ᤀᤡᤈᤁᤡᤀᤣᤗ 15 - LIFOTNT

ᤁᤢᤈᤠ᤹ ᤔᤧᤴᤎᤥ᤺ᤰᤔᤏᤠ ᤆᤧᤸᤗᤧᤰᤛᤣ᤹

¹ ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠᤗᤠᤶ ᤁᤴ ᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤁᤧᤖᤧ—

² “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤏᤠᤀᤣ. ᤆᤧᤸᤗᤧᤰᤛᤣᤸᤗᤧ ᤁᤢᤒᤢᤱᤅᤡᤴ ᤛᤡᤱᤒᤢᤅᤡᤴᤏᤢ ᤀᤠᤰᤂᤣᤀᤠᤱ ᤋᤱᤔᤠᤒᤣ᥅ ᤌᤣ ᤋᤠᤶᤓᤢᤱᤅᤥᤒᤠ ᤛᤡᤱ ᤁᤢᤀᤡᤛᤡᤰ ᤆᤧᤸᤗᤧᤰᤛᤣ᤹ ᤛᤡᤱᤅᤡᤴ ᤕᤠ᤺ᤶᤒᤰ ᤀᤠᤒᤡᤒᤡᤒᤠ ᤆᤥ᤺ᤰᤐᤡ᥅

³ ᤌᤣ ᤁᤴᤗᤠᤶ ᤀᤥᤃᤵ ᤆᤥ᤺ᤰᤔᤠ ᤁᤧᤏᤢ᤹ᤒᤠ ᤛᤡᤱ ᤗ᤺ᤴᤒᤡ᥅ ᤌᤣ ᤁᤴ ᤛᤡᤱᤅᤡᤴ ᤛᤡᤳᤗᤠᤱᤜᤠ᤹ᤀᤥ ᤛᤠᤔᤠᤜᤠ᤹ ᤑᤥ᤺ᤶᤔᤠᤖᤧ ᤗᤠᤃᤡ ᤁᤢᤜᤠᤵᤆᤣ᤺ᤰ ᤜᤧᤰᤋᤱᤒᤠ ᤐᤠ᤺ᤴᤜᤠ᤹ ᤆᤥ᤺ᤰᤔᤠ ᤛᤢᤰᤋᤧᤵᤐᤡ᥅

⁴ ᤁᤱᤃ ᤔᤡ ᤜᤠ᤺ᤶᤔᤠ ᤕᤠ᤺ᤶᤒᤰᤗᤧ ᤗᤠᤃᤡᤖᤰ ᤏᤢᤒᤠ ᤐᤥᤱ᤹॥ ᤜᤧᤰᤁᤩᤠᤱ ᤁᤴ ᤜᤠ᤹ᤖᤢ ᤔᤠ᤺ᤳᤋᤠᤱ ᤔᤡᤄᤠᤰᤁᤡᤴᤗᤰ ᤕᤠ᤺ᤰ. ᤂᤧᤏᤧ᤹ ᤁᤴᤗᤠᤶ ᤁᤢᤓᤠ ᤐᤠᤴ ᤆᤥ᤺ᤰᤔᤠ ᤁᤧᤛᤢᤰᤋᤢᤒᤡ᥅

⁵ ᤔᤣ᤺ᤴ. ᤁᤴ ᤔᤧᤴᤜᤠ᤺ᤴᤏᤣ ᤘᤕᤧᤛᤠᤱ ᤌᤧᤔᤠ ᤕᤠ᤺ᤶᤒᤰᤁᤠᤱ ᤀᤠᤶᤒᤡᤏᤧᤶᤒᤠ ᤆᤥᤃᤧ॥ ᤀᤠᤸᤗ ᤔᤡ᤺ᤸᤗᤧ ᤂᤧᤴ ᤜᤠ᤹ᤖᤢᤍᤣᤛᤢᤀᤠᤱ ᤔᤡᤄᤠᤰᤁᤡᤴᤗᤰ ᤕᤠ᤺ᤰᤋᤧ. ᤁᤱᤃ ᤀᤠᤸᤗᤛᤠᤱ ᤕᤠ᤺ᤶᤒᤰ ᤀᤠᤶᤒᤡᤏᤧᤶᤒᤠ ᤆᤥᤰ᥄

⁶ “ᤜᤧᤰᤁᤩᤠᤱ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤕᤖᤢᤛᤗᤧ᤺ᤶᤔᤥᤒᤠ ᤔᤏᤠᤜᤠ᤹ᤃ ᤋᤠᤶᤓᤢᤱᤅᤥᤒᤠ ᤛᤡᤱᤜᤠ᤹ᤖᤧ ᤁᤢᤗᤢᤶᤔᤥ ᤁᤧᤍᤠᤵᤐᤠ ᤆᤧᤸᤗᤧᤰᤛᤣᤸᤗᤧ ᤁᤢᤒᤢᤱᤜᤠ᤹ ᤜᤧᤰᤋᤱᤒᤠ ᤔᤧᤈᤥᤰ॥ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤕᤠᤵᤔᤡ ᤕᤠ᤺ᤶᤒᤰ ᤔᤧᤶᤒᤡᤔᤏᤠᤒᤠ ᤔᤧᤈᤥᤰ. ᤀᤠᤱᤃᤠ᤹ ᤂᤧᤱᤜᤠ᤹ ᤔᤡᤎᤡᤱᤔᤠᤛᤡᤖᤧ ᤗᤠᤃᤡ ᤔᤡᤀᤥ ᤗᤠᤵᤑᤣᤛᤢᤱᤛᤡᤱᤅᤠᤱ ᤔᤧᤏᤧ॥

⁷ ᤜᤧᤰᤁᤩᤠᤱ ᤗᤳᤇᤠ ᤔᤡᤀᤥᤗᤠᤶ ᤂᤧᤱᤜᤠ᤹ ᤔᤧᤄᤧᤳᤇᤡᤱᤒᤡ ᤜᤠᤃ ᤑᤠ᤹ᤀᤠᤱ ᤀᤥᤔᤧᤳᤋᤢᤱ. ᤁᤖ ᤂᤧᤱᤜᤠ᤹ ᤘᤣ᤹ᤛᤔᤠ ᤔᤡᤀᤥ ᤔᤰᤔᤧᤎᤠ ᤔᤧᤗᤠᤳ॥ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤜᤡᤛᤡᤱᤅᤠᤸᤗᤧ. ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤂᤡᤏᤡ᤹ ᤏᤡᤱᤘᤠ᤹ ᤁᤧᤄᤥᤛᤢᤶ᤹॥

⁸ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤀᤠᤱᤃᤠ᤹ᤏᤢ ᤏᤛᤠ᤺ᤴᤛᤠᤒᤠ ᤔᤧᤶᤒᤥ᤺ᤰᤂᤧᤴᤏᤠᤱ ᤔᤧᤴᤘᤠ᤹ᤏᤧᤶᤒᤠᤸᤗᤧ ᤆᤥᤃᤢᤸᤗᤧ ᤀᤠᤱᤃᤠ᤹ ᤗᤠᤈᤣᤴ ᤆᤡᤈᤡ ᤂᤰᤂᤰᤐᤠ ᤆᤥᤃᤢᤱ᤹॥ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤅᤠᤱ ᤘᤠ᤹ᤖᤥ᥄”