ᤀᤡᤈᤁᤡᤀᤣᤗ 12 - LIFOTNTᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠᤜᤠ᤹ᤖᤧᤴ ᤔᤡᤰᤛᤣᤴ 1 ᤕᤜᤘᤣ ᤍᤠᤱᤒᤠᤗᤠᤶ ᤕᤠᤶᤔᤥ ᤗᤳᤇᤠ ᤀᤡᤱᤄᤱ ᤀᤠᤱᤃᤠ᤹ᤀᤥ ᤁᤧᤖᤧ— 2 “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤏᤠᤀᤣ. ᤂᤧᤏᤧ᤹ ᤐᤡᤑᤩᤢᤱ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤁᤧᤕᤢᤱ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤡᤰ ᤐᤳ ᤁᤖ ᤀᤥᤔᤢᤔᤠ ᤔᤧᤴᤍᤧᤴᤏᤧᤴ॥ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤧᤰᤂᤥ᤹ ᤐᤳ ᤁᤖ ᤂᤧᤶᤔᤠ ᤔᤧᤴᤍᤧᤴᤏᤧᤴ᤹॥ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤃ ᤐᤡᤑᤩᤢᤱᤒᤠ ᤔᤏᤠᤛᤡᤖᤥ॥ 3 “ᤂᤧᤸᤗᤧᤆᤥᤃᤢᤸᤗᤧ ᤀᤠᤸᤗ. ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤏᤠᤀᤣ. ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤀᤠᤱ ᤁᤧᤘᤠ᤹ᤒᤠ ᤔᤏᤠ ᤗᤧᤱᤛᤡᤱᤅᤧ᤹॥ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤒᤠ ᤔᤏᤠ᤺ᤸᤗᤧ ᤁᤢᤔᤠ ᤛᤢᤰᤋᤢᤒᤠ ᤕᤠᤖᤡᤰ ᤁᤢᤓᤠ ᤆᤡᤃᤰᤘᤠᤜᤠ᤹ ᤁᤰ ᤆᤥᤃᤧ᤹. ᤜᤧᤰᤁᤩᤠᤱ ᤁᤢᤓᤠ ᤘᤣ᤹ᤍᤧᤴᤏᤥ ᤐᤣ᤺ᤰᤔᤠᤖᤧ ᤗᤠᤃᤡ ᤁᤧᤜᤡᤶᤔᤡᤴ ᤗᤧᤖᤧ᤹॥ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤋᤃᤡᤀᤣ ᤂᤧᤏᤧ᤹ ᤁᤴ ᤆᤥᤃᤧ᤹ ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤏᤡᤔᤠ ᤁᤧᤶᤛᤢᤰᤗ॥ ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤀᤰᤋᤱᤒᤠ ᤐᤡᤑᤩᤢᤱᤒᤠᤛᤡᤛᤠᤱ. ᤜᤠᤃ ᤂᤧᤱᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤏᤡᤱᤘᤠ᤹ ᤔᤧᤒᤡᤖᤢᤒᤡ॥ 