ᤗᤠᤶᤍᤡᤰ 9 - LIFOTNTᤌᤰᤛᤠᤜᤠ᤹ ᤔᤧᤛᤩᤧ 1 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤑᤠᤖᤥᤀᤥ ᤐᤣᤃᤧ᤹ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖ ᤐᤳ ᤔᤧᤳᤋᤧ᤹. ‘ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤐᤣ᤺ᤰᤔᤠ ᤑᤠ᤺ᤰᤋᤧᤛᤧ᤹ ᤜᤧᤰᤁᤩᤠᤱ ᤔᤧᤒᤣ᤺ᤰᤁᤠᤱ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤔᤠᤱᤛᤧᤘᤠ ᤔᤧᤔᤧᤳᤋᤠᤖ॥ 2 ᤂᤧᤏᤧ᤹ ᤂᤧᤱᤜᤠ᤹ ᤐᤣ᤺ᤰᤔᤠ ᤁᤧᤶᤓᤠ᤺ᤰᤋᤢᤛᤡᤴ ᤜᤧᤰᤁᤩᤠᤱ ᤀᤠᤸᤗᤛᤠᤱ ᤁᤧᤛᤠᤰᤋᤢ ᤁᤧᤃᤳᤋᤢᤛᤡᤏᤧᤓᤃᤪ. 3 ᤋᤠᤶᤍᤠᤶᤒᤠ ᤗᤠᤈᤣ᤹ᤀᤥ ᤁᤧᤘᤠ᤹ᤒᤠ ᤂᤧᤏᤧ᤹ ᤁᤧᤎᤰᤛᤠᤜᤠ᤹. ᤀᤡᤃᤪ ᤀᤴᤜᤠ᤹. ᤀᤍᤱᤜᤠ᤹. ᤐᤡᤳᤜᤠ᤹ ᤏᤢ ᤔᤧᤸᤗᤢᤰ ᤔᤧ᤺ᤴᤍᤠᤜᤠ᤹ᤀᤥ ᤀᤠᤱᤃᤠ᤹ ᤀᤠᤜᤢᤰᤁᤡᤴ ᤌᤠᤛᤢᤱ᤹. ᤜᤧᤰᤁᤩᤠᤱ ᤂᤧᤵᤔᤥ ᤁᤡᤵᤔᤠ ᤁᤧᤄᤢᤒᤠ ᤔᤡᤱᤍᤣ᤹ ᤐᤥᤰ॥ 4 ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤀᤡᤛᤪᤠᤀᤡᤗᤒᤠ ᤐᤡᤳᤌᤰᤛᤠᤜᤠ᤹ ᤏᤢ ᤔᤡᤛᤪᤒᤠ ᤐᤡᤳᤌᤰᤛᤠᤜᤠ᤹ ᤛᤧᤴᤍᤢᤛᤡ᤹ ᤜᤧᤰᤁᤩᤠᤱ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤏᤡ᤹ ᤗᤳᤇᤠᤀᤠᤱ ᤌᤰᤛᤠᤜᤠ᤹ ᤔᤧᤴᤇᤡᤏᤧᤴ॥’” 