ᤀᤡᤈᤁᤡᤀᤣᤗ 16 - LIFOTNTᤕᤖᤢᤛᤗᤧ᤺ᤶᤔᤡᤸᤗᤧ ᤁᤢᤏᤛᤠᤴ ᤜᤥ᤺ᤵᤔᤠ 1 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤴᤗᤠᤶ ᤘᤣ᤹ ᤀᤡᤱᤄᤱᤎᤡᤰ ᤀᤠᤱᤃᤠ᤹ᤀᤥ ᤁᤧᤖᤧ— 2 “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤏᤠᤀᤣ. ᤕᤖᤢᤛᤗᤧ᤺ᤶᤔᤡᤸᤗᤧ ᤆᤥᤃᤢᤒᤠ ᤕᤠᤶᤃᤧᤛᤡᤱᤒᤠ ᤁᤢᤗᤠᤕᤥᤜᤠ᤹ ᤀᤥ᤺ᤴᤎᤠᤰᤋᤧ᤹॥ 3 ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤗᤠᤶᤒᤠᤒᤠ ᤁᤴ ᤀᤡᤱᤄᤱᤅᤡᤴ ᤂᤧᤴ ᤔᤧᤳᤋᤧ᤹—ᤂᤧᤏᤧ᤹ ᤌᤣᤏᤧᤀᤠᤱ ᤔᤣ᤺ᤴ ᤁᤖ ᤗᤳᤇᤠ ᤁᤏᤠᤏᤡᤏᤧ᥄ ᤂᤧᤏᤧ᤹ ᤁᤧᤶᤒᤠ ᤀᤣᤔᤥᤖᤡ ᤘᤕᤧ ᤜᤧᤰᤁᤩᤠᤱ ᤁᤧᤶᤔᤠ ᤜᤡᤳᤋᤡ ᤘᤕᤧ॥ 4 ᤂᤧᤏᤧ᤹ ᤛᤠᤃᤧᤘᤠ᤺ᤴᤇᤡᤱᤒᤠ ᤕᤧᤴᤏᤥ ᤂᤧᤏᤧ᤹ ᤀᤠᤳᤋᤡᤸᤗᤧᤀᤠᤱ ᤁᤶᤒᤪᤠᤱ ᤁᤧᤶᤔᤧᤳᤋᤧᤴ॥ ᤂᤧᤏᤧ᤹ ᤁᤧᤒᤧ᤹ᤜᤡ᤺ᤴ ᤔᤧᤴᤜᤧᤰᤁᤣ ᤐᤳᤇᤧ. ᤜᤧᤰᤁᤩᤠᤱ ᤂᤧᤏᤧ᤹ ᤀᤠᤵᤑᤠᤸᤗᤧᤀᤠᤱ ᤘᤠᤃᤧᤔᤧᤴᤗᤢ᤺ᤵᤛᤧᤴ. ᤕᤢᤶ ᤁᤧᤔᤧᤴᤜᤢ᤺ᤳᤋᤧᤴ. ᤂᤧᤒᤩᤠᤱ ᤋᤣᤳᤋᤥᤀᤠᤱ ᤁᤧᤔᤧᤴᤃᤡᤳᤋᤧᤴ॥ 5 ᤜᤠ᤺ᤳᤗᤧᤀᤠᤱ ᤂᤧᤏᤧ᤹ ᤀᤥᤔᤧᤵᤔᤠᤖᤧ ᤗᤠᤃᤡ ᤆᤒᤧ᤺ᤳᤇᤡᤰᤌᤡᤰᤁᤠᤱ ᤏᤡᤱᤘᤠ᤹ ᤔᤧᤈᤥᤃᤢᤴ. ᤜᤠ᤺ᤳᤗᤧᤀᤠᤱ ᤂᤧᤏᤧ᤹ ᤁᤢᤗᤢᤱᤔᤠ᤹ ᤛᤩᤠ᤺ᤳ ᤁᤧᤴᤗ᤹ᤖᤧᤴ ᤀᤡᤃᤪ ᤁᤶᤒᤪᤠᤱ ᤁᤧᤶᤔᤧᤳᤋᤧᤴ॥ ᤂᤧᤏᤧ᤹ ᤛᤠᤃᤧᤘᤠ᤺ᤴᤇᤡᤱᤒᤠ ᤕᤧᤴᤏᤥ ᤜᤠ᤺ᤳᤗᤧᤀᤠᤱ ᤁᤢᤛᤡᤖᤠ᤹ ᤁᤧᤴᤎᤠᤅᤧᤴ. ᤀᤡᤰᤋᤠᤵᤐᤥ ᤗᤠᤵᤁᤧᤶᤍᤣᤛᤧ. ᤂᤧᤒᤩᤠᤱ ᤁᤧᤛᤡᤖ ᤑᤠ᤹ᤀᤠᤱ ᤁᤧᤶᤗᤧᤖᤧ ᤁᤧᤶᤏᤧᤛ᤻ᤛᤧ॥ 6 “ᤁᤖ ᤀᤠᤱᤃᤠ᤹ ᤂᤧ᤹ᤕᤥ ᤋᤩᤠᤱᤅᤡᤸᤗᤧ. ᤐᤵᤐᤪᤠ᤹ᤔᤠ ᤂᤧᤏᤧ᤹ ᤀᤠᤵᤑᤣᤰ ᤁᤧᤔᤠᤰᤂᤡ᤹ᤀᤥ ᤗᤠᤱᤃᤧᤎᤡᤰᤛᤡᤱᤅᤠᤱ ᤁᤧᤏᤧᤛ᤻ᤛᤧᤒᤠ ᤏᤡᤏᤧ॥ ᤂᤧᤏᤧ᤹ ᤂᤧᤵᤔᤥ ᤁᤧᤏᤧᤛ᤻ᤛᤧᤸᤗᤧ ᤀᤠᤱᤃᤠ᤹ ᤔᤧᤳᤏᤧ. ‘ᤂᤧᤏᤧ᤹ ᤜᤡᤅᤧ᤹॥’ 7 ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤡᤰᤋᤠᤵᤐᤥᤒᤠ ᤛᤡᤱᤒᤢᤱ ᤁᤢᤀᤡᤛᤡᤰ ᤂᤧᤏᤧ᤹ ᤜᤢᤖᤢᤶᤗᤢᤶ ᤐᤥᤔᤠ ᤌᤠᤱᤔᤠ ᤑᤠ᤹ᤏᤧ॥ ᤂᤧᤏᤧ᤹ ᤁᤧᤒᤥᤖᤧᤀᤠᤱ ᤔᤢᤎᤡᤱ ᤜᤧᤰᤁᤣ ᤏᤢᤔᤠ ᤁᤧᤒᤥ᤺ᤰᤂᤧ॥ ᤂᤧᤏᤧ᤹ ᤁᤧᤏᤢᤒᤰᤜᤠ᤹ ᤕᤶᤒᤕᤶᤒᤠ ᤐᤥ᤺ᤰᤂᤧ ᤜᤧᤰᤁᤩᤠᤱ ᤁᤧᤎᤣᤃᤣᤰ ᤀᤡ᤺ᤴ ᤁᤣ᤺ᤶᤒᤠ ᤐᤥ᤺ᤰᤂᤧ. ᤁᤖ ᤂᤧᤏᤧ᤹ ᤀᤠᤸᤗ ᤌᤠᤖᤡᤰᤛᤠᤱ ᤗᤧᤰᤆᤠᤒᤧᤎᤡ᤺ᤰ ᤁᤧᤘᤕᤧ॥ 8 ᤜᤧᤰᤁᤩᤠᤱ ᤀᤠᤱᤃᤠ᤹ ᤕᤠᤶᤔᤥ ᤗᤠᤱᤄᤣᤃᤠᤱᤅᤡᤸᤗᤧ. ᤂᤧᤏᤧ᤹ ᤏᤠᤏᤢ᤹ᤔᤠ ᤁᤧᤕᤧᤶ ᤁᤧᤖᤧᤒᤠ ᤏᤡᤏᤧ॥ ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤈᤠᤱᤅᤡᤸᤗᤧ ᤂᤧᤏᤧ᤹ ᤗᤧᤰᤆᤠᤒᤢᤎᤢ᤺ᤰᤐᤠ ᤁᤧᤎᤰᤁᤡᤴ ᤋᤧᤵᤋᤢᤱ ᤐᤡᤏᤧ ᤜᤧᤰᤁᤩᤠᤱ ᤂᤧᤏᤧ᤹ᤏᤢ ᤔᤣ᤺ᤰᤂᤡᤶ ᤆᤥ᤺ᤰᤔᤠ ᤔᤠᤱᤜᤧᤰ ᤆᤥᤃᤢᤱ॥ ᤀᤠᤱᤃᤠ᤹ ᤂᤧᤏᤧ᤹ᤏᤢ ᤔᤠᤱᤜᤢᤵᤐᤠᤱ ᤆᤥᤃᤢᤱ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. ᤂᤧᤒᤩᤠᤱ ᤂᤧᤏᤧ᤹ ᤀᤠᤱᤃᤠ᤹ᤀᤡᤴ ᤁᤧᤒᤥ᤺ᤰᤂᤧ॥ 