4 ᤗᤧᤴᤍᤡᤰᤛᤠ ᤂᤧᤏᤧ᤹ ᤁᤧᤃᤰᤁᤡᤴ ᤗᤠ᤺ᤰᤁᤠᤳ ᤗ᤺ᤳᤋᤧ᤹ ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ᤖᤧ ᤂᤧᤏᤧ᤹ ᤀᤥᤔᤧᤵᤔᤠ ᤁᤧᤶᤛᤢᤰᤗ॥ ᤂᤧᤒᤩᤠᤱ ᤕᤢ᤺ᤴᤇᤡᤰ. ᤂᤧᤱᤜᤠ᤹ᤖᤧ ᤀᤥᤃᤧᤶᤔᤧᤳᤋᤠᤱ ᤔᤧᤒᤳᤋᤡᤸᤗᤧ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠᤜᤠ᤹ ᤔᤠ᤺ᤱᤄᤠᤒᤠ ᤗᤠᤈᤣ᤹ᤜᤠ᤹ᤀᤥ ᤀᤡᤖᤡᤰ ᤗᤠᤱᤔᤧᤄᤣ᤺ᤰ ᤔᤧᤒᤣ᤺ᤰᤐᤠ ᤁᤢᤀᤡᤛᤡᤰ ᤂᤧᤏᤧ᤹ ᤁᤧᤜᤡᤶᤔᤡᤴ ᤗᤧᤖᤧ᤹॥ 5 ᤂᤧᤱᤜᤠ᤹ ᤀᤥᤔᤧᤔᤖ ᤔᤧᤒᤳᤋᤡᤸᤗᤧ ᤂᤧᤏᤧ᤹ ᤗᤢᤱᤎᤠᤰᤁᤥ ᤗᤳᤇᤠ ᤁᤢᤜᤱᤎᤡᤰ ᤜᤱᤛᤧ᤹ ᤜᤧᤰᤁᤩᤠᤱ ᤂᤧᤵᤔᤥᤗᤠᤶ ᤗ᤺ᤴᤍᤧᤀᤠᤱ ᤐᤣᤃᤧ᤹॥ 6 ᤂᤧᤱᤜᤠ᤹ ᤀᤥᤔᤧᤔ᤺ᤸᤗᤧ ᤂᤧᤏᤧ᤹ ᤁᤧᤃᤰᤁᤡᤴ ᤑᤰᤋᤠᤱᤅᤥ ᤑᤥ᤺ᤰᤂᤧ᤹ᤀᤠᤱ ᤕᤢᤰᤂᤧ᤹ ᤜᤧᤰᤁᤩᤠᤱ ᤛᤧᤴᤍᤡᤰ ᤗᤠᤱᤄᤣᤃᤧ ᤐᤣᤃᤧ᤹॥ ᤂᤧᤏᤧ᤹ ᤁᤧᤏᤠᤖᤠᤴ ᤋᤧᤵᤋᤧ᤹ ᤜᤧᤰᤁᤣᤗ᤹ᤖᤡᤰ ᤂᤧᤏᤧ᤹ ᤁᤧᤗᤧᤖᤢᤒᤠ ᤗᤠᤈᤣᤴ ᤂᤧᤏᤧ᤹ ᤏᤡᤔᤠ ᤁᤧᤴᤇᤢᤰᤋᤢᤴ᤹॥ ᤌᤣᤀᤠᤱᤓᤧᤸᤗᤧ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤂᤧᤏᤧ᤹ ᤗᤳᤌᤡᤰ ᤔᤡᤰᤛᤣᤴ ᤆᤥ᤺ᤰᤏᤧᤀᤠᤱ ᤘᤠ᤹॥” 7 ᤁᤸᤗᤧᤆᤥᤃᤢᤸᤗᤧ ᤀᤠᤱᤃᤠ᤹ ᤔᤧᤔᤧᤳᤋᤠᤱᤒᤠ ᤜᤧᤰᤁᤣᤀᤣ ᤆᤥᤃᤢᤱ॥ ᤀᤠᤱᤃᤠ᤹ ᤔᤧᤍᤧᤶᤔᤠ ᤔᤧᤍᤣ᤹ᤀᤠᤒᤠ ᤁᤢᤀᤡᤛᤡᤰ ᤆᤡᤃᤰᤘᤠᤜᤠ᤹ᤖᤧ ᤛᤎᤧᤰ ᤁᤧᤍᤡᤶᤒᤠ ᤀᤠᤱᤃᤠ᤹ ᤀᤠᤃᤰᤁᤡᤴ ᤗᤧᤴᤍᤡᤰ ᤔᤛᤣᤖᤠ ᤗᤠ᤺ᤰᤁᤠᤳ ᤗ᤺ᤳᤋᤢᤱ॥ ᤂᤧᤒᤩᤠᤱ ᤕᤢ᤺ᤴᤇᤡᤰ ᤔᤏᤠᤜᤠ᤹ ᤀᤥᤔᤧᤔᤕᤧᤀᤠᤱ ᤔᤧᤒᤳᤇᤧᤸᤗᤧ. ᤀᤠᤜᤢᤰᤁᤡᤸᤗᤧ ᤗᤢᤱᤎᤠᤰᤁᤥ ᤁᤢᤜᤱᤎᤡᤰ ᤑᤠ᤺ᤴᤍᤢᤱ ᤂᤶᤓᤩᤠᤱ ᤀᤠᤱᤃᤠ᤹ ᤀᤠᤃᤰᤁᤡᤴ ᤀᤠᤓᤰᤋᤠᤱᤅᤥ ᤕᤢᤰᤂᤢᤱᤅᤠᤱ ᤛᤧᤴᤍᤡᤰ ᤗᤠ᤺ᤰᤁᤠᤳ ᤗ᤺ᤴᤍᤠᤱ ᤐᤣᤃᤠᤱ॥ 