5 ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤀᤠᤱ ᤗᤳᤇᤠ ᤕᤧᤶᤎᤡᤰ ᤏᤡ᤺ᤴᤎᤥ ᤆᤥᤃᤢ. “ᤋᤠ᤺ᤴᤍᤡᤰᤛᤠ ᤁᤴ ᤗᤠᤈᤣ᤹ᤀᤥ ᤕᤜᤘᤣ ᤍᤠᤱᤒᤧᤸᤗᤧ ᤁᤴ ᤕᤠ᤺ᤶᤒᤰᤁᤡᤴ ᤆᤥᤃᤢ᤹॥” 6 ᤁᤢᤍᤠ᤺ᤴᤍᤡᤰᤔᤠ ᤕᤜᤘᤣ ᤍᤠᤱᤒᤧᤸᤗᤧ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤁᤢᤀᤡᤛᤡᤰ ᤆᤥᤃᤢ ᤜᤧᤰᤁᤩᤠᤱ ᤔᤡᤛᤪᤀᤥᤒᤠ ᤁᤧᤖᤧᤰ ᤌᤰᤛᤠᤜᤠ᤹ ᤔᤧᤛᤩᤧ॥ ᤁᤖ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤌᤰᤛᤠᤜᤠ᤹ ᤗᤳᤇᤠᤎᤡᤰᤁᤠᤱ ᤔᤧᤴᤇ᤻ᤕᤧᤏᤧᤴ॥ 7 ᤑᤠᤖᤥᤸᤗᤧ ᤂᤧᤴ ᤀᤥᤔᤧᤵᤔᤠᤖᤧ ᤗᤠᤃᤡ ᤔᤏᤠᤜᤠ᤹ ᤐᤠᤱᤄᤢᤛᤡ. ᤁᤖ ᤀᤡᤛᤪᤠᤀᤡᤗᤡᤜᤠ᤹ᤖᤧ ᤂᤢᤴᤇᤡ᤹ ᤌᤰᤛᤠ ᤐᤡᤳᤜᤠ᤹ ᤗᤳᤇᤠᤀᤠᤱ ᤔᤧᤛᤩᤧᤒᤠ ᤔᤧᤴᤏᤡᤛᤢᤴ॥ ᤜᤧᤰᤁᤣᤛᤠᤱ ᤑᤠᤖᤥᤴ ᤜᤠᤍᤡᤱᤅᤣ ᤌᤰᤋᤧᤀᤠᤱ ᤐᤳᤇᤧ. ᤜᤧᤰᤁᤩᤠᤱ ᤂᤢᤏᤧ᤹ ᤔᤏᤠᤜᤠ᤹ ᤐᤣ᤺ᤰᤔᤠ ᤔᤧᤓᤠ᤺ᤰᤋᤢᤛᤡᤴ॥ ᤕᤠᤱᤄᤣ᤺ᤰ ᤏᤢ ᤑᤰᤘᤠ 8 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤏᤢ ᤜᤠᤖᤢᤏᤧᤴ ᤔᤧᤳᤋᤢᤛᤡ. “ᤔᤡᤎᤢᤱᤍᤡᤱ ᤔᤡᤖᤠ᤺ᤰᤁᤥᤗᤠᤶ ᤜᤢᤰᤐᤢᤳ ᤁᤠᤱᤃᤠᤱᤒᤠ ᤂᤠᤵᤐᤢ᤺ᤴ ᤕᤠᤱᤏᤧᤳᤇᤧ᤹. ᤜᤧᤰᤁᤩᤠᤱ ᤔᤥᤛᤠ᤺ᤸᤗᤧ ᤑᤠᤖᤥᤸᤗᤧ ᤏᤡᤛᤢᤖᤀᤣ ᤁᤴ ᤂᤠᤵᤐᤢ᤺ᤴ ᤋᤠᤱᤛᤠᤱᤒᤥ ᤑᤢᤳᤗᤢᤶ ᤛᤧᤛᤢᤍᤣᤛᤢᤖ॥ 9 ᤂᤠᤵᤐᤢ᤺ᤴ ᤂᤠᤶᤜᤡ᤺ᤰ ᤁᤢᤀᤡᤛᤡᤰ ᤐᤥᤱᤅᤠᤱ ᤔᤡᤛᤪ ᤗᤠᤈᤣ᤹ ᤁᤧᤖᤧᤰ ᤜᤳᤇᤧ ᤛᤧ᤹᤺ ᤜᤧᤰᤁᤩᤠᤱ ᤁᤧᤖᤧᤰ ᤔᤏᤠᤜᤠ᤹ ᤏᤢ ᤌᤰᤛᤠᤜᤠ᤹ᤖᤧ ᤂᤢᤴᤇᤡ᤹ ᤌᤰᤁᤥ ᤜᤥ᤹ ᤗ᤺ᤴ॥ ᤂᤧᤴ ᤜᤥ᤹ᤜᤠ᤹ ᤋᤢᤀᤠᤱ ᤑᤰᤘᤠᤗᤧ᤺ᤱᤘᤠ ᤕᤠᤱᤄᤣ᤺ᤰ ᤐᤥᤱ᤹॥” 10 ᤁᤶᤓᤗ᤹ᤖᤡᤰ ᤂᤧᤴ ᤏᤧᤵᤔᤠᤱᤗᤧ ᤔᤡᤎᤢᤱᤍᤡᤱ ᤔᤡᤖᤠ᤺ᤰᤁᤥᤒᤠ ᤂᤠᤵᤐᤢ᤺ᤴ ᤕᤠᤱᤏᤧᤳᤇᤡᤀᤠᤱ ᤑᤠᤖᤥᤸᤗᤧ ᤁᤢᤍᤃᤡ ᤕᤧᤶᤏᤧᤳᤇᤡ. ᤜᤧᤰᤁᤩᤠᤱ ᤔᤥᤛᤠ᤺ᤸᤗᤧ ᤛᤢᤖᤡᤳ ᤁᤣᤈᤱᤅᤥ ᤂᤧᤴ ᤑᤢᤳᤗᤢᤶ ᤛᤧᤛᤢᤍᤣᤛᤢ॥ ᤜᤧᤰᤁᤩᤠᤱ ᤔᤏᤠᤜᤠ᤹ ᤏᤢ ᤐᤡᤳ ᤌᤰᤛᤠᤜᤠ᤹ᤖᤧ ᤂᤢᤴᤇᤡ᤹ ᤌᤰᤁᤥ ᤜᤥ᤹ ᤗ᤺ᤴᤍᤧᤖ ᤕᤠ᤺ᤴᤍᤢ॥ ᤜᤥ᤹ᤀᤡᤴ ᤋᤢᤖᤧᤀᤠᤱ ᤑᤰᤘᤠᤗᤧ᤺ᤱᤘᤠ ᤕᤠᤱᤄᤣ᤺ᤰ ᤐᤥ᤺ᤰᤂᤧ॥ 11 ᤁᤡᤳᤆᤠᤰ ᤁᤧᤈᤥ᤺ᤰᤐᤠᤜᤠ᤹ ᤕᤠᤱᤄᤣ᤺ᤰᤁᤡᤸᤗᤧ ᤆᤥᤃᤢᤸᤗᤧ ᤔᤥᤛᤠ᤺ᤸᤗᤧ ᤁᤢᤒᤣᤛᤠᤱ ᤘᤠ᤹ᤔᤠ ᤔᤧᤴᤇᤢᤰᤋᤧᤴ. ᤌᤣᤀᤠᤱᤓᤧᤸᤗᤧ ᤁᤡᤳᤆᤠᤰ ᤁᤧᤈᤥ᤺ᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤌᤰᤁᤥ ᤏᤢ ᤔᤡᤛᤪ ᤗᤠᤈᤣ᤹ᤀᤥᤒᤠ ᤁᤧᤖᤧᤰᤗᤧ ᤂᤢᤴᤇᤡ᤹ ᤌᤰᤁᤥ ᤕᤠᤱᤄᤣ᤺ᤰ ᤗ᤺ᤴᤍᤧᤀᤠᤱ ᤐᤳᤇᤧ॥ 12 ᤁᤖ ᤕᤜᤘᤣ ᤍᤠᤱᤒᤧᤸᤗᤧ ᤜᤠᤱᤅᤡᤸᤗᤧ ᤁᤢᤏᤡᤱᤘᤠᤴ ᤜᤠᤍᤡᤱ ᤁᤧᤎᤰᤐᤠ ᤆᤥᤃᤢ ᤐᤡᤖᤢ॥ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤒᤠ ᤁᤢᤀᤡᤛᤡᤰ ᤂᤧᤸᤗᤧ ᤔᤥᤛᤠᤴ ᤏᤢ ᤜᤠᤖᤢᤏᤧᤸᤗᤧ ᤂᤢᤴᤇᤡ᤹ ᤐᤠ᤺ᤴᤏᤡᤴ ᤂᤧᤶᤔᤠ ᤔᤧᤍᤧᤴᤍᤧᤴ॥ ᤑ᤺ᤴ 13 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤋᤠ᤺ᤴᤍᤡᤰ ᤋᤠᤏᤠᤶᤛᤠ ᤑᤠᤖᤥᤴ ᤋᤢᤔᤧᤀᤠᤱ ᤔᤧᤳᤋᤧ᤹. ‘ᤕᤜᤘᤣ ᤍᤠᤱᤒᤠ ᤜᤡᤒᤪᤢᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤐᤠ᤺ᤳᤋᤢ᤹. ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤐᤣ᤺ᤰᤔᤠ ᤑᤠ᤺ᤰᤋᤧᤛᤧ᤹ ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤒᤣ᤺ᤰᤁᤠᤱ ᤀᤠᤱᤃᤠ᤹ ᤔᤠᤱᤛᤧᤘᤠ ᤔᤧᤔᤧᤳᤋᤠᤖ॥ 14 ᤔᤣ᤺ᤴᤏᤧᤓᤃᤪ ᤁᤴᤇᤗᤠᤶᤒᤠ ᤀᤠᤱᤃᤠ᤹ ᤂᤧᤏᤧ᤹ ᤁᤧᤛᤢᤜᤠᤱᤃᤧᤶᤒᤠ ᤏᤢ ᤁᤧᤔᤏᤠᤜᤠ᤹ᤖᤰ ᤔᤣ᤺ᤴᤍᤢᤰ. ᤁᤖ ᤂᤧᤏᤧ᤹ᤀᤠᤱ ᤂᤢᤶᤍᤡᤱ ᤐᤡᤏᤧ॥ ᤂᤧᤒᤩᤠᤱ ᤀᤠᤱᤃᤠ᤹ ᤜᤧᤰᤋᤱᤒᤠ ᤏᤡᤱᤘᤠ᤹ᤑᤢᤔᤠᤱ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤘᤣ᤹ ᤜᤠ᤺ᤳᤋᤠᤱ ᤜᤥᤵ ᤑᤠ᤹ᤀᤠᤱ ᤏᤡᤱᤘᤠ᤹ ᤁᤧᤄᤥᤛᤢ᤹॥ 15 ᤀᤠᤱᤃᤠ᤹ ᤀᤠᤜᤢᤰᤁᤡᤴ ᤑᤥ᤺ᤰᤂᤢᤱᤅᤠᤱ ᤂᤧᤏᤧ᤹ ᤏᤢ ᤂᤧᤏᤧ᤹ ᤁᤧᤔᤏᤠᤜᤠ᤹ᤀᤥ ᤔᤠᤱᤍᤢᤰᤔᤠ ᤐᤠᤱᤄᤢᤱᤒᤠ ᤜᤧᤰᤁᤣ᤺ᤸᤗᤧ ᤂᤧᤏᤡ᤹ ᤁᤧᤖᤧᤰ ᤘᤖᤧᤱᤗᤧᤱ ᤁᤧᤔᤧᤃᤡᤒᤠ ᤘᤕᤧ॥ 16 ᤁᤖ ᤀᤠᤱᤃᤠ᤹ ᤀᤠᤔᤢᤰᤛᤠᤶᤔᤡᤴ ᤀᤥᤛᤣ᤺ᤴᤎᤠᤱ ᤆᤥ᤺ᤰᤔᤠᤖᤧ ᤗᤠᤃᤡ ᤁᤧᤖᤧᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤁᤥ ᤀᤠᤔᤡᤱ ᤋᤡ᤺ᤳᤗ ᤑᤠ᤹ᤀᤠᤱ ᤀᤠᤱᤃᤠ᤹ ᤁᤢᤜᤡᤱᤘᤧᤳ ᤗᤧᤳᤏᤧᤀᤠᤱ ᤁᤧᤘᤠ᤹॥ 