ᤀᤡᤈᤁᤡᤀᤣᤗ 14 - LIFOTNT

ᤏᤠᤘᤠᤀᤡᤳᤗᤠ ᤛᤧᤘᤠ ᤁᤧᤔᤧᤵᤐᤠᤜᤠ᤹ ᤂᤢᤶᤍᤡᤱ

¹ ᤂᤧᤒᤩᤠᤱ ᤀᤡᤛᤪᤠᤀᤡᤗᤒᤠ ᤁᤢᤓᤠ ᤗᤠᤶᤗᤥᤒᤠᤜᤠ᤹ ᤀᤠᤱᤃᤠ᤹ᤀᤥ ᤔᤧᤍᤩᤧ. ᤜᤧᤰᤁᤩᤠᤱ ᤂᤧᤱᤜᤠ᤹ ᤀᤠᤱᤃᤠ᤹ᤏᤢ ᤛᤥᤖᤡᤰ ᤔᤧᤕᤢᤅᤧ ᤔᤧᤈᤩᤧ᤺ᤸᤗᤧ.

² ᤕᤜᤘᤣ ᤍᤠᤱᤒᤠᤗᤠᤶ ᤁᤴ ᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤁᤧᤖᤧ—

³ “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤏᤠᤀᤣ. ᤁᤴ ᤗᤠᤶᤗᤥᤒᤠᤜᤠ᤹ᤖᤧ ᤂᤢᤴᤇᤡ᤹ ᤛᤡᤰᤗᤢᤱᤔᤥ ᤏᤠᤘᤠᤀᤡᤳᤗᤠᤜᤠ᤹ ᤔᤧᤕᤢᤰᤂᤢᤀᤠᤱ ᤕᤢᤱ᤹॥ ᤂᤧᤱᤜᤠ᤹ᤖᤧ ᤗᤠᤕᤥᤀᤥ ᤀᤠᤎᤠᤎᤠᤒᤠ ᤐᤠ᤺ᤴᤜᤠ᤹ ᤂᤢᤴᤇᤡ᤹ ᤔᤧᤔᤧᤳᤇᤡᤱᤅᤠᤱ ᤔᤧᤘᤠ᤹॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤣᤗᤡᤜᤠ᤹ ᤀᤠᤱᤃᤠ᤹ ᤌᤣᤀᤠᤱ ᤂᤧᤵᤛᤢᤱᤒᤠᤒᤣ᥅

⁴ ᤂᤧᤏᤧ᤹ ᤂᤧᤱᤜᤠ᤹ ᤔᤧᤳᤋᤧᤛᤧ᤹. ‘ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤛᤡᤰᤗᤢᤱᤔᤠᤜᤠ᤹ᤀᤥ ᤏᤠᤘᤠᤀᤡᤳᤗᤠᤜᤠ᤹ ᤔᤧᤕᤢᤰᤂᤢᤀᤠᤱ ᤕᤢᤱ᤹ ᤜᤧᤰᤁᤩᤠᤱ ᤂᤧᤱᤜᤠ᤹ ᤗᤠᤕᤥᤀᤥ ᤔᤧᤎᤩᤧᤀᤠᤱ ᤔᤧᤘᤠ᤹. ᤂᤧᤒᤩᤠᤱ ᤂᤧᤱᤜᤠ᤹ ᤀᤡᤱᤄᤱ ᤛᤣ᤺ᤴᤍᤥᤛᤧ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤥ ᤔᤧᤒᤣ᤺ᤰ॥ ᤂᤧᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤠᤘᤠᤀᤡᤳᤗᤠ ᤛᤧᤘᤠᤔᤧᤵᤔᤠ ᤕᤠ᤺ᤶᤒᤰᤁᤡᤸᤗᤧ ᤁᤢᤗᤧᤰᤘᤠ ᤂᤥᤔᤠ ᤔᤧᤕᤠᤖᤢᤒᤠ ᤌᤡᤰ ᤐᤖᤡᤰᤐᤠ ᤏᤢᤃᤵ ᤐᤡᤖᤢᤱᤛᤡᤱ᤹॥