8 ᤁᤢᤍᤠ᤺ᤴᤍᤡᤰᤔᤠ ᤋᤠᤏᤠᤶ ᤕᤜᤘᤣ ᤍᤠᤱᤒᤠᤗᤠᤶ ᤁᤴ ᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤁᤧᤖᤧ— 9 “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤏᤠᤀᤣ. ᤁᤴ ᤐᤡᤑᤩᤢᤱᤒᤠ. ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ᤖᤧ ᤁᤴ ᤐᤠ᤺ᤴᤜᤠ᤹ᤖᤧ ᤁᤢᤒᤣᤴ ᤌᤧᤔᤠ ᤑᤠ᤹ᤀᤠᤱ ᤛᤧ᤺ᤴᤁᤧᤶᤍᤥᤖ ᤔᤧᤘᤠ᤹॥ 10 ᤂᤧᤏᤧ᤹ ᤂᤧᤱᤜᤠ᤹ ᤀᤰᤂᤣ ᤔᤧᤳᤋᤧᤛᤧ᤹. ‘ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤁᤴ ᤕᤠ᤺ᤶᤒᤰᤜᤠ᤹ᤃ ᤕᤖᤢᤛᤗᤧ᤺ᤶᤔᤥᤒᤠ ᤜᤠᤱ ᤛᤡᤍᤁᤡᤕᤠᤜ᤺ᤴ ᤏᤢ ᤀᤡᤛᤪᤠᤀᤡᤗᤒᤠ ᤁᤧᤖᤧᤰ ᤔᤏᤠᤜᤠ᤹ᤖᤧ ᤗᤠᤃᤡ ᤀᤡᤱᤄᤱᤗᤥ॥’ 11 ᤂᤧᤏᤧ᤹ ᤁᤧᤈᤥᤃᤢᤒᤠ ᤕᤠ᤺ᤶᤒᤰᤜᤠ᤹ᤃ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤜᤠᤖᤠᤀᤣ ᤌᤣ ᤐᤥᤱ᤹ ᤁᤧᤗ᤹ᤒᤠ ᤐᤠ᤺ᤴᤜᤠ᤹ ᤀᤥᤛᤣ᤺ᤴᤎᤠᤱ ᤆᤥ᤺ᤰᤔᤠ ᤗᤳᤇᤠ ᤔᤡᤰᤛᤣᤴ ᤑᤠ᤹ᤀᤠᤱ ᤂᤧᤱᤜᤠ᤹ ᤆᤧᤰᤋᤧᤛᤧ᤹. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤒᤠ ᤁᤢᤀᤡᤛᤡᤰ ᤗᤠᤈᤣ᤹ᤗᤠᤶ ᤔᤧᤏᤠ᤺ᤳᤋᤢ ᤔᤧᤍᤣᤛᤢᤛᤡ᤹॥ 12 “ᤗᤢᤱᤎᤠᤰᤁᤡᤸᤗᤧ ᤁᤢᤜᤱᤅᤥᤗᤠᤶ ᤛᤡᤍᤣᤁᤡᤕᤠ ᤜᤠᤱᤅᤡᤸᤗᤧᤀᤠᤱ ᤂᤢᤏᤧ᤹ ᤁᤢᤔᤠ ᤛᤢᤰᤋᤢᤒᤠ ᤕᤠᤖᤡᤰᤗᤰ ᤁᤢᤕᤢᤀᤠᤱ ᤛᤧᤴᤍᤡᤰ ᤕᤖᤢᤛᤗᤧ᤺ᤶᤔᤡᤴ ᤗᤧᤖᤢ᤹॥ ᤂᤧᤸᤗᤧ ᤁᤢᤏᤠᤖᤠᤴ ᤋᤧᤵᤋᤢ᤹. ᤂᤧᤒᤩᤠᤱ ᤂᤢᤏᤧ᤹ ᤗᤧᤖᤢᤒᤠ ᤗᤠᤈᤣᤴ ᤁᤢᤔᤡᤰᤁᤡᤸᤗᤧ ᤏᤡᤔᤠ ᤔᤧᤛᤢᤰᤋᤢᤴ᤹॥ 13 ᤂᤧᤒᤩᤠᤱ ᤀᤠᤱᤃᤠ᤹ ᤀᤠᤕᤥ᤺ᤱᤅᤡᤴ ᤂᤢᤏᤧ᤹ ᤁᤢᤛᤶᤎᤠᤱ ᤗᤠᤵᤑᤣᤛᤢᤱ᤹ ᤜᤧᤰᤁᤩᤠᤱ ᤂᤧᤴ ᤀᤠᤱᤃᤠ᤹ ᤀᤠᤀᤡᤈᤥᤀᤥ ᤌᤠᤛᤢᤱ᤹॥ ᤀᤠᤱᤃᤠ᤹ ᤂᤢᤏᤧ᤹ ᤒᤣᤒᤡᤗᤥᤏᤡᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣ᤹ ᤒᤣᤒᤡᤗᤥᤏᤀᤥ ᤑᤧᤳᤋᤢᤱ᤹. ᤜᤧᤰᤁᤣᤛᤠᤱ ᤂᤧᤸᤗᤧ ᤂᤧᤴ ᤗᤠᤈᤣᤴ ᤀᤠᤵᤑᤠᤸᤗᤧᤀᤠᤱ ᤔᤧᤏᤡᤛᤢᤴ᤹. ᤜᤧᤰᤁᤩᤠᤱ ᤂᤢᤏᤧ᤹ ᤂᤧᤵᤔᤥᤀᤣ ᤛᤡᤖᤥ॥ 