ᤀᤡᤈᤁᤡᤀᤣᤗ 10 - LIFOTNTᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤔᤡᤍᤡᤱᤅᤡᤴ ᤔᤠᤱᤜᤡᤶᤔᤥᤗᤠᤶ ᤆᤳᤇᤡᤱ 1 ᤀᤠᤱᤃᤠ᤹ ᤀᤠᤛᤢᤑᤥᤀᤥ ᤁᤖᤢᤒᤜᤠ᤹ᤖᤧ ᤂᤢᤴᤇᤡ᤹ ᤌᤧᤃᤣᤰ ᤛᤶᤎᤠᤱᤒᤠ ᤛᤧᤸᤗᤧᤱ ᤛᤧᤸᤗᤧᤱ ᤁᤧᤀᤥ᤺ᤵᤐᤠ ᤋᤠᤶᤍᤠᤶᤒᤠ ᤁᤧᤓᤧᤛᤡᤱᤒᤠᤍᤧᤴᤏᤡᤸᤗᤧ ᤁᤢᤛᤶᤎᤠᤱ ᤜᤡ᤺ᤰᤁᤱᤁᤱᤒᤠ ᤔᤢᤎᤡᤱᤗᤢᤱ ᤜᤧᤰᤋᤱᤒᤠ ᤜᤠᤱᤕᤢᤰᤏᤠ ᤌᤡᤰ ᤏᤡᤎᤠᤒᤧᤒᤠ ᤏᤡᤛᤢᤱ॥ 2 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤂᤧᤴ ᤗᤡᤵᤗᤡᤱᤃᤣ ᤂᤡ᤺ᤸᤗᤧ ᤋᤣᤳ ᤁᤧᤈᤠᤱᤒᤠ ᤔᤏᤠᤴ ᤐᤠ᤺ᤴᤇᤠ᤺ᤳᤋᤢᤀᤠᤱ ᤔᤧᤳᤋᤢ. “ᤂᤧᤴ ᤁᤖᤢᤒᤜᤠ᤹ᤖᤧ ᤂᤢᤴᤇᤡ᤹ ᤛᤡᤃᤠᤱ ᤁᤧᤒᤵᤐᤠ ᤁᤧᤀᤡᤒᤠ ᤁᤠᤵᤗᤥ᤺ᤰᤜᤠ᤹ᤖᤧ ᤁᤢᤗᤢᤶᤔᤥ ᤐᤣᤃᤧ᤹. ᤜᤧᤰᤁᤩᤠᤱ ᤜᤢᤰᤐᤰ ᤌᤡᤰ ᤁᤧᤍᤡ᤺ᤵᤐᤠ ᤔᤡᤄᤠᤱᤃᤪᤥ᤺ᤰ ᤕᤠᤱᤛᤡᤱᤅᤧ᤹ᤀᤠᤱ ᤕᤧᤰᤕᤰᤁᤡᤸᤗᤧ ᤁᤢᤛᤶᤎᤠᤱ ᤜᤳᤇᤧ ᤛᤧᤛᤧᤍᤣᤛᤧ᤹॥” ᤀᤠᤱᤃᤠ᤹ ᤀᤥᤔᤧᤳᤋᤢᤱᤅᤠᤱ ᤐᤳᤇᤠᤱᤅᤡᤸᤗᤧ ᤂᤧᤸᤗᤧ ᤜᤧᤰᤁᤣᤀᤣ ᤆᤥᤃᤢ॥ 3 ᤔᤏᤠ᤺ᤴ ᤛᤡᤃᤠᤱ ᤗᤠᤛᤧᤸᤗᤧ ᤔᤠᤱᤜᤡᤶᤔᤡᤸᤗᤧ ᤕᤥᤜᤠᤱ ᤁᤢᤏᤢᤵᤔᤠ ᤗᤧᤵᤔᤠᤱ ᤁᤖᤢᤒᤜᤠ᤹ ᤔᤧᤕᤧᤶᤛᤡᤱᤅᤠᤱ ᤔᤧᤕᤧᤒᤧ. ᤜᤧᤰᤁᤩᤠᤱ ᤁᤢᤒᤣᤛᤠᤱᤒᤠ ᤗᤰᤂᤢᤶᤔᤡᤴ ᤔᤡᤔᤡᤍᤡᤱᤒᤠ ᤂᤠ᤹ᤔᤡ᤺ᤵᤐᤠᤸᤗᤧ ᤛᤎᤧᤰ ᤋᤡᤶᤛᤧ॥ 