ᤗᤠᤶᤍᤡᤰ 8 - LIFOTNTᤐᤧᤍ᤺ᤰᤜᤠ᤹ᤗᤠᤶ ᤔᤡᤱᤍᤣ᤹ ᤐᤥᤃᤧ 1 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤑᤠᤖᤥᤀᤥ ᤐᤣᤃᤧ᤹ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢᤖ ᤐᤳ ᤔᤧᤳᤋᤧ᤹. ‘ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤐᤣ᤺ᤰᤔᤠ ᤑᤠ᤺ᤰᤋᤧᤛᤧ᤹ ᤜᤧᤰᤁᤩᤠᤱ ᤔᤧᤒᤣ᤺ᤰᤁᤠᤱ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤔᤠᤱᤛᤧᤘᤠ ᤔᤧᤔᤧᤳᤋᤠ॥ 2 ᤂᤧᤏᤧ᤹ ᤔᤏᤠᤜᤠ᤹ ᤐᤣ᤺ᤰᤔᤠ ᤁᤧᤶᤓᤠ᤺ᤰᤋᤢᤛᤡᤴᤏᤧᤓᤃᤪ ᤀᤠᤱᤃᤠ᤹ ᤂᤧᤏᤧ᤹ ᤁᤧᤖᤧᤰ ᤁᤧᤗᤠᤈᤣ᤹ᤀᤥ ᤐᤧᤍ᤺ᤰᤜᤠ᤹ ᤐᤠᤱᤄᤢᤱᤛᤡᤱᤅᤠᤱ ᤋᤢᤰᤂᤣ ᤆᤠ᤺ᤳᤏᤧ॥ 3 ᤏᤡᤗ ᤘᤜ᤺ᤱᤅᤡᤴ ᤐᤧᤍ᤺ᤰᤜᤠ᤹ᤖᤧ ᤛᤎᤧᤰ ᤔᤧᤎᤡᤶᤛᤢ᤹. ᤜᤧᤰᤁᤩᤠᤱ ᤂᤧᤴ ᤐᤧᤍ᤺ᤰᤜᤠ᤹ ᤂᤧᤏᤧ᤹ ᤁᤧᤜᤡᤶᤔᤥ. ᤁᤧᤀᤡᤶᤔᤠᤍᤧᤴ ᤕᤠᤰᤑᤠᤱᤅᤥ. ᤁᤧᤏᤧᤳᤏᤠᤀᤥ. ᤁᤧᤛᤢᤜᤠᤱᤕᤢᤰᤐᤠᤜᤠ᤹ ᤏᤢ ᤁᤧᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤜᤠ᤹ᤀᤥ ᤜᤧᤰᤁᤩᤠᤱ ᤁᤧᤍ᤺ᤰ ᤌᤥ᤺ᤰᤔᤠᤍᤧᤴᤏᤥ ᤏᤢ ᤑᤣ᤹ᤖᤢᤶ ᤛ᤹ᤔᤠ ᤂᤵᤐᤩᤠᤀᤥᤀᤠᤱ ᤔᤧᤍᤠ᤹᤺॥ 4 ᤂᤧᤴ ᤐᤧᤍ᤺ᤰᤜᤠ᤹ ᤂᤧᤏᤧ᤹ ᤏᤢ ᤂᤧᤏᤧ᤹ ᤁᤧᤔᤏᤠᤜᤠ᤹ᤀᤥ ᤜᤧᤰᤁᤩᤠᤱ ᤁᤧᤖᤧᤰ ᤁᤧᤛᤢᤜᤠᤱᤕᤢᤰᤐᤠᤜᤠ᤹ᤀᤥ ᤐᤡᤳᤆᤠᤰ ᤐᤡᤳᤆᤠᤰ ᤔᤧᤒᤡᤴᤗ ᤔᤧᤍᤠ᤹᤺॥’” 