ᤀᤡᤈᤁᤡᤀᤣᤗ 19 - LIFOTNT

ᤔᤧᤖᤡᤱ ᤛᤠᤶᤗᤥ

¹ “ᤀᤡᤛᤪᤠᤀᤡᤗᤒᤠ ᤀᤣᤃᤠᤱᤒᤠ ᤏᤧᤵᤑᤢ ᤜᤠᤱᤜᤠ᤹ᤖᤧ ᤗᤠᤃᤡ ᤁᤴ ᤔᤧᤖᤡᤱᤎᤰᤔᤠ ᤛᤠᤶᤗᤥᤴ ᤛᤠᤶᤔᤧᤳᤋᤧ᤹—

² “ᤂᤧᤏᤧ᤹ ᤔᤠᤏᤢᤍᤡᤱ ᤁᤧᤶᤔᤠ ᤌᤧᤔᤠᤒᤣ᥅ ᤂᤢᤏᤧ᤹ᤃ ᤂᤡᤖᤡᤱᤒᤠᤜᤠ᤹ ᤗᤢᤶᤔᤥ ᤁᤢᤶᤔᤠᤔᤠ ᤌᤧᤖᤡᤱᤔᤠᤖᤥ᥄ ᤁᤧᤘᤧᤶᤒᤠ ᤂᤡᤖᤡᤱᤒᤠᤜᤠ᤹ ᤗᤢᤶᤔᤥ ᤂᤢᤏᤧ᤹ ᤏᤧᤛ᤻ᤛᤧᤖᤥ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤛ᤻ᤛᤠᤜᤠ᤹ ᤜᤡᤱᤄᤢᤛᤡᤖᤥ॥

³ ᤂᤢᤏᤧ᤹ ᤗᤳᤇᤠ ᤁᤢᤛ᤻ᤛᤠᤜᤠ᤹ᤀᤥᤒᤠ ᤌᤡᤰ ᤁᤧᤘᤧᤶᤒᤠ ᤁᤧᤎᤢᤶᤒᤠ ᤐᤥᤱᤔᤠᤖᤧ ᤗᤠᤃᤡ ᤕᤶᤒᤠ ᤆᤥᤃᤢᤖᤥ॥ ᤂᤧᤴ ᤛᤠᤏᤠ᤺ᤵᤔᤠ ᤏᤢ ᤛᤠᤏᤠ᤺ᤳᤋᤡᤴ ᤗᤵᤔᤠ ᤜᤢ᤹ᤛᤡᤱᤗᤥ. ᤜᤧᤰᤁᤩᤠᤱ ᤂᤧᤴ ᤔᤏᤠ ᤁᤧᤈᤠᤒᤠ ᤐᤥ᤺ᤰᤂᤧᤖᤥ॥

⁴ ᤂᤧᤒᤩᤠᤱ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤧᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤧᤄᤧᤵᤛᤢᤖᤥ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤒᤠ᤺ᤳᤋᤥ ᤔᤧᤎᤠᤛᤢᤖᤥ॥ ᤂᤧ᤺ᤰᤆᤢᤖᤡᤜᤠ᤹ᤖᤧ ᤂᤧᤴ ᤔᤧᤘᤣ᤹ᤖᤢᤀᤠᤱ ᤂᤧᤱᤜᤠ᤹ᤖᤧ ᤔᤡᤛᤪ ᤗᤠᤈᤣ᤹ᤀᤥ ᤔᤧᤍᤣ᤹ᤖᤢᤖᤥ॥

⁵ “ᤌᤧᤖᤡᤱᤔᤧᤸᤗᤧ ᤂᤧᤴ ᤏᤡᤛᤢᤀᤠᤱ ᤂᤧᤸᤗᤧ ᤁᤢᤗᤠᤃᤡ ᤂᤢᤏᤧ᤹ ᤀᤡ᤺ᤳᤋᤢᤀᤠᤱ ᤘᤕᤧᤒᤠ ᤐᤠ᤺ᤴᤜᤠ᤹ ᤔᤧᤃᤧᤖᤧᤴᤏᤡᤸᤗᤧ. ᤁᤢᤛ᤻ᤛᤠᤜᤠᤀᤥᤒᤠ ᤘᤣ᤹ ᤗᤳᤇᤠ ᤂᤧᤴ ᤕᤠᤱᤛᤡᤱᤗᤥ. ᤜᤧᤰᤁᤩᤠᤱ ᤂᤧᤴ ᤁᤧᤘᤧᤶᤒᤠ ᤁᤧᤎᤢᤶᤒᤠ ᤂᤡᤖᤡᤱᤒᤠ ᤐᤥᤱᤔᤠ ᤜᤢ᤹ᤖᤢᤖᤥ॥

