ᤀᤡᤈᤁᤡᤀᤣᤗ 13 - LIFOTNTᤀᤡᤱᤗᤧᤰᤐᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ 1 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠᤗᤠᤶ ᤁᤴ ᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤁᤧᤖᤧ— 2 “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤏᤠᤀᤣ. ᤀᤡᤛᤪᤠᤀᤡᤗᤒᤠ ᤀᤡᤱᤗᤧᤰ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤔᤠᤱᤏᤡᤱᤘᤠ᤹ᤐᤠᤴ ᤐᤠᤖᤧ᤹. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤏᤡᤱᤘᤠ᤹ᤀᤥᤗᤠᤶ ᤔᤠᤱᤏᤡᤱᤘᤠ᤹ᤐᤠᤴ ᤔᤧᤒᤠ᤺ᤳᤋᤢᤖ ᤔᤧᤘᤠ᤹॥ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤧᤛᤧ᤹. ‘ᤕᤜᤘᤣ ᤍᤠᤱᤒᤧᤸᤗᤧ ᤁᤢᤒᤠ᤺ᤴᤈᤠᤰᤁᤡᤴ ᤂᤧᤵᤛᤧᤶᤔᤧ᤹॥ 3 ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤌᤣᤀᤠᤱ ᤔᤧᤴᤏᤡᤀᤣ ᤁᤧᤘᤠ᤹ᤒᤠ ᤏᤢ ᤀᤠᤵᤑᤣᤰ ᤂᤢᤴᤇᤡ᤹ ᤏᤡᤱᤘᤠ᤹ᤀᤥ ᤔᤧᤀᤡ᤺ᤳᤋᤢᤒᤠ ᤐᤠ᤺ᤴᤜᤠ᤹ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠᤀᤠᤱ ᤁᤧᤘᤠ᤹ᤒᤠ ᤀᤍᤱ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤔᤧᤈᤡ᤺ᤳᤋᤧ ᤔᤧᤛᤩᤧᤖᤥ᥄ 4 “‘ᤀᤡᤛᤪᤠᤀᤡᤗᤒᤠ ᤔᤏᤠᤛᤣ. ᤂᤡᤏᤡ᤹ ᤁᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤃ ᤁᤧᤎᤢᤵᤐᤠ ᤁᤧᤗᤢ᤺ᤶᤒᤠᤍᤧᤴᤜᤠ᤹ᤀᤥ ᤁᤢᤜᤱ ᤁᤧᤓᤠ᤺ᤶᤒᤠ ᤁᤡᤎᤡᤒᤠᤜᤠ᤹ ᤜᤧᤰᤋᤱᤒᤠ ᤔᤧᤈᤥᤰᤗᤥ॥ 