ᤀᤡᤈᤁᤡᤀᤣᤗ 17 - LIFOTNT

ᤆᤧᤸᤗᤧᤰᤛᤣ᤹ᤒᤢᤱ ᤏᤢ ᤏᤧᤳᤇᤡ ᤔᤕᤠ

¹ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠᤗᤠᤶ ᤁᤴ ᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤁᤧᤖᤧ—

² “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤏᤠᤀᤣ. ᤁᤴ ᤋᤠ᤹ᤍᤡ᤺ᤴ ᤐᤠ᤺ᤳᤋᤧ᤹. ᤜᤧᤰᤁᤩᤠᤱ ᤁᤴ ᤂᤧᤍᤠ᤺ᤴ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤔᤧᤳᤋᤧᤛᤧ᤹॥

³ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤗᤠᤶ ᤂᤧᤏᤧ᤹ ᤁᤴ ᤀᤡᤱᤄᤱᤅᤡᤴ ᤔᤧᤳᤋᤧᤛᤧ᤹ᤀᤥ— “ᤕᤶᤒᤕᤶᤒᤠ ᤁᤢᤗᤠᤵ ᤁᤧᤒᤵᤐᤠ. ᤁᤣ᤺ᤶᤒᤠ ᤏᤢ ᤕᤖᤡᤰ ᤐᤖᤡᤰᤐᤠ ᤁᤢᤓᤖᤠ ᤁᤢᤔᤠᤰᤗᤠ ᤁᤢᤶᤒᤪᤡᤰ ᤁᤧᤕᤢᤱᤒᤠ ᤔᤕᤠ ᤌᤡᤰ ᤗᤧᤒᤏᤠᤏᤀᤥ ᤕᤧᤖᤥ॥ ᤂᤧᤸᤗᤧ ᤛᤠᤶᤔᤠᤱᤛᤡᤱᤸᤗᤧ ᤁᤢᤛᤶᤔᤡᤴ ᤕᤢᤰᤋᤢᤖᤥ॥

⁴ ᤜᤧᤰᤁᤩᤠᤱ ᤂᤧᤸᤗᤧ ᤁᤧᤖᤧᤰᤏᤢ᤺ᤸᤗᤧ ᤁᤢᤛᤶᤔᤥᤒᤠ ᤁᤢᤒᤥᤖᤠᤰᤁᤡᤴ ᤑᤢ᤹ᤖᤢᤖᤥ. ᤗᤧᤱᤜᤱ ᤁᤧᤈᤥ᤺ᤰᤐᤠᤜᤠ᤹ᤖᤧ ᤔᤧᤎᤡᤶᤛᤢᤒᤠ ᤗᤠᤈᤣ᤹ᤀᤥ ᤂᤧᤸᤗᤧ ᤂᤧᤴ ᤐᤰᤂᤢ ᤋᤣ᤹ᤖᤢᤖᤥ॥ ᤗᤧᤱᤜᤱᤒᤠᤜᤠ᤹ᤖᤧ ᤂᤢᤴᤇᤡ᤹ ᤐᤠᤱᤈᤢᤶᤔᤥ ᤂᤧᤴ ᤗᤣ᤺ᤳᤋᤢᤖᤥ॥

⁵ ᤗᤠᤈᤣ᤹ᤗᤠᤶ ᤂᤧᤸᤗᤧ ᤁᤢᤗᤡ᤺ᤶᤒᤠᤈᤡ ᤋᤣ᤹ᤖᤢᤖᤥ. ᤜᤧᤰᤁᤩᤠᤱ ᤆᤠᤃᤧᤏᤢ᤹ᤒᤠ ᤏᤢᤒᤠ ᤂᤠᤶᤔᤥ ᤂᤧᤴ ᤗᤣ᤺ᤳᤋᤢᤖᤥ. ᤂᤢᤏᤧ᤹ ᤋᤠᤶᤍᤠᤶᤒᤠ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥ ᤂᤧᤴ ᤕᤢᤰᤂᤢᤖᤥ. ᤂᤧᤵᤔᤥ ᤐᤥᤖᤥ᤺ᤰᤛᤡᤱᤔᤠ ᤜᤧᤰᤁᤣ ᤐᤥᤔᤠ ᤛᤢᤰᤋᤧᤖᤥ॥

⁶ ᤁᤸᤗᤧ ᤂᤧᤵᤔᤥ ᤁᤢᤛᤠ᤺ᤵ ᤗᤡᤱᤛᤧᤖᤥ ᤜᤧᤰᤁᤩᤠᤱ ᤔᤢ ᤐᤥᤖᤧᤀᤠᤱ ᤁᤧᤍᤠᤵᤐᤠ ᤆᤧᤸᤗᤧᤰᤛᤣ᤹ ᤐᤥ᤺ᤰᤂᤧᤖᤥ॥ ᤁᤸᤗᤧ ᤁᤢᤒᤥᤖᤠᤰᤜᤠ᤹ ᤁᤡ᤺ᤳᤌᤧᤴ ᤗᤧᤵᤔᤠᤱ ᤌᤠ᤺ᤱ ᤜᤡᤛᤡᤱᤗᤥ ᤜᤧᤰᤁᤩᤠᤱ ᤁᤸᤗᤧ ᤁᤢᤛᤠ᤺ᤵᤜᤠ᤹ ᤂᤠᤶᤒᤠᤱᤅᤥ ᤔᤢ ᤐᤥᤖᤧᤒᤣᤖᤥ॥ ᤁᤸᤗᤧ ᤁᤧᤎᤢᤶᤒᤠ ᤁᤢᤒᤥᤖᤠᤰᤜᤠ᤹ ᤗ᤺ᤴᤍᤧᤖᤥ. ᤜᤧᤰᤁᤩᤠᤱ ᤁᤢᤈ᤺ᤰᤜᤠ᤹ ᤗᤡᤱᤛᤧ ᤗ᤺ᤴᤍᤧᤖᤥ॥

⁷ ᤁᤖ ᤕᤶᤒᤠ ᤁᤢᤗᤠᤵ ᤁᤧᤒᤵᤐᤠ ᤏᤢ ᤐᤖᤡᤰ ᤐᤖᤡᤰᤐᤠ ᤁᤢᤓᤖᤠ ᤁᤢᤔᤠᤰᤗᤠ ᤁᤢᤶᤒᤪᤡᤰ ᤁᤧᤕᤢᤱᤒᤠ ᤗᤳᤇᤠ ᤘᤣ᤹ ᤕᤶᤒᤠ ᤔᤕᤠ ᤌᤡᤰ ᤕᤧᤖᤥ॥ ᤂᤧᤸᤗᤧᤆᤥᤃᤢᤸᤗᤧ ᤀᤠᤸᤗ ᤆᤧᤸᤗᤧᤰᤛᤣᤸᤗᤧ ᤆᤫᤠ᤺ᤳ ᤂᤥᤔᤠᤖᤧ ᤗᤠᤃᤡ ᤁᤢᤛᤠ᤺ᤵᤜᤠ᤹ ᤏᤢ ᤁᤢᤒᤥᤖᤠᤰᤜᤠ᤹ ᤂᤢᤏᤧ᤹ ᤗᤧᤵᤔᤠᤱ ᤐᤥᤖᤧᤒᤣᤖ ᤕᤠ᤺ᤴᤍᤢᤖᤥ.

⁸ ᤜᤧᤰᤁᤣᤃ ᤂᤧᤴ ᤆᤧᤸᤗᤧᤰᤛᤣ᤹ᤀᤡᤴ ᤐᤏᤢᤏᤢᤖᤡᤰ ᤐᤥᤔᤠ ᤛᤢᤰᤗ ᤜᤧᤰᤁᤩᤠᤱ ᤕᤖᤡᤰ ᤁᤢᤓᤧᤰᤘᤠ ᤏᤢ ᤁᤢᤈᤠ ᤁᤧᤏᤢ᤹ᤒᤠ ᤁᤢᤈᤠ᤹ ᤌᤥ᤺ᤰᤗ ᤑᤠ᤹ᤀᤠᤱ ᤁᤴ ᤋᤃᤡᤛᤠ ᤏᤢᤒᤠ ᤂᤠᤶᤔᤥ ᤔᤧᤗᤣ᤺ᤳᤋᤢᤀᤠᤱ ᤕᤢᤅᤧᤖᤥ ᤂᤧᤒᤩᤠᤱ ᤆᤫᤠ᤺ᤳᤋᤡᤸᤗᤧ ᤕᤥᤖᤢᤀᤠᤱ ᤕᤢᤅᤧᤖᤥ॥

