ᤀᤡᤈᤁᤡᤀᤣᤗ 18 - LIFOTNTᤀᤠᤒᤠᤅᤣ ᤆᤥ᤺ᤰᤔᤠ ᤁᤧᤒᤥᤱᤒᤠ ᤗᤰᤐᤧᤴ 1 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠᤗᤠᤶ ᤘᤣ᤹ ᤀᤡᤱᤄᤱᤎᤡᤰ ᤀᤠᤱᤃᤠ᤹ᤀᤥ ᤁᤧᤖᤧ— 2 “ᤀᤡᤛᤪᤠᤀᤡᤒᤠ ᤗᤠᤈᤣ᤺ᤸᤗᤧ ᤁᤢᤕᤠ᤺ᤶᤒᤣᤀᤥ ᤁᤴ ᤂᤠᤜᤢᤴᤏᤡᤴ ᤌᤣᤀᤠᤱ ᤁᤧᤒᤠ᤺ᤳᤋᤢᤶᤒᤠᤒᤣ᥅ ‘ᤐᤠᤔᤠᤖᤧ ᤁᤧᤛᤢ᤺ᤵᤐᤠ ᤆᤧᤸᤗᤧᤰᤛᤣ᤹ᤀᤡᤴ ᤔᤧᤈᤀᤠᤱ ᤘᤠ᤹ᤖᤥ. ᤁᤖ ᤂᤢᤴᤇᤡ᤹ ᤛᤠᤜᤠ᤹ᤖᤧ ᤔᤢᤖᤠᤴ ᤔᤢ᤺ᤋᤩᤢᤵ ᤗ᤹ᤖᤥ॥’ 3 ᤀᤠᤱᤃᤠ᤹ ᤁᤢᤜᤡᤱᤘᤧᤳ ᤘᤠ᤹ᤀᤠᤒᤠ ᤁᤢᤀᤡᤛᤡᤰ. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. ᤁᤴ ᤂᤠᤜᤢᤴᤏᤡᤴ ᤀᤡᤛᤪᤠᤀᤡᤗᤀᤥ ᤀᤠᤸᤗᤀᤠᤱᤎᤥ ᤀᤠᤵᤑᤠᤸᤗᤧᤀᤠᤱ ᤁᤧᤶᤒᤠ᤺ᤳᤋᤢᤶᤔᤡᤴ᤹॥ 4 ᤌᤣᤀᤠᤱᤓᤧᤸᤗᤧ ᤐᤠᤔᤠᤜᤠ᤹ ᤏᤢ ᤛᤠᤜᤠ᤹ ᤂᤰᤐᤧᤳ ᤂᤠᤛᤧᤴ ᤆᤥ᤺ᤰᤔᤠᤛᤡᤖᤧ ᤗᤠᤃᤡ ᤁᤧᤖᤧᤰ ᤀᤠᤱᤃᤠ᤹ ᤀᤠᤔᤏᤠᤛᤡᤖᤥ॥ ᤜᤧᤰᤁᤩᤠᤱ ᤁᤴ ᤀᤠᤱᤃᤠ᤹ ᤀᤠᤎᤡᤶᤒᤣᤖᤥ—ᤀᤠᤳᤋᤡᤴ ᤔᤏᤠ᤺ᤸᤗᤧ ᤗᤠᤕᤥ ᤆᤥᤃᤢ᤹. ᤂᤧᤴ ᤛᤡᤖᤥ॥ 5 “ᤁᤢᤒᤡᤖᤧ ᤗᤠᤃᤡ ᤁᤢᤓᤠ ᤔᤏᤠᤴ ᤛᤠᤶᤕᤥᤒᤠ ᤆᤥᤰ ᤜᤧᤰᤁᤩᤠᤱ ᤛᤠᤶᤕᤥᤒᤠ ᤏᤢ ᤁᤢᤍᤥ᤺ᤵᤔᤠ ᤆᤥᤃᤢᤔᤢ॥ 6 ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ᤀᤥᤒᤠ ᤀᤡᤛᤪᤠᤀᤡᤗᤒᤠ ᤏᤠᤘᤠᤀᤡᤳᤗᤠᤜᤠ᤹ ᤋᤃᤡ ᤂᤢᤏᤧ᤹ ᤆᤠᤔᤢᤰ ᤌᤡᤔᤢᤰ ᤔᤧᤈᤥᤃᤢᤴ᤹ ᤀᤡᤃᤪ ᤂᤧᤱᤜᤠ᤹ ᤛᤧᤘᤠ ᤔᤧᤔᤧᤳᤋᤢᤛᤡᤴ᤹॥ ᤂᤢᤏᤧ᤹ ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤔᤧᤈᤥᤃᤢᤴ᤹ ᤀᤡᤃᤪ ᤔᤧᤴᤇᤢᤔᤠᤴ ᤁᤢᤛᤡᤶ ᤘᤠᤜᤵᤔᤠ ᤘᤠ᤹ᤀᤧᤸᤗᤧ ᤂᤧᤴᤏᤢ ᤂᤢᤏᤧ᤹ ᤛᤥᤖᤡᤰ ᤀᤡᤶᤔᤠ ᤕᤠ᤺ᤶᤒᤰ ᤔᤧᤈᤥᤃᤢᤴ᤹॥ 7 ᤗᤢᤱᤔᤠ᤹ ᤋᤢᤰᤋᤢᤛᤡᤀᤠᤱ ᤆᤡᤃᤰᤘᤠ ᤕᤢᤰᤂᤢ ᤐᤡᤖᤢᤛᤡ᤹. ᤛᤡᤱᤏᤠᤳ ᤁᤧᤍᤣ᤹ᤒᤠ ᤕᤠᤱᤃᤧᤛᤠ᤹ᤒᤠᤜᤠ᤹ᤖᤧ ᤔᤧᤕᤢᤰᤂᤢᤒᤠ ᤛᤠᤔᤠᤜᤠ᤹ ᤂᤢᤏᤧ᤹ ᤔᤧᤔᤧᤳᤇᤡᤱᤅᤡᤴ᤹॥ ᤂᤢᤏᤧ᤹ ᤕᤠᤱᤃᤧᤛᤠ᤹ᤒᤧᤴ ᤔᤧᤏᤠᤵᤋᤢᤴ᤹ ᤁᤖ ᤂᤧᤸᤗᤧ ᤁᤢᤗᤧᤰᤘᤠ ᤁᤢᤛᤡᤰ ᤁᤧᤗᤠ᤺ᤰᤐᤧᤴ ᤁᤢᤈᤠ ᤐᤡᤖᤢ᤹ ᤁᤢᤜᤥ᤺ᤵᤔᤠ ᤁᤢᤛᤠᤰᤔᤥ ᤁᤧᤘᤠ᤹ᤒᤧᤴ ᤋᤣᤳᤑᤢᤱᤜᤠ᤹ ᤐᤡᤖᤢ᤹॥ 8 ᤂᤢᤏᤧ᤹ ᤁᤢᤛ᤻ᤛᤠ ᤔᤧᤴᤈᤠᤀᤣ ᤛᤡᤱᤏᤠᤳ ᤐᤡᤖᤢᤛᤡ᤹. ᤂᤢᤏᤧ᤹ ᤔᤧᤴᤘᤠ᤹ᤔᤏᤠᤒᤠ ᤂᤠᤛᤧᤴᤗᤠᤶ ᤗᤠ᤺ᤳᤗᤠ᤺ᤳ ᤘᤠ᤹. ᤘᤣ᤹ᤜᤠ᤹ ᤂᤠᤛᤧᤴ ᤆᤥ᤺ᤰᤔᤠᤛᤡ ᤐᤥᤱᤅᤡᤸᤗᤧ ᤂᤢᤏᤧ᤹ ᤁᤢᤍᤥ᤺ᤵᤔᤠ ᤏᤢ ᤁᤧᤘᤠ᤹ᤒᤠ ᤆᤥᤃᤢ᤹. 9 ᤜᤧᤰᤁᤩᤠᤱ ᤀᤠᤀᤡᤱᤈᤠᤱᤜᤠ᤹ ᤏᤢ ᤀᤠᤎᤡᤶᤜᤠ᤹ ᤁᤢᤍᤥ᤺ᤵᤔᤠᤀᤠᤱ ᤀᤡ᤺ᤳᤋᤢ ᤏᤠ᤺ᤳᤋᤢ᤹॥ ᤁᤴ ᤐᤠ᤺ᤴᤜᤠ᤹ ᤁᤧᤈᤥ᤺ᤰᤐᤠᤱᤃ ᤛᤠᤶᤕᤥᤒᤠᤖᤥ ᤜᤧᤰᤁᤩᤠᤱ ᤛᤧᤰᤂᤠᤀᤣ ᤜᤡᤱᤗᤥ. ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹॥ 10 “ᤁᤖ ᤁᤢᤒᤡᤖᤧ ᤗᤠᤃᤡ ᤂᤧᤴ ᤔᤏᤠ᤺ᤸᤗᤧ ᤗᤳᤇᤠ ᤁᤢᤛ᤻ᤛᤠ ᤘᤠ᤹ᤀᤠᤱ ᤔᤏᤠᤜᤠ᤹ ᤁᤧᤏᤠᤵᤐᤠ ᤏᤢ ᤔᤏᤠ ᤁᤧᤛᤧᤵᤐᤠ ᤐᤥᤱ᤹ ᤜᤧᤰᤁᤩᤠᤱ ᤏᤢᤒᤠ ᤐᤠ᤺ᤴᤏᤡᤴ ᤆᤥ᤺ᤰᤔᤠ ᤔᤧᤍᤧᤴᤏᤧᤴᤔᤢ॥ 