17 ᤁᤖ ᤀᤠᤸᤗ ᤌᤠᤖᤡᤰᤛᤠᤱ ᤂᤧᤏᤧ᤹ ᤜᤠᤍᤡᤱ ᤁᤧᤎᤰᤐᤠ ᤁᤧᤒᤥᤰᤂᤧᤀᤠᤱ ᤁᤧᤘᤠ᤹ ᤜᤧᤰᤁᤩᤠᤱ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤐᤣ᤺ᤰᤔᤠ ᤁᤧᤶᤓᤠ᤺ᤰᤋᤢᤛᤡᤴ᤹॥ 18 ᤁᤸᤗᤧᤆᤥᤃᤢᤸᤗᤧ ᤋᤠ᤺ᤴᤍᤡᤰ ᤀᤠᤶᤓᤠ ᤁᤴ ᤕᤧᤶᤔᤥ ᤔᤡᤛᤪ ᤗᤠᤈᤣᤴ ᤐᤥ᤺ᤰᤂᤧᤀᤠᤱ ᤁᤳᤌᤥ ᤀᤠᤓᤧᤸᤗᤧᤀᤠᤱ ᤔᤧᤴᤎᤠᤀᤣ ᤁᤧᤘᤠ᤹ᤒᤠ ᤛᤠ᤹ᤖᤡᤰ ᤕᤶᤒᤠ ᤑ᤺ᤴ ᤌᤠᤖ ᤕᤠ᤺ᤴᤍᤢᤱ᤹॥ 19 ᤀᤠᤸᤗ ᤔᤏᤠᤜᤠ᤹ ᤐᤠᤱᤄᤧᤛᤧ᤹ᤀᤠᤱ ᤋᤠᤶᤍᤠᤶᤒᤠᤍᤧᤴᤏᤥ ᤁᤧᤘᤠ᤹ᤒᤠ ᤐᤡᤳᤌᤰᤛᤠᤜᤠ᤹ ᤏᤢ ᤁᤧᤘᤠ᤹ᤘᤠ᤹ᤒᤠ ᤁᤧᤖᤧᤰ ᤛᤡᤃᤠᤱ ᤔᤧᤍᤠᤖᤢᤛᤡᤖ ᤕᤠ᤺ᤴᤍᤧᤛᤧ᤹. ᤌᤣᤀᤠᤱᤓᤧᤸᤗᤧ ᤋᤠᤶᤍᤠᤶᤒᤠᤍᤧᤴᤏᤥ ᤁᤧᤗᤧᤵᤐᤠᤀᤠᤱ ᤁᤧᤘᤠ᤹ᤒᤠ ᤏᤢ ᤜᤡᤶᤔᤥ ᤔᤧᤴᤍᤠᤖᤢᤛᤡᤴᤒᤠ ᤁᤧᤖᤧᤰ ᤔᤏᤠᤜᤠ᤹ ᤏᤢ ᤌᤰᤛᤠᤜᤠ᤹ ᤑ᤺ᤴᤏᤡᤸᤗᤧ ᤗ᤺ᤵᤛᤢᤛᤡ. ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤧᤛ᤻ᤛᤡ᤹᤺॥’” 20 ᤕᤜᤘᤣ ᤍᤠᤱᤒᤠᤸᤗᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤜᤠᤱᤅᤡᤸᤗᤧ ᤁᤢᤓᤠ ᤁᤢᤛᤢᤜᤠᤱᤕᤢᤰᤐᤠᤜᤠ᤹ ᤔᤧᤃᤡᤛᤧ॥ ᤂᤧᤱᤜᤠ᤹ ᤁᤧᤖᤧᤰᤗᤧ ᤂᤢᤴᤇᤡ᤹ ᤌᤰᤛᤠᤜᤠ᤹ ᤏᤢ ᤕᤥᤃ᤻ᤒᤠ ᤕᤥ᤺ᤃ᤻ᤔᤠᤜᤠ᤹ ᤜᤡᤶᤔᤥ ᤔᤧᤍᤠᤖᤢᤛᤡᤀᤠᤱ ᤜᤡᤶ ᤔᤧᤔᤧᤳᤋᤢᤛᤡ॥ 21 ᤁᤖ ᤘᤣ᤹ᤜᤠ᤹ᤖᤧ ᤆᤠᤜᤡ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤒᤠ ᤛᤠᤶᤍᤡᤱ ᤐᤠ᤺ᤴᤏᤡᤴ ᤏᤡᤏᤡ ᤂᤧᤶᤄᤧᤶ ᤔᤧᤸᤗᤠᤵᤋᤢᤴ ᤜᤧᤰᤁᤩᤠᤱ ᤂᤢᤴᤇᤡ᤹ ᤐᤡᤳᤌᤰᤛᤠᤜᤠ᤹ ᤏᤢ ᤕᤥᤃ᤻ᤒᤠ ᤕᤥ᤺ᤃ᤻ᤔᤠᤜᤠ᤹ ᤋᤠᤶᤍᤠᤶᤒᤠᤍᤧᤴᤏᤥ ᤋᤠᤵᤔᤧᤖᤠ ᤔᤧᤗᤧᤖᤢᤛᤡ॥ 