⁹ “ᤂᤧᤸᤗᤧᤆᤥᤃᤢᤸᤗᤧ ᤀᤠᤸᤗ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠᤴ ᤛᤣ᤺ᤴᤍᤥ ᤆᤥᤃᤢᤖᤥ— ᤌᤣ ᤁᤴ ᤆᤧᤸᤗᤧᤰᤛᤣ᤹ᤀᤡᤴ ᤐᤥᤀᤠᤱ ᤆᤠ᤹ᤒᤡ᥅ ᤔᤣ᤺ᤴ᥄ ᤁᤴ ᤁᤢᤛᤠ᤺ᤵᤜᤠ᤹ ᤏᤢ ᤁᤧᤖᤧᤰ ᤀᤠᤱᤃᤠ᤹ ᤜᤠ᤹ᤕᤠᤰ ᤀᤠ᤺ᤰᤂᤢᤱᤍᤣᤛᤢᤱᤗᤥ᥄ ᤀᤠᤱᤃᤠ᤹ ᤁᤸᤗᤧ ᤁᤢᤈᤠ᤹ᤜᤠ᤹ ᤆᤩᤧᤵᤋᤢᤱ ᤌᤠᤛᤢᤱᤗᤥ ᤜᤧᤰᤁᤩᤠᤱ ᤁᤸᤗᤧ ᤁᤢᤓᤧᤰᤘᤠᤜᤠ᤹ ᤀᤡᤖᤧᤶᤔᤠᤱ ᤛᤡᤖᤖᤥ॥ ᤀᤠᤱᤃᤠ᤹ ᤁᤴ ᤁᤧᤎᤢᤶᤒᤠ ᤜᤢᤰ ᤔᤣ᤺ᤴᤏᤣ ᤀᤡᤃᤪ ᤕᤖᤡᤰ ᤌᤰᤛᤢᤒᤠᤜᤠ᤹ ᤔᤣ᤺ᤴᤏᤣ ᤁᤢᤀᤠ᤺ᤱᤏᤢ᤹ᤖ ᤀᤠ᤺ᤰᤂᤢᤱᤍᤣᤛᤢᤱᤗᤥ॥

¹⁰ ᤁᤖ ᤌᤣ ᤆᤧᤸᤗᤧᤰᤛᤣ᤹ᤀᤡᤴ ᤆᤵᤔᤧᤸᤗᤧ ᤁᤸᤗᤧ ᤁᤢᤈᤠ᤹ ᤌᤥ᤺ᤰᤔᤠ ᤛᤢᤰᤐᤡ᥅ ᤔᤣ᤺ᤴ. ᤏᤠᤱᤃᤧᤴ ᤐᤡᤛᤠᤱᤒᤠ ᤛᤢᤖᤡ᤺ᤳᤋᤡᤸᤗᤧ ᤔᤢ᤺ᤳᤋᤢᤸᤗᤧ ᤁᤴ ᤛᤷᤃᤧᤱ ᤀᤡᤖᤧᤶᤒᤣ᤺ᤰᤗᤥ॥ ᤁᤴ ᤏᤢᤖᤡᤰ ᤋᤠᤖᤡᤰ ᤐᤥᤖᤧᤀᤠᤱ ᤕᤢᤅᤧᤒᤠ ᤜᤠᤒᤠ ᤂᤧᤴ ᤏᤢᤒᤠ ᤂᤠᤶᤔᤥ ᤁᤴ ᤛᤡᤖᤥ॥”

ᤂᤧᤍᤠ᤺ᤸᤗᤧ ᤁᤢᤒᤣ

¹¹ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠᤗᤠᤶ ᤁᤴ ᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤁᤧᤖᤧ—

¹² “ᤀᤡᤛᤪᤠᤀᤡᤗᤒᤠ ᤁᤴ ᤐᤡᤑᤩᤢᤱᤒᤠᤜᤠ᤹ ᤔᤧᤳᤋᤧᤛᤧ᤹—ᤁᤴ ᤁᤡ᤺ᤳᤌᤜᤠ᤹ᤖᤧ ᤂᤢᤴᤇᤡ᤹ ᤋᤠ᤹ᤍᤡ᤺ᤸᤗᤧ ᤁᤢᤒᤣᤴ ᤌᤣ ᤂᤡᤏᤡ᤹ ᤁᤢᤛᤡᤱ ᤁᤧᤴᤏᤡ᤺ᤳᤋᤢᤶᤔᤧᤶᤒᤡ᥅ ᤒᤣᤒᤡᤗᤥᤏᤒᤠ ᤜᤠᤱᤅᤡᤴ ᤕᤖᤢᤛᤗᤧ᤺ᤶᤔᤥ ᤑᤧᤖᤧ. ᤜᤧᤰᤁᤩᤠᤱ ᤂᤧᤵᤔᤥᤒᤠ ᤜᤠᤱᤅᤡᤴ ᤏᤢ ᤕᤢᤰᤛᤠᤒᤠᤜᤠ᤹ ᤒᤣᤒᤡᤗᤥᤏᤀᤥ ᤋᤣ᤹ᤖᤢᤛᤡ॥