14 ᤀᤠᤱᤃᤠ᤹ ᤂᤧᤸᤗᤧ ᤁᤢᤛᤧᤘᤠᤖᤥᤒᤠᤜᤠ᤹ ᤏᤢ ᤁᤢᤎᤰᤛᤢᤒᤠᤜᤠ᤹ ᤁᤧᤖᤧᤰ ᤐᤡᤛᤠᤱ ᤑᤢᤳᤇᤡᤱᤈᤩᤠᤱ ᤛᤧᤛᤢᤱᤛᤡᤱ᤹ ᤜᤧᤰᤁᤩᤠᤱ ᤂᤢᤴᤇᤡ᤹ ᤀᤣᤃᤠᤱ ᤋᤠᤓᤣᤴ ᤐᤠᤱᤄᤢᤱ᤹॥ 15 ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤱᤜᤠ᤹ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤑᤢᤳᤇᤡᤱᤈᤩᤠᤱ ᤛᤧᤛᤢᤱᤛᤡᤱᤅᤡᤸᤗᤧ. ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤂᤧᤱᤜᤠ᤹ᤖᤧ ᤏᤡᤱᤘᤠ᤹ ᤔᤧᤄᤥᤛᤢ᤹॥ 16 ᤁᤖ ᤀᤠᤱᤃᤠ᤹ ᤂᤧᤱᤜᤠ᤹ᤀᤥ ᤛᤠᤰᤘᤠ᤺ᤴ. ᤔᤡᤱᤍᤣ᤹ ᤀᤡᤃᤪ ᤋᤧᤴᤎᤱᤅᤥᤒᤠ ᤛᤡᤔᤠᤗᤠᤶ ᤀᤠᤈᤧ᤺ᤳᤇᤡᤰ ᤏᤴᤇᤢᤱᤛᤡᤱ᤹. ᤜᤧᤰᤁᤣᤗ᤹ᤖᤡᤰ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤧᤈᤥᤃᤢᤒᤠ ᤁᤧᤖᤧᤰ ᤕᤠᤶᤃᤧᤛᤡᤱᤒᤠ ᤗᤠᤕᤥᤜᤠ᤹ ᤂᤢᤴᤇᤡ᤹ ᤁᤧᤍᤧᤶᤒᤠ ᤁᤧᤍᤣ᤹ᤒᤠᤜᤠ᤹ ᤔᤧᤔᤧᤳᤋᤢᤛᤡ᤹॥ ᤂᤧᤒᤩᤠᤱ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤏᤡᤱᤘᤠ᤹ ᤔᤧᤄᤥᤛᤢᤖᤥ॥” ᤕᤖᤢᤛᤗᤧ᤺ᤶᤔᤥᤒᤠᤜᤠ᤹ ᤔᤧᤃᤡ ᤔᤧᤕᤱ 17 ᤕᤜᤘᤣ ᤍᤠᤱᤒᤠᤗᤠᤶ ᤁᤴ ᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤁᤧᤖᤧ— 18 “ᤏᤠᤛᤡᤱᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤏᤠᤀᤣ. ᤂᤧᤏᤧ᤹ ᤁᤧᤍ᤺ᤰᤁᤡᤴ ᤁᤧᤈ᤺ᤸᤗᤧ ᤆᤡᤖᤡᤶᤗᤡᤶᤏᤠ ᤕᤰᤂᤧ᤹. ᤂᤧᤏᤧ᤹ ᤁᤧᤈᤫᤠ᤺ᤳᤋᤡᤴ ᤁᤧᤎᤢᤅᤢᤸᤗᤧ ᤁᤡᤔᤠᤖᤧ ᤌᤧᤃᤰᤁᤰᤏᤠ ᤕᤰᤂᤧ᤹॥ 