5 ᤂᤧᤒᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤜᤠᤖᤢᤏᤧᤴ ᤔᤧᤳᤋᤧ᤹. ‘ᤁᤧᤍᤰᤁᤠ᤺ᤳᤋᤡᤴ ᤕᤠᤱᤛᤡᤱᤅᤧ᤹ᤀᤠᤱ ᤘᤜ᤺ᤱᤜᤠ᤹ᤀᤥ. ᤂᤠᤘᤠᤜᤠ᤹ᤀᤥ ᤏᤢ ᤘᤖᤰᤜᤠ᤹ᤀᤥ ᤁᤧᤜᤢᤰᤁᤡᤴ ᤛᤴᤇᤧ᤹. ᤜᤧᤰᤁᤩᤠᤱ ᤔᤡᤛᤪ ᤁᤢᤗᤧ᤺ᤶ ᤐᤧᤍ᤺ᤰᤜᤠ᤹ ᤔᤧᤍᤠᤖ॥’” 6 ᤁᤸᤗᤧᤆᤥᤃᤢᤸᤗᤧ ᤔᤡᤛᤪᤒᤠ ᤆᤫᤠ᤺ᤳᤜᤠ᤹ᤀᤥ ᤜᤠᤖᤢᤏᤧᤸᤗᤧ ᤁᤢᤜᤢᤰᤁᤡᤴ ᤛᤴᤇᤢ ᤜᤧᤰᤁᤩᤠᤱ ᤐᤧᤍ᤺ᤰᤜᤠ᤹ ᤔᤧᤗ᤺ᤴᤍᤧᤀᤠᤱ ᤗᤠᤈᤣᤴ ᤛᤡᤍᤧᤵ ᤔᤧᤍᤧᤵᤋᤢ॥ 7 ᤁᤖ ᤁᤡᤳᤆᤠᤰᤜᤠ᤹ᤖᤧᤀᤠᤱ ᤔᤡᤰᤗᤧ᤺ᤱᤔᤠᤗᤠᤶ ᤜᤧᤰᤁᤣᤀᤣ ᤔᤧᤈᤥᤃᤢ. ᤜᤧᤰᤁᤩᤠᤱ ᤗᤠᤈᤣ᤹ᤀᤥ ᤐᤧᤍ᤺ᤰᤜᤠ᤹ ᤔᤧᤗ᤺ᤳᤋᤢᤛᤡ॥ 8 ᤂᤧᤒᤩᤠᤱ ᤑᤠᤖᤥ ᤜᤠᤱᤅᤡᤸᤗᤧ ᤔᤥᤛᤠᤴ ᤏᤢ ᤜᤠᤖᤢᤏᤧᤴ ᤂᤢᤴᤇᤡ᤹ ᤀᤢ᤺ᤳᤇᤧ ᤐᤠᤱᤄᤢᤛᤡᤀᤠᤱ ᤔᤧᤳᤋᤢᤛᤡ. “ᤀᤠᤱᤃᤠ᤹ ᤏᤢ ᤀᤠᤔᤏᤠᤜᤠ᤹ᤗᤠᤶ ᤐᤧᤍ᤺ᤰᤜᤠ᤹ ᤂᤧᤳᤋᤢᤍᤣᤛᤢᤛᤡᤖ ᤑᤠ᤹ᤀᤠᤱ ᤕᤜᤘᤣ ᤍᤠᤱᤒᤠᤴ ᤐᤣᤗᤡ ᤑᤠᤰᤋᤧᤛᤧ᤹. ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤁᤢᤗᤠᤃᤡ ᤛᤡᤍᤢᤱᤈᤓᤠ ᤋᤥ᤺ᤴᤇᤧ ᤂᤧᤴᤇᤡ᤹ ᤔᤏᤠᤜᤠ᤹ ᤐᤣ᤺ᤰᤔᤠ ᤑᤠ᤺ᤰᤋᤢᤱᤛᤡᤱ᤹॥” 9 ᤔᤥᤛᤠ᤺ᤸᤗᤧ ᤑᤠᤖᤥᤴ ᤔᤧᤳᤋᤢ. “ᤀᤠᤱᤃᤠ᤹ ᤛ᤺ᤳᤋᤠᤖ ᤂᤧᤏᤧ᤹ ᤁᤧᤗᤠᤃᤡ ᤐᤣᤗᤡᤃᤧᤴ ᤋᤢᤘᤠ ᤆᤥᤃᤢᤱ᤹॥ ᤂᤧᤏᤧ᤹. ᤁᤧᤛᤢᤜᤠᤱᤃᤧᤶᤒᤠᤜᤠ᤹ ᤏᤢ ᤁᤧᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤗᤠᤃᤡ ᤀᤠᤱᤃᤠ᤹ ᤀᤠᤓᤧᤸᤗᤧ ᤐᤣᤗᤡ ᤑᤠᤰᤔᤠ ᤁᤧᤒᤥᤱᤒᤠ ᤂᤧᤴ ᤕᤧᤶᤔᤡᤴ ᤏᤡ᤺ᤴᤎᤥ ᤆᤥᤃᤠᤱ ᤐᤡᤖᤠᤱᤅᤧ᤹॥ ᤂᤧᤒᤩᤠᤱ ᤁᤧᤖᤧᤰ ᤐᤧᤍ᤺ᤰᤜᤠ᤹ ᤔᤧᤔᤠ ᤜᤧᤰᤁᤩᤠᤱ ᤏᤡᤗ ᤘᤜ᤺ᤱᤅᤥᤖᤰ ᤂᤥᤔᤧᤍᤧᤳ ᤘᤣ᤹ ᤀᤠᤳᤋᤡᤀᤠᤱ ᤂᤥᤔᤧᤴᤍᤧᤳᤏᤧᤴ॥” 10 ᤑᤠᤖᤥᤸᤗᤧ ᤔᤧᤳᤋᤢ. “ᤋᤠ᤺ᤴᤍᤡᤰ ᤀᤠᤱᤃᤠ᤹ ᤀᤠᤗᤠᤃᤡ ᤐᤣᤗᤡ ᤑᤠᤰᤋᤠᤱ ᤐᤡᤖᤠᤱᤅᤧ᤹॥” ᤔᤥᤛᤠ᤺ᤸᤗᤧ ᤔᤧᤳᤋᤢ. “ᤂᤧᤏᤧ᤹ ᤁᤧᤒᤠ᤺ᤳᤋᤢᤒᤠ ᤜᤧᤰᤁᤣᤀᤣ ᤀᤠᤱᤃᤠ᤹ ᤆᤥᤃᤢᤱ᤹. ᤂᤧᤒᤩᤠᤱ ᤕᤜᤘᤣ ᤍᤠᤱᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤴ ᤜᤧᤰᤋᤱᤒᤠ ᤘᤣ᤹ ᤜᤠ᤺ᤳᤋᤠᤱ ᤜᤥᤵ ᤑᤠ᤹ᤀᤠᤱ ᤂᤧᤏᤧ᤹ ᤏᤡᤱᤘᤠ᤹ ᤁᤧᤄᤥᤛᤢ᤹॥ 11 ᤐᤧᤍ᤺ᤰᤜᤠ᤹ ᤂᤧᤏᤧ᤹ ᤏᤢ ᤂᤧᤏᤧ᤹ ᤁᤧᤜᤡᤶᤜᤠ᤹ᤀᤥᤗᤠᤶ ᤜᤧᤰᤁᤩᤠᤱ ᤁᤧᤛᤢᤜᤠᤱᤃᤧᤶᤒᤠᤜᤠ᤹ ᤏᤢ ᤂᤧᤏᤧ᤹ ᤁᤧᤔᤏᤠᤜᤠ᤹ᤀᤥᤗᤠᤶ ᤔᤧᤏᤢ᤺ᤱ ᤔᤧᤒᤣ᤺ᤰ. ᤜᤧᤰᤁᤩᤠᤱ ᤏᤡᤗ ᤘᤜ᤺ᤱᤅᤥᤖᤰ ᤔᤧᤕᤠᤰ॥” 12 ᤂᤧᤒᤩᤠᤱ ᤔᤥᤛᤠᤴ ᤏᤢ ᤜᤠᤖᤢᤏᤧᤴ ᤑᤠᤖᤥᤀᤥᤗᤠᤶ ᤗ᤺ᤴᤍᤧᤛᤡᤀᤠᤱ ᤐᤣᤃᤧᤳᤇᤡ ᤜᤧᤰᤁᤩᤠᤱ ᤗᤠᤈᤣ᤹ᤀᤥ ᤁᤧᤍᤠᤒᤠ ᤐᤧᤍ᤺ᤰᤜᤠ᤹ ᤔᤧᤔᤠᤖ ᤑᤠ᤹ᤀᤠᤱ ᤔᤥᤛᤠ᤺ᤸᤗᤧ ᤕᤜᤘᤣ ᤍᤠᤱᤒᤠᤴ ᤐᤣᤗᤡ ᤑᤠᤰᤋᤢ॥ 13 ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠ᤺ᤸᤗᤧ ᤐᤣᤗᤡ ᤑᤠᤰᤋᤢᤒᤠᤴ ᤂᤧᤵᤛᤢ ᤜᤧᤰᤁᤩᤠᤱ ᤜᤡᤶᤜᤡᤶ. ᤗᤰᤂᤢᤶ ᤏᤢ ᤐᤩᤠᤱᤛᤡ ᤀᤡᤰᤋᤠᤵᤜᤠ᤹ᤀᤥ ᤁᤧᤘᤠ᤹ᤒᤠ ᤐᤧᤍ᤺ᤰᤜᤠ᤹ ᤜᤷᤃᤢᤵ ᤔᤧᤛᤩᤧ॥ 