¹³ ᤂᤢᤏᤧ᤹ ᤜᤠᤱᤜᤡᤶᤛᤕᤱᤒᤠ ᤗᤳᤇᤠ ᤐᤠᤛᤡᤱᤐᤠᤍᤠᤱ ᤌᤡᤰᤏᤢ ᤏᤠᤍᤱ ᤆᤥᤃᤢ ᤜᤧᤰᤁᤩᤠᤱ ᤂᤢᤏᤧ᤹ ᤗᤧᤵᤔᤠᤱ ᤛᤠᤰᤁᤧᤸᤗᤧᤰ ᤂᤧᤴ ᤔᤠᤱᤜᤧᤰ ᤆᤥ᤺ᤰᤔᤠ ᤐᤠᤱᤄᤢ॥ ᤂᤢᤏᤧ᤹ ᤀᤡᤛᤪᤠᤀᤡᤗᤒᤠ ᤛᤠ᤹ᤖᤡᤰ ᤁᤧᤕᤧᤰᤐᤠ ᤗᤠᤶᤗᤥᤒᤠᤜᤠ᤹ᤀᤠᤱ ᤋᤧᤶᤛᤢ ᤋᤣ᤹ᤖᤢᤛᤡ॥

¹⁴ ᤜᤧᤰᤁᤣᤗ᤹ᤖᤡᤰ ᤀᤡᤛᤪᤠᤀᤡᤗᤧᤴ ᤕᤠᤶᤔᤥ ᤁᤧᤎᤢᤶᤒᤠ ᤔᤧᤒᤥᤱᤏᤧᤴᤗ ᤜᤧᤰᤁᤩᤠᤱ ᤐᤡᤑᤩᤢᤱ ᤔᤧᤈᤥ᤺ᤰᤏᤧᤴᤗ॥ ᤒᤣᤒᤡᤗᤥᤏᤧᤴᤏᤢ ᤏᤠᤍᤱ ᤆᤥᤃᤢᤒᤠ ᤐᤠ᤺ᤴᤏᤡᤴ ᤂᤢᤏᤧ᤹ ᤀᤡ᤺ᤳᤋᤢ ᤏᤠ᤺ᤳᤋᤢᤀᤠᤱᤗᤰ ᤀᤡᤛᤪᤠᤀᤡᤗᤧᤴ ᤋᤠᤱᤔᤠ ᤛᤢᤰᤗ॥

¹⁵ “ᤜᤧᤰᤁᤣᤛᤠᤱ ᤁᤴ ᤀᤡᤛᤪᤠᤀᤡᤗᤒᤠ ᤜᤠᤱ ᤜᤡᤶᤛᤕᤱᤅᤥᤒᤠ ᤔᤏᤠ᤺ᤸᤗᤧ ᤀᤠᤳᤋᤠᤋᤠᤴᤏᤣ ᤕᤖᤡᤰ ᤌᤰᤛᤢᤒᤠᤜᤠ᤹ ᤏᤢ ᤕᤖᤡᤰ ᤀᤴᤜᤠ᤹ᤖᤧ ᤗᤠᤃᤡ ᤐᤣᤗᤡ ᤑᤠᤰᤛᤧ ᤔᤡᤛᤪᤀᤥ ᤜᤠᤱᤗᤠᤀᤡᤱᤒᤠᤜᤠ᤹ ᤐᤠᤱᤄᤢᤛᤡᤀᤠᤱ ᤒᤣᤒᤡᤗᤥᤏᤖᤧ ᤁᤢᤍᤰᤗᤧᤱᤘᤠᤀᤥ ᤐᤡᤑᤩᤢᤱ ᤆᤥᤃᤢ॥ ᤌᤣ ᤀᤡᤛᤪᤠᤀᤡᤗᤖᤧ ᤂᤢᤏᤧ᤹ ᤔᤠᤱᤜᤧᤰ ᤆᤥᤃᤢᤒᤠ ᤐᤠ᤺ᤴᤍᤱᤜᤠ᤹ ᤜᤧᤰᤁᤣᤗ᤹ᤖᤡᤰ ᤑᤣ᤺ᤴᤍᤢᤀᤠᤱ ᤁᤴᤗᤠᤶ ᤂᤢᤏᤧ᤹ ᤔᤠ᤺ᤱᤄᤠ ᤐᤥᤱᤔᤠ ᤛᤢᤰᤐᤡ᥅