22 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤂᤧᤏᤧ᤹ ᤁᤧᤜᤢᤰᤁᤡᤴ ᤋᤠᤱᤛᤠᤱᤒᤥ ᤗᤧᤵᤔᤠᤱ ᤛᤴᤇᤧ᤹ ᤜᤧᤰᤁᤩᤠᤱ ᤔᤡᤛᤪ ᤗᤠᤈᤣ᤹ᤀᤥ ᤁᤧᤖᤧᤰ ᤛᤠ᤹ᤖᤡᤰ ᤕᤶᤒᤠ ᤑ᤺ᤴ ᤌᤠᤛᤢ᤹—ᤔᤏᤠ. ᤌᤰᤛᤠ ᤏᤢ ᤂᤠᤶᤒᤠᤱᤅᤥ ᤁᤧᤕᤢᤱᤒᤠ ᤕᤠ᤺ᤱᤛᤢᤱ ᤁᤧᤖᤧᤰ ᤛᤶᤎᤠᤱ ᤕᤶᤒᤠ ᤑ᤺ᤴ ᤛ᤺ᤰᤌᤠ᤹᤺॥” 23 ᤂᤧᤒᤩᤠᤱ ᤔᤥᤛᤠ᤺ᤸᤗᤧ ᤁᤢᤍᤰᤁᤠ᤺ᤳᤋᤡᤴ ᤋᤠᤱᤛᤠᤱᤒᤥ ᤗᤧᤵᤔᤠᤱ ᤛᤴᤇᤢ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤂᤧᤖᤧᤱᤄᤢᤖᤢᤱ ᤗ᤹ᤖᤧᤀᤠᤱ ᤑ᤺ᤴ ᤌᤩᤧᤖ ᤕᤠ᤺ᤴᤍᤢ. ᤂᤧᤶᤒᤩᤠᤱ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤛᤠ᤺ᤶᤓᤣ ᤗᤧᤰᤋᤧ॥ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤡᤛᤪᤀᤥ ᤀᤠᤳᤋᤡ ᤀᤠᤳᤋᤡ ᤕᤶᤒᤠ ᤑ᤺ᤴ ᤌᤩᤧᤖ ᤕᤠ᤺ᤴᤍᤢ॥ 24 ᤕᤜᤘᤣ ᤍᤠᤱᤒᤧᤸᤗᤧ ᤂᤀᤡᤰ ᤂᤀᤡᤰ ᤀᤡᤰᤛᤡᤱᤗ ᤑ᤺ᤴ ᤌᤩᤧᤖ ᤕᤠ᤺ᤴᤍᤢ. ᤋᤠᤱᤛᤠᤱᤒᤥ ᤌᤡᤰ ᤁᤢᤕᤠᤀᤥᤏᤢ ᤘᤣ᤹ᤛᤔᤠ ᤁᤢᤕᤠᤀᤥ ᤌᤠᤖᤡᤰ ᤛᤠ᤺ᤶᤓᤣ ᤗᤧᤰᤋᤧ॥ ᤔᤡᤛᤪ ᤗᤠᤈᤣ᤹ᤀᤥ ᤀᤰᤋᤱᤒᤠ ᤑ᤺ᤴᤃ ᤋᤃᤡ ᤀᤠᤓᤧᤸᤗᤧᤀᤠᤱ ᤔᤧᤴᤎᤠᤀᤣ ᤘᤕᤧ॥ 