ ᤂᤧᤴ ᤐᤡᤑᤩᤢᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ ᤛᤢᤶᤗ᤹ᤔᤠᤖᤧ ᤗᤠᤃᤡ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤗᤳᤇᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤎᤡᤰ ᤋᤩᤧᤀᤠᤱ ᤘᤕᤧ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢ᤹॥

⁶ “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤂᤧᤏᤧ᤹ ᤂᤧᤱᤜᤠ᤹ᤏᤢ ᤀᤡᤃᤪ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠ᤺ᤴᤏᤡᤴᤏᤢ ᤔᤧᤃᤡᤛᤧᤴᤏᤧ᤹॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤱᤔᤠᤛᤧᤵᤔᤠ ᤐᤠ᤺ᤴᤏᤡᤸᤗᤧ ᤂᤧᤏᤧ᤹ ᤛᤡᤰᤘᤠ᤺ᤸᤗᤧ ᤁᤧᤛᤡᤰᤐᤠ ᤏᤢ ᤋᤡᤱᤅᤡᤸᤗᤧ ᤁᤧᤗᤰᤐᤠ ᤜᤧᤰᤁᤩᤠᤱ ᤋᤠᤱᤛᤠᤰᤂᤧᤒᤰᤐᤠᤜᤠ᤹ᤖᤧ ᤁᤧᤶᤛᤡᤰᤐᤠ ᤜᤧᤰᤁᤣ ᤗ᤹ᤛᤠᤱ ᤔᤧᤃᤡᤛᤧᤴᤏᤧ᤹॥ ᤂᤧᤱᤜᤠ᤹ ᤐᤡᤑᤩᤢᤱᤒᤠᤛᤡᤛᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤠᤔᤠᤰᤔᤠᤗᤠᤶ ᤂᤧᤏᤧ᤹ ᤁᤧᤏᤡᤱᤛᤠᤱ ᤔᤧᤒᤢᤃᤧᤴᤏᤧ᤹॥

⁷ ᤂᤧᤱᤜᤠ᤹ᤖᤧ ᤔᤧᤄᤧᤵᤛᤢᤃᤪ ᤔᤧᤄᤧᤵᤛᤢ ᤔᤧᤱᤄᤧᤵᤛᤢᤱᤃᤪ ᤔᤧᤱᤄᤧᤵᤛᤢᤴ ᤀᤠᤱᤃᤠ᤹ ᤀᤠᤀᤡᤱᤄᤱᤅᤡᤴ ᤂᤧᤱᤜᤠ᤹ ᤂᤧᤏᤧ᤹ ᤁᤧᤔᤧᤳᤋᤢᤛᤡᤖᤀᤣ ᤐᤥᤱ᤹॥ ᤁᤖ ᤂᤧᤱᤜᤠ᤹ᤖᤧ ᤔᤧᤱᤄᤧᤵᤛᤢᤴ᤹. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤁᤧᤖᤧᤰ ᤐᤡᤑᤩᤢᤱᤒᤠ ᤔᤧᤈᤥᤰ᥄

⁸ ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤧᤴᤇᤠᤶ ᤕᤠᤵᤔᤡᤀᤣ. ᤀᤠᤱᤃᤠ᤹ ᤂᤧᤏᤧ᤹ ᤌᤣ ᤔᤧᤳᤏᤧ. ᤂᤧᤴ ᤂᤧᤵᤛᤧ᤹॥ ᤂᤧᤏᤧ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤡᤑᤩᤢᤱᤒᤠ ᤆᤥ᤺ᤰᤔᤠᤀᤥ ᤂᤧᤏᤧ᤹ ᤔᤧᤒᤳᤇᤧᤴᤏᤧ᤹॥ ᤂᤧᤏᤧ᤹ ᤁᤧᤶᤒᤪᤠ᤺ᤴ ᤜᤱ ᤔᤧᤳᤋᤧ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤏᤧ᤹ ᤐᤡᤏᤧᤒᤠᤴ ᤆᤩᤧ᤹॥”

⁹ ᤂᤧᤒᤩᤠᤱ ᤜᤢᤰᤌᤡᤰ ᤀᤠᤱᤃᤠ᤹ ᤗᤧᤵᤔᤠᤱ ᤛᤴᤇᤡᤱᤅᤠᤱ ᤐᤳᤇᤧᤒᤠ ᤏᤡᤛᤢᤱ॥ ᤂᤧᤴ ᤜᤢᤰᤁᤧᤀᤥ ᤗᤳᤇᤠ ᤛᤠᤵᤗᤠᤌᤱᤔᤠᤎᤡᤰ ᤐᤳᤇᤧ॥

¹⁰ ᤂᤧᤴ ᤜᤢᤰᤁᤡᤸᤗᤧ ᤁᤡᤵᤔᤏᤠᤒᤠ ᤛᤠᤵᤗᤠᤌᤱᤔᤠᤴ ᤑᤠ᤺ᤰᤂᤢ॥ ᤜᤧᤰᤁᤩᤠᤱ ᤂᤧ᤹ᤕᤥ ᤏᤧᤵᤔᤈᤠᤱ ᤗᤧᤵᤔᤠᤱ ᤆᤣᤗᤢᤵ ᤂ᤺ᤱᤗᤢᤵ ᤛᤠᤶᤗᤥᤜᤠ᤹ ᤏᤢ ᤔᤧᤖᤡᤱ ᤌᤰᤔᤠ ᤐᤠ᤺ᤴᤜᤠ᤹ ᤜᤧᤰᤁᤩᤠᤱ ᤂᤠᤛᤧᤴᤗᤥᤶᤔᤠ ᤐᤠ᤺ᤴᤜᤠ᤹ᤖᤧ ᤋᤧᤵᤋᤢᤀᤠᤱ ᤐᤳᤇᤧᤖᤥ॥