ᤀᤡᤈᤁᤡᤀᤣᤗ 11 - LIFOTNTᤕᤖᤢᤛᤗᤧ᤺ᤶᤔᤥ ᤂᤢᤶᤍᤡᤱ 1 ᤂᤧᤒᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠᤶᤛᤠᤶᤔᤡᤸᤗᤧ ᤀᤠᤱᤃᤠ᤹ ᤐᤰᤂᤠᤱᤅᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶ ᤏᤠᤱᤃᤧᤴ ᤗᤧᤵᤔᤠᤱᤒᤠ ᤕᤶᤒᤠ ᤗᤥᤶᤎᤣ᤺ᤵᤐᤥ ᤋᤣ᤹ᤖᤠᤱ. ᤂᤧᤵᤔᤥ ᤀᤠᤱᤃᤠ᤹ ᤕᤧᤰᤕᤰᤁᤥᤒᤠ ᤏᤡᤒᤥᤱᤅᤠᤱ ᤅᤠᤛᤡ ᤔᤏᤠᤜᤠ᤹ ᤏᤡᤛᤢᤱᤛᤡᤱ॥ ᤂᤧᤱᤜᤠ᤹ᤀᤥ ᤀᤈ᤻ᤈᤢᤖᤗᤧ ᤁᤢᤛ᤻ᤛᤠ ᤕᤠᤈᤏᤩᤠᤜ᤺ᤴ ᤏᤢ ᤒᤏᤠᤕᤠᤜ᤺ᤸᤗᤧ ᤁᤢᤛ᤻ᤛᤠ ᤐᤗᤋᤩᤠᤜᤴ ᤘᤕᤧᤳᤇᤡ. ᤂᤧᤴ ᤏᤧᤵᤑᤢᤜᤠ᤹ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤶᤗᤥᤒᤠ ᤘᤕᤧᤛᤡ॥ 2 ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠᤶᤛᤠᤶᤔᤡᤸᤗᤧ ᤀᤠᤱᤃᤠ᤹ ᤔᤧᤳᤋᤠᤱ. “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤏᤠᤀᤣ. ᤁᤴ ᤔᤏᤠᤜᤠ᤹ᤖᤧ ᤑᤧᤴᤕᤠ᤺ᤶᤒᤰ ᤆᤥ᤺ᤰᤔᤠ ᤏᤡᤱᤛᤣᤰ ᤔᤧᤈᤥᤃᤢᤖ ᤔᤧᤘᤠ᤹ ᤜᤧᤰᤁᤩᤠᤱ ᤁᤴ ᤕᤧᤰᤕᤰᤁᤥ ᤋᤠᤵᤑᤧ᤺ᤶᤒᤠ ᤆᤥ᤺ᤰᤔᤠ ᤛᤢᤈᤠ ᤔᤧᤒᤡᤖᤢᤛᤡᤖ ᤔᤧᤘᤠ᤹॥ 3 ᤂᤧᤱᤜᤠ᤹ᤖᤧ ᤔᤏᤠᤜᤠ᤹ᤖᤧ ᤀᤰᤂᤣ ᤔᤧᤔᤧᤳᤋᤢᤛᤡ᤹. ‘ᤌᤣ ᤁᤴ ᤜᤡᤶ ᤆᤥ᤺ᤰᤔᤠ ᤏᤢᤒᤠ ᤕᤧᤶ ᤔᤣ᤺ᤴᤏᤠᤱᤒᤡ᥅ ᤁᤴ ᤕᤧᤰᤕᤰᤁᤡᤱᤃ ᤗᤳᤇᤠ ᤑᤧᤴᤈᤣ᤹ ᤂᤵᤐᤩᤠ ᤜᤧᤰᤋᤱᤒᤠ ᤆᤥᤰ॥ ᤀᤠᤏᤡ᤹ᤃ ᤂᤵᤐᤩᤠᤀᤥ ᤁᤧᤕᤠᤰᤐᤠ ᤛᤠ ᤜᤧᤰᤁᤣ ᤁᤵᤔᤥ ᤀᤠᤏᤢ᤹ ᤀᤠᤍᤠᤀᤠᤱ ᤀᤠᤕᤠᤰ॥’ 4 ᤂᤧᤸᤗᤧᤆᤥᤃᤢᤸᤗᤧ ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤏᤠᤀᤣ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤋᤰᤗᤧᤱᤘᤠᤀᤥ ᤕᤶᤒᤠ ᤀᤡᤰᤗᤠᤀᤥ ᤏᤢ ᤏᤢᤖᤡᤰᤁᤠᤱ ᤔᤠᤱᤏᤡᤱᤘᤠ᤹ᤐᤠᤴ ᤐᤠᤖᤧ᤹॥” 5 ᤕᤜᤘᤣ ᤍᤠᤱᤒᤧᤸᤗᤧ ᤁᤢᤕᤠᤶᤛᤠᤶᤔᤡᤴ ᤀᤠᤱᤃᤠ᤹ᤀᤥ ᤌᤩᤧ. ᤜᤧᤰᤁᤩᤠᤱ ᤂᤧᤸᤗᤧ ᤀᤰᤂᤣ ᤐᤠ᤺ᤳᤋᤧ᤹ ᤔᤧᤳᤋᤠᤱ. “ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ ᤀᤰᤂᤣ ᤔᤧᤳᤋᤢᤛᤡ᤹—ᤂᤡᤏᤡ᤹ ᤌᤣ ᤁᤧᤒᤠ᤺ᤳᤋᤢᤶᤗ ᤁᤧᤘᤕᤡ᤹ ᤂᤧᤴ ᤀᤠᤱᤃᤠ᤹ ᤁᤢᤛᤡᤱ ᤏᤡ᤺ᤳᤋᤢᤱ᤹. ᤌᤣᤀᤠᤱᤓᤧᤸᤗᤧ ᤂᤡᤏᤡ᤹ ᤏᤡᤱᤘᤠ᤹ᤀᤥ ᤁᤧᤀᤡ᤺ᤳᤋᤢᤶᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤀᤠᤱᤃᤠ᤹ ᤏᤡᤛᤢᤱ᤹॥ 6 ᤁᤴ ᤕᤧᤰᤕᤰᤁᤥ ᤂᤡᤏᤡ᤹ ᤕᤖᤡᤰ ᤔᤏᤠᤜᤠ᤹ ᤁᤧᤛᤧᤖᤢᤶᤛᤡᤶ ᤂᤧᤶᤒᤩᤠᤱ ᤁᤵᤔᤥᤒᤠ ᤔᤠᤖᤠᤶᤜᤠ᤹ ᤆᤣᤜᤠ᤹ᤖᤧ ᤁᤧᤎᤡᤶᤛᤢᤶ॥ 7 “ᤂᤧᤸᤗᤧᤆᤥᤃᤢᤸᤗᤧ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ᤹—ᤁᤴ ᤕᤧᤰᤕᤰᤁᤡᤴ ᤛᤧᤰᤂᤠᤀᤣ ᤗᤳᤇᤠ ᤑᤧᤴᤈᤣ᤹ ᤂᤵᤐᤩᤠᤖᤥ. ᤁᤖ ᤛᤠᤔᤢᤸᤗᤠᤜᤠ᤹ᤃ ᤂᤡᤏᤡ᤹ ᤔᤧᤴᤘᤠ᤹ᤔᤏᤠᤒᤠ ᤂᤠᤛᤧᤴᤗᤥ᤺ᤶᤔᤠᤸᤗᤧ ᤁᤧᤛᤧᤖᤢᤶᤛᤡᤶᤒᤠ ᤔᤏᤠᤜᤠ᤹ᤖᤥ॥ ᤂᤡᤏᤡ᤹ ᤁᤴ ᤂᤵᤐᤩᤠᤀᤥᤗᤠᤶ ᤜᤠᤖᤠᤀᤣ ᤀᤢ᤺ᤱᤏᤡᤱ ᤗ᤺ᤳᤏᤡᤱ᤹॥ 8 ᤛᤠ᤹ᤖᤡᤰ ᤁᤧᤃᤡᤖᤢᤶᤒᤠ ᤋᤠᤓᤣ᤺ᤸᤗᤧ ᤋᤧᤴᤎᤱᤅᤡᤴ ᤀᤠᤱᤃᤠ᤹ ᤂᤡᤏᤡ᤹ᤀᤥ ᤋᤠᤖᤢᤱ᤹. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹॥ 9 ᤀᤠᤱᤃᤠ᤹ ᤕᤖᤢᤛᤗᤧᤔᤗᤠᤶ ᤂᤡᤏᤡ᤹ ᤗᤠ᤺ᤰᤁᤠᤳ ᤏᤠ᤺ᤳᤏᤡᤱ ᤗ᤺ᤳᤏᤡᤱ ᤜᤧᤰᤁᤩᤠᤱ ᤘᤣ᤹ ᤗᤠᤈᤣ᤹ᤒᤠᤜᤠ᤹ᤖᤧ ᤂᤢᤴᤇᤡ᤹ ᤜᤢᤰᤁᤥ ᤌᤠᤏᤡᤱ᤹. ᤂᤡᤏᤡ᤹ ᤋᤰᤗᤧᤱᤘᤠᤀᤥ ᤀᤠᤱᤃᤠ᤹ ᤀᤠᤄᤠᤛᤧᤴᤗᤥ᤺ᤶᤔᤠ ᤕᤠ᤺ᤶᤒᤰᤁᤡᤴ ᤂᤧᤱᤜᤠ᤹ᤖᤧ ᤔᤧᤈᤥᤃᤢ᤹॥ 10 ᤀᤡᤛᤪᤠᤀᤡᤗᤒᤠ ᤀᤡ᤺ᤴᤍᤥᤜᤠ᤹ᤀᤥ ᤂᤡᤏᤡ᤹ ᤁᤧᤶᤛᤧᤖᤡ᤹॥ ᤀᤠᤱᤃᤠ᤹ ᤂᤡᤏᤡ᤹ ᤂᤠᤛᤧᤴᤗᤥ᤺ᤴᤏᤡᤱᤅᤠᤱ ᤀᤠᤵᤋᤡᤰ ᤁᤢ᤺ᤳᤏᤡᤱ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤂᤡᤏᤡ᤹ ᤏᤡᤱᤘᤠ᤹ ᤁᤧᤄᤥᤛᤢᤶ᤹॥ 11 ᤔᤣ᤺ᤴ. ᤁᤴ ᤕᤧᤰᤕᤰᤁᤡᤴ ᤂᤡᤏᤡ᤹ ᤗᤠᤃᤡ ᤑᤧᤴᤈᤣ᤹ ᤂᤵᤐᤩᤠ ᤔᤧᤒᤥᤱᤏᤧᤴ᤹. ᤜᤧᤰᤁᤩᤠᤱ ᤁᤵᤔᤥ ᤁᤧᤕᤠᤰᤐᤠ ᤛᤠᤴ ᤜᤧᤰᤁᤣ ᤂᤡᤏᤡ᤹ ᤋᤠᤱᤛᤧ᤺ᤵ ᤁᤧᤶᤒᤥ᤺ᤰᤂᤡᤏ᤹॥ ᤀᤠᤱᤃᤠ᤹ ᤀᤡᤛᤪᤠᤀᤡᤗᤒᤠ ᤀᤡ᤺ᤴᤍᤥᤜᤠ᤹ᤀᤥᤀᤠᤱ ᤂᤡᤏᤡ᤹ ᤂᤠᤛᤧᤴ ᤆᤥ᤺ᤰᤏᤡᤱ᤹. 12 ᤜᤧᤰᤁᤩᤠᤱ ᤀᤠᤱᤃᤠ᤹ᤀᤣ ᤕᤜᤘᤣ ᤍᤠᤱᤒᤠᤀᤠ ᤑᤠ᤹ᤀᤠᤱ ᤂᤡᤏᤡ᤹ ᤏᤡᤱᤘᤠ᤹ ᤁᤧᤄᤥᤛᤢᤶ᤹॥ ᤌᤣᤀᤠᤱᤓᤧᤸᤗᤧ ᤀᤠᤱᤃᤠ᤹ ᤀᤠᤎᤡᤶᤜᤠ᤹ ᤏᤢ ᤀᤠᤀᤡᤱᤈᤠᤱᤜᤠ᤹ ᤂᤡᤏᤡ᤹ ᤁᤧᤀᤡ᤺ᤳᤋᤢᤶᤒᤠᤀᤠᤱ ᤜᤥᤵ ᤁᤧᤏᤠ᤺ᤳᤋᤢᤶᤒᤠ ᤜᤥᤵ ᤁᤖ ᤂᤡᤏᤡ᤹ ᤂᤡᤖᤡ ᤗᤠᤈᤣ᤹ᤀᤥᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤌᤡᤶᤜᤠ᤹ ᤛᤠᤰᤌᤡᤶᤜᤠ᤹ ᤁᤧᤀᤡ᤺ᤳᤋᤢᤶ ᤁᤧᤏᤠ᤺ᤳᤋᤢᤶᤔᤠᤱ ᤁᤧᤘᤕᤡ᤹॥” 13 ᤀᤠᤱᤃᤠ᤹ ᤁᤴ ᤔᤠᤱᤏᤡᤱᤘᤠ᤹ᤐᤠᤴᤏᤡᤴ ᤐᤠ᤺ᤳᤋᤢᤱᤗ ᤐᤳᤇᤠᤱᤅᤡᤸᤗᤧᤛᤠ ᤒᤏᤠᤕᤠᤜ᤺ᤸᤗᤧ ᤁᤢᤛ᤻ᤛᤠ ᤐᤗᤋᤩᤠᤜᤴ ᤛᤩᤧ॥ ᤂᤧᤒᤩᤠᤱ ᤀᤠᤱᤃᤠ᤹ ᤂᤠᤶᤔᤥ ᤛᤠᤶᤒᤥᤴ ᤜᤒᤳ ᤑᤴᤇᤡᤱᤅᤠᤱ ᤜᤧᤰᤁᤩᤠᤱ ᤑᤡᤖᤡᤰ ᤑᤡ᤺ᤰᤋᤠᤱᤗ ᤐᤠ᤺ᤳᤋᤢᤱ. “ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤀᤣ ᤌᤣ ᤛᤧᤰᤂᤠ ᤂᤧᤏᤧ᤹ ᤀᤡᤛᤪᤠᤀᤡᤗᤀᤥ ᤁᤧᤏᤶᤒᤠᤀᤠᤱ ᤁᤧᤘᤠ᤹ᤒᤠᤜᤠ᤹ ᤁᤧᤖᤧᤰ ᤁᤧᤛᤩᤧᤖᤢᤛᤡᤒᤡ᥅” ᤀᤡᤛᤪᤠᤀᤡᤗᤖᤧ ᤁᤢᤏᤢ᤺ᤱᤔᤠᤖᤧᤴ ᤁᤢᤔᤠᤱᤜᤢᤵ 14 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠᤗᤠᤶ ᤁᤴ ᤀᤡᤱᤄᤱᤅᤡᤴ ᤀᤠᤱᤃᤠ᤹ᤀᤥ ᤁᤧᤖᤧ— 15 “ᤏᤠᤛᤡᤃᤧᤴ ᤌᤰᤗᤠ ᤁᤧᤃᤵᤐᤠ ᤔᤏᤠᤀᤣ. ᤂᤧᤏᤧ᤹ ᤜᤧᤰᤁᤩᤠᤱ ᤂᤧᤏᤧ᤹ ᤀᤠᤵᤑᤣᤰ ᤁᤧᤃᤠ᤹ᤀᤡᤜᤠ᤹ ᤏᤢ ᤗᤠᤈᤣ᤹ᤗᤠᤶᤒᤠ ᤔᤧᤗ᤺ᤳᤋᤢ ᤔᤧᤍᤣᤛᤢᤛᤡᤒᤠ ᤁᤧᤖᤧᤰ ᤀᤡᤛᤪᤠᤀᤡᤗᤒᤠ ᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤕᤠ᤺ᤶᤒᤣᤀᤥ ᤕᤖᤢᤛᤗᤧ᤺ᤶᤔᤥ ᤀᤠᤸᤗᤛᤠᤱ ᤁᤧᤍᤠᤱᤒᤠ ᤁᤧᤕᤠ᤺ᤰᤐᤠ ᤔᤏᤠᤜᤠ᤹ ᤋᤠ᤹ᤔᤧᤈᤧᤱᤗ ᤔᤧᤒᤳ॥ ᤂᤧᤱᤜᤠ᤹ᤖᤧ ᤀᤰᤂᤣ ᤔᤧᤒᤠ᤺ᤳᤋᤢ᤹. ‘ᤁᤴ ᤔᤏᤠᤜᤠ᤹ ᤕᤜᤘᤣ ᤍᤠᤱᤒᤠᤗᤠᤶ ᤔᤠ᤺ᤱᤄᤠ ᤔᤧᤘᤠ᤹. ᤁᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤈᤣᤴ ᤂᤢᤏᤧ᤹ ᤀᤠᤏᤡ᤹ ᤀᤠᤒᤡᤖᤧᤀᤠᤱ ᤏᤧᤖᤥ᥄’ 16 “ᤂᤧᤸᤗᤧᤆᤥᤃᤢᤸᤗᤧ. ᤗᤠᤈᤣ᤹ᤗᤠᤶ ᤔᤧᤗ᤺ᤳᤋᤢ ᤔᤧᤍᤣᤛᤢᤛᤡᤒᤠᤜᤠ᤹ ᤔᤧᤳᤋᤧ᤹ᤛᤧ᤹. ‘ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹—ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤗᤠᤈᤣ᤹ᤜᤠ᤹ᤀᤥ ᤂᤡᤏᤡ᤹ ᤑᤢᤳᤇᤡᤱᤈᤩᤠᤱ ᤛᤧᤏᤡᤱᤍᤣᤏᤡᤱᤅᤠᤱ ᤁᤧᤘᤕᤡᤛᤠᤱ. ᤂᤡᤏᤡ᤹ ᤗᤠᤈᤣ᤹ᤗᤠᤶ ᤁᤧᤶᤗ᤺ᤳᤋᤡ ᤁᤧᤶᤍᤣᤛᤡᤀᤠᤱ ᤁᤧᤘᤕᤡᤒᤠ ᤕᤧᤶᤔᤥ ᤀᤠᤱᤃᤠ᤹ᤀᤣ ᤂᤡᤏᤡ᤹ ᤛᤣᤛᤣᤍᤧᤴᤏᤠᤖᤥ॥’ 17 ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ ᤔᤧᤳᤋᤧᤛᤧ᤹. ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢ᤹—‘ᤀᤠᤱᤃᤠ᤹ ᤂᤡᤏᤡ᤹ ᤑᤢᤳᤇᤡᤱᤈᤩᤠᤱ ᤁᤧᤛᤧᤖᤡᤀᤠᤱ ᤁᤧᤘᤕᤡᤒᤠ ᤔᤧᤴᤇᤠᤶ ᤛᤢᤘᤠᤱᤜᤠ᤹ᤀᤥᤗᤠᤶ ᤀᤠᤱᤃᤠ᤹ ᤕᤠᤶᤔᤥ ᤑᤢᤱᤏᤡᤱ ᤋᤠ᤺ᤳᤏᤡᤱ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤡᤛᤪᤠᤀᤡᤗᤒᤠ ᤗᤠᤈᤣᤴ ᤂᤡᤏᤡ᤹ ᤕᤠᤶᤔᤥ ᤐᤡᤏᤡᤱ᤹॥’ 18 “ᤔᤏᤠᤜᤠ᤹ ᤂᤢᤴᤇᤡ᤹ ᤗᤠᤈᤣ᤹ᤀᤥ ᤔᤧᤏᤢ᤺ᤱ ᤔᤧᤍᤠ᤺ᤸᤗᤧ. ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤕᤠᤶᤃᤧᤛᤡᤱᤒᤠ ᤆᤀᤡ᤺ᤳᤜᤠ᤹ᤖᤧ ᤁᤢᤕᤥ᤺ᤰᤜᤠ᤹ ᤏᤢ ᤕᤠᤶᤃᤧᤛᤡᤱᤒᤠ ᤏᤠᤘᤠᤀᤡᤳᤗᤠᤜᤠ᤹ ᤔᤧᤄᤧᤳᤋᤢ ᤔᤧᤍᤣᤛᤢᤛᤡ᤹॥ 19 ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤱᤜᤠ᤹ ᤗᤳᤇᤠ ᤛᤡᤰᤗᤢᤱᤔᤠ᤹ ᤏᤢ ᤀᤠᤱᤃᤠ᤹ ᤗᤧᤵᤔᤠᤱ ᤁᤧᤘᤠ᤹ᤒᤠ ᤏᤡᤱᤘᤠ᤹ ᤐᤡᤖᤢᤱᤛᤡᤱ᤹॥ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤐᤠᤴ ᤔᤧᤱᤄᤧᤶᤔᤏᤠᤒᤠ ᤗᤢᤱ ᤜᤧᤰᤋᤱᤒᤠ ᤛᤡᤰᤗᤢᤱᤔᤠᤴ ᤂᤧᤳᤋᤢᤱᤍᤣᤛᤢᤱ᤹ ᤜᤧᤰᤁᤩᤠᤱ ᤀᤡᤱᤈᤠᤱ ᤁᤧᤀᤡ᤺ᤵᤐᤠ ᤁᤧᤏᤠ᤺ᤵᤐᤠ ᤏ᤺ᤶᤏ᤺ᤶᤒᤠ ᤛᤡᤰᤗᤢᤱᤔᤠ᤹ ᤐᤡᤖᤢᤱᤛᤡᤱ᤹. 20 ᤂᤧᤸᤗᤧᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤀᤠᤀᤡᤱᤈᤠᤱᤜᤠ᤹ ᤏᤢ ᤀᤠᤎᤡᤶᤜᤠ᤹ ᤔᤧᤀᤡ᤺ᤳᤋᤢ ᤔᤧᤏᤠ᤺ᤳᤋᤢ᤹॥ ᤂᤧᤒᤩᤠᤱ ᤂᤧᤱᤜᤠ᤹ ᤛᤧᤰᤂᤠᤒᤠ ᤀᤠᤱᤃᤠ᤹ ᤀᤠᤔᤏᤠ ᤔᤧᤒᤥᤱ᤹. ᤜᤧᤰᤁᤩᤠᤱ ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱ ᤐᤥᤱᤅᤠ॥ 21 ᤁᤖ ᤀᤠᤛᤢᤳᤌᤥ ᤏᤢ ᤕᤠᤶᤃᤧᤛᤡᤱᤒᤠ ᤏᤠᤘᤠᤀᤡᤳᤗᤠᤜᤠ᤹ ᤛᤧᤘᤠ ᤔᤧᤵᤔᤠ ᤂᤢᤴᤇᤡ᤹ ᤛᤡᤖᤠ᤹ ᤁᤧᤎᤠᤱᤒᤠᤜᤠ᤹. ᤀᤠᤱᤃᤠ᤹ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤗᤠᤕᤥᤜᤠ᤹ᤖᤧ ᤁᤢᤗᤧᤰᤘᤠ ᤂᤢᤴᤇᤡ᤹ ᤁᤰ ᤕᤥᤖ ᤂᤢᤶᤍᤡᤱ ᤐᤡᤖᤢᤱᤛᤡᤱ᤹॥ ᤀᤠᤱᤃᤠ᤹ ᤔᤢᤰᤛᤠᤶᤍᤠᤱᤒᤠ ᤕᤜᤘᤣ ᤍᤠᤱᤒᤠᤴ ᤐᤠᤖᤠᤱᤅᤠᤱ ᤘᤠ᤹ᤖᤥ᥄” 22 ᤂᤧᤒᤩᤠᤱ ᤁᤖᤢᤒᤜᤠ᤹ᤖᤧ ᤂᤢᤴᤇᤡ᤹ ᤗᤠᤵᤜᤠ᤹ ᤌᤥ ᤜᤵᤑᤧ ᤔᤧᤓᤧᤛᤢ ᤜᤧᤰᤁᤩᤠᤱ ᤂᤢᤴᤇᤡ᤹ ᤐᤣᤛᤠᤱᤒᤠ ᤁᤠᤵᤗᤥ᤺ᤰᤜᤠ᤹ᤏᤢ ᤛᤥᤖᤡᤰ ᤋᤠᤱᤛᤠᤱᤒᤥ ᤌᤠ᤺ᤱ ᤔᤧᤒᤥᤃᤧ. ᤂᤶᤓᤩᤠᤱ ᤂᤧᤱᤜᤠ᤹ ᤛᤶᤎᤠᤱ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱᤅᤡᤴ ᤐᤳᤇᤧ॥ 23 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤔᤡᤍᤡᤱᤅᤡᤴ ᤕᤧᤰᤕᤰᤁᤥᤗᤠᤶ ᤌᤥ ᤐᤣ ᤜᤧᤰᤁᤩᤠᤱ ᤂᤧᤴ ᤏᤠᤱᤃᤧᤴ ᤐᤡᤛᤠᤱ ᤗᤧᤵᤔᤠᤱᤒᤠ ᤁᤥ᤺ᤰᤔᤠ ᤑᤠᤱᤈᤱ ᤛᤶᤎᤠᤱ ᤑᤴᤇᤡᤱ॥ 24 ᤂᤧᤴ ᤀᤣᤃᤠᤱ ᤒᤣᤒᤡᤗᤥᤏᤀᤥ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤀᤠᤱ ᤁᤧᤘᤠ᤹ᤒᤠᤜᤠ᤹ᤀᤥ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤕᤠᤶᤛᤠᤶᤔᤡᤸᤗᤧ ᤀᤠᤱᤃᤠ᤹ ᤛᤢᤑᤥᤀᤥ ᤕᤠᤶᤔᤥ ᤕᤠᤱᤏᤠ ᤁᤧᤳᤋᤠᤱ॥ ᤜᤧᤰᤁᤣᤗ᤹ᤖᤡᤰ ᤀᤠᤱᤃᤠ᤹ ᤕᤖᤢᤛᤗᤧ᤺ᤶᤔᤥ ᤐᤣᤃᤠᤱᤅᤡᤸᤗᤧ ᤏᤡᤛᤢᤱᤒᤠ ᤛᤢᤑᤥᤴ ᤏᤢᤒᤧ॥ 25 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤠᤱᤃᤠ᤹ ᤀᤥ᤺ᤴᤎᤠᤰᤋᤠᤱᤅᤠᤱ ᤘᤕᤧᤒᤠ ᤁᤧᤖᤧᤰ ᤐᤠ᤺ᤴᤜᤠ᤹ ᤔᤧᤍᤧᤶᤛᤢ ᤔᤧᤍᤣ᤹ᤖᤢᤛᤡᤀᤠᤱ ᤁᤧᤘᤠ᤹ᤒᤠᤜᤠ᤹ ᤀᤠᤱᤃᤠ᤹ ᤔᤧᤳᤋᤢᤱᤛᤡᤱᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.