25 ᤔᤡᤛᤪ ᤗᤠᤈᤣ᤹ ᤁᤧᤖᤧᤰ ᤋᤠᤵᤔᤧᤖᤠ ᤋᤠᤶᤍᤠᤶᤒᤠᤍᤧᤴᤏᤥ ᤁᤧᤘᤠ᤹ᤒᤠ ᤌᤰᤛᤠᤜᤠ᤹ ᤏᤢ ᤔᤏᤠᤜᤠ᤹ ᤂᤰᤐᤧᤳ ᤑ᤺ᤴᤏᤡᤸᤗᤧ ᤗ᤺ᤵᤛᤢᤛᤡᤀᤠᤱ ᤛᤥ᤺ᤴᤍᤢᤛᤡ॥ ᤋᤠᤶᤍᤠᤶᤒᤠᤍᤧᤴᤏᤥᤒᤠ ᤕᤠ᤺ᤱᤛᤢᤱ ᤏᤢ ᤛᤡᤱᤜᤠ᤹ ᤔᤢᤖᤧᤰ ᤂᤠᤖᤧᤰ ᤐᤥ᤺ᤰᤂᤧ॥ 26 ᤀᤡᤛᤪᤠᤀᤡᤗᤡᤜᤠ᤹ ᤔᤧᤕᤢᤅᤧᤒᤠ ᤃᤥᤛᤣᤏ ᤋᤧᤱᤃᤵᤐᤥᤖᤰ ᤑ᤺ᤴ ᤔᤧᤎᤠᤛᤢᤴ॥ 27 ᤑᤠᤖᤥᤸᤗᤧ ᤔᤥᤛᤠᤴ ᤏᤢ ᤜᤠᤖᤢᤏᤧᤴ ᤀᤢ᤺ᤳᤋᤢᤛᤡᤀᤠᤱ ᤔᤧᤳᤋᤢᤛᤡ. “ᤁᤴᤇᤢᤔᤥ ᤀᤠᤱᤃᤠ᤹ ᤗᤠᤕᤥ ᤆᤥᤃᤢᤱ॥ ᤕᤜᤘᤣ ᤍᤠᤱᤒᤠᤴ ᤁᤢᤍᤥ᤺ᤵᤔᤠ ᤆᤥᤰ. ᤀᤠᤱᤃᤠ᤹ ᤏᤢ ᤀᤠᤔᤏᤠᤜᤠ᤹ᤖᤧ ᤕᤠ᤺ᤶᤒᤰ ᤑᤣ᤺ᤴᤍᤢᤶᤒᤧ॥ 28 ᤕᤜᤘᤣ ᤍᤠᤱᤒᤠᤴ ᤐᤣᤗᤡ ᤀᤠᤓᤠᤰᤋᤧ ᤀᤠᤒᤡᤖᤧᤶᤔᤧ᤹. ᤌᤣᤀᤠᤱᤓᤧᤸᤗᤧ ᤁᤴ ᤂᤧᤖᤧᤱᤄᤢᤖᤢᤱ ᤁᤧᤗ᤹ᤒᤠ ᤀᤡᤰᤗᤠᤴ ᤏᤢ ᤑ᤺ᤴᤏᤡᤴ ᤛᤠ᤹ᤖᤡᤰ ᤀᤡ᤺ᤳᤋᤧ॥ ᤀᤠᤱᤃᤠ᤹ ᤂᤡᤏᤡ᤹ ᤐᤣ᤺ᤰᤔᤠ ᤑᤠ᤺ᤰᤏᤡᤱ ᤑᤠ᤹ᤀᤠᤱ ᤐᤠ᤺ᤳᤋᤢᤱ᤹. ᤀᤠᤸᤗ ᤂᤡᤏᤡ᤹ ᤁ᤹ᤕᤥ ᤕᤢᤱᤔᤠ ᤔᤧᤒᤥᤱᤏᤧᤴ॥” 29 ᤔᤥᤛᤠ᤺ᤸᤗᤧ ᤜᤠᤱᤅᤡᤴ ᤔᤧᤳᤋᤢ. “ᤕᤧᤰᤕᤰᤁᤥᤗᤠᤶ ᤗᤠ᤺ᤰᤁᤠᤳ ᤗ᤺ᤴᤍᤡᤃᤧ ᤐᤣᤃᤡᤃᤧᤏᤢᤔᤧ᤺ᤴᤏᤣ ᤀᤠᤱᤃᤠ᤹ ᤀᤠᤜᤢᤰᤜᤠ᤹ ᤑᤥ᤺ᤰᤂᤢᤱᤅᤠᤱ ᤕᤜᤘᤣ ᤍᤠᤱᤒᤧᤴ ᤐᤣᤗᤡ ᤑᤠᤰᤋᤢᤱ᤹॥ ᤂᤧᤖᤧᤱᤄᤢᤖᤢᤱ ᤗ᤹ᤔᤠ ᤏᤠ᤹ ᤜᤧᤰᤁᤩᤠᤱ ᤑ᤺ᤴ ᤌᤠᤔᤠ ᤏᤠ᤹॥ ᤂᤧᤒᤩᤠᤱ ᤁᤴ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤕᤜᤘᤣ ᤍᤠᤱᤒᤧᤸᤗᤧᤴᤖᤧᤳᤇ ᤑᤠ᤹ᤀᤠᤱ ᤂᤧᤏᤧ᤹ ᤏᤡᤱᤘᤠ᤹ ᤁᤧᤄᤥᤛᤢ᤹॥ 