5 ᤗᤠᤈᤣ᤹ ᤁᤧᤖᤧᤰ ᤐᤡᤛᤠᤱ ᤁᤧᤗᤢ᤺ᤶᤒᤠ ᤁᤧᤎᤢᤵᤐᤠ ᤗᤢᤱᤎᤠᤰᤜᤠ᤹ ᤆᤠ᤺ᤱᤘᤠ ᤔᤧᤵᤔᤠ ᤕᤠ᤺ᤶᤒᤰ ᤂᤧᤱᤜᤠ᤹ᤖᤧ ᤌᤣᤀᤠᤱ ᤔᤧᤴᤈᤥ᤺ᤰᤁᤣ ᤔᤧᤘᤠ᤹॥ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤕᤧᤴᤏᤥᤒᤠ ᤌᤱᤅᤥ ᤌᤎᤵ ᤔᤧᤸᤗ᤹ᤀᤣ ᤕᤧᤵᤔᤠᤖᤧ ᤗᤠᤃᤡ ᤂᤧᤱᤜᤠ᤹ᤖᤧ ᤔᤧᤶᤓᤠ᤹ᤀᤣ ᤔᤧᤘᤠ᤹॥ 6 ᤂᤧᤴᤏᤢ᤺ᤸᤗᤧᤃ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤢᤑᤥᤜᤠ᤹ ᤀᤡᤱᤗᤧᤰᤐᤠ ᤆᤥᤰ ᤜᤧᤰᤁᤩᤠᤱ ᤔᤧᤴᤘᤠ᤹ᤔᤏᤠᤒᤠ ᤔᤠᤱᤏᤡᤱᤘᤠ᤹ᤐᤠᤴᤜᤠ᤹ ᤔᤧᤒᤠ᤺ᤳᤋᤢ॥ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤱᤜᤠ᤹ ᤀᤠᤵᤑᤠᤸᤗᤧᤀᤠᤱ ᤔᤧᤒᤠᤱᤄᤢᤛᤡᤴᤇᤠᤱ ᤂᤧᤱᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢ᤹. “ᤁᤴ ᤀᤡᤱᤄᤱᤅᤡᤴᤃ ᤕᤜᤘᤣ ᤍᤠᤱᤒᤠᤗᤠᤶ ᤁᤧᤍᤠᤒᤠᤖᤥ॥” ᤜᤧᤰᤁᤣᤛᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤠᤱᤏᤡᤱᤘᤠ᤹ᤐᤠᤴᤜᤠ᤹ ᤂᤢᤏᤧ᤹ ᤁᤧᤳᤋᤢᤖ ᤁᤧᤗ᤹ᤒᤠ ᤏᤡᤱᤛᤠᤱ ᤔᤧᤈᤥᤃᤢ᤹᥄ 7 ᤌᤣ ᤂᤡᤏᤡ᤹ ᤁᤧᤏᤡᤛᤢᤶᤒᤠ ᤛᤢᤑᤥᤜᤠ᤹ ᤌᤧᤔᤠᤀᤡ ᤐᤥᤱᤔᤠ ᤛᤢᤰᤐᤡ᥅ ᤁᤖ ᤀᤰᤂᤣ ᤁᤧᤗ᤹ᤖᤡᤏᤧᤓᤃᤪ ᤁᤴ ᤀᤡᤱᤗᤧᤰᤁᤣ ᤐᤥᤱ᤹. “ᤁᤴ ᤀᤡᤱᤄᤱᤅᤡᤴ ᤕᤜᤘᤣ ᤍᤠᤱᤒᤠᤗᤠᤶ ᤁᤧᤍᤠᤒᤠᤖᤥ” ᤀᤠᤱᤃᤠ᤹ ᤂᤡᤏᤡ᤹ᤏᤢ ᤐᤠ᤺ᤵᤔᤠᤀᤣ ᤔᤧᤶᤒᤠ᤺ᤳᤋᤣ ᤘᤠ᤹ᤀᤠ॥ 