11 ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤶᤒᤠᤖᤧ ᤀᤠᤵᤑᤠᤸᤗᤧᤀᤠᤱ ᤔᤧᤴᤈᤥ᤺ᤰᤁᤣ ᤘᤕᤧᤒᤠ ᤐᤠ᤺ᤴᤜᤠ᤹ ᤆᤥᤃᤢ. ᤂᤢᤏᤧ᤹ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ᤀᤥᤒᤠ ᤏᤠᤘᤠᤀᤡᤳᤗᤠᤜᤠ᤹ ᤛᤧᤘᤠ ᤔᤧᤳᤋᤢᤛᤡ. ᤕᤠᤶᤒᤥ᤺ᤵᤔᤠ ᤕᤠ᤺ᤶᤒᤰ ᤆᤥᤃᤢᤀᤠᤱ ᤁᤧᤖᤧᤰ ᤋᤠᤵᤑᤧ᤺ᤶᤒᤠ ᤕᤠ᤺ᤶᤒᤰᤜᤠ᤹ ᤆᤥᤃᤢ᤹. 12 ᤕᤠᤱᤃᤧᤛᤠ᤹ᤒᤠ ᤏᤢ ᤁᤢᤓᤠ᤹ᤒᤠᤱ ᤁᤧᤜᤥ᤺ᤵᤐᤠᤴ ᤋᤢᤰᤂᤣ ᤆᤠ᤺ᤳᤋᤢ᤹. ᤂᤢᤏᤧ᤹ ᤔᤏᤠᤜᤠ᤹ ᤏᤠᤵᤋᤢᤛᤡ᤹. ᤔᤧᤕᤢᤰᤂᤢᤒᤠ ᤛᤠᤔᤠ᤺ᤴ ᤌᤧ᤹ᤔᤠ ᤔᤧᤓᤠ᤺ᤰᤋᤢᤛᤡᤴᤏᤠᤱ ᤛᤡᤱᤏᤠᤳ ᤁᤧᤍᤣ᤹ᤒᤠᤜᤠ᤹ᤗᤠᤶ ᤂᤢ᤺ᤳᤋᤢ᤹. ᤏᤠᤘᤠᤀᤡᤳᤗᤠᤜᤠ᤹ ᤛᤧᤘᤠ ᤔᤧᤳᤋᤢᤛᤡ᤹. ᤕᤠᤶᤃᤧᤛᤡᤱᤒᤠ ᤗᤠᤕᤥ ᤗᤠᤛᤥᤳ ᤆᤥᤃᤢ᤹. 13 ᤜᤧᤰᤁᤩᤠᤱ ᤛᤠ᤹ᤖᤡᤰ ᤕᤖᤡᤰ ᤁᤢᤛ᤻ᤛᤠ ᤆᤠᤔᤠᤖᤧ ᤗᤠᤃᤡ ᤛᤡᤱᤏᤠᤳ ᤐᤡᤖᤢᤛᤡ᤹॥ ᤌᤣ ᤀᤰᤋᤱᤒᤠ ᤔᤏᤠᤴ ᤜᤡᤱᤗ ᤐᤥᤱᤒᤡ᥅ ᤔᤣ᤺ᤴ᥄ ᤂᤧᤸᤗᤧ ᤁᤴ ᤁᤧᤖᤧᤰ ᤕᤠᤶᤃᤧᤛᤡᤱᤒᤠ ᤐᤠ᤺ᤴᤜᤠ᤹ ᤆᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤂᤧᤴ ᤛᤡᤔᤠᤀᤣ ᤐᤥᤱ᤹ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤔᤠᤰᤂᤡᤴ ᤀᤠᤵᤑᤣᤰ ᤂᤢᤏᤧ᤹ᤀᤥ ᤌᤠᤖᤖᤥ॥ 