⁵ ᤀᤠᤱᤃᤠ᤹ᤗᤠᤶ ᤔᤠ᤺ᤱᤄᤠ ᤁᤧᤒᤥᤱᤒᤠᤀᤠᤱ ᤂᤢᤴᤇᤡ᤹ ᤕᤠᤶᤃᤧᤛᤡᤱᤒᤠ ᤏᤠᤘᤠᤀᤡᤳᤗᤠᤜᤠ᤹ ᤛᤧᤘᤠ ᤔᤧᤵᤔᤠ ᤗᤧᤵᤔᤠᤱ ᤁᤧᤗᤠ᤺ᤵᤐᤠ ᤀᤠᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ ᤏᤢ ᤛᤡᤰᤗᤢᤱᤔᤠᤴ ᤜᤡᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤀᤰᤂᤣ ᤆᤥᤃᤢᤱ᤹॥’

⁶ “ᤁᤸᤗᤧᤆᤥᤃᤢᤸᤗᤧ ᤂᤧᤏᤧ᤹ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤀᤰᤂᤣ ᤔᤧᤳᤋᤧᤛᤧ᤹. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤗᤠᤕᤥᤗᤠᤶ ᤜᤡᤴᤍᤧᤶᤔᤧ᤹ ᤂᤶᤓᤩᤠᤱ ᤂᤡᤏᤡ᤹ ᤏᤠᤘᤠᤀᤡᤳᤗᤠᤜᤠ᤹ᤗᤠᤶ ᤗᤠ᤺ᤳᤗᤠ᤺ᤳ ᤐᤥ᤺ᤰᤂᤧᤶᤔᤧ᤹. ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤖᤧᤰ ᤕᤠᤶᤃᤧᤛᤡᤱᤒᤠ ᤗᤠᤕᤥᤜᤠ᤹ ᤗᤧᤖᤧᤶᤔᤧ᤹॥

⁷ ᤀᤠᤱᤃᤠ᤹ ᤕᤠᤵᤔᤡ ᤁᤧᤏᤠ᤹ᤒᤠ ᤜᤧᤰᤁᤩᤠᤱ ᤂᤢᤴᤇᤡ᤹ ᤛᤡᤰᤗᤢᤱᤔᤠᤜᤠ᤹ᤀᤥ ᤏᤠᤘᤠᤀᤡᤳᤗᤠᤜᤠ᤹ ᤁᤧᤕᤢᤱᤒᤠᤀᤠᤱ ᤜᤧᤰᤁᤣᤗ᤹ᤖᤡᤰ ᤗᤠᤕᤥᤀᤥ ᤁᤧᤎᤠᤒᤠ. ᤂᤧᤒᤩᤠᤱ ᤛᤢᤈᤠ ᤏᤠ᤺ᤰᤔᤠᤖᤧ ᤗᤠᤃᤡ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤥ ᤁᤧᤍᤠᤒᤠ ᤁᤧᤖᤧᤰ ᤀᤡᤛᤪᤠᤀᤡᤗᤡᤜᤠ᤹ ᤏᤢ ᤘᤣ᤹ ᤗᤠᤈᤣ᤹ᤒᤠᤜᤠ᤹ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤏᤢᤃᤵ ᤐᤡᤖᤢᤱᤛᤡᤱ᤹॥

⁸ ᤀᤠᤱᤃᤠ᤹ ᤀᤰᤋᤱᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤜᤡᤛᤡᤱ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥᤗᤠᤶ ᤂᤧᤱᤜᤠ᤹ ᤕᤢᤔᤪᤧᤰ ᤔᤧᤰᤂᤢᤱᤛᤡᤱᤅᤠᤱ ᤂᤧᤱᤜᤠ᤹ ᤗᤳᤇᤠ ᤁᤡᤵᤔᤠ ᤁᤧᤄᤢᤒᤠ ᤁᤢᤒᤡ ᤏᤢ ᤆᤠᤜᤠᤰ ᤆᤥᤃᤢᤱᤛᤡᤱ᤹॥ ᤂᤧᤒᤩᤠᤱ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤂᤡᤏᤡ᤹ ᤏᤡᤱᤘᤠ᤹ ᤁᤧᤄᤥᤛᤢᤶ᤹॥