⁶ ᤘᤣ᤹ ᤂᤡᤖᤡᤱᤒᤠᤜᤠ᤹ ᤗᤢᤶᤔᤥ ᤂᤧᤴ ᤏᤠ ᤏᤢ ᤁᤳᤏᤠ ᤘᤕᤧᤖᤥ ᤜᤧᤰᤁᤩᤠᤱ ᤁᤧᤎᤢᤶᤒᤠ ᤐᤥ᤺ᤰᤂᤧᤀᤠᤱ ᤂᤧᤱᤜᤠ᤹ᤀᤥ ᤏᤡᤎᤠ᤺ᤶᤛᤡᤱᤗᤥ॥ ᤂᤧᤴ ᤛᤠ ᤏᤠ᤺ᤵᤔᤠ ᤏᤢ ᤛᤠ ᤗᤵᤔᤠ ᤜᤢ᤹ᤛᤡᤱᤗᤥ ᤜᤧᤰᤁᤩᤠᤱ ᤂᤧᤴᤏᤠᤱ ᤔᤏᤠ ᤁᤧᤈᤠᤒᤠ ᤐᤥ᤺ᤰᤂᤧᤖᤥ॥

⁷ ᤂᤧᤸᤗᤧ ᤜᤠᤱᤕᤰᤜᤠ᤹ ᤜᤠ᤹ᤕᤠᤰ ᤀᤠ᤺ᤰᤂᤢᤍᤣᤛᤢᤖᤥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠᤱᤈᤢᤶᤜᤠ᤹ ᤏᤢ ᤕᤧᤰᤕᤰᤜᤠ᤹ ᤂᤧᤸᤗᤧ ᤂᤠᤵᤐᤢᤌᤩ᤺ᤱ ᤆᤥᤃᤢ ᤐᤡᤖᤢᤛᤡᤖᤥ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤢᤈᤠᤜᤠ᤹ ᤂᤠᤵᤐᤢᤌᤩ᤺ᤱ ᤐᤥ᤺ᤰᤂᤧᤖᤥ॥ ᤂᤧᤴ ᤜᤢ᤺ᤰᤋᤧᤒᤠ ᤔᤧᤄᤧᤵᤛᤢᤀᤠᤱ ᤁᤡᤔᤧᤸᤗᤧ ᤗᤠᤈᤣᤴ ᤏᤢ ᤂᤧᤵᤔᤥᤒᤠ ᤔᤏᤠᤜᤠ᤹ ᤆᤡᤖᤡᤶᤗᤡᤶᤏᤠ ᤔᤧᤕᤰᤂᤧᤖᤥ॥

⁸ ᤁᤧᤖᤧᤰ ᤐᤡᤛᤠᤱᤗᤠᤶ ᤂᤧᤴ ᤁᤡᤷᤃᤵ ᤔᤧᤃᤒᤢᤖᤥ. ᤂᤧᤒᤩᤠᤱ ᤔᤧᤴᤇᤠᤶ ᤛᤢᤘᤠᤱᤒᤠ ᤌᤰᤛᤢᤒᤠᤜᤠ᤹ᤖᤧ ᤂᤧᤴ ᤔᤧᤓᤳᤋᤢᤖᤥ॥ ᤂᤧᤱᤜᤠ᤹ᤖᤧ ᤂᤧᤸᤗᤧ ᤁᤢᤛᤶᤎᤠᤱ ᤕᤥ᤺ᤱᤎᤡᤰ ᤗᤠᤵᤔᤧᤓᤢᤛᤢᤖᤥ ᤂᤧᤒᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤒᤠ᤺ᤳᤋᤥ ᤔᤧᤎᤠᤛᤢᤖᤥ॥