19 ᤂᤧᤏᤧ᤹ ᤔᤏᤠᤜᤠ᤹ ᤀᤰᤂᤣ ᤔᤧᤳᤋᤧᤛᤧ᤹. ‘ᤀᤡᤛᤪᤠᤀᤡᤗ ᤗᤠᤈᤣ᤹ᤀᤥ ᤏᤢ ᤕᤖᤢᤛᤗᤧᤔ ᤁᤧᤕᤢᤱᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤕᤠ᤺ᤶᤒᤣᤀᤥ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤂᤧᤱᤜᤠ᤹ᤖᤧ ᤆᤡᤖᤡᤶᤗᤡᤶᤏᤠ ᤔᤧᤕᤱᤗ ᤂᤢᤴᤇᤡ᤹ ᤋ᤺ᤰᤁᤡᤴ ᤔᤧᤈᤖᤥ ᤜᤧᤰᤁᤩᤠᤱ ᤏᤡᤱᤛᤠᤶᤔᤥ ᤂᤢᤴᤇᤡ᤹ ᤆᤫᤠ᤺ᤳᤋᤡᤴ ᤔᤧᤎᤢᤅᤢ᤹. ᤌᤣᤀᤠᤱᤓᤧᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤔᤏᤠᤛᤧᤵᤔᤠ ᤕᤠ᤺ᤶᤒᤰᤁᤡᤸᤗᤧ ᤆᤥᤃᤢᤸᤗᤧ ᤂᤢᤴᤇᤡ᤹ ᤗᤠᤈᤣᤴ ᤘᤖᤧᤱᤗᤧᤱ ᤔᤢᤖᤧᤰ ᤂᤠᤖᤧᤰ ᤐᤥᤱ᤹॥ 20 ᤐᤠᤱᤈᤢᤶᤜᤠ᤹ ᤂᤠᤵᤐᤢᤌᤩ᤺ᤱ ᤔᤧᤈᤥᤃᤢ᤹ ᤂᤧᤒᤩᤠᤱ ᤀᤡᤰᤋᤠᤵᤜᤠ᤹ ᤆᤡᤈᤡ ᤂᤰᤂᤰ ᤐᤥᤱ᤹॥ ᤂᤧᤒᤩᤠᤱ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤂᤡᤏᤡ᤹ ᤏᤡᤱᤘᤠ᤹ ᤁᤧᤄᤥᤛᤢᤶᤗᤥ॥’” ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ᤖᤧ ᤗᤠᤃᤡ ᤁᤢᤛᤱ ᤂᤠᤜᤢᤴ 21 ᤕᤜᤘᤣ ᤍᤠᤱᤒᤠᤗᤠᤶ ᤀᤡᤱᤄᤱᤎᤡᤰ ᤕᤠᤶᤔᤥ ᤀᤠᤱᤃᤠ᤹ᤀᤥ ᤁᤧᤖᤧ— 22 “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤏᤠᤀᤣ. ‘ᤀᤡᤛᤪᤠᤀᤡᤗᤀᤥ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢᤒᤠ ᤋᤠ᤹ᤍᤡ᤺ᤴ ᤂᤧᤏᤧ᤹ ᤁᤧᤄᤧᤵᤛᤢᤀᤠᤱ ᤘᤠ᤹. ᤕᤧᤶ ᤗᤧᤰᤁᤠᤱ ᤐᤣᤰ. ᤜᤧᤰᤁᤩᤠᤱ ᤛᤢᤑᤥᤴ ᤔᤧᤱᤃᤧᤳᤋᤣ ᤜᤏᤧᤒᤠ ᤐᤥᤱ᤹॥’ 23 ᤂᤧᤏᤧ᤹ ᤔᤏᤠᤜᤠ᤹ ᤔᤧᤳᤋᤧᤛᤧ᤹. ‘ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤀᤠᤱᤃᤠ᤹ ᤁᤴ ᤋᤠ᤹ᤍᤡ ᤂᤧᤍᤠ᤺ᤴ ᤏᤢᤵᤛᤢᤱ᤹. ᤜᤧᤰᤁᤩᤠᤱ ᤂᤡᤏᤡ᤹ ᤁᤴ ᤀᤠᤸᤗᤀᤠᤱᤎᤥ ᤐᤠ᤺ᤵᤔᤠ ᤁᤧᤏᤠ᤹ᤖᤢᤶ᤹॥’ ᤀᤠᤸᤗ ᤋᤃᤡᤒᤠᤸᤗᤧ ᤁᤢᤗᤧᤰᤘᤠ ᤂᤧᤏᤧ᤹ ᤁᤢᤛᤱ ᤋᤠ᤹ᤍᤡ ᤌᤡᤰ ᤂᤧᤱᤜᤠ᤹ ᤔᤧᤳᤋᤧᤛᤧ᤹—‘ᤁᤧᤖᤧᤰ ᤛᤢᤑᤥᤜᤠ᤹ ᤁᤧᤵᤔᤠᤖᤧ ᤗᤠᤃᤡ ᤕᤧᤶᤔᤡᤴ ᤋᤩᤧᤀᤠᤱ ᤘᤠ᤹᥄’ 24 “ᤀᤠᤸᤗᤀᤠᤱᤎᤥ ᤀᤡᤛᤪᤠᤀᤡᤗᤀᤥ ᤀᤡᤱᤗᤧᤰᤐᤠ ᤛᤢᤑᤥᤜᤠ᤹ ᤏᤢ ᤔᤢᤷᤗᤧ᤺ᤶᤒᤠ ᤔᤠᤱᤏᤡᤱᤘᤠ᤹ᤐᤠᤴᤜᤠ᤹ ᤔᤧᤒᤥᤱᤏᤧᤴ॥ 