⁹ “‘ᤜᤧᤰᤁᤩᤠᤱ ᤁᤢᤓᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤴ ᤀᤡᤱᤄᤱ ᤐᤡᤔᤠᤖᤧ ᤗᤠᤃᤡ ᤀᤡᤱᤗᤧᤰᤁᤥ ᤌᤩᤧᤀᤠᤱ ᤘᤠ᤹ᤏᤧᤓᤃᤪ. ᤁᤱᤃ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤧᤴ ᤀᤡᤱᤗᤧᤰᤁᤥ ᤌᤠᤛᤢᤱᤅᤠᤱ ᤘᤠ᤹ᤒᤠᤸᤗᤧ ᤆᤥᤃᤢᤸᤗᤧ ᤜᤧᤰᤁᤣ ᤐᤥ᤺ᤰᤂᤧᤒᤠᤖᤥ॥ ᤀᤰᤋᤱᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤴ ᤀᤠᤱᤃᤠ᤹ ᤀᤠᤜᤢᤰᤁᤡᤸᤗᤧ ᤛᤠ᤺ᤵᤛᤢᤱ᤹. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤒᤠ ᤛᤱᤈᤢᤶᤓᤥᤗᤠᤶ ᤂᤧᤴ ᤔᤧᤰᤂᤢᤱ᤹॥

¹⁰ ᤀᤡᤱᤗᤧᤰ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤏᤢ ᤀᤡᤱᤗᤧᤰ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤗᤠᤶ ᤗᤠᤶᤗᤥᤛᤡᤱᤔᤠ ᤁᤧᤃᤥ᤺ᤵᤐᤠᤜᤠ᤹ ᤁᤧᤖᤧᤰ ᤂᤢᤴᤇᤡ᤹ ᤗᤠᤕᤥᤸᤗᤧ ᤁᤢᤗᤧᤰᤘᤠ ᤂᤢᤶᤍᤡᤱᤅᤥ ᤔᤧᤎᤠᤖᤥ॥

¹¹ ᤁᤶᤓᤗ᤹ᤖᤡᤰ. ᤂᤢᤴᤇᤡ᤹ ᤗᤠᤕᤥᤸᤗᤧ ᤀᤠᤛᤢᤳᤌᤥ ᤔᤧᤴᤈᤥ᤺ᤰᤛᤡᤱᤅᤡᤴᤏᤠᤱ ᤀᤠᤱᤃᤠ᤹ᤗᤠᤶ ᤔᤠ᤺ᤱᤄᤠ ᤔᤧᤶᤒᤥᤱᤏᤧᤸᤗ ᤑᤠ᤹ᤀᤠᤱ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤔᤧᤜᤢ᤹ᤛᤡᤱ᤹॥ ᤂᤧᤱᤜᤠ᤹ ᤀᤠᤱᤃᤠ᤹ ᤀᤠᤔᤏᤠ ᤔᤧᤒᤥᤱ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱ ᤐᤥᤱᤅᤠ॥ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤅᤠᤱ ᤘᤠ᤹ᤖᤥ᥄’”

ᤏᤢᤜ. ᤍᤠᤏᤡᤀᤧᤗ ᤏᤢ ᤀᤕᤢᤒ

¹² ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠᤗᤠᤶ ᤁᤴ ᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤁᤧᤖᤧ—

¹³ “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤏᤠᤀᤣ. ᤁᤢᤒᤡᤖᤧ ᤗᤠᤃᤡ ᤗᤳᤇᤠ ᤗᤠᤈᤣ᤹ᤀᤥᤒᤠ ᤔᤏᤠᤜᤠ᤹ᤖᤧ ᤀᤠᤱᤃᤠ᤹ ᤀᤠᤍᤰᤗᤧᤱᤘᤠᤀᤥ ᤏᤛᤠᤴ ᤔᤧᤗᤧᤰᤂᤢᤀᤠᤱ ᤗᤠᤕᤥ ᤔᤧᤈᤥᤃᤢ᤹. ᤜᤧᤰᤁᤩᤠᤱ ᤂᤧᤱᤜᤠ᤹ ᤕᤢᤔᤪᤧᤰ ᤛᤧᤵᤔᤠᤛᤡᤖᤧ ᤗᤠᤃᤡ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤁᤢᤈᤠ ᤋᤠᤔᤠ ᤗᤠᤶᤔᤡᤴ ᤛᤠᤰᤋᤢᤱ᤹ ᤂᤶᤓᤩᤠᤱ ᤔᤏᤠᤜᤠ᤹ ᤏᤢ ᤌᤰᤛᤠᤜᤠ᤹ ᤁᤧᤖᤧᤰ ᤔᤧᤱᤔᤠᤛᤡᤖᤧ ᤗᤠᤃᤡ ᤛᤠᤰᤘᤠᤴ ᤑᤥ᤺ᤰᤂᤢᤱᤅᤠᤱ ᤀᤠᤜᤢᤰᤁᤡᤸᤗᤧ ᤛᤠ᤺ᤵᤛᤢᤱᤛᤡᤱ᤹ᤔᤢ॥