⁹ ᤂᤧᤱᤜᤠ᤹ᤖᤧ ᤂᤧᤴ ᤂᤧ᤺ᤰᤆᤢᤖᤡᤜᤠ᤹ᤖᤧ ᤕᤧᤴᤈᤧ᤺ᤵᤐᤥ ᤔᤧᤀᤢ᤺ᤰᤂᤢᤀᤠᤱ ᤔᤧᤕᤠᤰᤋᤢᤖᤥ. ᤜᤧᤰᤁᤩᤠᤱ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤁᤢᤍᤃᤡ ᤂᤧᤴ ᤔᤧᤓᤧᤳᤋᤢᤖᤥ॥ ᤜᤧᤰᤁᤣᤗ᤹ᤖᤡᤰ ᤀᤡᤛᤪᤠᤀᤡᤗᤒᤠ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ᤀᤥ ᤂᤧᤸᤗᤧ ᤁᤢᤀᤡᤰᤗᤠᤴ ᤕᤠᤶᤔᤥ ᤀᤠᤵᤑᤠᤸᤗᤧᤀᤠᤱ ᤂᤧᤶᤔᤠ ᤛᤢᤰᤔᤧᤍᤧᤳᤏᤧᤸᤗ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤂᤧᤴ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠᤜᤠ᤹ᤀᤥ ᤔᤧᤃᤧᤳᤋᤢᤖᤥ॥

¹⁰ “ᤂᤧᤏᤧ᤹ ᤁᤧᤶᤔᤠᤃ ᤆᤫᤠ᤺ᤳᤋᤡᤸᤗᤧ ᤁᤢᤕᤠᤀᤥ ᤗᤣ᤺ᤵᤔᤏᤠᤀᤠᤱ ᤁᤧᤏᤧᤒᤠ ᤆᤧᤸᤗᤧᤰᤛᤣ᤹ ᤀᤡᤰᤋᤠᤵ ᤜᤧᤰᤋᤱᤔᤠ ᤆᤥᤃᤧᤖᤥ॥ ᤕᤖᤡᤰ ᤘᤧᤳᤋᤧᤛᤖᤧ ᤆᤫᤠ᤺ᤳᤋᤡᤸᤗᤧ ᤆᤥᤃᤢᤸᤗᤧ ᤂᤧᤸᤗᤧ ᤛᤖᤣ᤺ᤰᤕᤠᤖᤡᤰ ᤜᤢᤖᤢᤶᤗᤢᤶᤏᤠ ᤁᤢᤓᤧᤰᤘᤠ ᤐᤳᤇᤧᤖᤥ॥

¹¹ ᤕᤢᤰᤛᤠᤒᤧᤸᤗᤧ ᤁᤢᤜᤠᤱ ᤋᤰᤁᤠᤳ ᤆᤥ᤺ᤰᤔᤠᤖᤧ ᤗᤠᤃᤡ ᤂᤧᤸᤗᤧ ᤁᤢᤒᤥᤖᤠᤰᤜᤠ᤹ ᤐᤎᤢᤶ ᤁᤧᤎᤢᤶᤒᤠ ᤐᤥ᤺ᤰᤂᤧᤖᤥ॥ ᤁᤧᤖᤧᤰ ᤘᤣ᤹ᤜᤠ᤹ᤏᤢ᤺ᤸᤗᤧ ᤌᤠ᤺ᤱᤎᤠᤰ ᤁᤴ ᤛᤠ᤹ᤖᤡᤰ ᤁᤣ᤺ᤶᤒᤠ ᤐᤥᤖᤧᤖᤥ. ᤁᤸᤗᤧ ᤛᤖᤣ᤺ᤰᤕᤠ᤺ᤵᤐᤠ ᤜᤢᤖᤢᤶᤗᤢᤶᤏᤠ ᤁᤢᤓᤧᤰᤘᤠ ᤐᤳᤇᤧᤒᤠ ᤏᤢ ᤁᤢᤗᤡᤱᤃᤧᤴ ᤁᤣ᤺ᤶᤒᤠ ᤆᤥᤃᤧᤒᤠᤸᤗᤧ ᤆᤥᤃᤢᤸᤗᤧ ᤁᤴ ᤏᤡᤎᤠᤒᤧᤖᤥ॥