8 “‘ᤂᤧᤸᤗᤧᤆᤥᤃᤢᤸᤗᤧ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤁᤧᤒᤠ᤺ᤳᤋᤢᤶᤒᤠᤜᤠ᤹ ᤀᤡᤱᤗᤧᤰᤁᤣ ᤆᤥᤰ ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤏᤡᤛᤢᤶᤒᤠ ᤛᤢᤑᤥᤜᤠ᤹ ᤛᤧᤰᤂᤠᤒᤠ ᤔᤧᤈᤥᤰᤏᤧᤴ. ᤀᤠᤱᤃᤠ᤹ ᤂᤡᤏᤡ᤹ ᤏᤡᤱᤔᤡᤀᤠᤖᤥ. ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱ᤹॥ 9 ᤀᤡᤱᤗᤧᤰᤐᤠ ᤛᤢᤑᤥᤜᤠ᤹ ᤁᤧᤏᤡᤒᤠ ᤏᤢ ᤔᤧᤴᤘᤠ᤹ᤔᤏᤠᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ ᤁᤧᤖᤧᤰ ᤀᤠᤱᤃᤠ᤹ ᤀᤠᤜᤢᤰᤁᤡᤸᤗᤧ ᤛᤠ᤺ᤵᤛᤢᤱᤛᤡᤱ᤹. ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡ ᤛᤱᤈᤢᤶᤓᤥᤜᤠ᤹ᤖᤧ ᤂᤧᤱᤜᤠ᤹ ᤔᤧᤗ᤺ᤳᤋᤢ ᤔᤧᤍᤣᤛᤢᤛᤡ᤹॥ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤡᤱᤜᤠ᤹ ᤀᤡᤛᤪᤠᤀᤡᤗᤒᤠ ᤛᤠᤵᤐᤴᤜᤠ᤹ᤀᤥᤗᤠᤶ ᤔᤠᤛᤢᤱ ᤐᤡᤖᤢᤱᤛᤡᤱ᤹. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤀᤠᤵᤑᤣᤰ ᤗᤠᤈᤣ᤹ᤀᤥ ᤀᤠᤵᤑᤠᤸᤗᤧᤀᤠᤱ ᤂᤢᤴᤇᤡ᤹ ᤗᤠᤱᤕᤥᤰ ᤔᤧᤴᤎᤠᤛᤢᤴ᤹॥ ᤂᤧᤒᤩᤠᤱ ᤀᤠᤱᤃᤠ᤹ᤀᤣ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤂᤡᤏᤡ᤹ ᤏᤡᤱᤘᤠ᤹ ᤁᤧᤄᤥᤛᤢᤶ᤹॥ 10 “‘ᤁᤴ ᤁᤢᤏᤡᤱᤘᤠ᤹ ᤁᤧᤈᤡ᤺ᤵᤐᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤏᤢ᤹ᤔᤠᤍᤠᤔᤠ ᤛᤏᤠᤖᤢᤱ ᤜᤥᤵᤔᤠᤀᤣ ᤜᤥ᤺ᤵᤛᤠᤱ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤀᤰᤂᤣ ᤔᤧᤔᤧᤳᤋᤢᤛᤡᤀᤠᤱ ᤀᤡᤱᤔᤧᤗᤧᤰᤋᤢᤛᤡ᤹. “ᤁᤧᤖᤧᤰ ᤐᤠ᤺ᤴᤜᤠ᤹ᤀᤥ ᤏᤢ᤹ᤔᤠᤍᤠᤔᤠ ᤛᤏᤠᤖᤢᤱ ᤘᤠ᤹” ᤂᤧᤸᤗᤧᤆᤥᤃᤢᤸᤗᤧ ᤀᤰᤂᤣ ᤐᤥᤱ᤹᥄ ᤁᤱᤃ ᤔᤏᤠᤜᤠ᤹ᤖᤧ ᤆᤧᤸᤗᤢᤱᤃᤣ᤺ᤰᤘᤠ ᤗᤢᤱᤎᤠᤰ ᤔᤧᤛᤧᤳᤋᤢᤀᤠᤱ ᤕᤧᤵᤐᤠ ᤁᤢᤀᤡᤛᤡᤰ ᤆᤥᤰ ᤜᤧᤰᤁᤩᤠᤱ ᤁᤴ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠᤜᤠ᤹ᤖᤧ ᤀᤠᤸᤗᤛᤠᤱ ᤁᤢᤓᤖᤠ ᤂᤠᤶᤔᤡᤸᤗᤧ ᤜᤡᤵᤔᤠ ᤔᤧᤃᤥ᤺ᤳᤋᤢ᤹᥄ 11 ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤱᤎᤠᤰᤁᤡᤴ ᤜᤠᤖᤠᤀᤣ ᤆᤠᤴ ᤑᤠ᤹ᤀᤠᤱ ᤂᤧᤴ ᤁᤢᤓᤖᤠ ᤂᤠᤶ ᤁᤧᤜᤡᤵᤐᤠᤜᤠ᤹ ᤔᤧᤳᤋᤧᤛᤧ᤹॥ ᤂᤀᤡᤰ ᤂᤀᤡᤰ ᤁᤧᤀᤡᤰᤛᤡᤱᤒᤠ ᤕᤶᤒᤠ ᤘᤜᤡᤳᤋᤡᤸᤗᤧ ᤁᤴ ᤆᤧᤸᤗᤢᤱᤃᤣ᤺ᤰᤘᤠ ᤆᤥᤃᤢ᤹. ᤕᤶᤒᤕᤶᤒᤠ ᤑ᤺ᤴᤜᤠ᤹ ᤏᤢ ᤂᤀᤡᤰ ᤂᤀᤡᤰ ᤁᤧᤀᤡᤰᤛᤡᤱᤒᤠ ᤛᤢᤖᤡᤳ ᤁᤣᤈᤱᤜᤠ᤹ᤖᤧ ᤗᤢ᤺ᤴᤍᤢᤍᤣᤛᤢ᤹॥ 12 ᤜᤧᤰᤁᤩᤠᤱ ᤗᤢᤱᤎᤠᤰᤜᤠ᤹ ᤗᤢ᤺ᤴᤏᤡᤸᤗᤧ. ᤔᤏᤠᤜᤠ᤹ ᤁᤶᤓᤗ᤹ᤖᤡᤰ ᤔᤧᤜᤠ᤺ᤵ ᤔᤧᤗ᤺ᤴ᤹. “ᤂᤠᤶᤔᤡᤸᤗᤧ ᤂᤡᤏᤡ᤹ ᤁᤧᤜᤡᤵᤋᤢᤶᤒᤠᤴ ᤌᤧᤔᤠ ᤐᤥ᤺ᤰᤂᤧᤒᤣ᥅” 13 “‘ᤁᤸᤗᤧᤆᤥᤃᤢᤸᤗᤧ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤸᤗ ᤀᤰᤂᤣ ᤐᤠ᤺ᤳᤋᤢ᤹—ᤀᤠᤛᤠᤰᤁᤧᤴᤏᤡᤸᤗᤧ ᤂᤀᤡᤰ ᤂᤀᤡᤰ ᤁᤧᤀᤡᤰᤛᤡᤱᤒᤠ ᤛᤢᤖᤡᤳ ᤁᤣᤈᤱᤜᤠ᤹ᤖᤧ. ᤀᤠᤛᤡᤰ ᤐᤥ᤺ᤰᤔᤥ ᤁᤧᤃᤢᤱᤒᤠ ᤆᤫᤠ᤺ᤳᤋᤡᤸᤗᤧ ᤜᤧᤰᤁᤩᤠᤱ ᤀᤠᤕᤠ᤺ᤰᤗᤧ᤹ᤔᤠ ᤑ᤺ᤴᤜᤠ᤹ᤖᤧ ᤀᤠᤱᤃᤠ᤹ ᤂᤡᤏᤡ᤹ ᤁᤢᤓᤖᤠ ᤂᤠᤶᤔᤡᤸᤗᤧ ᤁᤧᤜᤡᤵᤋᤢᤶᤒᤠ ᤗᤢᤱᤎᤠᤰᤁᤡᤴ ᤗᤢ᤺ᤴᤍᤢᤱᤍᤣᤛᤢᤱ᤹॥ 14 ᤀᤠᤱᤃᤠ᤹ ᤂᤡᤏᤡ᤹ ᤗᤢᤱᤎᤠᤰᤁᤡᤴ ᤁᤢᤒᤢᤱᤅᤥ ᤜᤠ᤹ᤕᤠᤰ ᤗᤢ᤺ᤴᤍᤢᤱᤍᤣᤛᤢᤱ᤹. ᤜᤧᤰᤁᤩᤠᤱ ᤁᤴ ᤗᤢ᤺ᤴᤏᤡᤸᤗᤧ ᤁᤸᤗᤧ ᤂᤡᤏᤡ᤹ ᤁᤧᤕᤢ᤺ᤳᤋᤡ᤹॥ ᤂᤧᤒᤩᤠᤱ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤂᤡᤏᤡ᤹ ᤏᤡᤱᤘᤠ᤹ ᤁᤧᤄᤥᤛᤢᤶ᤹॥ 15 ᤁᤢᤏᤢᤵᤔᤥ ᤗᤢᤱᤎᤠᤰᤁᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤏᤢ ᤁᤢᤓᤖᤠ ᤂᤠᤶ ᤁᤧᤜᤡᤵᤐᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥᤒᤠ ᤀᤠᤱᤃᤠ᤹ ᤀᤠᤛᤡᤰᤁᤡᤴ ᤏᤧ᤺ᤶᤏᤧ᤺ᤶᤒᤠ ᤐᤥᤱ᤹॥ ᤂᤧᤒᤩᤠᤱ ᤀᤠᤱᤃᤠ᤹ ᤂᤧᤏᤡ᤹ ᤀᤰᤂᤣ ᤔᤧᤳᤏᤡᤱ᤹. “ᤗᤢᤱᤎᤠᤰᤁᤡᤴ ᤏᤢ ᤁᤢᤓᤖᤠ ᤂᤠᤶ ᤁᤧᤜᤡᤵᤐᤠᤜᤠ᤹ ᤁᤧᤖᤧᤰ ᤔᤧᤜᤥᤵ॥ 16 ᤏᤢ᤹ᤔᤠᤍᤠᤔᤠ ᤛᤏᤠᤖᤢᤱ ᤜᤥᤵᤔᤠᤀᤣ ᤜᤥ᤺ᤵᤋᤧᤛᤠᤱ ᤕᤖᤢᤛᤗᤧ᤺ᤶᤔᤥ ᤛᤏᤠᤖᤢᤱ ᤋᤠ ᤑᤠ᤹ᤀᤠᤱ ᤁᤧᤒᤠ᤺ᤵᤐᤠ ᤂᤧᤱᤜᤠ᤹ ᤀᤡᤱᤗᤧᤰ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤐᤠ ᤔᤧᤘᤕᤧᤖᤥ॥ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤅᤠᤱ ᤘᤠ᤹ᤖᤥ᥄”’ 17 “ᤀᤠᤸᤗ. ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤏᤠᤀᤣ. ᤂᤢᤴᤇᤡ᤹ ᤀᤠᤵᤑᤣᤰ ᤏᤡᤱᤘᤠ᤹ᤀᤥ ᤔᤧᤀᤡ᤺ᤳᤋᤢᤒᤠ ᤔᤠᤱᤏᤡᤱᤘᤠ᤹ᤐᤠᤴ ᤁᤧᤒᤠ᤺ᤵᤔᤠ ᤔᤧᤴᤇᤢᤔᤠᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤐᤠᤖᤧ᤹॥ 18 ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤁᤠᤵᤐᤥᤒᤠ ᤏᤢ ᤌᤠᤱᤒᤧᤴ ᤀᤠᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤕᤠᤶᤛᤠᤶᤜᤠ᤹ ᤆᤧᤴᤏᤥ ᤁᤧᤎᤠᤔᤠ ᤔᤧᤴᤇᤢᤔᤠᤜᤠ᤹ ᤔᤧᤈᤡ᤺ᤳᤋᤧ ᤔᤧᤛᤩᤧᤖᤥ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤜᤠ᤹ᤀᤥ ᤁᤡᤳᤆᤠᤰ ᤔᤠᤰᤐᤧᤴᤇᤠᤵᤜᤠ᤹ ᤁᤧᤄᤣ᤺ᤰᤂᤢᤶᤔᤠᤱ ᤐᤳ ᤜᤧᤰᤁᤩᤠᤱ ᤁᤡᤳᤆᤠᤰ ᤐ᤺ᤳᤌᤠᤱᤜᤠ᤹ᤖᤧ ᤁᤧᤍᤧᤵᤋᤢᤶᤛᤡᤶᤔᤠᤱ ᤁᤧᤈᤥᤃᤢᤶᤛᤡᤶ᤹॥ ᤌᤣ ᤂᤡᤏᤡ᤹ ᤀᤠᤵᤑᤣᤰ ᤛᤶᤎᤠᤱ ᤔᤧᤰᤔᤠᤛᤡᤔᤠ ᤔᤧᤴᤍᤠ᤺ᤳᤋᤣ ᤘᤣ᤹ᤜᤠ᤹ ᤀᤡᤈᤥᤀᤥ ᤌᤠᤔᤠ ᤛᤢᤰᤔᤧᤍᤧᤳ ᤑᤠ᤹ᤀᤠᤱ ᤁᤧᤀᤡ᤺ᤳᤋᤢᤶᤒᤡ᥅ 19 ᤜᤢᤰᤐᤰ ᤌᤡᤰᤏᤧᤳᤇᤡ ᤜ᤺ᤰᤛᤡ ᤀᤡᤃᤪ ᤁᤢᤄᤧ᤺ᤰ ᤌᤡᤰᤏᤧᤳᤇᤡ ᤂᤖᤧ᤺ᤱᤗᤧ ᤗᤠᤃᤡ ᤀᤠᤱᤃᤠ᤹ ᤀᤠᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤂᤡᤏᤡ᤹ ᤀᤠᤱᤃᤠ᤹ ᤀᤠᤈᤠ᤺ᤳᤌᤡ ᤁᤧᤍᤣᤛᤢᤶ॥ ᤀᤡᤱᤗᤧᤰᤐᤠ ᤐᤠ᤺ᤴᤜᤠ᤹ ᤂᤧᤶᤔᤠ ᤁᤢᤛᤡᤖᤠ᤹ ᤁᤧᤎᤠᤱᤒᤠ ᤀᤠᤔᤏᤠᤜᤠ᤹ ᤂᤡᤏᤡ᤹ ᤀᤡᤱᤃᤧᤗᤧᤰᤋᤢᤶᤛᤡᤶᤔᤠᤱ ᤛᤡᤔᤠ ᤔᤧᤶᤒᤥᤱᤔᤏᤠᤒᤠ ᤀᤠᤔᤏᤠᤜᤠ᤹ ᤂᤡᤏᤡ᤹ ᤁᤧᤛᤧᤖᤢᤶᤛᤡᤶ᤹. ᤜᤧᤰᤁᤩᤠᤱ ᤜᤡᤱᤔᤠ ᤔᤧᤴᤕᤠ᤺ᤵᤔᤏᤠᤒᤠ ᤔᤏᤠᤜᤠ᤹ᤏᤢ ᤜᤡᤱᤔᤠᤖᤧ ᤗᤠᤃᤡ ᤔᤠᤱᤜᤢᤵ ᤁᤧᤈᤥᤃᤢᤶ᤹॥ 20 “ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤐᤢᤜᤠ᤹ ᤜᤧᤰᤁᤣ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤀᤡᤈᤥᤀᤥ ᤌᤠᤔᤠ ᤁᤧᤃᤥ᤺ᤳᤋᤢᤶᤛᤡᤶᤒᤠ ᤂᤡᤏᤡ᤹ ᤁᤡᤳᤆᤠᤰ ᤔᤠᤰᤐᤧᤴᤇᤠᤵᤜᤠ᤹ᤖᤧ ᤁᤢᤍᤰᤗᤧᤱᤘᤠᤀᤥ ᤀᤠᤱᤃᤠ᤹ ᤘᤠ᤹ᤀᤠ॥ ᤀᤠᤱᤃᤠ᤹ ᤂᤡᤏᤡ᤹ ᤜᤢᤰᤁᤥᤗᤠᤶ ᤂᤧᤱᤜᤠ᤹ ᤏᤠᤵᤏᤡᤱ ᤜᤧᤰᤁᤩᤠᤱ ᤀᤡᤈᤥᤀᤥᤗᤠᤶ ᤐᤢᤜᤠ᤹ ᤗᤧᤵᤔᤏᤠᤍᤣᤔᤏᤠᤛᤡᤒᤠ ᤜᤧᤰᤁᤣ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤗᤧᤖᤢᤱᤍᤣᤛᤢᤱᤛᤡᤱ᤹॥ 