¹⁶ ᤔᤣ᤺ᤴ᥄ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤁᤢᤜᤡᤱᤘᤧᤳ ᤘᤠ᤹ᤀᤠᤒᤠ ᤁᤢᤀᤡᤛᤡᤰ. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤴ ᤒᤣᤒᤡᤗᤥᤏᤀᤥ ᤛᤡᤖᤥ. ᤌᤣᤀᤠᤱᤓᤧᤸᤗᤧ ᤜᤠᤱᤅᤡᤸᤗᤧ ᤁᤢᤗᤠᤈᤣ᤹ᤀᤥ ᤕᤢᤰᤛᤠᤒᤠ ᤁᤧᤈᤥ᤺ᤰᤐᤠ ᤏᤢ ᤂᤢᤏᤧ᤹ ᤆᤥᤃᤢᤒᤠ ᤏᤠᤍᤱ ᤐᤠ᤺ᤴᤏᤡᤴ ᤂᤧᤸᤗᤧ ᤁᤢᤏᤠᤔᤧᤴᤇᤠ᤹ ᤆᤥᤃᤢᤀᤠᤱ ᤑᤣ᤺ᤴᤍᤢ॥

¹⁷ ᤒᤣᤒᤡᤗᤥᤏᤒᤠ ᤜᤠᤱᤅᤡᤸᤗᤧ ᤕᤠᤶᤔᤥ ᤕᤖᤢᤛᤗᤧ᤺ᤶᤔᤡᤴ ᤌᤱᤅᤥ ᤁᤡᤷᤃᤵ ᤁᤒᤢᤸᤗᤧ ᤗᤢᤱᤎᤠᤰ ᤗᤢ᤺ᤶᤔᤠ ᤆᤴᤈᤶᤒᤠᤍᤧᤴᤜᤠ᤹ ᤏᤢ ᤗᤢᤱᤎᤠᤰ ᤗᤢ᤺ᤶᤔᤠ ᤛᤡᤱᤀᤠ᤺ᤳᤜᤠ᤹ ᤆᤥᤃᤢ᤹ ᤜᤧᤰᤁᤩᤠᤱ ᤕᤖᤡᤰ ᤔᤏᤠᤜᤠ᤹ ᤛᤧᤖᤢᤛᤡᤸᤗᤧ ᤑᤠᤖᤥᤴ ᤏᤢ ᤂᤢᤏᤧ᤹ ᤔᤢᤰᤛᤠᤶᤒᤠ ᤁᤢᤎᤰᤛᤢᤒᤠᤜᤠ᤹ᤖᤧ ᤀᤡᤛᤪᤠᤀᤡᤗᤧᤴ ᤑᤠ᤹ᤔᤠ ᤔᤧᤴᤇᤢᤰᤋᤢᤴ॥

¹⁸ ᤌᤣᤀᤠᤱᤓᤧᤸᤗᤧ ᤀᤡᤛᤪᤠᤀᤡᤗᤒᤠ ᤜᤠᤱᤅᤡᤸᤗᤧ ᤂᤧᤸᤗᤧ ᤆᤥᤃᤢᤒᤠ ᤏᤠᤍᤱ ᤐᤠ᤺ᤴᤏᤡᤴ ᤁᤢᤏᤠᤔᤧᤴᤇᤠ᤹ ᤔᤧᤳᤋᤢ ᤜᤧᤰᤁᤩᤠᤱ ᤂᤧᤴ ᤀᤡ᤺ᤵᤔᤠ ᤏᤠ᤺ᤵᤔᤠᤖᤧ ᤗᤠᤃᤡ ᤆᤥᤃᤢᤒᤠ ᤁᤢᤔᤠᤱᤜᤧᤰᤁᤡᤴ ᤑᤣ᤺ᤴᤍᤢ. ᤂᤧᤸᤗᤧᤆᤥᤃᤢᤸᤗᤧ ᤂᤢᤏᤧ᤹ ᤂᤧᤳᤇᤡᤱᤔᤠ ᤔᤧᤄᤥᤏᤧᤴ॥