¹⁴ ᤂᤧᤵᤔᤥ ᤏᤢᤜ. ᤍᤠᤏᤡᤀᤧᤗ ᤏᤢ ᤀᤕᤢᤒ ᤂᤧᤴ ᤛᤢᤶᤛᤡ ᤁᤧᤖᤧᤰ ᤔᤧᤘᤕᤧᤛᤠᤱ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤶᤕᤥᤒᤠ ᤕᤠ᤺ᤶᤒᤰᤁᤡᤸᤗᤧ ᤜᤠ᤺ᤳᤋᤠᤱ ᤛᤧ᤺ᤵᤔᤠ ᤔᤧᤛᤢᤰᤋᤢᤶᤒᤠ ᤘᤕᤧ ᤁᤖ ᤂᤢᤴᤇᤡ᤹ ᤀᤠᤵᤑᤣᤰᤗᤰ ᤔᤧᤛᤧ᤺ᤵᤛᤡᤱᤒᤠ ᤘᤕᤧᤔᤧᤴ. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹॥

¹⁵ “ᤀᤡᤃᤪ ᤗᤠᤈᤣᤴ ᤗᤡᤔᤠᤖᤧ ᤗᤠᤃᤡ. ᤔᤏᤠᤜᤠ᤹ ᤛᤧᤵᤔᤠᤛᤡᤖᤧ ᤗᤠᤃᤡ ᤜᤧᤰᤁᤩᤠᤱ ᤗᤠᤈᤣᤴ ᤗᤡᤔᤠᤀᤠᤱ ᤛᤠ᤹ᤖᤡᤰ ᤆᤡᤈᤡ ᤂᤰᤂᤰᤐᤠ ᤆᤥ᤺ᤰᤔᤠ ᤏᤢ ᤂᤧᤵᤔᤥᤗᤠᤶ ᤐᤥᤱᤔᤠᤀᤠᤱ ᤗᤠᤱᤄᤣ᤺ᤰᤔᤠ ᤁᤧᤀᤠ᤺ᤵᤐᤠ ᤐᤥᤱᤔᤠᤖᤧ ᤗᤠᤃᤡ ᤀᤠᤱᤃᤠ᤹ ᤋᤠᤶᤓᤢᤱ ᤌᤰᤛᤠᤜᤠ᤹ ᤐᤠᤱᤔᤠᤛᤡ ᤁᤧᤒᤥᤱᤒᤠ ᤘᤕᤧᤔᤢ॥

¹⁶ ᤀᤠᤱᤃᤠ᤹ ᤛᤧᤰᤂᤠᤀᤣ ᤁᤢᤜᤡᤱᤘᤧᤳ ᤘᤠ᤹ᤀᤠᤒᤠ ᤁᤢᤀᤡᤛᤡᤰ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. ᤂᤧᤵᤔᤥ ᤂᤧᤴ ᤛᤢᤶᤓᤢ ᤔᤏᤠᤜᤠ᤹ ᤔᤧᤘᤕᤧᤛᤠᤱ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤕᤧᤶᤒᤡᤳᤇᤠ ᤔᤧᤴᤇᤢᤔᤠ ᤛᤠᤜᤠ᤹ ᤋᤠᤱᤛᤧ᤺ᤵᤔᤠ ᤔᤧᤴᤇᤢᤰᤋᤢᤛᤡᤴᤒᤠ ᤘᤕᤧ. ᤂᤧᤱᤜᤠ᤹ ᤀᤠᤵᤑᤣᤰᤗᤰ ᤔᤧᤛᤧ᤺ᤵᤛᤡᤱᤒᤠ ᤘᤕᤧ. ᤁᤖ ᤗᤠᤈᤣ᤺ᤱᤃ ᤆᤡᤈᤡ ᤂᤰᤂᤰ ᤐᤥ᤺ᤰᤂᤧᤒᤠ ᤘᤕᤧᤔᤧᤴ॥