30 ᤁᤖ ᤀᤠᤱᤃᤠ᤹ ᤁᤢᤛᤡᤱ ᤏᤡ᤺ᤳᤋᤢᤱ᤹. ᤂᤧᤏᤧ᤹ ᤏᤢ ᤂᤧᤏᤧ᤹ ᤁᤧᤛᤢᤱᤜᤠᤱᤕᤢᤰᤐᤠᤜᤠ᤹ᤖᤧ ᤀᤠᤸᤗᤛᤠᤱ ᤕᤜᤘᤣ ᤍᤠᤱᤒᤧᤴ ᤔᤧᤱᤃᤡᤳᤋᤣ ᤁᤧᤃᤳᤋᤢᤶ॥” 31 (ᤛᤠᤵᤑᤰᤁᤪᤠ ᤏᤢ ᤜ᤺ᤰᤛᤡᤴ ᤑ᤺ᤴᤏᤡᤸᤗᤧ ᤜᤡᤵᤋᤢᤍᤣᤛᤢ. ᤌᤣᤀᤠᤱᤓᤧᤸᤗᤧ ᤜ᤺ᤰᤛᤡ᤺ᤸᤗᤧ ᤁᤢᤍᤠᤵᤔᤠ ᤗ᤺ᤴᤍᤧ ᤆᤢᤖᤧᤀᤠᤱ ᤐᤳᤇᤧ. ᤜᤧᤰᤁᤩᤠᤱ ᤛᤠᤵᤑᤰᤁᤪᤠ᤺ᤴ ᤑᤧᤰᤋᤧᤀᤠᤱ ᤐᤳᤇᤧ॥ 32 ᤁᤖ ᤔᤠᤛᤡᤴ ᤏᤢ ᤜ᤺ᤰᤛᤡᤴ ᤔᤧᤜᤡᤵᤋᤢᤴ. ᤌᤣᤀᤠᤱᤓᤧᤸᤗᤧ ᤂᤧᤴ ᤕᤠᤱᤛᤡᤖᤰ ᤋᤢᤶ॥) 33 ᤑᤠᤖᤥ᤺ᤴᤏᤢ ᤛᤧᤴᤍᤧᤀᤠᤱ ᤔᤥᤛᤠᤴ ᤗᤠ᤺ᤁᤠᤳ ᤗ᤺ᤴᤍᤧᤒᤣ ᤜᤧᤰᤁᤩᤠᤱ ᤁᤢᤜᤢᤰᤜᤠ᤹ ᤑᤥ᤺ᤰᤂᤢᤀᤠᤱ ᤕᤜᤘᤣ ᤍᤠᤱᤒᤧᤴ ᤐᤣᤗᤡ ᤑᤠᤰᤋᤢ ᤜᤧᤰᤁᤩᤠᤱ ᤋᤠᤱᤛᤠᤱᤒᤥ ᤂᤧᤖᤧᤱᤄᤢᤖᤢᤱ ᤗ᤹ᤔᤠ ᤏᤢ ᤑ᤺ᤴ ᤘᤜᤡᤳ ᤌᤠᤔᤠ ᤏᤠ᤹ᤖᤧ॥ 34 ᤁᤖ ᤀᤠᤸᤗ ᤑᤠᤖᤥᤸᤗᤧ ᤘᤜᤡᤳ. ᤑ᤺ᤴ ᤌᤠᤔᤠ ᤏᤢ ᤋᤠᤱᤛᤠᤱᤒᤧᤴ ᤂᤧᤖᤧᤱᤄᤢᤖᤢᤱ ᤗ᤹ᤔᤠ ᤏᤠ᤹ᤖᤧᤒᤠ ᤏᤡᤛᤢ. ᤂᤧᤒᤩᤠᤱᤃ ᤂᤢᤏᤧ᤹ ᤀᤠᤸᤗᤛᤠᤱ ᤕᤖᤡᤰ ᤗᤠᤕᤥ ᤆᤥᤃᤢ. ᤜᤧᤰᤁᤩᤠᤱ ᤂᤢᤏᤧ᤹ ᤏᤢ ᤁᤢᤛᤢᤜᤠᤱᤕᤢᤰᤐᤠᤜᤠ᤹ᤖᤧ ᤂᤢᤴᤇᤡ᤹ ᤏᤡᤱᤘᤠᤴ ᤜᤠᤍᤡᤱ ᤁᤧᤎᤰᤐᤠ ᤔᤧᤈᤥᤃᤢ॥ 35 ᤁᤶᤓᤗ᤹ᤖᤡᤰ ᤑᤠᤖᤥᤸᤗᤧ ᤁᤢᤏᤡᤱᤘᤠᤴ ᤜᤠᤍᤡᤱ ᤁᤧᤎᤰᤐᤠ ᤐᤥ᤺ᤰᤂᤧ. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢᤒᤠ ᤜᤧᤰᤁᤣ ᤂᤢᤏᤧ᤹ ᤀᤡᤛᤪᤠᤀᤡᤗᤡᤜᤠ᤹ ᤐᤣ᤺ᤰᤔᤠ ᤔᤧᤓᤠ᤺ᤰᤋᤢᤛᤡᤴᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.