14 “ᤁᤖ ᤁᤢᤒᤡᤖᤧ ᤗᤠᤃᤡ ᤂᤧᤴ ᤗᤠᤕᤥᤒᤠ ᤛᤠ᤺ᤸᤗᤧ. ᤁᤢᤗᤧᤰᤘᤠᤀᤥ ᤁᤢᤛ᤻ᤛᤠᤎᤡᤰ ᤘᤠ᤹ᤀᤠᤱ. ᤂᤢᤏᤧ᤹ ᤁᤢᤶᤒᤠᤖᤧ ᤆᤥᤃᤢᤒᤠ ᤁᤧᤖᤧᤰ ᤑᤧᤴᤕᤠ᤺ᤶᤒᤰᤜᤠ᤹ ᤏᤡᤛᤢ᤹ ᤜᤧᤰᤁᤩᤠᤱ ᤂᤧᤴ ᤐᤖᤡᤰᤐᤠ ᤜᤡᤱᤔᤧᤸᤗᤧ ᤋᤰᤗᤧᤱᤘᤠᤀᤥ ᤗᤠᤱᤔᤧᤱᤄᤣ᤺ᤰᤔᤠ ᤏᤡ᤺ᤴᤎᤥ ᤆᤥᤃᤢ᤹॥ 15 ᤁᤴ ᤁᤢᤛ᤻ᤛᤠᤴ ᤁᤥ᤺ᤰᤔᤠ ᤑᤠᤱᤈᤱ ᤌᤧᤃᤢ ᤔᤠᤱᤘᤠᤜᤠ᤹ᤀᤥᤒᤠ ᤏᤠᤘᤠᤀᤡᤳᤗᤠᤜᤠ᤹ ᤛᤧᤘᤠ ᤔᤧᤵᤔᤠ ᤔᤧᤍᤧᤴᤏᤧᤴ᤹ ᤂᤧᤒᤩᤠᤱ ᤕᤠᤶᤒᤥ᤺ᤵᤔᤠ ᤕᤠᤶᤒᤰ ᤔᤧᤈᤥᤃᤢᤴ᤹॥ 16 ᤂᤧᤸᤗᤧ ᤕᤠᤱᤃᤧᤛᤠ᤹ᤒᤠᤴ ᤋᤢᤰᤂᤣ ᤔᤧᤈᤠ᤺ᤳᤋᤢᤴ᤹. ᤁᤖ ᤂᤧᤸᤗᤧ ᤁᤢᤗᤧᤰᤘᤠ ᤛᤡᤱᤏᤠᤳ ᤁᤧᤍᤣ᤹ᤒᤠᤜᤠ᤹ ᤏᤢᤖᤡᤰ ᤔᤧᤳᤋᤢᤛᤡ ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤏᤠᤵᤋᤢᤛᤡᤴ᤹॥ ᤁᤢᤛᤡᤰ ᤁᤧᤗᤠ᤺ᤰᤐᤧᤴ ᤂᤢᤏᤧ᤹ ᤁᤢᤈᤠ ᤐᤡᤖᤢ᤹ ᤂᤶᤓᤩᤠᤱ ᤁᤢᤜᤥ᤺ᤵᤔᤠ ᤁᤢᤛᤠᤰᤔᤥ ᤁᤧᤘᤠ᤹ᤒᤠᤴ ᤋᤣᤳᤆᤠᤱᤜᤠ᤹ ᤐᤡᤖᤢ᤹॥ 17 ᤂᤢᤏᤧ᤹ ᤕᤠᤱᤃᤧᤛᤠ᤹ᤒᤧᤴ ᤋᤢᤰᤂᤣ ᤔᤧᤈᤠ᤺ᤳᤋᤢᤴ᤹. ᤁᤢᤛ᤻ᤛᤠ ᤆᤠᤔᤠᤖᤧ ᤗᤠᤃᤡ ᤛᤡᤱᤏᤠᤳ ᤕᤠᤱ ᤔᤧᤒᤡᤖᤢᤴᤇᤡᤴ᤹. ᤜᤧᤰᤁᤩᤠᤱ ᤁᤧᤖᤧᤰ ᤀᤠᤱᤃᤠ᤹ ᤀᤠᤎᤡᤶᤜᤠ᤹ ᤏᤢ ᤀᤠᤀᤡᤱᤈᤠᤱᤜᤠ᤹ ᤀᤡ᤺ᤳᤋᤢ ᤏᤠ᤺ᤳᤋᤢ᤹॥ ᤀᤰᤋᤱᤒᤠ ᤔᤏᤠᤴ ᤂᤢᤏᤧ᤹ ᤁᤢᤶᤒᤠᤖᤧ ᤁᤢᤗᤠᤕᤥᤜᤠ᤹ᤖᤧ ᤆᤥᤃᤢᤸᤗᤧ ᤔᤧᤛᤡᤏᤧᤴ. ᤂᤧᤴ ᤛᤧᤰᤂᤠᤀᤣ ᤜᤡᤱ᤹॥ 18 ᤁᤖ ᤂᤢᤏᤧ᤹ ᤁᤢᤶᤒᤠᤴ ᤛᤡᤖᤥ ᤌᤣᤀᤠᤱᤓᤧᤸᤗᤧ ᤂᤢᤏᤧ᤹ ᤁᤢᤀᤡᤃᤧᤓᤧᤶᤒᤠ ᤐᤥ᤺ᤰᤂᤧ. ᤔᤏᤠᤜᤠ᤹ ᤏᤠᤵᤋᤢᤛᤡ. ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤏᤢᤖᤡᤰ ᤏᤡᤛᤢᤀᤠᤱ ᤘᤕᤧᤛᤠᤱ ᤆᤥ᤺ᤰᤔᤠ ᤔᤧᤴᤏᤢ᤹ᤔᤏᤠᤒᤠ ᤐᤠ᤺ᤴᤏᤡᤴ ᤆᤥᤃᤢ॥ 19 “ᤁᤖᤛᤠᤱ ᤂᤡᤏᤡ᤹ ᤀᤰᤂᤣ ᤁᤧᤒᤠ᤺ᤳᤋᤢᤶ. ‘ᤌᤣ. ᤐᤠᤔᤠᤖᤧ ᤂᤢᤴᤇᤡ᤹ ᤗᤠᤕᤥᤜᤠ᤹ ᤛᤠ᤺ᤸᤗᤧ ᤜᤢᤱᤔᤠ ᤔᤧᤒᤥᤱᤏᤧᤶᤒᤡ᥅’ ᤔᤣ᤺ᤴ᥄ ᤌᤣᤀᤠᤱᤓᤧᤸᤗᤧ ᤁᤢᤛ᤻ᤛᤠ᤺ᤸᤗᤧ ᤁᤢᤍᤥ᤺ᤵᤔᤠ ᤏᤢ ᤏᤢᤒᤠ ᤆᤥᤃᤢ᤹ ᤜᤧᤰᤁᤩᤠᤱ ᤁᤧᤖᤧᤰ ᤀᤠᤱᤃᤠ᤹ ᤀᤠᤎᤡᤶᤜᤠ᤹ ᤀᤡ᤺ᤳᤋᤢ ᤏᤠ᤺ᤳᤋᤢᤏᤧᤓᤃᤪ. ᤂᤧᤴ ᤁᤢᤛ᤻ᤛᤠᤴ ᤛᤧᤰᤂᤠᤀᤣ ᤜᤡᤱ᤹॥ 20 ᤗᤠᤕᤥ ᤁᤧᤈᤥ᤺ᤰᤐᤠ ᤔᤏᤠᤴ ᤛᤡᤖᤥ॥ ᤁᤢᤶᤒᤠᤖᤧ ᤆᤥᤃᤢᤒᤠ ᤗᤠᤕᤥᤸᤗᤧ ᤀᤠᤵᤋᤡᤰᤁᤡᤴ ᤁᤢᤛ᤻ᤛᤠᤀᤥ ᤔᤧᤎᤠᤏᤧᤴ. ᤁᤢᤛ᤻ᤛᤠ᤺ᤸᤗᤧ ᤆᤥᤃᤢᤒᤠ ᤗᤠᤕᤥᤸᤗᤧ ᤀᤠᤵᤋᤡᤰᤁᤡᤴᤏᤠᤱ ᤁᤢᤶᤒᤠᤀᤥ ᤔᤧᤎᤠᤏᤧᤴ॥ ᤛᤠᤶᤕᤥᤒᤠ ᤔᤏᤠᤴ ᤛᤠᤶᤕᤥᤒᤠ ᤁᤢᤕᤠ᤺ᤶᤒᤰᤁᤡᤸᤗᤧ ᤂᤢᤏᤧ᤹ ᤛᤠᤶᤕᤥᤒᤠ ᤗᤣ᤺ᤳᤋᤢ᤹. ᤜᤧᤰᤁᤩᤠᤱ ᤋᤠᤰᤁᤧᤓᤧ᤹ᤒᤠ ᤔᤏᤠᤴ ᤋᤠᤵᤑᤧ᤺ᤶᤒᤠ ᤁᤢᤕᤠ᤺ᤶᤒᤰᤁᤡᤸᤗᤧ ᤂᤢᤏᤧ᤹ ᤋᤠᤵᤑᤧ᤺ᤶᤒᤠ ᤗᤣ᤺ᤳᤋᤢ᤹॥ 21 ᤁᤖ ᤋᤠᤰᤁᤧᤓᤧ᤹ᤒᤠ ᤔᤏᤠᤜᤠ᤹ ᤂᤢᤴᤇᤡ᤹ ᤁᤧᤖᤧᤰ ᤗᤠᤕᤥᤜᤠ᤹ᤗᤠᤶ ᤔᤧᤏᤢ᤺ᤱ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤎᤡᤶᤔᤡᤴ ᤀᤡ᤺ᤵᤔᤠ ᤏᤠ᤺ᤵᤔᤠ ᤔᤧᤜᤣ᤺ᤰᤋᤢ ᤜᤧᤰᤁᤩᤠᤱ ᤏᤢᤒᤠ ᤏᤢ ᤁᤢᤍᤥ᤺ᤵᤔᤠ ᤐᤠ᤺ᤴᤏᤡᤴ ᤔᤧᤈᤥᤃᤢᤏᤧᤓᤃᤪ. ᤂᤧᤱᤜᤠ᤹ ᤛᤧᤰᤂᤠᤀᤣ ᤔᤧᤜᤡᤱ᤹ ᤜᤧᤰᤁᤩᤠᤱ ᤔᤧᤴᤇᤡᤏᤧᤴ॥ 