¹⁷ “ᤀᤡᤃᤪ ᤁᤢᤒᤡᤖᤧ ᤗᤠᤃᤡ ᤀᤠᤱᤃᤠ᤹ ᤗᤠᤈᤣ᤺ᤸᤗᤧ ᤁᤢᤍᤰᤗᤧᤱᤘᤠᤀᤥ ᤋᤧᤴᤎᤱ ᤐᤥᤱᤍᤠᤖ ᤕᤠ᤺ᤴᤍᤢᤱ᤹. ᤜᤧᤰᤁᤩᤠᤱ ᤔᤏᤠᤜᤠ᤹ ᤏᤢ ᤌᤰᤛᤠᤜᤠ᤹ ᤁᤧᤖᤧᤰ ᤔᤧᤱᤔᤠᤛᤡᤖᤧ ᤗᤠᤃᤡ ᤏᤡᤱᤔᤡ ᤌᤰᤛᤢᤒᤠᤜᤠ᤹ ᤐᤠᤱᤄᤢᤱ ᤋᤠᤛᤢᤱᤛᤡᤱᤔᤢ॥

¹⁸ ᤀᤠᤱᤃᤠ᤹ ᤛᤧᤰᤂᤠᤀᤣ ᤁᤢᤜᤡᤱᤘᤧᤳ ᤘᤠ᤹ᤀᤠᤒᤠ ᤁᤢᤀᤡᤛᤡᤰ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. ᤂᤧᤵᤔᤥ ᤂᤧᤴ ᤛᤢᤶᤓᤢ ᤔᤏᤠᤜᤠ᤹ ᤔᤧᤘᤕᤧᤛᤠᤱ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤕᤧᤶᤒᤡᤳᤇᤠ ᤔᤧᤴᤇᤢᤔᤠ ᤛᤠᤜᤠ᤹ ᤋᤠᤱᤛᤧ᤺ᤵᤔᤠ ᤔᤧᤴᤇᤢᤰᤋᤢᤛᤡᤴᤒᤠ ᤘᤕᤧ. ᤂᤢᤴᤇᤡ᤹ ᤀᤠᤵᤑᤣᤰᤗᤰ ᤋᤠᤱᤔᤧᤛᤧ᤺ᤵᤛᤡᤱᤒᤠ ᤘᤕᤧᤔᤧᤴ॥

¹⁹ “ᤀᤡᤃᤪ ᤁᤢᤒᤡᤖᤧ ᤗᤠᤃᤡ ᤗᤠᤈᤣ᤹ᤀᤥ ᤔᤠᤱᤍᤢᤰᤔᤠ ᤐᤠᤱᤄᤢᤱᤅᤠᤱ ᤀᤠᤱᤃᤠ᤹ ᤀᤠᤛᤠᤰᤁᤧᤴᤏᤡᤴ ᤌᤠᤔᤠ ᤁᤧᤒᤥᤱᤒᤠ ᤐᤥ᤺ᤰᤂᤧᤸᤗᤧ ᤜᤧᤰᤁᤩᤠᤱ ᤋᤢᤰᤔᤠ ᤗᤠ᤺ᤰᤔᤠᤸᤗᤧ ᤁᤧᤖᤧᤰ ᤔᤏᤠᤜᤠ᤹ ᤏᤢ ᤌᤰᤛᤠᤜᤠ᤹ ᤔᤧᤛᤩᤧᤔᤢ.

²⁰ ᤀᤠᤱᤃᤠ᤹ ᤁᤢᤜᤡᤱᤘᤧᤳ ᤘᤠ᤹ᤀᤠᤒᤠ ᤁᤢᤀᤡᤛᤡᤰ. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹. ᤂᤧᤵᤔᤥ ᤏᤢᤜ. ᤍᤠᤏᤡᤀᤧᤗ ᤏᤢ ᤀᤕᤢᤒ ᤔᤧᤘᤕᤧᤛᤠᤱ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤕᤧᤶᤒᤡᤳᤇᤠ ᤔᤧᤴᤇᤢᤔᤠ ᤛᤠᤜᤠ᤹ ᤋᤠᤱᤛᤧ᤺ᤵᤔᤠ ᤔᤧᤴᤇᤢᤰᤋᤢᤛᤡᤴᤒᤠ ᤘᤕᤧ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤠᤶᤕᤥᤒᤠ ᤕᤠ᤺ᤶᤒᤰᤁᤡᤸᤗᤧ ᤂᤢᤴᤇᤡ᤹ᤖᤰ ᤔᤧᤛᤧ᤺ᤵᤛᤡᤱᤒᤠ ᤘᤕᤧᤔᤧᤴ॥