¹⁹ “ᤂᤧᤸᤗᤧᤆᤥᤃᤢᤸᤗᤧ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤀᤠᤱᤃᤠ᤹ ᤁᤢᤜᤡᤱᤘᤧᤳ ᤘᤠ᤹ᤀᤠᤒᤠ ᤁᤢᤀᤡᤛᤡᤰ. ᤂᤢᤏᤧ᤹ ᤔᤠᤱᤜᤢᤵᤐᤡᤴ ᤑᤣ᤺ᤴᤍᤢᤒᤠ ᤏᤢ ᤀᤠᤱᤃᤠ᤹ ᤀᤠᤔᤡᤱᤅᤥ ᤆᤥᤃᤢᤒᤠ ᤔᤠᤱᤜᤧᤰᤁᤡᤴ ᤁᤢᤏᤠᤔᤧᤴᤇᤠ᤹ ᤔᤧᤳᤋᤢᤒᤠᤸᤗᤧ ᤁᤢᤗᤧᤰᤘᤠ ᤀᤠᤱᤃᤠ᤹ ᤂᤢᤏᤧ᤹ ᤂᤢᤶᤍᤡᤱ ᤐᤡᤖᤢᤱ᤹॥

²⁰ ᤀᤠᤱᤃᤠ᤹ ᤀᤠᤕᤥ᤺ᤱᤅᤡᤴ ᤂᤢᤏᤧ᤹ ᤁᤢᤛᤶᤎᤠᤱ ᤗᤠᤵᤑᤣᤛᤢᤱ᤹ ᤜᤧᤰᤁᤩᤠᤱ ᤀᤠᤀᤡᤈᤥᤀᤥ ᤂᤧᤴ ᤌᤠᤛᤢᤱ᤹॥ ᤀᤠᤱᤃᤠ᤹ ᤂᤢᤏᤧ᤹ ᤒᤣᤒᤡᤗᤥᤏᤀᤥ ᤑᤧᤳᤋᤢᤱ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤆᤥᤃᤢᤒᤠ ᤁᤴ ᤀᤡᤱᤗᤧᤰ ᤏᤛᤠ᤺ᤴᤏᤡᤸᤗᤧ ᤁᤢᤗᤧᤰᤘᤠ ᤂᤢᤏᤧ᤹ ᤂᤠᤛᤧᤴ ᤆᤥᤃᤢᤱ᤹॥

²¹ ᤜᤧᤰᤁᤩᤠᤱ ᤂᤧᤸᤗᤧ ᤁᤧᤖᤧᤰᤏᤢ᤺ᤸᤗᤧ ᤏᤢᤒᤠ ᤁᤢᤎᤰᤛᤢᤒᤠᤜᤠ᤹ ᤌᤱᤅᤥ ᤔᤧᤛᤧᤖᤢᤛᤡ᤹. ᤜᤧᤰᤁᤩᤠᤱ ᤁᤧᤜᤡᤱᤒᤠᤜᤠ᤹ ᤁᤧᤖᤧᤰ ᤐᤡᤛᤠᤱ ᤛᤢᤖᤡᤳ ᤁᤣᤈᤱᤅᤥ ᤑᤢᤳᤇᤡᤱᤈᤩᤠᤱ ᤔᤧᤛᤧᤛᤢ ᤔᤧᤍᤣᤛᤢᤛᤡ॥ ᤂᤧᤒᤩᤠᤱ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤴ ᤐᤠᤖᤠᤱᤅᤠᤱ ᤘᤠ᤹ᤀᤠ ᤑᤠ᤹ᤀᤠᤱ ᤂᤡᤏᤡ᤹ ᤏᤡᤱᤘᤠ᤹ ᤁᤧᤄᤥᤛᤢᤶᤗᤥ॥”