14 ᤂᤧᤴ ᤁᤧᤛᤡᤒᤠ ᤐᤧᤍ᤺ᤰᤜᤠ᤹ ᤔᤡᤛᤪᤡᤜᤠ᤹ᤖᤧ ᤔᤧᤓᤢᤰᤂᤢᤛᤡᤀᤠᤱ ᤔᤧᤗᤢᤵᤛᤢᤛᤡ ᤜᤧᤰᤁᤩᤠᤱ ᤗᤠᤈᤣ᤺ᤴᤏᤣ ᤏᤠᤶᤛᤢᤔᤠ ᤜᤣ᤺ᤰᤋᤧ॥ 15 ᤀᤠᤸᤗ ᤜᤠᤱᤅᤡᤸᤗᤧ ᤐᤧᤍ᤺ᤰᤜᤠ᤹ ᤔᤧᤛᤩᤧᤒᤠ ᤏᤡᤛᤢᤀᤠᤱ ᤕᤜᤘᤣ ᤍᤠᤱᤒᤠᤸᤗᤧ ᤐᤠ᤺ᤳᤋᤢᤒᤠ ᤜᤧᤰᤁᤣᤀᤣ ᤁᤢᤏᤡᤱᤘᤠ᤹ᤀᤥ ᤜᤠᤍᤡᤱ ᤌᤰᤔᤠ ᤜᤣ᤺ᤰᤋᤧ ᤜᤧᤰᤁᤩᤠᤱ ᤔᤥᤛᤠᤴ ᤏᤢ ᤜᤠᤖᤢᤏᤧᤸᤗᤧ ᤂᤢᤴᤇᤡ᤹ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤴᤗᤥ॥ ᤕᤠᤱᤏᤠᤜᤠ᤹ᤗᤠᤶ ᤔᤡᤱᤍᤣ᤹ ᤐᤥᤃᤧ 16 ᤕᤠᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤜᤠᤖᤢᤏᤧᤴ ᤔᤧᤳᤋᤧ᤹. ᤂᤢᤏᤧ᤹ ᤁᤢᤍᤰᤁᤠ᤺ᤳᤋᤡᤸᤗᤧ ᤂᤠᤶᤒᤠᤱᤅᤡᤴ ᤜᤡᤵᤋᤢᤖ ᤜᤧᤰᤁᤩᤠᤱ ᤔᤡᤛᤪ ᤗᤠᤈᤣ᤹ ᤁᤧᤖᤧᤰᤐᤠ ᤂᤠᤶᤜᤡ᤺ᤰᤜᤠ᤹ ᤕᤠᤱᤏᤠ ᤔᤢᤈᤡᤰ ᤔᤧᤒᤥᤱᤗ॥” 17 ᤂᤢᤴᤇᤡ᤹ ᤜᤧᤰᤁᤣᤀᤣ ᤆᤥᤃᤧᤳᤇᤢ॥ ᤜᤠᤖᤢᤏᤧᤸᤗᤧ ᤋᤰᤁᤠ᤺ᤳᤋᤡᤴ ᤕᤠᤱᤛᤡᤱᤅᤠᤱ ᤁᤢᤜᤢᤰᤁᤡᤴ ᤛᤴᤇᤢ ᤜᤧᤰᤁᤩᤠᤱ ᤂᤠᤶᤒᤠᤱᤅᤥᤒᤠ ᤂᤠᤶᤜᤡ᤺ᤰᤁᤡᤴ ᤜᤡᤵᤋᤢ. ᤂᤧᤒᤩᤠᤱ ᤔᤏᤠᤜᤠ᤹ᤀᤥ ᤏᤢ ᤌᤰᤛᤠᤜᤠ᤹ᤀᤥ ᤕᤠᤱᤏᤠ ᤔᤢᤈᤡᤰᤜᤠ᤹ ᤔᤧᤈᤢᤰᤋᤧ॥ ᤔᤡᤛᤪ ᤗᤠᤈᤣ᤹ ᤁᤧᤖᤧᤰᤐᤠ ᤂᤠᤶᤜᤡ᤺ᤰᤜᤠ᤹ ᤕᤠᤱᤏᤠᤀᤣ ᤕᤠᤱᤏᤠ ᤔᤢᤈᤡᤰ ᤔᤧᤒᤥ᤺ᤰᤂᤧ॥ 18 ᤑᤠᤖᤥᤸᤗᤧ ᤁᤢᤃᤡᤳᤆᤠᤰ ᤁᤧᤈᤥ᤺ᤰᤐᤠᤜᤠ᤹ᤖᤧᤀᤠᤱ ᤔᤡᤰᤗᤧᤱᤔᤠᤗᤠᤶ ᤕᤠᤱᤏᤠᤜᤠ᤹ ᤋᤠ᤺ᤵᤔᤠ ᤔᤧᤃᤥ᤺ᤳᤋᤢᤛᤡ. ᤁᤖ ᤔᤧᤴᤇᤢᤰᤋᤢᤴ॥ ᤔᤏᤠᤜᤠ᤹ᤀᤥ ᤏᤢ ᤌᤰᤛᤠᤜᤠ᤹ᤀᤥ ᤕᤠᤱᤏᤠᤜᤠ᤹ ᤀᤠᤶᤓᤠ ᤔᤧᤒᤳᤇᤧ॥ 19 ᤜᤧᤰᤁᤩᤠᤱ ᤁᤡᤳᤆᤠᤰᤜᤠ᤹ᤖᤧ ᤜᤠᤱᤅᤡᤴ ᤔᤧᤔᤧᤳᤋᤢ. “ᤁᤴ ᤕᤠ᤺ᤶᤒᤰᤁᤡᤱᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤆᤥᤃᤢᤒᤠᤖᤥ᥄” ᤁᤖ ᤜᤠᤱᤅᤡᤴ ᤜᤠᤒᤠ ᤜᤠᤍᤡᤱ ᤌᤰᤋᤧᤀᤠᤱ ᤕᤢᤅᤧ ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤐᤠ᤺ᤳᤋᤢᤒᤠ ᤜᤧᤰᤁᤣ ᤔᤥᤛᤠᤴ ᤏᤢ ᤜᤠᤖᤢᤏᤧᤸᤗᤧ ᤂᤢᤴᤇᤡ᤹ ᤐᤠ᤺ᤴᤏᤡᤴ ᤂᤧᤶᤔᤠ ᤔᤧᤍᤧᤴᤍᤧᤴᤗᤥ॥ ᤛᤡᤈᤠᤜᤠ᤹ᤗᤠᤶ ᤔᤡᤱᤍᤣ᤹ ᤐᤥᤃᤧ 20 ᤕᤠᤶᤔᤥ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠᤴ ᤔᤧᤳᤋᤢ. “ᤋᤠ᤺ᤴᤍᤡᤰ ᤋᤠᤏᤠᤶᤛᤠ ᤐᤥ᤺ᤰᤁᤠᤱ ᤜᤠᤱᤅᤡᤴ ᤘᤜ᤺ᤱᤅᤥ ᤐᤣ᤺ᤰᤁᤡᤸᤗᤧ ᤂᤢᤏᤧ᤹ ᤋᤢᤔᤧᤀᤠᤱ ᤔᤧᤳᤋᤧ᤹. ‘ᤕᤜᤘᤣ ᤍᤠᤱᤒᤧᤸᤗᤧ ᤀᤰᤂᤣ ᤐᤠ᤺ᤳᤋᤢ. ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤐᤣ᤺ᤰᤔᤠ ᤑᤠ᤺ᤰᤋᤧᤛᤧ᤹ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤀᤠᤱᤃᤠ᤹ ᤔᤠᤱᤛᤧᤘᤠ ᤔᤧᤔᤧᤳᤋᤠᤖ॥ 21 ᤀᤠᤱᤃᤠ᤹ ᤀᤠᤒᤠ᤺ᤴᤏᤡᤴ ᤂᤧᤶᤔᤠ ᤁᤧᤴᤍᤧᤴᤏᤧᤴᤏᤧᤓᤃᤪ ᤀᤠᤱᤃᤠ᤹ ᤂᤧᤏᤧ᤹ ᤁᤧᤜᤡᤶᤔᤥ. ᤂᤧᤏᤧ᤹ ᤁᤧᤛᤢᤜᤠᤱᤃᤧᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤔᤥ ᤏᤢ ᤁᤧᤔᤏᤠᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤔᤥ ᤛᤡᤈᤠᤜᤠ᤹ ᤐᤠᤱᤄᤢᤱ ᤋᤠᤛᤢᤱᤛᤡᤱᤅᤠᤱ ᤂᤧᤏᤧ᤹ ᤂᤢᤶᤍᤡᤱ ᤐᤡᤏᤧ॥ ᤔᤡᤛᤪᤒᤠᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤜᤠ᤹. ᤗᤠᤈᤣ᤹ ᤛᤡᤱᤒᤢᤱᤅᤡᤴ ᤁᤧᤖᤧᤰ ᤛᤡᤈᤠᤜᤠ᤹ᤖᤧ ᤛᤎᤧᤰ ᤋᤡᤶ᤹. ᤀᤠᤱᤃᤠ᤹ ᤐᤠ᤺ᤳᤋᤢᤱᤒᤠ ᤁᤴ ᤛᤠᤶᤍᤡᤱ ᤐᤠ᤺ᤴᤏᤡᤴ ᤂᤧᤵᤛᤧ᤹॥ 22 “‘ᤁᤖ ᤀᤠᤱᤃᤠ᤹ ᤂᤧᤴ ᤕᤧᤴᤏᤥ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤔᤧᤕᤢᤱᤒᤠ ᤃᤥᤛᤣᤏ ᤗᤠᤈᤣ᤺ᤱᤃ ᤋᤠᤱᤛᤧ᤺ᤵᤋᤢᤱ ᤜᤧᤰᤁᤩᤠᤱ ᤂᤧᤵᤔᤥ ᤛᤡᤈᤠᤜᤠ᤹ ᤔᤧᤴᤍᤠᤏᤧᤴ॥ ᤀᤠᤱᤃᤠ᤹ ᤜᤧᤰᤁᤣ ᤆᤥᤃᤢᤱ᤹ ᤜᤧᤰᤁᤩᤠᤱ ᤂᤧᤏᤧ᤹ ᤁᤧᤗᤠᤈᤣ᤹ᤀᤥ ᤀᤠᤱᤃᤠ᤹ ᤕᤜᤘᤣ ᤍᤠᤱᤒᤧᤸᤗᤧᤀᤣ ᤁᤴ ᤕᤠ᤺ᤶᤒᤰᤜᤠ᤹ ᤆᤥᤃᤢᤱᤗ ᤘᤠ᤹ᤀᤠ ᤑᤠ᤹ᤀᤠᤱ ᤂᤧᤏᤧ᤹ ᤁᤢᤛᤡᤱ ᤁᤧᤏᤡ᤺ᤳᤋᤢ᤹॥ 23 ᤁᤶᤓᤗ᤹ᤖᤡᤰ ᤀᤠᤱᤃᤠ᤹ ᤀᤠᤔᤏᤠᤜᤠ᤹ ᤏᤢ ᤂᤧᤏᤧ᤹ ᤁᤧᤔᤏᤠᤜᤠ᤹ ᤀᤣ᤹ᤀᤣ ᤛᤧᤴᤍᤢᤱᤛᤡᤱ᤹॥ ᤁᤴ ᤏᤡᤱᤘᤠ᤹ ᤁᤧᤔᤠᤒᤠ ᤕᤠ᤺ᤶᤒᤰᤁᤡᤸᤗᤧ ᤔᤡᤰᤛᤣ᤺ᤴᤏᤡᤴ ᤋᤠ᤺ᤴᤍᤡᤰ ᤐᤥᤱ᤹॥’” 24 ᤜᤧᤰᤁᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤑᤠᤖᤥᤸᤗᤧ ᤁᤢᤜᤡᤶᤔᤥ ᤏᤢ ᤛᤢᤜᤠᤱᤃᤧᤶᤒᤠᤜᤠ᤹ᤖᤧ ᤂᤢᤴᤇᤡ᤹ ᤜᤡᤶᤔᤥ ᤛᤡᤈᤠᤜᤠ᤹ ᤛᤠ᤹ᤖᤡᤰ ᤕᤖᤡᤰ ᤁᤢᤒᤴᤈᤩᤠᤱ ᤁᤢᤒᤴᤈᤩᤠᤱ ᤐᤠᤱᤄᤢ ᤋᤠᤛᤢᤛᤡ॥ ᤛᤡᤈᤠᤜᤠ᤹ᤖᤧ ᤔᤡᤛᤪ ᤗᤠᤈᤣ᤹ᤀᤥ ᤁᤧᤖᤧᤰ ᤛᤰᤔᤠ ᤜᤡ᤺ᤰᤜᤡ᤺ᤰ ᤔᤧᤔᤧᤳᤋᤢ॥ 25 ᤂᤧᤒᤩᤠᤱ ᤑᤠᤖᤥᤸᤗᤧ ᤔᤥᤛᤠᤴ ᤏᤢ ᤜᤠᤖᤢᤏᤧᤴ ᤀᤢ᤺ᤳᤋᤢᤛᤡᤀᤠᤱ ᤔᤧᤳᤋᤢᤛᤡ. “ᤂᤧᤏᤡ᤹ ᤐᤣᤃᤧᤶᤔᤧ᤹ ᤁᤖ ᤜᤠᤒᤠ ᤁᤴ ᤗᤠᤈᤣ᤹ᤀᤥ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤥ ᤛᤡᤍᤢᤱᤈᤓᤠ ᤋᤥ᤺ᤴᤍᤧᤶᤔᤧ᤹॥” 26 ᤁᤖ ᤔᤥᤛᤠ᤺ᤸᤗᤧ ᤔᤧᤳᤋᤢ. “ᤜᤧᤰᤁᤣ ᤆᤥ᤺ᤰᤔᤠ ᤏᤢᤒᤠ ᤔᤧᤒᤥᤱᤏᤧᤴ ᤌᤣᤀᤠᤱᤓᤧᤸᤗᤧ ᤀᤠᤏᤡᤃᤣ ᤏᤡᤱᤘᤠ᤹ᤑᤢᤔᤠᤱ ᤕᤜᤘᤣ ᤍᤠᤱᤒᤠᤀᤥ ᤌᤰᤛᤠᤜᤠ᤹ ᤘᤕᤠᤃᤧᤴ ᤛᤡᤍᤢᤱᤈᤓᤠ ᤋᤥ᤺ᤶᤔᤠᤛᤡ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤔᤡᤛᤪᤡᤜᤠ᤹ ᤂᤢᤴᤇᤡ᤹ ᤕᤠ᤺ᤰᤗᤧ᤹॥ ᤔᤡᤛᤪᤡᤜᤠ᤹ᤖᤧ ᤂᤢᤴᤇᤡ᤹ ᤔᤡᤰ ᤋᤃᤡ ᤀᤠᤏᤡᤃᤣ ᤁᤴ ᤌᤰᤛᤠᤜᤠ᤹ ᤛᤡᤍᤢᤱᤈᤓᤠ ᤋᤥ᤺ᤶᤔᤠ ᤜᤧ᤺ᤰᤋᤢᤶᤛᤡᤒᤧᤸᤗᤧ ᤂᤧᤱᤜᤠ᤹ᤖᤧ ᤀᤠᤏᤡᤃᤣ ᤗᤢᤱᤅᤡᤸᤗᤧ ᤔᤧᤒ᤺ᤳᤋᤡᤃᤧ ᤔᤧᤛᤩᤧᤖᤡᤃᤧ॥ 27 ᤀᤠᤏᤡᤃᤣ ᤛᤢᤶᤕᤠᤴᤒᤠ ᤗᤠᤶ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤐᤣᤃᤡᤃᤧᤀᤠᤱ ᤂᤧᤵᤔᤥ ᤀᤠᤏᤡᤃᤣ ᤕᤜᤘᤣ ᤍᤠᤱᤒᤠᤀᤥ ᤛᤡᤍᤢᤱᤈᤓᤠ ᤋᤥ᤺ᤶᤍᤢᤶᤒᤧ ᤂᤢᤏᤧ᤹ ᤀᤠᤏᤡᤃᤣ ᤜᤧᤰᤋᤱᤒᤠᤀᤣ ᤀᤡᤱᤈᤠᤱ ᤐᤡᤖᤡᤃᤧᤀᤠᤱ ᤘᤕᤡᤃᤧ॥” 28 ᤑᤠᤖᤥᤸᤗᤧ ᤔᤧᤳᤋᤢᤛᤡ. “ᤂᤡᤏᤡ᤹ ᤛᤠ᤹ᤖᤡᤰ ᤔᤠ᤺ᤱᤗᤡᤰ ᤁᤧᤶᤒᤣᤃᤡᤴᤏᤧᤓᤃᤪ ᤔᤢᤖᤧᤰ ᤂᤠᤖᤧᤰ ᤌᤣᤀᤠᤱ ᤁᤧᤜᤥᤵᤐᤠᤍᤧᤴᤏᤥ ᤂᤡᤏᤡ᤹ ᤐᤣ᤺ᤰᤔᤠᤀᤠᤱ ᤕᤜᤘᤣ ᤍᤠᤱᤒᤠ ᤂᤡᤏᤡ᤹ ᤏᤡᤱᤘᤠ᤹ᤑᤢᤔᤠᤱᤅᤥ ᤛᤡᤍᤢᤱᤈᤓᤠ ᤋᤥ᤺ᤶᤔᤠ ᤑᤠ᤺ᤰᤏᤡᤱ᤹॥ ᤀᤠᤱᤃᤠ᤹ ᤀᤠᤗᤠᤃᤡᤀᤠᤱ ᤐᤣᤗᤡ ᤑᤠᤰᤋᤠᤶ ᤀᤠᤒᤡᤖᤧᤶᤔᤧ᤹॥” 29 ᤔᤥᤛᤠ᤺ᤸᤗᤧ ᤔᤧᤳᤋᤢ. “ᤀᤠᤱᤃᤠ᤹ ᤁᤵᤔᤥᤗᤠᤶᤒᤠ ᤐᤣ᤺ᤰᤁᤠᤏᤢᤔᤧ᤺ᤴᤏᤣ. ᤂᤧᤏᤧ᤹ ᤏᤢ ᤂᤧᤏᤧ᤹ ᤁᤧᤛᤢᤜᤠᤱᤃᤧᤶᤒᤠᤜᤠ᤹ ᤜᤧᤰᤁᤩᤠᤱ ᤁᤧᤔᤏᤠᤜᤠ᤹ᤗᤠᤶ ᤋᤠ᤺ᤴᤍᤡᤰᤛᤠ ᤛᤡᤈᤠ ᤐᤴᤈᤩᤠᤱᤔᤠᤜᤠ᤹ ᤔᤧᤔᤠᤖ ᤑᤠ᤹ᤀᤠᤱ ᤀᤠᤱᤃᤠ᤹ ᤐᤣᤗᤡᤃᤧᤴ ᤋᤢᤘᤠ ᤆᤥᤃᤢᤱ᤹॥ ᤁᤖ ᤕᤜᤘᤣ ᤍᤠᤱᤒᤠᤀᤥ ᤛᤡᤍᤢᤱᤈᤓᤠ ᤋᤥ᤺ᤴᤇᤧ ᤐᤣ᤺ᤰᤔᤠᤖᤧ ᤗᤠᤃᤡ ᤕᤠᤵᤔᤡ ᤔᤧᤛᤠᤰᤋᤧᤴᤏᤧᤀᤠᤱ ᤕᤠᤶᤔᤥ ᤀᤡᤱᤗᤧᤰ ᤔᤧᤈᤥᤃᤧᤴᤏᤧ᤹॥” 30 ᤂᤧᤒᤩᤠᤱ ᤔᤥᤛᤠᤴ ᤑᤠᤖᤥ᤺ᤴᤏᤢ ᤛᤧᤖᤧᤀᤠᤱ ᤗᤠ᤺ᤰᤁᤠᤳ ᤐᤣ ᤜᤧᤰᤁᤩᤠᤱ ᤛᤡᤈᤠᤜᤠ᤹ ᤔᤧᤔᤠᤖ ᤑᤠ᤹ᤀᤠᤱ ᤕᤜᤘᤣ ᤍᤠᤱᤒᤠᤴ ᤐᤣᤗᤡ ᤑᤠᤰᤋᤢ॥ 31 ᤂᤶᤓᤩᤠᤱ ᤕᤜᤘᤣ ᤍᤠᤱᤒᤧᤸᤗᤧ ᤔᤥᤛᤠ᤺ᤸᤗᤧ ᤁᤢᤒᤣᤗᤡᤴ ᤂᤧᤵᤛᤢ. ᤜᤧᤰᤁᤩᤠᤱ ᤑᤠᤖᤥᤴ ᤏᤢ ᤁᤢᤛᤢᤜᤠᤱᤃᤧᤶᤒᤠᤜᤠ᤹ ᤜᤧᤰᤁᤩᤠᤱ ᤂᤢᤏᤧ᤹ ᤁᤢᤔᤏᤠᤜᤠ᤹ᤀᤥᤗᤠᤶ ᤛᤡᤈᤠ᤺ᤸᤗᤧ ᤁᤢᤒᤴᤈᤩᤠᤱᤔᤠᤜᤠ᤹ ᤗᤳᤇᤠᤀᤠᤱ ᤔᤣ᤺ᤴᤏᤣ ᤔᤧᤔᤕᤧ॥ 32 ᤁᤖ ᤕᤠᤶᤔᤥᤀᤠᤱ ᤜᤠᤱᤅᤡᤴ ᤜᤠᤍᤡᤱ ᤁᤧᤎᤰᤐᤠ ᤐᤥ᤺ᤰᤂᤧ ᤜᤧᤰᤁᤩᤠᤱ ᤕᤠᤶᤔᤥᤀᤠᤱ ᤀᤡᤛᤪᤠᤀᤡᤗᤡᤜᤠ᤹ ᤐᤣ᤺ᤰᤔᤠ ᤔᤧᤓᤠ᤺ᤰᤋᤢᤛᤡᤴᤗᤥ॥ |
© 2009, 2023, Wycliffe Bible Translators, Inc. All rights reserved.
Wycliffe Bible Translators, Inc.