22 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤣᤕᤧᤶᤔᤥᤒᤠ ᤁᤧᤖᤧᤰ ᤗᤠᤕᤥᤜᤠ᤹ ᤏᤡᤱᤘᤠ᤹ ᤑᤣ᤺ᤴ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤀᤠᤱ ᤘᤠ᤹ᤒᤠ ᤛᤠᤶᤕᤥᤒᤠ ᤐᤠ᤺ᤴᤜᤠ᤹ᤖᤧ ᤆᤥᤃᤢᤸᤗᤧ ᤂᤧᤱᤜᤠ᤹ ᤔᤧᤜᤡᤱ᤹॥ 23 “ᤋᤠᤰᤁᤧᤓᤧ᤹ᤒᤠ ᤔᤏᤠᤴ ᤛᤡᤒᤠ ᤀᤠᤱᤃᤠ᤹ ᤀᤥᤔᤧᤵᤔᤠ ᤀᤠᤛᤡᤖᤠ᤹ᤌᤠᤱ ᤑᤠ᤹ᤀᤠᤱ ᤂᤧᤏᤧ᤹ ᤁᤧᤀᤡ᤺ᤳᤋᤢᤒᤡ᥅ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱ᤹॥ ᤛᤧᤰᤂᤠᤀᤣ ᤔᤣ᤺ᤴ᥄ ᤀᤠᤱᤃᤠ᤹ᤃ ᤂᤧᤱᤜᤠ᤹ ᤂᤢᤴᤇᤡ᤹ ᤑᤧᤴᤕᤠ᤺ᤶᤒᤰᤗᤠᤶ ᤔᤧᤏᤢ᤺ᤱᤅᤠᤱ ᤔᤧᤜᤡᤱᤗ ᤁᤧᤗ᤹ᤒᤠ ᤏᤡᤱᤘᤠ᤹ ᤀᤡ᤺ᤳᤋᤢᤱ᤹॥ 24 ᤁᤖᤛᤠᤱ. ᤛᤠᤶᤕᤥᤒᤠ ᤔᤏᤠᤜᤠ᤹ ᤂᤢᤴᤇᤡ᤹ ᤛᤠᤶᤕᤥᤒᤠ ᤕᤧᤵᤗᤧᤰᤁᤥᤗᤠᤶ ᤔᤧᤏᤢ᤺ᤱᤅᤠᤱ ᤘᤣ᤹ ᤗᤠᤕᤥᤒᤠᤜᤠ᤹ ᤜᤧᤰᤁᤣ ᤕᤠᤶᤃᤧᤛᤡᤱᤒᤠ ᤗᤠᤕᤥᤜᤠ᤹ ᤆᤥ᤺ᤰᤔᤠ ᤔᤧᤜᤣ᤺ᤰᤋᤢᤏᤧᤓᤃᤪ. ᤌᤣ ᤂᤧᤱᤜᤠ᤹ ᤜᤡᤱ ᤑᤠ᤺ᤰᤔᤠᤛᤡᤒᤡ᥅ ᤔᤣ᤺ᤴ. ᤛᤧᤰᤂᤠᤀᤣ ᤔᤣ᤺ᤴ᥄ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤧᤖᤧᤰ ᤛᤠᤶᤕᤥᤒᤠ ᤕᤠ᤺ᤶᤒᤰᤜᤠ᤹ ᤏᤡᤱᤘᤠ᤹ᤔᤢ᤺ᤴ. ᤂᤢᤴᤇᤡ᤹ ᤏᤛᤠᤴ ᤜᤥ᤺ᤵᤔᤠ ᤏᤢ ᤗᤠᤕᤥᤜᤠ᤹ᤖᤧ ᤆᤥᤃᤢᤸᤗᤧ ᤂᤧᤱᤜᤠ᤹ ᤔᤧᤛᤡᤖᤥ॥ 