ᤏᤡᤱᤛᤠᤱ ᤆᤥ᤺ᤰᤔᤠ ᤔᤠᤱᤜᤢᤵ

²² “ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖᤥ— ‘ᤗᤳᤇᤠ ᤁᤣ᤺ᤶᤒᤠ ᤛᤠᤶᤔᤠᤱᤛᤡᤱᤸᤗᤧ ᤁᤢᤛᤶᤔᤥᤗᤠᤶ ᤗᤳᤇᤠ ᤁᤢᤈᤱ ᤌᤡᤰ ᤀᤠᤱᤃᤠ᤹ ᤋᤣ᤹ᤖᤢᤱᤗᤥ. ᤜᤧᤰᤁᤩᤠᤱ ᤁᤧᤖᤧᤰᤏᤢ᤺ᤸᤗᤧ ᤁᤣ᤺ᤶᤒᤠ ᤁᤥ᤺ᤰᤔᤠᤸᤗᤧ ᤁᤢᤈᤱᤅᤥ ᤂᤧᤴ ᤗᤣ᤺ᤳᤋᤢᤱᤗᤥ॥

²³ ᤀᤠᤱᤃᤠ᤹ ᤀᤡᤛᤪᤠᤀᤡᤗᤒᤠ ᤁᤧᤖᤧᤰᤏᤢ᤺ᤸᤗᤧ ᤁᤣ᤺ᤶᤒᤠ ᤌᤧᤃᤢ᤺ᤸᤗᤧ ᤁᤢᤈᤱᤅᤥ ᤂᤧᤴ ᤗᤣ᤺ᤳᤋᤢᤱᤗᤥ॥ ᤁᤴ ᤛᤠ᤹ᤖᤡᤰ ᤐᤕᤶ ᤕᤶᤒᤠ ᤛᤠᤶᤔᤠᤱᤛᤡᤱ ᤐᤥᤱᤗᤥ ᤁᤸᤗᤧ ᤁᤢᤒᤥᤖᤠᤰᤜᤠ᤹ ᤛᤧᤀᤠᤱ ᤁᤢᤛᤣ᤹ ᤌᤥ᤺ᤰᤗᤥ ᤁᤧᤖᤧᤰ ᤐᤖᤡᤰᤐᤠ ᤐᤢᤜᤠ᤹ᤖᤧ ᤁ᤹ᤕᤥ ᤜᤠᤵ ᤔᤧᤈᤥᤃᤢᤖᤥ॥ ᤁᤸᤗᤧ ᤁᤢᤒᤥᤖᤠᤰᤜᤠ᤹ᤖᤧ ᤀᤡ᤺ᤵᤋᤢᤒᤠᤍᤧᤴᤜᤠ᤹ᤀᤥ ᤂᤧᤱᤜᤠ᤹ᤖᤧ ᤀᤡ᤺ᤶᤛᤡᤱᤔᤠᤍᤧᤴ ᤔᤧᤄᤥᤛᤢᤖᤥ॥

²⁴ ᤜᤧᤰᤁᤩᤠᤱ ᤁᤣ᤺ᤶᤒᤠ ᤛᤡᤱᤒᤢᤱᤅᤡᤴ ᤕᤥᤕᤥᤰ ᤁᤧᤀᤠ᤺ᤵᤐᤠ ᤏᤢ ᤋᤠᤱᤒᤠ ᤛᤡᤱᤒᤢᤱᤅᤡᤴ ᤁᤣ᤺ᤶᤒᤠ ᤁᤧᤈᤥ᤺ᤰᤐᤠ. ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤁᤧᤖᤧᤰ ᤛᤡᤱᤒᤢᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢᤖᤥ॥ ᤛᤖᤣ᤺ᤰᤕᤠ᤺ᤵᤐᤠ ᤛᤡᤱᤒᤢᤱᤅᤡᤴ ᤁᤧᤜᤣᤒᤠ ᤁᤧᤈᤥ᤺ᤰᤐᤠ ᤏᤢ ᤁᤧᤜᤣᤒᤠ ᤛᤡᤱᤒᤢᤱᤅᤡᤴ ᤁᤢᤜᤡᤱᤘᤧᤳ ᤁᤧᤈᤥ᤺ᤰᤐᤠ ᤀᤠᤱᤃᤠ᤹ᤀᤣᤖᤥ॥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤴ ᤐᤠᤖᤠᤱᤅᤠᤱ ᤘᤠ᤹ᤖᤥ. ᤂᤶᤒᤩᤠᤱ ᤀᤠᤱᤃᤠ᤹ ᤐᤠ᤺ᤳᤋᤢᤱᤒᤠᤴ ᤆᤥᤃᤢᤱᤅᤣᤖᤥ᥄’”