¹² ᤁᤖ ᤛᤠ᤹ᤖᤡᤰ ᤛᤠᤰᤁᤧᤴ ᤐᤥ᤺ᤰᤔᤠᤀᤥ ᤂᤧᤴ ᤆᤧᤸᤗᤧᤰᤛᤣ᤺ᤴ ᤁᤢᤛᤠ᤺ᤵᤏᤢ ᤜᤠ᤹ᤕᤠᤰ ᤔᤧᤀᤠ᤺ᤰᤂᤢᤖᤥ ᤜᤧᤰᤁᤩᤠᤱ ᤂᤠᤶᤒᤠᤱᤅᤥ ᤗᤠᤵᤐᤢᤱ ᤔᤧᤍᤣᤛᤢᤖᤥ॥ ᤏᤠᤱᤃᤧᤴ ᤐᤡᤛᤠᤱᤒᤠ ᤁᤧᤕᤧᤶᤒᤠ ᤛᤢᤖᤡᤳ ᤁᤣᤈᤱᤅᤡᤸᤗᤧ ᤁᤸᤗᤧ ᤁᤢᤈᤠ᤹ᤜᤠ᤹ ᤛᤷᤃᤧᤱ ᤜᤣᤛᤢᤍᤣᤛᤢᤖᤥ ᤂᤧᤶᤒᤩᤠᤱ ᤁᤸᤗᤧ ᤁᤧᤎᤢᤶᤒᤠ ᤁᤢᤒᤥᤖᤠᤰᤜᤠ᤹ ᤗᤧᤴᤍᤢ ᤌᤠᤛᤢᤖᤥ. ᤜᤧᤰᤁᤣᤗ᤹ᤖᤡᤰ ᤂᤧᤴ ᤀᤡᤛᤢ᤹ᤖᤢᤀᤠᤱ ᤔᤡ᤺ᤸᤗᤧ ᤂᤠᤵᤐᤢᤌᤩ᤺ᤱ ᤆᤥᤃᤢᤖᤥ॥

¹³ ᤀᤠᤸᤗ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤂᤧᤴ ᤆᤧᤸᤗᤧᤰᤛᤣ᤺ᤴ ᤔᤧᤈᤳᤋᤢᤀᤠᤱ ᤕᤢᤱᤗᤥ. ᤂᤧᤵᤔᤥᤒᤠ ᤂᤠᤶᤔᤡᤴ ᤁᤧᤜᤣᤒᤠ ᤏᤢ ᤁᤢᤛᤧᤱᤃᤪᤠ ᤆᤥᤰᤗᤥ॥

¹⁴ ᤁᤸᤗᤧ ᤁᤢᤒᤥᤖᤠᤰᤜᤠ᤹ᤀᤥᤗᤠᤶ ᤔᤡ ᤜᤠ᤹ᤖᤢᤗ᤺ᤴᤍᤧᤀᤠᤱ ᤐᤳᤗᤥ ᤜᤧᤰᤁᤩᤠᤱ ᤁᤸᤗᤧ ᤁᤢᤈᤠ᤹ᤜᤠ᤹ ᤂᤠᤵᤐᤢᤌᤩ᤺ᤱ ᤆᤥᤃᤢᤖᤥ॥ ᤁᤸᤗᤧ ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠ ᤁᤢᤗᤠᤱᤜᤠ᤹ ᤕᤢᤰᤛᤠᤒᤧᤸᤗᤧ ᤁᤢᤜᤠᤱ ᤋᤰᤁᤠᤳ ᤆᤥ᤺ᤰᤔᤠ ᤁᤧᤎᤢᤶᤒᤠ ᤔᤧᤈᤥᤰᤏᤧᤸᤗᤥ॥ “ᤁᤱᤃ ᤗᤳᤇᤠ ᤔᤧᤖᤡᤱ ᤌᤰᤔᤠ ᤛᤠᤶᤗᤥᤖᤥ. ᤜᤧᤰᤁᤩᤠᤱ ᤏᤡᤱᤘᤠ᤹ ᤋᤢᤰᤂᤣ ᤆᤠᤔᤠ ᤕᤧᤶᤔᤥ ᤁᤴ ᤛᤠᤶᤔᤧᤔᤧᤳᤋᤢᤖᤥ॥”