9 “ᤂᤧᤒᤩᤠᤱ ᤀᤠᤱᤃᤠ᤹ ᤂᤧᤏᤧ᤹ ᤘᤠᤖᤢᤶᤏᤧ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤔᤠᤰᤂᤡᤴ ᤘᤠᤜᤵᤋᤢᤱ ᤐᤡᤏᤧ. ᤂᤶᤓᤩᤠᤱ ᤂᤧᤏᤧ᤹ ᤁᤧᤎᤰᤁᤥ ᤆᤤᤋᤢᤏ ᤏᤡ᤺ᤱᤃᤣ᤹ ᤜᤢ᤺ᤳᤋᤢᤱ ᤐᤡᤏᤧ॥ 10 ᤀᤠᤱᤃᤠ᤹ ᤂᤧᤏᤧ᤹ ᤁᤧᤄᤧᤶᤛᤡᤱᤒᤠ ᤁᤢᤓᤢᤱ ᤀᤡᤛᤣ᤺ᤱᤒᤠ. ᤁᤢᤔᤧᤴ ᤁᤧᤄᤡ᤺ᤰᤐᤠ ᤏᤤᤏᤠᤛᤢᤳ ᤏᤢ ᤁᤢᤔᤧᤴ ᤁᤧᤄᤡ᤺ᤰᤐᤠ ᤆᤠᤱ. ᤜᤧᤰᤁᤩᤠᤱ ᤆᤢᤴᤈᤢᤶᤒᤠ ᤔᤧ᤺ᤴᤍᤠᤜᤥᤖᤡᤰᤗᤠᤶ ᤋᤔᤏᤠᤒᤠ ᤗᤠᤱᤛᤢ᤺ᤵ ᤐᤡᤏᤧ॥ 11 ᤀᤠᤱᤃᤠ᤹ ᤂᤧᤏᤧ᤹ ᤛᤡᤖᤠ᤹ᤃᤧᤎᤠᤱᤒᤠ ᤔᤢᤎᤡᤱ ᤀᤡᤛᤣ᤺ᤱᤒᤠ ᤛᤠᤔᤠ. ᤜᤢᤰᤐᤠ᤺ᤱᤃᤡᤜᤠ᤹. ᤏᤢᤒᤠ ᤁᤠᤴᤎᤡᤜᤠ᤹. 12 ᤂᤧᤏᤧ᤹ ᤁᤧᤴᤒᤥᤀᤥ ᤔᤢᤴᤍᤪᤡ. ᤁᤧᤏᤧᤰᤂᤥ᤹ᤀᤥ ᤁᤢᤴᤍᤢᤸᤗᤥ ᤘᤠ᤺ᤳᤏᤧ ᤜᤧᤰᤁᤩᤠᤱ ᤁᤧᤎᤣᤃᤣ᤺ᤰᤁᤥ ᤛᤡᤖᤠ᤹ᤃᤧᤎᤠᤱᤒᤠ ᤋᤡᤆ ᤂᤢ᤺ᤰᤏᤧ॥ 13 ᤜᤧᤰᤁᤩᤠᤱ ᤀᤰᤂᤣᤗ᤹ᤖᤡᤰ ᤂᤧᤏᤧ᤹ ᤛᤠᤶᤔᤩᤠᤱ ᤏᤢ ᤕᤢᤵᤐᤠ᤺ᤸᤗᤧ ᤁᤧᤗᤧ᤺ᤰᤛᤡᤱ॥ ᤂᤧᤏᤧ᤹ ᤁᤧᤈᤠᤱᤜᤠ᤹ ᤆᤢᤴᤈᤢᤶᤒᤠ ᤏᤤᤏᤠᤛᤢᤳ ᤜᤧᤰᤁᤩᤠᤱ ᤁᤢᤔᤧᤴ ᤁᤧᤄᤡ᤺ᤰᤐᤠ ᤆᤡᤖᤡᤰ ᤏᤢ ᤐᤄᤧᤶ ᤁᤧᤄᤧᤶᤒᤠ ᤁᤢᤓᤢᤱ ᤀᤡᤛᤣ᤺ᤱᤒᤠ ᤘᤕᤧ॥ ᤌᤱᤔᤏᤠᤒᤠ ᤑᤣ᤹ᤖᤢᤶ. ᤛᤰᤘᤠᤄᤢ. ᤐᤧ᤺ᤱᤘᤠᤗᤡ᤺ᤳᤇᤣ᤹ ᤏᤡ᤺ᤱᤃᤣ᤹ ᤏᤢ ᤁᤠᤰᤏᤢ᤺ᤸᤗᤧ ᤏᤢᤒᤠ ᤁᤢᤈᤠᤜᤠ᤹ ᤁᤧᤈ. ᤜᤧᤰᤁᤩᤠᤱ ᤋᤃᤡᤏᤢ᤺ᤸᤗᤧ ᤛᤠ᤹ᤖᤡᤰ ᤐᤏᤢᤏᤢᤔᤠ ᤁᤧᤒᤥ᤺ᤰᤂᤧ. ᤂᤧᤏᤧ᤹ ᤜᤠᤱᤔᤠ ᤜᤧᤰᤋᤱᤔᤠ ᤏᤡᤃᤧᤍᤧᤳᤋᤧ. ᤂᤧᤒᤩᤠᤱ ᤜᤧᤰᤁᤣᤗ᤹ᤖᤡᤰᤁᤣ ᤂᤧᤏᤧ᤹ ᤁᤧᤘᤕᤧ᥄ 14 ᤂᤧᤏᤧ᤹ ᤛᤠ᤹ᤖᤡᤰ ᤏᤢᤔᤠ ᤁᤧᤈᤥᤃᤧᤒᤠᤸᤗᤧ ᤆᤥᤃᤢᤸᤗᤧ ᤂᤧᤏᤧ᤹ ᤁᤧᤔᤡᤱᤅᤡᤴ ᤁᤧᤖᤧᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤜᤠᤖᤠᤀᤣ ᤀᤡᤅᤧ॥ ᤀᤠᤱᤃᤠ᤹ ᤀᤠᤜᤠᤱᤘᤠ᤺ᤸᤗᤧ ᤂᤧᤏᤧ᤹ ᤂᤢ᤺ᤰᤏᤧ ᤜᤧᤰᤁᤩᤠᤱ ᤂᤧᤏᤧ᤹ ᤏᤢᤔᤠ ᤁᤧᤄᤧᤶᤛᤡᤱᤔᤠᤴ ᤁᤢᤗᤡᤱᤍᤥ ᤁᤧᤳᤋᤢᤱ ᤐᤡᤏᤧ. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹॥ 15 “ᤁᤖ ᤂᤧᤏᤧ᤹ ᤁᤧᤄᤧᤶᤛᤡᤱᤔᤧᤴ ᤏᤢ ᤁᤧᤍᤡ᤺ᤵᤐᤠ ᤁᤧᤔᤡᤱᤅᤡᤴ ᤁᤧᤳᤏᤡᤔᤠ ᤕᤠ᤺ᤶᤒᤰ ᤆᤥ᤺ᤰᤔᤠᤖᤧ ᤗᤠᤃᤡ ᤂᤧᤏᤧ᤹ ᤀᤥᤃᤵ ᤁᤧᤈᤥᤃᤢ॥ ᤜᤧᤰᤁᤣᤗ᤹ᤖᤡᤰ ᤁᤧᤍᤠᤍᤠᤒᤠ ᤔᤏᤠᤜᤠ᤹ ᤂᤧᤏᤧ᤹ ᤆᤠᤖᤠᤶᤔᤠ ᤕᤠ᤺ᤶᤒᤰ ᤆᤥ᤺ᤰᤔᤠ ᤁᤧᤒᤡᤖᤢᤛᤡ॥ ᤂᤧᤏᤧ᤹ ᤐᤏᤢᤏᤢᤔᤠ ᤁᤧᤄᤧᤶᤛᤡᤱᤔᤠᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠ᤺ᤳᤐᤠ᤺ᤳ ᤐᤥ᤺ᤰᤂᤧᤀᤠᤱ ᤘᤕᤧ॥ 16 ᤂᤧᤏᤧ᤹ ᤁᤧᤈᤠᤖᤠᤶᤔᤠ ᤕᤠ᤺ᤶᤒᤰ ᤆᤥ᤺ᤰᤔᤠᤍᤧᤴᤏᤥ ᤀᤠᤱᤃᤠ᤹ ᤂᤧᤏᤧ᤹ ᤐᤡᤏᤧᤒᤠ ᤛᤡᤖᤠ᤹ᤃᤧᤎᤠᤱᤒᤠ ᤐᤠ᤺ᤴᤜᤠ᤹ ᤏᤠᤘᤠᤀᤡᤳᤗᤠᤜᤠ᤹ᤖᤧ ᤗᤠᤃᤡ ᤔᤠᤱᤎᤠ᤺ᤴᤜᤠ᤹ ᤆᤥ᤺ᤰᤔᤠᤖᤧ ᤗᤠᤃᤡ ᤀᤥᤃᤵ ᤁᤧᤈᤥᤃᤢ॥ ᤏᤛᤠ᤺ᤴᤏᤣ ᤆᤥ᤺ᤰᤔᤠ ᤛᤢᤰᤔᤧᤴᤍᤧᤳᤋᤣ᥄ ᤀᤠᤵᤑᤠᤸᤗᤧ ᤀᤰᤋᤱᤒᤠ ᤐᤠ᤺ᤴᤜᤠ᤹ ᤐᤥᤱᤔᤠ ᤛᤢᤰᤋᤧᤒᤠᤒᤣ᥅ 17 ᤀᤠᤱᤃᤠ᤹ ᤂᤧᤏᤧ᤹ ᤐᤡᤏᤧᤀᤠᤱ ᤘᤕᤧᤒᤠ ᤔᤢᤎᤡᤱ ᤀᤡᤛᤣ᤺ᤱᤒᤠ ᤛᤠᤔᤠᤜᤠ᤹ ᤏᤢ ᤛᤠᤶᤔᤩᤠᤱ ᤕᤢᤵᤐᤠ ᤘᤠ᤺ᤳᤋᤡᤜᤠ᤹ ᤂᤧᤏᤧ᤹ ᤁᤧᤍᤣ᤹ᤖᤢ. ᤜᤧᤰᤁᤩᤠᤱ ᤕᤧᤶᤒᤡᤳᤇᤠ ᤀᤡᤳᤜᤠ᤹ ᤁᤧᤈᤥᤃᤢ ᤂᤶᤓᤩᤠᤱ ᤂᤧᤱᤜᤠ᤹ ᤔᤠᤱᤛᤧᤘᤠ ᤁᤧᤔᤧᤳᤋᤢᤛᤡ॥ ᤁᤱᤃ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤁᤧᤳᤏᤡᤔᤠ ᤕᤠ᤺ᤶᤒᤰᤗᤥ᥄ 18 ᤀᤠᤱᤃᤠ᤹ ᤐᤡᤏᤧᤒᤠ ᤁᤢᤓᤢᤱ ᤀᤡᤛᤣ᤺ᤱᤒᤠ ᤆᤠᤱᤜᤠ᤹ ᤁᤧᤍᤣ᤹ᤖᤢᤀᤠᤱ ᤂᤧᤏᤧ᤹ ᤏᤠᤘᤠᤀᤡᤳᤗᤠᤜᤠ᤹ ᤁᤧᤈᤠᤰᤋᤢᤛᤡ॥ ᤂᤧᤒᤩᤠᤱ ᤀᤠᤱᤃᤠ᤹ ᤏᤢᤒᤠ ᤀᤠᤒᤣ᤺ᤱᤘᤠᤗᤡ᤺ᤳᤇᤣ᤹ ᤏᤡ᤺ᤱᤃᤣ᤺ᤴ ᤏᤢ ᤛᤢᤰᤐᤠᤜᤠ᤹ ᤂᤧᤱᤜᤠ᤹ ᤛᤧᤘᤠ ᤔᤧᤵᤔᤠᤛᤡᤖᤧ ᤗᤠᤃᤡ ᤁᤧᤕᤠᤅᤢ॥ 19 ᤂᤧᤏᤧ᤹ ᤀᤡ᤺ᤳᤇᤡᤱ ᤛᤠ᤹ᤛᤡᤱᤅᤧ᤹᥄ ᤀᤠᤱᤃᤠ᤹ ᤂᤧᤏᤧ᤹ ᤐᤡᤏᤧᤀᤠᤱ ᤘᤕᤧᤒᤠ ᤏᤢᤒᤠ ᤑᤣ᤹ᤖᤢᤶ. ᤐᤧ᤺ᤱᤘᤠᤗᤡ᤺ᤳᤇᤣ᤹ ᤏᤡ᤺ᤱᤃᤣ᤹ ᤏᤢ ᤛᤰᤘᤠᤄᤢᤴ ᤛᤡᤍᤢᤱᤈᤓᤠ ᤜᤧᤰᤁᤣ ᤂᤧᤴ ᤏᤠᤘᤠᤀᤡᤳᤜᤠ᤹ ᤋᤃᤡ ᤁᤧᤏᤧᤛ᤻ᤛᤢ. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹॥ 20 “ᤂᤧᤒᤩᤠᤱ ᤀᤠᤱᤃᤠ᤹ ᤀᤠᤗᤠᤃᤡ ᤂᤧᤏᤧ᤹ ᤕᤧᤶᤒᤡᤳᤇᤠᤛᤠᤜᤠ᤹ ᤏᤢ ᤔᤧᤴᤇᤢᤔᤠ ᤛᤠᤜᤠ᤹ ᤛᤠᤃᤧᤘᤠ᤺ᤴᤍᤢᤛᤡᤒᤠᤀᤠᤱ ᤔᤧᤘᤕᤧ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤏᤠᤘᤠᤀᤡᤳᤗᤠᤜᤠ᤹ᤀᤥ ᤂᤧᤱᤜᤠ᤹ ᤛᤡᤍᤢᤱᤈᤓᤠ ᤁᤧᤈᤥᤃᤢᤛᤡ॥ ᤌᤣ ᤂᤧᤏᤧ᤹ ᤁᤧᤳᤏᤡᤔᤠ ᤆᤥ᤺ᤰᤔᤠ ᤁᤧᤕᤠ᤺ᤶᤒᤰᤁᤡᤸᤗᤧ ᤁᤧᤕᤥᤖᤧᤀᤠᤱ ᤔᤧᤘᤕᤧᤴᤒᤡ᥅ 21 ᤂᤧᤏᤧ᤹ ᤀᤠᤱᤃᤠ᤹ ᤀᤠᤛ᤻ᤛᤠᤜᤠ᤹ ᤏᤠᤘᤠᤀᤡᤳᤗᤠᤜᤠ᤹ᤀᤥ ᤛᤡᤍᤢᤱᤈᤓᤠ ᤁᤧᤍᤥ᤺ᤴᤍᤢᤛᤡᤀᤠᤱ ᤁᤧᤛᤧᤖᤢᤛᤡᤒᤡ᥅ 22 ᤂᤧᤏᤧ᤹ ᤆᤠᤖᤠᤶᤔᤠ ᤕᤠ᤺ᤶᤒᤰ ᤁᤧᤈᤥᤃᤢᤒᤠ ᤏᤢ ᤕᤠᤶᤃᤧᤛᤡᤱᤒᤠ ᤗᤠᤕᤥ ᤁᤧᤈᤥᤃᤢᤒᤠ ᤁᤧᤖᤧᤰ ᤋᤱᤒᤣᤜᤠ᤹ᤀᤥ ᤂᤧᤏᤧ᤹ ᤀᤠᤵᤑᤣᤰ ᤁᤧᤔᤠᤰᤂᤡ᤹ᤀᤥ ᤗᤠᤱᤃᤧᤎᤡᤰᤛᤡᤱᤒᤠ ᤏᤢ ᤀᤡᤰᤋᤠᤵᤐᤥ ᤗᤧᤰᤆᤠᤒᤧᤎᤡ᤺ᤰ ᤁᤧᤏᤧᤛ᤻ᤛᤧᤒᤠ ᤕᤧᤴᤏᤡᤴ ᤂᤧᤏᤧ᤹ ᤌᤡᤰᤗᤧᤱᤅᤠᤱ ᤏᤡᤱᤘᤠ᤹ ᤁᤧᤴᤀᤡ᤺ᤳᤋᤢᤴᤗᤥ॥ 23 “ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. ‘ᤂᤧᤏᤧ᤹ᤃ ᤁᤧᤈᤡ᤺ᤳᤋᤧ ᤁᤧᤛᤩᤧᤖᤥ॥ ᤂᤧᤏᤧ᤹ ᤘᤣ᤹ ᤁᤧᤓᤧᤴᤕᤠ᤺ᤒᤰᤜᤠ᤹ᤏᤢ ᤛᤥᤛᤥᤖᤡᤰ. 24 ᤘᤣ᤹ ᤛᤠᤶᤔᤠᤱ ᤛᤧᤘᤠᤔᤧᤵᤔᤠᤍᤧᤴ ᤔᤠᤱᤎᤠ᤺ᤴ ᤁᤧᤈᤥᤃᤢ ᤜᤧᤰᤁᤩᤠᤱ ᤕᤧᤰᤕᤰᤁᤥᤒᤠ ᤁᤧᤖᤧᤰ ᤁᤧᤀᤡᤒᤠᤍᤧᤴᤜᤠ᤹ᤀᤥ ᤏᤠᤘᤠᤀᤡᤳᤗᤠᤜᤠ᤹ᤖᤧ ᤗᤠᤃᤡ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ ᤁᤧᤈᤥᤃᤢ॥ 25 ᤆᤰᤔᤧᤸᤗ᤹ᤔᤏᤠᤒᤠ ᤁᤧᤳᤏᤡᤔᤠ ᤆᤥ᤺ᤰᤔᤠ ᤁᤧᤕᤠ᤺ᤶᤒᤰᤁᤥ ᤗᤠᤱᤃᤧᤄᤣ᤺ᤰᤐᤠᤜᤠ᤹ ᤁᤧᤖᤧᤰ ᤂᤧᤏᤧ᤹ ᤁᤧᤎᤰᤁᤡᤴ ᤁᤧᤒᤡᤖᤢᤛᤡᤀᤠᤱ ᤁᤧᤖᤧᤰ ᤔᤠᤖᤠᤶᤜᤠ᤹ᤖᤧ ᤁᤢᤛᤢᤰᤐᤥ ᤂᤧᤏᤧ᤹ ᤁᤧᤄᤧᤶᤛᤡᤱᤔᤧᤴ ᤁᤧᤈᤡ᤺ᤴᤍᤢ॥ 26 ᤂᤧᤒᤩᤠᤱ ᤂᤧᤏᤧ᤹ ᤗᤢᤱᤔᤠ᤹ ᤁᤧᤜᤡ᤺ᤵᤋᤢᤛᤡᤒᤠᤜᤠ᤹ᤀᤥ ᤔᤣ᤺ᤳ ᤁᤧᤃᤥ᤺ᤵᤐᤠ ᤔᤡᤛᤪᤒᤠ ᤔᤏᤠᤜᤠ᤹ ᤁᤧᤕᤥ᤹ᤖᤢᤛᤡ. ᤁᤧᤳᤏᤡᤔᤠ ᤆᤥ᤺ᤰᤔᤠ ᤁᤧᤕᤠ᤺ᤶᤒᤰᤁᤡᤴ ᤁᤧᤓᤥᤛᤢᤀᤠᤱ ᤀᤠᤱᤃᤠ᤹ ᤀᤠᤛᤡᤰ ᤁᤧᤓᤥ᤺ᤰᤂᤢ॥ 27 ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤀᤠᤜᤢᤰᤁᤡᤸᤗᤧ ᤛᤠ᤺ᤶᤏᤧᤀᤠᤱ ᤌᤰᤏᤧ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤀᤡ᤺ᤴᤍᤥᤜᤠ᤹ ᤕᤢᤶᤛᤢᤱ ᤐᤡᤏᤧ॥ ᤀᤠᤱᤃᤠ᤹ ᤂᤧᤏᤧ᤹ ᤁᤧᤏᤡᤱᤔᤡ ᤐᤗᤡᤛ᤻ᤋᤡᤜᤠ᤹ᤀᤥ ᤜᤢᤰᤛᤢᤵᤏᤧ. ᤂᤧᤏᤧ᤹ ᤁᤧᤕᤠᤶᤒᤥ᤺ᤵᤔᤠ ᤁᤧᤕᤧᤵᤗᤧᤰᤁᤡᤸᤗᤧ ᤂᤧᤱᤜᤠ᤹ᤀᤠᤱ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧ॥ 28 ᤂᤧᤏᤧ᤹ ᤀᤛ᤻ᤛᤢᤖᤡᤜᤠ᤹ᤏᤢᤀᤠᤱ ᤀᤠᤵᤑᤣᤰ ᤁᤧᤳᤏᤡᤔᤠ ᤕᤠ᤺ᤶᤒᤰ ᤁᤧᤈᤥᤃᤢᤀᤠᤱ ᤘᤠ᤹॥ ᤀᤠᤵᤑᤠᤸᤗᤧᤀᤠᤱ ᤁᤢᤛᤱ ᤗᤢᤱᤔᤠ᤹ ᤁᤧᤜᤡ᤺ᤵᤋᤢᤛᤡᤒᤠᤜᤠ᤹ ᤂᤧᤏᤧ᤹ ᤕᤖᤡᤰ ᤂᤥᤔᤠ ᤁᤧᤴᤇᤢᤰᤋᤢᤴᤇᤡᤴ ᤜᤧᤰᤁᤣ ᤗ᤹᥄ ᤜᤧᤰᤁᤩᤠᤱ ᤂᤧᤵᤔᤥ ᤂᤧᤏᤧ᤹ ᤁᤧᤳᤏᤡᤔᤠ ᤕᤠ᤺ᤶᤒᤰ ᤁᤧᤈᤥᤃᤢᤀᤠᤱ ᤀᤣᤃᤠᤱ. ᤀᤠᤸᤗᤛᤠᤱ ᤂᤧᤏᤧ᤹ ᤁᤧᤏᤡᤱᤘᤠ᤹ ᤔᤧᤴᤍᤠᤀᤣ ᤁᤧᤘᤕᤧ॥ 29 ᤂᤧᤏᤧ᤹ ᤗᤧᤱᤜᤱ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ ᤒᤣᤒᤡᤗᤥᤏᤧᤴ ᤁᤧᤜᤧᤵᤋᤢᤀᤠᤱ ᤗᤢᤱᤔᤠ᤹ ᤁᤧᤜᤡ᤺ᤵᤋᤢᤛᤡᤒᤠᤜᤠ᤹ ᤁᤧᤕᤥ᤹ᤖᤢᤛᤡ. ᤁᤖ ᤀᤠᤸᤗᤛᤠᤱ ᤂᤧᤏᤧ᤹ ᤁᤧᤏᤡᤱᤘᤠ᤹ ᤔᤧᤍᤧᤏᤧᤴ॥ 30 “‘ᤛᤡᤖᤡᤱ ᤔᤧᤶᤔ᤺ᤶᤏᤠᤔᤠ ᤁᤧᤳᤏᤡᤔᤠᤸᤗᤧ ᤆᤥᤃᤢᤒᤠ ᤜᤧᤰᤁᤣ. ᤂᤧᤏᤧ᤹ ᤀᤰᤋᤱᤒᤠ ᤐᤠ᤺ᤴᤜᤠ᤹ ᤆᤥ᤺ᤰᤔᤠᤖᤧ ᤗᤠᤃᤡ ᤂᤧᤏᤧ᤹ ᤀᤠᤰᤂᤣᤍᤱᤒᤠ ᤗᤢᤱᤔᤠ᤹ ᤜᤡ᤺ᤶᤔᤠ ᤛᤡᤰᤗᤢᤱᤔᤠ᤹ ᤁᤧᤃᤳᤋᤢᤒᤣ. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹॥ 31 ᤁᤧᤖᤧᤰ ᤔᤠᤖᤠᤶᤜᤠ᤹ᤖᤧ ᤁᤢᤛᤢᤰᤐᤠᤜᤠ᤹ᤀᤥ ᤘᤣ᤹ ᤁᤧᤔᤠᤱᤜᤠ᤹ᤖᤧ ᤔᤠᤱᤎᤠ᤺ᤴᤜᤠ᤹ ᤏᤢ ᤁᤧᤖᤧᤰ ᤀᤡᤗᤠᤶᤜᤠ᤹ᤀᤥ ᤏᤠᤘᤠᤀᤡᤳᤗᤠᤜᤠ᤹ᤖᤧ ᤗᤠᤃᤡ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ ᤁᤧᤈᤥᤃᤢ॥ ᤛᤧᤰᤂᤠ᤺ᤸᤗᤧ. ᤂᤧᤏᤧ᤹ᤃ ᤛᤠ᤹ᤖᤡᤰ ᤗᤠᤕᤥ ᤆᤥ᤺ᤰᤔᤠ ᤁᤢᤛᤡᤖᤠ᤹ ᤁᤧᤎᤠᤱᤔᤠ. ᤁᤧᤳᤏᤡᤔᤠ ᤕᤠ᤺ᤶᤒᤰᤁᤡᤸᤗᤧ ᤁᤢᤔᤧᤴᤏᤠᤱ ᤔᤧᤴᤏᤠ᤺ᤰᤔᤏᤠᤔᤠ ᤁᤧᤳᤏᤡᤔᤠᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤋᤠᤵᤑᤧ᤺ᤶᤔᤠ ᤁᤧᤒᤥᤰᤂᤧᤀᤠᤱ ᤁᤧᤘᤠ᤹॥ 32 ᤀᤥᤖᤥ. ᤂᤧᤏᤧ᤹ᤃ ᤀᤠᤵᤑᤣᤰ ᤁᤢᤕᤧᤶᤒᤠ᤺ᤴᤏᤢ᤺ᤸᤗᤧ ᤁᤢᤛᤡᤱ ᤏᤡ᤺ᤳᤔᤧᤴᤍᤧᤵᤔᤏᤠᤒᤠᤜᤠ᤹ ᤁᤧᤃᤵᤔᤠ ᤆᤠᤖᤠᤶᤔᤠ ᤕᤠ᤺ᤶᤒᤰ ᤁᤧᤈᤥ᤺ᤰᤔᤠ ᤔᤣ᤺ᤳᤏᤧᤖᤥ॥ 33 ᤁᤧᤳᤏᤡᤔᤠᤜᤠ᤹ᤖᤧᤃ ᤂᤢᤴᤇᤡ᤹ ᤕᤠ᤺ᤶᤒᤰᤁᤡᤸᤗᤧ ᤁᤢᤔᤧᤴ ᤔᤧᤍᤠ᤺ᤰᤋᤢ. ᤁᤖ ᤂᤧᤏᤧ᤹ᤃ ᤁᤧᤴᤍᤠ᤺ᤰᤋᤢᤴ᥄ ᤂᤧᤏᤧ᤹ᤃ ᤗᤢᤱᤔᤠ᤹ ᤁᤧᤜᤡ᤺ᤵᤋᤢᤛᤡᤒᤠᤜᤠ᤹ ᤋᤠᤔᤠᤀᤠᤱ ᤂᤧᤏᤧ᤹ᤏᤢ ᤀᤡᤶᤔᤠᤖᤧ ᤗᤠᤃᤡ ᤛᤢᤖᤢᤋᤩᤠᤱ ᤁᤧᤒᤡᤖᤢᤛᤡᤀᤠᤱ ᤔᤡᤰᤋᤥ᤺ᤰᤜᤠ᤹ ᤁᤧᤒᤡᤖᤢᤛᤡ॥ 34 ᤁᤸᤗᤧᤆᤥᤃᤢᤸᤗᤧ ᤂᤧᤏᤧ᤹ᤃ ᤘᤣ᤹ ᤁᤧᤳᤏᤡᤔᤠᤜᤠ᤹ᤏᤢ᤺ᤸᤗᤧ ᤋᤠᤱᤃᤪᤠᤳᤆᤡ ᤐᤖᤡᤰᤔᤠ ᤁᤧᤈᤥᤰ॥ ᤗᤢᤱᤔᤠ᤹ ᤁᤧᤜᤡ᤺ᤵᤋᤢᤛᤡᤒᤠᤜᤠ᤹ᤖᤧ ᤁᤢᤔᤧᤴ ᤂᤧᤏᤧ᤹ ᤐᤡᤔᤠᤖᤧ ᤁᤢᤗᤧᤰᤘᤠ ᤂᤧᤏᤧ᤹ᤏᤡ ᤂᤧᤱᤜᤠ᤹ ᤁᤢᤔᤧᤴ ᤁᤧᤒᤡᤖᤢᤛᤡᤖᤥ᥄ ᤕᤖᤢᤛᤗᤧᤔ ᤕᤧᤰᤕᤰᤁᤡᤴ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤂᤢᤶᤍᤡᤱ ᤐᤡᤖᤢ 35 “‘ᤂᤧᤸᤗᤧᤆᤥᤃᤢᤸᤗᤧ ᤁᤧᤳᤏᤡᤔᤠᤀᤣ. ᤕᤜᤘᤣ ᤍᤠᤱᤒᤠᤗᤠᤶ ᤁᤴ ᤀᤡᤱᤄᤱᤅᤡᤴ ᤂᤧᤏᤧ᤹ ᤂᤧᤵᤛᤧ᤹᥄ 36 ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤂᤧᤏᤧ᤹ ᤁᤧᤕᤠᤶᤛᤥᤔᤧᤴ ᤗᤠ᤺ᤰᤁᤠᤳ ᤁᤧᤗ᤺ᤳᤋᤢᤀᤠᤱ ᤁᤧᤳᤏᤡᤔᤠ ᤁᤧᤕᤠ᤺ᤶᤒᤰᤁᤡᤴ ᤁᤧᤖᤧᤰ ᤗᤢᤱᤔᤠ᤹ ᤁᤧᤜᤡ᤺ᤵᤋᤢᤛᤡᤒᤠᤜᤠ᤹ ᤀᤠᤵᤑᤣᤰ ᤀᤥ᤺ᤴᤃᤧᤎᤠᤰᤋᤢᤛᤡᤒᤠᤸᤗᤧ ᤆᤥᤃᤢᤸᤗᤧ. ᤜᤧᤰᤁᤩᤠᤱ ᤂᤧᤏᤧ᤹ ᤕᤠᤶᤃᤧᤛᤡᤱᤒᤠ ᤏᤠᤘᤠᤀᤡᤳᤗᤠᤜᤠ᤹ ᤛᤧᤘᤠ ᤁᤧᤔᤧᤳᤋᤢᤛᤡᤀᤠᤱ ᤁᤧᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ. ᤂᤶᤓᤩᤠᤱ ᤂᤧᤏᤧ᤹ ᤁᤧᤔᤠᤱᤜᤠ᤹ᤀᤥ ᤛᤡᤍᤢᤱᤈᤓᤠ ᤁᤢᤀᤡᤛᤡᤰ ᤂᤧᤏᤧ᤹ ᤁᤧᤛ᤻ᤛᤠᤜᤠ᤹ ᤁᤧᤛᤧᤖᤢᤛᤡᤒᤠᤸᤗᤧ ᤆᤥᤃᤢᤸᤗᤧ. 37 ᤀᤠᤱᤃᤠ᤹ ᤀᤰᤂᤣ ᤆᤥ᤺ᤰᤔᤠ ᤆᤥᤃᤢᤱ᤹॥ ᤂᤧᤏᤧ᤹ᤏᤢ ᤛᤥᤖᤡᤰ ᤗᤠᤕᤥ ᤁᤧᤈᤥ᤺ᤰᤐᤠᤀᤠᤱ ᤁᤧᤘᤠ᤹ᤒᤠ ᤂᤧᤏᤧ᤹ ᤗᤢᤱᤔᤠ᤹ ᤁᤧᤜᤡ᤺ᤵᤋᤢᤛᤡᤒᤠ ᤂᤧᤏᤧ᤹ ᤁᤧᤈᤢᤶ ᤁᤧᤍᤧ᤺ᤱᤜᤠ᤹. ᤂᤧᤏᤧ᤹ ᤗᤢᤱᤔᤠ᤹ ᤁᤧᤍᤢᤰᤋᤢᤛᤡᤒᤠ ᤏᤢ ᤁᤧᤈᤡ᤺ᤳᤋᤢᤛᤡᤒᤠ ᤁᤧᤖᤧᤰ ᤀᤠᤱᤃᤠ᤹ ᤛᤥᤖᤡᤰ ᤛᤢᤵᤛᤢᤱᤛᤡᤱ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤂᤧᤏᤧ᤹ ᤗᤧᤰᤆᤠ᤹ᤒᤢᤎᤢᤰ ᤑᤧᤴᤏᤧ᤹ ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤀᤍᤰᤋᤰ ᤀᤥᤔᤧᤵᤔᤠ ᤁᤧᤶᤛᤢᤰ॥ 38 ᤀᤠᤱᤃᤠ᤹ ᤂᤧᤏᤧ᤹ ᤆᤠᤖᤠᤶᤔᤠ ᤕᤠ᤺ᤶᤒᤰ ᤁᤧᤈᤥᤃᤢᤒᤠ ᤏᤢ ᤔᤏᤠ ᤁᤧᤛᤧᤖᤢᤛᤡᤒᤠᤸᤗᤧ ᤁᤢᤗᤧᤰᤘᤠ ᤂᤢᤶᤍᤡᤱ ᤐᤡᤏᤧ॥ ᤀᤠᤱᤃᤠ᤹ ᤀᤠᤏᤠᤜᤧᤶᤔᤠ ᤀᤠᤛᤠᤰᤁᤧᤴᤏᤡᤸᤗᤧ ᤂᤧᤏᤧ᤹ ᤔᤠᤰᤂᤡ᤹ᤑᤢᤔᤠᤸᤗᤧ ᤗᤧ᤺ᤰᤏᤧ॥ 39 ᤂᤧᤒᤩᤠᤱ ᤂᤧᤏᤧ᤹ ᤗᤢᤱᤔᤠ᤹ ᤁᤧᤜᤡ᤺ᤵᤋᤢᤛᤡᤒᤠ ᤁᤴ ᤕᤖᤡᤰ ᤛᤢᤘᤠᤱᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥ ᤂᤧᤏᤧ᤹ ᤌᤠᤏᤧ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤁᤧᤶᤔᤧᤱ᤹॥ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤘᤣ᤹ ᤁᤧᤔᤠᤱᤜᤠ᤹ᤖᤧ ᤗᤠᤃᤡᤒᤠ ᤔᤠᤱᤎᤠ᤺ᤴᤜᤠ᤹ ᤏᤢ ᤁᤧᤏᤠᤘᤠᤀᤡᤳᤗᤠᤜᤠ᤹ᤖᤧ ᤗᤠᤃᤡ ᤗᤧᤳᤋᤡ ᤋᤥ᤺ᤶᤔᤠᤍᤧᤴᤜᤠ᤹ ᤔᤧᤗᤢ᤺ᤴᤍᤢ ᤔᤧᤎᤠᤛᤢ᤹॥ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤗᤧᤰᤆᤠ᤹ ᤁᤧᤶᤓᤧᤴ᤹ ᤜᤧᤰᤁᤩᤠᤱ ᤐᤏᤢᤏᤢᤒᤠ ᤁᤧᤛᤠᤔᤠᤜᤠ᤹ ᤔᤧᤍᤣ᤹ᤖᤢᤀᤠᤱ ᤂᤧᤏᤧ᤹ ᤗᤧᤰᤆᤠᤒᤧᤎᤡ᤺ᤰ ᤁᤧᤶᤗᤧᤳ ᤁᤧᤶᤎᤠᤖᤥ॥ 40 ᤂᤧᤱᤜᤠ᤹ᤖᤧ ᤗᤢᤱᤅᤡᤸᤗᤧ ᤐ᤺ᤵᤔᤠ ᤏᤢ ᤋᤠᤓᤣᤜᤠ᤹ᤖᤧ ᤐᤠᤰᤗᤧ ᤐᤠᤰᤗᤧ ᤆᤩᤧᤵᤔᤠᤖᤧ ᤗᤠᤃᤡ ᤂᤧᤏᤧ᤹ ᤗᤳᤇᤠ ᤜᤕᤱ ᤁᤡᤸᤗᤡᤱᤅᤥ ᤀᤡᤁᤧᤶᤄᤣ᤺ᤱ᤹॥ 41 ᤂᤧᤱᤜᤠ᤹ᤖᤧ ᤕᤖᤡᤰ ᤔᤧᤴᤇᤢᤔᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡ ᤂᤧᤏᤧ᤹ ᤁᤧᤜᤡᤶᤜᤠ᤹ ᤔᤡᤔᤧᤎᤡᤰᤂᤢ ᤁᤧᤶᤒᤡ ᤜᤧᤰᤁᤩᤠᤱ ᤂᤧᤏᤧ᤹ ᤂᤢᤶᤍᤡᤱ ᤁᤧᤶᤒᤡ॥ ᤀᤠᤱᤃᤠ᤹ ᤂᤧᤏᤧ᤹ ᤁᤧᤃᤧᤳᤏᤡᤔᤠ ᤆᤥ᤺ᤰᤔᤠ ᤁᤧᤕᤠ᤺ᤶᤒᤰᤁᤡᤴ ᤛᤠᤰᤋᤢᤱ ᤐᤡᤏᤧ ᤂᤧᤒᤩᤠᤱ ᤕᤖᤡᤰ ᤁᤧᤛᤡᤖᤠ᤹ ᤁᤧᤎᤠᤱᤒᤠᤜᤠ᤹ ᤆᤠᤛᤢᤱ ᤐᤡᤔᤠᤛᤡ ᤁᤧᤕᤠ᤺ᤶᤒᤰᤁᤡᤴ ᤏᤢᤵᤛᤢᤱ ᤐᤡᤏᤧ॥ 42 “‘ᤂᤧᤒᤩᤠᤱ ᤁᤢᤏᤢᤵᤔᤥ ᤂᤧᤏᤧ᤹ ᤁᤧᤍᤰᤗᤧᤱᤘᤠᤀᤥᤒᤠ ᤀᤠᤱᤃᤠ᤹ ᤀᤠᤕᤠ᤺ᤰᤗᤧ᤹ᤔᤠᤴ ᤏ᤺ᤶᤏ᤺ᤶ ᤐᤥᤱ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤏᤠᤜᤧᤶᤔᤠ ᤀᤠᤛᤡᤰᤁᤧᤴ ᤆᤡ᤺ᤰᤋᤢ᤹॥ ᤀᤠᤱᤃᤠ᤹ ᤏ᤺ᤶᤏ᤺ᤶᤒᤠ ᤐᤥᤱᤅᤠ ᤜᤧᤰᤁᤩᤠᤱ ᤀᤠᤸᤗᤀᤠᤱᤎᤥ ᤀᤠᤱᤃᤠ᤹ ᤂᤧᤏᤧ᤹ᤏᤢ ᤀᤠᤕᤠᤰ ᤔᤧᤗᤧ᤹ᤏᤧᤴ॥ 43 ᤂᤧᤏᤧ᤹ ᤁᤧᤘᤧᤶᤔᤧᤴ ᤏᤡᤱᤘᤠ᤹ ᤔᤧᤴᤀᤡ᤺ᤳᤋᤣ ᤁᤧᤘᤕᤧ ᤁᤖ ᤁᤴ ᤁᤧᤖᤧᤰ ᤋᤠᤵᤑᤧ᤺ᤶᤒᤠ ᤐᤠ᤺ᤴᤜᤠ᤹ ᤁᤧᤈᤥᤃᤢᤀᤠᤱ ᤀᤠᤱᤃᤠ᤹ ᤀᤠᤛᤡᤰ ᤁᤧᤓᤥ᤺ᤰᤂᤢᤀᤠᤱ ᤘᤕᤧᤒᤠᤸᤗᤧ ᤆᤥᤃᤢᤸᤗᤧ. ᤀᤠᤱᤃᤠ᤹ ᤂᤧᤏᤧ᤹ ᤁᤧᤈᤥᤃᤢᤒᤠ ᤁᤧᤖᤧᤰ ᤗᤠᤕᤥᤜᤠ᤹ᤖᤧ ᤁᤢᤗᤧᤰᤘᤠ ᤏᤢ᤺ᤰᤋᤢᤱ ᤐᤡᤏᤧ. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹॥ ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤧᤖᤧᤰ ᤕᤠᤶᤃᤧᤛᤡᤱᤒᤠ ᤕᤠᤶᤒᤥ᤺ᤵᤔᤠ ᤁᤧᤗᤠᤕᤥᤜᤠ᤹ᤀᤥ ᤆᤡ᤺ᤴᤈᤡ᤺ᤴ ᤁᤧᤄᤢᤒᤠ ᤕᤠ᤺ᤶᤒᤰᤜᤠ᤹ ᤁᤧᤕᤥ᤹ᤖᤢᤀᤠᤱ ᤘᤠ᤹ᤖᤥ॥’” ᤁᤢᤶᤔᤠ ᤜᤧᤰᤋᤱᤔᤠ ᤁᤢᤛ᤻ᤛᤠ 44 “ᤂᤧᤏᤧ᤹ ᤁᤧᤕᤠ᤺ᤶᤒᤣᤀᤥ ᤁᤧᤒᤠ᤺ᤵᤐᤠ ᤁᤧᤖᤧᤰᤗᤧ ᤂᤧᤏᤧ᤹ ᤋᤠ᤹ᤍᤡ ᤁᤧᤶᤈᤥ᤺ᤰᤁᤠᤱ ᤀᤰᤂᤣ ᤔᤧᤒᤠ᤺ᤳᤋᤢ. ‘ᤀᤠᤰᤋᤱᤔᤠ ᤁᤢᤶᤔᤠ. ᤜᤧᤰᤋᤱᤔᤠᤀᤣ ᤁᤢᤛ᤻ᤛᤠ॥’ 45 ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ᤀᤠᤱ ᤁᤧᤶᤔᤠ ᤜᤧᤰᤋᤱᤔᤠᤀᤣ ᤁᤧᤈᤥᤰ. ᤂᤢᤏᤧ᤹ ᤀᤠᤒᤠᤅᤣ ᤁᤢᤕᤧᤶᤒᤠ᤺ᤴ ᤏᤢ ᤁᤢᤛ᤻ᤛᤠᤜᤠ᤹ ᤛᤠ᤹ᤖᤡᤰ ᤆᤡ᤺ᤳᤋᤢᤛᤡ॥ ᤜᤧᤰᤁᤩᤠᤱ ᤂᤧᤏᤧ᤹ ᤜᤠᤒᤠ ᤁᤧᤴᤏᤧ᤹ᤁᤧᤴᤛᤠ᤹ᤛᤡ᤹ ᤜᤧᤰᤋᤱᤔᤠ ᤁᤧᤈᤥᤰ. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤧᤶᤒᤠᤜᤠ᤹ ᤏᤢ ᤂᤢᤴᤇᤡ᤹ ᤛᤠᤜᤠ᤹ ᤔᤧᤈᤡ᤺ᤳᤋᤢᤛᤡ॥ ᤛᤧᤰᤂᤠᤀᤣ ᤂᤧᤏᤧ᤹ ᤁᤧᤶᤔᤠ ᤗᤳᤇᤠ ᤜᤡᤳᤋᤡ ᤘᤕᤧ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤶᤒᤠ ᤀᤣᤔᤥᤖᤡ ᤘᤕᤧ॥ 46 “ᤂᤧᤏᤧ᤹ ᤁᤧᤴᤏᤧ᤹ ᤕᤶᤔᤠᤴ ᤛᤠᤔᤖᤡ ᤘᤕᤧ. ᤂᤢᤏᤧ᤹ ᤌᤠᤱᤃᤧᤳ ᤐᤡᤛᤠᤱ ᤁᤢᤛ᤻ᤛᤠ ᤔᤧᤴᤇᤢᤔᤠᤜᤠ᤹ᤏᤢ ᤕᤢᤅᤧ॥ ᤂᤧᤏᤧ᤹ ᤁᤧᤴᤛᤠ᤹ ᤆᤢᤰᤔᤠᤴ ᤛᤍᤥᤔ ᤘᤕᤧ. ᤂᤢᤏᤧ᤹ ᤁᤢᤛ᤻ᤛᤠ ᤔᤧᤴᤇᤢᤔᤠᤜᤠ᤹ᤏᤢ ᤗᤠᤱᤃᤧᤳ ᤐᤡᤛᤠᤱ ᤕᤢᤅᤧ॥ 47 ᤁᤖ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤁᤢᤀᤡᤛᤡᤰ ᤂᤧᤏᤧ᤹ ᤕᤠᤶᤃᤧᤛᤡᤱᤒᤠ ᤗᤠᤕᤥᤖᤰ ᤁᤧᤴᤈᤥᤃᤢᤴ॥ ᤁᤖ ᤂᤧᤏᤧ᤹ ᤜᤠᤖᤠᤀᤣ ᤂᤧᤱᤜᤠ᤹ᤏᤢ᤺ᤸᤗᤧ ᤀᤠᤸᤗᤛᤠᤱ ᤁᤢ᤹ᤀᤡᤃᤧᤓᤧᤶᤔᤠ ᤁᤧᤒᤥ᤺ᤰᤂᤧ॥ 48 ᤀᤠᤱᤃᤠ᤹ ᤁᤢᤜᤡᤱᤘᤧᤳ ᤘᤠ᤹ᤀᤠᤒᤠ ᤁᤢᤀᤡᤛᤡᤰ. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. ᤂᤧᤏᤧ᤹ ᤏᤢ ᤂᤧᤏᤧ᤹ ᤁᤧᤛ᤻ᤛᤠ ᤔᤧᤴᤇᤢᤔᤠᤜᤠ᤹ ᤜᤧᤰᤁᤣ ᤛᤍᤥᤔ ᤏᤢ ᤁᤢᤛ᤻ᤛᤠ ᤔᤧᤴᤇᤢᤔᤠᤜᤠ᤹ ᤀᤠᤵᤑᤠᤸᤗᤧᤀᤠᤱ ᤁᤢ᤹ᤀᤡᤃᤧᤓᤧᤶᤔᤠ ᤔᤧᤴᤘᤕᤧᤴ॥ 49 ᤛᤍᤥᤔ ᤏᤢ ᤂᤧᤸᤗᤧ ᤁᤢᤛ᤻ᤛᤠ ᤔᤧᤴᤇᤢᤔᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤜᤠ᤹ ᤀᤠᤱᤍᤡᤱ ᤁᤧᤗ᤹ᤒᤠ. ᤁᤧᤎᤧᤰᤛᤡᤱᤒᤠ ᤏᤢ ᤗᤧᤶᤛᤫᤠᤒᤠ ᤘᤕᤧ. ᤂᤧᤴ ᤕᤧᤶᤔᤥ ᤗᤠ᤺ᤰᤁᤠᤳ ᤗᤧᤵᤔᤠᤱ ᤕᤠᤱᤃᤧᤛᤠ᤹ᤒᤠ ᤏᤢ ᤁᤢᤜᤥ᤺ᤵᤔᤠ ᤁᤢᤛᤠᤰᤔᤥ ᤁᤧᤘᤠ᤹ᤒᤠᤜᤠ᤹ ᤋᤢᤰᤂᤣ ᤔᤧᤈᤩᤧ॥ 50 ᤂᤧᤱᤜᤠ᤹ ᤕᤶᤔᤠ ᤁᤧᤗᤧᤱᤛᤡᤱᤔᤠ ᤔᤧᤘᤕᤧ ᤜᤧᤰᤁᤩᤠᤱ ᤕᤠᤶᤃᤧᤛᤡᤱᤒᤠ ᤗᤠᤕᤥᤜᤠ᤹ ᤔᤧᤈᤥᤃᤢ. ᤂᤧᤸᤗᤧᤆᤥᤃᤢᤸᤗᤧ ᤂᤡᤏᤡ᤹ ᤁᤧᤏᤡᤶᤛᤢᤶᤔᤠᤱ ᤘᤠ᤹ᤒᤠ ᤁᤢᤀᤡᤛᤡᤰ ᤀᤠᤱᤃᤠ᤹ ᤂᤧᤱᤜᤠ᤹ ᤘᤖᤧᤱᤗᤧᤱ ᤔᤧᤱᤏᤡᤱ॥ 51 “ᤂᤧᤏᤧ᤹ ᤁᤧᤗᤠᤕᤥᤜᤠ᤹ᤖᤧ ᤁᤢᤓᤪᤧ᤺ᤱ ᤕᤠᤖᤡᤰᤁᤠᤱ ᤛᤠᤔᤖᤡᤕᤠ᤺ᤸᤗᤧᤃ ᤔᤧᤈᤥᤃᤢᤴ॥ ᤂᤧᤏᤧ᤹ ᤁᤧᤴᤛᤠ᤹ ᤔᤧᤴᤇᤢᤔᤠᤜᤠ᤹ᤖᤧ ᤔᤧᤈᤥᤃᤢᤒᤠᤏᤢ᤺ᤸᤗᤧᤀᤠᤱ ᤛᤠ᤹ᤖᤡᤰ ᤕᤖᤡᤰ ᤕᤠᤶᤃᤧᤛᤡᤱᤒᤠ ᤐᤠ᤺ᤴᤜᤠ᤹ ᤁᤧᤈᤥᤃᤢᤀᤠᤱ ᤘᤠ᤹॥ ᤂᤧᤏᤧ᤹ᤏᤢ ᤋᤱᤔᤧᤸᤗᤧ ᤂᤧᤱᤜᤠ᤹ ᤛᤠᤶᤕᤥᤒᤠ ᤏᤡᤍᤧᤳ॥ 52 ᤂᤧᤏᤧ᤹ ᤛᤡᤖᤡᤱᤔᤔᤥ ᤌᤩᤧ᤹᥄ ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤧᤴᤛᤠ᤹ ᤔᤧᤴᤇᤢᤔᤠᤜᤠ᤹ ᤀᤠᤵᤋᤡᤰ ᤔᤣ᤺ᤴᤏᤣᤒᤠ ᤏᤡᤔᤧᤍᤧᤵᤐᤠ ᤁᤧᤈᤥᤃᤢᤛᤡ॥ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧᤴᤏᤢ᤺ᤸᤗᤧ ᤂᤧᤏᤧ᤹ ᤁᤧᤗᤠᤕᤥᤜᤠ᤹ ᤛᤠ᤹ᤖᤡᤰ ᤋᤠᤵᤑᤧ᤺ᤶᤒᤠ ᤘᤕᤧ. ᤂᤧᤏᤧ᤹ᤏᤢ᤺ᤸᤗᤧ ᤂᤧᤱᤜᤠ᤹ ᤛᤠᤶᤕᤥᤏᤡᤔᤠ ᤏᤡᤔᤧᤎᤠ᤺ᤵ॥ ᤂᤧᤸᤗᤧᤆᤥᤃᤢᤸᤗᤧ ᤛᤡᤖᤡᤱᤔᤔᤥ ᤌᤩᤧ᤹ ᤜᤧᤰᤁᤩᤠᤱ ᤁᤢᤏᤠᤔᤧᤴᤇᤠ᤹ ᤐᤠ᤺ᤴᤏᤡᤴ ᤌᤖᤧ᤹. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤧᤴᤏᤧ᤹ ᤁᤧᤴᤛᤠ᤹ᤜᤠ᤹ ᤛᤠᤶᤕᤥᤏᤡᤔᤠ ᤏᤡᤔᤧᤍᤧᤳᤋᤧᤖ ᤁᤧᤈᤥᤃᤢᤛᤡᤀᤠᤱ ᤘᤠ᤹ᤖᤥ॥” ᤛᤍᤥᤔ ᤏᤢ ᤛᤠᤔᤖᤡᤕᤠᤴ ᤋᤃᤡᤒᤠ ᤜᤧᤰᤁᤣ ᤕᤠᤶᤔᤥ ᤏᤢ᤺ᤱᤛᤡ᤹ 53 “ᤁᤖ ᤁᤢᤓᤠ ᤕᤧᤶ ᤀᤣᤃᤠᤱ ᤛᤍᤥᤔ ᤏᤢ ᤂᤧᤸᤗᤧ ᤁᤢᤛ᤻ᤛᤠᤜᤠ᤹ ᤜᤧᤰᤁᤩᤠᤱ ᤛᤠᤔᤖᤡᤕᤠᤴ ᤏᤢ ᤂᤧᤸᤗᤧ ᤁᤢᤛ᤻ᤛᤠᤜᤠ᤹ ᤕᤠᤶᤔᤥ ᤔᤧᤏᤢ᤹ᤔᤧᤍᤠᤖ ᤆᤥᤃᤢᤱ᤹ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤏᤢ᤹ᤔᤠ ᤁᤧᤍᤠᤔᤧᤴ ᤂᤧᤱᤜᤠ᤹ᤏᤢ ᤛᤥᤖᤡᤰ ᤀᤠᤱᤃᤠ᤹ ᤕᤠᤶᤔᤥ ᤏᤢ᤺ᤰᤋᤢᤱ᤹. 54 ᤂᤧᤒᤩᤠᤱ ᤂᤧᤏᤧ᤹ ᤁᤧᤈᤥᤃᤢᤀᤠᤱ ᤘᤠ᤹ᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ᤖᤧ ᤗᤠᤃᤡ ᤛᤧᤰᤂᤠᤀᤣ ᤂᤧᤏᤧ᤹ ᤛᤡᤖᤡᤱᤔᤔᤥ ᤁᤧᤎᤠᤖᤥ. ᤌᤣᤀᤠᤱᤓᤧᤸᤗᤧ ᤂᤧᤴᤏᤢ ᤋᤱᤔᤧᤸᤗᤧ ᤂᤧᤏᤧ᤹ ᤁᤧᤗᤠᤕᤥᤜᤠ᤹ᤖᤧ ᤂᤧᤱᤜᤠ᤹ ᤏᤢᤒᤠ ᤆᤥᤃᤢᤛᤡᤒᤠ ᤂᤢᤴᤇᤡ᤹ ᤏᤡᤱᤘᤠ ᤔᤧᤄᤥᤛᤢ᤹॥ 