²¹ “ᤀᤠᤸᤗ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤁᤴ ᤁᤠᤰ ᤔᤏᤠᤜᤠ᤹ ᤏᤢ ᤌᤰᤛᤠᤜᤠ᤹ ᤁᤧᤔᤧᤱᤒᤠ ᤋᤧᤴᤎᤱ. ᤛᤠᤰᤘᤠ᤺ᤴ. ᤋᤠᤶᤓᤢᤱ ᤌᤰᤛᤠᤜᤠ᤹ ᤜᤧᤰᤁᤩᤠᤱ ᤋᤢᤰᤔᤠ ᤗᤠ᤺ᤰᤔᤠ. ᤁᤴ ᤗᤡᤔᤪᤠᤱ ᤁᤧᤖᤧᤰ ᤁᤡᤵᤔᤠ ᤁᤧᤄᤢᤒᤠ ᤂᤢᤶᤍᤡᤱᤜᤠ᤹ ᤕᤖᤢᤛᤗᤧ᤺ᤶᤔᤥ ᤌᤠ᤺ᤸᤗᤧ ᤀᤠᤰᤂᤧᤴ ᤁᤧᤀᤠ᤺ᤶᤒᤠ ᤐᤥᤱᤒᤡᤗᤠ॥

²² ᤜᤧᤰᤁᤣᤛᤠᤱ ᤂᤧᤵᤔᤥ ᤁᤢᤓᤠ ᤔᤧᤍᤠᤱ ᤔᤧᤕᤠ᤺ᤰ. ᤜᤧᤰᤁᤩᤠᤱ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠᤜᤠ᤹ ᤁᤢᤀᤡᤛᤡᤰ ᤁᤵᤔᤥ ᤒᤣᤒᤡᤗᤥᤏᤀᤥ ᤀᤠᤏᤡ᤹ᤏᤢ ᤛᤥᤖᤡᤰ ᤐᤥᤱᤛᤧ ᤔᤧᤓᤧᤴ᤹॥ ᤂᤧᤱᤜᤠ᤹ ᤀᤠᤰᤂᤧᤴ ᤛᤠ᤹ᤖᤡᤰ ᤋᤠᤰᤁᤧᤓᤧ᤹ᤒᤠ ᤔᤧᤈᤥᤰ ᤂᤧᤴ ᤂᤡᤏᤡ᤹ ᤀᤠᤵᤑᤣᤰ ᤔᤡᤰᤁᤧᤸᤗᤧ ᤁᤧᤏᤡᤛᤢᤶᤛᤡᤶ᤹. ᤂᤧᤒᤩᤠᤱ ᤀᤠᤱᤃᤠ᤹ ᤕᤖᤢᤛᤗᤧ᤺ᤶᤔᤥ ᤆᤥᤃᤢᤱᤅᤠᤱ ᤘᤠ᤹ᤒᤠᤴ ᤏᤢᤒᤠᤀᤣ ᤐᤥ᤺ᤰᤂᤧᤖᤇ ᤑᤠ᤹ᤀᤠᤱ ᤂᤡᤏᤡ᤹ ᤁᤧᤀᤡ᤺ᤳᤋᤢᤶ᤹॥

²³ ᤂᤡᤏᤡ᤹ ᤂᤧᤱᤜᤠ᤹ ᤁᤧᤍᤢᤔᤢᤶᤛᤡᤶ᤹ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤧᤵᤗᤧᤰᤜᤠ᤹ ᤁᤧᤏᤡᤛᤢᤶᤔᤡᤸᤗᤧ. ᤀᤡᤛᤪᤠᤀᤡᤗᤀᤥ ᤁᤴ ᤐᤠ᤺ᤴᤜᤠ᤹ ᤌᤣᤏᤠᤎᤣᤃ ᤔᤧᤒᤥᤱᤏᤧᤸᤗ ᤔᤧᤘᤠ᤹ᤏᤧᤴᤗᤳᤇ ᤑᤠ᤹ᤀᤠᤱ ᤂᤡᤏᤡ᤹ ᤁᤢᤛᤡᤱ ᤁᤧᤏᤡ᤺ᤳᤋᤢᤶ᤹॥ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤅᤠᤱ ᤘᤠ᤹ᤖᤥ᥄”