4 ᤂᤧᤒᤩᤠᤱ ᤁᤖᤢᤒᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱᤗᤠᤶ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤔᤡᤍᤡᤱᤅᤡᤴ ᤌᤠ᤺ᤱ ᤐᤥᤃᤧᤀᤠᤱ ᤔᤠᤱᤜᤡᤶᤔᤥᤒᤠ ᤗᤠᤶᤎᤣ᤺ᤵᤐᤥ ᤐᤣ॥ ᤁᤴ ᤔᤡᤔᤡᤍᤡᤱᤒᤠ ᤂᤠ᤹ᤔᤡ᤺ᤳᤋᤧᤸᤗᤧ ᤔᤠᤱᤜᤡᤶᤔᤡᤴ ᤛᤎᤧᤰ ᤋᤡᤶᤛᤧᤀᤠᤱ ᤏᤧᤛ᤻ᤛᤧ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤔᤡᤍᤡᤱᤅᤡᤸᤗᤧ ᤗᤰᤂᤢᤶᤔᤡᤴ ᤋᤡᤸᤗᤧᤰ ᤋᤡᤸᤗᤧᤰ ᤗᤧᤰᤋᤧᤀᤠᤱ ᤛᤧᤍᤡᤱᤍᤡᤱ ᤀᤥ᤺ᤳᤋᤧ॥ 5 ᤁᤖᤢᤒᤜᤠ᤹ᤖᤧ ᤂᤢᤴᤇᤡ᤹ ᤗᤠᤵᤜᤠ᤹ ᤁᤧᤔᤢᤶᤒᤠ ᤀᤡᤰᤗᤠᤴ ᤔᤢᤰᤛᤠᤶᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤀᤡᤰᤗᤠ ᤁᤢᤀᤡᤛᤡᤰ ᤗᤠᤀᤡᤰᤋᤧ ᤂᤧᤒᤩᤠᤱ ᤗᤠᤁᤠᤳᤐᤠ ᤗᤰᤂᤢᤶᤔᤥ ᤌᤠᤖᤡᤰᤁᤠᤱ ᤂᤧᤶᤔᤠ ᤛᤢᤰᤋᤧᤳᤋᤧ॥ 6 ᤕᤜᤘᤣ ᤍᤠᤱᤒᤧᤸᤗᤧ ᤗᤡᤵᤗᤡᤱᤃᤣ ᤂᤡ᤺ᤸᤗᤧ ᤋᤣᤳ ᤁᤧᤈᤠᤱᤒᤠ ᤔᤏᤠᤴ ᤔᤧᤳᤋᤢ. “ᤂᤧᤏᤧ᤹ ᤁᤖᤢᤒᤜᤠ᤹ᤖᤧ ᤂᤢᤴᤇᤡ᤹ ᤗᤢᤶᤔᤥ ᤐᤣᤃᤧ᤹ ᤜᤧᤰᤁᤩᤠᤱ ᤁᤠᤵᤗᤥ᤺ᤰᤜᤠ᤹ᤖᤧ ᤁᤢᤗᤢᤶᤔᤥᤗᤠᤶ ᤁᤢᤓᤠ ᤁᤧᤍᤡ᤺ᤵᤐᤠᤖ ᤁᤧᤒᤵᤐᤠ ᤁᤢᤓᤠ ᤔᤡᤄᤠᤱᤜᤠ᤹ ᤕᤠᤱᤛᤡᤱᤅᤧ᤹॥” ᤂᤧᤸᤗᤧᤆᤥᤃᤢᤸᤗᤧ ᤂᤧᤴ ᤔᤏᤠᤴ ᤛᤡᤃᤠᤱ ᤐᤣᤀᤠᤱ ᤗᤳᤇᤠ ᤁᤠᤵᤗᤥᤰ ᤌᤡᤰᤗᤧ ᤁᤢᤒᤣᤛᤠᤱ ᤕᤧᤶᤛᤡᤱ॥ 