55 ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤴᤏᤧ᤹ ᤁᤧᤴᤛᤠ᤹ᤜᤠ᤹. ᤛᤍᤥᤔ ᤏᤢ ᤛᤠᤔᤖᤡᤕᤠᤖᤧ ᤂᤢᤴᤇᤡ᤹ ᤔᤧᤴᤇᤢᤔᤠ ᤛᤠᤜᤠ᤹. ᤂᤧᤱᤜᤠ᤹ ᤋᤃᤡ ᤔᤧᤘᤕᤧᤒᤠᤍᤧᤴᤏᤥ ᤕᤠᤶᤔᤥ ᤔᤧᤏᤢ᤺ᤱ ᤔᤧᤍᤠᤖᤥ. ᤜᤧᤰᤁᤩᤠᤱ ᤂᤧᤏᤧ᤹ ᤏᤢ ᤂᤧᤏᤧ᤹ ᤁᤧᤛ᤻ᤛᤠ ᤔᤧᤴᤇᤢᤔᤠᤜᤠ᤹ ᤋᤃᤡ ᤁᤧᤘᤕᤡᤒᤠᤍᤧᤴᤏᤥ ᤁᤧᤏᤢ᤺ᤰᤂᤡ ᤁᤧᤍᤩᤧ᤹ᤀᤡᤖᤥ॥ 56 ᤂᤧᤏᤧ᤹ ᤀᤠᤱᤍᤡᤱ ᤁᤧᤗ᤹ᤖᤧᤒᤠ ᤕᤧᤴᤜᤠ᤹ᤀᤥ ᤂᤧᤏᤧ᤹ ᤛᤍᤥᤶᤔᤡᤴ ᤁᤢᤏᤠᤔᤧᤴᤇᤠ᤹ ᤁᤧᤔᤧᤳᤋᤢ॥ 57 ᤁᤖ ᤀᤠᤸᤗᤥ ᤂᤧᤴᤏᤢ᤺ᤸᤗᤧᤀᤠᤱ ᤕᤶᤒᤠ ᤁᤧᤓᤧᤴ ᤕᤠ᤺ᤶᤒᤰᤁᤡᤴ ᤁᤧᤖᤧᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤀᤥᤛᤣ᤺ᤴᤎᤠᤱ ᤐᤥ᤺ᤰᤂᤧᤀᤠᤱ ᤘᤠ᤹. ᤜᤧᤰᤁᤩᤠᤱ ᤀᤧᤍᤥᤔ ᤏᤢ ᤂᤧᤴ ᤁᤧᤖᤧᤰ ᤐᤡᤛᤠᤱᤒᤠ ᤁᤢᤒᤠᤱᤓᤣ᤹ᤛᤠᤒᤠᤜᤠ᤹ᤖᤧ ᤜᤧᤰᤁᤩᤠᤱ ᤐᤗᤡᤛ᤻ᤋᤡᤜᤠ᤹ᤖᤧ ᤂᤧᤏᤧ᤹ ᤁᤢᤏᤠᤔᤧᤴᤇᤠ᤹ ᤁᤧᤶᤔᤧᤳ॥ 58 ᤁᤧᤖᤧᤰ ᤆᤡ᤺ᤴᤈᤡ᤺ᤴ ᤁᤧᤄᤢᤒᤠ ᤁᤧᤕᤠᤶᤒᤥ᤺ᤵᤔᤠ ᤏᤢ ᤕᤠᤶᤃᤧᤛᤡᤱᤒᤠ ᤁᤧᤗᤠᤕᤥᤜᤠ᤹ᤖᤧ ᤗᤠᤃᤡ ᤁᤴ ᤂᤧᤏᤧ᤹ ᤁᤧᤄᤢᤶᤍᤡᤱᤗᤥ. ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤖᤥ॥ ᤛᤍᤠᤍᤡᤱᤒᤠ ᤔᤠᤱᤜᤢᤵ 59 “ᤀᤠᤸᤗ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤂᤧᤏᤧ᤹ ᤌᤣ᤺ᤴ ᤂᤥᤔᤠ ᤁᤧᤕᤠᤖᤢ᤹ ᤂᤧᤴ ᤀᤠᤱᤃᤠ᤹ ᤐᤡᤏᤧᤖᤥ. ᤌᤣᤀᤠᤱᤓᤧᤸᤗᤧ ᤂᤧᤏᤧ᤹ ᤁᤧᤔᤠᤱᤜᤢᤵᤐᤡᤴ ᤁᤧᤓᤣ᤺ᤴᤍᤢᤀᤠᤱ ᤑᤣ᤺ᤶᤔᤠ ᤔᤧᤴᤏᤢ᤹ᤔᤏᤠᤒᤠ ᤁᤧᤔᤠᤱᤜᤧᤰᤜᤠ᤹ ᤕᤠᤱᤕᤠᤱᤒᤠ ᤁᤧᤗᤣ᤺ᤳᤋᤢᤀᤠᤱ ᤘᤠ᤹॥ 60 ᤜᤧᤰᤁᤣᤛᤠᤱ ᤂᤧᤏᤧ᤹ ᤔᤧᤴᤇ᤻ᤕᤠ ᤁᤧᤘᤕᤧᤸᤗᤧ ᤀᤠᤱᤃᤠ᤹ ᤂᤧᤏᤧ᤹ᤏᤢ ᤆᤥᤃᤢᤱᤒᤠ ᤔᤠᤱᤜᤢᤵᤐᤡᤴ ᤀᤠᤱᤃᤠ᤹ ᤏᤡᤱᤘᤠ᤹ ᤀᤡ᤺ᤳᤋᤢᤱ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤏᤧ᤹ᤏᤢ ᤀᤠᤓᤧᤸᤗᤧᤛᤠᤱ ᤔᤧᤴᤏᤢᤵᤔᤏᤠᤒᤠ ᤗᤳᤇᤠ ᤔᤠᤱᤜᤢᤵ ᤆᤥᤃᤢᤱ᤹॥ 61 ᤂᤧᤒᤩᤠᤱ ᤂᤧᤏᤧ᤹ ᤁᤧᤈᤥᤃᤢᤀᤠᤱ ᤘᤠ᤹ᤒᤠ ᤁᤧᤖᤧᤰ ᤁᤧᤓᤧᤴ ᤕᤠ᤺ᤶᤒᤰᤜᤠ᤹ ᤁᤧᤏᤢ᤺ᤴᤗ ᤏᤡᤱᤘᤠ᤹ ᤁᤧᤀᤡ᤺ᤳᤋᤢ᤹॥ ᤂᤧᤏᤧ᤹ᤏᤢ ᤆᤥᤃᤢᤱᤒᤠ ᤔᤠᤱᤜᤢᤵᤐᤡᤸᤗᤧ ᤂᤧᤱᤜᤠ᤹ ᤁᤢᤗᤰᤛᤡ ᤔᤧ᤺ᤴᤇᤡᤛᤠᤱ ᤀᤠᤱᤃᤠ᤹ ᤂᤧᤏᤧ᤹ ᤁᤧᤴᤏᤧ᤹ ᤁᤧᤴᤛᤠ᤹. ᤛᤍᤥᤔ ᤏᤢ ᤛᤠᤔᤖᤡᤕᤠᤴ ᤂᤧᤏᤧ᤹ ᤁᤧᤛ᤻ᤛᤠ ᤔᤧᤴᤇᤢᤔᤠ ᤔᤧᤒᤥᤱᤗ ᤆᤥᤃᤢᤱᤛᤡᤱ᤹॥ 62 ᤜᤧᤰᤁᤩᤠᤱ ᤀᤠᤱᤃᤠ᤹ ᤆᤥᤃᤢᤱᤒᤠ ᤔᤠᤱᤜᤢᤵᤐᤡᤴ ᤂᤧᤏᤧ᤹ᤏᤢ ᤕᤠᤶᤔᤥ ᤏᤡ᤺ᤴᤎᤥ ᤆᤥᤃᤢᤱ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤂᤧᤏᤧ᤹ ᤏᤡᤱᤘᤠ᤹ ᤁᤧᤄᤥᤛᤢ᤹॥ 63 ᤂᤧᤏᤧ᤹ ᤁᤧᤈᤥᤃᤢᤀᤠᤱ ᤘᤠ᤹ᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ᤀᤥ ᤀᤠᤱᤃᤠ᤹ ᤂᤧᤏᤧ᤹ ᤗᤧᤵᤔᤡ ᤐᤡᤏᤧᤸᤗᤧ ᤂᤧᤏᤧ᤹ ᤁᤧᤗᤠᤕᤥᤜᤠ᤹ ᤏᤡᤱᤘᤠ᤹ ᤁᤧᤀᤡ᤺ᤳᤋᤢᤀᤠᤱ ᤁᤧᤏᤢ᤺ᤴᤏᤠᤱ ᤁᤧᤏᤠ᤺ᤴ ᤁᤧᤍᤧᤵᤋᤢ᤹॥ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤴ ᤐᤠᤖᤠᤱᤅᤠᤱ ᤘᤠ᤹ᤖᤥ᥄” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.