21 ᤀᤠᤱᤃᤠ᤹ ᤂᤡᤏᤡ᤹ ᤁᤡᤳᤆᤠᤰ ᤐ᤺ᤳᤌᤠᤱᤜᤠ᤹ ᤋᤧᤖᤧᤰ ᤋᤧᤖᤧᤰ ᤌᤧ᤺ᤰᤂᤢᤱ᤹ ᤜᤧᤰᤁᤩᤠᤱ ᤂᤡᤏᤡ᤹ ᤁᤧᤍᤧᤶᤛᤢᤶᤛᤡᤶᤒᤠᤗᤠᤶ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤛᤧ᤺ᤵᤋᤢᤱᤛᤡᤱ᤹॥ ᤀᤠᤸᤗᤀᤠᤱᤎᤥ ᤂᤧᤱᤜᤠ᤹ ᤂᤡᤏᤡ᤹ ᤋᤠᤵᤑᤧ᤺ᤸᤗᤡᤰ ᤔᤧᤵᤔᤠ ᤆᤠᤜᤠᤰ ᤔᤧᤶᤒᤥᤱᤏᤧᤴ॥ ᤂᤧᤒᤩᤠᤱ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤂᤡᤏᤡ᤹ ᤏᤡᤱᤘᤠ᤹ ᤁᤧᤄᤥᤛᤢᤶ᤹॥ 22 ᤂᤡᤏᤡ᤹ ᤀᤡᤱᤗᤧᤰ ᤐᤠ᤺ᤴᤜᤠ᤹ᤖᤧ ᤛᤠᤶᤕᤥᤒᤠᤜᤠ᤹ ᤂᤢᤴᤇᤡ᤹ ᤛᤠᤘᤣ᤺ᤳ ᤕᤅᤧᤖ ᤁᤧᤕᤠ᤺ᤴᤍᤢᤶᤛᤡᤶᤔᤠᤱ ᤘᤠ᤹. ᤁᤖ ᤂᤧᤱᤜᤠ᤹ ᤂᤢᤴᤇᤡ᤹ ᤏᤡᤱᤘᤠ᤹ ᤋᤢᤰᤂᤣ ᤆᤠᤖ ᤁᤧᤗ᤹ᤒᤠ ᤀᤠᤏᤡᤱᤘᤠ᤹ ᤜᤥ᤺ᤵᤋᤧ॥ ᤋᤠᤰᤁᤧᤓᤧ᤹ᤒᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤜᤠ᤹ ᤔᤧᤗᤧᤖᤢᤸᤗᤧ ᤂᤧᤱᤜᤠ᤹ ᤑᤠ᤹ᤀᤠᤱ ᤂᤡᤏᤡ᤹ ᤂᤧᤱᤜᤠ᤹ ᤗᤠᤕᤥ ᤆᤥ᤺ᤰᤔᤠᤀᤠᤱ ᤐᤵᤔᤠ ᤀᤠ᤺ᤴᤇᤡᤱᤔᤠ ᤁᤧᤒᤡᤖᤢᤶᤛᤡᤶ॥ 23 ᤂᤧᤸᤗᤧᤆᤥᤃᤢᤸᤗᤧ ᤀᤠᤸᤗᤀᤠᤱᤎᤥ ᤂᤡᤏᤡ᤹ ᤀᤡᤱᤗᤧᤰᤐᤠ ᤛᤢᤑᤥᤜᤠ᤹ ᤏᤢ ᤀᤡᤱᤗᤧᤰᤐᤠ ᤔᤠᤱᤏᤡᤱᤘᤠ᤹ᤐᤠᤴᤜᤠ᤹ ᤏᤢᤒᤧ॥ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤂᤡᤏᤡ᤹ ᤁᤧᤍᤧᤶᤛᤢᤶᤛᤡᤶᤒᤠᤗᤠᤶ ᤛᤧ᤺ᤵᤋᤢᤱᤛᤡᤱ᤹॥ ᤜᤧᤰᤁᤩᤠᤱ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤂᤡᤏᤡ᤹ ᤏᤡᤱᤘᤠ᤹ ᤁᤧᤄᤥᤛᤢᤶᤗᤥ॥” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.