25 “ᤁᤖᤛᤠᤱ ᤂᤡᤏᤡ᤹ ᤀᤰᤂᤣ ᤁᤧᤒᤠ᤺ᤳᤋᤢᤶ. ‘ᤍᤠᤱᤒᤧᤸᤗᤧ ᤁᤢᤍᤥ᤺ᤵᤔᤠ ᤔᤧᤈᤥᤃᤢᤴᤗ ᤔᤧᤘᤠ᤹ᤏᤧᤴ᥄’ ᤀᤡᤛᤪᤠᤀᤡᤗᤒᤠ ᤜᤡᤶᤛᤕᤱᤛᤣ. ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹॥ ᤌᤣ ᤀᤠᤱᤃᤠ᤹ ᤁᤢᤍᤥ᤺ᤵᤔᤠ ᤔᤧᤈᤥ᤺ᤰᤁᤠᤴᤗ ᤔᤧᤘᤠ᤹ᤀᤠᤴᤒᤡ᥅ ᤀᤡ ᤂᤡᤏᤡ᤹ ᤁᤧᤴᤈᤥᤃᤢᤶᤔᤧᤶᤒᤡ᥅ 26 ᤛᤠᤶᤕᤥᤒᤠ ᤔᤏᤠᤜᤠ᤹ ᤂᤢᤴᤇᤡ᤹ ᤛᤠᤶᤕᤥᤒᤠ ᤕᤧᤵᤗᤧᤰᤗᤠᤶ ᤔᤧᤏᤢ᤺ᤱ᤹ ᤜᤧᤰᤁᤩᤠᤱ ᤗᤠᤕᤥᤒᤠ ᤐᤠ᤺ᤴᤜᤠ᤹ ᤆᤥ᤺ᤰᤔᤠ ᤔᤧᤜᤣ᤺ᤰᤋᤢᤸᤗᤧ. ᤂᤧᤸᤗᤧ ᤁᤢᤗᤧᤰᤘᤠ ᤂᤧᤱᤜᤠ᤹ ᤔᤧᤛᤡᤖᤥ॥ ᤀᤥᤖᤥ. ᤂᤧᤱᤜᤠ᤹ ᤂᤢᤴᤇᤡ᤹ ᤗᤠᤕᤥᤒᤠ ᤕᤠ᤺ᤶᤒᤰᤜᤠ᤹ᤖᤧ ᤆᤥᤃᤢᤸᤗᤧ ᤔᤧᤛᤡᤖᤥ॥ 27 ᤜᤧᤰᤁᤩᤠᤱ ᤋᤠᤰᤁᤧᤓᤧ᤹ᤒᤠ ᤔᤏᤠᤜᤠ᤹ ᤂᤢᤴᤇᤡ᤹ ᤑᤧᤴᤕᤠ᤺ᤶᤒᤰᤗᤠᤶ ᤔᤧᤏᤢ᤺ᤱᤅᤠᤱ ᤛᤠᤶᤕᤥᤌᤡᤶᤔᤡᤴ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢ. ᤜᤧᤰᤁᤩᤠᤱ ᤁᤢᤍᤥ᤺ᤵᤔᤠ ᤏᤢ ᤏᤢᤒᤠ ᤔᤧᤈᤥᤃᤢᤏᤧᤓᤃᤪ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤡᤱᤔᤧᤴ ᤋᤠᤱᤔᤧᤛᤧ᤺ᤵᤋᤢ᤹॥ 28 ᤂᤧᤱᤜᤠ᤹ᤖᤧ ᤁᤴ ᤐᤠ᤺ᤴᤏᤥ ᤏᤡᤱᤘᤠ᤹ ᤔᤧᤀᤡ᤺ᤳᤋᤢ ᤂᤧᤒᤩᤠᤱ ᤂᤢᤴᤇᤡ᤹ ᤗᤠᤕᤥᤜᤠ᤹ᤗᤠᤶ ᤏᤢ᤺ᤱᤔᤠ ᤏᤡ᤺ᤴᤎᤥ ᤔᤧᤈᤥᤃᤢᤒᤠᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ ᤔᤧᤜᤡᤱ᤹॥ ᤀᤰᤋᤱᤒᤠ ᤔᤏᤠᤜᤠ᤹ ᤔᤧᤴᤇᤡᤏᤧᤴ॥ 