25 ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤠ᥄ ᤀᤠᤱᤃᤠ᤹ ᤁᤴ ᤐᤠ᤺ᤳᤋᤢᤱᤏᤧᤓᤃᤪ. ᤂᤧᤴ ᤁᤧᤳ॥ ᤀᤡᤛᤪᤠᤀᤡᤗᤒᤠ ᤐᤡᤵᤑᤩᤢᤱᤒᤠᤛᤣ. ᤀᤠᤸᤗ ᤀᤠᤰᤂᤩᤠᤖᤡᤰᤁᤠᤱ ᤔᤧᤛᤢᤏᤧᤴ॥ ᤂᤡᤏᤡ᤹ ᤁᤧᤜᤡᤅᤡᤀᤠᤱ ᤁᤧᤘᤕᤡᤖᤀᤣ ᤀᤠᤱᤃᤠ᤹ ᤂᤡᤏᤡ᤹ ᤔᤧᤰᤔᤠᤛᤡᤔᤧᤴ ᤁᤧᤳᤋᤢᤱ᤹॥ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤱᤅᤠᤱ ᤘᤠ᤹᥄” 26 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠᤗᤠᤶ ᤁᤴ ᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤁᤧᤖᤧ— 27 “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤏᤠᤀᤣ. ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢᤖ ᤔᤧᤘᤠ᤹. ‘ᤂᤢᤏᤧ᤹ ᤏᤡᤛᤢᤒᤠ ᤛᤢᤑᤥᤜᤠ᤹ ᤕᤖᤡᤰ ᤋᤱᤒᤣ ᤀᤣᤃᤠᤱᤗᤰ ᤁᤧᤳᤗᤥ. ᤂᤢᤏᤧ᤹ᤃ ᤋᤠ᤺ᤴᤍᤡ ᤋᤠ᤺ᤴᤍᤡᤒᤠ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤠᤱᤏᤡᤱᤘᤠ᤹ᤐᤠᤴ ᤐᤠ᤺ᤳᤋᤢᤖ ᤘᤠ᤹॥’ 28 ᤂᤧᤸᤗᤧᤆᤥᤃᤢᤸᤗᤧ ᤂᤧᤏᤧ᤹ ᤂᤧᤱᤜᤠ᤹ ᤔᤧᤳᤋᤧᤛᤧ᤹. ‘ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤀᤠᤰᤂᤩᤠᤖᤡᤰᤁᤠᤱ ᤔᤧᤛᤢᤏᤧᤴ᥄ ᤀᤠᤱᤃᤠ᤹ ᤂᤡᤏᤡ᤹ ᤕᤱᤔᤠ ᤛᤧᤳᤏᤡᤱᤅᤠᤱ ᤘᤠ᤹ᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤀᤠᤸᤗ ᤀᤠᤱᤃᤠ᤹ ᤆᤥᤃᤢᤱ᤹॥ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤴ ᤐᤠᤖᤠᤱᤅᤠᤱ ᤘᤠ᤹ᤖᤥ᥄’” |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.