7 ᤂᤧᤒᤩᤠᤱ ᤗᤳᤇᤠ ᤁᤖᤢᤒ ᤌᤡᤰᤗᤧ ᤁᤢᤜᤢᤰᤁᤡᤴ ᤂᤧᤵᤔᤥ ᤛᤴᤇᤢᤀᤠᤱ ᤂᤧᤴ ᤜᤢᤖᤢᤖᤢ ᤁᤧᤍᤡ᤺ᤵᤐᤠᤖ ᤁᤧᤕᤢᤱᤒᤠ ᤔᤡᤀᤥᤗᤠᤶ ᤁᤢᤓᤠ ᤁᤧᤍᤡ᤺ᤵᤐᤠᤖ ᤁᤧᤒᤵᤐᤠ ᤔᤡᤄᤠᤱᤜᤠ᤹ ᤕᤠᤱᤛᤡᤱ॥ ᤂᤧᤸᤗᤧ ᤂᤧᤴ ᤗᤡᤵᤗᤡᤱᤃᤣ ᤂᤡ᤺ᤸᤗᤧ ᤋᤣᤳ ᤁᤧᤈᤠᤱᤒᤠ ᤔᤏᤠ᤺ᤸᤗᤧ ᤁᤢᤜᤢᤰᤁᤥ ᤔᤡᤄᤠᤱᤜᤠ᤹ ᤏᤧᤛ᤻ᤛᤢ ᤐᤡᤖᤢ. ᤜᤧᤰᤁᤩᤠᤱ ᤂᤧᤴ ᤔᤏᤠ᤺ᤸᤗᤧ ᤂᤧᤴ ᤔᤡᤄᤠᤱᤜᤠ᤹ ᤋᤣ᤹ᤖᤢᤀᤠᤱ ᤂᤧᤵᤔᤥᤗᤠᤶ ᤗ᤺ᤴᤍᤧᤒᤣ॥ 8 (ᤁᤧᤖᤧᤰ ᤁᤖᤢᤒᤜᤠ᤹ᤖᤧ ᤂᤢᤴᤇᤡ᤹ ᤗᤠᤵᤛᤡᤃᤠᤱ ᤔᤏᤠ ᤜᤢᤰ ᤜᤧᤰᤁᤣ ᤏᤡᤃᤧᤍᤧᤵᤐᤠ ᤐᤳᤇᤧ॥) 9 ᤀᤠᤱᤃᤠ᤹ ᤀᤥᤔᤧᤳᤋᤢᤱ. ᤜᤧᤰᤁᤩᤠᤱ ᤁᤧᤖᤧᤰ ᤁᤖᤢᤒᤜᤠ᤹ᤖᤧ ᤂᤢᤴᤇᤡ᤹ ᤀᤣᤃᤠᤱ ᤁᤠᤵᤗᤥ᤺ᤰᤜᤠ᤹ ᤐᤳᤇᤧ. ᤂᤧᤒᤩᤠᤱ ᤁᤠᤵᤗᤥ᤺ᤰᤜᤠ᤹ ᤀᤡᤔᤧᤸᤗᤢᤱᤒᤠ ᤔᤢᤎᤡᤱᤗᤢᤱ ᤜᤧᤰᤁᤣ ᤋᤡᤸᤗᤧᤰ ᤋᤡᤸᤗᤧᤰ ᤁᤧᤗᤧᤰᤐᤠ ᤔᤧᤈᤥᤃᤧ॥ 10 ᤗᤡᤔᤪᤠᤱ ᤁᤧᤖᤧᤰ ᤁᤠᤵᤗᤥ᤺ᤰᤜᤠ᤹ ᤗᤳᤇᤠ ᤐᤖᤡᤰᤐᤠ ᤏᤡᤔᤧᤍᤧᤳᤋᤧ ᤜᤧᤰᤁᤩᤠᤱ ᤗᤳᤇᤠ ᤐᤖᤡᤰᤗᤧ ᤔᤧᤈᤥᤃᤢᤛᤡᤒᤠ ᤆᤥᤃᤧ. ᤁᤧᤖᤧᤰ ᤁᤠᤵᤗᤥ᤺ᤰᤜᤠ᤹ ᤗᤢᤶᤔᤥ ᤗᤳᤇᤠ ᤗᤳᤇᤠ ᤘᤣ᤹ ᤁᤠᤵᤗᤥᤰ ᤐᤳᤇᤧ॥ 11 ᤁᤖᤢᤒᤜᤠ᤹ ᤔᤧᤈᤳᤇᤡᤱᤅᤡᤸᤗᤧ. ᤂᤧᤱᤜᤠ᤹ ᤔᤧᤴᤜᤡᤛᤡᤱᤅᤣ᤹ ᤂᤢᤴᤇᤡ᤹ ᤋᤰ ᤔᤧᤔᤧᤳᤋᤢᤒᤠ ᤗᤧᤵᤔᤠᤱ. ᤀᤠᤳᤋᤡ ᤐᤡᤛᤠᤱᤛᤠᤱ ᤆᤳᤇᤡᤱᤔᤠ ᤐᤣ᤺ᤰᤔᤠ ᤔᤧᤛᤢᤰᤋᤧ॥ ᤀᤠᤵᤑᤠᤸᤗᤧᤀᤠᤱ ᤌᤡᤰᤏᤠᤜᤠᤱ ᤔᤧᤴᤜᤡᤛᤡᤱᤅᤣ ᤂᤧᤱᤜᤠ᤹ᤖᤧ ᤋᤰ ᤔᤧᤔᤧᤳᤋᤢᤒᤠ ᤗᤧᤵᤔᤠᤱ ᤂᤢᤴᤇᤡ᤹ ᤁᤢᤍᤥ᤺ᤵᤔᤠ ᤔᤧᤒᤣ॥ 12 ᤁᤖᤢᤒᤜᤠ᤹ ᤏᤢ ᤁᤠᤵᤗᤥ᤺ᤰᤜᤠ᤹ ᤏᤧᤵᤔᤠᤱ ᤔᤡᤰᤁᤣ ᤔᤡᤰᤁᤡᤸᤗᤧ ᤐᤴᤇᤢᤀᤠᤱ ᤐᤳᤇᤧ॥ ᤁᤖᤢᤒᤜᤠ᤹ᤖᤧ ᤁᤧᤖᤧᤰ ᤂᤢᤴᤇᤡ᤹ ᤌᤰᤜᤠ᤹. ᤂᤧᤴᤏᤢ ᤛᤥᤛᤥᤖᤡᤰ ᤂᤢᤴᤇᤡ᤹ ᤜᤢᤰᤜᤠ᤹. ᤂᤢᤴᤇᤡ᤹ ᤀᤣ᤺ᤰᤌᤠ᤺ᤰᤔᤠᤜᤠ᤹ ᤜᤧᤰᤁᤩᤠᤱ ᤂᤢᤴᤇᤡ᤹ ᤗᤠᤵᤜᤠ᤹ᤀᤥ ᤔᤡᤰᤁᤣ ᤔᤡᤰ ᤐᤳᤇᤧ॥ 13 ᤁᤢᤓᤠᤖᤧ ᤂᤧᤴ ᤁᤠᤵᤗᤥ᤺ᤰᤜᤠ᤹ ᤀᤰᤂᤣ ᤔᤧᤳᤋᤢᤛᤡᤒᤠ ᤜᤧᤰᤁᤣ ᤂᤧᤵᤛᤢᤱ “ᤂᤡᤖᤡᤖᤡᤏᤠ ᤁᤧᤀᤡᤒᤠᤀᤠᤱ ᤁᤧᤒᤵᤐᤠ ᤁᤠᤵᤗᤥ᤺ᤰᤜᤠ᤹॥” 14 ᤁᤧᤖᤧᤰ ᤁᤖᤢᤒᤜᤠ᤹ᤖᤧ ᤂᤢᤴᤇᤡ᤹ ᤗᤡᤛᤡ ᤏᤠᤖᤠ ᤐᤳᤇᤧ—ᤌᤡᤰᤛᤡᤃᤣᤰᤐᤠᤸᤗᤧ ᤛᤧᤃᤶᤒᤠ ᤐᤡᤳᤋᤧᤸᤗᤧ ᤁᤢᤏᤠᤖᤠ ᤐᤳᤇᤧ. ᤏᤡᤛᤡᤃᤣᤰᤐᤠᤸᤗᤧ ᤔᤧᤴᤇᤠᤶ ᤕᤠᤵᤔᤡ᤺ᤸᤗᤧ ᤁᤢᤏᤠᤖᤠ ᤐᤳᤇᤧ. ᤛᤢᤶᤛᤡᤃᤣᤰᤐᤠᤸᤗᤧ ᤂᤡᤖᤡᤱᤒᤠᤸᤗᤧ ᤁᤢᤏᤠᤖᤠ ᤐᤳᤇᤧ. ᤜᤧᤰᤁᤩᤠᤱ ᤗᤡᤛᤡᤃᤣᤰᤐᤠᤸᤗᤧ ᤔᤢᤕᤠ᤺ᤸᤗᤧ ᤁᤢᤏᤠᤖᤠ ᤐᤳᤇᤧ॥ 15 ᤂᤧᤒᤩᤠᤱ ᤁᤖᤢᤒᤜᤠ᤹ ᤌᤠ᤺ᤱ ᤗᤧᤵᤔᤠᤱ ᤔᤧᤒᤥᤃᤧ॥ ᤀᤠᤱᤃᤠ᤹ ᤁᤒᤠᤖ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥ ᤏᤡᤛᤢᤱᤛᤡᤱᤅᤠᤱ ᤘᤕᤧᤒᤠ ᤁᤢᤜᤡᤱᤘᤧᤳ ᤌᤰᤛᤠᤜᤠ᤹ ᤜᤠᤒᤠ ᤁᤴᤜᤠ᤹ᤀᤣ ᤔᤧᤘᤕᤧᤖᤥ॥ 16 ᤁᤖᤢᤒᤜᤠ᤹ ᤔᤧᤔᤢᤴᤍᤧᤸᤗᤧ. ᤁᤠᤵᤗᤥ᤺ᤰᤜᤠ᤹ᤀᤠᤱ ᤂᤧᤱᤜᤠ᤹ᤏᤢ ᤛᤥᤖᤡᤰ ᤔᤧᤔᤢᤴᤍᤧ॥ ᤂᤧᤱᤜᤠ᤹ᤖᤧ ᤐᤧᤔᤠᤖᤧ ᤗᤠᤃᤡ ᤂᤢᤴᤇᤡ᤹ ᤗᤠᤵᤜᤠ᤹ ᤜᤵᤑᤧ ᤔᤧᤓᤧᤛᤢᤸᤗᤧ. ᤁᤠᤵᤗᤥ᤺ᤰᤜᤠ᤹ ᤂᤢᤴᤇᤡ᤹ ᤐᤣᤛᤠᤱ ᤔᤧᤕᤧᤒᤧ॥ 17 ᤁᤖᤢᤒᤜᤠ᤹ ᤆᤰᤔᤧᤗ᤹ᤖᤧᤸᤗᤧ. ᤁᤠᤵᤗᤥ᤺ᤰᤜᤠ᤹ᤀᤠᤱ ᤆᤰᤔᤧᤗ᤹ᤖᤧ॥ ᤂᤧᤱᤜᤠ᤹ ᤌᤠ᤺ᤱ ᤗᤧᤵᤔᤠᤱ ᤔᤧᤒᤧᤖᤧᤸᤗᤧ. ᤁᤠᤵᤗᤥ᤺ᤰᤜᤠ᤹ᤀᤠᤱ ᤌᤠ᤺ᤱ ᤔᤧᤒᤥᤃᤧ. ᤌᤣᤀᤠᤱᤓᤧᤸᤗᤧ ᤁᤢᤜᤡᤱᤘᤧᤳ ᤌᤰᤛᤠᤜᤠ᤹ᤖᤧ ᤂᤢᤴᤇᤡ᤹ ᤕᤠᤶᤛᤠᤶᤔᤡᤴ ᤁᤠᤵᤗᤥ᤺ᤰᤜᤠ᤹ᤀᤥ ᤕᤠᤃᤧ॥ 18 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤔᤡᤔᤡᤍᤡᤱᤅᤡᤴ ᤔᤠᤱᤜᤡᤶ ᤗᤠᤶᤎᤣ᤺ᤵᤐᤥᤗᤠᤶ ᤗᤠ᤺ᤰᤁᤠᤳ ᤗ᤺ᤴᤍᤧ ᤜᤧᤰᤁᤩᤠᤱ ᤁᤖᤢᤒᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤕᤧᤶᤛᤡᤱ॥ 19 ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤥᤔᤧᤳᤋᤢᤱᤛᤡᤱᤗ ᤐᤳᤇᤠᤱᤅᤡᤸᤗᤧ. ᤁᤖᤢᤒᤜᤠ᤹ ᤂᤢᤴᤇᤡ᤹ ᤗᤠᤵᤜᤠ᤹ ᤜᤵᤑᤧ ᤔᤧᤓᤧᤛᤢᤀᤠᤱ ᤁᤠᤵᤗᤥ᤺ᤰᤜᤠ᤹ᤏᤢ ᤛᤥᤖᤡᤰ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤜᤡᤶᤔᤥᤒᤠ ᤏᤠᤱᤃᤧᤴ ᤗᤧᤵᤔᤠᤱᤒᤠ ᤗᤠᤶᤎᤣ᤺ᤳᤋᤥ ᤔᤧᤒᤧᤖᤧ ᤔᤧᤒᤣ॥ ᤜᤧᤰᤁᤩᤠᤱ ᤀᤡᤛᤪᤠᤀᤡᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤔᤡᤔᤡᤍᤡᤱᤅᤡᤴ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤛᤶᤎᤠᤱ ᤌᤠ᤺ᤱ ᤐᤳᤇᤧ॥ 20 ᤀᤠᤱᤃᤠ᤹ ᤁᤒᤠᤖ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥ ᤘᤕᤠᤱᤅᤡᤸᤗᤧ ᤀᤡᤛᤪᤠᤀᤡᤗᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤓᤥᤛᤠᤱ ᤀᤠᤱᤃᤠ᤹ ᤏᤡᤛᤢᤱᤛᤡᤱᤒᤠ ᤁᤢᤜᤡᤱᤘᤧᤳ ᤌᤰᤛᤠᤜᤠ᤹ ᤀᤠᤶᤓᤠ ᤁᤴᤜᤠ᤹ᤀᤣ ᤔᤧᤘᤕᤧ॥ ᤂᤧᤱᤜᤠ᤹ ᤁᤖᤢᤒᤜᤠ᤹ ᤔᤧᤘᤕᤧ ᤑᤠ᤹ᤀᤠᤱ ᤀᤠᤱᤃᤠ᤹ ᤏᤡᤱᤘᤠ᤹ ᤂᤥᤛᤢᤱ॥ 21 ᤌᤣᤀᤠᤱᤓᤧᤸᤗᤧ ᤁᤧᤖᤧᤰᤗᤧ ᤂᤢᤴᤇᤡ᤹ ᤗᤡᤛᤡ ᤗᤡᤛᤡ ᤏᤠᤖᤠ ᤏᤢ ᤗᤡᤛᤡ ᤗᤡᤛᤡ ᤗᤠᤵᤜᤠ᤹ ᤐᤳᤇᤧ ᤜᤧᤰᤁᤩᤠᤱ ᤂᤢᤴᤇᤡ᤹ ᤗᤠᤵᤛᤡᤃᤠᤱ ᤔᤏᤠ ᤜᤢᤰ ᤜᤧᤰᤁᤣ ᤏᤡᤃᤧᤎᤠ᤺ᤵᤐᤠ ᤐᤳᤇᤧ॥ 22 ᤜᤧᤰᤁᤩᤠᤱ ᤀᤠᤱᤃᤠ᤹ ᤁᤒᤠᤖ ᤘᤜ᤺ᤱᤅᤡᤸᤗᤧ ᤁᤢᤕᤠᤀᤥ ᤏᤡᤛᤢᤱᤛᤡᤱᤅᤠᤱ ᤘᤕᤠᤱᤒᤠ ᤌᤰᤛᤠᤜᤠ᤹ᤖᤧ ᤂᤢᤴᤇᤡ᤹ ᤏᤠᤖᤠᤜᤠ᤹ ᤜᤧᤰᤋᤱᤒᤠᤀᤣ ᤀᤠᤳᤋᤡᤀᤠᤱ ᤔᤧᤶᤒᤣ᤺ᤰᤁᤣ ᤂᤧᤱᤜᤠ᤹ᤖᤧ ᤂᤢᤴᤇᤡ᤹ ᤏᤠᤖᤠ ᤐᤳᤇᤧ. ᤂᤶᤓᤩᤠᤱ ᤂᤧᤱᤜᤠ᤹ ᤗᤠᤶᤍᤡᤰ ᤔᤧᤈᤥᤃᤧᤒᤠ ᤁᤢᤀᤡᤛᤡ᤺ᤰᤁᤣ. ᤂᤧᤱᤜᤠ᤹ ᤋᤃᤡ ᤗᤧᤵᤔᤠᤱ ᤁᤢᤍᤥ᤺ᤵᤔᤠ ᤔᤧᤒᤣᤖᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.