29 ᤜᤧᤰᤁᤩᤠᤱ ᤀᤠᤸᤗᤛᤠᤱ ᤔᤏᤠᤜᤠ᤹ᤖᤧ ᤆᤰᤔᤧᤸᤗ᤹ᤀᤣ ᤀᤰᤂᤣ ᤔᤧᤒᤠ᤺ᤳᤋᤢᤀᤠᤱ ᤔᤧᤒᤳ. ‘ᤍᤠᤱᤒᤧᤸᤗᤧ ᤁᤢᤍᤥ᤺ᤵᤔᤠ ᤔᤧᤈᤥᤃᤢᤴᤗ ᤔᤧᤘᤠ᤹ᤏᤧᤴ᥄’ ᤀᤡᤛᤪᤠᤀᤡᤗᤒᤠ ᤜᤡᤶᤛᤕᤱᤛᤣ. ᤁᤱᤃ ᤂᤡᤏᤡ᤹ᤀᤣ ᤁᤢᤍᤥ᤺ᤵᤔᤠ ᤁᤧᤴᤈᤥᤃᤢᤶᤔᤡᤴᤗ ᤁᤧᤴᤘᤕᤡᤴ. ᤀᤠᤱᤃᤠ᤹ ᤔᤣ᤺ᤴᤗᤥ॥ 30 “ᤂᤧᤸᤗᤧᤆᤥᤃᤢᤸᤗᤧ ᤀᤡᤛᤪᤠᤀᤡᤗᤒᤠ ᤜᤡᤶᤛᤕᤱᤛᤣ. ᤁᤧᤈᤥᤃᤢᤶᤒᤠ ᤂᤡᤏᤡ᤹ ᤕᤠ᤺ᤶᤒᤰᤜᤠ᤹ ᤀᤡᤛᤡ᤺ᤰ. ᤀᤠᤱᤃᤠ᤹ ᤂᤡᤏᤡ᤹ ᤁᤧᤖᤧᤰ ᤂᤠᤛᤧᤴᤗᤥ᤺ᤴᤏᤡᤱ᤹. ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱ᤹॥ ᤂᤡᤏᤡ᤹ ᤏᤡᤱᤘᤠ᤹ ᤗᤥᤖᤧᤶᤔᤧ᤹. ᤜᤧᤰᤁᤩᤠᤱ ᤂᤡᤏᤡ᤹ ᤗᤠᤕᤥᤜᤠ᤹ᤗᤠᤶ ᤏᤢ᤺ᤰᤂᤧᤶᤔᤧ᤹॥ ᤂᤧᤴ ᤗᤠᤕᤥᤜᤠ᤹ᤖᤧ ᤂᤡᤏᤡ᤹ ᤁᤧᤶᤔᤧᤰᤂᤡᤴᤗᤖᤥ᥄ 31 ᤂᤡᤏᤡ᤹ ᤁᤧᤖᤧᤰ ᤐᤡᤑᤩᤢᤱᤒᤠ ᤐᤠ᤺ᤴᤜᤠ᤹ ᤗᤧᤖᤧᤶᤔᤧ᤹. ᤜᤧᤰᤁᤩᤠᤱ ᤂᤡᤏᤡ᤹ ᤀᤠᤵᤑᤣᤰ ᤗᤳᤇᤠ ᤁᤢᤛᤱ ᤛᤡᤰᤗᤢᤱᤔᤠ᤹ ᤏᤢ ᤏᤡᤱᤘᤠ᤹ ᤂᤥᤛᤧᤶᤔᤧ᤹॥ ᤌᤣᤀᤠᤱᤓᤧᤸᤗᤧ ᤀᤡᤛᤪᤠᤀᤡᤗᤒᤠ ᤔᤏᤠᤛᤣ. ᤂᤡᤏᤡ᤹ ᤌᤣᤀᤠᤱ ᤁᤧᤛᤩᤧ᤹ᤀᤡᤒᤣ᥅ 32 ᤁᤢᤓᤠ ᤔᤏᤠᤴ ᤛᤡ᤺ᤸᤗᤧ ᤀᤠᤱᤃᤠ᤹ ᤀᤠᤏᤡᤱᤘᤠ᤹ ᤔᤧᤍᤠᤏᤧᤴ. ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱ᤹॥ ᤂᤡᤏᤡ᤹ ᤗᤠᤕᤥᤜᤠ᤹ᤗᤠᤶ ᤜᤡᤴᤍᤧᤶᤔᤧ᤹ ᤜᤧᤰᤁᤩᤠᤱ ᤂᤡᤏᤡ᤹ ᤜᤡᤅᤧᤶᤔᤧ᤹ᤀᤥ᥄” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.